sweetgal's Profile

OT到20：00, 諗起依間新開嘅茶記，就決定嚟食個快飯； 坐低20：26， 用手機落好單就等嘢食，見好耐都唔嚟，問其中一個員工話炒飯要等耐啲，點知跟住見佢出餐，遲嚟過我嘅都已經有得食就係冇我份，已經好肚餓嘅我等到20：50忍唔住同另一個員工講，我只會等多5分鐘，唔嚟嘅可以唔洗嚟喇，佢先入廚房問話3分鐘有，跟住我真係睇住手機個鐘等，好彩佢冇呃我真係三分鐘到。講返我叫個飯---咖喱肉餅煎蛋炒飯，份量好足，兩個女仔食都夠飽，咖喱汁係另上嘅，個味偏咸，但因為另上嘅關係可以自己控加落飯嘅量所以都還好，味道就一般啦，冇螢光咖喱咁hea但都冇印度咖喱咁香，個飯就真係炒得好乾身，啱鍾意食爽飯嘅人，對我嚟講就有啲太乾，不過篤穿咗上面隻蘭王蛋撈埋就即刻好食咗，而個肉餅就好厚，可能因為要煎好耐先熟所以兩面都偏乾，裡面肉汁就無乜架喇，感覺似比較乾嘅漢堡扒。如果唔洗等咁耐，佢應該都係一個唔錯嘅選擇。…Read More

麵檔可以話係銅鑼灣區其中一間最常幫襯嘅食店，因為近公司味道又唔錯，不過食嚟食去都係嗰幾味餸，豬紅、大腸、蘿蔔、瑞士雞翼，今日等位時先發現佢個menu 原來係有撈麵同飯嘅，而且張相睇落又唔錯喎，所以決定要試試佢。叫咗個葱油雞扒撈粗面，比平時叫車仔麵係要耐少少，嚟到嘅時候我同同事們都有啲驚訝到，誰又會諗到係車仔麵店會用一隻銀色西餐碟去上一個撈麵呢？仲要係比刀叉你食，真係估佢唔到，而且除咗件雞扒，仲有隻幾靚仔嘅糖心蛋，成碟麵個樣真係不得了。味道嘛，麵就唔算係爽口，但條條麵都有沾到汁，味道係可以，雞扒就係炸過嘅，外脆裡都唔乾，加埋個葱油都幾夾，而且有一定厚度，所以真係要用刀叉食嘅，仲有兩條菜襯托，食埋覺得成件事平衡咗。下次去到底食車仔麵定試埋未食過嘅飯類好呢🤔🤔🤔…Read More

每次經過都會望下依間嘢，今日放工行過見到佢哋set dinner好似又唔貴喎，就決定試試佢。走入去店裡面，突然有種去咗主題樂園嘅感覺，啲聲音同裝置就好似係廸士尼排緊隊玩遊戲咁，個vibe唔錯，但依個係一個好冷清嘅樂園，地下整飲品賣飛嘅位置係冇開嘅，要買嘢就要行上一樓；上到去見到個裝修真係幾有心思，而且牆上播住太空嘅畫面，你坐係度食嘢就好似坐係架駛艙咁，真係幾得意，不過全場只有一張枱係有人嘅，老實係有啲驚嘅，嗰度話哂都係銅鑼灣黃金地段，晚餐時間一枱客真係唔知佢可以點生存落去。講返食物，我叫咗個牛油果蟹堡（$78），另加$25跟炸雞腿同青檸梳打；個包味道都可以，中間係一件蟹餅，雖然應該只係用蟹柳同洋蔥條整，不過味道係可以嘅，我反而唔太喜歡佢個包，因為食落有啲碎，唔係好似真麵包，係個樣幾特別囉；雞腿就正常發揮，反而覺得佢杯青檸梳打調得幾好，唔怕飲色素嘅話佢係好飲嘅。整體嚟講係可以一戰嘅，食物味道唔算差，環境又可以，價錢依區嚟講都算正常，希望佢可以頂到落去啦。…Read More

