Goooal's Profile

聽閒呢間店既蝦籽撈麵都幾出名，加上openrice既風評都唔錯，今日湊巧經過灣仔終於有機會試下。六點鐘左右黎到所以唔係好多人，自己一個坐張四人卡位。侍應阿姐幾有禮貌，笑容亦都十足，點左一個蝦籽牛肉撈麵（＄３２），加＄４要多包檸檬茶。先上左伴麵既羅漢果湯，一飲就覺得好清甜解喝，唔會好油膩。到個麵黎果陣已經見到好足料，蝦籽鋪滿晒見唔到麵咁滯，未食已經閒到好香既蝦籽味。牛肉好新鮮爽口，麵條咬落夠晒彈牙，軟硬度掌握得好，食落好有口感好過癮，比出面好多鋪頭既鹼水麵高出一個層次。不過如果就咁食就略嫌乾身，加埋個湯，再撈埋蝦籽一齊食既話就係一絕。埋單唔洗＄４０，咁既價錢有咁既質素，絕對可以用物有所值黎形容:)。…Read More

放假日下午三點幾黎到太古城地下foodcourt，都仲係有好多人，不過我一個人就比較容易找位，不久前係呢度食過芝士焗長通粉係唔錯的，今次就要左個咖哩豬扒奄列飯套餐（單叫要三十七蚊），四十二蚊包野飲、沙律同忌廉湯。先講忌廉湯，稍縑「杰」左少少，唔夠滑；凍檸檬茶一般茶記水準，唔夠甜:(。至於個奄列飯都算係份量十足，蛋夠滑，飯亦夠香，幾適合配埋咖哩汁一齊食，屬於水準之作:)。不過吉列豬扒就比較失色，肉質唔夠鬆脆，比較淋同埋乾身，豬扒個麵衣同肉一夾就分開，要扣分:(。奄列飯值得推薦，不過下次黎應該唔會叫豬扒了。…Read More

高登炸雞個名上網聽人講就聽得多，今次都係第一次黎試食。試左最出名既小學雞塊（大），老實講十八蚊真係有點貴:(，不過食完都叫做值得既。放學時間黎到都唔洗排隊，等左三分鐘左右就有得食，雞係即叫即炸既，每件都炸到好靚既金黃色，咬落去夠晒香脆，熱辣辣仲有肉汁，不過就好似唔係幾夠入味，下次自己落返調味粉應該會仲好味。作為高登討論區既一份子，今次試過總算叫做還左心願，應該還會有下次的。…Read More

呢間應該係小西灣唯一既壽司店，地方唔大所以淨係做外賣生意，有時小弟經過都會買一兩個手卷做早餐或者宵夜:)。今次就買左盒加州反卷返屋企做宵夜，八件賣廿八蚊唔算貴，醋飯軟硬度適中，加埋蟹籽食落幾有口感，材料就有青瓜、蟹柳同煎蛋，沙律醬就略嫌多左少少，蓋過左醋飯同材料既味道:(。不過以份量黎講做宵夜係唔錯既選擇。…Read More

呢間茶餐廳係小西灣都算歷史悠久，由以前開係商場地下到搬左上黎都有十幾年，最近裝修完仲乾淨企理左:)。食物質素方面唔可以話好標青，不過由細食到大都叫做有水準，而且勝在食物款式都算多，尤其是下午茶時間。通常小弟黎呢度食野叫得最多既係豬扒，今次就試左個煎豬扒豉油撈公仔麵。豬扒一向厚度適中，肉質鬆軟，最緊要係咬落唔會韌，公仔麵唔乾身又夠彈牙，撈埋豉油汁食又係一絕。份量都幾夠，水準更加係喜出望外，而侍應態度就一向都麻麻，見你食完唔會問你一句「仲要唔要？」，就直接收晒野。不過茶餐廳始終係茶餐廳，食物質素點都緊要過服務態度既，一句講晒：「好食就得啦。」…Read More

呢間小食店開左幾個月，直至最近先第一次幫襯，其實佢係以賣台式飲品為主，一到放學時間就經常聚集一班學生哥買野飲，不過我就對佢既小食興趣比較大。賣既小食都幾多款，而且係以炸既香口野為主，對炸物情有所鍾既我就試左一份鹽酥雞，十蚊既份量已經幾多下，而且新鮮炸起夠晒熱辣辣，咬落有肉汁之餘唔會好油，而且幾入味。講真我覺得咁既價錢有咁既質素，已經抵過出面好多專賣炸物既鋪頭，值得推薦:)。…Read More

自己本身一向對米線既興趣都不大，不過自從同朋友食過一次譚仔之後，就好似上左癮咁，每星期起碼要食過一次先安落。次次黎食我都會叫墨丸同牛丸，鍾意佢夠彈牙，湯底就一定係清湯，一來唔食得辣，二來自己食開粉麵都鍾意清淡少少既口味。同埋自己一向大食，好多時都會叫加底，埋單三十五蚊已經食到好滿足。值得一提既係，唔同分店既價錢係會唔一樣，試過食返同樣既野，灣仔分店貴過旺角果間三蚊，大家值得留意。…Read More