msfoodo's Profile

屋企附近商場開咗間新嘅日韓料理，週末懶得煮飯過嚟探探店。一打開餐牌就俾佢嘅壽喜燒套餐吸引到，分為三個價位，有美國、澳洲同日本和牛，唔使二百就食到日本宮崎和牛，感覺都幾抵食。餐牌入面有介紹壽喜燒嘅食法，對新手小白都非常友好，好貼心。食材一送上枱，我哋一見到啲和牛嘅質素已經知道冇揀錯，油花分布非常綿密，色澤鮮嫩，而且份量仲要唔算少，配搭上前菜、蔬菜同烏冬，絕對唔擔心食唔飽。牛油煮溶之後將牛肉輕輕煎熟，加啲壽喜燒汁，再沾上蘭王蛋，入口嫩滑又重牛味，特別欣賞佢嘅壽喜燒汁唔會太鹹，適合唔鍾意重口味嘅朋友。鮮果茶同檸檬茶賣相亦相當有誠意，甜度適中。…Read More

放工約咗同事睇戲，剩低唔係好多時間，揀咗呢間喺戲院附近嘅燒肉店，貪佢有一人燒肉set快靚正。我點咗牛魔三重盛宴，有牛舌、牛五花同牛板腱，配埋湯、沙律同飯，份量好夠。加錢Upgrade咗蟹粉蟹黃蘭王拌飯，香濃鮮味，撈匀食完全係輕易KO成碗飯。同事點咗牛自慢系列，有日本A4和牛西冷同牛小排，配上蘭王鵝肝炒飯，賣相吸引。A4和牛西冷質素自然有保證，大大片油脂豐富嘅和牛放上火爐輕輕一燒，入口即溶，百鬆啲食到呢個質素嘅和牛非常值。…Read More

上完興趣班遲咗食晏，近近哋去咗附近嘅正九，好耐冇食佢嘅牛腩牛筋，入到去發現附近呢間仲係冰室，有我至愛嘅西多下午茶餐！芝士流心西多即叫即整熱辣辣，牛油同糖漿俾得夠大方，中間夾心嘅芝士亦好足料，非常邪惡。一時間糾結要牛腩、牛筋定牛肚嘅我哋最後直接揀咗乜都有嘅全家福，份量好足，底下仲有白蘿蔔。崩沙腩半肥瘦，非常之入味，口感腍中帶爽，最正係嗰片爽口嘅筋膜，令人回味無窮。金錢肚同白蘿蔔同樣入味，特別係白蘿蔔，又甜又冇渣，近乎入口即化。通菜爽嫩，調製嘅腐乳亦鹹甜適中，價錢抵食。…Read More

今個週末終於帶咗小朋友嚟朋友介紹嘅富來農莊，貪佢一個場地有哂大人細路都啱嘅活動，而且價錢又唔貴，自駕過嚟仲有免費停車場。我哋兩個大人一個小朋友，除咗BBQ之外揀咗$130嘅遊樂套票，有哂小朋友最鍾意嘅活動，比散買抵玩好多。一入去有超大嘅草地，有好多唔同類型嘅攀爬架，放電一流。最好嘅係佢就喺正燒烤區對出，大人燒嘢食嘅時候都可以離遠望住小朋友玩，各自各精彩。小朋友至愛嘅撈金魚，魚嘅數量好多，簡簡單單就撈到十條魚，小朋友好有滿足感。大頭蝦好生猛，好多都有膏，係用倒鈎勾佢上嚟唔使用餌，小朋友都操作到。嚟到農莊當然唔少得餵小動物環節，兩隻山羊都好好胃口，搶住食草好可愛。BBQ爐旁邊仲有做小手工嘅攤位，大人食嘢嘅同時小朋友都絕對唔會悶親。夾公仔機同遊戲機當然唔少得，不過實在太多嘢玩，小朋友都冇特別扭計話要夾。場內仲有好驚喜嘅吹泡泡機，絕對會令小朋友尖叫，泡泡用強力吹風機吹出嚟，營造到好似落雪咁嘅場景，最正嘅係啲泡泡可以維持到好耐都唔消散，小朋友超鍾意玩！BBQ方面都係一啲比較大路嘅肉類同丸類，最推介嘅當然係自己釣嘅大頭蝦，自己釣自己燒自然特別好味，飲品方面包汽水一罐同水一支，另外可以自行加購雪糕雪條。…Read More

