Cabanedezucca的個人專頁

當日係母親節，訂枱嘅時候被告知因為爆滿嘅關係，15樓已經冇位，要我哋去6樓嘅日本餐廳，但係食嘅都係古琴雅苑餐牌。當日去到我哋7:30點餐，但係到八點先上第一道菜。期間我哋有問過服務員(因為用餐時間只有個半鐘)，佢哋用非常差嘅態度話”你又唔係好早落單，係要等㗎啦！”其實要等半個鐘先有第一道菜上枱，已經唔係我早落單定遲落單嘅問題。仲要所有侍應態度都係差到爆，詢問佢哋想要多一客北京填鴨卷餅係咪都要等好耐？ 然後女侍應又係用好差嘅態度話:”你係咪要先？要就即刻俾你！你而家要講㗎喇!”訂枱嘅時候話有壽桃送，而壽桃居然係同啲餸菜一齊上。到我哋食完晒所有嘢，個壽桃已經凍晒。見到嗰日全場爆滿，好明顯佢哋就係做唔切。經濟差我明，但係為咗賺盡而令食客受氣，我諗我真係唔會再幫襯第二次。…查看更多

見佢同一條街有幾間舖，但呢間無人等位，入到去先知道伏……用手機落單，等足廿分鐘先有嘢食，外賣單就見佢不斷出……佢有一邊係用輸送帶送麵，而埋單都係用手機支付，咁其實啲服務員都唔係好重工作量啫，但佢哋係連枱都唔抹，上手食到成枱汁，仲有筷子套喺度佢哋都唔會清理……如果住附近外賣算喇……食物方面佢啲推介嘅係唔錯，例如牛筋、玻璃魷魚……豬紅亦算入味……分量足，亦有辣菜圃任加，係環境同服務唔理想….希望佢會審視吓呢方面啦…查看更多

下午四點去，kimbap得返原味同呑拿魚，揀咗原味，入面有韓式魚蛋、紅蘿蔔絲、牛蒡、醃蘿蔔、雞蛋絲、青瓜絲等等....用料超豐富一啲都唔吝嗇，未食晒一條已經好飽，最近食得太多肉類肥膩野，食韓式飯卷入邊多菜少肉感覺健康清新得多👍🏻…查看更多

武肺疫情嚴重，成條登龍街都無人，唯獨是麵尊要排隊排到出面.......外面就貼咗告示話要配合政府政策，所以只可以開放一半座位，但放眼望去，全院滿座😨難道老細唔怕被撿控？當日嗌咗兩個麵，分別有大腸，豬皮，牛腩，炸魚皮、蘿蔔。最好食係個大腸，又入味又淋，分量又唔算少。至於牛腩就好搞笑，似一塊塊牛肉多啲。個炸魚皮係另上避免浸淋，但個另上係用膠袋😂😂😂個侍應無啦啦遞個膠袋嚟嗰吓真係黑人問號咗🤪不如用個碟仔啦, presentation會好好多。另外嗌咗杯蘋果蜜糖凍飲，都幾甜吓。如果想要葱粒記得喺order紙上面圈呀，我隔離位女士睇唔到無圈到，事後問佢哋拎都不得要領......…查看更多

因為懶，所以而家先補寫食評.....光顧嘅時候係父親節，打去N咁多間餐廳酒樓都fully booked... 唯獨是dim sum library 話十一點仲有位。我哋準時十一點到，食到十一點半都仲見到好多吉枱。由於限時九十分鐘，所以我哋不敢怠慢，一坐低就嗌嘢食。其實睇番餐廳格局、進取嘅定價，居然仲要限時九十分鐘，真係好令人O咀....好彩點心都唔算太耐，大約十五分鐘就上枱。不過味道十分普通無驚喜。燒賣蝦餃叉燒包都係正常貨色，灌湯餃定價$88一客但用料唔算上盛豐富，新派點心如擔擔湯包同麻辣鱈魚生煎包太濃味，直頭可以講係咸，完全蓋過哂其他食材嘅味道。最好食係個星洲炒米，炒得乾身香口，可惜分量好細只夠二人用。至於服務方面我認為係不過不失。個別員工殷勤有禮，但有位制服唔同顏色嘅員工就完全配合唔到餐廳格調，首先佢動作係屬於心急派，喺呢間相對叫優雅路線嘅餐廳當中頗為突兀，最搞笑係我哋食完點心，拎起個餐牌想嗌甜品嘅時候，佢即刻九秒九走埋嚟用相當無禮貌嘅語氣同我哋講:”限時個半鐘喎，你而家仲想嗌嘢？嚟到你都食唔切啦！” 當堂我哋所有人都打咗個突...無諗過呢間餐廳嘅員工可以咁唔友善，再者當時係十二點，距離九十分鐘仲有半個鐘，佢哋啲甜品都不外乎楊枝甘露、布甸、奶凍，我相信呢啲都係雪定而唔係叫先整掛？無理由覺得半個鐘都上唔到枱然後唔俾食客嗌甜品囉。總括而言，可一不可再。…查看更多