朋友仔生日揀咗嚟Harlan's 食午餐，係open rice 訂位時剔咗慶祝生日，早三日餐廳就打比我確定並主動問朋友名，當日就會送上甜品同係碟度寫上壽星名，幾欣賞佢哋嘅仔細。依度嘅Semi-buffet頭盤最令我深印象嘅係嗰一大煲嘅關東煮，原因係諗唔明西餐餐枱點解會出現依樣嘢，味道嘛，正常囉，但同餐廳嘅style總係格格不入；buffet枱上其他頭盤個人就比較欣賞一款肝醬，大概是鴨/雞肝做的，都忘記了，但味道唔錯，而且係其他餐廳比較少見，值得一讚，另外都幾鍾意佢哋配餐包嘅牛油，幾香滑，個包食落都好味咗。當日佢哋嘅餐湯係三文魚忌廉湯（需另加$30）,聽落幾特別所以就試下，湯上枱後聞落覺得有啲腥，飲落係有煙三文魚嘅，不過就係唔太好飲，朋友飲咗幾啖就放棄咗。。。到主菜，我加咗$40要豬鞍，朋友就要咗個炸黃花魚；我嘅豬鞍賣相唔錯，好厚一件，而仲保留到裡面有肉汁，配埋個汁味道算唔錯；但朋友嗰份黃花魚就炸得比較亁，而且底下配嘅荳蓉都係冇乜汁，唯一係魚上面放咗菜絲沙律叫做有汁，但朋友話個汁係乳酪味所以唔係咁夾；甜品就出翻buffet枱有啲小蛋糕，無乜特別。兩個人依餐七百幾其實又唔算好貴，只係我相信依個價錢食午餐係尖沙咀區應該有更好嘅選擇，不過依度個景又真係幾靚嘅。…Read More

每次到西環都要用好多時間去諗食乜，一來唔熟依頭，二來依區有好多第二區冇嘅小店，所以間間都會想試下，今日就係比依間周記門口嘅相吸引咗入去。依間舖頭賣嘅可以算是fusion點心吧，有蝦餃燒賣，但又有西多士凍檸茶，大概全世界只有係香港依個地方，先會有咁跳嘅menu。點咗佢哋嘅下午茶餐，XO醬炒蘿蔔糕+餐飲（$52），另外點咗間舖嘅名物芝麻蝦多士（$52）。先嚟嘅係蘿蔔糕，睇個樣係唔錯嘅，除咗有正常會用嘅芽菜、紅蘿蔔一齊炒之外，仲有我鍾意嘅唐芹，面頭仲灑咗啲炒過嘅蝦皮，樣係唔錯嘅，但蘿蔔糕嘅質地有啲奇怪，點解食落會有啲煙韌嘅？感覺有啲似炸脆咗再淋翻咁，但炒蘿蔔糕唔係應該乾身架咩🤔我睇唔透，而且佢應該用咗非常多油去炒，碟底全是油，真係有影響食慾。再嚟嘅係芝麻蝦多士，依個就真係唔錯，方包中間夾住厚厚嘅蝦膠，面頭再黐滿芝麻去炸，出嚟金黃色証明炸嘅時間恰到好處，不但樣靚亦都好香，只係因為麵包係一樣非常吸油嘅食材，所以佢都唔例外，配上沙律醬本來酸酸哋係可以解膩嘅，不過諗深一層，沙律醬其實都係用油打成，所以都係點少少好喇。總結就係，下次如果再去，食蒸嘅點心好了，因為炸嘅太油喇。…Read More

Lunch 成日會路經依間漢堡包店但好似都無咩人幫襯，睇過門口個菜單又好似幾吸引，今日就拿起勇氣入去試下。午餐價錢大約$70-$120,包汽水&粗薯條， 加$10可轉為洋蔥圈、甜薯條或Nacho; 我哋一行人就叫咗三款餐，包括煙肉蘑菇芝士漢堡、經典芝士牛肉漢堡、蜜糖芥末豬扒漢堡； 包嘅份量十足，件漢堡扒應該有起碼1cm厚，味道可以但奈何有啲乾，不過加埋佢哋個汁同配菜都可以嘅，只係咁啱今日佢哋芝士冇貨，所以感覺就係掙啲咁。同行友人件豬扒就大過個包，佢哋話味道唔錯嘅，肉唔乾亦都唔會好硬。整體嚟講依間都食得過嘅，只係想講，芝士其實對一個漢堡來説係好緊要，如果無，應該落單時同客講，唔好上咗枱先講，雖然最後比咗折，但就係少咗啲滿足感；另外在場只有一個員工，所以上菜落單整嘢飲都係佢，可能太忙所以係完全無表情嘅，作為客人嘅唔好太介懷，畢竟一間食肆，食品質素才是最重要。…Read More

