dorrchan's Profile

上次匆忙經過未有幫襯，見到每枱都食緊酸辣魚煱，望落好似好好味咁。今次尊程嚟，雖然本身唔太喜愛食淡水魚，但都一試。魚煱可選鯇魚片或鯇魚腩，由唔辣至大辣，我哋要鯇魚腩小辣，但都覺幾辣，因個煱一路食一路加熱。嘩 ! 一試，原來個湯至係個精髓，鯇魚腩好滑好新鮮，配菜有埋酸菜、酸瓜、牙菜、九菜等，好好味。另外加咗: 雞件、炸腐竹、菜、鮮牛栢葉、鮮鵝腸等…尤其個新鮮鵝腸，淥一陣，入口好爽。佢個生炒骨個味道好正，唯獨D排骨用咗一字排，又切細粒，所以冇咩肉食，希望大厨下次用d肉排啦 !呢度白飯係用細木盆上，因每碗都係蒸㗎，粒粒分明，個個都好鍾意。其實，大熱天時食火煱幾辛苦吓，又星期五晚超多人。所以，下次會揀平日同涼D天氣再去食。*** 好想讚吓全晚個侍應姐姐仔，熱情招呼又好好態度，食得都開心D。…Read More

見到網購話係酒店式泰式自助餐，價錢只係$108+$29服務費，諗都唔諗就買咗3張，仲要係優惠開始第一日買，同日去食。(當日由朝早打電話去訂位，但一直唔通，直到下午3:15至通……離哂譜囉 !？)但都可以訂到即日食。:(食5:30-7:30, 準時到達，但餐廳竟然仍然準備中，侍應仲施施然擺緊嘢，等咗約10分鐘至有得食！首先，所有碟都係用細碟，係平時墊住茶杯嗰種，感覺好怪、好核突、好唔慣，乜咁都叫酒店式咩？:(由於只包一杯飲品，所以一開始就有張飲品 list 紙同筆擺喺枱，比你點咗先，如要再添飲品就要另計。~泰式青檸梳打 : 太甜，仲係飲咗頭一啖，就見到有蚊螆，要換另一杯，但侍應已不悦……:(~柚子梳打 : 依然超甜 ! 冇繼續飲啦。(又唔循例比杯水D客人，好難頂!):(佢哋嘅食物仲難頂呀 ! 雖然話係一路食一路出爐，但實在唔好食。(唔明點解前面有一連6篇但只有2位食家寫嘅短食評，仲係有位一日寫2篇，對其讚不絕口囉!)~炸蝦餅 : 啱啱炸起，以為正嘢？跟相片相差甚遠 .... 原來係街市現成泰國造急凍蝦餅，冇乜味之餘，蝦餅扁扁平平型狀咁, 仲冇口感，太淋， 好差!:(~煎蠔餅 : 蛋多過蠔仔，唔夠蠔味。~甜酸魚柳: 咪又係用D急凍越南鯰魚，冇試。~沙律： 泰式鳳爪，粉絲沙律等, 味道普通，可以唔食。~冇炒貴刁，又冇濕炒河，只有炒金邊(粉)幼麵 : 好乾又冇味，難食。~青、紅咖喱雞、牛 : 味道一般，但只用細碟仔盛載，想食D飯加D咖喱汁，容易做到嗎？？？？？真討厭(¬_¬)~香葉包雞：樓上食家呀，講笑咩？又乾又硬…冇香味又冇肉味。~泰式春卷：差! 冇泰式感覺，只係超市急凍嘢，可能泰式係指個酸甜醬。~炒菜類：一般味道，還可以。~冬蔭功湯 : 冇料㗎 ! 你以為真係同相中咁 ?? 差天共地啦 ! 只有湯水, 咸+辣，好差!:(~海南雞飯 ：跟相片相差甚遠 !:( 途中只係斬一碟冰鮮熟雞連骨出嚟，(仲係只有一次咋!) 但行到去只見仲有幾件雞胸、雞頸等，仲有得食咩？~串燒 ：味道普通，我覺得街邊小販嘅味道好得多。~泰式生蝦： 唔夠凍㗎 ! 幸好D蝦夠新鮮，但就勁多蒜蓉同指天指，每夾一隻要撥走D料，否則太辣。甜品 ：~千層糕，嘩 ! 甜死人呀! 又冇椰汁味，更加冇班蘭葉味道，同個椰汁西米糕，一樣甜到漏喉，冇辦法，全部投哂降啦 !~見有芒菓糯米飯出，當然跟相片相差甚遠啦 ! 但行到去已排哂隊拎，仲係人人都夾哂D芒菓同有椰汁部份，輪到時只得番些少糯米？？？想話等佢出第二輪，點知等極都冇(︶︹︺)，不知所謂!~生果 : 西瓜唔係好甜，但都只拎得2塊，之後又冇再出，真係好小家!*由於餐廳每次出食物數量都好少，所以好似爭食咁，可悲 ! *食過咁多自助餐，好耐都未遇過咁差，當倒霉啦!**** 網上見登出食物圖片相當精美，令人唾然，加上以抵食價錢去吸引讀者…，明白想招徠客人，但都奉勸一句，想要留住客人，就必要留住客人嘅心先囉 ! …Read More

