小哉哉's Profile

深水埗素來都係平民界美食天堂。今晚嘅晚飯去咗青山道嘅「旺萍川菜館」，門口已經見到好多招牌菜嘅相。入到去餐廳嘅座位好寬闊，啱哂同朋友一邊食飯一邊傾偈。天氣咁凍，叫咗一個細份嘅酸菜生魚（$188）雖然話細份，但係份量一啲都唔少。滿滿嘅魚片舖滿整隻碗，魚片下面就係酸菜，蘿蔔同薯粉，三個人食都無問題!!湯底揀咗小辣，但酸味都好出色，所以值得一試。大盤花菜($78)，見到隔離枱話好好味，即刻都叫咗碟。一上枱就「聞」到好香麻辣味，見到個份量真係好大盤。花菜夠哂入味，好出色，仲有豬腩片一齊炒，好惹味!!乾鍋肥腸（$118），上菜時會有個爐一邊加熱一邊食，都係叫咗小辣，就算朋友唔食得辣都話好好味。肥腸清洗得好乾淨，炒到好乾身，個口感好特別，食到舔舔脷~~最後仲有必食嘅紅糖糍粑（$78），一份有12條，幾個朋友一齊食都夠食。食完麻辣香口嘅餸菜之後，再食呢個又脆又甜嘅糍粑即刻解左辣。呢間餐廳價錢好合理，份量又足夠，味道又好地道，值得再試。旺萍川菜館 (長沙灣)地址：長沙灣青山道129-135號顯暉大廈地下2-7號舖…Read More

入秋之後，夜晚氣温稍涼，又係時候去打邊爐食雞煲。今次去咗一間喺深水埗福華街新開嘅雞煲火鍋餐廳，餐廳門口有好多霓虹燈佈置，尤如漆黑中嘅螢火蟲般，好容易就見到。餐廳名稱好特別，叫「wai wei喂雞煲火鍋專門店」。餐廳主打任食雞煲同火鍋($188），另一$298套餐就可以享用任食雞煲& 火鍋，一隻海鮮船同埋任食牛頸脊+養生燉湯一盅。餐廳會先上一碟前菜同燉湯。今日靚湯係「黨參烏雞湯」，藥材味好濃，證明足料，真係無加味精，店員仲話如果唔夠味先自己加鹽。之後就上新鮮滾熱辣嘅海鮮船，入面有蜆，螺，生蠔同埋用芝士蒜蓉一齊蒸嘅烏冬同粉絲。食到咁上下就上埋雞煲，唔夠飽仲可以加雞，強烈建議火鍋湯底揀沙嗲湯底，用黎煮牛頸脊同埋出前一丁真係無得輸 !!飲品方面都有好多選擇，好多樽裝汽水同埋仲可以揀枝裝嘅竹蔗茅根海底椰或山楂蘋果。埋單$298/ 1位，呢個價錢有呢種食物質素，再加上CP值高，真係估佢唔到 !!食得好滿足。好適合約埋朋友一齊一邊吹水，一邊烚下烚下。餐廳名稱：Waiwei喂雞煲海鲜火鍋專門店地址：深水埗福華街51號…Read More

自從上次去大棠睇紅葉之後都好耐無入過元朗。對於一個九龍人，入元朗係一件好遙遠嘅事。不過最近有朋友搬入咗元朗住，今日趁放假入去探佢同埋順道揾好嘢食。元朗朋友首先帶咗我去佢新屋附近一間餐廳醫肚仔先。外表睇落去平平無奇嘅一間茶餐廳，入到去竟然係大排檔佈局嘅港式小廚。幾張大圓枱配上幾張卡位，份外親切兼有風味。餐牌上價錢都十分親民，誇張啲講，可以用「抵到爛」嚟形容。餐牌上每個菜式都好有特色，係一般大排檔食唔到嘅。我同我朋友兩個人叫咗三個餸。分別係伙計介紹嘅鎮店燒鵝，冰震脆脆菠蘿咕嚕肉同椒鹽鮮魷。先講講呢度燒鵝先，餐廳名叫得「燒鵝小廚」，唔洗講燒鵝一定係佢哋嘅「撚手」招牌菜，我哋叫咗一份下庄燒鵝（$148）。燒鵝賣相好吸引，食落去塊皮燒得啱啱好，脆口同鵝香味融入塊皮。鵝肉同脂肪比例剛好，肉質嫩滑亦不乏鵝油香。食到停唔到口。之後到冰震脆脆菠蘿咕嚕肉（$118），上枱嘅外表拍得住五星級酒店中菜廳，薄薄嘅煙霧配以鮮艷嘅咕嚕肉，令到成個菜式昇華。外面冰凍而脆脆嘅外皮，內裏係溫暖嘅咕嚕肉，夏天食就更加開胃。另外仲有一直冰鎮住嘅新鮮菠蘿，真係愈食愈開胃。最後就係椒鹽鮮魷（$98），份量好大份，餐廳唔係用魷魚鬚，而係用一塊塊嘅鮮魷魚去泡油，食落非常惹味同爽口。呢間餐廳好多特色小菜，入到去周圍都係食物相，下次要搵多幾個朋友一齊試多幾款先得。聚豐燒鵝小廚地址：元朗橫洲路9號朗晴邨青朗樓地下1號舖…Read More