同先生行完山當然要食餐好啲慰勞下自己，難得嚟到布袋澳當然唔少得望住海景加吹住海風食海鮮。坐低已經見到店員喺旁邊開海膽，原來佢哋今日啱啱落完海捉海膽，隻隻新鮮肥美，非常吸引。海鮮選擇非常多，仲有唔少小菜可以選擇，價錢合理。店員見我哋心大心細，直接帶我哋出去魚缸揀海鮮，仲好細心咁逐樣報價，最後我哋點咗三款海鮮。首先送上嘅係豉椒炒大蟶子配腸粉底，腸粉炒得夠鑊氣，肥美冇沙嘅大蟶子爽口彈牙，加上清脆嘅青椒，成個組合都無懈可擊！當季奄仔蟹非常肥美，鹽焗嘅做法為鮮甜結實嘅蟹肉加上一點鹹香，原隻對切送上，完全可以用爆曬膏嚟形容，極度邪惡。最後當然唔少得最吸引嘅海膽蒸蛋，新鮮即開嘅海膽果然非常鮮甜，加上大量爽口青蔥，入口完全係鮮味大爆發！…Read More

放工同同事兩個人打邊爐，佢又出名細食，我諗起之前經過海之戀呢間主打藥膳雞湯底米線嘅舖頭有出一人火鍋，拉咗佢嚟試下。我哋不約而同揀咗藥膳雞湯底，無論配肉類定蔬菜都好夾，而且感覺較為健康。$138嘅B餐包prime grade牛肩胛肉同無激素豬肉片各一碟，我哋兩個女仔食份量非常足夠，而且肉類質素唔錯，特別係豬肉片，肉質軟嫩有驚喜。雖然肉類係定量，但可以出去自取蔬菜、丸類同粉麵，選擇仲非常多，啱晒鍾意食蔬菜嘅朋友，仲夠晒健康；丸類方面亦有心思，特別推薦麻辣貢丸、魷魚羹同黑松露豬肉丸。放題本身包幾款台式飲品，亦有唔少冷熱飲品可以選擇。雪糕同雪條選擇非常多，仲有movenpick同DREYER'S可以選擇，絕對可以食到回本。…Read More

最近發現路德圍轉角開咗間米線舖，主打貴州風味米線，今日午餐同先生去幫襯下。除咗幾款主打嘅貴州風味米線，仲有小食、涼菜同甜品可以選擇，價錢抵食。我揀咗牛肉米線，牛肉唔係一般嘅肥牛，有少少似炆好咗嘅牛𦟌再薄切，份量算多，入口軟腍。米線偏粗，軟硬適中，配上小辣嘅牛肉湯底味道唔錯。先生揀嘅辣子雞亦唔錯，雞肉入味得嚟肉質亦保持到鮮嫩。三色糍粑分別係糯米、粟米同高粱口味，即叫即做，外脆內軟糯，加上花生碎同芝麻口感更豐富。飲品可以加冰底，非常貼心。…Read More