一般有供應生蠔嘅自助餐都會貴D，但又未必夠新鮮，除咗大多數要排隊配給外，仲好多時食到滿口沙！每逢星期二晚，山頂呢間Cafe Deco都會有自助晚餐，每位$438加一，餐飲只有一杯，如任飲果汁等，需另付每位$120加一。但就冇任何包括信用咭優惠喇！個幾星期前已訂位，並要求窗口位。終於，嚟到啦！餐廳位置好正，坐落就望到成個夜景。嘩！超正！仲可以走出去露台行吓影吓相，成個人心情即時靚到痺！但最估唔到生蠔係主角，好新鮮好肥美，仲不斷一盆一盆咁出，任你拎任你食，又何來需要排隊呢？其中有一幕：我見到厨師正拎出嚟一大盆生蠔，有位客人即時話想要一打，厨師就馬上遞過去，仲好有禮貌添！接近完場都仲會出比你呀！話雖如比，生蠔又點可以一次食得太多喎！其他食物都係唔錯：~三文魚生同樣好新鮮，同樣任食任拎。~熟蝦，竟然好鮮甜又彈牙！龍蝦仔及青口就冇食到。~Parma ham配蜜瓜，蜜瓜好甜，真係好好食。~水牛芝士伴蕃茄，嚿芝士仲係切大嚿呈半圓型，真係第一次食到咁正！~批都有好幾款，但只記得菠菜批，好食。~芝士，有多款。~湯：只有磨菇湯一款，但好濃好味道。~迷你和牛漢堡，正！~仲有燒牛肉, 但就唔見有鵝肝。~熟食款色唔多，印象中有炒雜菜，炸魚，咖喱雞、牛，羊等，配薄餅及印度米雜色飯。~甜品：法式焦糖燉蛋，有原味及綠茶，好正！。芒果布甸丶熱情果布甸杯，佈滿芒果、熱情果蓉，正！仲有其他多款芝士餅等，都好好食。~雪糕：Movenpick*總括來講，食物款色唔算好多，但每款都好精緻及用心炮製，最重要係餐廳不間斷咁供應比客人，超讚！ …Read More

