baby120's Profile

見到新裝修後有promotion，而且食物都好吸引，見到好多網紅拍片有無限量供應海膽魚子、蒸新鮮龍蝦及海膽鴨肝意大利飯，淨係呢幾樣已經好吸引。自助餐6:30開始，我哋6:45到，餐廳周圍已經排晒隊，差唔多每一樣嘢都要排好長。我地叫咗紅白酒任飲，飲完第一杯，叫咗好耐都冇人再嚟refill。明顯餐廳人手係嚴重不足。海膽魚子醬：排好耐隊，份量唔多。基本上你全晚唔可能食到好多次。新鮮龍蝦：又係等好耐，不過龍蝦確實係新鮮。鴨肝意大利飯：呢度係等最耐，質素都OK。如果想食牛扒羊架燒蝦之類，唔明點解都要排同一條隊。總之你食啲咩都要排。其他凍海鮮：賣相唔吸引。麵包蟹完全冇膏。仲要成晚兩三個鐘都冇人refill過。總括而言，食物質素其實唔差。不過全晚都不停咁排隊一啲都唔enjoy。唔會再嚟。…Read More

喺元朗又想食吓高質燒肉同飲下清酒，冇乜太多選擇。於是上網搵到呢間，即日book位就嚟試吓。餐廳坐得舒服，都有好多卡位，一啲都唔大油煙，估唔到煙囪細細，個吸力又幾好喎。兩個人叫咗個至尊二人餐$888，有前菜、一盤燒肉、海鮮有龍蝦同埋生蠔，唔要生蠔可以揀帶子。仲有兩杯大生啤！肉類質素都好高，龍蝦雖然唔係新鮮的，但係都好大隻，燒完都好彈牙，另外俾咗蒜蓉同牛油，加埋一齊燒又幾好食。最後仲有兩杯雪糕，整體都唔錯。…Read More

今次第二次過嚟食，因為朋友未食過，就陪朋友再嚟試吓。第一次印象好好，肉質好鮮嫩，有驚喜的。但係唔知係咪第二次食嘅關係，感覺水準差咗少少，件漢堡扒好似冇之前咁Juicy咁。套餐每人包三件漢堡扒，一隻生雞蛋，廚師會分開三次上，見你食完一舊，就會立即上第二舊俾你。都要讚賞廚師嘅眼力。面對着個火爐，都係有啲特色。不過食過一次之後，第二次確實冇乜新鮮感。因為有會員可以訂位可以試吓。如果要排隊，就一定不會黎。…Read More

慶祝老公生日，佢一向鍾意食日本嘢又鍾意飲清酒，就嚟呢間餐廳試吓。叫左個套餐，再加咗清酒free flow, 個套餐都好豐富，而每道菜都好精緻，最好食係壽司同天婦羅，壽司飯好食，刺身夠新鮮，天婦羅炸得恰到好處，炸皮唔會太厚。最精彩當然係有多款靚清酒任飲。staff仲會介紹每款清酒俾你，夠專業不過開頭去到，安排左一張好細的二人枱，位置又唔好，初時有點失望。然後要求先至安排另外一個望窗的位置。其實餐廳仲有好多位置，希望餐廳唔好成日安排咗比較差啲位置比客人先。整體嚟講，食物質素好，上菜速度都好。會再來的。…Read More

其實多年來都係牛角VIP, 我和家人都係食肉獸，又係清酒愛好者。佢嘅燒肉放題加清酒放題，確實好適合我哋口味。質素多年來都冇乜改變，放題價錢合理，當然肉類嘅質素唔可以同去日本比啦，但比好多香港燒肉放題質素都高，其實我最欣賞就係只加$68 可以任飲啤酒、清酒、梅酒、菠蘿酒…啱晒我哋呢啲酒鬼。加上放題唔止有燒肉，前菜有芥末八爪魚、沙律、炸雞、炸蝦… 好多款式。而佢哋每一間餐廳，服務態度都真係好好。市道唔好，見佢哋就算假期都唔多人，真係要多多支持，希望佢哋可以繼續落去，始終服務好又保持到食物水準嘅餐廳真係唔太多了。…Read More

睇到有介紹話廚師係日本人，用本地食材煮法國菜，於是就book位去試吓。餐廳位置唔多，最多容納18人左右，今次我哋坐吧枱，可以望住廚師煮嘢。我哋揀咗四道菜，$6xx 價錢相當抵。不過酒就偏貴wine paring 四杯酒都要 $6xx, 配的酒都唔錯嘅。廚師煮每道菜都融合咗少少廣東味道，調味頗重，而每款菜啲肉質都恰到好處。龍蝦好彈牙，唔會過熟。黑毛豬好軟腍，魚都好滑。最後甜品都好有驚喜，尤其係紹興酒雪糕配朱古力凍依個價錢性價比算高…Read More

