KwunFanHo's Profile

中午同老婆揸車路過詩歌舞街，有錶位即刻泊低架車，去吓蠔吧食中午飯，一直都覺得呢間餐廳好正，門口有錶位、唔怕嘅或者泊路邊位，餐廳又望到車，樓底高，冷氣夠凍，餐廳有音樂播，但唔係好大聲，食環境一流。我叫咗個煎豬扒太陽蛋+薯蓉，另外叫咗半打生蠔，價錢嚇死人，$10一隻生蠔真係無敵，食完就問我哋要唔要加多半打，如果唔係飽真係可以加，蠔嘅海水味十足，又夠新鮮，不過有一隻鹹咗啲，午餐個豬扒個邊有啲乾乾地，整體可以，配個薯蓉唔夠飽，但有個蘑菇餐湯同餐包，全程都滿足，配咗熱咖啡，奶分開上，自己落奶，飲品食物+環境其實可以兩個人慢慢坐一至兩個鐘傾吓計，不過小弟有工作做老粗咁食完就閃人，如果有時間慢慢食真係可以食多兩三次。…Read More

星期五晚OT完揸車出到太子，11點幾好運粥麵門口有錶位，之前都買過粥食，即刻滾幾好食，今次就泊低架車入去坐，門口企咗幾個自由行買外賣，見到事頭婆都好耐心咁通解咩麵咩麵咁，而家呢個時勢好少見到。店內裝修係傳統香港嘅粥麵店格局，雖然古舊但衛生還好，落單哥哥有禮貌，我就叫咗個雲吞麵，汽水就自己埋去凍櫃撰，三分鐘唔駛上枱，湯底幾正，麵唔係太大碗但食得飽，無鹼水味，雲吞足料又彈牙，極速食完埋單$45讓咗張枱比下一家。…Read More

又係揸車路過長沙灣，突然想食沾麵，非呢間莫屬，不過附近無得泊車，兜咗去順寧道泊錶位再行返過嚟。入去坐低叫咗個櫻花蝦味噌湯沾麵，唔識形容點好食，份量是足夠的，湯好濃，有櫻花蝦、糖心蛋、兩片仔叉燒，麵夠粗身，感覺到湯嘅材料份量縮細咗，但質量十分好，都可以飽肚。職員招呼十分之有禮貌，由入門口到坐低、落單、食完麵後再幫我加水落湯俾我飲埋碗湯，到收款埋單全程態度都很好。舖頭來大約10張座椅，是一張吧枱設計，好似日本啲小店咁，等個麵上枱的時候，可以望住師傅煮麵、燒叉燒等等，感覺幾正，但略為迫少少，如果快食的話，冇得介意咁多。…Read More

見美孚新開，喺二期平台，不過地鐵站口行上去都方便，試吓個麵如何，下午去見到無下午茶餐，不過見到佢一個麵跟杯嘢飲，點咗個蚵仔台灣扁麵+凍檸茶。57蚊有埋嘢飲就是但啦，點知一上枱好大碗，午餐都還好，下午茶真係撐到飽，味道比想像中好，帶少少辣味，我唔食辣嘅都接受到，蚵仔好多隻，食極都有，碗麵仲有啲配菜，嘢食同嘢飲整體可以。店舖裝修就新裝修無得彈，冷氣屬於殮房級，怕凍最好帶件褸去。員工無乜特別好與唔好招呼，係入門口時男職員帶位，跟住自己QR code落單，埋單去櫃面，感覺可以再食。…Read More

好耐無去過呢間添好運，今日路過飲個茶，食中午。點咗菠蘿叉燒飽，不過尺寸比之前縮咗水，但餡料十足，又夠熱，味道我就覺得以前會再好食啲。點心紙上無咗牛肉飯，就叫咗土魷肉餅飯、鳳爪排骨飯。另外點咗山竹牛肉及牛肉腸粉，全部都夠哂熱，味道就keep到米芝蓮級數，講真呢啲價錢平過樓下間酒樓，但味道真係好好多，所以間中揸車路過都會幫襯吓。今日就唔知發生咩事，坐到一半無冷氣，好熱，隔離枱同我哋一樣食完成身汗走人，之前無發生過，希望下次去坐有改善。…Read More