屋企附近開咗間新嘅西餐廳，主打鐵板扒，以後鋸扒又多一個選擇。餐廳位於荃新天地二期地下，門外有大型聖誕裝飾，非常吸睛，打卡一流。食物方面主打鐵板餐，有幾款唔同嘅牛扒，仲有羊架同雜扒餐，餐湯仲可以加錢轉酥皮龍蝦湯，價錢合理。酥皮龍蝦湯熱辣辣送上，即叫即焗，酥皮保持到非常香脆，滲透着淡淡嘅牛油香，龍蝦湯鮮甜濃郁，加上香草碎非常惹味，仲有啖啖彈牙嘅龍蝦肉，好有誠意。肉眼扒大大件童叟無欺，肉質軟嫩冇筋，我叫咗五成熟剛剛好而且冇血水，配上黑椒汁非常香濃惹味。先生嘅雜扒餐同樣內容豐富，有豬扒、雞扒、司華力腸同火腿，賣相吸引，食材質素亦唔錯，特別係雞扒，肉質嫩滑多汁，而且冇雪藏味；另外佢嘅沙嗲汁亦值得一讚，非常推薦！西多士即叫即整熱辣辣好香口，淋上朱古力醬賣相吸引，沾上煉奶就更加滋味。青檸茶梳打甜度適中，配上清新嘅薄荷葉非常解渴。芒芒椰椰用上鮮芒果同椰汁打成，口感幼滑，味道香濃。…Read More

開心星期五同先生去睇戲，當然要醫咗肚先入場，搵咗荃灣廣場附近嘅呢間泰越小店，貪佢價錢親民選擇又多，我哋揀咗好抵食嘅二人餐。首先送上嘅係生菜包，加入咗好多香料，入口味道豐富，非常有驚喜，喺第二道菜未上嚟之前我哋已經輕鬆解決成碟，一致認為係必食！泰式粉絲扇貝一碟四件，用上類似泰式沙律嘅調味，入口非常清新，扇貝蒸得啱啱好唔會過老，而且大大隻啖啖肉，非常抵食。虎蝦大大隻而且數量唔吝嗇，加入泰式香料去燜粉絲，非常惹味有特色。芒果糯米飯份量唔細，配上幾乎成個芒果，果肉鮮甜，糯米飯椰味香濃。青檸茶茶底夠濃，配上青檸乾好有誠意，推薦；先生嗌嘅龍眼冰好清新，入口甜度亦適中。…Read More

最近發現屋企附近有滷味小食店好吸引，上網一查原來係肥姐小食老闆個新抱開，喺商場入面可以嘆住冷氣食，環境乾淨舒適。我哋叫咗大生腸、細生腸、鮑魚仔、豬頭肉、雞腎、豬耳、豬心同墨魚，店員知道我哋唔係現場食，幫我哋拆竹簽入盒裝好，醬汁亦可以另上，非常貼心。大生腸肥厚夠粗身，滷得啱啱好唔會太韌，入口亦冇內臟嘅腥臭味，必須一讚。細生腸係我兒時至愛，口感爽脆，入口同樣冇異味，食材新鮮加上特製嘅醬汁，令人食完一啖又一啖。墨魚非常新鮮，入口口感彈牙，特別係墨魚腳，配搭甜醬同黃芥末，帶嚟微微嘅刺激感，非常開胃。…Read More

Happy Friday決定唔煮飯，喺先生公司附近食埋晚餐先返屋企，佢推薦呢間開咗冇耐嘅越式餐廳，平民價錢但係質素唔錯。餐廳食物選擇多，仲有set Menu，追加小食同飲品都好抵食。生牛肉湯河湯底鮮濃，牛肉半生熟，放入湯底略為浸熟再食，入口嫩滑又不失肉香，加入青檸同辣椒更加惹味，非常推薦。蝦餅標榜鮮蝦手打，入口果然彈牙，味道亦鮮甜，而且即叫即炸，口感香脆而唔油膩，同樣推薦。軟殼蟹成隻上，切成兩三件方便食用，同樣係即叫即炸，肉質鮮美。牛肉串燒肉質嫩滑而且唔韌，配上特製嘅沙嗲醬同花生碎，香口惹味。清甜嘅椰汁配上新鮮芒果同西米，自然係冇得輸；先生最愛嘅三色冰同樣清新解暑，絕對唔少得。…Read More

