janwong123's Profile

到現場想睇餐牌，已經有3個人睇緊餐牌，位於排隊位置隊頭。而3個負責“樓面”的店員在閒聊 (一個20多歲男士及2個中年婦人)，完全無理會過睇緊餐牌的3個人。本人主動告知店員2個 (現場亦有2個毗連的空座位)，男店員才發現原本已經有3個人，同時要求本人排隊。本人通知店員時，在現場已等待超過3分鐘時間，早已經留意到3個店員的不作為。因此獲告知要排隊時 ，我立即離開，因為不知道要等待多久才獲得招待到已經存在的2個空位上。我明白規矩，但這件事的根本原因係三位負責樓面的店員無好好履行自己職責。…Read More

去到Butlery發現過了一個號碼，跟店員A講，佢有聽我講嘢，但聽完唔俾反應我還離開，我便跟店員B講，店員B只顧自己取外賣，完全無視我跟她說話，唯有告知店員C才獲得一句回應。無可否認食物係一般以上水平，而且沙田市中心係少呢類餐廳，但唔會日日當正餐食，請自行斟酌是否一定要在這間餐廳用膳。…Read More

因為晚上剛巧要去大圍辦點事，天氣涼了，傍晚5點幾有少少肚餓，所以想在附近找點吃的，但怕食飯太飽，就在漢年叫鹽焗雞湯米。開頭見佢餐牌寫一碗，以為啲雞會好少，但碗湯米上到檯，啲雞肉接近一般「例牌」嘅份量：啲雞預咗係冰鮮，得好輕微雞肉味，肉質有啲「霉」，但未至於難食。米粉入面搭條菜心，啲湯有少少雞味，唔會淡茂茂，所以啲米粉都好易落肚。整體嚟講，$48咁多雞，份量搭夠，而且唔算難食，如果為了填肚，都值得去食。…Read More

食早餐用手機點餐：沙茶牛肉麵配太陽蛋麵包 (加飲品)蛋治三色雜菜除了麵，其他食物在20分鐘內已經到，麵等了40分鐘，期間追了兩次，最後個阿姐拎住人哋碗麵話俾我哋先。咩叫"俾你哋先"? 比我遲入座遲落單嘅都有麵到，我唔係打人哋尖喎。本來寫過一次好評，但今次的體驗非常差。舖頭打住懷舊旗號，不過效率差過傳統茶餐廳多多聲。食物方面，唔知係咪啲鹽唔值錢，所有食物都係偏鹹。之前食過一次覺得幾好食，但今次的水準，真係毫不突出。…Read More

同朋友去大埔行，午飯時間無意中經過一銘記，因為有位就順勢入去試下。舖頭細，坐得迫少少。但食粉麵呢類都唔會坐太耐，所以接受到。見到餐牌上介紹醉雞，似係招牌菜，就叫個醉雞米，朋友叫牛三寶飯。醉雞食落好香酒味，因為應該有加桂花糖調味，還有杞子，酒味唔苦仲甜甜地，好易接受。雞有雞味，唔似一般雪藏貨咁無味白𡁻。米粉係湯米另上，無乜特別。牛三寶飯有牛腩、牛筋和金錢肚，餸嘅份量唔少，腩汁好香撈飯一流。牛腩雖然有少少鞋口，但唔太黏牙，好香牛肉味。金錢肚最正，索晒啲腩汁。…Read More

食物質素唔評論。還未飲完嘢，有位女侍應走過嚟就咁放低張單俾我哋，環顧其他檯都無咁嘅做法。嗰一刻覺得想趕我們走，感覺好掃興，所以都唔想繼續用餐，直接埋咗張單去。走嗰時睇返時間，只是坐了1小時8分鐘。…Read More

