300 spartan's Profile

見到呢間酒店有自助餐優惠，上去睇下有咩選擇，見到除咗有自助午餐及晚餐之外、仲有個下午茶餐、兩位用收費$341。二話不說就訂位。去到坐低就發現唔對路，我被安置在間小房中而不是坐近自助餐區！跟住聽到旁邊枱的食客低聲討論原來唔係食自助餐，先知唔少人被廣告誤導了！😡心諗嚟到呢個地步都冇乜嘢可以做，唯有做次蠢仔啦🥲到了所謂下午茶餐上枱、再一次失望咗，好心佢學下人哋唔食得都要睇得先，佢求其到就咁攞個木盤放晒所有食物上去，一點心思都冇！最起碼用個幾層高的食物架啦，望落去都高貴啲先。都算、啲嘢食好似放咗好耐咁、面冇血色、顏色暗啞，味道方面比起坊間的茶餐廳更不堪，嗰個聲稱朱古力流心蛋糕明顯係現成行貨，攞入微波爐叮返熱就上碟，流都唔流嘅？！甚至乎普通一杯Cappuccino都沖得淡而無味！唯一可以讚嘅係附近得幾枱食客，算是清靜中渡過這次被誤導的自助下午茶餐😮‍💨 ，希望啲人睇到我嘅食評後唔好上當啦！小彩蛋係我身後有個太太埋單後，有意無意咁講「頂呀！仲諗住係自助餐？真係搵笨！」🤪…Read More

上個禮拜六和女友行完飛鵝山經沙田坳道落番去準備到東華三院黃大仙醫院探病，望下鐘又未到探訪時間，咁就搵間餐廳食個下午茶先。誤打誤撞記發現呢間餐廳，裝下入面見到細細間但都算乾淨企理，咁就入去試吓！一坐低就見隔離枱有個貌似林敏聰嘅哥仔食緊碟粟米六粒飯、憑住佢嘅賣相已經有少少驚喜，可能林敏聰𥄫到我偷望佢碟飯、佢就以熟客嘅口吻推介話呢個粟米六粒飯掂呀！我就話睇得出啦！😅之後佢再推薦呢度嘅咖哩吉列豬扒飯仲正，當時就決定下次一定要試吓啦！咁我和女友就食咗西多士餐和餐肉蛋三文治，兩樣都ok好食、而我杯茶走少甜都唔錯🤗滿足後就啱啱夠鐘行返醫院探媽媽！今日又到醫院探望後，帶家姐去到餐廳、正值午飯時間（1:30pm)望見高朋滿座，只好行過對面嘅友誠閑逛打發時間。過咗十分鐘再返去就有位了！第一時間梗係叫個咖哩超列豬扒飯啦！可能真係即刻整嘅關係，等嘅時候比其他人嘅食物耐，心諗好食嘅嘢係值得等嘅。😋終於出場啦，賣相都可以，咖哩味道比一般茶餐廳認真，只係我覺得可以多番少少汁🤏而吉列豬扒炸得鬆脆帶有肉汁，整體來講算中上水準！但係下次再食可能會試吓咖哩牛腩或雞扒😋美中不足嘅係如果價錢可以再平啲就完美喇！…Read More

若果你唔介意落單伙記以至廚房大哥都會擔住口烟嚟招呼你嘅話，呢間食肆都不妨一試嘅！午飯時經過東記，本來都冇諗住幫襯，但正值午飯時間，之前心儀的餐廳又冇位、兜兜轉轉嚟到呢間伯父飯堂，而喺經驗中呢類食肆除咗環境及衛生比較差之外，一般嘅炒粉麵飯都唔會太差。所以就胆粗粗蹤入去。因考慮到再揾落去可能唔夠時間食飯啦！😥坐低後見到附近的食客都係食緊嗰啲蒸餸小菜，都唔係我想食的，我都係堅持自己的信念叫番炒粉炒麵算了。果然不出所料，今次我碟雙蛋揚州炒飯個買相都唔差。仲有三隻蝦都係一個意外驚喜✌🏼…Read More

置身店中彷似遊歷大陸山川中的食肆，無論門面及舖內的裝修擺設、以至肥佬老板的一身做型都形成一種和城市格格不入的氣氛。至於由肥老細烹調出來的担担麵亦是實而不華，充滿濃濃的鄉村味道，雖然不是我食過的担担麵中最好，不過久不久感受下農家小菜的風味都令人感到愜意！😋…Read More