算一算，都有一年幾未有寫食評啦！原因某次睇到别人某些食評時，好似完全將事實顛倒咁，因我都曾經光顧，該店食物顯然價格超貴兼水平一般，但偏偏食評對其讚不絕口，頓然覺得好沮喪兼無乜意義再寫....但今日為咗食石澗食到一肚氣，不得不再執筆，將怨氣宣洩！由於睇到OpenRice食評，對大埔呢間石澗好評如潮，於是喺一月某晚九點曾到光顧，可能我哋當日單點每款食物，並唔係封頂價，所以每款食物都似樣，而且味道亦可，所以，一見到有放題團購，就冇考慮咁馬上買咗幾張券。我哋訂咗年初七食5:00-7:00pm，於是下午4:50pm已到達。可能時間尚早，當日連同我哋幾個及其他顧客到達，只係得兩張枱而已。雖然餐廳已開門，但仍然未開燈，只見一班侍應喺潻黑下睇緊電視，完全當外面嘅客人透明一樣...到咗5：05pm終於開著燈，但就冇人出嚟招呼？？？我哋仍然似透明人咁！於是一行成十人自己行入去，要叫D侍應生至識埋嚟呀！好啦，因團購寫明係限2小時放題，並訂明於結束半小時前係最後落單，所以馬上入紙落單。點知？等到5：43pm仲未有食物上枱，餓死我哋啦！望一望厨房？D師傅/侍應全部都係停哂手周圍望或睇電視，完全好似拖慢嚟咁....不知所謂！好嬲呀！第一次食放題...........終於有嘢上枱啦！嘩！！四個人坐喺度，只嚟得2小豉油碟，其中一碟醬汁豬軟骨似嘔吐物咁，望見都唔想食！另外4小粒味噌牛舌，唔入味，又靭，難食！鐵板牛舌，未夠熟，好靱！鐵板帆立貝，勁雪味，完全冇味道！勁差!!! ****突然覺得好似乞食咁呀！****好後悔光顧，但終於領略到大部份人都有嘅放題經歷囉！後來，刺身等食物都陸續奉上，但每次總會減少我哋人紙時數量。...我哋有我哋剔食物數量，但石澗就求求其其，勁討厭！最後更不斷有心漏單，追極都唔啋你！仲有，餐單明明有雪米糍，但上次、今次都話冇貨到喎！雪糕又只得3、4款雀巢咋，仲要雪到硬過石頭，用匙刮極都刮唔到，又點可以食多1杯呢？太過份！太過份！埋單前，我哋都唔想再追單，只係話：只想點嘅8片燒菠蘿到，然後食埋就走人！果然！馬上遞上！***其實，計一計四人放題總價錢，真係完全可以去元氣或其他餐廳，食一餐舒舒服服又開心嘅晚餐，今次真係蠢!!!!!~我發誓！以後唔會再食所謂放題！就算貴D，都只會食自助餐囉！對我而言，要食得開心，食物係其次，服務態度至最重要！***等待食物上枱初時，曾問過D侍應生是否團購價待遇有別？但冇一個有反應，最後佢哋走過去收銀柜枱，問個黑衫黑褲女收銀員，嘩！個身材矮小嘅中年女收銀員聽到後，雙眼怒啤向我哋張枱，然後一直怒視住行過嚟問有咩事？間餐廳睇唔見有任何經理在場，同上次一樣，得一班冇咩經驗嘅女侍應生，同一個外型瘦削稍熟手D嘅冇禮貌男侍應生。所以，好相信個黑衫黑褲女收銀員就係餐廳較高級員工！ …Read More

雖然今晚係大除夕，但聖誕期間食得太多啦，於是走去大圍，諗住求其揾d嘢食吓。點知？好多食肆都閂咗門，於是走咗去九龍城。去到九龍城，幾經辛苦至等到錶位。唔想又食泰國菜，咁去揾吓西餐。喺d門口望下d餐牌都幾貴，有d仲話要最低消費$250/位添！行到呢間東星餐廳門口，睇見晚餐價錢都OK，同好快有個後生女侍應出嚟招呼，咁就呢間啦！* 叫咗2個是日晚餐 : 红酒燴牛脷配薯菜$78 & 法國鵝肝伴牛柳配意粉$128~義大利雜菜湯，同粟米忌廉湯，配埋塊牛油多士。2款湯嘅味道普通，仲唔夠熱。~红酒燴牛脷配薯菜 :有4塊牛脷，唔係太厚切，不過煎得幾好味，淋上红酒汁，味道係唔差，但份量偏少。薯菜係用薯蓉同椰菜、红蘿白，特别薯蓉好好味，每啖都係牛油同cream味道，好香好滑。~法國鵝肝伴牛柳配意粉 :1小薄片鵝肝喺頂部，要小心翼翼夾落嚟，但食唔到有乜味，都係太细片囉！牛柳話要七成熟，但食到中間太生啦，我諗得五成咋，但味道都唔錯。雖然配意粉，但都有一大球薯蓉+雜菜，反而意粉就得一細碟。*另外 : 芝士焗龍利柳配飯$78 加$20配餐湯同飲品, 再加$5轉即磨咖啡~塊龍利柳唔係好大嚿，但都好味，個碟都係有一大球薯蓉+雜菜, 就算食主菜唔飽，薯蓉都撑飽你啦！整體嚟講, 食物唔算太好味，而且餐廳裝修都頗舊, 不過，喺九龍城區而又係大除夕晚食到呢個價錢，都算唔錯啦！**最值得要讃嘅，係呢度嘅幾位女侍應，個個都好好禮貌同態度。 …Read More

