sekka's Profile

去過The Southside 3次，都唔知有Table呢間店，係睇openrice先知佢嘅存在，仲有最多好評添。今晚喺黃竹坑站轉車，特登去食番餐。原來佢座落商場正門，但門口喺戶外，淨行室內係見唔到佢㗎。好耐無食過鐵板扒，加上非常肚餓，就叫左個免翁牛柳五成熟($148)升級特飲熱情果烏龍茶半價($15)。手機落單好方便，上菜都好快手。扒餐包左羅宋湯，好濃好夠料，雖然細細杯，但份量真係夠㗎啦，因為個扒餐係好豐富嘅。兩塊厚厚牛柳，粉嫩淋滑，配菜有番茄、椰菜花、粟米、脆肉瓜、大量薯角，全部都好味，包你食飽飽。熱情果烏龍茶則較遜色，用烏龍茶包，但唔係好覺熱情果味，比較清淡，但驚喜佢係用甘蔗渣飲管而唔係紙飲管，呢個又加分。總結食店環境清新，食物用料新鮮優質，賣相精美，性價比高免加一，喺湯杯同單據都見到名稱係‘茶東西’，應該係茶餐廳升級傑作，一定要大推！…Read More

依家啲麵包越嚟越貴，與其十幾蚊買個周街都有嘅吞拿魚包，不如趁今日過海，去太子呢間特色麵包店買番幾個包試吓。睇之前東方報道，呢間係全港首間用酵素做包嘅麵包店。佢係台灣一家名為禾野酵素生活館的姊妹店，香港分店的每款包點都加入了一種名為御麵素的酵素，主要用途是與麵糰產生天然的化學作用，分解部分澱粉質，令其更容易讓人體吸收，同時不會令人吃罷胃氣脹。買玫瑰洛神麵包同杏仁碎軟朱古力包（我唔記得佢個名啦），但因為果時已7點，店員提醒買3個85折，所以買多個oreo餅底嘅朱古力包添。軟朱古力包包身比想像中硬，oreo底朱古力包中間有啲脆米咁嘅東西，但再硬啲，唔係好咬到。總結都係玫瑰洛神同之前試過嘅黑帝斯呢啲有cream cheese嘅包類啱我口味。下次都想試吓臺灣神木同紫薯包…Read More

三個女人第一次去加寧街搵食，呢度名店雲集，Lady M，Burgeroom都喺度搵到，我就揀左Simplylife Bakery Cafe，貪佢價錢合理，加$30就有沙律或湯加餐飲，啱我。睇食評先知呢間餐廳係美心集團嘅，餐廳比我想像中細，但環境唔會太黑，枱嘅距離足夠，坐得好舒服。我點左紅酒燴牛尾糙米飯（$108），其實我食唔到有紅酒味，應該揮發晒，但醬汁濃郁，包住粒粒米飯，好入味。牛尾燴得夠淋，三扒兩撥就比我K O左成碟啦。朋友點嘅係茄汁燒虎蝦手製扭紋粉 （$138），燒蝦係香嘅，茄汁都唔錯，唯獨是呢個扭紋粉太實啦，我試左一啖覺得要多幾吓至吞，我朋友就話食到佢好攰添。另一個朋友點嘅燒美國嫩牛柳（$218）我覺得係整晚嘅驚喜，我試左兩啖，驚為天人，未食過咁嫩嘅牛柳，正到一試立即愛上左佢呀！呢度嘅侍應好親切友善，當晚沙律轉左款會即刻同客人更正。雖然久唔久會見到一條小人龍喺度等位，但都無話要限客人用膳時間，咁樣食都食得舒服啲啦！…Read More

以往多數買外賣，唔係牛腩米線就係炒粉麵，今日首次入座堂食一個芝士肉醬意粉，套餐包飲品，估唔到個醬汁又較得幾啱我口味喎，有肉香又唔會太酸，加埋芝士就係畫龍點睛，食左第一啖忍唔住就想食第二啖。飲品杯夠大，絕不欺場，爽晒。同行媽媽點左豬紅牛腩河，河粉夠滑，同米線兩樣我都鍾意。食飯時間見幾個大男人幫趁都點左星洲炒米，大大碟，份量好夠，係理想嘅開餐小店。…Read More

