colalachan的個人專頁

今日同太太夜晚去開深水埗逛黃金買game，順道去下呢間同事介紹嘅懷舊冰室試下。夜晚差不多7點半到，都幾旺場，不過都係等左3-4分鐘就有得入。一入門口就有好多懷舊嘅poster(見到可口可樂都眼前一亮！)同霓虹燈，成個架局都顯得好有心思。而餐牌就設計成信咁入落個懷舊信箱到，幾過癮的。食物方面我地就叫左2個餐，沙爹牛公仔面同芝士豬頸肉撈丁沙爹牛公仔面啲沙爹好香濃，公仔麵淥得剛剛好，唔會太腍，唔錯唔錯。至於芝士撈丁個芝士醬非常稠密濃郁，唔係好鹹，熱辣辣食散發出香濃嘅芝士味，豬頸肉就煎得剛好，配埋撈丁的確一流。另外我地仲叫左個老鳳10大必食嘅蝦多士，蝦多士用兩塊麵包中間夾著蝦滑沾上麵包糠炸， 炸到相當乾身，外脆內腍，唔會太油膩， 配上沙律醬，中和油膩嘅感覺。飲品方面就叫左杯雜果賓治同飛女可力，雜果賓治個糖水可能我唔係太喜歡，有點葯水嘅味道，不過又唔會好抗拒，最後都係一滴不漏><，而太太個杯飛女可力，聽個名就過癮，成杯飲品有食芭菲呢感覺，插住張飛女啤牌，店員仲好有心提醒你食左個張啤牌先以免變腍。加左cream嘅可力，飲完都幾飽，哈哈!…查看更多

今日黎到觀塘東廣場搵嘢食，呢度有好多價錢實惠而又好味嘅小型食店，Coffee Art就係心水之選。環境上面，用左型格工業風裝修，座位闊落，坐得幾舒服。雖然夜晚收工去食，不過都唔使等位。食物方面就叫左個Dinner set，前菜可以揀綠茶多士或沙律，今次想揀左沙律，酸酸地嘅芝麻醬開開胃先。跟住就輪到主角出場，就係蒜香蜆肉意大利粉，意大利粉軟硬度剛好，每條都沾上蒜香，蜆肉亦保持到鮮味同Juicy，值得一食！另外再order左小食- 香草忌廉智利藍青口，一上檯已經聞到好香忌廉牛油味，食落青口嘅鮮味同奶油香味爆發出黎，十分滋味！最後仲叫左個鐵板焦糖香蕉雪糕班尼，呢個甜品真係整得十分出色，Brownie用鐵板熱住，凍冰冰嘅雪糕就慢慢因為Brownie嘅熱力溶化，雪糕連埋Brownie一齊食，口腔充滿住冰火嘅口感。而且仲有得淋朱古力醬落雪糕Brownie上，朱古力濃度Double，朱古力控一定好愛食。朱古力同香蕉有幾夾就不用多說，成個甜品令到呢餐大滿足！ …查看更多

香港近年輕番懷舊冰室嘅餐廳，而今日就經過見到淘大新開喜喜冰室，門面已經係七八十年代feel，不如入去食個茶餐，懷舊一番。餐廳入面裝潢充滿住老香港風味，擺左好耐以前嘅電視雜誌，貼左不同代嘅明星卡，連餐具都好有心思，用個餅罐存放，刀叉就用舊時大漱口杯裝住，好有特色。至於食物方面，就叫左個喜喜茶餐($46)同索女餐($49)，喜喜茶餐嘅叉燒湯意粉好好味，叉燒都足料夠厚，而火腿炒蛋加左蔥花，令個味道更香。索女餐嘅牛油焗餐包，熱辣辣上檯包香撲鼻，雖然只係甜豬，不過係呢個舊環境食好有feel。食物普遍都比同區啲茶記貴，不過黎呢度食食環境佈置已經值回票價。…查看更多

入到奧海城，啲食店同一般商場嘅連鎖店差不多，不過行到奧海城一期呢間店就吸引左我同太太嘅眼晴，充滿書卷味嘅｢書湘門第｣。湘菜我地都好少試，以辣嘢為主，有啲似四川菜，有水煮魚個啲食。咁我地都唔係好食得太辣嘅關係，就叫左鐵板孜然牛肉同糯米蒸排骨食。上菜啦，一黎就有咋咋聲嘅孜然牛肉，香味撲鼻，用左洋蔥同辣椒爆香嘅牛可以送幾碗飯，牛肉有鐵板香味同相當之嫩口，好好味！之後就黎一個糯米蒸排骨，用糯米飯包住排骨黎蒸，賣相都幾特別，食落其實同平時食鳳爪排骨飯差不多。下次要搵多啲朋友試埋其他特色菜！…查看更多