只能用一個字形容呢間嘢，差╰_╯而家早晚温差大，夜晚特别寒，入到呢間燒扒屋, 唔期望你會馬上遞上杯熱茶，但都可以喺落單後要求整杯熱茶飲吓呱？？？一入到去，d侍應好似唔想做咁，個個乸口乸面，叫極都聽唔到咁:(:(:(...终於有一個肯過嚟。點知？唔知係個女侍應新嚟，定係餐廳規定.....我哋落完單後話想要3杯熱茶先，講咗3次，個侍應都好似好迷網咁！？ 之後,突然遞上3杯熱奶茶？?？咁奇怪嘅？點會未食飯就叫茶，仲係3個一樣奶茶？？:(:(咁我哋當然退貨啦，於是嚟料啦！個侍應退番3杯嘢去水吧，馬上比個呀嬸破口大駡:(，...乜乜要問清楚呀？ 呢度只有餐飲...乜乜咁要每杯另收費等等...大大聲愈鬧愈惡，同時雙眼啤住我哋，成個老板娘咁！！當時真係想即刻離開，但唔想食餐飯都咁唔開心啦，算！:(之後都搞咗10分鐘至遞上熱茶，但見個女侍應就頭都耷哂！惨！:(叫咗2個是日晚餐：焗海鮮飯$37連熱飲* 焗海鮮飯好夠熱，但冇乜料，只見少量鱿魚+越南鲶魚柳，味道好淡, 又唔夠汁, 愈食愈乾。另外西冷牛扒司華力腸配沙律$62連熱飲*雖然牛扒冇梳打味，但超细嚿:(，牛扒只係配角，2條司華力腸就似大主角，凈食2條腸都飽。冇諗過沙律入面冇薯仔，只係大量雪梨+少少罐頭雜果，無他....d薯仔仲貴過雪梨。***仲有，呢度d餐係冇跟餐湯同麵包。~因爲一路食一路嬲，冇諗住寫OpenRice ，所以冇影相，但到最後叫飲品，忍唔住啦！篤完杯熱檸檬茶，拎走d檸檬後, 嘩！睇到個杯完全係上手飲完冇洗過，好污漕好多漬, 就咁拎嚟冲檸檬茶比我飲？？？我仲飲咗1啖，真係火都嚟呀！！另外2杯係凍咖啡，所以就睇唔到有冇事啦!最後可以證實個水吧惡呀嬸=老板娘，因爲我哋仲有幾啖就食完時，佢已經行出嚟收嘢，仲叫我哋拎開d電話，因四人檯仲有一個空位比人客坐喎！真犀利！* 呢間餐廳地方已經唔大，檯同檯之間又窄，個個都要搭檯坐，價錢完全唔係平，冇服務加上個惡老板娘，真係貼錢買難受，咁仲點會再嚟呀？Sent from Yahoo Mail on Android …Read More

今晚去沙田和亭食晚餐，打電話去該店時，話就話冇位啦，但去到等咗45分鐘就有，比想像中快得多。從來我都覺得呢度嘅壽司比一般嘅壽司尊門店好味，所以今次都唔例外，叫咗2客三文魚壽司($88+$28)。清酒煮蜆($38)，冇乜清酒味，純粹過吓口癮，味道普通。蟹肉忌廉球($18)，熱辣辣，一咬落去蟹肉忌廉醬汁流出，好味，但太細件囉！仲有，伴碟嘅菜好唔新鮮添！炸蠔($38/4件)，熱辣辣仲好脆，不過粉醬較厚，食唔多到蠔味，而且，點蠔嘅醬太少，都唔夠點4件。和亭沙律($38)，今次份量真係太少啦！幾細片三文魚+少少生菜、洋蔥絲、1-2粒車厘茄、dd多水牛芝士粒..以往嚟食都唔覺佢大碟，但都唔使縮到咁細碟呱？3個人share到每人2啖咋！牛肉壽喜燒2人份量(大$88+追加烏冬$22)嘩！真係有d嚇親！本身個餐已經冇咩嘢食，仲唔包烏冬，算！於是加咗個所謂大烏冬($22)，嚟到一望，又係咁少？問一問侍應係咪搞錯呀？點知佢話已經係大啦，細嘅烏冬仲會少一半㗎！成個煱有2大碗雜菜，但唔夠新鮮，底部仲有大量黃牙白已經變色。有3樽湯汁，但係用得1 & 3/4 樽就夠哂！d牛肉最離譜，雖然好食但份量係超少！只係要讚佢嘅刀功一流！竟然切薄到一放入煱就黐住底，再轉身已夾唔番，完全黐喺煱底，於是唔敢再煎，全部用嚟火煱算數！上次食都唔會咁，再冇下次啦！好彩一開始叫咗個韓國泡菜豚肉飯 ($28)，都算有d嘢落肚！** 以前好鍾意嚟和民、和亭食嘢，因為對佢有信心，但今日已完全破滅啦！今次嘅食物質數真係差咗好多，各樣份量都偏少，以往都唔係咁，仲有，d地方又好污糟咁。雖然話今次食完有半數現金回贈，但下次嚟食都要諗一諗先囉！ …Read More