朋友剛剛坐完月，約好去佢屋企探BB，上去之前喺附近食少少嘢醫肚先，經過見到呢隻咁吸睛嘅樹懶，超級可愛。飲品選擇多元化，仲有少量小食可以選擇，我哋揀咗兩杯飲品同一客窩夫。窩夫賣相吸引，抹茶窩夫夾住紅豆餡，再淋上奶蓋，成個組合非常夾，窩夫入口鬆軟，抹茶嘅味道好出，紅豆餡亦唔會過甜，非常推薦！檸檬愛玉一向夾，配上桂花亦毫無違和感，甜度適中，愛玉口感軟嫩，整體清新消暑。珍珠奶茶嚟講，眾多茶底之中我最喜歡烏龍，獨有嘅香氣配上黑糖味道醇厚，珍珠有咬口又唔會太硬，非常唔錯。…Read More

準備已久嘅project終於完成，為咗好好慶祝一下，先生信守承諾帶我嚟食鐵板燒，對上一次食已經幾個月前喺深圳，食材份量比較少，略嫌有啲意猶未盡。今次揀咗位尖沙咀呢間日式鐵板燒，網上評價唔錯加上地理位置方便，我哋一個星期前就預約定。晚市有兩款套餐可以選擇，亦可以散叫。我哋揀咗和牛龍蝦鮑魚套餐二人前，價錢合理，內容超豐盛，仲加入唔少高級食材，感覺物有所值。點餐後侍應為我哋送上沙律同前菜三小點，分別係煙燻雞肉、日本豆腐同蒜頭漬，清新開胃。另外點嘅蝶豆花青檸梳打甜度適中，清爽解渴，有別於一般嘅蝶豆花飲品，餐廳將蝶豆花整成冰塊，當蝶豆花冰慢慢溶化，飲品就會出現漸層變色，超級夢幻。刺身拼盤有牡丹蝦、油甘魚同拖羅，非常新鮮，特別係牡丹蝦，肉質厚實，味道清甜。產自兵庫縣嘅生蠔體型巨大，已經細心咁樣落埋酸汁，唔需要額外調味，入口帶有淡淡嘅海水味，鮮甜爽口。完成前菜嘅部份，師傅向我哋展示今晚嘅主菜，海鮮拼盤極度吸睛，巨型伊勢海老配上鮮艷奪目嘅蝦膏，非常邪惡；仲有大大隻嘅鮮活南非鮑魚，仲不停郁緊，令人食指大動！除咗海鮮，當然唔少得將會用嚟做薄燒卷嘅A4鹿兒島和牛同日本黑毛豬，色澤嫩紅，油脂分佈均勻，賣相吸引。伊勢海老煎香之後加入用蝦膏煮成嘅醬汁，鮮味濃郁，配上羅勒汁獨有嘅香味，更加激發出伊勢海老嘅鮮甜，加上彈牙嘅肉質，令人回味；蝦頭嘅部份會留返稍後煮湯用，唔會浪費。完成一道咁高質嘅海鮮之後，侍應為我哋送上間場嘅茶碗蒸，加入咗松露嘅蒸蛋又香又嫩滑，面頭淋上鰹魚汁，底下鋪咗少許木耳絲，令口感同味道都更豐富。南非鮑魚用海帶蓋住去煎保持鮮嫩，咬落去爽口得嚟唔會太韌，配上自家熬製嘅鮑魚汁同新鮮昆布一齊食，香味更突出；另外師傅專登留低鮑魚肝香煎，係平日比較少食嘅部位，只加入少許鹽調味，細嚼之下非常香口，十分出色！和牛同黑毛豬薄燒加入鮮筍絲同雜菇，口感豐富，簡單淋上燒汁調味已經好滋味；伴碟嘅蔬菜亦處理得恰到好處，特別係南瓜同蒜片，前者香甜軟糯到好似食緊甜薯咁，後者又香又脆，令人食唔停口。完成主菜之後侍應為我哋送上剛煮好嘅味噌湯，加入咗龍蝦頭嘅味噌湯鮮香濃郁，非常滋味。鐵板炒飯加入白飯魚乾、櫻花蝦乾同鰹魚乾，口感非常有層次，仲有自家製嘅酸梅醬，酸甜解膩。食咗一半之後仲可以加入鰹魚湯同芥末做成茶漬飯，另有一番滋味。最後侍應為我哋送上紅豆雪糕同焦糖多士，焦糖多士入口香脆，帶有濃濃嘅牛油香，非常邪惡。餐廳食物質素好高，新鮮嘅食材加上師傅嘅巧手，無論係烹調嘅過程定係食物嘅賣相同味道都令人非常享受，另外必須一讚嘅係侍應服務親切熱情，對菜式嘅講解亦非常仔細，非常推薦！…Read More

