tonychanhk的個人專頁

我只想同間舖嘅老板講，你有心係香港開檔做得耐就唔該做多啲功夫同請多啲人，要慳錢就唔好做，我今日4點去食唔係午飯最忙時間，見到幾個員工做到唔停手都處理唔晒成場客人，做到佢哋都有少少手忙脚亂，不過見到佢哋都盡力做，客人都理解無發脾氣，但間舖就真係有太多改善嘅地方：1.請多個人做收銀兼樓面啦，我見收盤阿姐去後面廚房食飯時，成間舖滿客無人收枱，樓面員工太忙根本行唔開去收盤、清潔，要客人自己收盤先有位食2.下午茶餐飲品不能更改，要跟價錢牌上圖片一樣，太攪笑，加錢轉都唔得，太唔靈活啦3.主打清真牛肉麵所以好多伊斯蘭教及其他外籍客人(今日半間舖嘅客都係) 但電子叫號取餐只講廣東話無英文又無顯示牌，外籍客人白等唔知已經可以取餐4.細碗不足得幾隻，見一家大細客人想攞隻碗分食都無晒:(另外讚嘅地方：1.收銀個男仔真係好員工，咁忙都無任何態度差或發脾氣，睇得出有盡力處理出餐及同客人溝通有咩賣晒要更換等等雜事，之後有空閒仲主動行出去收盤送餐，香港後生仔員工已少見，不管佢係咪國內新移民都要讚，好榜樣！2.食物價錢合理，味道唔差，牛肉麵都幾好味，快餐價錢算係咁，另外牛肉夾餅係即做，入口仲係熱，抵讚，不過等出餐時間就等咗耐啲3.有洗手地方(非洗手間內) 俾客人用幾方便4.其實今次賣蘭州麵算幾好生意，比上兩手賣炸雞同漢堡應該有得做，不過老板要多聽意見改善一下，或落舖睇睇總括嚟講我都會返頭再幫襯，希望下次有改進，吸引更多回頭客啦(包括好多外籍客)。…查看更多

帶幾位客人去尖沙咀食飯，客人想看海景又想吃日本菜，揾過幾個地方都滿座，想起之前未通關前人少時，行過海港城商場入邊最尾有兩三日本菜唔使排隊就隨意挑選了天穴，當時食過覺得幾好味及環境好，即刻再打去訂位，選擇去這間原因是有海景又有一流新鮮食材，但今日星期五晚已經好full訂唔到位但可walkin排隊，點了廚師發板以及其他單點菜式，簡單總結：各方面總括係高級消費，一分錢一分貨，唔會令你失望失禮，但未係必食程度高。…查看更多

環境、材料、菜色全部都高分數，主要材料新鮮，味覺外觀一流，當然不能說在尖沙咀區日本料理中最好，但符合預期，俾得這個價有你要嘅嘢，總之同客食飯、同女朋友慶祝、朋友生日之類活動，肯定無失誤。…查看更多

其實除咗肉燥飯同牆上幾張台灣風影相之外(攪笑？) ，湯底及食品同台式無乜關係，不過$168免加一，自取食品、租品等等都算多款，雞蛋、枝裝可樂任攞算係咁，平價火鍋係旺角算性價比高，牛肉同脆肉鯇預咗係中等貨不過算正常唔太差，有豆腐花、雪糕、小甜品食到夠，佰幾蚊算俾足貨，唔係太高要求嘅人可以食。唯一覺得差就有一兩個大嬸伙計同酒樓一樣態度，可以話係一分錢一分貨，反而後生男女員工算有禮貌，不過香港地講服務都係笑吓算。…查看更多

