修煉友情's Profile

近期對日系梳乎厘班戥的著迷真是意想不到，一向對甜品無動於衷的本人亦為之心動。真是世事無絕對。提起梳乎厘，其實第一時間係會想起太平館的經典梳乎厘。下午茶時段經過銅鑼灣店，決定再試下經典嘅味道。星期六下午茶都有不少客人光顧，等了大概二十分鐘左右方可入座。有幾年冇嚟過呢度，店內裝潢都已經翻新，仍然保留了港式西餐廳格局。無論卡位用色配襯什至天花設計都令人有＂花樣年華＂的感覺。而服務員仍然是有禮及專業的叔叔，看見他們總有份信得過的感覺存在。可能當日生意太好，入座後等了十來分鐘才有人應機。 下午茶餐點了一份瑞士汁炒牛河及燴牛脷飯，兩份餐的味道其實都很一般，瑞士汁沒有以前的香濃。因製作需時，服務員叔叔見我哋食到中段時通知＂主菜＂開始炮制了。 下午茶餐的份量不大，仍有充裕空間享受人頭咁大嘅梳乎厘。 單是外觀已值回票價。外脆內軟， 蛋味濃郁，甜而不膩入口即溶。好一個梳乎厘，但願水準能永夠保持。…Read More

雖然本人並非好甜之人，但自從試過九龍尖沙嘴區嘅班戥代表之後回味無窮。順理成章要拜候下港島銅鑼灣區另一人龍班戥店。 位於希慎廣場6樓嘅 Flipper’s，叫佢做 ”人龍”店都相當合理。每次經過例必被班戥香味吸引，呢種情況就更係跟住啲香味搵食。幾次都係見排長龍而放棄收塲。某個星期六下午近五點左右又再經過，竟然只有五個人排緊隊。終於有機會試下人氣店嘅招牌菜。簡單點咗士多啤梨香蕉梳乎厘班戥加杯啡。 梳乎厘班戥嘅香味就唔在講，賣相亦相當吸引。食落蛋味濃 （本人大歡喜，空氣感足，甜度剛好，Cream亦夠滑。個人來講比較喜歡港島區的這件班戥。…Read More

有時入到餐廳睇菜牌揀選食品其實都會幾煩惱，除非一早係為咗某種食品而來，否則在樣樣都想試的情況下選菜都有小小壓力。La Vache! 呢度可以減省呢種煩惱，只提供單一套餐包括麵包，沙津，牛排及薯條。 據聞呢類型只提供單一菜單由朝買到晚嘅扒房係由法國傳入。 以牛扒加薯條 （ Steak Frites )呢個配搭嘅單一菜牌餐廳在法國仍然相當流行。有機菜做嘅沙津食落都覺得好新鮮。 USDA Prime 肉眼扒唔算太靱，可配餐廳秘製醬汁。仲有任食唔嬲嘅薯條，一定唔怕食唔飽。除非你唔鍾意食薯條。餐廳環境倘算舒適，服務員態度友善。輕輕鬆鬆食餐飯，呢度係一個唔錯嘅選擇。…Read More

曾經在台灣高雄偶然食過一件很美味的吉士同紅豆餅，一試難忘。適逢經過西灣河太安樓這家南國紅豆餅店，店舖乾淨企理，售貨員示謙恭有禮。 店舖不設堂食只提供外賣。食品以餡餅為主，種類咸甜皆有。招牌款式紅豆餅 （HK$12)，以台灣進口紅豆自家製作紅豆餡。紅豆餡量適宜，味道不會太甜。 另外吉士餅的吉士味相對淸淡，配合餅料後未能突出其味道。 兩餅味道雖未及高雄的，但以價格及餡料分量絕對値得推介。 下次有機會要試下他們的咸味餡餅系列，特別是芝士鹹牛肉薯仔餅。…Read More

老字號的韓國甜品店百味堂乘著韓流於 2017 年旋風式登陸香港。 恕本人老眼昏花，首次見到百味堂 logo 未睇真隻牛牛還以爲是什麼藥材品牌。原來是一家 1964 年成立的韓國乳業品牌，以百分百有機奶製成的牛奶雪糕甜品店。早前於希慎及太古城中心展開的期間限定店屢見人龍排隊。 百味堂的確將品牌形象配合產品包裝得相當吸引。特別是限定店的裝， 欣賞品牌帶給顧客一種甜品簡約美學的感覺。試過原味及朱古力味，雪糕牛奶味香濃細滑但有點甜。一試無妨。…Read More

