Traveller Siu's Profile

多年來都好少去港島東搵食，今次身痕去太古城行下，喺OpenRice搵到間高評價嘅餐廳，見環境裝修唔錯，當去打卡都好，就Go！(評分5✅為滿分)環境✅✅✅✅✅呢間Black Bear嘅裝修有啲似日式cafe，基本上好多個位都好好打卡，尤其係入面兩幅畫，有「最後的『Bear』餐」，好得意。被安排喺入面近窗口位置，座位闊落好舒服。食物✅✅✅✅✅主菜叫咗照燒汁煮牛肉丼定食，及鰻魚飯定食，配有前菜同麵豉湯。前者雖然賣相同坊間好多牛肉丼差唔多，不過我覺得牛味較香濃，收$88係絕對值呢個價；至於鰻魚飯就真係堅香又大條，出面食鰻魚飯，條鰻魚通常都係八達通size，今次足足有2大塊，正。飲品叫咗黑熊特飲同荔枝士多啤梨梳打，兩者都好飲，呢方面唔多講，睇相大家都會明。埋尾追加士多啤梨乳酪芭菲同柚子蜜乳酪雪糕牛角包窩夫，同樣前者都係expected嘅好味，不過我更推介柚子蜜乳酪雪糕牛角包窩夫，雪糕香、窩夫脆。如果你太飽只食到一個甜品，咁一定係呢個。性價比✅✅✅✅叫咗6樣嘢，$588埋單，老實講我唔覺貴，以環境、食物攞盤、食物質素，出面收多你$300都仲得，真心堅讚👍🏼…Read More

喺舊樓林立嘅深水埗，有間舖仔細細嘅拉麵店，門面企企理理無咩特別，至少唔會反感。（評分5✅max）環境✅✅✅✅裡面唔大，大概坐到20人，環境乾淨唔逼，坐得舒服嘅。味道✅✅✅✅✅今次點咗2個丸京拉麵，1個配背脂醬油清湯，另1個配黑蒜油湯。2個拉麵抵讚係湯底好味唔死咸，特別係湯面好少油，感覺唔油膩，食得舒服。要挑剔的話，只可以話份量唔大，不過我覺得拉麵係咁㗎啦。麵質爽、叉燒薄薄都好食嘅。性價比✅✅✅✅埋單$220兩碗，味道好，算扺食喇，有喺日本食嘅水準喎。…Read More

喺舊樓林立嘅深水埗，有間舖仔細細嘅拉麵店，門面企企理理無咩特別，至少唔會反感。（評分5✅max）環境✅✅✅✅裡面唔大，大概坐到20人，環境乾淨唔逼，坐得舒服嘅。味道✅✅✅✅✅今次點咗2個丸京拉麵，1個配背脂醬油清湯，另1個配黑蒜油湯。2個拉麵抵讚係湯底好味唔死咸，特別係湯面好少油，感覺唔油膩，食得舒服。要挑剔的話，只可以話份量唔大，不過我覺得拉麵係咁㗎啦。麵質爽、叉燒薄薄都好食嘅。性價比✅✅✅✅埋單$220兩碗，味道好，算扺食喇，有喺日本食嘅水準喎。…Read More

某一晚9點，突然心血來潮想試下香港嘅松屋，話晒嚟咗香港都未食過，就狗衝去佐敦有以下體驗：（去到門口）我：咦，9點都有8成滿座喎，嗰邊有位⋯⋯（準備埋位時，職員突然殺出）職：先生，幾多位？我：兩位職：呀，自己搵位啦下（唔耐煩嘅語氣）我：呆咗（心諗，我剛剛咪自己搵位囉，係你截住我咋嘛）無嘢嘅，無礙回味日本味道嘅雅興，叫咗個喺日本時常食嘅「生薑牛肉燒定食」，以及普通嘅燒牛肉定食。環境評分✅✅✅乾淨度不過不失，但我覺得無咗日本松屋嘅感覺，用色有少少唔同，所以個親切感無咗。食物評分✅✅✅✅見佢話用返日本嘅米，而生薑牛肉燒都有日本時時嘅水準，連個沙律味道都好似喺日本，淨講食物係有feel嘅。性價比✅✅✅講真，同日本比就無得比，喺日本食個定食都係1000yen左右，香港就要$90，多接近一半，抵食當然喺日本，不過香港作為回味止癮嘅定位，兩個人食接近$130，唔貴囉!…Read More

