Regina:]'s Profile

普通車仔面我就食得多，滷水車仔面就比較少。今日有同事介紹公司附近有一間，所以收工一齊去試下。一人一碗再加2個小食share😋🍜豬雜面入面有各式各樣既豬雜，例如豬肚，豬腸，豬心，粉腸等等。湯底我叫左個特別啲既，「重口味推薦」，即係所有湯底加埋一齊。本身以為會得個咸字。點知竟然入到口每一種湯底都好分明。重口味的我表示喜歡。🍜滷水汁車仔面滷水汁好香，飲落好有層次，飲得出有唔同既香料味。叫左3個餸：牛腩。雖然唔係坑腩，但係都好冧好入味牛肉餅。好似一粒拍扁左既牛丸咁，食落都幾有趣。牛舌。估唔到佢都可以出現喺車仔面度，仲要係靚位置。有驚喜。🦐太陽餅其實即係蝦餅。入面好多蝦，炸得好香脆。推薦👍🏻🦑新鮮魷魚鬚用少少辣椒油撈過，但係依然食到佢既鮮味。而且好夾脆，應該都真係好新鮮。呢度都可以話係大份夾抵食。全部都好足料好多餸。食左咁多野再每人叫埋野飲每人先around$100😼…Read More

尋晚收工約左朋友食下飯傾下計，搵左間喺山林道既cafe，順便又可以試下新餐廳。我地叫左兩個餐share食，份量都幾夠。🥩古堡紅酒汁香煎肉眼伴薯菜塊扒煎得岩岩好，叫7成煎到少少生，而且嫩得嚟又有牛味。🍝海王櫻花珍寶巨蝦配龍蝦汁意粉都好少見到有咁大隻蝦喺意粉上面，差不多有成隻碟咁大。龍蝦汁好濃好惹味，成碟意粉一啲都唔乾。下次都會想叫番呢一個😂🍰朱古力芝士蛋糕雖然芝士味唔重，但朱古力味好濃。而且擺盤好靚，用嚟影相厄like一流🤭除左食物幾好之外，呢度啲店員服務仲好好，會主動俾碟仔我地，見我地食完主菜又主動上甜品🥰朋友傾計聚會呢度都真係個好地方。…Read More

朋友介紹既隱世拉麵店，出左地鐵站行幾分鐘就到，都幾方便。入到去人唔多，好有日本小店既感覺。我地一人叫左一碗拉面再加個小食，$200都唔洗，都幾抵。🍜醬油慢煮叉燒拉麵見到「期間限定」呢四個字就覺得一定要叫😂一上枱醬油味好香；慢煮叉燒一啲肥膏都無，感覺好健康，但係一啲都唔會鞋唔會實；大葱木耳份量十足，性價比高。🍜葱山拉面純粹想睇下究竟有幾多葱所以先叫😂結果都真係好多，真係有成座山咁多。呢碗我地揀左火炙豚肉。相比起慢煮叉燒，佢就肥美啲，而且燒得好香。🍢免治雞肉棒入邊有少少軟骨，好有咬口，係我每次去日本餐廳見到都必點既item。…Read More

聽講呢間餐廳啲蠔拉麵好出色，咁啱今日去開又一城又有分店所以就去試試看。我哋有事先OpenRice book到，去到人數唔算多，我諗坐咗一半都冇，但係竟然喺門口企咗成5分鐘都都冇人出嚟招待過我哋。最後係煮緊拉麵嗰位師傅見到我哋企咗好耐都冇人理過我哋先幫手叫同事出嚟。入到去坐低打開餐牌，發現原來呢間並沒有蠔嘅拉麵，只有一啲好基本嘅鹽味拉麵，醬油拉麵。咁都唔緊要啦，見呢間餐廳咁出名，由日本開到嚟香港，都應該會好食嘅。拉麵到咗，賣相的確係唔錯，但係食落口確實非常非常普通。兩款味道差不多，而且份量都好細。兩片豚肉好嚡好實。性價比實在唔高。都算係一間可一不可再嘅拉麵店。…Read More

呢間餐廳主打平價焗飯/焗意粉。餐牌上面有九成餐點都係焗嘅。今日我哋叫左兩款唔同嘅下午茶餐試吓。🍄‍🟫芝士焗黑椒汁蜆肉蘑菇螺絲粉明顯見到粒粒蜆肉喺入面，料子都幾多。黑椒味都算香，整體嚟講幾惹味。🐟芝士焗白汁吞拿魚尖通粉對比起前者呢款就遜色少少。吞拿魚唔算多，而且個汁都爭咗少少味。兩款個面都焗得好靚，但係其實都係同茶餐廳差不多😂並沒有特別出色。…Read More