週五晚上與夫人及另外兩位友人飯局，友人是soho 區常客揀算了 MEATS 這家肉食餐廳。 外藉服務員先帶到角落小圓枱，友人覺得角落環境不太舒服最後換到門口的半室外的位置。半邊枱位於室外，另外一半屬於室內範圍，感覺好多了。 星期五的晚上，餐廳都座滿了，氣氛熱鬧非常。略嫌餐廳所播的音樂有聲音太大，服務員調較過幾次但分別不大。牛肉簿切 （Beef Fillet) 配傳統 peppercorn sauce，胡椒味配牛肉永遠惹味。 韃靼牛肉 (Beef Tartare), 肉味新鮮。 叫咗兩客 Glasgow Salad, 個名叫沙津其實係薯條，友人們食到停唔到口。 出奇地好味的 Galician Octopus, 肉質爽味道調配適中。稍微遜色的Beef Tataki, 味道比預期清淡。結尾來了一客 有椰香味的 lemon pie 作為生日甜品，亦是本人推介食品。…Read More

明白每家食店都有她的形象及待客態度，亦了解餐飲服務是吃力不討好的工作，會忽略待人該有態度。這店的服務員由”命令”式地要食客座指定位置 （註：當時店內客人不多） 到黑面埋單，每一環都盡顯其獨特性格。這不是個別事件，每位服務人員都以同一種無禮及傲慢囂張態度公平對待每擡客人。落單口吻其實有點接近呼喝，何解？難道幫襯都是錯？不是在小店尋找五星級服務，但未至於要食客受氣吧。食品方面，貫徹有期望有失望的道理。豬頸肉芝士撈丁，芝士冇芝士味，豬頸肉相當韌。只有賣相還可接受。 簡單的雞翼煎蛋飯的汁料都咸得有點過份。 如果這些就是新記的招牌味道，恕本人不懂欣賞。…Read More

對上幾個星期六早上都要尖沙咀參加工作會議、每次經過 K11 Mall 這家日式 pancake 店都見門外大排長龍。 首先吸引我的其實就係呢條成日都見過嘅長龍, 好想知道乜嘢原因咁多人排隊。 今日同夫人經過、見長龍還未成型之際立即上前在隊中穩佔較前的位置。 等了大概20分鐘左右便可入座，服務員禮貌地帶我們入座後覺得環境舒適唔會好逼，只是冷氣有啲凍。 起初只點了一客 Apple Caramel Souffle Pancake (焦糖蘋果梳乎厘班㦸) 同夫人分享叫做總算食過。 點知唔食好地地、一食就出事，口感鬆軟，不會太甜、蛋味香濃，好快就食完。 一向對甜品興趣不大的我急不及待要來多客再加杯 Macha Latte 來穩住呢一刻忐忑嘅心情。 只此以後，對班㦸呢樣食品改觀了。…Read More

原本今日中午想去宜家碰下運氣睇下會唔會有得賣返果隻搽麵包餅乾好好未嘅 PASTEJ LAX Salmon spread, 可惜都係冇得賣。 既然如此、又有機會俾藉口自己化失望爲食量, 今日目標係鎖定已久嘅 Little Bao (小包包)。 一向都鍾意試 fusion 菜, 以前中環店每次去到都因為要排隊而卻步。銅鑼灣店地方闊落加上充滿色彩嘅水磨石地板及半身牆已經有一種叫我 “快啲入嚟啦” 嘅感覺。 所有服務員面上都掛上燦爛笑容，熱情招待我哋坐低後本人立即落 order。 黑松露薯條 (HK$98) 好快有得食，黑松露沙律醬，醃蘿蔔加薯條，開胃! 差唔多食晒先記得要影相。 最後都係冇影呢味。 跟住墨西哥炸雲吞 (HK$98) 嚟喇，雲吞炸得香脆、最意想不到嘅係菠蘿 salsa 同牛油果醬撞埋果隻味。説時遲那時快，啲小包包亦到位。本人叫咗招牌豬腩包 (HK$78) ，兩片肥美慢煮豬腩肉加埋啲醬汁同配料，好食惹味! 夫人就點了天婦羅魚包 (HK$78) ，就本人根據分得小口份量試食後覺得魚不油但偏乾，羅望子醬味道特別。本來計劃嘆完小包包再去天天海南雞，所以只叫咗四款淺嚐。下次返嚟小包包仲有好多款式可以慢慢試。…Read More

朋友介紹食炸魚薯條一定要試下 HOOKED, 專登安排星期六下午慕名一試馳名嘅炸魚薯條。大概下午2點鐘左右到達、小店主打外賣所以座位不多。呢個時間有數位外籍客人正在光顧，見到佢哋食得津津有味。已經按耐不住同夫人一齊點咗兩份一樣的紐西蘭藍雪魚，薯條及lemonade 。今日氣温都成三十幾度, 本人由中環行到上嚟都已經大汗淋漓, 辛苦了老板要企响個炸爐傍邊幫我哋點嘅炸魚薯條即叫即炸。以不含膽固醇及非基因改造嘅高級澳洲葵花油炸起，除咗聽起嚟都覺得健康同食得安心之餘, 外皮炸得依然脆口，魚肉結實唔韌仲仍然有肉汁（真心想請教下點樣可以炸成咁）。 冇另外要醬汁，原味加小許鹽已經惹味非常。…Read More

