ireneyanirene's Profile

Lunch time去咗pizza express食，由於價錢唔平，所以都好耐冇嚟食，原來已經冇咗set lunch，反而係叫一個主菜，送頭盤及飲品。4個女仔，叫咗3個主菜其實已經好夠食。頭盤有2款選擇，焗麵包球或沙律。焗麵包球鬆軟，點上牛油食，係個幾好嘅配搭。北京烤鴨薄餅，有啲似食片皮鴨，其實唔錯，略嫌鹹咗少少肉醬千層寬麵，芝士味濃，不過整得好薄。烤雞配蝴蝶粉，呢個最好食，但由於係第一道上加上各人都有點餓，嚟唔切影相。呢度嘅環境唔錯，樓底高，坐得舒適，雖然價錢唔平，但間唔中嚟，悠閒咁食個飯，都係唔錯嘅選擇。…Read More

好耐冇嚟龍門居呢邊買嘢食，突然間諗起呢間鋪嘅大阪燒，咁啱今日又路經附近，即刻買個嚟食。呢度嘅大阪燒，依然保持水準。大阪燒有6款選擇，點選嘅係海量海鮮大阪燒。一打開個盒，就見到大阪燒上面鋪滿木魚呢個大阪燒，食落唔會覺得好粉，反而以椰菜及少少粟米做底裡面夾住蟹柳，章魚，蝦仔同蜆肉仔，加埋個醬汁，真係好食到停唔到口。試埋個飲品，檸檬配四季春茶，裡面嘅檸檬唔係得幾片而係成個所以好夠味，天氣咁熱，飲完好解渴。…Read More

突然心血來潮想食炸雞，走咗去大雞大買BB雞食，呢間鋪分店唔多，所以有時路過都會買嚟食。呢度嘅BB雞係雞髀件，有分唔同辣度，而且有大size($32) 同細size ($28)，由於只係差幾蚊，要咗個大份BB雞。BB雞外面炸得好脆，而雞肉好夠滑，加上佢哋自己嘅調味粉，都算整得幾好食，大size嘅份量都算多，作為小食嘅話，可以兩個人share食。…Read More

一直以為校園餐廳只是學生飯堂，冇乜特別，有朋友介紹話浸會大學入面呢間西餐廳唔錯，於是就睇吓佢個menu，見到有威靈頓牛柳呢道聽聞好耐但就未試過嘅菜式，於是就決定去試一試。訂座時已預訂威靈頓牛柳，叫多一個主菜，另外叫咗兩個甜品，其實2人嚟講，呢個份量都太多。威靈頓牛柳（需預訂）好少餐廳有得食，專登為佢而嚟，因為第一次食，唔知正唔正宗，但就覺得幾好食，外脆嘅酥皮包著層醬及牛柳，另提供鹽及燒汁俾你加落去食，個醬味道好濃，牛柳約5成熟，肉質嫩，食落會有點飽濟，一定要share食。大啡菇黑松露雜菌忌廉意粉份量好足好大碟，意粉軟硬適中，唔錯。伯爵茶奶凍個奶凍滑溜，伯爵茶味香而濃。Tiramisu呢度將tiramisu嘅元素分開上，賣相靚，適合打卡，個cream cheese甜度適中，好好食。因為點咗威靈頓牛柳，埋單唔平，記得留意浸大學生有得免加一同有9折。…Read More

間唔中都會幫襯榮式燒雞扒，每次都會食佢嘅招牌雞扒配搭為主嘅主食，今次食嘅係榮式雞扒湯檬，外賣嘅話，佢會將雞扒同湯檬分開，唔會令到雞扒變稔。講起雞扒，榮式燒雞扒係我食過嘅餐廳中，回食率最多嘅一間，佢嘅燒雞扒，燒得香口之餘，肉質嫩滑，醬汁甜甜的帶有黑椒，好夾好好食。近期都係外賣為主，極少堂食，發現原來榮式燒雞扒都可以用openrice外賣自取服務，第一次使用，覺得真係好方便，網上落單，有預計取餐時間，落單後可以周圍行，出餐先行去餐廳拎，唔使門口呆等。…Read More