每次諗唔到食乜好？都會嚟八號餐廳 ，因為佢每次都能夠有保証，食物可以保持水準。大埔依家每逢公眾假期揾嘢食都幾難，到處人多不特止，商埸食肆滿座，揾位泊車亦一樣難。今個星期曰中午嚟到，雖然有泊車優惠，但停車埸已滿，唯有泊喺路邊博一博，因實在太肚餓啦! 等咗10分鐘就有位，入到去馬上落單，叫咗2個午餐+1個意粉餐。餐湯：雜菜湯=羅宋湯，味道好香好濃，夠牛肉味。忌廉湯，依然保持水準，好味。午餐:  鮮蝦冬蔭公炒烏冬~ 好鍾意呢度嘅炒粉麵，即炒熱辣辣，尤其加咗好多鮮菇一齊炒。今次d蝦特別多，冬蔭公味好香，雖然唔係用日本/韓國烏冬，但都好好味，唔錯！午餐: 椰皇燴雞配白飯~ 呢個飯就稍差咗少少，只有些少椰汁味嘅雞肉，仲係雞脾肉但連皮，味道一般啦。拿破倫意粉(茄汁、鮮蝦、火腿)~ 又係炒得好香，濃濃蕃茄醬加埋火腿、鮮蝦、仲有大量鮮菇，好正！***食完拿拿淋走人，幸好冇牛肉乾貼喺車頭(￣▽￣")…Read More

早年每次食元氣都覺得好好味，但近年就愈嚟愈差，仲一次難食過一次:(！今曰食下午茶餐~ 壽司：水準明顯差咗！ 炸薯餅：0K！ 炸魷魚：炸得太燶啦，咬落好乾好硬，味道苦㗎！◑︿◐好差！ 燉蛋：凍㗎？！差囉！ 凍烏冬：食落發覺冇冷麵汁嘅？？ 問侍應拎冷麵汁時，仲勞氣╰_╯！！！佢竟然話，幫我哋拎返嗰2碗烏冬去廚房加汁 ? 咁點知邊個食過邊碗呀？之後要我教咗好耐，至識得入廚房拎d冷麵汁出嚟，但就只拎得一碗汁:(:(，又冇附帶湯羹，搞到我哋倒過去碗烏冬時，d汁喺碗邊流出檯面，好鬼嬲呀！最離譜係其中一碗烏冬碎濕濕㗎，完全就係筲箕尾嗰堆碎麵囉！！咁都比得客人嘅？？？ 本來好想換，但間店d侍應嘅反應好唔掂，問樣樣都唔多識答，好似唔想做咁，所以放棄囉! 反正都冇哂胃口啦,最後放棄d食物，埋單走人！*** 相信以後都唔會再幫襯呢間元氣！:(…Read More

每次經過呢間金源餐廳，都總係坐滿人，可能佢嘅價錢較平d d，因為佢隔離係另外2間餐廳囉！ 今次就食吓佢嘅午餐！~豉椒排骨炒河$33，包例湯+凍飲加$1~ 即叫即炒，熱辣辣好夠鑊氣，份量都唔少，但排骨唔多，不過味道唔錯！~西蘭花蟹肉會伊麵$36，包例湯+凍飲加$1~ 賣相唔掂！只係大大pat蟹柳蓉+蛋白鋪面，冇咩味道，只覺咸咸哋，當然唔會有鮮味啦！差！*值得一讚係侍應呀叔同呀姐，動作反應快兼好禮貌！…Read More