知道希慎廣場地庫近來開咗一個新嘅FOOD COURT，咁啱又係附近返工，所以就約同事過嚟試試佢。個FOOD COURT選擇唔算係好多，不過勝在每間都有唔同特色，我哋今日4個人去試咗兩間舖頭，依間漢堡店就係其中之一；我同其中一位同事分別叫咗漁夫之堡($78)同埋和牛漢堡($98)，加$20跟餐會有汽水，連皮粗薯條或薯格。先講我點嘅漁夫之堡，見到個包嘅真身時我係嘩咗一聲，原因係個包好高件魚柳好大件，食嗰時係無辦法一口食到成個包嘅，個包由上至下分別係他他醬、芝士、炸魚柳、厚切蕃茄、洋葱、同埋生菜，個包就甜甜哋，似係Brioche，由於個包好高，我唯有分開食佢，先食嘅係配菜同最底嗰層包，菜幾新鮮，有爽脆嘅口感，配埋幾好食，再食嘅係魚柳+他他醬、同埋係最頂嗰層包，味道係唔錯嘅，個他他醬應該係自家制，唔係好酸，魚柳炸得幾好外面脆，裡面滑，配埋個醬都幾好味，但食咗幾啖之後開始覺得有啲漏，我諗如果可以配埋啲蔬菜食應該係無依個問題嘅，所以建議如果要分開食嘅話要注意。另外同事就叫咗個和牛漢堡，相對上個包就無咁大個，除咗件漢堡肉，配菜有炸洋葱、芝士同翡翠苗，同事話件肉係好食嘅，有汁唔乾，炸洋葱亦增加咗個口感，唯一嘅問題係用咗翡翠苗，因為草青味比較重同埋難咬斷，而且無生菜嘅爽脆，所以扣咗啲分。值得一提嘅係跟餐嘅薯條同薯格都好好食，一來新鮮炸起，二來調味啱啱好，唔會太淡或太咸，真係好彩有加點。整體嚟講依間漢堡店係好食嘅，以後應該會再嚟試佢其他包。…Read More

自Aeon裝修後就見依間舖日日都要排，晚飯時間五點幾已見人龍，心諗有冇咁好味呀？今日lunch 見有位就試下啦，價錢睇落都算親民，一個定食最平只要$6x, 重冇加一叫咗個燒油甘魚定食，舊魚雖然係細啲，但味道都唔錯，喜出望外的係碗味噌湯，用白蘿蔔同紅蘿蔔煲，有蔬菜嘅甜味，而配菜嘅醋蘿蔔就有淡淡的柚子味，連咁細微嘅位都冇馬虎真係難得。唯一要挑剔就係嗰度嘅環境好嘈，而且後面是鐵板燒，所以食完餐飯個頭會有陣油煙味，所以如果去還是遠離食飯時間比較好。…Read More

之前依間初初開嘅時候都有同朋友嚟食過school food，味道都唔錯，但今次去就咗好多喇。今次兩個人叫咗三樣野，拉絲芝士炒年榚、沙希肉、脆雞大蔥沙律先講個炒年榚，雖然幾辣，但辣得嚟幾好味，奈何佢叫拉絲芝士，我期待佢係面頭放滿芝士，然後我夾嘅時候會黏著啲年糕，結果係啲芝士上枱時已經係黏埋一舊，同啲年榚一啲交流都冇，完全你有你、我有我，拉絲就做唔到喇，就多咗一舊野係個碟，要食嘅話重要好大力先可以扯得開，好"論盡"囉!另外個沙希肉，睇相好似啲韓式豬手咁，底下配啲沙律，上枱見個樣都okay喎，點知食落口啲豬手好肥好膩，完全唔係豬手應該有嗰種膠質嘅感覺，要知道依個係冷盤，凍食肥膏真係幾難頂，心諗同啲菜食會好啲喇，點知個沙律啲菜唔新鮮，食落有啲苦味，依碟確係唔得。最後個炸雞，因為以前有食過，所以對佢都有啲信心，點知個樣係同以前一樣，但味道就差好遠，第一口咬落去重以為未炸熟，因為個脆皮裡面嘅炸槳重係好濕好冧，但夾開啲槳睇舊雞又熟嗰喎，咁即係雞可能之前已經煮熟，然後上粉槳，不過太厚，所以裡面嘅粉槳炸唔透，都未講我發覺舊雞嘅大少同個皮係一樣咁大舊的，個人認為食KFC 都好過佢。雖然最後埋單唔算貴，但好失望囉……Read More

