Pro-eater Dusty's Profile

俾報紙廣告吸引，見到個價錢好平，用埋優惠券每人 $108 連加一。於是，我地就試咗啦。一分錢一分貨。睇過其他 OpenRice 嘅食評，都比較負面。我覺得冇咁差，都唔係難食嘅。冇乜貴價食物。我覺得炒烏冬都幾好食，有少少辣，忌廉魚柳唔錯。前菜選擇都唔少。不過牛扒麻麻地，肉質有啲奇怪。即炒嘅卡邦尼意粉，廚師功力十足，味道都OK，但係唔夠熱，相信係因為炒完意粉之後會放喺一磚雪咗嘅芝士之中，令意粉變凍。環境方面，我地坐喺角落位，都舒服嘅。但係今日都算多人，嘈咗啲。總括來講，呢間餐廳質素一般。每人 $108，都預咗唔會話有高級酒店嘅質素。…Read More

平時同班同學每個星期都會來食一次，鍾意食個黑椒汁漢堡排腸仔嘅學生餐。但係今次食完之後，真係唔值得每星期去一次。我地一行三人去咗呢間食，一坐低就叫咗三個黑椒汁漢堡排腸仔，都係跟意粉。過陣一陣，個餐湯同麵包來啦。我望住個忌廉湯，心諗：駛唔駛咁hea啊，一碗忌廉湯加幾片腸仔就算。飲咗一啖湯，嘩，咁淡嘅，無忌廉味:(。另外，個湯係超稀，好似清水咁。飲完湯之後，又等多一陣個主菜來啦，第一眼望就見到少咗一條腸仔，唔通話個忌廉湯入面幾片腸仔就算數 ? 之後，個侍應問我地駛唔駛要多啲黑椒汁，我望一望個意粉，好dry ! 好似未煮熟咁 ! 落多咗啲黑椒汁之後先好少少。漢堡排同腸仔味道不過不失啦。飲品 (凍檸水) 正常。不過食物質數真係要做返好先得，呢個餐$38認真唔抵。…Read More

放飯了，同班同學來咗呢度食午飯，因為呢度勝在較抵，效率快。一坐低，即刻叫：腿麵！同學叫兩個牛麵一個餐肉通！上菜速度好快:)，火腿絲配住麵條，淡淡嘅湯底浸住，味道不過不失，不過感覺上好似熱得滯。‘奶醬多奄列‘，每次我都係叫呢個。不過退步咗:(，奄列太油膩，而且啲油浸咗啲落個多士度，變得好濕，破壞咗個口感。其實，冇濕到嘅包都好食嘅，啲花生醬甜甜地咁，好唔錯。奄列一般，不過就好在好多火腿夾喺入面，質感提升咗好多。凍檸茶一般味道，好似甜得滯。每人$20埋單，好抵！伙記嘅態度比一般茶餐廳好，不過衛生就有待改善:(。。。一隻手唔知掂完啲咩就掂多士，有啲唔乾淨。不過算啦，好多茶餐廳都係咁。有下次！…Read More

之前團購咗呢一間，於是今日就來試吓啦。我叫咗個豚肉烏冬，同埋加咗一個野菜天婦羅。食物效率好快:)，但係收錢就搞好耐。服務同衛生程度都係一般般。講返啲食物，首先試咗隻蛋，我覺得好入味！至於天婦羅，幾好味，炸得都ok，只係有啲野菜太淋:(。烏冬質素都唔錯，同上次未做openrice會員食嗰時有好大進步，堅韌度剛剛好。豬肉賣相唔係幾好:(，但係都整得幾好食。不足之處就係湯底好淡，連味精味都冇。希望餐廳可以做得更加好:)！…Read More

星期日來呢到食tea，叫咗兩個下午茶餐：一個栗米菠蘿火腿pizza同埋一個甜品餐（三粒泡芙，兩粒和菓子，雪糕）。首先來咗個甜品，賣相麻麻，啲雪糕溶咗少少:(。不過味道先係最緊要，泡芙幾好食:)，夠凍同埋有好多忌廉，和菓子味道好好，雪糕無咩特別，只係一般嘅超市貨。過咗一陣，pizza 來咗啦。Pizza 唔係幾熱，不過餅底好脆，配料份量係夠嘅，不過太少火腿，令我有啲失望:(。飲品方面，我飲咗個凍檸茶，味道一般，另外一提嘅係熱咖啡會送一塊曲奇餅。問心講，我覺得呢個Spaghetti 360食物質素其實唔錯，但係太逼:(，座位間距離太窄，而且服務都一般，繁忙時般要等好耐位。我覺得應該有下次！…Read More