最近發現，原來有好多朋友關注自己寫嘅OpenRice食評，難得係唔介意一篇篇既簡單、又不太細膩描繪食物嘅文字，竟然有人肯睇喎◑△◐？甚至有食評被推介添?真係令我受寵若驚呀 多謝，多謝哂\^o^/仲記得由舊年開始寫食評，因一次去譚仔三哥食米線，但未食已成肚氣，激氣之下，就想藉住OpenRice話比人知，該店如何嘅惡劣服務質素。之後，就習慣喺餐廳用膳後，寫低食評比人參考，當然，有時遇到食物同服務都唔錯嘅食肆，會故意去讚揚一吓。事實上，真係好佩服有好多人，能夠將食評寫得好詳盡，同描繪食物時好細緻，咁當然有A+啦！自問就未到呢個水平，更何況自己都唔係食家，加上工作好多時都較繁忙，咁唯有多d欣賞人哋 d A+靚食評啦！話雖如此，此終簡單到題嘅食評係我鍾意嘅表達模式，加揷相片就更提高趣味性啦！買咗團購套餐，到期日係十月十曰，於是趕快訂位食咗佢先。好耐冇嚟Pizza Hut食嘢啦，仲記得以前佢嘅份量唔係好多，感覺上唔太抵食囉！今次一入到嚟，原來又裝修過，好靚好光猛，但d檯就稍窄，而且同隔離張檯太貼，完全冇哂私隱，基本上好似同搭檯冇分別咁囉！咁啱隔離檯個女人不停口不停口又大聲講嘢，成餐飯都比佢轟炸到死咁滯！幸好兩個團購餐都唔錯，而且份量仲好夠添！1. 酥脆雞件伴瘋薯條($98)2. 波爾多濃湯牛肉鍋($168)每個餐都包2個湯+2杯汽水。粗薯條，好好味！ 炸雞好熱，外皮好鬆好脆，入面d雞肉又juicy，好正！凱撒沙津：羅馬生菜好嫩好新鮮，見唔到老菜葉，仲有煙肉粒同芝土粉伴香脆芝麻麵包條，太好味！(外面唔少嘅餐廳，都會加埋d深綠色老菜葉一齊㗎！)肉醬意粉：水準冇變，好味！蜆肉焗薯蓉：焗得好香好滑，好味！意大利沙律：羅馬生菜+車厘茄+黃椒+靑瓜+紫椰菜等 ... 伴香脆芝麻麵包條配黑醋汁，好味！牛肉鍋：份量真係唔少。牛肉鍋上檯時，本身已有唔少蔬菜喺煲入面，再煲一陣，等湯底稍為滾，就落埋杯紅酒，之後加埋其餘嘅蔬菜，等幾分鐘就可以食啦！ 大大嚿牛肉，雖然唔係太淋，但絕唔係韌，都唔係嚡口喎，好正！ 蔬菜有紅酒味，幾特別。 食到七七八八，最後就落埋杯芝士粉+珍珠米飯....嘩！真係好好食！＊今次嘅團購真係物超所值，仲冇加一！ 下次再有，一定唔可以錯過。 *用餐途中，有幾個相信係Pizza Hut嘅推廣員，其中一個叫我哋做咗份簡單嘅問卷調查，之後就送咗一張coupon比我哋(免費Pizza Hut一個)^_-…Read More

今次中午嚟食，竟然有套餐！ 其實價錢同散叫冇乜分別，只係多咗一件咖喱角(Samosa)，仲要set死要人飲芒果奶昔。不過，反正都想試吓件咖喱角，同飲吓杯芒果乳酸，就叫set 2同set 3啦！芒果奶昔(Mango Lassi) : 較甜，味道都0K！Samosa(咖喱角) : 成件炸得好熱，外皮好硬但脆，入面係咖喱雜菜，有洋蔥、薯仔、青豆等...味道一般，感覺仲好溜，唔明d印度人咁鍾意食嘅？！Salad (Roast Chicken)燒雞肉沙律 : 早知散叫啦！唔知係咪套餐嘅關係，竟然冇水牛芝士、水欖&紅黃椒！！ 燒雞肉又少，蕃茄&青瓜切薄片 ?(以前係切角㗎!) 仲要係用普通生菜代替羅馬生菜咋！！Biryani (Fried rice w/chicken)燒雞肉咖喱炒飯 : 份量好明顯少咗，味道0K，但d沙律都係差囉！◑︿◐*今次連d辣醬都好有問題，唔知點解..好似加咗d薄荷葯油味咁，一食落即刻想反胃，感覺好似d呀婆隻手搽咗風濕葯油攪辣椒醬咁囉←_←* 走時見到門口貼咗張紙，原來每星期三仲有自助晚餐，每位$98咋！…Read More