朋友係kumamon小粉絲，小是因為未到瘋狂階段，今次嚟主要為的就是那個襟章。本來朋友話會先訂位，但book唔到，那就唯有walk in。到達時約18:35，人未算多，2人枱只需等三張，但結果都等咗差唔多20分鐘先入到去。坐底先睇個kumamon special menu, 因為要叫依個menu嘅飲品先送襟章; 我要咗杯latte，朋友叫的是杯cocktail，叫sweet tomato fizz，飲到有酒、茄汁同橙汁味，朋友話幾好飲，至於我的latte，冇咩特別，係個kumamon樣幾可愛囉。兩個人叫咗3樣野食 ~~~ Prosciutto Pancake、明太子意粉、墨西哥雞肉沙津第一樣嚟嘅係依個pancake，直徑應該得6寸，巴馬芝士加火箭菜，底下墊塊pancake，塊pancake比平時食嘅crepe厚啲，加埋配菜味道都可以，不過份量好細，兩啖就食完。之後等咗好..............................耐，重要我地追，先再上意粉同沙津，由於當時已好肚餓，所以相都冇影; 先講沙津，個汁嘅色同味都好似千島汁，好失望，因為冇expect咁fashion嘅餐廳會用千島汁咁流; 而我地雖然叫的已是大size，但上枱時見個沙津竟然只有平時在和民食細沙津嘅份量多啲，真係覺得被騙 ; 至於個意粉就正正常常，味道份量都可以，但都冇咩特別。埋單依餐承為 400大元，貴而唔飽! 應該都冇下次。…Read More

有什麼比夏日炎炎食杯冰凍的雪糕呢？是日出開銅鑼灣，朋友提議去Via Tokyo試試; 因為係平日，等位的人不多，期間侍應會比定餐牌我們選要食的甜品，那一有位就可以落ORDER。我和朋友都揀咗食生果白玉抺茶餡蜜，因為咩都有 。這個抺茶雪榚味道算濃，但就欠了日本食到的那種甘味，不過在香港來說已很不錯; 團子是沒有味道的，所以一定要伴雪榚或紅豆一齊食先好味，生果我覺得一般，冇咩特別，朋友就話好酸，而碗底重有一些透明的類似涼粉物體，我不知道那是否就叫"白玉"; 這白玉亦是沒有味的，要靠隨甜品附上的黑糖糖槳伴食，但黑糖糖槳比的份量不多，不足夠我和朋友，最後只好問侍應小姐多添一些，還好她們都很樂意為我添加。下次再嚟，我想淨食一個抺茶雪榚就好了。…Read More

好幾個月前已和朋友約定食啤酒炸雞 (雖然我們其實都不好酒)，但一路都沒時間，終於今晚約好去嚐嚐。之前在想要去Red Chicken還是Fairyland, 朋友說怕Red Chicken會很吵，因為那裡會不斷播K Pop ，所以最後選擇了Fairyland。這店面積不大，亦不設訂位，還好我們早到，拿了籌後很快已可以入坐。三個人坐的是二人位+一張圓櫈，有點逼，不過反正吃完就走，所以也不太計較。點了有骨酸辣炸雞、田園沙津和芝士蛋卷，沒有點飲料，因為這裡的食物份量都很大，怕桌子放不下; 先說炸雞，每件都很大，沒有想像中的嫩，炸槳是脆，可是也厚，加上酸辣汁有點膩，尤其是放了一會才吃的更甚，之後見鄰桌點了原味的，沒有汁感覺上就比較爽，大概也不會這麼膩吧; 伴菜是炸薯片，可能是現做的問題，沒有放乾就炸，所以也沒有很脆，味道還可以。芝士蛋卷不知道用了幾只蛋做，差不多有一尺長，裡面溶化了的芝士加上蛋和茄汁，好味，人多食更好。田園沙津內有生菜、紫蘇和其他的雜菜，面層有三片雞片和芝士碎，這沙津是本人今晚最滿意的一個菜，因為很清新，醬汁甜甜的很美味，侍應還會主動過來加醬汁，好吃! 或許，炸雞是一定要和啤酒一起享用才有那化學作用。…Read More

身為東區之友，筲箕灣東大街已經食到冇野好食，今次就轉向電車路上覓食。依間上咖啡，原來我成日都會經過，但一路都以為只係一間salon，有日係對面759買完野望過嚟，招牌上寫著salon & coffee, 先知依間都係cafe 由於佢地同salon同用一個門口，朋友問我有冇行錯，我話上去睇下先啦～一到二樓，salon的員工就問我地係咪食野，係就去嗰邊…原來cafe的門口開在salon的右手邊，兩間舖就用玻璃門分隔; 店內好有空間感，枱擺得唔密，以矮枱sofa 藤椅為主， 感覺舒服，飲野應該幾relax, 但佢地主要賣食野所以就有啲麻煩，要彎住條腰食。叫野食需先去櫃檯攞張menu, order完會比個牌你，坐埋位等食物送嚟; 我食咗個蜜汁雞扒煎蛋飯，賣相幾靚，有西籣花伴碟，味道都ok, 其實蛋黃汁撈飯一般都冇得輸，難得真係食到煎脆咗嘅雞扒皮，有啲喜出望外。朋友食嘅係蘑菇龍脷柳飯，個汁幾香濃， 伴飯味道很好…原本依個應該係配長通粉嘅，但朋友唔鍾意，要求轉意粉，店員就好禮貌咁話今日冇意粉，提意不如轉飯，估唔到咁以客為先，唔錯唔錯 :) 餐飲我同朋友都加$ 5 要咗特色咖啡，Cappuccino 個樣唔錯，有個圓圓滿滿嘅頂，Latte又有拉花， 只係本身隻咖啡味道就好一般，漂亮的外表令杯咖啡加分不少。…Read More