平時都有食開A-1既飛碟，今日突然發現佢出咗新嘅開心果味，開心果迷又可以一戰。超級軟熟嘅麵包，包住好香滑嘅開心果忌廉，個醬做得好濃郁，一啲都唔比外面嘅甜品店輸蝕，而且中間仲有好多開心果碎。平時見到呢種飛碟入面係做甜嘅口味我都唔會試，因為驚好甜食完好膩。但係呢個開心果味都算係好清甜，下次可以再encore。…Read More

平時都好鍾意食百分百嘅早餐，雖然佢唔係話特別平，但係感覺比一般快餐店更加有誠意。平時最鍾意叫煎豬扒，配腸仔同流心蛋。都好耐冇食過，今次食覺得佢質素下降咗少少。🐖豬扒一如以往的非常腍，而且個醬係我最鍾意嘅蒜蓉汁。🥓腸仔平時係用廚師腸，但係今次轉咗做脆皮腸。🍳流心蛋我覺得佢能夠外賣都做到流心，而且送到嚟冇穿冇爛係非常勁嘅一回事😂🍞平時好多早餐個多士都只係普通烘多士加牛油，但係呢度係蒜蓉包，焗得好香（雖然外賣送到嚟已經冧咗）欠缺咗廚師腸嘅早餐，梗係覺得欠缺咗一份完美😌如果佢能夠轉返做廚師腸，我絕對會俾99分佢。…Read More

今日去咗觀塘一間由台灣人主理嘅台式餐廳食晚飯。入面全部嘢都大件夾抵食，味道方面都非常有水準。🍗手撕巨無霸炸全雞我哋係因為呢隻雞而嚟嘅，喺香港好少見到有原隻嘅炸雞。視覺效果上的確好澎湃，一撕開入面有滿滿嘅肉汁湧出嚟。食落口除咗外皮非常香脆惹味之外，連啲肉都好入味。成隻雞真係非常嫩滑，連個雞胸都好腍，一啲都唔會覺得乾。🍖巷仔巨無霸排骨便當塊排骨的確好巨大，而且好厚肉。認真喺香港冇乜見過咁大噸位嘅排骨便當。雖然就咁睇落好似冇乜油脂咁，但係食落口都好腍。而且都係炸得非常香脆。🥕滷味拼盤入面有蘿蔔，雞翼，豬耳同埋牛筋。其中我覺得蘿蔔同埋豬耳係最出色。蘿蔔滷得好腍好入味，入口即溶。豬耳好厚，而且滷到好軟糯，滿滿骨膠原嘅感覺。🍤炸物拼盤入面有炸杏鮑菇，台式香腸，地瓜球同埋鹽酥雞粒。杏鮑菇勁Juicy，一咬開個脆皮就有好多汁爆出嚟。台式香腸好誠意咁有埋蒜片俾你一齊食。成餐飯我最滿意嘅係隻炸全雞，嗰隻雞髀既香脆嫩滑多汁程度真係令我念念不忘。而且都係呢間餐廳嘅必點之菜，見到台台都有叫到😂另外值得一提嘅係呢間餐廳出面有自助水吧，4:30之後就可以俾客人自己斟冬瓜茶，綠茶或者水。…Read More

媽媽生日，咁啱見到呢間自助餐網上有買一送一優惠，即刻全家去試試佢。呢度啲熱盤同甜品有少少平平無奇冇乜特別，所以我就唔多講。主要係想分享吓呢度嘅冷盤同埋麵包有好多唔同種類，都幾有驚喜。冷盤區有生蠔，龍蝦，蟹腳，麵包蟹，鮑魚，翡翠螺同埋凍蝦等等其他唔同款式嘅海鮮。🦪生蠔唔大隻，啲肉唔算厚，而且仲有少少蠔殼喺入面。不過味道都幾鮮。🦞龍蝦好大隻，啖啖肉。有冇幾隻好多膏都幾好食。🦀蟹腳好新鮮，唔黐殼，而且好粗壯好大條。🥖麵包區有好多多款唔同嘅麵包，有長法包，牛油卷，黑糖麵包等等。平時食我自助餐都真係幾少食麵包，因為唔想浪費咗啲quota。但係同行有小朋友，小朋友就非常之鍾意，見到有咁多款唔同嘅麵包，佢都覺得好興奮。總括而言，呢度種類唔算多，不過買一送一完五百幾蚊一位都可以嚟試吓嘅。…Read More

