Faywoon's Profile

本身唔係蠔痴，但間唔中就會忽然好想食生蠔，所以呢間用嚟止癮就一流。蠔本身細細隻，唔肥，但係抵食，叫一打仲平過一碟意粉，先掃一打再諗主菜。口味偏鹹，不過啱我，因為自己唔會落醬，所以鹹少少都冇所謂。黑松露飯好好食，唔知係咪撞彩，因為第一次喺呢間叫，全家都讚佢係全晚最好食。另外叫咗柏士圖大蝦飯同冬蔭功意粉，都好食但冇黑松露咁令人驚喜。反骨雞翼都一樣，炸得夠脆，乎合預期，但未至於驚喜。牛扒都食得過，只係出得較慢，所有嘢熱食同一時間叫，但佢最後先到。我本身對扒冇咩研究，只要厚身唔嚡同有 grill 嘅香就得，所以我覺得都好食。…Read More

之前同朋友食過一兩次 lunch semi- buffet 印象中唔錯，前日再去食就好難食。Buffet 入面有款菇嘅前菜究極鹹。其他沙律醬撈嘅前菜就太淡，包括我好鍾意嘅薯仔沙律，近乎冇味。主菜我叫咗黑松露飯，生米，我好鍾意食西餐所以絕對識分係燴飯嘅硬定係生米，而佢肯定係生米。先生叫咗蕃茄乜乜意粉（唔記得）個茄底就茄膏味好濃，質素同大家樂差唔多。由於諗住就咁食個 lunch 所以冇影相冇剩，除非嗰日係主廚請假搵咗個新手嚟煮，如果唔係咁嘅質素真係等執，希望管理層見到快啲改善。…Read More

收工約同事打邊爐，地點唔算方便，位置亦隱閉，唔係元朗通都行唔掂。建議首次去嘅朋友問定員工詳細路線。舖頭不算大，乾淨光猛。同事幫襯過，訂檯時已留咗部分海鮮。海鮮真係好靚好鮮味，今次食咗鑽石蜆同黃金貝。建議大家訂檯時問埋有咩海鮮入貨，以免到時食唔到想食嘅。響鈴一份有10條超大卷，又係必叫，如果驚食唔曬可以叫半份。仲叫咗豚肉，都好好食，似連鎖店貨色。其餘雲吞、乜滑乜滑、菜之類就正常水準冇咩特別。唯獨個本地牛，雖然好新鮮，不過略嫌瘦得濟，淥兩淥就靭，可能本地牛就係咁。可能因為成班都係女士，叫嘅唔算多但最後都食到好飽。…Read More