kenlo2015's Profile

仲有一日先返工，一個人去咗旺角行街，想搵食又見到呢間越南餐廳就上咗去食。可能仲未係午膳時間，入面人就唔算多，坐得舒服。其實我食越南嘢就只會食嗰幾樣嘢，今日都唔例外，叫咗生牛河同牛油雞翼，個生牛河係餐嚟，加錢飲菠蘿熱情果梳打。生牛河：好食嘅，牛肉就算浸熟咗都好嫩，湯頭算濃郁，但可能食慣檬粉，覺得河粉冇咁夾。法式牛油雞翼：可能即叫即整，我食晒碗粉後都仲要成5分鐘先有得食。上菜時幾精緻，用個籃仔裝住，擺得幾靚。個皮幾脆，雞翼入口好滑，但味道就唔算濃，可能個人口味比較重，覺得牛油蒜蓉味較重會好食d，呢度係口感勝過味道菠蘿熱情果梳打：冇特別嘅飲品，個人對果準梳打有偏好所以一定覺得唔差，但比較細杯，單叫就唔太抵，餐飲加錢先覺得可以一個人食咗150蚊，當然唔係平啦，不過辛苦搵嚟志在食，得閒對自己好d，生活亦開心d，味道唔差下就可以接受。…Read More

上星期跟友人飯聚時，曾說下次就到這家火鍋店用饍，想不到沒幾天便成事。昨晚6:45到場時，店內沒多少顧客，友人更早到場取了在窗邊的位置，邊吃飯邊看外旺角晚間的繁華景象，也是一件樂事。店內採用套餐形式，按人頭收費，基本上大部分菜單是已擬定好的，選擇性不高。而且分量也是按人頭計算。前菜：柚子沙律是用柚子汁拌生菜，很清新而且味道也配；涼拌蟲草花口感很爽脆，麻油味很香，很好吃湯底：雖然套餐內已擬定好，但可按自己喜愛的口味去選擇而不會另行收費，其實跟自選沒分別。我們選了東方美人鍋拼青花麻辣鍋，另外套餐內可選火焰清酒煮蜆，為試吃也選了。東方美人鍋即是竹絲雞湯配桃膠，湯頭非常清甜，還沒涮菜料前，可以直接飲用，也沒有甚麼口渴感，用來涮肉或菜都很不錯，值得推薦青花麻辣鍋辣度不算低，味道也不錯，像小弟般嗜辣者也推薦一試，不過始終缺少了重慶正宗牛油麻辣鍋的香氣及層次，比較偏向乾辣。至於火焰清酒煮蜆就是視覺比味覺優勝，侍應在煮蜆時燃點火焰，縱非首次吃這種菜式，看到那效果還是忍不住驚呼，煮好後再注入豬骨湯頭，整個湯及蜆的味道有點不太配合，蜆也真的太迷你了.....菜料方面，因朋友戒吃牛肉，故選了黑豚肉配小黃瓜，而侍應也很貼心，因套餐拼盤內有牛丸，特意來問我們是否不吃牛肉，可轉換成其他配料。友人決定讓小弟吃牛丸故沒有作出更改。黑豚肉配小黃瓜：雖然瘦肉較多，但豚肉涮煮後也不會變韌，非常鮮嫩，用小黃瓜卷著肉來吃，口感也變得比較清新，味道很好，每人約有5件，分量來說還可以海鮮拼盤：套餐本來有帶子、魷魚、蝦、蟶子及龍躉魚片，因可以加點錢就將其中一款改成龍蝦，故我們就每人都將蝦改成龍蝦。上菜時，卻只見每款只有2件，即是每人1件！龍蝦就頭及身各有半份。基本所有海鮮都很新鮮，蟶子沒沙，清理得很乾淨，龍躉肉很厚也鮮味；至於龍蝦就明顯是淡水養殖，不過肉頗多，蝦頭也鮮美，整體甚佳。響鈴：每人2件，無甚特別，就是一般火鍋店的響鈴拼盤：包括有牛丸、魚滑棒、豚肉餃、釀冬菇、三色墨魚片，每款每人1件，也是太小了吧......豚肉餃及魚滑棒均很好吃，釀冬菇可能始終用煎或炆的方式會比較好吃吧，燙火鍋感覺只算一般；另外兩款就是一般火鍋店水準蔬菜拼盤：有金菇、生菜、油麥菜，通常都是解膩用，分量不多，就如上文說用美人鍋去涮煮很配合飲品方面，小弟選了芒果沙冰，但還有冰粒，感覺沒打得很仔細，不過不會太甜，感覺真材實料；朋友選了柚子茶，表示不過不失套餐還有甜品，這晚的是柚子果凍，不會過甜，口感很滑而清新，在吃罷一頓火鍋後，這個還頗有解膩之用，很不錯！埋單每人要350元，以分量而言，價位是相當高了，雖然整體味道是不俗，但這個價位的選擇性很多，似乎性價比就不算太高，也難怪就算到晚上8:00這類繁忙時間，店內還是只坐了約一半的桌。聽朋友說周末的生意會好一些吧⋯⋯…Read More

