Wingsum Lau's Profile

自問已經食過香港好多間餃子舖，但都要講一句呢間真係數一數二咁好食，以後去紅磡黃埔有多一間飯堂👍🏻唔算排咗好耐隊就入得，鋪面好日式用咗好多木嘅設計，牆上面仲黐咗好多好cute嘅貓仔。Menu有好多選擇除咗餃子之外，仲有小食麵食同甜品。我哋叫咗八隻湯餃套餐，韭菜豬肉餃拼大葉雞肉餃，再加購涼拌菠菜。餃子好大粒，而且個皮好煙靭，肉嘅份量亦好多。湯底飲落唔似味噌湯，有老火湯嘅感覺忍唔住一啖接一啖👏🏻另一款就試八隻煎餃餐，芝士辣雞餃拼黑松露豬肉餃，再加購勁高人氣嘅花膠雞絲湯麵。老闆仲推薦一定要試佢哋自家製嘅辣菜脯。兩款煎餃口味都好特別，黑松露味好勁，而芝士辣雞嗰個勁有韓式風味。再配埋辣菜脯一齊食，更有咬口。最驚喜嘅係湯麵好濃好好食，特登嗌咗多蔥，再食埋大大嚿花膠，我會為咗呢碗嘢而再嚟🫶我哋叫咗兩款嘢飲都係舖頭自家製，分別係洛神花茶同埋金羅漢果白茶。包裝勁cute，飲落好養生，正啊！其實仲想試埋佢個甜品，可惜已經太飽，下次再訪一定要食🎉…Read More

作為土生土長香港人，港式鐵板絕對係兒時回憶，而家大個咗帶返屋企人去食別有一番風味。旺角呢間鐵板世家，一入到去好似入咗時光隧道回到過去咁，成個格局都好復古懷舊，正啊！望吓餐牌有好多款鐵板同埋焗飯食，首先叫咗個鐵板西冷牛扒拼雞扒($128)，五成熟，加$10配個意粉。再嗌咗個芝士白汁海鮮飯($98)。每個餐都會跟餐湯、餐包、甜品同埋飲品，抵到爛。餐湯叫咗白湯，隊個餐包落去一邊食一邊飲，冇得輸。鐵板上場，淋個燒汁落去渣渣聲，嗰陣香味包保隔籬枱都聞到。牛扒同雞扒都各有兩三塊，份量已經好大，兩款扒都煎得好腍，好食。跟住$10嘅意粉又係一大碟，差啲食到要打包。再到焗飯，淡淡都有白汁，而且有好多海鮮，例如龍脷柳、蝦、青口等等，基本上一口接水口停唔到，特別配埋芝士，男女老幼都包保鍾意。最後甜品係一個好經典嘅花奶布甸，好滿足。埋單人均都只係$120，晚市就可以食到咁豐富，大力推介俾一家人去食，重拾兒時嘅回憶❤️‍🔥…Read More

因為朋友喺九龍東嗰邊返工，所以想喺觀塘搵間靚靚Cafe慶祝生日，之前一直想試Be Leaf好耐，今次終於有機會！依間餐廳打卡一流，淨係門口個花花裝飾都有排影，餐廳裏面個vibe都好柔和，枱同枱之間有一定距離保持私隱👍🏻Menu都算多嘢食選擇，前菜我哋揀咗意式芝士巴馬火腿拼盤($128)，份量都算多有四款肉，芝士唔會太鹹。主菜揀咗香煎牛小排紅咖哩意大利飯（$188），加多咗個是日餐湯。意大利飯微辣嘅感覺好過癮，牛小排煎得好腍，感覺好似食緊泰國fusion嘢咁樣！餐湯係蘑菇湯，好順滑，將個餐包點落去食Perfect！嚟得呢間Cafe梗係要嗌個signature嘅梳乎厘，我地叫咗法式焦糖卡士達梳乎厘班戟（$128）。店員仲好好人幫我哋寫生日message👍🏻個疏乎厘算係有咬口嗰一種，唔會食落剩係得空氣，特別鍾意佢個卡士達醬，配埋啲焦糖脆脆食好夾。我哋最後仲叫咗兩杯好fancy嘅嘢飲，Ocean paradise（$48）同Grapefruit summer soda（$46）。朋友都好滿意呢餐生日飯👍🏻…Read More

