eatpraylove1999's Profile

話說上星期六試咗新馬路附近某「(方向)記」嘅煲仔飯之後，我同朋友都極之失望兼好想再尋覓更好味嘅煲仔飯，於是就嚟咗順記一探究竟。今次weekday放工時間大約7點半去到紅窗門街，嚟到門口，我望一望鋪面，再問我朋友「就係呢間啊？」因為望入去係唔似食店㗎，得幾張枱無咩飲食架部feel..兼我以為好似其他食評咁又排隊等位又好多人咁。坐底之後望下餐牌啦：價錢同上次方向記差唔多，今次就叫咗滑雞臘腸飯同牛肉蛋飯，等咗大概25-30分鐘，由於經歷上次一役之後，今次等緊嗰陣都少少緊張添終於等到上枱嗰個moment，未揭蓋已經聞到好正嘅飯餸香味，真係未食已經有少少興奮，同埋都有啲肚餓嘅關係，第一啖飯入口已經覺得幾好味，件雞嘅肉質都算新鮮，臘味味道尚可，牛肉蛋飯整體比滑雞嗰個好味，成個煲仔飯係夠火氣，有飯蕉食，水準唔錯但就略嫌阿姨姨猛咁sell野，又問我地叫唔叫多個飯問咗幾次，中間食食下又問要唔要菜，叫完菜陣間又問飲唔飲湯，而且碟菜係好細碟，算啦埋單$130，旅遊區嚟講算係咁。至於有無下次就睇緣份啦...…Read More

利伸咗先：係本地土生土長正宗澳門人由於朋友話想食煲仔飯，但因為已經差唔多夜晚8點，相信街市熟食檔口都關門喇，所以佢話有人推介南記，咁我地就去試下啦，喺澳門咁多年都未食過。（雖然亦有朋友同我講中過伏，但當下好想食咁就抱住試一下嘅心態）去到關前後街左近我地仲要唔識路，有個伯伯帶我地去條後巷，終於嚟到南記個檔口，已經見到坐咗3、4枱客，我地唔洗等就有位坐啦。我叫咗個田雞煲仔飯，朋友叫田雞臘腸飯。我自己個飯圖片如下：光線比較暗，但呢個係後巷嘅情調，anyway, 重點係我食咗幾啖已經覺得真係伏，成差唔多$50一個飯，簡單啲講，白飯還白飯、田雞還田雞、飯蕉痴哂底，根本就做唔到煲仔飯炭燒蒸焗將肉汁逼出嚟流入飯粒嗰種滋味，即係成個飯係無味，加咗豉油先勉勉強強調一下味道，最後我係有食哂個飯嘅，因為我並唔浪費，但佢將一個原本可以做得好好味嘅煲仔飯嘅食材浪費咗。所以三個字：無下次。…Read More