記得上一次屋企打邊爐喺「潮叔」長沙灣鋪頭買料，覺得啲料好新鮮，牛味好濃。估唔到今日竟然係觀塘見到有「潮叔」分店，間舖唔止有得賣火鍋料，仲有堂食添。咁我就同我朋友即刻入去試吓。店舖內外嘅裝修都好新潮，加上入面嘅座位好「骨緻」，入到去，店員見啱啱開始晚市，人未算多，所以安排咗四人座俾我哋，十分貼心。餐牌有唔同嘅選擇，有特色嘅客飯同麵，另外有招牌一人火鍋餐。我同我朋友就叫咗個$268套餐，為咗可以試多啲牛肉。呢個套餐有5款湯底可以揀，今次就揀咗沙嗲湯底。丸類就包左魚冊，豬肚丸，墨魚丸，牛筋丸。墨魚丸熟咗之後好大粒又彈牙，牛筋丸咬開之後爆汁，好正!!蝦滑係自家製出品，呢個包裝好方便，仲好抵食，入面有一粒粒蝦肉，打邊爐食好啱。牛肉方面就包左三款:匙柄，吊龍同三花趾。呢個套餐價錢好抵，而又好足料，每碟肉都好新鮮好正。匙柄塊塊都好大塊又唔會好薄切，好有牛味，好鍾意。至於吊龍就有小小脂肪，食落幾嫩口。三花趾就食落好爽口，唔似另外兩款口感。套餐時限為兩個鐘，仲包埋沙嗲湯底，不需加錢，真係無得頂。飲品方面跟餐仲可以有優惠價加5蚊就有罐汽水，加10蚊就有罐王老吉添。今餐潮式火鍋好抵食，下次要再搵多啲朋友一齊試多幾款肉先得。潮叔 (觀塘)地址：觀塘開源道60號駱駝漆大廈第3座4樓A1室…Read More

近排睇社交平台，個個朋友都話去旅行，一係就泰國食海鮮，一係就走去日本食刺身，我有得睇無得食。好彩知己朋友話放假帶我遠離市區，去食餐海鮮+刺身，當去咗次短線旅行食嘢咁話我哋楂車去布袋澳，沿山路行，藍天白雲，風景優美，泊好車跟住指示行，就見到「海鮮島墨魚刺身專門店」。 門口擺滿不同種類嘅海鮮，各式各樣，種類都唔少。待應姐姐帶我們到窗邊位坐，並推介我們選擇什麼海鮮，我哋聽到之後，樣樣都好想order，但姐姐都細心叫我們食完再叫，一來怕我哋眼闊肚窄，二來驚啲海鮮擺到滿枱都係，而被海風吹涼，會影響味道！我哋最後點咗墨魚兩食(刺身+椒鹽鮮魷)，豉椒炒蟶子王，蒜蓉粉絲蒸扇貝及蜆湯墨魚是每枱必點的，刺身切得很薄，味道鮮甜有咬口，食得岀係用新鮮墨魚！椒鹽鮮魷香脆可口，十分岀色！豉椒炒蟶子王煮得剛剛好，豉汁惹味，鑊氣又足，蟶子爽口，一個字，掂！蜆湯是姐姐推介給我們，有蜆食又有湯飲！湯內每隻蜆都有肉的，不是殼肉分離，湯底鮮甜！蒜蓉粉絲蒸扇貝，蒸嘅時間又係啱啱好，加上材料新鮮，一啖粉絲，一啖扇貝，真係停唔到口，水準之作！我哋最後再加多一個芝士焗龍蝦炒飯底。姐姐話炒飯及炒米粉底都比較特別。提議我哋試試，的而且確芝士配炒飯好邪惡，但真係好好味，再加上鮮甜彈牙嘅龍蝦肉，真係食到停唔到口!!用餐時候，眼見待應姐姐都會主動關心各枱食客，對食物出品是否滿意，希望客人比多啲意見佢哋，加上主動講解/推介新鮮時令比大家，真係非常細心又好客！!食飽飽之後，我哋就步行去大坳門散吓步，睇完日落先揸車返屋企。海鮮島墨魚刺身專門店 (西貢)地址：西貢清水灣布袋澳6號地舖…Read More