平時去開尖沙咀經過厚福街都知道有好多好嘢食，最近有朋友生日，佢話H8樓上有間西餐好正，結果一試難忘，好難想像人均$500可以食到咁高質素❤️‍🔥❤️‍🔥我哋未叫嘢食就已經上咗餐包，兩款包都係酒店及嘅水準，好鬆軟，再配埋牛油同果醬，簡直想encore。前菜揀咗自家製豬手凍沙律伴話梅芥末汁($128)同埋傳統法式生生肉他他($148)。個豬手份量大到嚇親，沙律菜好爽口，個汁酸酸may may幾好好食。牛肉他他配埋隻蛋食好match，配包一齊食Perfect！Main就order咗加拿大豬鞍扒（$268）同埋牛肝菌露筍意大利飯（$208）。豬鞍煎得好腍，最欣賞佢連啲配菜同埋薯蓉都整得好出色，清晒碟！至於個意大利飯都好香口，上面仲有大量芝士，好邪惡啊！最後梗係要嗌返個甜品，我哋揀咗伯爵茶奶凍（$48）同埋朱古力香蕉金寶（$68）， earl grey味超濃仲配咗啲玫瑰花瓣，個奶凍入口好順滑，食到停唔到口👍🏻👍🏻👍🏻👍🏻另外我哋嘢飲叫咗凍開心果咖啡（$46）同埋香橙乳酸梳打（$42），開心果味超濃，每啖都飲到，係我暫時喺香港飲過最好飲嘅開心果咖啡😝…Read More

自從啟德Airside開咗之後我都成日過去行，因為貪佢嗰邊空間夠大，而且可以同寵物一齊chill。前排因為想減肥，所以朋友推薦我一齊去食樹屋Tree House。呢度有好多健康餐單最出名嘅係酸總麵包，仲有多元化嘅蔬菜。我哋叫咗餐廳signature嘅regular cedar sourdough ($78)，裏面有牛油果、紅菜頭、洋蔥等等，勁多餡料撈埋一齊，一啖咬落去超滿足。之後叫咗一個half and half regular banyan，仲upgrade埋soup of the day (南瓜湯)同一杯就Lemonade ($148)。呢個又係超豐富，有燒過嘅矮瓜、蕃茄、好多卷心、roasted garlic hummus 等等，食落去好清新健康開胃！值得一提嘅係個南瓜湯好濃郁，我同個friend都爭住飲。最後仲叫咗個甜品walnut brownie ($50)，同埋一杯熱嘅ginger lemongrass ($45)，成餐飽肚之餘又食得好健康下次如果keep fit都會再去幫襯。…Read More

自從去完越南旅行之後就迷上咗越式料理，有日喺旺角行完街就同朋友入咗呢間河內越式料理，唔係繁忙時間但係裏面都full House，咁嘅市道之下做到咁多人幫襯，肯定有佢嘅本事🫡基本上你講得出嘅越南嘢佢都有，我哋叫咗三樣嘢，分別係越式河內三寶飯（豬扒、雞翼，札肉）$72、招牌越式三文治 $53、越式烤雞半隻 $118。首先上枱係三寶飯，啱晒啲有選擇困難症嘅人，可以乜嘢都試吓。雞翼好惹味，炸至顏色非常之金黃，再食啖豬扒，頓時忘卻咗要減肥😆😆至於個三文治其實係法包，裏面有扎肉同埋超多蔬菜，個包皮唔會太硬，配埋個特製嘅醬，大滿足。最後上嘅係烤雞半隻，上枱熱辣辣仲噴緊煙，雞肉好嫩滑，就算係雞胸部份都唔會好嚡，我同朋友一致認為呢個係今日mvp🫶🏻另外天時暑熱梗係要嗌返兩杯凍嘢爽吓，叫咗杯椰汁三色冰 $30，同埋鮮芒果沙冰 $36。兩樣都超級解渴。咁食法人均都只係$150，抵佢咁好生意！而且又近旺角東或者太子站，行過都可以再試佢啲Pho。…Read More

自從啟德開咗Airside，周邊環境好chill而且Pet Friendly，係假日好去處。早前去探朋友嘅時候佢介紹咗樓下一間西餐廳，食物質素完全唔遜色於市區餐廳，而且價格仲好抵👍🏻餐廳裝修好骨緻，尤其是係吧枱位，燈光會不停轉色，有feel~ 佢有分a la carte同埋套餐，套餐只係$238，包前菜主食甜品同埋飲品。我哋叫咗兩set。餐湯係超濃厚嘅蕃茄湯，裏面仲有通粉，超有誠意。個沙律都比出邊大份，仲有勁多芝士，個橄欖油為佢添上多一份層次。配埋烤麵包佐蕃茄，好開胃。我哋加咗$110食新鮮生蠔，總共有六隻咁多，size好大，而且冇腥味，大推。至於主菜就叫咗BBQ HALF RIBS半排骨，同埋牛柳。個ribs大過我隻手！嗰調味好好食，貫穿晒肉嘅每個部份，係我今餐嘅favourite。至於個牛都好軟腍，連配菜舊薯仔都好好食。最正係飲酒唔使加錢，個set包埋。食生蠔梗係要飲番杯白酒，友人就揀咗Sapporo生啤，渡過咗一個愉快嘅晚上。兩個人買單人均都係三百幾，性價比一流👍🏻…Read More