話說白色情人節，我哋一向好少慶祝，不過見譚仔三哥搞綽頭做辣之戀人情侶套餐，就湊下熱鬧買咗個外賣返屋企食。椒夕相對二人套餐前菜 - 麻辣汁手拍青瓜，口水汁雲耳個汁好惹味主菜 - 過橋米線非常大碗，食完真係好飽，我哋叫咗蕃茄湯，中和返其他辣嘅嘢食，過橋米線份量十足，有好多餸，有豬肉，牛肉，火腿，豬膶，墨丸，牛丸，腐皮，豆卜，炸醬等等。小食 - 土匪雞翼我至愛，色香味俱全特飲 - 三哥賓治（5小辣）& 柚子桂花茶三哥賓治一入口好似平時雜果賓治咁甜甜地，但之後會感覺到微微嘅辣味慢慢喺喉嚨滲出，既特別又好飲。本來套餐仲有杯薑味雙檸梳打（10小辣）可以選擇，可惜賣晒，姐姐話可以揀柚子桂花茶試吓，飲落都ok，尤其食完辣嘢飲，幾解渴。今日惠顧有5小辣心型朱古力送，而且外賣有9折…Read More

因為疫情，已經冇出街用膳一段日子，最近為著某d事心情十分低落，大大見我如此，破戒帶我出街食嘢，解吓鬱悶心情。喺街上四圍遊走期間，就被呢間餐廳宣傳海報上面嘅牛肉飯吸引住。雖然係下晝4點幾，餐廳入座率都有7成，我哋揀咗個同鄰枱中間有隔篷嘅位置坐低，期間侍應貼心地提供信封俾我哋放口罩點餐方面，呢度係半自助形式，需要自己先去前面櫃位落單，之後由侍應捧餐。呢段時間仲有下午茶套餐供應，價錢$49-$59，不過我就點咗主餐牌上面嘅套餐嚟試。今次叫咗個牛角次男坊丼定食，肉係美國草飼牛腹腩，d牛肉堆到成座山咁，賣相一流，非常吸睛，牛肉配埋燒汁，送飯一流，牛肉下面仲鋪有芽菜，唔會只係食肉咁膩。套餐包埋嘢飲同前菜，價錢$88，算係合理。…Read More

走咗去Mr. Steak食佢個semi-buffet lunch，落咗個main course同飲品之後，就可以去自助沙律同甜品吧拎嘢食。Lunch hour人比較多，大部分人都係一嚟就去自助沙律吧拎嘢食，所以自助沙律吧條人龍都長，我過咗陣先出去，都要排5，6分鐘。自助沙律吧有十幾款沙律冷盤選擇，有南瓜，日式豆腐，cold cuts，薯仔沙律，螺絲粉等等，餐湯係蘑菇湯，幾好飲。主菜揀咗爐燒香草春雞，呢個比較普通，不過不失。不過以呢個價錢當食一個lunch buffet，都算ok。食完前菜同主菜，其實已經飽飽地，先醒起仲有甜品。佢嘅甜品吧都有兩款切餅同多款迷你cake，麵包布甸，仲有西米露同豆腐花。不過由於太飽關係，只係攞咗少少試吓。…Read More

台式飲品入面，奶蓋茶係我嘅至愛，不過，飲得太多，真係會怕肥，所以平時都會就住間唔中先飲一杯。見鰂魚涌有間叫Nuttea嘅台式飲品店，係用堅果嚟做奶蓋，就叫咗杯台灣紅玉堅果奶蓋茶。佢附送咗一個迷你鏟仔俾你，有咩用途？就係俾你直接用嚟食面頭嘅奶蓋，好特別嘅方式。奶蓋茶飲落口最初會覺得鹹鹹哋，之後就有種堅果嘅味道，同平時飲開嘅奶蓋茶有少少分別，而奶蓋都算厚身，綿綿的，同茶底好夾，飲完成杯，會覺得好飽肚。…Read More

自從公司附近冇咗間outback，已經好耐冇食過喇，嚟開黃埔，朋友帶咗我嚟食個late lunch。由於已過繁忙時間，呢間鋪又相對比較大，我地兩個人都被安排坐4人卡位，坐得好闊落。見仲有套餐叫，就叫咗2個餐，分別係香辣燒蝦飯同一個burger。餐湯係忌廉洋蔥湯，配上佢嘅招牌黑糖麵包，以前就已經好鍾意食佢個黑糖麵包，麵包軟熟，甜度適中。香辣燒蝦飯有4隻已經剝咗殼嘅蝦，唔算太辣，不過飯唔夠乾身。澳坊芝士漢堡呢個比較普通，漢堡扒太乾，薯條反而好食，炸得脆口唔淋。…Read More