今晚收工要過科學園做嘢，去到又未夠時間，好彩記起有個朋友喺科學園返工，大家好耐冇見，趁仲有少少時間，就揾佢出嚟食嘢，吹水，老友係地膽，非常推介蘇哥清湯腩，於是我哋就去撐枱腳！職員安排我哋坐卡位，枱同枱之間有適當距離，靜靜哋傾計都好舒服!!我哋叫咗咖哩牛三寶飯，鮮蝦雲吞麵，淨墨魚丸拼牛丸加油菜本身諗住食清湯腩，但天氣熱又想食惹味d，就揀咗咖喱牛三寶(牛腩，金錢肚，牛根) ，三寶都煮得好淋又入味，好岀色！咖喱好香椰奶味，唔係好辣，送飯一流！職員見我哋樣樣都想叫，就介紹我哋食鮮蝦雲吞，話係每日新鮮包嘅！大大粒，咬落去，蝦肉好新鮮又爽口，雲吞好彈牙！跟餐加咗個蠔油菜心，菜嫩鮮甜，食返小小菜嚟balance 返食咗咁多肉👍🏻仲有散叫咗墨魚丸拼牛丸，牛丸彈牙又juice ，好正!!墨魚丸就正正常常，我哋仲拎咗嚟點咖喱汁，別有一番風味😋蘇哥清湯腩 (沙田)地址:沙田白石角香港科學園第二期科技大道西8號尚湖樓8W地下S036號舖…Read More

忙碌嘅星期三，辛苦完一日之後就搵間餐廳好好獎勵自己。睇睇公司附近有咩靚餐廳，就搵到呢一間位於上環，鄰近九如坊新開嘅法國fusion餐廳 「Goldfinch」店舖坐位唔多，好彩今日早收工，walk-in都有位。餐廳環境氣氛好舒服，好適合同朋友一邊品嚐美食，一邊傾計。前菜Pani puri($118)外層脆卜卜嘅印度皮，入面滿滿的蟹肉沙律同青瓜，口感十分清新，好開胃。Tom Kha Gai （$88）喺店員嘅介紹之下，知道呢個醬汁味道同泰式冬陰功相似再加埋椰汁調製而成，食落去唔會好辣，單骨雞翼食落好方便，唔會好乾身，配上呢款特製醬汁，層次感滿滿。另外，仲加咗木耳同雞髀菇一齊，吸收咗醬汁一齊食，真係好正。主菜Goose （$288）擺盤好吸引，先有兩粒鵝肉波波，配上兩塊鵝胸肉。醬汁嘅果皮香同鵝肉意外哋配合，味道好獨特清新。Beef Short Ribs （$298）店員重點推介，連店員自己都好鍾意食嘅一道菜。肥瘦適中嘅牛小排做到入口即溶，配上佢哋特製嘅沙嗲醬，再加埋酸菜炒蕎麥麵，就好似港式沙嗲牛肉麵一樣。呢個菜式好有驚喜，擺盤又好靚，值得推介。甜品Chrysanthemum Puer （$108）首先講一講雪糕，係菊花嘅味道，甘美清香撲鼻，未試過呢款味道嘅雪糕，一定要試!! 另外配上普洱茶香芝士蛋糕，原先芝士蛋糕嘅邪惡感，而家當兩者加埋一齊，就產生微妙變化，食起來一點膩的感覺也沒有。個人愛它柔軟細緻幼滑的口感，不太甜，不太膩......一啖雪糕，一啖蛋糕味道啱啱好！Strawberry Tart （$98）呢個撻係用咗櫻花味cream同吉士醬襯托上面滿滿嘅士多啤梨，另外再加咗少許花椒碎粒做點綴。食落味道唔會好奇怪，反而令層次昇華咗。今餐晚飯好高質，每道菜式都好有驚喜，餐廳職員又好細心及專業介紹每道菜式食材及做法，下次一定會約其他朋友光顧，非常值得推介！Goldfinch (中環)地址：中環善慶街2號地舖…Read More

