yylyl's Profile

店舖位於商場外圍，必須走出商場沿外圍走方可到達。店內位置不多，但乾淨衛生。食物份量一般，男生可能不夠飽，可能對越式食品沒有多大愛好，只覺得味道就不過不失吧，如果不用等位，可以一試。…Read More

餐廳出名成日爆滿，好奇係咪真係咁好食，所以夜晚去試下。一入到去，基本上無訂位好難有位，餐廳的價位唔算平，半隻雞要$188，打邊爐配料按碟計，埋單起碼人均過$200。點單後伙記會幫你炒雞煲，份量唔多，勝在味道好食。配料一分錢一分貨，新鮮，但價錢唔平，一份牛肉過$150, 一份豬肉接受$100。…Read More

午市時間去，見$40就有一碗三寶河，幾化算就叫一碗。鋪頭細，座位同人手唔多，有時會無人執枱。粉麵的份量夠，料都多，牛肚，牛筋同牛腩都入味，但牛腩有點兒碎，而且湯底好淡。…Read More

餐廳坐得舒服，唔會太迫，望落都乾淨企理。平日晚上等位時間唔算太耐。一坐低會俾個QR code 你自己落單，如果想人手落單，侍應都會幫手。食物質素一貫沙嗲王水平，白咖喱豬扒蛋包飯豬扒厚切，亦炸得香脆，白咖喱唔辣，易入口；沙嗲香茅豬扒烏冬沙嗲食到花生香，香茅豬扒肉質唔韌，食到香茅味。越式春卷就感覺一般，唔太特別。如果食量大或者人多，其實叫套餐會經濟d，2人餐連加一約300蚊左右，包2個主食加小食及飲品，但選擇會比散叫少。…Read More

以賣咖啡為主打嘅小店，咖啡之前試過ok, 但食物質素一般，長通粉份量唔多，味道偏淡，配飲品要加價，一個lunch閒閒地都超過$60，行遠少少去附近商場會有更多選擇。…Read More

中央廣場外圍的一間小清新cafe, 平日有午餐供應，可以點一個主菜加指定飲品，例如花茶，美式咖啡等。cafe內的座位不多，裝修令人感覺很舒服。點餐需要自己到收銀處點餐付款，食品即叫即製，要給一點耐性 。午餐時間去到，沒有點他們的招牌窩夫，點了一個鴨粒蔥油拌烏冬加花茶。本身不是愛飲茶的人，感覺杯花茶同普通暖水分別不大。鴨肉蔥油拌烏冬味道偏日式醬油風，拌開蛋黃後蛋汁包裹著烏冬，令烏冬的口感更加滑溜。鴨肉切成細粒，不會煮得太柴，入口沒有羶味。餐點整體不錯，加上餐廳的環境舒服，如果下次經過可能都會再試。…Read More

街坊茶餐廳，價錢正常，味道同份量不過不失，餐飲加3蚊可以要枝裝維他奶。坐得舒服，侍應態度可以接受，不會特別主動，但又未致於見你唔到。但真的不要叫鐵板餐，之前試過1個鐘都未上菜。…Read More

名店車仔麵，價錢上真係名店，但食物質素同服務就普通平民車仔麵水準。份量少之餘，河粉係碎到要用匙食；冬菇得兩粒，仲要大個粒中間煮唔淋；豬頸肉煮得淋，但長期暴露係空氣中，見職員夾嘅時候乾到黏住個盤，是旦扯一塊大剪幾塊細俾你就算；要幾多沙嗲汁，咖哩汁或其他醬汁其實落單時講唔講無分別，職員會按佢標準俾你。…Read More