情人節要工作，但仍然要保留小小嘅儀式感，先生特意book咗呢間我想食好耐嘅omakase提早慶祝，位置喺半島酒店嘅basement，門面簡樸低調。Dinner set有兩款，我哋揀咗瀧Taki，有三款前菜、三款一品料理、八貫壽司、湯同甜品，非常豐富。首先送上嘅前菜係鰻魚苗配漬大根，鰻魚苗口感滑溜，配上切成細絲嘅漬大根，酸甜清爽，非常開胃。第二道係令人眼前一亮嘅紐西蘭螯蝦他他，用清澈通透嘅玻璃盒裝住，表面再加上金箔做裝飾，非常精緻。面層用上珍貴嘅紐西蘭螯蝦做成他他，中間係清甜嘅水果蕃茄蓉，底層係蝦膏，主要味道來自底層嘅蝦膏，極度鮮甜，係一道值得細細品嚐嘅前菜。接住落嚟係一道熱食——鱚魚卷，做法類似天婦羅，用鱚魚包住紫蘇葉同明太子，裹上粉漿再炸。侍應建議先品嚐一啖，再加青檸汁，入口非常鬆脆，輕薄嘅炸衣顯得出師傅嘅功架，淡味嘅鱚魚配上鹹鮮嘅明太子，加上紫蘇葉特有嘅香氣，層次分明，成個配搭好有心思。完成兩款前菜同一款一品料理之後店員為我哋送上毛巾同漬物，為接住落嚟嘅壽司做準備，介紹嚟緊會先食四貫壽司，然後會去返前菜。好欣賞餐廳上菜嘅安排，連續食幾道前菜或者熟食難免有啲沉悶，梅花間竹上菜反返而加多一份期待。首先送上嘅壽司係北海道深海池魚同鹿兒島赤貝，池魚肉質細膩，細嚼之下釋放出嘅魚油甘香令人回味；赤貝肉質結實爽脆，鮮味十足。鰤魚喺冬天正係當造，比較肥美同顏色較深，口感細嫩，油脂亦較甘香；池魚味道比較濃郁，配以薑蔥蓉令味道更豐富。北海道帶子又厚又鮮，細細咀嚼之下更能品嚐到佢嘅清甜，佐以柚子鹽更加畫龍點睛；以昆布漬過嘅牡丹蝦比一般嘅牡丹蝦刺身更紮實鮮甜，加少少青檸汁更加能夠帶出蝦嘅鮮味。鮟鱇魚肝以醬油慢煮，入口鹹淡適中，質感細膩；漬西瓜用上奈良西瓜醃漬兩年，入口帶酒香，配上魚肝一齊食清新解膩。鯛魚經過醬烤油香滿溢，自家製醬油加咗魚湯熬製特別鮮美，魚皮香脆可口，加埋水菜同漬筍同食，口感更豐富，整體非常出色，係少有連先生都大讚嘅一品料理。完成哂所有前菜同一品料理之後繼續壽司嘅部份，今次侍應為我哋送上嘅係金目鯛、中拖羅同大拖羅，向來喜愛食拖羅嘅我當然雙眼發光。金目鯛肉質味道鮮美，口感肥而不膩；中拖羅肉質香軟無筋，魚味濃厚；大拖羅近乎入口即融，油香喺口腔內蔓延，令人回味。驚喜一浪接一浪，眨吓眼一大匙滿滿嘅北海道馬糞海膽就已經放咗喺我哋前面，色彩鮮艷，係肉眼都睇得出嘅新鮮，入口自然係冇得彈，瞌埋眼都可以想像到自己喺日本。伴碟嘅布丁玉子香軟可口，蛋香濃厚。野鴿清湯用上乳鴿同雞全翼熬製成，再加入大量蔬果同菇類吊味，湯頭清澈見底，係無添加嘅清甜滋味。甜品方面同樣令人驚喜，豆乳福袋嘅造型加上金箔做裝飾，非常吸引。福袋嘅外皮用腐皮做成，口感香脆，內裡嘅豆腐奶凍又香又滑，豆味濃郁而且甜度適中，底下鋪滿胚芽白朱古力，配上淋喺面頭嘅焦糖醬油，成個組合口感同味道都非常豐富有層次。另一款係富有新年氣氛嘅四式甜品盒，有紅豆焦糖餅乾、咖啡蒟蒻、提子沙冰同紅豆餡芝士蛋糕，非常豐富。最欣賞嘅係咖啡蒟蒻，用上低咖啡因嘅咖啡製成，中間配以蜜柑，底下係Rose Mary雪糕配榛子，三種味道出奇地合襯，配搭有心思。最後係黑芝麻朱古力，黑芝麻味好香濃，而且入口即融，質素極高。只能夠講今餐係令人非常滿意嘅一餐，無論食材嘅新鮮程度、配搭同賣相都無可挑剔，食材珍貴而且毫不吝嗇，配搭同賣相好有心思，加上師傅嘅巧手，由前菜至甜品幾乎每一道都有驚喜，唔會有虎頭蛇尾嘅感覺，價錢雖然唔平，但整體質素絕對係對得住地段同價錢，不枉我期待咗咁耐。…Read More