今日經過聯和墟想買下午茶，喺海聯廣場附近見到有間深綠色店面嘅外賣店，舖面有個逗號，幾特別，所以行過去買咗個下午茶試吓。入到去見到餐牌主要都係日式餐點為主，收銀姐姐態度好好，介紹咗幾款tea比我，反正第一次幫襯，就照佢意思order。和風牛肉飯 +日式煎茶 （$48）一打開個盒有小小驚喜，估唔到會有啲沙律前菜，份量仲要好大份。一開始以為係一個好似連鎖店嘅牛肉飯，但食落完全兩回事，牛肉唔韌，好有牛味，牛肉飯下面有個汁，令到個牛肉飯層次再昇華。下次一定要encore。跟住叫咗個吉列豬扒厚切三文治+日式煎茶（$38）脆卜卜嘅豬扒配酸酸甜甜嘅醬好開胃，就算返到屋企，塊豬扒都仲係好脆口。三文治外面有張紙包住咁食好方便。芝麻手羽先 （$28）未返到屋企已經聞到香噴噴，因為外賣關係，餐廳好細心無冚實個盒，以免有倒汗水，所以返到去屋企都仲係好脆。一盒有三隻好抵食，雞翼外面好多芝麻脆脆，食落好好味。溫馨提示，餐廳主打做外賣生意，店舖內只有幾個座位，打算堂食須留意呢點。逗點 comma地址：粉嶺和泰街4號和泰樓K1地舖…Read More

今日收工約咗個朋友食飯傾吓偈，約咗個朋友喺MK女人街覓食，行過見到有間串燒鋪好爆場，所以就跟隊試吓佢。入到去，店員見我地一袋二袋，就好貼心俾個四人座位我哋。呢度嘅點餐形式係填紙嘅，搞到我同我朋友不停咁剔，因為樣樣都好似好好食咁！除咗串燒，仲有意粉及小食可以點。飲品有汽水，燒酒或者啤酒。我哋今次就無飲酒，因為食串燒無理由唔點返罐王老吉嘅！店主大力推介頂級安格斯牛小排 ($118)有得揀唔同嘅熟度，我哋就叫咗七成熟。嚟到上碟，嘩，串燒鋪頭嘅上碟，都擺盤擺得咁靚。呢一碟牛小排食落去，燒得岩岩好，唔會太乾，牛嘅脂肪香同牛味都好出。底下墊住嘅蘆筍都吸收咗啲肉汁，好好味。燒玉子 （$20）幾有趣，燒完熱辣辣又有玉子嘅甜味，不錯不錯。煙肉蘆筍卷（$20）無得輸嘅配搭，煙肉嘅香加上蘆筍嘅清新。娃娃菜 （$16）份量好大份，燒完唔會好乾身，好抵食。芝士煙肉大啡菇 （$32）一咬落去，啲汁爆哂出嚟，再加上濃郁嘅芝士味同煙肉味，值得一試再試！蒜蓉燒原條茄子 （$36）呢個好有驚喜，估唔到咁大條，味道好足夠，啱哂重口味嘅我。燒好就熱辣辣咁上枱，真係好好味！燒饅頭 （$18）細細粒饅頭上面灑咗彩虹朱古力碎碎，再點埋煉奶真係好好味！值得一讚嘅係，店員服務態度好好，每次上碟都會主動提供埋相應餐具方便我哋食用，非常窩心。三人行燒烤專門店 (旺角)地址：旺角通菜街85號地舖…Read More