為食朋友提議試試這間星級中菜餐廳，當然有所期待啦; 可惜，一個名菜都嘗不到.......事原我們點菜時，這裡有名的鴛鴦糯米米飯、欖菜明珠、山渣卷......怎至普通不過的皮蛋酸薑，不是要預訂就是已賣光( 才19:00); 而餐牌上很多菜都是要預定的， 朋友說訂位時那裡的員工有問過要不要先訂菜，可是並沒有說什麼菜是要先預訂，而且訂位時又沒有提供MENU，那朋友當然不會知道我們是應該要"先訂菜"，這點真的很不專業，亦令我們慕名而來的很失望。說回菜式吧，是晚我們連甜品共點了10道菜:1. 煙薰素鵝~~不過不失，煙薰味還是挺濃的，只是餡料沒什特別，同一道菜還是覺得北京樓做的比較好，因為北京樓的餡料較多。2. 素炸脆鱔~~一個我一向喜歡的素菜，這裡做的不錯，味道質感都好，朋友說有真吃鱔的感覺。3. 玫瑰煙薰帶子~~這個真是帶子有帶子味，沒有其他味，亦沒有玫瑰香，而且賣相真的不吸引  :( 4. 鮮明蝦鍋貼~~蝦好爽，而且炸得不錯，不太油膩，就是味道很淡，一定要加淮鹽和喼汁，否則是沒有味道的。5. 桂花牛柳粒~~比起剛剛吃的鮮蝦鍋貼，這個味道濃的多，甜甜的，雖然很難找到桂花的踪影，可其他的配菜都很好，牛柳炒得剛好，不過冧或過韌，很不錯的一個菜。6. 蜜味京燒骨~~就是京都骨的味道，酸酸甜甜，很普通，朋友說這根本就是拈燒鵝的酸梅醬伴排骨，而且PRESENTATION亦很隨便:(7. 葡汁牛油果海鮮焗飯~~因為待侍應直接幫我們分菜，所以沒有拍照; 味道嗎，就是葡汁焗飯的味道，可狠的是我的那碗分不到牛油果 8. 蛋白杏仁露~~也沒有拍照，因為侍應要在餐車上用小火爐即場煮給我們; 正確點應該是加蛋白再煮熱給我們，蛋白完全的融合杏仁露裡，吃時感覺不到蛋白的存在， 味道不錯，只是那時已經飽了，所以覺得有點膩。9. 楊枝桂花榚~~樣子不好看，味道不好吃，不提也罷。10. 雷沙湯圓~~個人認為不過不失，但友人說皮有點厚。…Read More

難得清閑，記起朋友話哩度有HAPPY HOUR飲品買一送一連PIZZA任食，就專成來試試。HAPPY HOUR 由17:00-19:30(MON-THU)，唔可以訂位，當天我五點半到，一個人都冇，大概是都未收工吧! 侍應帶咗我到窗邊的位置，景色實在是一絕，在這裡可享受到180度的維港美景和看日落，如果放工來，相信感覺會更心曠神怡。飲品選擇還不少，基本的酒類、汽水、COCKTAILS、MOCKTAILS 都齊全，而且價錢都合理; 飲品上枱前侍應先送上一碟4小件如麻雀大少的PIZZA，材料應該是BASIL+蕃茄，味道可以。至於飲品，朋友點了杯 ASSAGGIO，喝後說其實就是VODKA + 橙汁 (HKD 70)，沒怎特別; 而我就要了杯簡單不過的LIME & MINT SODA (HKD 50)， 其實這杯好難唔好飲，但我真心覺得BARTENDER冇乜誠意，因為薄荷葉沒有'盅'爛，令味道沒有析出，我用飲管努力 '盅' 都幫唔到好多，所以飲落沒怎薄荷味，只有LIME同糖水味; 到第二ROUND，我杯嘅糖水比之前更多，好甜，而朋友嗰杯就多咗VODKA味。 …Read More