前排同先生去大阪冇食到串燒一直覺得遺憾，咁啱同同事講起佢屋企附近呢間串燒店質素極高，趁住Happy Friday過嚟撐枱腳。打開Menu就知道雞串燒係主打，圖文並茂非常細心，仲有唔少刁鑽稀有嘅部位。一坐低店員首先為我哋送上前菜，有三款漬物，特別鍾意漬蒜頭，入口微辣但冇蒜頭嘅辛味，口感爽脆，非常開胃。味醂魚干燒得好香，表面微焦，沾上加入七味粉嘅蛋黃醬更加香口滋味。雞腎爽口而唔會太韌，稍微加上少少鹽花已經好香口；雞頸肉入口皮香脂肪少，雞肉鮮甜而且飽滿多汁，絕對唔能夠錯過。五花腩肥瘦相間，香口得嚟唔會覺得好肥膩，加上自家醬料非常惹味，推薦！豚肉車厘茄卷燒到恰到好處，薄薄嘅豚肉片色澤金黃，灑上少量鹽同黑椒吊味，一咬落去外面微脆帶鹹香，內裡嘅車厘茄熱辣辣又好juicy，充滿驚喜！只能夠講師傅手勢好，平凡嘅食材都能夠帶出驚喜。雞橫膈膜來自三黃雞，係非常稀少嘅部位，入口多汁有咬口，略帶油脂但又唔會太肥膩，果然冇令人失望；小腿肉口感紮實而且肉味濃，外皮亦燒得香脆可口。雞湯烏冬嘅湯底非常濃郁，食得出冇加味精，係嗰種好純粹嘅濃雞湯味道，就咁配上少量昆布已經好滋味。最後當然唔少得甜品，燒菠蘿就食得多，呢個加咗焦糖嘅燒菠蘿絕對係我食過之中最好味，薄薄嘅焦糖又香又脆，加上甜度極高嘅新鮮菠蘿，一咬落去滴晒汁，超級好味！今晚同先生食得好盡興，食材新鮮加上師傅嘅巧手，上菜嘅時間亦掌握得啱啱好，令初次喺香港食日式燒鳥嘅我哋留低深刻嘅印象，推薦俾想享用高質燒鳥嘅朋友仔。…Read More