近期見到台灣開關，好想去行返轉，但又攞唔到假，唯有出去食餐台式火鍋頂住旅行癮先。印象喺屋企附近，將軍澳廣場，有間「馬祖」台式火鍋店。今晚相約個fd一齊去試吓，門口好多人等緊，喺等位期間我哋就諗定食咩湯底，因為呢到係一人一鍋，所以我同我朋友各自可以揀自己鐘意嘅口味喇。我就揀咗個藥膳花雕清雞鍋，朋友就揀藥膳沙茶湯。而店員推薦我地食$298既套餐，可以試下唔同嘅肉。入到餐廳，四四正正，通道算闊落，方便拎嘢飲及野食。係等待湯底上枱時候，我就出去睇吓有咩飲，選擇有多過15款，凍飲有汽水，紙包飲品等等。令我有啲意外係有熱飲，可能因為天氣還凍，所以有熱飲都幾貼心。套餐包嘅牛肉質素都幾高質，牛頸脊牛味突出，食落唔嚡口，encore幾次都係保持同一水準，不錯不錯。肩胛肉眼比較厚小小，有啲脂肪，但食落唔會好膩，都encore咗幾次。豬肉方面就主要食伊比利亞黑毛豬，高質同埋食落唔會好韌。自助區食物方面都有好多選擇，每次拎嘢食都要喺自己枱拎個白色膠碗出去揀。比較有驚喜嘅係黃金蝦仁棗，手打牛丸，甜不辣，芫茜燒賣，沙茶牛肉同蘑菇芝心堡丸。最後梗係要留肚食雪糕喇，有得任食movenpick，dreyer’s，同埋甜筒雪條。食多幾杯就真係回晒本喇。總括而言，呢餐火鍋真係好抵食，同時又可一解去唔到旅行之苦，最後希望可以快啲攞到假，直接飛去台灣食火鍋及shopping啦。馬祖（將軍澳）地址：將軍澳唐德街1號將軍澳廣場1樓1021-1023號舖…Read More

趁住放假加上天氣仲涼涼哋，就同朋友踩單車，由沙田踩入去大尾篤。入到去大尾篤，還完單車就開始覓食。我哋沿路逐間睇下，喺龍尾沙灘對面搵到呢間「Relax B&M」。本來以為係按摩地方，但原來下面係餐廳，見到外觀咁靚就入去試吓佢先。入到去，店員就好親切招呼我哋，同埋比我哋揀坐外面定室內。咁面對住咁靚嘅海景，當然坐外面啦。睇一睇個menu，選擇都好多，有沙律，意粉，主菜，小食，甜品。我同我朋友各叫咗一份主食，一杯嘢飲。軟殼蟹意粉($128)估唔到係用蒜蓉蕃茄炒墨汁意粉再配合脆卜卜香口軟殼蟹，上面仲有堆芝士粉，加埋一齊都幾惹味。炸魚薯條（$118）薯條剛炸好， 熱辣辣，非常香脆，再點埋個他他醬就食到唔停口。呢個真係啱啱好嘅下午茶份量。另外加咗2杯凍飲，抹茶牛奶（+$18）抹茶味偏清淡，可能牛奶比例多咗，令飲品淡咗少少。另一杯係凍黑糖鮮奶（+$18）黑糖味好出，好好飲，好有台灣風味。在店員帶領之下，遊覽呢度二樓，原來有貓貓嘅房間。內面有三隻貓貓，超得意，同埋完全唔驚陌生人。仲可以幫佢哋梳下毛。上去天台就見到一個好chill嘅地台+枱櫈，可以坐低傾吓計，仲可以同時睇晒成個龍尾泳灘，好正。參觀完就落返去叫埋個甜品，朱古力牛角窩夫（$78）個樣好靚，好適合打卡，牛角包外殼脆脆，內裏好似麻薯咁，好煙韌，再加埋朱古力漿，朱古力粉同cream，估唔到咁夾。呢度食物十分唔錯，環境一流。今日踩單車嘅疲勞都因為呢餐飯擺低晒。放鬆 Relax B&M地址：大埔大埔大尾篤汀角路龍尾村165A地下…Read More

今日同朋友去鐵路博物館影吓文青相，影到咁上吓就開始肚餓，附近見到有間餐廳就同朋友入去試吓餐廳唔止外牆有特色，而且入面佈置仲好靚，入面有好多土耳其燈，著咗燈之後，好有feel 同好適合影相打卡。餐廳主要提供西式料理，有小食，pizza，意粉，主菜就有德國鹹豬手同燒春雞。最特別係有幾款串燒，加埋啤酒一齊食應該幾正。不過今晚有揸車，就唔飲酒，留返下次再試。叫咗個黑松露忌廉長通粉（$108），份量夠晒2個人食，忌廉汁好香入面有洋蔥，煙肉同蘑菇，食落好好味。仲叫咗一份德國鹹豬手（$198），新鮮出爐熱辣辣，大大份，仲有個黃芥末醬配返個豬手，豬手皮脆肉嫩，呢到仲幫你切埋，唔使自己郁手。為食嘅我，仲叫咗個小食拼盤（$138），入面有洋蔥圈，炸蠔，魚手指同薯角。一上枱果吓，Wowww.....！份量係出面餐廳嘅4-5人份。份量大之餘，食材一啲都唔馬虎。炸物再配埋個松露醬，yummy😋飯後感，餐廳環境真係好舒服，枱與枱之間有好大嘅距離，好適合知己談心。另外食物嘅份量都大份，絕對可以抱住個肚走。…Read More