第一次去呢間餐廳，我哋就花咗少少時間，首先要搵佢身處嘅商場仔個入口，而餐廳就藏身在呢個商場仔嘅最深處。餐廳唔算好大，午飯時間已經坐滿人，要排隊等位，內裡嘅裝修好有印度色彩，呢度嘅平日嘅中午套餐好簡單，得幾款瑪沙拉/咖喱嘅選擇，配naan或飯，有個是日餐湯，但唔包飲品，價錢$65，另外佢有行政午餐供應，特式印度烤肉料理/特式印度蔬菜料理，似大集燴，有3款唔同嘅咖喱，乜都有啲，包飲品，分別$80同$75，驟眼見餐廳入面大半數人都揀呢個。不過我今次淨係叫咗個瑪沙拉雞肉套餐食，店員首先奉上是日餐湯，個餐湯係奶白色，有少少辣口，似加咗薑/香茅，幾特別。Masala係一種綜合香料，由唔同嘅香料炒香磨成粉末而成，常見於印度料理。呢度嘅瑪沙拉醬汁香味濃，易入口，開始食時唔覺辣，但越食會覺得越嚟越辣，不過辣嘅程度對於唔太食得辣嘅我都接受到。而值得一讚嘅係套餐配嘅naan，每人兩塊，奉上時仲熱辣辣，而且好軟熟。…Read More

午飯時間又再去西灣河搵食，今次試的是越北牛肉粉專門店，一睇個名就知係食越南嘢。午市套餐價錢大概五十幾至七十蚊，有越式粉/飯選擇，套餐包飲品一杯。午飯時間都多人食，要在門外自助取票機攞飛，不過等咗10分鐘左右，就可以入座。見好多人都係叫湯粉，於是叫咗碗魚餅湯河加熱西洋菜蜜，落單時店員溫馨提示個魚餅有點辣，其實碗粉算大碗，不過個魚餅就唔太合我口味，而杯熱西洋菜蜜味道就偏淡。可能今次揀唔啱嘢食，下次試埋其他大路嘢先再作評論。…Read More

為了就齊所有人，特意提早食團年飯，地點選在北京老家，餐館入面的裝修風格甚有中國風，古色古香。店員提議我們點套餐，但見套餐的食物並不合我們心水，於是決定散叫。北京填鴨食北京菜一定會點北京填鴨，這裡的北京填鴨上枱時已經切好，鴨皮薄而脆，肉嫩多汁，配上醬汁用薄餅包著食，一流白菜水餃水餃皮薄，不過略嫌肉較少蔥爆羊肉味道唔錯，有羊味之餘又不會羶到入唔到口京牌炒飯這個比較普通，沒什麼特別炒刀削麵似平時食乾炒牛河，偏油上湯豆苗當坐滿食客時，這兒其實很噪吵，比較難與人傾談，尤其是坐大枱的。…Read More

呢間叫風車嘅餐廳雖然係一間酒吧，但日間就好似普通一間西式餐廳咁，有lunch set供應。呢度嘅座位都算坐得舒服，裡面有2部大電視，如果夜晚嚟睇波，絕對一流。Lunch set個餐牌有好多選擇，大致分為包類及飯麵類，每個種類都有6-8項選擇，而且包埋餐湯/沙律，同一杯飲品。我同友人都比較鍾意食包類，所以分別點咗「煙肉芝士牛肉漢堡」同「醬燒豬扒土耳其三文治」嚟一齊食。先嚟咗跟餐嘅餐湯同沙律，是日餐湯係我至愛嘅南瓜湯，味道唔錯，唔會太稀，而沙律都新鮮。「煙肉芝士牛肉漢堡」我特別鍾意佢個煙肉煎得幾脆口，幾好食，牛肉食落有肉汁鎖住，唔會乾身:)「醬燒豬扒土耳其三文治」賣相幾討好，見到芝士溶化喺三文治個包上面，裡面夾著2塊豬扒，冇錯，係2塊！配合埋個醬汁，好夾好好味。飲品方面，我同友人都升級做特飲，友人點咗杯爆谷咖啡，而我點咗杯荔枝梳打。爆谷咖啡友人話幾好飲，而我杯荔枝梳打有粒荔枝喺入面，都唔錯。…Read More

講到梳乎厘pancake, 旺角呢架黃巴士（其實比較近油麻地）可以話係其中一間人氣之選。每次行過，都會俾佢poster入面嘅梳乎厘pancake吸引住，難得見冇咁多人，終於忍唔住要試吓。呢個炎燒布丁梳乎厘個賣相簡直一流，好適合打卡用Pancake上面蓋著吉士布丁，再用火槍將上面嘅糖燒成焦糖，形造出熔岩般嘅效果，未食已經聞到好香嘅焦糖同蛋香味。面層嘅焦糖燒到脆脆的，食落有少少似食緊焦糖燉蛋嘅感覺，而pankcake就好鬆軟，蛋味濃，十分出色…Read More