在此區試盡不下百間茶餐廳，諗唔到都會中伏中到應一應！怪只怪忽發其想、想轉下口味試吓啲新嘅，就一行四人行咗去石硤尾村附近，開頭想入大X活食，點知入到去食山人海，揾個位都好難跟手走過去斜對面渣豆茶座。惡夢就係咁開始了，首先叫咗四個下午茶餐，沙嗲牛肉蛋麵、餐肉蛋三文治、奶油豬仔包、雞扒包連同餐飲。出餐時間正常，第一個出場係奶油豬，見到人造牛油仍然是膏狀的，已經唔講佢啲牛油唔掂、但竟然連朱仔包最基本嘅外脆內軟都做唔到！摸落去只微暖的所以牛油仍是凝固着。第一個失敗☹️之後晦氣亞姐擺低咗碗清淡如白開水的米粉上面放着煎蛋，然後佢好燥咁講冇晒沙嗲牛肉、你哋揀咗第二樣啦！咁我哋就再點豬頸肉，過咗一陣，晦氣姐擺低咗碟好唏噓嘅豬勁肉，睇上去死灰一遍，毫無血色、睇見都唔想食！第二個失敗😔到最後嘅餐蛋治叫冇咁衰，只係啲麵包比較乾同硬少少，第三個失敗🤪，但比較起前面嘅驚嚇呢啲算係咁啦！最後冇出事嘅雞扒包係正常嘅，真係還得神落😅所以解釋咗點解呢間餐廳有咁多位剩低，隔離就坐無虛席。下次都係唔好三心兩意、貪新鮮感係要付出代價㗎！😫…Read More

闊別了北角區數年，今日偶然經過，想起曾幾何時新和富是我的飯堂，於是就碰碰運氣看看是否健在。須知道這個年頭莫講話幾年，就算上個月曾經幫趁的舖頭，今個月就可以消失得無影無踪！轉入小路，漸漸行近和富中心時，心中已打定輸數。但世事難料，見到舖頭仍然生還，親切感湧上心頭！杏坐下來就看見老板娘依舊坐陣收銀機，隨即點了圖中所見的涼瓜班腩炒米，水準依然，鑊氣十足，斑腩入味，米粉微焦。不消十分鐘已俾我KO咗碟炒米粉，再嘆埋杯奶茶埋單都係收三十八個大洋，仲想點？總算在這個只得十一，二度的冬日增添一點點的慰藉！…Read More

今次同家人一行四人，叫了兩人套餐再另加一客雜莱咖哩角和芝士烤餅。其中咖哩羊及牛肉味道一般，食得出其中的香料沒有很豐富的層次，燒雞的肉汁鲜味十足，美中不足的是份量欠奉！而烤餅和咖哩角有驚喜，首先俾我感覺到係新鮮出爐，仲係熱烘烘兼軟綿綿的，咖哩角再沾上点点薄荷汁就更加美味！最後飲品点了芒果及香蕉lassi，味道比起在重慶大廈某餐廳真係好好多。不單只有乳酪的味道，更品嚐出鮮果的香甜，真的令人灰沐春風yummy…Read More

其實一直都想去重慶大廈試一試印度咖哩，终於選擇左咖哩王，現在的重慶大廈和我印象中真的有些出入，入面現代化得很。少左D風味，基本上同一般商場没兩樣。對於今日的香港乜都要新；要方便，有時真係覺得無奈！言歸正傳，食印度咖哩其實有好多選擇，如果不是好似我有"重慶森林"情意结的語，根本不須要專程來到這裏，我們點了咖哩牛腩，咖哩雜莱，燒雞，咖哩角，芝士及原味簿餅及Lasa.以上菜式除了咖哩牛及菜，燒雞尚算合格外。其他的食品和飲料都未如理想。咖哩角(包括牛肉/薯仔)上枱時都是冰凍的，那杯芒芒果Lasa更是從壼中倒出來，朋友說早知道的話一定唔會要！而事實上，它的味道亦和一般現成買的乳酪無分別。如果行開尖沙咀區而又想食印度咖哩的話，這裡都可一試，但對我嚟講--試過就算！…Read More

專誠開個open rice account來寫呢個食評，希望少D人中招，今曰中午和同事一行六人來這裡食Lunch，叫左冬陰公肥牛金邊粉，上枱時目測還可以，但一食落D牛肉好似橡膠一樣，唔駛講，即刻換，諗住試吓虾可能好少少，點知都出事，D虾大就大嘞！但係似用清水㷛熟，完全冇冬陰公的味道，又死實咬了一半已經食唔到！又有腥臭。但今次算了，冇再要求更换，當買佪教訓啦!總結就係貴夾難食！…Read More