pongPONG9718's Profile

星期五收工搵地方Happy Hour，原來附近新開一間餐廳，把心一橫去試下。餐廳地方新裝修幾骨緻，仲有間開一部份做Bar檯。趁今晚無乜人，自己成班friends霸佐bar檯位。今晚主要係HH, 再嗌啲小食。炸口香口熱辣，配埋芥末醬送酒一流。薯格正常，但份量好夠，抵食。特色炒蝦，味道好特別，而且惹味，值得一試。Pizza係薄底趣口款，正常水準。鵝肝黑松露意大利飯，全晚最滿意既食物，足料味道濃郁，誠意推介。整體黎講好滿意。可能係工業區，夜晚唔駛排隊，但聽老闆講中午會多人。…Read More

冬天黎到又係食雞煲既時候。自問港九新界比較出名既雞煲火鍋都有試過，以為有水準既食店都發掘得七七八八，點知今日係旺角又試到間相當不錯既雞煲。二鍋頭近旺角站B出口，係南記上層，雖然唔算大間，但係環境乾淨企理，而且坐得相當舒服。坐低之後店員好快手送上味架同豉油，豉油配料同坊間其他雞煲火鍋店大同小異，唯一唔同係店家提供一樽類似魚乾既配料，加落豉油可以增加香味。火鍋食法都係先食雞煲，後打邊爐，店員誠意推介佢地既鴛鴦鴨煲，不過我掛住雞煲多啲，唯有下次再試。嗌佐個小小辣雞煲，雞件同京葱、乾葱同花椒等配料一齊炒，香味濃郁，上檯個時店員會係你面前炒香。由於本人大食關係，二人份量既雞好快就食哂，正諗住換湯底打邊爐之際，老闆竟然問我要唔要多份雞，抵讚。食完雞煲就到打邊爐，我地嗌佐個蕃茄薯仔湯底。湯底夠足料，不過茄膏落得有啲多，個人覺得個陣酸味過濃。粗略估計有超過五十款配料可以揀，肉類同海鮮要入紙另上，菜類丸類就可以去自助區拎。重點推介有：白鱔片、肥牛、豬頸肉、海蝦、帆立貝、墨魚滑等，其他配料都唔差。飲品方面都有好多選擇，包括汽水、韓國飲品，仲有幾款鴻福堂既健康飲品，啱哂鐘意健康既女士。值得一讚係店員服務態度好好，會教你點淥，又會自動幫客人加水換碟。下次會再黎。…Read More

又到Blue monday，返完工特別攰，放工一於去旺角行下食下。西餐廳係朗晴坊，位置相當方便，網上都有唔少食評。餐廳賣點似fusion，選擇都幾多，意粉、飯、扒等都有。值得一讚係個飲品方面，有好多cocktail選擇。首先上餐湯同沙律，湯有濃濃蘑菇味，如果份量再多啲就正，蒜蓉包脆口夠味。沙律有幾款唔同既菜撈埋，但有啲酸。餐前小食嗌佐焗蘑菇。一上檯即刻覺得隻菇好大，餡料係煙肉加芝士。整體黎講焗得夠乾身，餡料多亦夠濃味，最緊要隻菇夠厚肉，必食之選。跟住係白酒煮蜆。一送上黎即刻聞到淡淡的白酒味，蜆仲要好厚肉，而且隻隻都有肉，唔似其他餐廳煮到甩哂殼，證明啲蜆都幾新鮮，佐酒一流。跟住係焗龍蝦配牛柳。少少失望係餐聽無問我要幾成熟，個人鐘意食生啲。牛柳煮得有啲熟，不過口感仲係外脆內嫩，配埋紅酒汁有水準。龍蝦有驚喜，芝士好濃味，肉質好爽。兩個人嗌佐一個晚餐套餐同兩個小食，份量好夠，味道唔差。價錢貴唔貴就見人見智。餐廳裝修有啲美國風，係旺角鬧市中搵到個特別既小角落，算係唔錯。…Read More

星期日又係食好西既時候。今日一早係觀塘行街，中途要補給梗係食放題好，貪佢午市可以十二點食到三點。餐廳轉佐用手機自助落單，方便員工同顧客，出菜效率極快，漏單都少佐，抵讚。燒物款式有八九種，普遍都算有水準。比較深印象係牛舌，食完又食。厚切得黎唔會燒到乾哂，加埋檸檬汁勁夾。刺身主要係魚同蝦。油甘魚，三文魚，臉魚腩同蝦都好新鮮，另外北寄貝同帶子都值得推介。其他好似八爪魚同鮑片就無試。天婦羅種類唔算多，蟹柳同蝦值得推介，煮得有水準。粉漿薄，炸得脆口，而且熱辣辣。伊度係由客人自己調配天婦羅汁，仲可以加蘿蔔蓉壽司卷物方面有驚喜，款式多，亦有原創壽司。大部細細舊，可以一啖一舊，蝦卷，鵝肝帶子卷，火炙牛肉，三文魚等好味。友人仲嗌佐啲其他野食。牛柳粒味道還可以，花膠有驚，好林同入味。其實餐廳既自助飲品吧都好正，啤酒有stella，連白可樂都有。絕對會翻啅。…Read More

