elleho's Profile

第一次試華星冰室，order兩份常餐，牛油多士、火腿炒蛋、叉燒意粉、熱茶蜜。牛油多士最鍾意食厚多士，自動烘底，夠熱夠脆，正！火腿炒蛋標榜用3.6牛乳炒，果然滑到不得了，份量多，金黃色有蛋香有蛋汁，配成片火腿，好味道！叉燒意粉可轉通粉，雞湯湯底好味，叉燒6,7片而且偏瘦整體黎講好滿意，送餐速度快，食物好味，價錢合理，絕對有下次！…Read More

除夕夜幸運坐在店內靠窗的位置，望到海景和燈飾，而當晚餐廳只供應套餐，就跟女朋友點了二人套餐。湯 - 忌廉蘑菇好稀，可以稱得上難飲，女朋友只飲了兩啖。小食 -士多啤梨雞中翼 炸雞翼配strawberry sauce幾夾，亦夠熱。主菜1 - 龍蝦汁海鮮天使麵配料款式有蝦、青口、八爪魚粒、蘑菇、洋蔥、青椒，味道好但略嫌份量少。主菜2 - 帶子牛扒石鍋飯原隻帆立貝加上幾塊黑椒牛，好味，可惜醬汁無味又少，似食緊白飯，唯有自己將天使麵個龍蝦汁加落去。甜品1 - 士多啤梨千層酥女朋友話好出名要試，可能套餐關係只有一層，整體黎講無咩特別，酥皮夠脆。甜品2 - 法式焦糖燉蛋好細杯，個人鍾意食即燒既糖，有凍熱既效果，但呢個燉蛋面頭既焦糖明顯係一早燒好再放入雪櫃，所以雪到有一陣薄膜，不過都好味。套餐亦包2杯餐飲，埋單連加一$322，呢個節日呢個價錢尚可接受。…Read More