​呢兩個星期，接近12月，近年尾，多咗飯局，幾個老友都係住港島，佢哋話世貿開咗間新食肆，「南海二號」最後大家意見一致，舉腳贊成去光顧。我哋一行幾人，訂咗晚飯時間上去。Wowww，一出𨋢，已被「南海二號」裝修佈局吸引，集簡潔，幽雅，時尚於一身，非常吸睛 !!加上迷人夜影，真係酒不醉人，人自醉~頭盤/醒胃小碟陳皮話梅萵筍陳皮帶點橘香， 加上話梅嘅獨特甜酸味，配上口感清爽萵筍，一絕 !!川味牛筋凍入口似啫喱般滑，富有彈性，燉牛筋的湯汁濃稠，在口腔內即化，口感嫩滑不腻，加上川味汁料，麻麻辣辣，食得過癮!!金榜醬煮大蝦秘製金榜醬，味濃，感覺上似Curry Laksa 加上 Asam Laksa混合體，大蝦肉質爽甜彈牙，配上饅頭，蘸上金榜醬汁同食，食到舐舐脷 !!招牌茶燻雞茶香撲鼻，不可不試，雞肉煙燻出金黃的蜜糖色，肉質嫩滑緊緻又有富彈性，燻過的茶香在口中流竄，令人垂涎三尺 !!龍蝦湯泡貴妃飯湯底濃郁鮮甜，材料豐富，蝦仁、絞肉、菜粒，上枱前灑上香芫、放入脆米，香噴噴，食到口水流!…Read More

今晚約咗個朋友食嘢，朋友話想食韓國嘢，做完嘢喺佐敦果邊，於是搵openrice佐敦 韓國料理 就見到呢間 雞哥媽韓國料理，佐敦站C2一出行一陣好快到！呢間親民價韓式餐廳舖頭門面企理乾淨，入面掛咗好多韓國旗🇰🇷同彩繪壁畫，好有韓國小店特色雞哥媽有各式各樣嘅韓國菜-炸雞，豬手，部隊鍋，煎餅同各式炸物小食，仲有套餐，價錢親民好抵食 !一入座就立即送上前菜 ，有好開胃嘅醃蘿蔔同爽口辣芽菜我哋今晚叫咗芝士岩漿炒飯$98超級邪惡嘅滿滿芝士泡菜豬肉炒飯，鹹鹹辣辣好惹味🌶，個炒飯份量好多，如果今晚係2個女仔可能食唔晒!!另外叫咗個一人餐，有牛肉炒粉絲，炸魷魚鬚跟飲品一罐$108牛肉炒粉絲甜甜哋，炒粉絲唔太油同埋有好多蔬菜，感覺健康啲，無咁heavy，好好味👍🏻即叫即炸既魷魚鬚配甜辣醬，魷魚鬚好香脆，粉漿唔厚，同埋魷魚唔un，好食👍🏻配啤酒一流~可惜跟餐飲品係韓國罐裝氣水！本身入餐廳見無咩人都驚伏，但越坐越多人，堂食仲有9折，好多人 & foodpanda過嚟拎外賣，總結 雞哥媽韓國料理 嘢食好食又份量足，包你有驚喜！!地址：雞哥媽韓國料理 (油麻地)油麻地上海街42-46號忠和商業中心地下11-12號舖…Read More

上星期行完山，落咗去筲箕灣揾嘢食，去到筲箕灣，第一時間走去東大街逛吓，成條街都好多人，至出名果幾間排晒長龍，唯有走去間冇咁多人排隊嘅「阿一豬扒酸菜米線」未入去，有店員已經叫我哋order定食物，睇完餐牌之後，點咗幾樣嘢食，其中包括有「生牛肉酸辣米線」，一碗生菜，而當時有個行山腳話呢度「招牌豬扒」好出名，好多人嚟到，都會叫嚟試吓，所以我單點了一份，點知落單嘅哥哥話單點一份好貴喎，然後望住我，跟著問我有冇睇餐牌，我梗係有睇餐牌先識點餐啦哥哥。。到份生牛肉米線嚟到，啲生牛肉完全冇味，個湯又淡，真係食唔到落去。相反個豬扒又真係有驚喜，肉質鮮嫩，又食唔到梳打粉味，呢個價錢真係扺食！最後剩係食哂豬扒，啲牛同米線冇再掂過…Read More