昨天跟三個舊同學去了這家位於圓方的中菜館吃午餐，位置有點難找，上了2/F後還得再多上一道電梯，在商場的平台位置。餐廳的裝潢格局明顯走比較高檔的路線，而食物上菜時也確實賣相頗精緻。由於同行者的食量不算太大，所以只點了數道菜。小籠包 - 只有4件索價60元，說真的不便宜。上菜時發現有一個的皮是紅色的，其中一位同學自告奮勇的吃掉了，搓皮時應該有加紅菜頭汁所以變了紅色，比道她說只是一般。我自己吃了普通口味的，說真的跟外面不少普通上海菜館吃的沒兩樣。醬肉燒餅 - 相對小籠包來說，這個就好吃得多，酥皮入口鬆化，醬肉餡料足且味道甚濃，雖然索價達88元但也是值得一吃！鴨肉沙律 - 蔬菜很新鮮，吃上去感覺清新，沙律的醬汁亦開胃，不過鴨肉吃上去只是一般，甚至與沙律有點格格不入，未知是否只滿足食肉獸？孜然豆腐 - 豆腐炸得外脆內軟，口感很好，但孜然粉下得不夠，感覺只是點綴一下而已，帶不出跟豆腐清淡的對比，就像吃普通的炸豆腐而已。瑤柱金華火腿雞肉炒飯 - 整頓午餐中最為出色的一道菜了，炒飯乾身但不會硬，配料頗足而味道甚佳，128元以現時消費來了也合理了。整頓飯每人消費140元，以現今水平來說尚可接受吧，畢竟餐廳身處圓方，價格始終有一定水平。菜式的確賣相比味道出眾，若追求性價比式味道至上者，這裡或不是最好的選擇。…Read More