初嚐永發車仔麵係佢喺華貴街市開店嘅時候，本人麻麻地好車仔麵，但因住在華貴，永發便順理成章成為大家樂快餐之外的另一慣常選擇。因為食店面積不大，我通常都會幫趁外賣，午餐必定選豬紅牛腩米線，喜歡豬紅夠爽，牛腩夠淋，仲通常係筋多過腩添。之後華貴街市關門大吉，好高興得知老闆在香港仔另起爐灶，開了這間永發車仔麵。雖然依家位置同住處有段距離，少左幫趁，但偶然一次尋回昔日味道，都可以滿足吓心癮。我之所以麻麻地車仔麵，係因為覺得坊間車仔麵啲料好似魚旦，豬皮，雞翼，紅腸咁，都係普通食材，無乜特別，最最重要係通常食完都唔係好夠飽。但試過永發車仔麵覺得腩汁湯夠香，筋夠滑，肉夠淋唔癡牙，豬紅咬落又爽口，仲有幾片生菜送，最最重要係食得飽我喎，加個凍檸茶就perfect喇。（以前喺華貴嘅份量係普通裝湯嗰隻外賣兜，我都覺得夠飽喎，依家仲加大左添。）…Read More

跟大家一樣，我亦是被之前大批食客對這餐廳的一連串好評吸引而訂位。雖然後來發覺是一連串試食活動的食評 (例如生蠔連冰上碟，又出現上輪推出的飽魚食品等可察覺一二)，覺得可信性驟降，但見$349包加一，價格確實吸引，於是決定姑且一試。到臨之前一連看到兩篇食評提到生蠔有臭味，心想：「唔係啩，咁大鑊！」心情頓時變得七上八落。當晚我們一行九人六時半前已到達，獲安排坐於獨立房間，環境舒適寧靜，非常滿意！自助餐一開始，生蠔counter前即時組起長龍，唯幸師傅準備充足（似是於自助餐開始前偷步預備了少數)，所以於初段時間需要排隊輪候的時間尚算很快。當晚供應4款生蠔，USA, Scottish, Ireland & Coffin Bay，亦如其他食評提到，真的不知道吃的是那一款，但尚算鮮味，總算放心了。生蠔水準合格，但遺憾當晚不見有蕃茄水牛芝士沙律供應，亦沒有了凍大蜆，但其他如沙律，冷麵，刺身，蒸魚，咖喱，炸物等品質尚令人滿意。本人於自助餐從來不吃即煮粉麵或粥品，所以品質如何，無可奉告。聞說餐廳的鎮江排骨人吃人讚，可惜當晚只出了一輪，本人欲品嚐時已被掃清，隨後換上翠肉瓜炒豬頸肉，本人才有幸吃到。此道菜豬頸肉非常爽口，是另一美味之選。美中不足是沒有自助餐常見的即切燒牛肉，總覺得差了點什麼。整個自助餐之中甜品算是最弱的一環，雖然一件件精緻的甜品在雪櫃陳列得非常漂亮，但本人試過牛奶布丁尚可，brownie 及豆沙煎堆仔略嫌有點實，泡芙已淋，柚子啫喱味道並無柚子的清新感覺，有點失望！值得一讚的是侍應的殷勤服務，雖然我們處身私家房，但侍應們都會密密留意我們枱面上是否有餐碟需要收拾，態度有禮勤快，值得加分。總括而言，以$349 （$359 - $10 ）一位成人價來說，此自助餐也是物有所值，可以一試。…Read More

同大家姐慶祝生日，一行五人去咗花月庭食Dinner Buffet。地方真係好大，Ｄ枱唔會太逼，坐得好舒服。剛剛來到時要在門口排隊入場，都好怕要大排長龍攞嘢食架，原來又唔駛喎，最多人嘅即開生蠔，都係排四、五個人啫，好合理！雖然三位師父已經不停手咁開，仲用水沖過Ｄ蠔殼先比我，但。。。真係仲食到殼碎呢！當晚每人獲贈鮑魚一隻，憑咭去counter攞，味道都算唔錯。仲有熟龍蝦任攞，我試咗芝士蟹子忌廉汁同豉椒汁，覺得都係前者夾Ｄ。除咗燒牛肉,仲有片皮鴨食，唔錯唔錯！熱葷數目唔算少喎！雖然無話邊樣食物特別特出，但勝在質素平均，最緊要食得開心。食得差唔多，仲有餘慶節目，突然鑼聲響起，有師父即席炮製火焰雪糕，雪糕係最傳統嘅三色雪糕呀！正！仲有藍霉芝士餅、窩夫、豆腐花、芝麻糊、杏汁燕窩等，好飽！依家至三月底用渣打咭仲有七折添，大概四百蚊一位，我覺得好值喎！…Read More