聽講呢間Issac係韓國都相當之出名，黎到澳門就一於去拜會下，鋪頭係新馬路郵局對面嘅斜巷，都要花啲時間去搵。鋪頭位置有限，所以都要等一陣位。係Issac梗係要食佢地嘅多士，今次就叫左個火腿芝士多士同一份蜜糖雞翼。因為係即叫即整，所以都要等10-15分鐘先有得食。黎到啦，一份熱辣辣嘅火腿芝士多士，面包皮烘到脆身，面頭仲塗上蜜糖，面包食落更香甜。而中間嘅芝士半溶狀態仲可以拉下絲，一啖咬落去層次豐富，外脆內軟。而蜜糖雞翼都泡制得恰到好處，雞皮都係脆身，入面十分嫩滑，洒上芝麻令雞翼更加香。下次黎澳門掃街嘅同時都要留番個肚黎issac整件多士先得。…查看更多

有次經過Mikiki 見到呢間食日本鍋嘅餐廳中午4人同行3人收費，就可以食到火鍋‘放題，咁抵就梗係若埋朋友一齊去啦，中午都唔使點等就有得食。可以先自選湯底 跟住可騎食牛定豬，我就揀左壽喜燒鍋，甜豉油湯底，咁係太甜。放題都幾多料揀 菜有油墨菜，生菜，娃娃菜，仲有菇，丸同埋烏冬揀。飲品就自由添飲，另外有個乳酪雪糕食添。值得食就係佢地嘅粟米 雖則細細舊 但就好清甜 當然一個人都食左5 6舊 可以清清食肉啲肥膩感蕃茄鍋 真係有蕃茄肉嘅湯， 好香濃鮮茄味，試左一啖 酸酸甜甜都幾開胃。總括黎講中午黎真係好抵食!平均1個人都係60幾蚊倒，就有咁多嘢食。…查看更多

呢間係新蒲崗新開嘅文青餐廳，就趁lunch同同事黎呢度一試，晏就都幾多OL黎食，得左大概10分鐘就有檯。餐廳佈置得好新潮風格， 以外國有機茶為主打，除左餐廳仲有啲盒裝嘅茶同果乾出售。今日我就叫左個一人意大利薄餅餐同凍血橙茶，同事就叫左三色焗薯。薄餅唔係太厚身，油份都不多，不會感到太油膩，芝士處於半溶，所以又要試一試拉倒幾長嘅絲。個人鐘意pizza有菠蘿，因為可以無咁濟，呢個pizza落左煙肉碎係面就偏鹹，所以就一般。至於血橙茶，同同事分享左啲黎飲，大家一致同意，呢個係維多C味，我地未試過血橙係咩，原來真係同橙味有好大分別，個人就對維他命片味就真係一般般，下次都係叫番熱檸茶算 哈哈。…查看更多

今日黎到銅鑼灣搵食，見到呢間王家沙好有風味同平時商場嘅裝修都不同，係一啲高級餐廳嘅擺設，燈色都暗有一種浪漫嘅感覺，咁就一於去試下。今次叫左好多嘢食，紅油炒手　好香辣油味，但食落就唔係好辣。花雕醉雞   好香花雕味，食完個喉嚨有點熱，對我地唔飲酒嘅人黎講都能品嚐酒香佳肴。佢地仲用咁特色嘅酒埕去裝，好有風味。蟹粉炒年糕 年糕好煙韌， 蟹粉蟹黄味十分香濃， 食落又唔太漏，值得一試。蕃茄節瓜魚湯　食完之前較濃味嘅菜，飲個清魚湯可以中和一下，個湯飲到一滴都無哈哈。蟹粉小籠包 一口可以咬得哂，皮薄涵靚，湯汁充滿口腔裏面，蟹粉香味爆哂出黎！…查看更多

今日同朋友慶生，就揀左新浦崗都幾出名嘅Café試下。呢間窩子嘅設計同裝潢佈置充滿懷舊色彩。今次我地一行多人都可以叫多啲菜色食。紅酒燴牛尾配意粉，牛尾好淋同入味，個紅酒汁配埋蒜蓉意粉一流。韓式泡菜豬肉薄餅，佢同一般嘅pizza唔同，因為個皮係酥皮邊，失色嘅係非常的油，令人有一種油膩感，不過好彩有泡菜嘅酸減少油膩感覺。蛋沙津窩夫本身對咸食窩夫感覺都一般，而配蛋沙律味道太淡，味道一般有啲沙律還沙律，窩夫還窩夫呢感覺。餐飲有熱情果茶，熱情果香味慢慢滲出，好味道。最後仲叫左個疏乎厘pancake，好鬆軟，配埋雪糕一齊食一流呀！…查看更多

觀塘真係好多好嘢食，今日去到工廠區個邊搵食，太太介紹呢間米線工房俾我，果然一試難忘！ 我地叫左2個小鍋米線，一個要麻辣湯底 魚腐 仿鮑片 豬腸，另一個要酸辣湯底 墨魚丸 黑魚咀 生菜。成個米線份量唔少，有肉碎，炸菜嘅料，米線幾彈牙唔會好韌，兩個湯底都唔係太鹹，送料俾得幾多都係30幾蚊，好抵食。酸辣湯底偏酸，唔係好辣，而麻辣湯底一上檯已經聞倒香濃嘅辣味，食落都幾辣，所以要叫杯凍檸茶令條舌過一過冷河。另外我地仲叫左個小食麻辣牛腱 10分好食，個種麻辣既味道令到成個嘴都麻住，食到雖然去到噴火嘅程度但啲辣都好快散。麻辣有啲同大陸個隻周X鴨嘅味相似，我相當喜歡個隻麻香。…查看更多