又同朋友去開餐，今晚去咗呢間專食東歐菜嘅餐廳。地點稍為偏僻，上完德己立街條斜路右轉雲咸街一直向前行一陣先到。呢間餐廳或者因前排俄國世界盃所以hit過吓，而家先食只能話有心唔怕遲....餐廳偏細，今晚係星期五所以幾多人，我哋由8:00食到差唔多11:00，期間都冇點少過人keep住坐滿八九成。不過唔會覺得太焗促，環境尚可啦。講返嘢食，我哋分別叫咗芝士焗牛脷盅、烤肋骨、焗鹿肉、Honey Cake、煎Pancake配雜莓果醬及雲呢拿雪糕。我唔太好飲酒所以叫咗個有汽蘋果汁，朋友叫咗杯啤酒。飲品就唔多評論，唔會有咩驚喜，唔會難飲啦。朋友話杯啤酒都幾好。至於食物就真心唔錯，水準幾高！芝士焗牛脷盅 - 睇咗好多朋友都大力推介，一試果然堅正！牛脷好稔又好味，芝士味唔會太濃郁但好香，個酥皮稍偏硬但真係脆，蘸芝士汁極度好味，而且雖然餐廳將呢味放喺頭盤餐牌，但份量真係唔細，真正抵食又好食！真心推介烤肋骨 - 又係招牌菜，上菜時waiter會即席點火，視覺效果幾正。份量只有五件唔算多，但又係好軟熟，味道亦好夠，亦係好唔錯嘅。焗鹿肉 - 其他人同紅酒焗牛尾冇咩分別，只不過主角換成鹿肉，果然冇咩肥肉，但食落唔乾，入口口感唔差，味道就幾好但唔算驚喜。Honey Cake - 朋友叫嘅甜品，真係蜂蜜蛋糕，蜜糖味幾濃但偏甜，口感軟熟，嗜甜者或蜜糖迷會幾鍾意，我就普普通通啦⋯⋯煎Pancake配雜莓果醬及雲呢拿雪糕 - 呢道甜品幾乎度度都有，呢度算整得幾好，上菜時個賣相真係幾吸引，班戟口感幾煙韌，本身唔算甜，配上雪糕食到一冷一熱效果，個果醬偏酸亦令成道甜品味道豐富咗，亦係甚推介嘅！兩個人食咗八百幾蚊，以食咗嘅份量同質量計其實真係幾值，唯一係可能顧客較多，做嘢嘅人偏少，所以樣樣都等比較耐，但喺今時今日嘅情況其實都可以接受了。…Read More

今晚約咗個朋友嚟呢度食嘢，嚟得呢度，都係食扒啦。去到裡面都幾full，好在有訂位，等咗陣就入到座。趁朋友未到叫咗個芝士薯條先，呢樣係我最鍾意嘅小食，炸到好脆嘅薯條上面鋪上脆煙肉粒同半熔芝士，非常邪惡但好味。呢間就唔係做得最出色嘅，薯條夠脆但芝士唔多夠。如上文所言。嚟得都係食扒，我就叫咗個Medium嘅慢燒安格斯肉眼扒，但上菜時真係紅得好緊要，成塊生肉咁問咗Waiter，佢就話本身原味燒嘅會係咁，但可以幫我煎一煎個表面。講真我就已食咗一小塊，感覺唔算生，但真係唔太習慣，都係叫咗佢幫忙再整一整。整完後嘅就變返真正Medium cook嘅，幾好食，翻整過都唔會韌，肉質仲係嫩，肉味夠。我塊扒就配晒麵包、餐湯、配菜，佢嘅黑糖麵包係名物，呢次水準依舊出色，外脆內軟，帶少少甜味，塗上牛油後真係大滿足，讚！餐湯係忌廉粟米湯，真係好甜，不過唔會似糖水，係忌廉口感唔夠細滑濃郁，似飲緊普通粟米湯，但都唔錯。朋友叫咗個烤豬肋骨，肉嫩味濃，雖然帶嘅肥肉較多，但正因此突出咗口感，果然係另一名物，又係讚！我係一個點都要叫杯嘢飲嘅人，又唔想飲Cocktail就叫咗會Cherry Limeade，甜甜哋嘅Soda，不過不失但合我口味。食咗接近700蚊，以食扒計就可以接受，食物水準亦有咁上下嘅，算係一餐愜意嘅weekend dinner!…Read More

