魚果。愛's Profile

自己好少去沙田大圍呢邊食野，因為住港島的我，車程未免有點太遠了吧，但估唔到今次入黎探朋友就有食神XD由於太耐無黎過大圍，所以根本唔知有咩好食，住大圍的友人話附近開左間新Cafe，便去一試。去到門口，裝潢有別於商場內其他食肆，給人一種輕鬆舒適的感覺。坐低之後，一看餐牌，雖然叫歐陸餐廳，但係就連韓式菜式都有，而且價錢亦非常經濟。我地人數唔多兼且女仕為主，所以好多睇落好吸引的都未能夠一試。首先叫左個咖喱牛尾配德國農夫包，農夫包外脆內軟，咖哩汁濃而不辣，牛尾亦非常稔滑跟住就係黑松露忌廉燴義大利芝士雲呑，個黑松露忌廉汁真係無得輸，因為加左黑松露所以非常香濃，但食落一D都唔膩，可能我香港人性格啦，係度諗如果拎撈飯就一流喇！韓式拉芝士辛辣泡菜雞肉石板飯，同行友人一向追捧韓風，所以亦都特意叫左個韓式飯試下，香濃芝士加上嫩滑的雞肉，而且辣度適中(唔係好食得辣的都可以試下)。大家亦可以等芝士起焦再吃，更加香口！最後一個就係德國式啤酒焗雞，賣相相當出位，我地問店員拎手套，手撕來吃，風味十足！試完呢4樣之後，雖然好想再試其他，不過都真係實在太飽喇，唯有再約下次再試過啦！(P.S. 埋單4個人每人都唔洗$100，真係好抵！！)…Read More

是日與朋友一行10人來到尖沙咀聚會食晚飯，由識飲識食的朋友帶路！由於係星期一再加上朋友一早訂左位，所以即使係晚飯黃金時段亦無須等位！坐低傾2句，無耐就有老火湯飲跟住就係頭盤，黎到食中菜，不過唔好以為頭盤就一定燒味拼盤，今餐食既頭盤絕對不是省油的燈！第一味是咸菜胡椒浸花甲，胡椒味恰到好處，有辣味但沒有搶過花甲的鮮味！跟住呢個椒鹽白飯魚真係無得頂，聽小二講，佢地係用新鮮白飯魚整既，所以食落去特別香口！生炒蠔鬆生菜包，蠔鬆加上炸米粉，口感豐富！法式焗元貝，用新鮮元貝焗成，配以西式調味，一款幾有特色的菜式！百花馬友蝦膠煎肉餅，由於有蝦膠成份，所以比一般肉餅更加彈牙，外層煎到金黃色，非常香脆！咬落去，亦食到啖啖鹹香！送飯一流！招牌鴛鴦雞，一邊白切雞一邊蒜香脆皮雞，個人比較喜歡白切果邊，口感婌滑，雞味突出！咕嚕肉 - 甜酸味適中，由於個人好鐘意食咕嚕肉，本來諗住叫個白飯，但係比跟住個2個飯打消左個念頭跟住2個飯，不得不介紹，第一款籠仔荷葉蒸花蚧糯米飯，可能我孤陋寡聞，之前未試過花蟹配糯米飯，所以感覺幾新鮮，花蟹當然啖啖肉啦，溶入左蟹汁既糯米飯，更加係好食到停唔到口！不停添飯是常識吧！第二款臘味煲仔飯，小二又講臘味都係香港製造，重點介紹當中的臘肉，肥瘦分明，肥膏口感爽口彈牙，有別於一般"淋滋滋"果D！最後食返個魚湯浸蕃薯苗，為今晚晚餐劃上句號！由於呢餐係朋友係同我慶祝生日，所以唔知張單幾錢XP…Read More

九龍城一向出名多泰國餐廳，好多都打著正宗既旗號，真係花多眼亂好難擇。好彩今晚個飯局有位友係金泰常客，於是就發現左呢間正宗又特別泰國菜。五個人叫左六碟野食，碟碟都夠哂大碟，泰國菜黎講真係算好抵食！呢碟酸辣柚子大蝦一上黎個陣都有D驚，會唔會好怪架？好在個酸辣汁夠哂味，完全冇沖突既感覺，每隻蝦都好大隻，抵食之選！之後就係個個都大讚既串燒，可能因為期望過大，除左雞串夠哂滑之外，其他都不過不失；值得一提既係，個沙嗲汁好明顯係自家製，十分正宗，出面未食過既味道，為串燒加分不少。呢碟豬頸肉係朋友大力推薦，果然冇介紹錯。同坊間一般既豬頸肉唔同，半肥瘦之餘十分爽口，個醬汁聽講係正宗泰國南部醬汁，十分惹味。明爐烤魚就食得多，明爐魷魚真係第一次，蒜頭同辣椒既配搭一直都天衣無縫，魷魚又新鮮，讚！總結黎講都係好滿意既一餐~…Read More

其實一直都食過幾次Baby Cafe既午餐同下午茶，今次終於有機會試下佢地既晚餐啦！8鐘晚飯時間去到竟然唔使等位真係好難得，值得一讚既係D staff十分好態度！好耐冇黎過Baby Cafe張menu好似轉左少少，多左好多較較正宗既意大利菜，未食已經好期待！第一個上黎既係芝士焗西蘭花，本來覺得$28會唔會太平，點知個size......細過盆盆栽，明哂哈！味道方面唔算太突出，芝士味略嫌不足，D西蘭花既草青味仍然殘留，有少少失望囉主菜方面分別叫左春雞蟹肉飯同海鮮義大利飯，兩樣十分正宗！意大利飯有少少迎合返香港人口味，軟硬適中，海鮮汁亦都十！分濃郁！而春雞蟹肉飯都冇令人失望，燉飯極之入味，蟹肉都十分足料。…Read More