話說有日想食韓國菜，咁去尖沙咀實揀到一間啦。喺個list上面，呢間韓屋屬於高分一族，咁我就太放心入場，點知⋯⋯環境✅✅老實講，舖仔細細放咗廿幾個位，話唔逼就假。仲要我坐近廚房，油煙噴射到我全身，成個人入哂味。食物✅✅✅✅2個人點咗個牛膝骨湯加$20飯，再加醬炒牛肉石鍋芝士拌飯。前者個湯幾好味，只係比較多牛脂肪令個底嘅湯唔飲得，有啲浪費。後者個飯其實都好好味，韓式醬加牛肉好惹味，不過呢個飯真心有個敗北位，可能成本問題，個飯好細兜，用嘅石鍋都係細碼，問題嚟了！唔夠飯又唔夠熱就無飯焦（註：我喺韓國食過係有飯焦㗎！）加上份量都幾細，做下午茶還可以，晚餐要$138，食完我出嚟即時搵地方食多一餐，咁樣唔得囉。性價比✅✅其實間舖有另一個問題，係樓面得一個人，問題唔係招呼唔到咁多人，就係佢做完一輪個人hang機無反應，全程水都無杯，餐牌差啲係我自己落手攞，最後埋單仲見到「加一服務費」，好想問服務在哪？所以，呢間舖以後不了就係咁解。…Read More

深水埗Cafe林立，想食Cafe去深水埗白撞總會揀到一間。當日就係抱住白撞嘅心態去試，走入咗呢間Colour Brown。環境 ✅✅✅✅從門面睇，賣懷舊小店、工業風設計，簡潔舒適。筆者揀坐門口位，坐得算係ok，不過呢個位唔太適宜食嘢時去坐，會食得比較辛苦。雖則如此，環境分我無扣到，5分滿分我俾4分，因為裡面有條打卡好靚嘅樓梯，不過由於當日太多人關係，我影唔到相。食物 ✅✅✅✅當日叫咗兩份All Day Fully Brown Breakfast，由於另一半唔食茄汁豆，所以特別要求換牛油果等其他食材，店員都做得好好。而味道方面，四平八穩、都幾好味。性價比 ✅✅✅當日兩份All Day加兩杯咖啡，埋單$360，價錢平絕對不是！喺呢個地段食呢個質素算差不多或偏貴，如果有閒錢我覺得一試無妨！…Read More

雖然我寫食評嘅呢一刻，哥登堡已經結業，但筆者都好想舒發一下哥登堡與我多年來嘅緣份。話說筆者中學就讀附近某陽氣極重嘅學校，所以30幾年前就開始食呢間野，老實講由於當年年紀細、見識少，有得食鐵板牛扒已經覺得好勁，即使好貴、儲一段時間錢就會嚟幫襯下。不過，其實當年都已經覺得食物水準一般，30幾蚊有得lunch鋸扒都算係咁。畢業後離開呢區，20幾年來應該幫襯過3次，主要都係老人家返嚟食下回憶。今次結業，返嚟完整地總結一下我認識的「哥登堡」環境 ✅✅✅論環境，同我30幾年認識嘅哥登堡可以話係無分別，當年環境好舊、依家一樣咁舊。枱椅擺設同以前一模一樣，舒適度都係一樣，真係好痴線！點解可以咁keep得食物 ✅✅✅雖然上文提到當年細個見識少，但其實當時已經覺得食物水準一般，去食嘅原因都因為成班o靚仔去鋸扒好型。今次返嚟同哥登堡埋齋，帶埋另一半叫咗兩份鐵板餐，分別係$160嘅鐵板牛扒及$170嘅鐵板牛柳，味道維持水準～～～唔好味！牛柳唔淋又細份，牛扒肉質有D假。跟餐飲品叫咗一杯紅豆冰同涼粉冰，前者味道幾好，不太甜又夠花奶，有傳統冰室嘅感覺；而後者味道一般，加上「涼粉冰」唔太有冰嘅感覺，所以都係差。性價比 ❓❓❓❓❓大家無睇錯，性價比係無比分，舖都執咗啦，性價比高定低都唔關事。再者，今次返嚟食回憶，再次返嚟感受一下，不論好食與否我都係讚！讚老闆嘅堅持、讚店員嘅努力、讚40多年來(我唔知佢開咗幾耐)為區內居民嘅服務就夠，尤其係香港越來越唔似香港，筆者以前嘅地方「城寨」、美東邨、哥登堡一個一個消失，所以回憶比性價比更高。最後，祝福被逼只能向前看的香港人！…Read More