今日又試咗一間新餐廳，出名秘製酸湯米線。不過我就唔係幾鍾意食酸，所以叫左藥膳湯。叫咗個三餸泡飯，賣相都幾靚。🤍淮山新鮮爽口🐔貴妃雞即使係雞胸嘅部份都係肉眼可見的嫩滑🐟魚片係脆肉鯇片，雖然應該係急凍食材，但係都好爽口好好味🍲藥膳湯好香，對比起米線我覺得泡飯更加能夠吸到啲湯。整體感覺都很好，如果冬天嚟食一定好正❤️…Read More

以前成日睇宣傳易都有呢間餐廳嘅廣告😂標榜任食點心同自助火鍋，兩樣都係我鍾意嘅嘢，所以間唔中都會去吓。老實講，其實佢只係一間好普通同埋古舊，仲有少少麻甩嘅酒樓，環境有啲殘舊同嘈吵。但係價格同埋食物我都覺得幾好。夏天周圍打邊爐都有提供冬瓜盅/冬瓜湯底，呢度都唔例外。但係估唔到一間咁隨意嘅餐廳，佢都會將個冬瓜擺得咁精美俾我哋。而且店員仲會周不時過嚟提醒我哋冬瓜要煲腍啲先切，如果唔係好易整親。食物方面其實選擇唔係好多，都唔係話好精美好高級。有部份係自己剔紙仔叫嘅，另外丸菜嗰啲就喺出面自助吧自己拎。🐂肥牛方面本身對佢完全冇期望嘅，但今次竟然出乎左我意料。啲肥牛完全唔似平時啲cheap牛一大塊肥膏連住少少肉，入口有牛味而且唔鞋。（請原諒我掛住食唔記得影😂）🐟平時喺出面叫魚頭都會斬到好細舊或者叫好多轉先嚟一轉。但係呢度好大方，斬到大大嚿，而且長叫長有，我哋都encore咗好多次。🦑我最欣賞嘅係佢啲手打墨魚丸。入邊有粒粒墨魚肉，食得出佢係真材實料。🐗另外仲有得叫滑牛，雖然明顯有乸過，但係都依然有肉既口感。除咗火鍋之外，呢度都仲有得任食點心，不過其實食吓食吓都好飽，食唔到幾多點心。我哋淨係叫咗蝦餃🥟蝦餃雖然皮唔薄，但係餡幾靚，入面好多蝦，而且好爽口。大大隻咁都幾好食。之前嚟都有食過佢其他點心全部都很不錯🤤我自己比較建議平日嘅晚上呢度，會好過星期六日，人多起上嚟呢度都真係幾嘈同埋成日漏單嘅。…Read More

鳥貴族喺香港都開咗一段時間，但係一次都未試過。今日下午見竟然冇人排隊，要入去試吓同日本分別大唔大啦😂😂🍡雞肉丸- 表面燒得有啲乾，可能佢想做到少少香脆口感嘅感覺？🫑釀青椒- 成個底燶哂，成餐飯都有燶味。避雷！🫀雞心- 粒粒飽滿，值得encore。🥘🍽️鹽味麻油燒雞肝- 靠葱，蒜同麻油吊味，雞肝本身好乾。🐣雞爽肉- 平時都好鍾意食呢個部位，肉質好嫩，少少爽，但無乜味。🐂蒜味果香燒牛肉串- 唯一值得再叫的。牛肉燒得啱啱好，再配埋好香口嘅蒜汁。吃鳥的地方居然牛肉比較出色。🫓鐵板烤山藥蓉- 其實賣相唔係咁討好，好似一pat野咁。但係食落去口感極好。綿綿滑滑，有蛋香又有醬汁既香。不過真係要鍾意食淮山嘅人先識得欣賞。🍼飲品方面我叫咗一個士多啤梨牛乳，極度唔推薦！大家千祈唔好叫！一入去個口感已經好奇怪，𠎀到好似奶昔咁，甜到苦，好似未溝好就拎出嚟俾人飲咁。我自己溝咗成杯水落去先正常返少少。下次我應該會叫混合果汁，我記得上次喺日本飲過係幾好嘅總括而言，無論飲品定係食物嘅質素都係同日本爭好遠。好耐冇去過日本嚟感受一下氣氛係可以嘅，但係真係對食物方面唔使抱有期望😂😂😂…Read More