今日十月一日假期，諗住去西貢行吓，點知多人到呢？！揾極都冇位泊車，於是去陳福榮餅家買咗甜豬包同皮蛋酥就走啦！多年前嚟西貢，見到呢間陳福榮餅鋪，門口貼咗d雜誌篇幅介紹佢嘅甜豬包，見個樣又幾得意，於是一試，果然...愈食愈上癮，雖然係冇餡，但外皮硬硬哋似傳統嘅豬仔，包入面就非常柔軟，少少甜味，好味！之後每次嚟西貢，都必定買半打返屋企，但試過有幾次四、五點就賣哂囉！上一次買埋佢嘅皮蛋酥，點知食過之後念念不忘，因為佢嘅餡整得好好味，香滑有薑味，皮蛋約1/4隻，唔會太甜，仲好似有奶黃味添，外皮好酥有嚼口，正！…Read More

今時今日百物騰貴，有時用錢時，仲以為去咗泰國用緊泰幣咁，食個早餐都閒閒哋要$30幾，但呢間魚滑粥粉麵茶餐廳出名又平又好食，用$24就可以食到啦！當然，此終以呢個價錢，唔可以要求餐廳格局同食物質數太高啦！~ 一碗米/粉/麵/通+兩款餸配方包(轉多士加$1)+熱飲(凍飲加$1)沙爹牛肉通粉，份量好夠，多牛肉，沙爹味都唔錯，食埋份..夾起嚟足足係半份腿蛋治，飽哂！呢間魚滑粥粉麵茶餐廳喺大埔已經好多年，營業時間仲直至深夜3:00 am，有粥有粉麵，晚市仲有煲仔飯，所以，越夜都有人嚟幫襯，冬天仲好旺添呀！…Read More

多年前興起食盆菜時，傻更更試過去大家樂、大快活同埋美心，除咗買個盆菜，仲用乜乜優惠價買埋d拼盆小食、湯羹等，但每次都非常失望，三間嘅盆菜同佢哋嘅宣傳照都差天共地，貨不對辦仲成盆勁雪味，不但愈食愈出水，連其他食物都差到惨不忍睹！自此之後，好多年都唔敢再食盆菜。直至一次，去大尾督時見到呢間忠誠盆菜，望到好似幾似樣，而且一陣一陣香味傳出，特別佢嘅南乳炆豬肉味，於是又再食盆菜啦！ 仲記得當年第一次食 ，價錢係四佰幾(自取)一個(中)傳統盆菜，約7-8人食用。之後每年都有買，價錢亦一年一年調整。呢度有幾款盆菜 :盆菜皇/素盆菜/海味盆菜/一品盆菜/家鄉盆菜, 但家人只愛佢傳統風味嘅家鄉盆菜。 今次中秋又再幫襯，但已經賣$800(送貨要加一，自取依然九折) 味道仍然不變，份量都依然勁呀！***盆菜材料：干煎大蝦 / 傳統魚蛋 / 玫瑰油雞 / 五香糟鴨 / 酥炸斑肉 / 家鄉炆豬肉 / 紅炆北菇 / 爽脆魷魚 / 香滑豬皮 / 五香芋頭 / 南乳支竹 / 清甜蓮藕 / 清湯蘿蔔*** 　　　茄汁大蝦：夠新鮮。 炸石班：食落唔似石班，但都0K。 炸魚蛋/魷魚/豬皮：0K。 油雞：好味。 五香糟鴨：好味。 南乳炆豬肉：今次特別多，好夠味。蓮藕/冬菇: OK。枝竹：好夠味。 蘿白：好甜好淋。 芋頭：正。 **每次到取盆菜時，都必定多取一兜炆餸汁，因為個盆菜食到尾時，再加d汁就可以焯吓生菜，好正㗎！…Read More