雖然好耐無出post，但最近食過一間餃子小店令我忍唔住都要寫一下。呢間位於荔枝角與長沙灣之間嘅餃子店，舖面細細但好有人情味。環境 ✅✅✅✅雖然舖面舊、唔大，但整體嚟講都好乾淨，呢下先難得！味道 ✅✅✅✅✅我點咗煎韮菜餃10隻，同行朋友就叫咗雙拼餃10隻，餃子size適中、都夠飽滿，韮菜餃味香濃。同行朋友叫咗粟米餃拼韮菜，都係好好味。性價比 ✅✅✅✅✅10隻餃$47、雙拼10隻$49，一定食得飽你！如果驚唔夠飽，仲可以加錢加多個麵，湯餃拼麵加多$9、煎餃拼麵加多$16，所有價錢都相當合理，唔貴囉！…Read More

話說喺Openrice上其他食客對呢間餐廳嘅評語係「串」「唔準時開門」，為咗試一試我選擇食Tea 3、4點時間去食，時間剛剛好。環境☑️☑️☑️☑️多次經過Lady Gourmand 門口，都已經覺得好特別，好似美國鄉郊食店咁，門外嘅坐位可以坐，冬天坐外面打卡一流。室內嘅環境就有D似美國嘅鄉村酒吧，放咗部打碟機喺近門口位置。同時，店主應該係貓奴，所以好多擺設、掛畫都同貓有關。味道☑️☑️☑️☑️☑️食物就叫咗個邋遢漢堡配咖啡天堂、深海奇緣配菠蘿椰子奶昔。前者邋遢漢堡肉汁多、好夠辣，其實好好味！而後面嘅咖啡天堂係一杯沙冰，咖啡味極濃，好似成兜咖啡炒啪入口咁濃，但都係好好味。至於深海奇緣即係Fish & Chips嘅進化版，多咗炸蠔、炸蝦、芝士條等，都香口好味，炸魚都有魚味（嗱！講真唔係個個Fish & Chips都有魚味架！)所以食品都幾高分。性價比☑️☑️☑️☑️兩個Dish兩杯飲品，盛惠$313，除開每人$156左右，食Burger嚟講唔算平，差唔多質素嘅平少少、$120-130都有。不過加埋環境擺設，同埋貓奴加分位，都值得大家去食，記得大家唔好咁早去就得！…Read More

位於利奧坊嘅Restoran SAYA一直以來都係我想試嘅清單上面，點解話「一直以來」？因為呢間鋪最好就係訂定位先，否則Walk in通常都無位，摸過幾次門釘。即使係突然想去食，大家最好早幾粒鐘都打去問下有無位先穩陣。環境☑️☑️☑️☑️呢間餐廳首先吸引我嘅，係佢嘅裝修。到處都係藤製傢俬、湖水綠牆身、地磚，打卡一流。不過由於太多人關係，打張靚卡都唔易，我食到差唔多閂門先影到靚相。味道☑️☑️☑️☑️由於當然異常肚餓，即使只得兩個人食、張枱都唔係大，但都怒點3餸2飲品1甜品，先有$138嘅蟹肉炒飯，味道不過不失、少少蟹味同飯粒炒得鬆散，加埋個醬食係加分嘅！另一道菜係女朋友指定嘅辣肉碎生菜包 ($108)，鍾意食辣會鍾意，個肉都幾辣。至於我鍾意嘅係瑪莎文咖喱．牛肋條，汁底香濃，牛肋條入味，好食！如果份量多少少就更好！飲品方面，點咗椰汁沙冰同薑汁菠蘿沙冰，前者我比較鍾意，椰味重加上好似有D奶味，又有少少椰肉；後者薑汁同菠蘿都係我鍾意，但加起上嚟又好似一般。最後加埋芒果糯米飯先走，呢個表現正常，呢D甜品好少失手。性價比☑️☑️☑️☑️當然兩個人食，埋單$636，以環境同食物質素算對得住個價錢。…Read More

香港地時常有餐廳隱藏喺大廈之內，今次如果唔係同事帶路都唔識嚟。話說某日外出工作，lunch時production同事想喺尖沙咀食平民野，唔好咁貴又飽肚，就帶咗我去呢間聯威，佢個門口要進入大廈大門，然後見到一個好似天井位竟然有間茶餐廳喺度，堅隱世。不過隱世又是否一定好味呢～環境☑️☑️呢個環境當然唔會係好靚，純粹老茶一間，聽講呢度係好多司機大佬、導演攝影師嘅飯堂，即係好多男人！味道☑️☑️☑️佢成個Menu最吸引就係啲「皇袍乜乜物物」，個皇袍其實係用鮮奶炒蛋，所以個蛋會帶點奶白色，會較為滑身。我今次揀皇袍叉燒飯，個蛋幾滑唔錯，只係個叉燒較為差，切得厚之餘又有少少乾身，完全好貼切男人竇食男人嘅粗豪叉燒飯。性價比☑️☑️☑️一個碟頭飯加杯凍檸茶，盛惠$63，喺尖沙咀唔算貴唔算平啦，勝在坐位唔逼，又唔趕你走。…Read More