在新城市廣場6樓一個人流不多的角落，新開張了日本餐廳，不太多顧客，想靜靜地享受午餐就入內試試。午餐定食有分熱食和刺身/壽司類，價錢由百多元至三百多元都有，熱食有照燒雞扒、鰻魚飯等等。點了一客燒魚定食，沙律、茶碗蒸、味噌湯和小菜先上。沙律菜已經隔走了很多水份，值得一讚。茶碗蒸好滑，好香蛋味。味噌湯鹹度適中。唯獨係小菜 (有菠菜、金菇、甘筍絲) 無味，要扣分。燒魚和飯後上，燒魚是一夜干，鹹香和魚鮮，伴飯一流。…Read More

疫情前有同同事去過QRE其他食肆食午餐，疫情後第一次再約出去食，睇到Misu 嘅食評唔錯，就訂位試下。同同事都係點Set lunch B 極上魚生丼，套餐連野菜沙律、日式蒸蛋、麵豉湯和雪米糍。坐下沒多久就先上沙律和湯，沙律菜很新鮮，上面有蟹子/飛魚子，更加鮮味。湯不會死鹹，味道適中。然後上了日式蒸蛋，十分滑。魚生丼啲魚生是厚切，每款兩件，有三文魚、劍魚腩、帆立貝、油甘魚和甜蝦，都幾新鮮，無雪藏味。不過啲飯覺得比平時食嘅壽司飯硬身同乾身，也不似日本米。最後上的雪米糍係敗筆，係獨立包裝嘅維記雪米糍(迷你)，剛剛喺冰箱攞出嚟，好硬。…Read More

最近才留意到新城市廣場7樓有兩間新的食肆，Cafe Library by Espuma 係其中一間，週末趁早就去試試。(本人係用商場App 攞飛去等位，只是普通街坊一名，從來無參與任何所謂試食活動或接受任何特別款待)店的裝修多粉紅色，傢俬都像Cafe 類型，整體似係走年輕人路線。食物方面，叫了一客熱水果茶，一杯朱古力咖啡，一客菠菜芝士意大利雲吞和一客蟹盛樂。熱水果茶的份量不少，可以兩人分享，有點後悔叫了朱古力咖啡，因為飲埋杯咖啡覺得過飽。要特別介紹「蟹盛樂」，因為我覺得在蟹蓋和蟹鉗下面的蠔仔飯才是主角，拌勻啲飯時已經有很濃郁的鮮蠔仔味，蠔仔入口啲鮮味爆發出來。蟹鉗也不弱，不是一般買的或在酒樓食的貨式，蟹鉗上的蝦膠十分爽口，也有鮮味。菠菜芝士意大利雲吞雖然有芝士，但醬汁不會過份濃味，味道配合得好好。…Read More

食店的位置旺中帶靜，在界限街體育館附近。早上剛開店沒多久就入內用餐，已經有兩檯客人。我們二人點了一份「香榭麗舍特級早餐」、一份「法式橙酒班戟」、一杯「蝴蝶夫人茶」和一杯「巴黎人朱古力」。蝴蝶夫人茶：上桌時聞到清幽的花香味，帶點成熟的風韻，就像少婦一樣，難怪有如此取名。入口取而代之有淡淡的果香，和鹹食或甜點都十分匹配。香榭麗舍特級早餐：定位係All Day Breakfast，食物內容大致和其他食肆的全日早餐差不多，但選料和煮法有些分別，炒蛋是法式炒蛋，而且有Medeleine和油漬番茄拌扁豆，Tolouse Sausage和煙肉也不算油膩，是這份早餐的特別和優勝的地方。巴黎人朱古力：朱古力粒和牛奶分開上桌，趁牛奶還暖就倒進朱古力粒內攪拌，可惜手腳慢，飲到底仍然有些未溶的朱古力。整體上不會過甜，和接下來要介紹的法式橙酒班戟十分配合。法式橙酒班戟：有三片班戟，質地本身都偏濕潤，伴有暖暖的橙酒醬，橙酒醬不會太少 (吃完班戟還有剩下的醬)，偏甜，淡淡的班戟沾上橙酒醬，味道剛好。整體來說，可以一試。…Read More