香港仔酒樓只有四間，大部份做街坊生意，員工對客人態度一般都唔錯，本人亦喜歡經常到此酒樓幫襯，因為點心款式多及味道及水準都唔錯，另有茶王廳，入去茶王廳每個茶位會貴少少但係有靚茶葉飲，同價錢算合理，但今日再被收銀阿姐差劣態度影響心情，一定要係到寫出嚟投訴！要酒樓集團知道請咗低質員工係到！我今日同老人家去飲下午茶，之後攞埋張單行出去收銀台埋單(係魚缸旁邊收銀台，唔係大門口嗰邊的收銀台，我唔想投訴錯人), 由於之前落單有寫到潮州粉果，但最後無嚟，咁我同收銀阿姐(帶眼鏡) 講："唔該幫我取消碟粉果，無嚟到。" 但佢當時同旁邊嘅阿姐傾計(係傾得好投入好開心果種！) ，無在意我嘅說話，跟住印張單出嚟，我一睇都係有計到碟粉果，我再好禮貌同佢講無取消到，佢先取消，面色開始唔好睇，好似要佢多做功夫咁！佢一直都傾緊計無停過！最火滾係當我俾完錢，問佢俾張手寫單我，佢就一邊寫一邊講："又要哩樣又要嗰樣，又要收錢又要寫手寫單，點做得咁多嘢？！如果人多就XXXXX(我都唔記得太多，總知係發牢騷嘅說話！當時我後面無客等埋單，得我一個，就算有人，寫手寫單好難？我因為當時有老人家在旁，否則我唔會客氣會同佢拍枱！今日咁嘅時勢仲有人因為阻住佢傾計就要俾面色客睇？我希望香港仔街坊睇遇到我講嘅情況，都寫出嚟，俾酒樓集團知道要處理！除非阿姐係老板個親戚鐘意點就點！…查看更多

平時食開同層對面X尊雞煲火鍋，雖然性價比高但有D悶，講真樓下樓上又經常執笠又開，真係絕少有機會去試，不過今日上到2樓眼見對面新開火鍋店(門口裝修好似同之前一樣，可能係轉手改名，唔肯定), 門口姐姐有禮貌俾我哋入去睇睇先，環境同食物睇落ok, 最後決定試一試啦，當出小小力幫襯吓本地小店。$169全包任食火鍋其實間間差唔多級數，就簡單評價：1.雞煲味道正常，係有點瘦，骨多，無啖啖肉feel 【75分】2.地方乾淨，卡位夠闊，我無影卡位的相片，不過兩人位都可接受(有相) 【80分】3.自取食品不算太多，不過算整齊、乾淨、新鮮 ,另外不滿係脆肉鯇魚片食完之後，換了一碟出來原來係普通鯇魚片，有點不老實【55分】4.任點食品不太多，可以接受，驚喜係海蝦大大隻，肉又不"霉":)【65分】5.飲品发及甜品不算多，大路嘢都有就算了，不過沒一點生果可食【75分】6.員工不多，但都有禮貌，服務很快！【80分】總之不算太突出，但各方面都合格，可能會再幫襯，建議多做團購或優惠谷人氣，今晚冬至都唔滿7成，有點危機…建議多加點特色食品及水果會令享用更豐富。:)總分我俾75錫:)…查看更多

睇過其他食評話招呼差，今日行過銅鑼灣想食吓燒肉，試吓多年前幫襯過嘅漢和係咪真係咁差，就走去試吓。銅鑼灣今日無示威但都好多舖關門，人少到唔洗排隊，半年前真係唔敢諗今日變成咁。可能老板知道有人差評服務所以有改善，我今晚整體算滿意，有一個後生女仔員工有禮貌，有人會自動嚟收碟，出面自取食物回滿都幾快，小食生果甜品等等都唔會空碟，我食到好滿夠，200零幾蚊唔算超值，但坐得舒服，枱夠大，可以慢慢食吓，5分我俾4分，可以再幫襯。…查看更多

今日帶國內朋友一家到尖沙咀中港城購物，中午係附近想揾個地方飲茶，心目中想揾個中上嘅地方好好食一餐，上網睇過有好幾間，但五一假期好多都滿，再高級嘅ICC 101樓天XX酒家都爆，北京道一號前日已食過想試新嘢，最後見到openrice有介紹同其他食評有環境相，見到高層有海景，應該唔失禮，打去又有位訂，就試一次！去到見到環境唔錯，唔算係好大好豪華嗰種中餐廳，不過因為樓底高(兩層樓)都落地玻璃夠光猛，整體環境算舒服，坐近窗邊第二行嘅大枱，點咗個六人套餐另加點心，中茶就係餐廳自已調嘅鐵觀音，味道有點特別，不過我唔識茶但幾香，主菜都一如預期，味道算不錯材料新鮮符合這地這價錢，但未至於到非食不可，所以我無影食物嘅相，不過我朋友讚不絕口，可能海景及優雅令佢哋心情大好吧，咁嘅環境招呼朋友或客人絕對可以，值得推介！另外補充：1. 套餐最後上嘅甜品係芒果椰汁西米露，西米露係好似分子料理咁一大粒有有膜包著，一拮就穿幾得意，好味！2.見有食評話服務員無禮貌，我當日就覺得ok, 服務員都係年青人為主，明顯感覺都有指定嘅基本禮貌，不過我點嘅點心紙最後發現無落單就差少少，明顯有人忘記，不過唔影響心情3.iSquare最麻煩(應該係尖沙咀食飯)就係泊車，無位泊full晒，我泊路邊算，附近最近嗰個政府車場一早執埋，私人場時租$30至$50都未必有位, 政府都係帶頭衰先，無得講！…查看更多

