hannansl's Profile

相隔3年，再訪跑馬地人龍店 — 祥興咖啡室！揀咗午市去，試咗喇沙同鮮茄濃湯系列！喇沙湯底好濃，雖然唔算正宗，但個湯底好夠味，微辣，唔錯！反而跟餐嘅炒蛋多士就好失望，份炒蛋勁老，厚多士一啲都唔似多士，食落軟淋淋（似係擺咗好耐咁），又唔夠牛油，我哋最後無食到鮮茄濃湯我哋要要咗豬扒螺絲粉，湯底味道屬於偏清淡嗰種，不過有雜菜嘅甜味，都算有驚喜，豬扒煎得好香，肉質軟淋，味道不錯！菠蘿包蛋撻水準依然好好，就算好飽都要叫！凍奶茶好滑好好飲，甜度適中！凍檸茶茶底夠濃，係出色之作！後話，侍應們雖然好忙，但依舊笑容滿面，感覺好親切！揀得午餐時間去，都預咗人多會好嘈，但係企喺水吧嗰個姐姐麻煩下次講電話講得細聲少少，已經滿口鄉音（絕對唔係歧視），仲要勁大聲，唔多唔少會影響食客心情！而且佢全程夾住個電話嚟邊講邊做，都唔知啲口水會唔會噴咗落去啲食物度，感覺好唔專業！都知道而家飲食業不斷輸入外勞，估唔到祥興都唔例外…Read More

今次特登揸車嚟，結果因為午市已過，都係試唔到鮮茄濃湯系列 🤷🏿‍♀️ 肥豬餐肉煎蛋菠蘿包超級好食！原來又咸又甜嘅味道混埋一齊係咁有驚喜！又熱又脆嘅菠蘿包配埋煎香咗嘅肥豬餐肉同流心蛋，真係好好食😋 必試 ！！！酥皮蛋撻好震撼，蛋漿甜度適中，撻皮亦唔會過厚，難怪檯檯都嗌！奶茶，個人覺得係失望嘅，同上一次杯奶茶比較，今次呢杯係無茶味而且帶苦澀，飲咗2啖就無飲……Read More

喺附近醫院睇完醫生順便就去呢間都幾出名嘅茶記食個晏啦，真係一試難忘！叫咗是日午餐咖哩龍利球，常餐同埋菠蘿油！常餐個叉燒唔係好乾柴嗰種，而且個湯都幾夠味，麵身又爽，個炒蛋仲好滑，厚多士都係熱辣辣，食完好滿足！至於個咖哩飯，個汁係極度重口味，屬於又咸又杰嗰種，杰到完全可以當膠水咁用，講真，係幾難入口 😔 最後菠蘿油真係贏晒，果然係菠蘿油關注組嘅話題之作，熱辣辣好好味！侍應嘅服務態度都唔錯，整體來講都可以啦，不過午餐就未必會再試，反而下次想試吓個喇沙同蕃茄濃湯！…Read More