Ken86's Profile

Happy Friday當然要找間高檔次餐廳，與愛妻共進晚餐。選了金鐘的Dalloyau，環境舒適寧靜。今次太太選了Set Dinner，我就試下叫散點。前菜是Norwegian Salmon Roll，味道清新可口，非常開胃的前菜。另一道是至愛的生牛肉他他，鮮味十足，配上即炸脆薯條非常美味。由於我散點沒有餐湯，侍應出奇地細心為太太的龍蝦湯分成兩份，供我們一同享用。主菜我們點了法國牛肉漢堡包，份量十足。太太點的是法式油封鴨腿，第一次吃這度菜式，非常驚喜！鴨腿皮脆內軟，配上甜酸醬料，美味非凡。可能這次點肉類太多，二人非常滿足，休息了良久才能叫侍應上甜品。最後一度甜品依然為我們送上驚喜，又是貼心地分成兩份，供我與愛妻甜蜜地享用。一間成功的餐廳不止於美食，也在乎於優質、專業、貼心的服務！…Read More

辛苦了一整天，放工後想找個地方與同事飲少少野，之前得知La Terrasse by EPURE已經開業，當然要去試下啦！叫了一杯Cosmopolitan，不勝酒量的我要求侍應生盡量加少一點酒。幾易入口，如果大杯D仲好！小食都幾特別！餐廳設計優雅，能夠一邊欣賞維港夜景，一邊與同事暢談，真是一個減壓好地方。餐廳周圍有一支支有「火」的吾知咩來，侍應話是發熱暖管，第一次見，咁高科技！…Read More

樂怡坊呢間米線舖開左咁耐都居然無人寫食評，一於搶閘做第一個！由於我教會在附近，所以已食了無數次！以前一向食開譚仔，但覺得佢越做越差！直至有呢間小本經營的米線舖出現，覺得佢地係好有誠意，無乜野心，只想造好一碗米線！所以值得支持！舖面很細，坐滿都無十臺客。裝修簡單，有電視！似家庭生意，咩都一腳踢！由於食物有很多選擇，又要自己在「糧單」上圈食D咩？幾辣？加不加蔥等！第一次來肯定眼都花，會吾知點畫，希望可改善！有朋友話似考MC(笑)！我一向喜歡叫兩餸米線，呢間D所有「豬」食都好得，包括：豬軟骨(好淋有咬口)、麻辣豬耳(至愛，但很油，一定要寫「分開上」)、豬腸(好味！)、辣腩肉(令成碗米線都升級，好食)、豬頸肉(香滑)、香茅豬扒(好香，但一定要寫「分開上」)。另外雲吞、蟹籽丸都不錯！佢既特式就係湯底好熱，但都幾好飲，通常我都飲大半碗！但味精重！個人認為米線配凍檸茶是絕配，但佢呢間D熱奶茶都好香滑到家，值得一試！之前呢個舖位開過無數間食肆都瞬間執笠，惟有呢間可以頂咁耐，皆因佢有質素，每樣餸都有獨得處理方法，吾似一般米線舖只係整熟佢！…Read More

由於身邊不少朋友都彈牛陣價錢貴，限時間，不算好好味，不值得。所以一直都無食過，今次難得放半晝陪太太行街睇戲，咁岩太太又想打邊爐，更係要食豪D啦！食飯時間諗住會好多人，點知得幾檯客，十分冷清！打開餐牌見到鴛鴦湯底＄138任食，都吾算貴啦！太太說晚市貴成倍，但都係食呢D，午餐抵好多！限時一小時，開動！鴛鴦湯底點了泡菜和豬骨湯，未落料之前各飲了一啖，好鮮味！我和太太平時食野好清淡，但可隨時化身做食肉獸，來得牛陣當然係食肉，配菜就真係只係配菜，攞一碟已夠！先叫了兩牛一豬，牛快熟D，但湯未滾，等得好心急！約十分鐘後才完全滾了，但之後無再冷却過，皆因佢D食材吾似一般火煱店咁雪到成舊冰攞出來，所以吾會太影響煲湯的溫度，而且亦無乜雪味！又慳時間快D熟！細心、抵讚！牛和豬也切得很薄，好快熟！牛肉好靚無乜肥膏，但因此稍為會韌一點，但咁食健康D！平時在火煱店都要自己met走肥膏先食，食得健康最重要！豚肉好鮮好好味！有驚喜，食到停吾到！我地成餐飯總共食左3碟牛，6碟豬！你就知D豬幾好食，我和太太都話佢不如改名做「豬陣」！配菜全部都新鮮、在特式好食，但主力食肉，一碟已夠！最大驚喜係可以任食haagen-dazs雪糕，我食左五個球，太太食左四個！都有四款味道揀！太太話好似吾係間間都係haagen-dazs，真係好抵！埋單都係$305，超值！總括來說：好少食火煱會覺得食到返本，但今次好有信心一定返本，抵食！但咁少人幫襯真怕佢頂吾住。撐你！…Read More