之前買咗Groupon，所以專登來呢到食午餐。我叫咗個叉燒拉面，首先試咗湯底，夠濃，好有豬骨味。之後食咗啲面，好彈牙，質感好唔錯。:)最初睇落去啲叉燒好似啲五花腩咁，但係所謂人不可貌相，肉都一樣，味道水平超卓，從來未食過咁好食嘅！由於我地買咗三張Groupon，所以有三份小食：章魚燒，日式餃子，炸雞。章魚燒味道唔錯:) ; 餃子個餡夠料，好多肉汁，個皮唔會太燶 ; 炸雞本身好食，但係太厚粉，掩咁啲雞味。服務都好好 ; 環境方面，我覺得逼咁少少，不過整體都唔差。總括來講，應該有下次吧！…Read More

之前同班同學仔來咗呢啲食午餐，我叫咗個美式雞扒，加咗$3轉烏冬。服務等同一般快餐店嘅質素。好快，有野食啦，首先食咗塊雞扒。唔。。。都唔錯 :) ！吉列做得好好，咖喱味道都幾好，夠香濃，而且又唔係話好辣，有啲甜甜地，好特別。不過真係唔好咁講求烏冬質素，應該係港貨／大陸貨，有啲酸 :( ！所以我俾咗3分味道。總括來講，應該有下次（不過跟飯）。…Read More

之前做咗意粉屋會員，見來到青衣，就來試吓同埋用吓啲優惠券。入到去，我地坐咗個 window seat ，景色都嘅好，而我地就叫咗個二人餐：兩個湯，pizza ，同埋忌廉帶子意粉。等咗好耐，忌廉湯來啦，味道都唔錯，夠濃，好食:)。之後又等咗好耐，終於有野食啦，pizza 幾香，芝士夠晒數，另一方面意粉都唔差，不過帶子好細粒:(，有啲缺失。餐飲不過不失，冇咩特別。最後加一未用優惠券價錢around $330。…Read More

原本諗住食TEA WOOD ，因為要等好耐，所以就來咗呢間。見到餐牌，好多款拉面:)，於是喺千挑萬選之後要咗個白丸拉面（叉燒拉面）。（服務唔錯）。過咗一陣，碗面來啦，首先試咗湯底，嘩！好滑好好食！之後食面啦，一樣咁好食，夠堅韌。我好快就食晒，唯一缺點就係份量太少，可以加多25%。一定有下次！！…Read More

今日食lunch去試新野，見openrice呢一間餐廳有近50個:)，就去試吓啦。入到去之後，我叫咗個韓式芝士面配雞扒，賣相唔係幾好，味道一般，芝士湯冇乜芝士味。。。飲品方面，係自助餐飲，但係好混亂，啲冰同水周圍都係:(，咖啡都唔好飲，超甜。唔知有冇下次。…Read More

學校喺附近，諗住今日食吓新野，行下行下就來到橫濱。見價錢合理，就行咗入去試吓。我叫咗吉列豬扒拉面，但係另外三個同學嘅魚生飯落曾單唔知變咗咩野，貴咗$5！！個店員仲連聲sorry都冇，仲講如果要轉要等好耐！Anyway, 野食上得超慢，野食來時得返半粒鐘食飯！冇辦法，就加快食野速度。豬扒不過不失，但係啲面淋到棉花糖咁:(！好難食呀！食咗半份頂唔順，大家埋單走人！學生習慣自己俾自己個份錢，但係話咩繁忙時間要一次過埋單！問佢點解有呢個安排，佢就扮聽唔到！搞咗好耐，終於埋到單，走人。絕對唔會有下次！…Read More

今日同班fd來呢度食lunch. 間舖睇來都乾乾淨淨，ok.我叫咗叉燒拉面，配料分量唔錯，但係湯底太咸，同食鹽基本上冇分別。不過面的硬度麻麻，太淋。不過我諗有下次。（ps. 新晉食家，第一篇評論）…Read More