中午行經鰂魚涌一段的英皇道，突然飄來一陣香味。在附近的小巷内終於找到了這“馬來亞春色”。餐廳位處於的不是大街但也不難找到。室內座位不多但正是小店的可愛處。店内座無虛席，剛好有食客用餐完畢示意可坐到他們的位置。這種和睦的氣氛，可能也是在街坊小店才能找到了。後來才知道這店經常需要等位、今日不用排隊已屬萬幸。同夫人分別簡單點了巴東牛喇沙及正宗巴生肉骨茶，喇沙湯底味濃而不膩特顯了椰汁香味但又不會太甜。 藥材味濃厚的肉骨茶，材料充足再配一碗蔥油飯。個人較喜歡肉骨茶的味道， 但只從夫人的慷概分享下淺嘗了小口。下次定當再仔細一試這正宗巴生肉骨茶。…Read More

由細到大身邊都有不少朋友喜歡食自助餐，自問從來都不是自助餐的粉絲。 以前食自助餐嘅概念係食得越多越抵, 不管食物質素如何、只要每一次去攞食物嘅時候，將所有食物放到隻碟成座山咁高就算贏了。與此同時，自助餐卓亦變成了你爭我奪嘅兵家之地。好多年都冇食自助餐了、星期六到金鐘 JW 萬豪酒店嘅 JW Cafe 食午餐自助餐，前幾天已訂位。午餐時段係 12:00 noon – 2:30 pm，當日餐廳 8 成滿、餐廳亦同時爲招待非自助餐食客預留了一些位置。 接待員及服務員都非常有禮同樂意地主動關注客人需要。食物種類及質素方面總體尚算合理, 招牌菜有紅燒鮑魚 ,魚肚 ,海參, 蒸石斑魚, 蒸蝦, 龍蝦, 泥蟹, 貽貝及北京烤鴨等都源源不絕地供應。 呢度主打的都是中菜類、西式代表的燒牛肉及羊架亦有供應但水準並不突出。 還有其他熱食都一應俱全，種類不算很多、但該有的都有了。 目測魚生不太新鮮。 甜品方面也是貴精不貴多、外型精緻甜度適中。雖然以午餐價錢嚟講絕對不便宜, 但餐廳嘅食物種類、服務及環境總算是一次值得的自助餐體驗。 …Read More

風和日麗藍天白雲嘅一日，中午時份漢堡包癮大發不可收拾。走咗去公司附近的 Shake Shack 止癮。 ifc店開業後不久已來過潮聖，咁耐以來一直都係咁多人排隊。分別只係條隊 有幾長，今日當然冇走雞一樣要排隊。癮到起上嚟幾耐都要排。 印象中第一次食不過不失唔係最得，味道硬係冇美國咁震憾。今日輪候情況算快，加埋排隊只係等咗25分鐘。點咗個 Double ShackBurger（$76) 薯條 ($27) 同自家製 Lemonade (大杯 $32） 。 個 bun 比起其他 burger joint 嘅相對有咬口，唔太硬又不太軟果隻。聽聞話個包係用薯粉做，所以咬落有呢種 「咬囗」感覺。個包夾住嘅漢堡扒煎得有啲乾， 芝士就係一貫 processed cheese 味，生菜同番茄都新鮮。唔知係咪個醬汁關係，食到成手都係油，食完之後包住個包張紙好似浸過油一樣。 下次一定要返嚟試下係咪仲係咁油。…Read More

每次行經太古城 Night Market 店都有入去幫襯嘅衝動，因為好想試下佢哋嘅紅燒牛肉麵。可惜，好多時候要相信自己嘅直覺，一碗啱口味嘅紅燒牛肉麵唔係咁容易遇到。呢碗都唔例外。紅燒湯底味唔夠濃，牛肉相當韌，麵質一般。另外點了的小籠包，皮較厚湯汁不多。鹽酥雞做得幾香但唔夠脆。下次有機會再嚟嘅時候會試下其它菜式。個人最欣賞係套餐具。…Read More

不經不覺光顧咗南記超過 7，8，9 年。由之前在公司附近的上環店開始，基乎一個禮拜食足五日 (五天上班）。 之後最常幫襯的是銅鑼灣店。每次其實都係食同一味「招牌春卷腩肉小窩米線 」（4條春卷個隻），由以前食開的大辣到而家轉食小辣口味，酸辣嘅湯底都係同樣地惹味。 今次係第一次來西灣河店食我的最愛，店內氣氛感覺很不錯，由收銀員到取餐部姐姐以至清潔的員工同事都笑容滿面。 招牌春卷嘅爽朗同夠咬口嘅腩肉永遠冇令我失望。感覺個酸辣湯底同銅鑼灣店的有啲唔同，但味道仍然處於我愛的範圍，完全收貨。鑑於疑似湯底味道不同，計劃盡快返回銅鑼灣店進行驗證。😉…Read More