曼巴食神的個人專頁

事緣呢日咁啱一個去灣仔辦事，就一試呢間so called名店，1：20去有條人龍，等左接近半個鐘有位。卡位就無，去到一張大圓枱，已經見到每位必點的咖喱豬扒。份量超多，見隔離個男人都食唔曬要搵盒裝走 。另一邊個女仔食剩一半。我份豬扒來時，仍係份量好多，咖哩汁係分開上，只見較稀，認同其他網友講偏辣無椰香的。要辣定要椰香人人可取向不同，但D汁稀就已經趕客，而且味道絕稱唔上咩秘製。我特登唔點咖喱汁下試下塊豬扒咩料，口感唔鞋但醃得唔夠入味。豬扒飯98另加凍飲22,無套餐價，雖然豬扒份量夠曬多，但始終係下欄野，寧願平廿蚊少返D豬扒。總而言之，吹大左，無下次。…查看更多

呢間來過兩三次，當時未有咁多人氣，叫做有D新意，同埋有朋友方便出面路闊充電，唔係真係覺D野咁好食。今晚覺D服務趕客。事緣我6點半來，兩個朋友未到，我先叫一碟菜，女樓面（定老闆娘）反問你d朋友未到喎，我心諗：食住等唔得？最過份係我越坐越熱時，發現對上冷氣無開，問係咪壞左，女樓面好老奉話人未齊唔開（呢D仲唔係趕客！？醒D都扮下野話唔記得開啦）再講下野食啦。初試金沙鮮魷，已經係出術咁用咸蛋黃，都做唔出果種惹味，好一般。招牌梅骨OK，但略甜左D。但要讚下酸菜魚，細碗都好大兜，爐魚好鮮甜。…查看更多

本來去油麻地分店，去到兩點稍遲，坐低得悉崩砂賣曬，好失望，唔死心，轉戰另一分店塘尾道。油麻地分店地理位置贏曬，啱曬路痴,mtr站一出即見，不求人。塘尾道如果太子就C2出，行幾條街，見到旺角消防局就行啱左，田記就在果邊。崩砂腩肥瘦適中，都有牛脂香，如某R君網紅講：唔痴牙。本身我已當食牛痴牙恒常化，無諗過真可以唔痴牙。至於網紅形容不可超越，講到係崩砂腩的天花板，我就咁睇：如果你可接受到更肥，想更重油脂香，田記未必係最好選擇，潮乜園果D可能更適合你。…查看更多

星期五晚同一班朋友來食，同多數大排檔不同，有挨pan椅，舒服好多。原先想試八寶鴨，因屬功夫菜不易食到，但問過價錢要680蚊一隻（要提早至少一日預訂），朋友又無特別興趣於是作罷。餐牌已唔見盆龍雞，都係幾特別的菜式，仲有乳鴿炒飯都係第一次見，但朋友無興趣。欖角骨同牛柳粒都叫左，由於較普通就唔講。椒鹽鮮魷粉唔厚椒鹽味亦夠，幾惹味，應不比已拆左的元朗池記遜色。蝦多士最為推介，多士鬆軟加上原隻蝦，好香口，我地一行6人，老闆娘話有兩隻多左共8件，由於太好食，我不客氣的食多件（在美食面前客氣就是對唔住自己LOL）最後炸蠔都唔錯，粉唔厚而且蠔鮮甜肥美。餐廳內不大，應該7,8張枱左右，星期五晚仍坐唔滿，唔知係咪openrice太少人討論，事實上亦唔差，可以再來。…查看更多

今日係第二次來大少，兩次都係點乳豬飯。水準依舊，口感一流，一咬d肥膏溶喺咀內，回味無窮，絕對有酒樓水準。皮肉不分離，唔會硬，乳豬必食，68蚊價錢是合理價。見d人留言係講燒肉點差點差，叫人唔好幫襯，我未食過就唔作評論，但乳豬真係推介。…查看更多

今日係假期最後一日，不想頹廢在屋企食麵做早餐，帶住期待食呢間以籠仔飯做招牌的店24蚊的價錢，比一般盅頭飯大，似幾抵，但味道就好令人失望~心目中的籠仔飯係要有飯香，但呢度完全冇，飯又淋得滯~鳳爪雖OK,但排骨偏淡,呢間以籠仔飯做店名真係失禮~唔死心,見有灌湯餃食,依家唔多地方有,就即管叫味道OK,但偏細件,同埋想講阿姐問到唔問就幫我狂隊醋,隊太多了而且佢應先問我要唔要醋,我就係少數食灌湯餃唔鍾意落醋的人,呢D服務唔得細心一句講哂,無TAKE TWO!!!…查看更多

我食過咁多間小籠包，無覺得邊間特別好食，可能自己咀未夠刁食唔出，但可以講既係呢間係我食過中的算較差,食落有D鞋口，雖然皮唔算厚。粉皮還可以，肉好淡，個汁其實都麻麻地台式擔擔麵我平時較少食，算係中規中矩吧。抄手一般，個汁唔見得出色，唔辣，普通。無影低朋友的飯，佢要戒口走蛋，更無咩好講。一點鐘左右walk in ，無得BOOK位，夜晚唔知，應該閒日關係，唔洗等。…查看更多

今日中午接近一點在女人街兩側遊走，因平時已留意到兩邊好多餐廳，一直未有試，最後入左間權記。見到權記有崩砂腩，引起我興趣，因崩砂係靚部位，比多少少錢係值得。腩汁濃，崩砂腩滲出陣陣肉香，而且分量都多,我諗都有8至10件，加埋枝凍豆漿，66蚊唔貴。想提一下老闆溫文有禮，喺呢D粉麵茶餐廳加左唔少分，見得太多係粗聲粗氣。…查看更多