朋友生日飯，選了這間價錢大眾化的意大利餐廳，我第一次來，打開餐牌真係有驚喜，樣樣野都好平，可惜無Set叫，第一次來要花點時間挑選菜式。五個人點了漢堡扒+雞翼、西冷扒、燒鯖魚、烤羊架、兩客蒜蓉包、水牛芝士pizza、三文魚芝士意粉、酥炸帶子！因為平，所以份量叫得偏多。上菜很快，限時個半鐘！建議早一點來，多人都爆！西冷扒較韌，咁既價錢是常識吧！預左！不過不失啦！燒鯖魚好腥，都係預左，但朋友話一定要叫，無法啦！烤羊架還可以，有少許酥！漢堡扒+雞翼在鐵板之中就最好味，肉質鬆軟易入口。雞翼都OK，如辣D仲好。水牛芝士pizza係呢餐最好食的一度菜，超多芝士，五個人如餓狼一樣瞬即將之KO！好好味！喜愛芝士的朋友必食，早知吾點咁多扒，點多個Pizza。第二好食係三文魚芝士意粉，都係好食在多芝士，三文魚都新鮮！梗係啦，流量咁大。酥炸帶子不過不失！蒜蓉包好食，好想叫多客，可惜已飽了！仲有＄12自助任飲汽水咖啡，咖啡是即磨，有點驚喜！不俗！總括來說，呢餐算係平、靚、正，下次會叫多D焗製食品，減少鐵板食品。這樣的價錢當然不能要求太高。例如人多地方嘈，有限時，就算未夠鐘，只要你食哂D野，侍應都會叫你走！這些確是缺點，但整體很OK，必定再來！…Read More

一向幾喜歡來這間相當偏僻的酒家食晚飯，外表平平無奇，原來用心製作，價錢相宜。可惜平日晚飯好冷清。一家人(8人)預計了兩隻乳豬，非常香脆吾算肥，大家都食到吾停得口，仲以為有得打包，骨都無哂！跟住上海鮮卷和上湯煮菜，海鮮卷係酒樓拿手野，正常都無問題，好食！上湯煮菜就麻麻地。炸蝦丸好彈牙，食兩粒都吾夠，正！主菜係芝士焗龍蝦，大家睇相都知幾大碟，呢度有兩個份量，只係＄168，抵食到呢！味道都幾好，但更係吾可以同西貢比啦！但以一般酒家來講都算不錯啦！糯米蟹同樣有驚喜，兩隻羔蟹吾算好多羔，但都好鮮味，糯米飯韌度剛剛好，食到停吾到！只係＄98咋！跟住仲點了榣柱蛋白炒飯，正常味道啦！食咁多野，埋單先8XX，真係好抵！…Read More

Dalloyau咁出名，識食之人實知道。之前只係試過佢D Cake，好多款都好有特色和好味，今次一於試下佢裡面間餐廳----Epure！一間餐廳有無實力，吾係試午餐可以知道，而係要試晚餐！一入到去，侍應閂左餐廳度門，好似入左第二個世界一樣，隔聲一流！裝修華麗兼金碧輝煌，聽侍應講牆身的全是手繪畫，直接由法國運來，真巴閉！打開餐牌，第一次來，更係試Set Dinner，佢有分6或8個Courses，我和同事也選擇了6 Courses，吾駛太Heavy！每度菜侍應都會前來悉心介紹，但坦白講，聽完都吾記得。但吾緊要，欣賞佢地最緊要好食！先來個餐前小食+餐包，Menu無寫係乜東東，三件精緻小食，順序進食有最佳效果：凍(紅)、暖(白)、熱(綠)。有驚喜有心思，值得一讚！餐包有兩大系列：鬆軟或鬆脆，不得不提的是那兩款牛油，香濃而不油膩，好想再食！(吾知用來夾菠蘿包會點！)直接由法國運來，可惜香港無得買。正式進入第1個Course：鴨肝凍熱兩食先食凍，香而不腥，入口即溶(如果多D就好)；再食熱，真係想食多碟。非常細心的是，每樽鴨肝旁邊也配上一小片法國啤梨，鮮味帶走了留在口中的鴨肝味；感覺很清新。第2個Course：烤法國蘆荀+羊肚菌和烏賊起初真係吾知乜來，好似一塊雲吞皮包住D餸，原來醬汁藏在「雲吞皮」下，碟是特別設計盛載醬汁的，心思滿分！入口香濃，有D似中國菜的味道。食完都搵唔到其他野去形容那種味道，名不虛傳，佩服！第3個Course：酥皮配炙燒小龍蝦和煎鮮魚酥皮非常鬆脆香濃，龍蝦新鮮可口，可惜的是蓋了魚的味道，配上甘草汁，正！第4個Course：終於上主菜啦！同事點了烤鴨，我點了鱈魚Share食，烤鴨出奇地柔軟，侍應話係好似血鴨的造法，劏鴨時盡量將血留在鴨體內，令其肉非常柔軟，容易入口，真係同中國人的烤鴨完全不同。一定要試！鱈魚非常新鮮，配上洋蔥更能帶出魚的鮮味，若能更多魚汁會更好。第5個Course：北非菠蘿+雲呢拿芝士雪葩似係甜品的前奏，菠蘿鮮味到無得頂，真係想問佢攞多片，雪葩+芝士原來咁好味！第6個Course：同事點了梳乎厘，我點了法國牧場精選芝士梳乎厘溫度剛剛好，非常香濃。芝士只是聞都非常香濃，但未必個個接受，但有五款不同芝士可供選擇，總有一款適合你。齋食芝士又得，塗在餐包上也可以，各有各好味！其實這時已經有飽的感覺，但太好味忍吾住食哂三片麵包。餐飲點了泡沫咖啡，香濃可口，吾係一般咖啡店果D可以相比！最後仲有三粒迷你糕點做甜品，幾飽都要食埋，甜而不膩！正！同餐前小食一樣三粒，前後呼應，完美結束這次法國大餐！整個晚餐食了2.5小時，滿足！很高興Dalloyau的餐廳Epure能夠這樣細心關注客人每一個需要，每一度菜也是悉心設計，精雕細琢，必定再來！讚！…Read More