餐廳的位置不太顯眼，但一入到去就見到枱面有貓貓嘅相片牆上即有不同的卡通貓畫，而且衛生情況可以，見職員每次食客埋單後都會消毒張枱，加上座位唔會太迫，感覺好舒服。職員好有禮貌，都幾親切。餐廳嘅餐點價錢公道，份量正常，上枱時擺放得好整齊，賣相吸引。吉列豬扒唔咸，唔會炸到好乾；地獄湯拉麵唔算辣，拉麵麵質正常，唔會太糊。整體來說，呢間係一間有心做嘅小店，人手唔會好多，但基本服務同衛生會做足，餐點味道唔突出，但以$5x~$6x嘅定價嚟講，絕對合理公道。…Read More

平日晚上去食，好彩等左幾張飛就入到去。可能都係開左唔太長時間嘅關係，裝修擺設全部都好新淨，座位亦唔算迫。叫左担担麵，生煎包同黃金魚塊。全部好快上菜，担担麵花生味唔夠，叫嘅時候侍應講左上菜時一定會剪麵，但上菜時好似無剪。生蒸包上菜時熱辣辣的，咬開有微燙口嘅湯汁，但包皮比較厚。黃金魚塊份量多，喜歡咸旦黃味嘅會喜歡，但個人感覺一般。成餐飯食完唔會覺得唔值，但要等位又唔會覺得想等，就普通一間餐廳，無特別想再去嘅感覺。…Read More

平日喺尖沙咀30幾蚊可以食到一個下午茶，仲要份量都ok，有沙嗲牛麵+魚片頭連汽水，味道又唔差，抵食過某d連鎖米線舖。而且座位都唔會好窄好迫，只係人手唔係好夠，收銀排長龍。…Read More

無論食物同服務都越做越差。點心水準不穩定都算，無人等位，有幾張4人吉枱，入面都有2人客坐緊4人枱，但侍應就一句無2人枱就要個客等1個鐘，咁入面d坐緊4人枱的2人客又點解入得呢？入到去食點心火鍋，收人$10醬料費但自助吧連無蒜蓉都無人理，真係自助到連蒜蓉都要自備嗎？醬料只包豉油嗎？點心仲要一籠得3粒，叫多一籠食唔哂又浪費。雞煲叫左一隻雞，但上菜應該份量無一隻。食左雞煲叫侍應加湯亦都係叫幾次先有人應，真係咁忙嗎？飲品區的選擇唔多，飲管全部都無紙袋獨立包裝，個個都掂過哂d飲管，真係唔敢用。…Read More

餐廳外觀走文青風格，入面都坐得舒服。招牌牛肉麵賣相靚，適合打咭，而且肉量多，食肉獸會喜歡；但個麵同湯感覺一般，不會有再叫的意欲。反而安格斯滷肉飯真係好食，食到牛肉塊之餘，個飯甜甜地，又有少少濕潤。想個飯再濕潤少少可以叫廚房將個熟蛋改做半熟蛋。蝦餅炸得乾身，不太油，有少許彈牙感覺。飲品方面推介他們的水果茶，大杯而且味道唔差，打咭一流。順帶一提，他們的服務是有點飄忽的，有時去到有枝水放係枱俾你自己，有時就無；有時搵侍應叫極都無人理你，有時就好熱情。…Read More

係food court見好多人食呢間，就去試下。個花甲粉香就真係好香，個賣相好啱打咭，但朋友話叫左微辣都好辣，而且d花甲真係好細粒。燒生蠔無咩特別，試一次就可以了。…Read More

去天后staycation，下午經過見到價值都幾公道已經想試，晚上就直接買嚟食。店家嘅食物全部即叫即做，店家會同你講清楚大約要等多久，自己預計時間回來取就可以了。可能平日嘅關係，5-10分鐘就攞到餐盒。餐盒以一個好靚嘅保溫袋裝著，返到酒店個餐盒仲暖。打開餐盒，飯量頗多，女仔可能會食唔哂，而且不是白飯，好味。沾串燒嘅花生醬有花生碎，可以選擇辣定唔辣，甜甜地好惹味。串燒可以揀豬牛雞，唔會燒得太乾，不沾醬都有味道。…Read More