想搵經濟嘅新年大餐食，訂咗恆豐酒店紅煙窗餐廳食lunch buffet，１２：００至１４：３０都係每人＄１５８，用恒生、中銀、Compass等信用咭仲有八折，係加一都有八折喎，好抵！元旦日竟然唔係好多人喎，可能大家鍾意食好嘢多過平嘢啦！我對上嗰次嚟已經係２００４年，餐廳明顯裝修過，比以前坐得舒服，ｄ位無咁迫。雖然食物選擇唔係好多，但以＄１４０嘅價錢，我覺得已經抵食有餘啦！冷盤有自助沙律，亦有已經撈好嘅，有菠蘿、粟米、生菜、紅腰豆加千島汁我已經滿足啦。壽司有五、六款，仲refill得好快，刺身放喺冷凍櫃任挾，保持喺適當溫度，夠晒穩陣。當然唔少得煙三文魚、凍蝦同大頭龍蝦仔啦！餐湯有中、西湯任揀，我地個個幫趁磨菇湯，皆因好味沒法擋，磨菇味好香，比起上次帝苑又無咁多味精，飲完唔口渴。熱葷唔算好多，白汁海鮮飯同肉醬意粉啱晒我亞爸，個白汁較得好味。此外仲有Pizza、時菜、鴨胸、炸魚、炸青口同我覺得最正嘅炸雲吞。雲吞新鮮炸起，食入口脆到發聲，入面ｄ蝦膠好爽，意外咁好食。另外有燒火雞同牛柳，姪仔食咗至少四轉火雞，細佬話牛柳仲好食，可惜我兩樣都無試到，反而試咗個唔得嘅拉麵，豬骨湯唔夠濃，ｄ麵仲有鹼水味，可能烏冬或地獄湯會好味ｄ啩！仲有一檔甜品pancake，我都試唔到，食咗細細件檸檬cheese cake，檸檬清香加淡淡芝士味，唔膩，啱我！楊枝甘露布丁，ｏｋ！桂花糕，好香！芒果黑糯米，椰汁唔夠！我另一個目標係Movenpick 雪糕，試咗朱古力同士多啤梨。朱古力雪糕有朱古力薄片，士多啤梨有果肉，個人喜歡朱古力多ｄ，實在香滑。仲有雲呢拿同意大利芝士餅味共四款，源源不絕供應。呢度嘅自助餐仲有樣好，係有橙汁、蘋果汁、茶、啡任斟任飲，不另收費，抵讚啦啩！總括而言，元旦日仲可以搵到個咁抵食嘅自助午餐，心滿意足！…Read More

星期日同家人嚟到擦番餐，不嬲覺得必勝客係良朋親友開心歡聚嘅好地方，唔知係咪佢個一班朋友將個ｐｉｚｚａ傳嚟傳去嘅廣告太深入民心呢？我哋五個人，叫咗一個超級夏威夷大厚批，兩個什菌雞肉天使麵，一個原味雞翼，一個葡汁雞皇飯同一個大蝦鮮果沙律。我地一家人至鍾意什菌雞肉天使麵，個汁調得好好味，ｐｉｚｚａ、雞翼同飯一貫水準，我本來對個沙律有期望，點知蝦唔爽口，鮮果又少，有ｄ失望。因為係星期日，無ｓｅｔ　ｌｕｎｃｈ，只有兩點半後先有下午茶餐。原來依家無得揀茶或啡，跟餐只送汽水，要其他飲品就要加錢。姪仔想飲芒果沙冰，廿幾蚊杯，如果叫下午茶餐加＄１５就可以轉，但姪仔等唔切，兩點三叫咗，竟然搞到兩點半至到，手腳真係慢咗ｄ。埋單時比咗兩張＄１００　ｃｏｕｐｏｎ，點知簽咭照打咗總銀碼，呢ｄ咪太過大意囉！…Read More

去親深水埗都一定會到坤記買糕番屋企食，白糖糕我一定買，另加芝麻糕、馬蹄糕或紅豆糕任何兩款，每款半斤。電腦節最後一天，今次買咗芝麻同紅豆，本人愛馬蹄糕夠爽口，但老豆鍾意紅豆糕多豆又唔會太甜，芝麻糕又夠香，買晒三款又太多，所以今次唯有捨棄馬蹄糕啦！今次買嘅芝麻糕覺得無以前咁香，不過佢嘅九層心機，仍然值得欣賞。白糖糕買咗兩件，一件ｓｉｚｅ正常，一件就偏細但比正常厚番少少，賣相差ｄ。最正都係紅豆糕，雖然又覺得紅豆少咗，但仍然好好味！仲有覺得ｄ糕要擺入雪櫃雪吓會好味ｄ，即買即食都比較黏，無咁爽，總之日後仍然會繼續邦趁！…Read More