每次經過呢間舖，佢個貨架都空空如也，得返一、兩條麵包....望吓價錢其實唔平嗰喎！究竟佢係極少量製作定係咁好賣呢？卒之有一日我晨早十二點半嚟到，見到琳琅滿目嘅麵包種類，有咸嘅、有甜嘅....不過我本人就唔嚐甜，所以買咗兩個咸包— 辣肉腸方包同蒜茸法包。韓國老闆娘好friendly, 佢教我要薄薄地咁切個辣肉腸方包再拎去叮，然後點佢送嘅洋蔥白汁。返到屋企已經急不及待想食，一切開已經聞到香味⋯每片包都有芝士、辣肉腸同焦糖化咗嘅洋蔥，而佢送嘅洋蔥白汁真係好畫龍點睛，成件事好夾，仲有啲似食緊pizza咁。。。食咗半條已經好飽，正餐都唔洗食！總括來說呢個小店係好值得再幫襯！…查看更多

我係第一次嚟利寶閣飲茶嘅，集團其他分店我未試過，但今次嘅體驗足以令我以後唔會再光顧利寶閣。當日係母親節，住附近嘅我發現所有酒樓都訂唔到枱（係我衰嘅幾日前先嚟訂枱），但唯獨係呢間酒樓，電話一接通就爽快答我：有位呀！於是我就訂一點。去到見到門口人山人海，心諗好彩訂咗枱啫！點知發現，原來全部等候嘅人群都係訂咗枱（因為接待員話唔接受walk in)，我哋被告知等多三張枱就有得入，點知一等就等咗五十分鐘。我企無所謂呀，可憐兩個老人家入到去發現原來有好多吉枱，但係咁大間酒樓得幾個侍應，佢哋根本就做唔切。有架車上面推滿點心泊咗喺酒樓中間，啲點心擺咗喺度好耐都無人serve... 我哋嗌咗燒鵝，佢無酸梅醬，嗌煎蘿蔔糕又無甜醬麻醬，總之平時有嘅醬汁佢都唔會俾你，到你開口問，無論係個傳菜阿姐定係個樓面侍應都係好似夾定咁唔答你，佢唔會拒絕你嗰喎因為佢唔係無丫嘛，但佢係點都唔會俾你囉成間酒樓咁大佢請得嗰幾個樓面，人手嚴重不足，真係好離譜⋯⋯最令我接受唔到嘅係佢環境衛生極之惡劣，周地都係廚餘雞骨無人執，連張枱布都有陣酸噏味，真係屋村酒樓都無咁衰啦大佬...講返食物質素，佢個荔芋帶子入面竟然係無帶子，煎蘿蔔糕入面無臘味，燒鵝係又乾又甩皮甩骨............總括嚟請，係唐x點心質素...上面講嘅野係有圖為證，我真係諗極都唔明點解呢間野會有咁多好評。成件事簡直就係一個伏，希望你哋幫襯嘅時候三思⋯…查看更多

無諗過九龍城會有咁好食嘅居酒屋！由前菜到串燒到炸物等等都好有驚喜....而且當晚招呼我哋嘅男侍應態度殷勤誠懇，笑客親切。大家記得訂位，去過幾次都座無虛席......…查看更多

喺蘋果日報上面見到介紹，話呢一間小店嘅大廚係酒店餐廳出身。本身我係好鍾意食麵，又好鍾意飲湯，特別係濃湯，於是就趁閒日過去幫襯下。試過第一次之後真係念念不忘呀！首先佢每一碗麵都配唔同嘅高湯同埋唔同嘅麵條，食得出個心機同埋食材嘅新鮮，而啖啖濃郁嘅高湯真係會令人飲清光...食完係唔會頸渴㗎！而且店員服務殷勤，嗌墨魚麵會有圍裙，嗌海龍王麵會有濕毛巾等你搣完蝦殼可以用... 真心推介呀！不過要注意佢每日下午三點至到六點係唔開嘅。…查看更多

呢間位於保安道街坊店已經䇄立咗喺長沙灣區幾十年，雖然裝修簡陋，但價錢非常親民炸豬扒麵又薄又大，外脆內juicy,仲要醃得非常入味，都係廿七蚊咋！另一必食推介仲有菜肉雲呑，自家包製，皮薄多菜，平時打邊爐都會特登過嚟買生餃！注意如果你嗌麵佢係會俾上海麵，上面會有少少雪菜。。。。。…查看更多

已經係第二次嚟，因為呢度無論食物定係服務都一流。唯獨是環境未有高級會所嘅氣派，樓底亦唔高，坐喺大廳更加係無窗。講返食物先，點心師傅係前米之蓮大廚，所有點心即叫即做，上枱熱辣辣。推介龍皇脆米腸粉！佢哋個招牌黑毛豬叉燒今次就冇嗌啦，因為百幾蚊得幾舊，真係唔係次次捨得食呀，雖然入口係好林同埋無筋，仲有陣陣火炙嘅香味，不過性價比呢....注意午市營業時間頗短，1200-1500,1430last order.…查看更多

The atmosphere here is quite good however the food is over-priced. Our table is served by a young lady(probably a Philippino) who is not really professional. it was a round table and I was sitting against the wall. Whenever she wanna served the one next to me her body touched my head Ian's it happened for a few times. There was one time she even used her hand to push my back and stepped on my headphones without lifting her foot up until she finished refilling the water. This is really unprofessional and unacceptable.…查看更多