元朗食日式拉麵，「彩」真係數一數二，之前一直好難排隊食唔到，直至早前天氣凍到無人出街，無咩人肯捱凍排隊先至有機會，真誇張！環境☑️☑️☑️場內粗略數過大約10個位，唔太逼，有喺日本食拉麵嘅感覺。味道☑️☑️☑️☑️我同女友分別點咗「原味豚骨湯沾麵配花椒麵」，而我就點「蝦味噌湯沾麵配小麥麵」。前者豚骨湯係expected嘅香濃，但湯質地有點稀，所以麵身掛湯能力一般，幸好Today special嘅花椒麵幾香，加分。至於蝦沾麵，個湯勁濃勁有蝦味，配本身味道普通嘅小麥麵已經好夠味、好好味。個叉燒肉質ok，個蝦湯好味就得，我成碗飲哂！性價比☑️☑️☑️☑️兩碗有水準嘅拉麵，埋單$176，其實好抵。難怪日日排哂隊，今次我唔使排有得食真係好運咋，如果唔係天氣凍真係排到癲。…Read More

話說呢間新麻蒲應該係出名食燒肉，而我當日起身起得晏，所以簡單食個lunch就出事。環境☑️☑️☑️好，一步一步講！環境大但坐位舒服就一般啦。唔知點解啲枱腳係要出入kick住。味道☑️☑️叫咗個章魚石鍋拌飯，食材同醬料幾好味、夠辣，但一個重要嘅失誤，令個飯嚴重失分，就係個飯太濕，多水到啲飯一嚿嚿，食到漿住個口，有咩辦法唔嬲。性價比☑️個飯$89，仲要加一最後$100，其實已經唔好食，仲要其實無乜service，除咗落單就無咩關啲staff事(可能係我衰，3點幾先食lunch，人哋休息緊所以無咩服務可言)。希望日後有機會試埋你嘅BBQ再評個更中肯嘅意見。…Read More

一直以來，我都以為上海菜嘅味道係好standard，最多都係辣多辣少、鹹多鹹少咁，但今次經驗真係麻麻，仲要發生喺堂堂「和平飯店」。環境☑️☑️☑️☑️今次逐樣點評，環境其實唔錯，都坐得舒服嘅，真係有嗰句講嗰句。味道☑️☑️今次點好多餸，本身入場就想食酸菜魚、小籠包，其餘就試埋酸辣湯雲吞及津白肉絲湯年糕。首先不如好人啲，讚嘅野講先，小籠包好味的，只係包入面無乜湯，湯年糕個湯鹹香好味只係年糕有啲林。好，係時候__ ，酸菜魚條魚無魚味，肉質直情有啲假，唔好食！難以形容！個酸辣湯雲吞個湯底麻麻，唔辣唔酸，而且稀湯多過入面嘅配菜，加上雲吞皮厚唔林，味道就好似唔入味嘅菜色。以上兩道菜都極不推介。性價比☑️5個滿☑️我俾1個，好明顯啦。利申絕唔係打手，真金白銀幾百蚊食完嘅comment，嬲到啲文字都燒得著。…Read More

之前已經食過旺角嗰間紅葉茶屋，嗰次係食剌身茶漬飯，當時已經覺得幾好味，只係份量唔夠飽⋯⋯但！日本菜就係咁㗎啦！今次荔枝角D2 place開新店，見無乜人知個場唔爆當然試下。今次同女朋友分別點咗牛肉壽喜燒定食，同和牛肉壽喜燒定食，試試有無分別。環境☑️☑️☑️☑️☑️間鋪咁新，一定乾淨又好坐㗎！味道☑️☑️☑️☑️☑️兩個定食都會配兩個前菜、湯、一個半熟蛋，個鍋除咗牛肉就有菜、洋蔥等。牛肉軟林加上牛肉汁，撈飯一流，唔怪得個飯可以任裝。性價比☑️☑️☑️☑️和牛壽喜燒定食係$168，牛肉壽喜燒定食就平啲$128，價錢上唔平唔貴囉，不過由於個鍋加白飯任裝，一定飽！所以性價比算中上。…Read More