CarsonMing's Profile

今日午餐去咗淘大花園商場嘅金牌冰室食飯，叫咗個揚州炒飯，套餐包餐湯同餐飲，價錢盛惠$69，其實唔算特別平：餐湯叫咗紅湯，當然唔能夠同西餐廳嘅紅湯比較啦，菜嘅份量都算多，不過覺得太酸唔啱飲，同埋唔夠熱。主菜揚州炒飯方面，炒飯份量唔算特別大兜，我覺得炒得唔夠鑊氣，上菜時溫度唔夠熱，雖然由落單到上菜都等咗大約8-10分鐘，不過從碟飯嘅溫度同鑊氣都唔能夠肯定係唔係即炒。蝦嘅份量有3粒，肉(叉燒）嘅份量正常，唔算特別多。食完睇返個餐牌，發現叫個龍脷柳意粉都係$62，大大塊扒任你食，即時覺得用$69叫個揚州炒飯唔係好抵。其實間餐廳最惡劣係啲店員嘅態度同質素，一入去店員就安排我坐一張四人座位，而四人位嘅另一邊就坐咗另一名食客（下圖右邊黑衫男士嘅位置）。我由一坐低開始，嗰名食客就喺度用手機大聲播放聲音，我本身諗住佢都係睇片睇一陣就不以為意。隔咗2-3分鐘都有餐廳侍應叫佢細聲啲，不過嗰名食客都冇聽侍應講將電話調校返細聲。但從餐廳侍應同嗰名食客嘅對話，我大概估到嗰名食客應該係餐廳廚房職員，而最後我都響餐廳侍應口中確認佢係餐廳出品部嘅員工。佢播咗3分鐘左右，我終於忍唔住出聲叫餐廳侍應安排我坐第二個位，因為真係好滋擾。要到我(作為消費者)出聲話佢，個廚師先肯將電話調校返細聲，店員都好快手幫我安排調位，不過由於我同餐廳侍應嘅對話比隔離嘅廚師聽到，個廚師喺我食飯嘅過程全程都係啤住我。雖然最後餐廳經理都有向我道歉，不過食餐飯俾人啤住真係食到成肚氣。我覺得如果大家係嚟呢間餐廳食揚州炒飯嘅就真係唔使試啦，不過如果大家係想嚟試下食啲扒餐都可以一試嘅，但要預咗個用餐體驗未必會太好，冇期望就唔會有失望👍🏻…Read More

今日要去土瓜灣搵朋友，搵完就當然嚟呢區好好食嘅譽麵坊做午餐啦！下午一時許入到去，見到入邊好多人，店員都只係揀左一個比較擠迫的位置比我，不過我都接受到，人多就體諒下啦，比嗰四十蚊食午餐，唔好諗坐得舒服啦。我一入座後唔駛諗，即刻同店員姐姐講我食雞球米線。因為真係好好味，而且八成人都食呢個。米線湯底清淡過譚x。不過我無乜留意米線，反而著重雞球。雞球大大舊，好抵食。再加上鹹鹹的南乳雞球醬，味道一流。我數過雞球有六件，我食到第四件已經好飽，第五件已經再食唔到落去。我記得之前四個人嚟可以再嗌小食（eg. 墨魚餅）。惟我今次毒食，無法再叫更多。個餐係冇跟飲品，但可以加$6飲罐裝飲品或$15飲台式飲品。我冇咁有米飲台式飲品，故加$6飲罐裝道地綠茶。不過在上年十一月時食呢個餐只係$31，今次要$33。雖然加左價，但都係抵食。…Read More

今日夜晚晚一條友在大角咀，唔知食乜好。行行下見到一間印度菜，餐廳外睇menu見價錢唔貴，又唔使等位就試下。店舖裝飾好簡單，只有印度風情的燈。桌椅都係簡簡單單樺木製的。入到去嗌左個$53的咖哩雞飯，等左5分鐘就食飯食。咖哩辣度適中，對我嚟講ok。飯好有飯香，又熱辣辣新鮮送到，我第一時間食D飯係辣口，好熱。份量一般。店員姐姐好親切，我食到一半就問我夠唔夠食，我答夠。我check out仲問我好唔好食，我答好食。呢間餐廳感覺上好過其他印度餐廳，下次有機會會再試呢間的印度薄餅，只是稍欠了一點裝修和裝飾。…Read More

今日在德福廣場食午餐，好多食店都好貴，就上Openrice睇睇有咩平價之選，見到呢間又平又多好評，就去試試。行上去期間見到有間美心都行入去望望，見到D野價格貴過呢間十幾蚊就卻步。行到間食店，店舖面積都算細，要立食，只能容納約二十人。店員都好忙，要兼顧收銀及廚房。見到D餐份量都算細，就點最大份的C餐（章魚小丸子四粒 + 炒麵 + 日式pizza）。一分鐘都唔使就有野食，賣相都好靚、好吸引，打算po ig 呃 like 。我一埋到檯就打算食日式pizza，一入口，舊pizza係林嘅，入面D料都係不外乎章魚及雜菜，再加上D 唔 match 嘅汁，真係想嘔，食左四分一就投降。試完中伏的日式pizza，就試炒麵，同普通茶餐廳一樣，冇乜特別。章魚小丸子同普通小食店味道差不多，只係大粒D。最後因為冇食到個日式pizza就唔夠飽，要去麥當勞買多個餐先夠。早知食美心。總結：完全中伏。招牌菜之質素極差。相就唔知點解po唔到。…Read More