圓方咁多間餐廳入面，諗咗好耐先決定要食呢一間😂😂🍝麻婆肉醬炆伊麵麻而不太辣，幾惹味。入面都幾足料，有豆腐，有蛋，有肉碎。另外仲有唔同嘅配菜豐富口感同賣相。🍲沙嗲牛肉金菇粉絲煲好香好濃郁，沙嗲味同出面有少少唔同但係好香花生味。牛肉好腍，但係唔會係乸到好假嗰啲質地。最出色我覺得係啲粉絲，每一條都好入味浸滿咗醬汁。🐂京葱爆牛柳粒牛柳粒每一粒都煎到少少脆口，再裹住甜甜地嘅醬汁，真係食完一粒又一粒停唔到口。再叫埋嘢飲，兩個人先至五百幾蚊，仲要環境服務都很不錯。圓方嚟講性價比都真係算幾高。…Read More

今日約咗朋友喺觀塘食飯，揀咗間Cafe諗住可以慢慢chill吓飲吓食吓傾吓偈。我哋一共叫咗四樣嘢，全部都出乎意料地大份，搞到我哋大失預算爭啲食唔哂😂😂🐑烤香草澳洲羊架擺盤非常精美，而且份量十足，有四支骨咁多。羊架雖然冇得比我哋揀生熟到度，但係都依然拿捏得非常好。而且啲肉唔會黐實晒啲骨，好容易就可以食得乾乾淨淨。🍄‍🟫黑松露燴飯伴巴馬火腿配黑醋汁松露味無論係聞落定係食落都非常香濃。啲飯食落口綿密得嚟又粒粒分明，每一粒都有好濃厚嘅醬汁包住。🍟明太子薯條熱愛明太子嘅我見到有明太子薯條梗係想試吓啦，見到佢$78咁平以為係細細兜，心諗叫多個小食OK啦😂點知嚟到嚇咗一跳，個份量仲大過碟黑松露燴飯，令我感到又驚又喜。薯條上面既明太子醬都算多，另外其實薯條本身佢都有做到調味，就算係啲冇沾到醬汁嘅薯條都非常惹味。真係誠意十足。🥞特濃開心果忌廉麻糬疏乎厘我從來都冇食過咁大嚿嘅疏乎厘pancake😂大概係平時我哋喺出面食到既1.5倍大。食落口非常鬆軟，而且好有蛋香味。開心果忌廉都非常濃郁，上邊有一粒粒開心果碎。如果唔係食咗咁多嘢已經覺得好飽，我真係想再叫多一個啊。雖然加埋都食咗六百幾蚊，但係每一樣嘢都好大份，性價比好高，絕對係可以encore嘅餐廳。…Read More

見到有人介紹$198可以任食串燒，而且仲聲稱7月15號就完結，所以即刻book嚟試試。除咗串燒之外，我哋另外仲加咗$98可以任飲同埋享用出面嘅自助吧，飲品除咗有普通冇酒精飲品之外仲有啤酒🍺。而自助吧枱會有一般嘅日式小食，例如中華沙律，味付螺肉。仲有少量壽司可以供客人享用，不過壽司睇落黑黑沉沉咁感覺唔係太新鮮。嚟到今日嘅重點-串燒，都有好多款選擇，其中有幾款我都覺得非常高質，encore完一次又一次。👅薄切牛舌- 燒得啱啱好，牛舌味好香，入口即溶，塊塊都係牛舌心。雖然佢叫薄切牛舌，但係其實都唔係好薄。🐖豚肉蒜心卷- 豚肉完全唔會燒到好乾，入面包住大概三條嘅蒜芯，非常爽口。係我地叫得最多既一款串燒。🫒黑豚荔枝卷- 最近開始比較常見呢一個菜式，食落都幾特別，少少酸酸甜甜中和番豚肉嘅油膩。🐓免治雞肉棒- 係我第二喜愛嘅串燒。串燒入面仲夾雜着啲雞軟骨碎增加口感。不過佢都幾大件，食多幾件好容易打爆咗個肚嘅quota。其實$198可以任食到咁高質嘅串燒性價比都真係幾高，我諗起佢完結之前我會去多次，不過可能就未必會加飲品放題啦😂😂…Read More