係香港唔係成日食到葡國菜，有次行行下海港城發現呢間奧瑪葡國菜，於是就book左一日坐望維港景嘅檯食晚飯。成間店鋪環境都好舒服，仲有所有啲碗碟都係有葡國特色，用番藍白色嘅格調。咁我同太太就叫左一個湯一個主菜同個小食。馬介休球　係澳門基本次次都會叫嘅菜色，呢度整得相當出色，好香嘅薯仔味，入面嘅馬介休大大舊得黎又唔係好鹹。葡式薯蓉青菜湯，一樣好香薯仔味，入面仲有好多片葡式臘腸，不會遜色過澳門餐廳。霹靂雞翼，最有驚喜同值得試嘅菜色，上面嘅黃色醬汁，甜甜酸酸，好開胃，雞翼本身有好濃嘅炭燒香味，外脆內嫩，再講多次係好好味！仲叫左個主菜海鮮飯，不過掛住食唔記得影~以後唔洗去澳門都可以係奧瑪葡國餐廳嘆到正宗葡國菜。…查看更多

我本身好喜歡飲茶，每日都無茶不歡，日本茶、中國茶、西茶都合我心意，所以我啲同事就帶左我去一間新蒲崗嘅隱世小店－茶作，呢間鋪雖然位於工廈，都唔係難搵。係鋪前已經聞倒陣陣嘅茶香，原來呢間鋪頭唔只係飲茶，出售茶葉、茶具等，仲有茶味手工雪糕食。平時綠茶雪糕就見得多，普洱，鐵觀音雪糕真係第一次見，好特別！同同事叫左幾款茶味雪糕，有半熟普洱、鐵觀音、玄米、玫瑰味，自已就食普洱味雪糕，一入口唔係好食得出普洱味，但當你慢慢含住係口中，就會有普洱嘅回甘味，茶本身係好解膩加埋厚滑嘅雪糕，食完成個人感覺好清新。下次要試埋其他茶味先得！成間鋪嘅氛圍都好relax，拎住本書，係度嘆杯茶，你話係幾寫意嘅生活呢！…查看更多

又係懷舊冰室feel嘅餐室，因為係新蒲崗mikiki新開就去試下，不過晏就黎食都排幾耐隊，10分鐘左右就排到。啲侍應姨姨好有禮貌，俾錯左食物好爽手就換過。今次就叫左個炸菜肉絲雞翼公仔麵 ($34) ，跟餐就叫左杯雜果賓治 +$6 (P.S 特飲本身要$22)，公仔麵就都幾鹹下，自問食嘢都偏濃味都要係咁飲嘢，因為本身炸菜肉絲都幾鹹，公仔面要落番少啲調味料會好啲。而雞翼都炸得唔錯，外脆內嫩，浸左係湯到都係脆身。雜果賓治係雜果少左啲外都幾好飲！不過因為好多人等嘅關係都要食得急啲就要離開。…查看更多

今日行經太子見到餓餓地就搵左間冰室食個下午茶嘆番下，今次就去到係專賣婚禮用品嘅金都商場旁嘅太子冰室。餐廳環境昏暗都幾太氣氛，不過都尚算乾淨。太子冰室主要應該係食扒出名，因為叫牛扒之家， 不過因為未係餓到要食正餐，就叫左個西多食，連凍檸茶37蚊，正常價錢。西多可以自己揀餡，有花生醬等西多炸到金黃色，非常鬆脆，入口即溶，不過花生醬應該落得比較少，因為唔係好食到花生醬味～不過凍檸茶個茶味偏淡，味道一般。係度渡過一個relax嘅下午，爽。…查看更多

黎到中上環拍拖，除左行下元創坊，行下啲舊街道之外，仲黎左呢間好出名嘅茶記食午餐。瑞記座落係上環街市嘅熟食店裏頭，有一種懷舊嘅味道。招牌依然係由右至左寫起。店鋪位置唔多，但係朝早黎食唔係咁多人，唔使等位。黎到呢到就要試試佢嘅餐肉蛋包 $13，炒蛋加左蔥段，令到香味提升，真係幾好食。我地仲左西多士 $22同火腿牛麵$26，麵同一般茶記差不多，而西多士就幾第一次見呢個做法，瑞記用將麵包塗左啲蛋漿跟住就煎，然後就塗啲煉奶上包面，同一般茶記拎多士去炸嘅做法唔同，個包會無咁油膩，不過咁整就同平時烘包差不多。最後要講下杯凍檸茶，佢地特別之處係唔係落糖漿而係落砂糖，因為凍嘅關係係杯底仲見到砂糖係度，飲嘅時候會食到一粒粒糖，口感好得意，唔知舊時嘅凍檸茶做法係咪都係咁嘅呢？…查看更多