黎緊新年會回暖，趁仲有啲寒意嗱嗱林去打邊爐。吞Pot係油麻地既熱門食店，地方唔算大，但坐得舒服，即使閒日都需要預約先得食。煲底選擇多，可以齋火鍋或者先雞煲，後火鍋。今次嗌佐麻辣雞煲，一上枱雞煲啲麻辣香味湧埋黎，雞肉煮得好嫩滑，醃得夠濃味，食到無停手。火鍋生料方面揀佐牛柳粒、廣島蠔、羊肉、栗米同爆芝響鈴。牛柳粒切得太細，如果大粒啲就好，不過牛味好夠；廣島蠔有驚喜，雖然無美國蠔咁大隻，而且係雪藏貨，但煮熟唔縮水，蠔肉亦好鮮嫩，最重要係超重蠔味；羊肉切得有啲薄，味道正正常常；粟米食落都算新鮮；全晚另一重點係爆芝響鈴，超大舊，兼且新鮮炸起，浸湯後唔會即刻淋哂，一咬即刻有芝士流出黎，好流但好好食。想食平野伊度未必可以符合你既要求，但食物絕對襯得起價錢。…Read More

沙田河畔不嬲多好野食，只係要轉馬鐵線未必咁多人識。今晚試既和氣食堂，係伊區既熱門餐廳，放假黎食一定要排隊，閒日先有機會唔駛等。餐廳地方唔算大，但坐得都算闊落。今晚兩個人嗌佐五樣菜。第一款芝士厚燒玉子，上檯夠哂温熱，蛋味好濃，食落軟綿綿，上面舖埋芝士，食一舊好喇，要留肚食其他野。再上三文魚海鮮沙律脆脆，係特色壽司卷。海鮮同沙律醬味道好夾，再大啖啲就正。壽司大小適中，大概兩啖食哂。跟住係魚生飯，伊個真係不得了，有牡丹蝦，三文魚，帶子，海膽，油甘同葱拖羅，款款都好新鮮，兩個人食都覺得多。燒雞翼，我鐘意食。火喉啱啱好，食落入面仲有肉汁，滴兩滴檸檬汁更夾。豬肉壽喜燒，入面有温泉蛋，野菜，豬肉，金菇。味道唔差，湯頭夠甜。值得一提係服務員添茶好快手。絕對值得翻啅。…Read More

舊時有聽過恆河咖喱屋，但食真係第一次。叫佐咖哩雞配薄餅，同吉列豬扒蛋包飯。咖喱汁少少辣，但咖喱味並唔算香濃，薄餅反而有水準，脆邊香軟。吉列豬扒亦炸得好靚，午市兩個人都係一百蚊多啲。埋單話想用paywave, 員工即刻黑一黑面。唔想比人用就唔好提供。…Read More

餐廳標榜星泰菜式，款式都算多，但就有啲怪。豬頸肉沙律，豬頸肉竟然係切幼絲，口感好差，豬頸肉亦都烤得唔好。冬蔭公豬扒金湯粉，一食落口明明係喇沙味，即時睇下落單同餐牌，但又無喇沙，姐係餐廳不嬲都咁煮。最正常係椰青，同埋fusion既芝士雜菌焗茄子。唯一係取係一定食得飽，價錢唔算貴。…Read More

黎廟街要食煲仔飯就梗。但食個普通飯都要排三四個字就有啲哂氣。興記勝在好快有位，味道上絕對唔差，尤其係個蠔餅，大大份，料又足。煲仔飯亦有好多選擇。唯一要彈係個炒蜆，無肉又少，不過附近間間都係咁。…Read More

餐廳主打西餐，食物種類唔算多，午市餐單有六七款。套餐送湯同餐飲。粟米湯香甜，似係自家煲。嗌佐焗豬扒煲仔飯，不過感覺怪怪地，其實係普通焗豬扒飯，用砂煲上，但係又無煲仔飯既質感，味道係幾好。環境係最大賣點。…Read More

上手東南亞餐廳執佐，轉為美心經營。本身都無乜期望，都係返工午餐心態去試。咖哩豬扒飯送野飲，兩塊豬扒相當巨型，飯就正常。咖哩少辣唔算濃味，但啲汁就比得好少，想撈下飯都唔得。…Read More

老虎堂聽就聽得多，今日第一次試。出奇地荃灣分店無乜人，唔通比喜茶搶佐啲人？嗌佐招牌波霸厚鮮奶。一入口奶味濃，口感厚實，伊點係其他舖頭未必做到。珍珠味道少甜，反而無市面其他舖頭個啲咁煙韌。…Read More

放假梗係入荃灣搵食。餐廳係悅來酒店底層，賣點係性價比高。嗌佐午餐芝士豬扒飯，豬扒大大塊，炸得好脆口，但味道真係淡，汁都唔多滴，芝士味欠奉。飯就正常。唯一特色係任飲麵豉湯、茶，白飯、椰菜絲任裝。對食物無乜要求既人好會啱。…Read More

假日午餐通常都會出去食，廣福道周邊有唔少餐廳，泰國佬算係比較新既一間。午餐價錢由五十到七十到，都有六七款可以選擇。揀佐睇落最穩陣既海南雞飯，份量正常，以泰國餐黎講算係淡口味。雖然跟餐送凍熱飲同冬蔭公湯，但五十幾蚊偏貴，大埔絕對有其他更好選擇。…Read More

經過荃灣唔知食乜好，隨隨便便行入去試。嗌佐下午茶既越式酸辣金邊粉配雞翼。越式酸辣湯底唔同泰式或中式，感覺好新鮮，雞翼炸得啱啱好，肉嫩多汁。整體份量亦都唔少，仲包野飲，抵食。…Read More