依家d自助餐越嚟越貴，動輒＄４００樓上，又未必物有所值，所以都好耐無食過，偶然得知憑ｏｐｅｎｒｉｃｅ　ｃｏｕｐｏｎ嚟呢度食ｌｕｎｃｈ　ｂｕｆｆｅｔ有六五折，仲係長者、小童優惠價都有得折，真係多謝ｏｐｅｎｒｉｃｅ，令我有機會重溫自助餐的滋味。百零蚊實在唔敢要求太高，見佢有長腳蟹、龍蝦仔、凍蝦都已經好滿意，曾經食過有ｄｂｕｆｆｅｔ嘅長腳蟹好咸，呢度就無呢個問題，咁當然亦都唔會好鮮甜啦。龍蝦仔個頭就易剝，但個身比較難剝，較論盡，不過都有ｄ膏，ｏｋ！ｄ凍蝦我就食到有腸同有ｄ沙，唔敢再食。沙律有數款選擇，本人獨愛鮮果沙律，可惜只出了一輪並無ｒｅｆｉｌｌ，之後才發現有專人服務嘅沙律吧，無邦趁到。剌身只試了三文魚和八爪魚，幾好，壽司就無乜驚喜，只有青瓜蘿蔔壽司，極其量再外包蟹子，所以唔係好受歡迎。熱食最受歡迎係海南雞飯同１８５５牛肉，海南雞飯ｓｉｚｅ的式啱啱好，唔會太飽，雞肉夠滑，有辣醬、黑醬油同薑蓉三款醬料，好周到。１８５５牛肉好淋身，唔會太熟同靱，同場仲有炒雜菜加菇菌，好味！熱葷見過有炸雞、豬扒、魚柳、千層麵，炒飯，我都無食過，只食咗魷魚鬚，夠粗同仲暖，所以覺得幾好食喎！中式蒸點心，出得唔夠密，一出蝦餃、燒賣首先比人搶晒，鳳爪、排骨、山竹牛肉都唔擺得好耐，剩番义燒包可以長期有得供應。即整意粉有三款：長通粉、雜菜羅絲粉同墨汁意粉，有茄汁或忌廉汁，仲有多款配料如煙肉、火腿、蝦、粟米、磨菇、蜆肉等隨便揀，不過份多咗ｄ，加埋忌廉汁會好飽。甜品我只試咗ｔｉｒａｍｉｓｕ、杞子啫喱、迷你杯裝涼粉、香蕉ｐａｎｃａｋｅ同冰皮朱古力卷，我食嘅ｔｉｒａｍｉｓｕ底層較濕同酒味重咗，屋企人話佢哋之前食嗰件唔覺有呢個問題，杞子啫喱甜甜哋幾清新，涼粉只係特別在個杯，冰皮朱古力果然係呢度特色甜品，尤其裏面ｄ脆脆，生色不少。自助餐尾聲，好多人排ｐａｎｃａｋｅ，由於多人要求加雪糕落香蕉ｐａｎｃａｋｅ，嗰位女服務員又要整ｗａｆｆｌｅ，又要整ｐａｎｃａｋｅ，又要畢雪糕，有點應接不瑕，但都盡力做到一眼關七，達到每個客人嘅要求，其他同事見到亦即刻幫忙畢雪糕，疏導人流，抵讚。有嘢讚亦有嘢要彈，之前見過有食家坐喺電梯嗰便，發覺張枱好污穢，我有同樣問題，因為張枱喺電梯隔籬，電纜上ｄ污物掉晒落餐枱，唔知以為張枱好耐無人坐添，但觀乎ｌｕｎｃｈ　ｂｕｆｆｅｔ日日爆場嘅情況，絕對無呢個可能，即係話電梯不斷有污物掉下啦！一埋枱見到咁即同侍應反映，佢只叫我哋坐後一張無咁污穢嘅枱就算，另一班客人嚟到照樣帯佢哋埋去嗰張污穢枱坐，並無清潔更換嘅意思，亦相信班侍應已習以為常，於是唯有自己逐件餐具清潔過至用囉！呢個情況希望有關方面加以正視，因為咁會令客人非常不安，覺得食咗污漕嘢落肚呀！…Read More