之前喺其他地區有經過敏華冰廳，見到大排長龍，所以從來未惠顧過，直到瀝源邨分店開業了一段時間後，有一晚經過見到毋須排隊就去試下。晚上唔太想食飯麵，所以叫了一客 荷蘭煉奶西多士 ($29) 及 忌廉雞湯三色雜菜 ($16)。本身對西多士無大期望，因為現在不論在連鎖食店或舊式茶餐廳，經常都食到啲唔夠熱唔夠脆口而且好韌的西多士。但在敏華冰廳叫的這份西多士，除了熱辣辣，也有蛋香，外層微脆，咬落都唔會死實實，已經合格有餘。美中不足係內層無花生醬 (可能就算有都食唔出)。至於個忌廉雞湯三色雜菜，唔明白點解叫忌廉雞湯，因為似清雞湯。但還好啲雜菜份量唔少，$16 已經算有個交代。…Read More

大圍有啲食店人氣高企，E FOR EGG係其中一間。舖頭11:00開始營業，我10:50去到，前面已經有4組人排隊。11:00正開門順利入座，點了餐牌上註明期間限定的海鮮軍艦盒子吐司($128)，還有招牌奶蓋咖啡 E FOR EGG Coffee ($45)。咖啡先上桌，賣相不只吸引我的眼球，還有坐在隔離的一對情侶，都話賣相好特別。因為咖啡表面多咗隻「蛋」，配合了餐廳的主題，蛋黃的味道像栗子醬，而蛋白像酸忌廉，帶微鹹。配合微甜的咖啡，別有一番風味。至於海鮮軍艦盒子吐司以份量取勝。吐司上面有吉列蠔和帆立貝，和微溶的芝士。帆立貝有點失色，味道很淡，芝士也只是微溶。不過吐司裡面的蛋混和了魷魚粒，就豐富了吐司的口感。吐司外面脆口，裡面的麵包仍然軟熟，加上蛋香濃郁，為整個吐司挽回了分數。配菜的炸番薯條脆口，帶番薯香，如果多啲就更好。總括而言，吐司的主要材料：麵包和蛋的口感和味道，十分有水準，將來會一試招牌三重芝士盒子吐司，相信最簡單的材料就能發揮到最好的味覺享受。…Read More

見Platform啲食評唔錯去試下，去到登記入座，等咗大約5分鐘就可以入座，比想像中快。叫了菠菜蝦肉卷和Baileys Latte。(1) 菠菜蝦肉卷 $98單從賣相不能辨認到是意粉卷，要慢慢切開才見到。餡料份量多，菠菜多，有菠菜味，另外有少許蝦肉，爽口。整道菜味道靠醬汁調味，但也不太能分辨到甚麼味道，印象不鮮明，本來很有心機的手工菜被味道影響了印象。(2) Baileys Latte $48Baileys味突出，但唔覺有咖啡味，如果咖啡味重啲會平衡啲。這間食肆感覺上，無一個鮮明的主題和招牌菜，食物和飲品味道中規中矩，可以一試但不是必食推介。…Read More

晚上喺旺角食晚餐，因為太鹹，所以搵糖水食中和返味蕾。經過間糖水店 (仁芝初)，見得一檯客，驚有伏，但因為之前食嘅嘢實在太鹹，所以入去試下。舖頭啲糖水選擇有限，大部份係中式傳統糖水，得少數新款的 (例如楊枝甘露)。叫咗一碗芝麻糊和杏仁糊雙拼，同埋一碗合桃糊。兩碗糖水甜度都適中，唔會太濃或或太稀，水準係中上。…Read More

惠顧了這食店數次，之前叫拉麵，質素不值一提。今次叫了特上日本豚肉飯和日本和牛丼，都算是店家主打，所以才寫食評會比較公道。當日特上日本豚肉飯做緊優惠$88，豚肉味道鮮甜，而且撈飯嘅汁都夠，平日我無乜飯癮都可以食得晒成盒飯。另外朋友食日本和牛丼，但味道有點羶，肉質又不是嫩滑，$149值唔值就見仁見智。…Read More