突然想食韓國嘢，又去開YOHO MALL，而商場就只有呢間，餐廳外型又吸引, 就入去試下。好想食吓壽司卷，部隊鍋之類的韓國菜。不過呢間都係fusion咗，偏向西餐的韓國嘢。餐廳環境都幾靚，午餐嚟講又坐得舒服。服務就一般般，叫咗好耐都冇侍應嚟寫嘢。佢杯橙汁吸引，又靚又幾好飲。叫咗個韓式飯卷，非常之普通，價錢又唔平。部隊鍋就唔係我想像中的，又唔夠熱，個面又好腍，配菜又少。另外再叫咗個意粉，反而唔係韓國菜的意粉好食啲，不過應該都唔會再嚟。…Read More

同朋友慶祝生日，大家都鍾意食法國菜，就book咗呢間三星米芝蓮法國餐廳試吓。餐廳裝修華麗，環境非常之舒服，好適合慶祝。午餐價錢性價比較高，餐廳光猛，座位之間寬敞，可以同朋友慢慢傾偈，確係非常享受的一個下午。每道菜都非常好食，好有驚喜。首先麵包已經有好多選擇，熱辣辣。然後每道菜味道都好豐富及有驚喜，上菜速度合適，服務都算細心。最後甜品都好完美，細至朱古力都好好食。會再來的一間餐廳，不過價錢確實係稍貴。…Read More

一向都鍾意飲清酒。見到呢間做清酒祭🍶，有任飲清酒已經夠吸引。竟然廚師發辦套餐只係千幾蚊位，仲要買一送一，任飲清酒。依個價錢真係冇得輸。刺身中規中矩，壽司好食，食物種類都夠豐富，任飲嘅清酒質素都唔算差，一定唔係放題嗰啲質素。清酒飲完，好快refill俾你，唔使點樣等。不過今次book唔到吧枱位，吧枱位置可以睇到師傅手勢，更加有feel。呢個價錢絕對係超值，仲要係喺尖沙咀區。下次會試埋鐵板燒，見佢午市套餐都好抵，一樣有清酒放題。…Read More

試左午市套餐$198，連埋服務費$5xx. 普普通通，性價比不算高。 勝在環境舒服，唔多人，服務都幾好。 不過食物真係好普通，點心全部都唔夠熱，最好係個湯羹👍。如果想搵間舒服嘅酒樓可以試吓。…Read More

去元朗附近買糯米糍。經過見到依間魚湯米線，就入去試吓。試咗個鯇魚腩魚湯米線，仲加咗魚卜。魚肉食落新鮮夠滑，鯇魚腩都大舊。魚卜新鮮，不過魚卜份量俾我想像中少，因為我好鍾意食魚卜。魚湯好鮮甜，我飲咗好多都唔覺口渴，相信冇味精。米線都唔會好腍，適中。 應該過開嚟，會再嚟食。同埋唔算多人，有卡位又坐得舒服。見到對面嬸嬸叫咗個蒸鯇魚配白飯，睇落都幾大條。佢仲忍唔住話好抵食，話自己買都要差唔多錢。好似都係$70左右，價錢聽落OK。…Read More

已經唔係第一次嚟呢間鐵板燒幫襯。🌅海景房環境一流，食物質素高。而家套餐都好抵食，人均都唔使$1000，有海景有海鮮，尖沙咀地區呢個價錢真係性價比好高。今次仲叫咗日本象拔蚌刺身，非常之鮮甜，配埋白酒，簡直一流😍😍😍!前菜有我最鍾意嘅海膽三文魚子，另外鐵板燒鮑魚真係一絕，又鮮甜又彈牙，師傅住得啱啱好！和牛唔使講，非常之冧又有牛味😍😍😍 另外，發現餐廳出邊種咗好多自家香草。相信佢哋採用新鮮香草烹調，真係色香味俱全！一定會再嚟。環境、服務和食物水準都好高。…Read More

一向都好鍾意飲雞湯同食花膠。經過葵芳見到呢間花膠雞湯米線，入去試吓，點知好有驚喜。個花膠雞湯底非常之濃郁，雞肉嫩滑，花膠又厚又大隻。我忍唔住飲埋啲湯，飲完都唔會口渴喎！果然真材實料👍👍👍 ！我要咗菜底，菜嘅份量都好多！試埋個豬扒，好鬆化好好食。朋友要咗米線，份量都好多，軟硬適中。麻辣拍青瓜都好好食，夠爽脆，辣度剛剛好。一定會再嚟！依個價錢真係性價比好高！👍👍👍下次我要試埋黃酒雞湯同埋胡椒雞，見到隔離好多人食，相信都唔錯。…Read More