講真，食物水準係可以嘅，辣醬幾好味，配料都係大路嘢啦，特色就一般，勝在分量可以。推介嘅係冬菇、牛肚，反而牛腩好多時偏韌！價錢以而家嘅水平嚟講已經幾唔錯，三餸加杯嘢飲都係40蚊左右，若想輕鬆解決一餐都唔錯。不過呢間店嘅最大問題係成日都好早就賣晒d嘢！每次七點後去到唔係冇呢樣就係冇嗰樣，有時連麵都可以賣晒，若七點半後先到可能已得返幾樣餸，呢樣嘢就真係唔多得。或者真係入貨唔多啦，但俾人感覺真係麻麻哋。好似今晚咁又話冇晒粗麵，唉......…Read More

上次去咗食海鮮鍋，今次就食燒烤。去咗佐敦一間開咗幾耐嘅串燒店食，都唔係第一次嚟，不過以前就只會食吓羊肉雞翼嗰d，今次叫d海鮮食吓。我哋兩個人，七點半去到，入面唔算多人，始終未係嗰度嘅黃金時間。鮑魚同蟶子都好新鮮，用蒜燒味道好夾。尤其鮑魚，絕對推介，就算要到38蚊一隻都值回票價。細龍蝦就叫咗一隻芝士，一隻蒜燒。個人一向都鍾意食芝士焗龍蝦，呢隻都差唔多口味，幾香口，芝士味好夠；蒜燒就不過不失啦，龍蝦本身都算多肉，整體唔錯。只係以呢個size，58蚊一隻就略貴了燒羊肉串係呢間舖嘅名物，可惜第一串失準，燒過咗肉質比較韌，味道亦一般；好在後來encore嗰串先回復水準。辣酒煮東風螺係成晚比較失敗之作，辣味唔夠，香味亦唔夠，個汁只一味鹹，螺本身亦好細隻，58蚊唔算抵。燒茄子都係呢度名物，都係水準依舊唔錯，茄子口感好好，配蒜蓉好夾。燒魷魚鬚都好食嘅，唔會太韌，用日式照燒汁亦夾，只係又唔會特別推薦咁解另外仲叫咗燒雞翼同芝士牛油焗帆立貝，不過冇影相。雞翼就失準，略燒焦；焗帆立貝都係食個芝士汁，保持水準吧。整體嚟講海鮮水平唔錯，但其他食物嘅水準冇以前咁穩定了。兩個人食連埋飲品，埋單差唔多600蚊，當然貴啦，不過唔係成日食咁嘅價錢，當weekend豪吓啦！…Read More

講就講咗好耐，終於付諸行動，嚟呢間名廚餐廳，食咗一餐英國菜。今次同一個朋友嚟食，我哋六點半已到，當時人唔算好多，服務員態度真係幾好，幾熱情咁推介餐單，而就算我哋用咗成20分鐘翻餐牌，亦問咗唔少問題，佢哋都好耐心。但最後，我哋點嘅都係最出名嗰兩個：Fish and Chips, Wellington Beef。上主菜前先嚟麵包，係幾好食嘅，口感鬆軟，尤其落埋牛油，真係好夾。Fish and Chips：魚炸得外脆內嫩，口感剛好。薯條講真就冇咩特色，亦真係只蘸他他醬先配，另一個醬味道極怪......Wellington Beef：一上檯見每人兩塊都目瞪口呆，因為真係好大塊。用酥皮包住牛柳同蘑菇醬，牛柳好嫩，牛味幾濃，另外兩樣嘢當然冇咩特色，而成個菜整體味道都偏淡，要蘸個燒汁嚟食，汁料味道就普通啦。而且比較唔好嘅係細嗰件一夾過碟嗰陣會散，好在厚嗰件就冇問題。另外叫咗杯Mocktail，酸酸甜甜幾啱胃口。本來嘅打算係試完兩樣名菜再叫其他嘢，但我哋兩個食完呢樣嘢後已飽到連甜品都食唔落......嚟得呢度就預咗唔會平，不過只係食咗兩道菜加兩杯飲品，埋單每人唔使700，還可以啦。整體水平唔錯嘅，但真係未至於好出色。或者要再試其他嘢先知，畢竟今次食嘅嘢太少。…Read More