去完沙田行街，上網睇吓有乜食，係討論區見有人介紹，影埋相有蠔有鮑魚任燒任食好似好抵，又話佰幾蚊任食，就決定試吓，由市中心專登行約二十幾分鐘去到，一望8點未到係黄金時間但四份一客都無就心知不妙，心諗一場行到嚟就試一下，坐低先知$138只係任食串燒，$238先係任食海鮮，同每人只包兩包/枝飲品(無乜選擇：可樂/枝裝水/不知名芒果汁，啤酒要加錢但我哋唔飲所以唔記得加幾錢)｡心想$238會有鮑魚同蠔又算數照樣幫襯，結果行去自取魚池就只有蝦、各種蜆貝類東西、幾條活魚同幾隻半死水蟹…鮑魚同蠔就無，見到比我哋早嚟嘅客枱面有鮑魚殼，應該要第一輪先有之後就唔使諗有得食，我哋食到十點埋單都無再出過，真係懷疑網上有人影到各種海鮮擺齊晒話任選係自已人擺拍，串燒食品又係幾串幾串咁補，串燒食品種類已經唔係乜貴嘢都咁孤寒，海鮮類更加唔使諗會補鮑魚或新鮮貴嘢俾你，最後見到得死蝦同反肚魚，係剛入座時攞咗一條唔知乜名嘅活魚去俾佢哋即劏即燒之後，第二次再攞條魚去之後就一去不返，追問全場唯一一個哥哥仔伙計，都係機械式回覆"好快，就有"﹐結果一粒鐘後我埋單都無劏到出嚟，我見之前劏魚個位人兄就坐係大排檔出面食煙，根本無心再劏魚俾人食，環境係嗰種又隨便又污糟又無人理嘅自生自滅式任食型舖頭…我食完其實無乜心機寫食評，只俾想食嘅人一句：俾得$238去食放題好過食呢間嘢幾十倍！(補充：我發覺好多台客都係似頭一次幫襯，因為都係坐低先知$238, 當中又多人問點解無補充食物，估計嚟過嘅人都無下次，係好似我哋第一次幫襯先會中招！)…查看更多

一向無動力寫食評，係openrice無意揾到北角呢間火鍋店，之前係同一集團嘅功夫點心幫襯過飲茶食點心，水準不錯，所以專登坐車嚟試吓嚟呢間火鍋店。位置有點偏要行上一條斜路，未嚟過北角人士就難揾小小，我星期一晚上9點到，很多坐位(假日唔清楚是否一樣), 兩款特價湯底$18, 肥例牌$68可以接受，其他食品價錢中高，質量也中高，另外9:30後入單有8折，間中食好點也是不錯的選擇，特別一提姐姐侍應有禮貌，比其他人山人海嘅火鍋店D侍應做唔切個唔得閒理你個種態度差好遠! 讚! 食品有圖請各位自評。另一提：侍應姐姐(張單寫佢姓任，真係有禮貌又細心，我9:28落單先睇到9:30後8折，再追問之下先知姐姐已幫我hold到9:30先入機，很不錯的服務！老板請到呢D伙計係福氣，我會再幫襯!:)…查看更多

於一個星期已食了兩次，一次中午，另一次晚上，客人數目約7成滿，識員服務沒問題，最大問題是預備不足，兩次到來仍舊出現餐牌上部份食品未有提供，排隊購買時間太長(收銀員只有一位，另一部機沒人),等候送餐時間太長，有留單及客人提供已等半個鐘外賣，員工才發現及去取來。味道亦而改善，如炸雞太硬及不熱，咖哩雞只是雞翼明顯沒誠意，總結要改善的地方太多，否則日後難以經營下去。…查看更多