呢間和風酒吧位置上雖然唔顯眼，但係入到去一睇裝修就知道臥虎藏龍，牆上面放咗唔同國家嘅CD，充分突顯咗老闆嘅音樂品味。我哋去嗰陣仲有枱日本人嘅客，證明連local日本人都欣賞佢哋嘅嘢食同酒🫡餐廳有套餐選擇，亦都可以散叫。我哋叫咗個一人餐($258)，包晒前菜、沙律、湯、小食、鐵板料理、食事、甜品同埋飲品，份量基本上係夠兩個女仔食。另外仲散叫咗一個流心芝士年糕($48)、明太子玉子燒($72)。首先嚟到嘅係套餐嘅日式漬茄子、蟹柳蟹籽沙律、日式南瓜湯，南瓜湯好Creamy好Rich，個沙律有勁多蟹籽，而且沙律菜份量比出邊嘅餐廳多，夠晒健康。小食我哋揀咗日式炸雞（2件），個脆度炸得啱啱好，食落啲雞肉都好嫩滑。至於鐵板料理就叫咗蒜香帆立貝，上到枱仲係渣渣聲，帆立貝超大粒！同埋好鍾意洋蔥加埋個汁，勁適合送飯。個餐仲有一個和風溫泉蛋拌飯，甜品就係自家製蕨餅（抹茶伴紅豆），仲有個黑糖醬俾你點。個蕨餅勁煙靭，紅豆又好甜，食得出一定唔係來貨。去得日式酒吧梗係要試吓sake，套餐包一杯飲品，我哋揀咗六根純米吟釀，味道非常之甘香柔和，飲得出有少少蘋果同埋啤梨味，就算平時冇飲開酒，都會鍾意！成餐飯食咗咁多嘢，人均先係二百幾蚊，再加埋環境又好坐，下次去尖沙咀都會再試吓佢唔同酒👍🏻…Read More

最近因為朋友生日，所以諗住搵間靚靚仔仔嘅西餐廳同佢慶祝，無意中見到呢間restaurant and bar。佢個位置喺灣仔旺中帶靜嘅一角，因為夠高層再加埋落地大玻璃，望到成個港島夜暗超級靚，仲有天台露天位俾人chill，不過𠸝唔好彩嗰日天氣唔係幾好，所以我哋坐喺室內，一樣咁正。佢夜晚嘢食有好多選擇，有set dinner同a la carte，仲有好多自家調製嘅Cocktail。Set dinner前菜我哋揀咗日本帶子三文魚蟹子他他，嗰日嘅餐湯係南瓜湯，main course方面就揀咗香煎加拿大牛柳配和牛頰肉焗薯伴香草紅酒汁，仲包埋個甜品。他他上面嘅海鮮好有鮮味，開胃一流。牛肉煎得好腍，本身都已經有好多肉汁，點埋個紅酒汁食再昇華，甚至連個伴碟焗薯都好好食，絕對唔係交行貨。我哋仲散叫咗香煎三文魚配香滑薯蓉伴蟹肉忌廉汁、三文魚子牛油果、西班牙火腿蕃茄莎莎多士 ，各有兩嚿。多士好surprise，牛油果唔會太熟啱啱好，令人一啖接一啖咁食。今餐VIP係三文魚，喺出邊未食過呢隻味嘅蟹肉忌廉汁，好襯三文魚！我同朋友認同會為咗佢而encore。慶祝生日梗係要飲酒，我同朋友都叫咗gin tonic，為呢餐生日飯畫上完美句號。呢個地方真係好啱食生日飯，大推！…Read More

以前讀大學已經成日食呢間餐廳，貪佢大件夾抵食，啱晒一班人re-u聚會。估唔到過咗咁多年之後依然都係咁旺，價錢依然都係咁親民！今次專登返去食回憶嘅味道，冇令我哋失望。我哋兩條友總共嗌咗五樣嘢，第一樣走唔甩一定係鮮肉小籠包（5隻）$48。上枱熱辣辣，皮薄咬落去爆汁，點埋喼汁仲好食。涼拌四併（$102），有麻油海蜇、花雕醉雞、鎮江餚肉、雞絲粉皮。開胃一流，最正係個醉雞，好入味，同埋好滑。至尊炒飯（$88）炒得好有鑊氣，都算比得多蝦，唔會太鹹。成餐飯嘅重頭戲就係蟹粉賽螃蟹（$138），一上枱已經俾個份量嚇親，仲大碟過炒飯😂😂蟹粉覆蓋住蛋白，每啖都食到，無得彈！最後梗係整返個高力豆沙($52)，上枱一樣係熱辣辣，好鬆軟，而且個紅豆唔會死甜，為呢餐晚飯畫上完美句號。建議大家可以一班人嚟食，咁樣可以試多啲晚餐小菜，同埋其實佢都有好多套餐可以揀，性價比極高！…Read More

聽開K-Pop嘅人通常都好鍾意食韓國嘢，尖沙咀就出名多韓國餐廳任君選擇。上星期同friend去咗諾士佛台嘅啤啤Bear韓國包車，上到去已經俾佢啲裝修驚艶到，好cyber y2k嘅感覺，淨係打卡都有排打，very ig-able!舖頭裏邊一直播住kpop，好有feel❤️‍🔥用手機落單，基本上咩都有得食，炸雞、燒烤、麵、煎蛋捲，送酒一流！我地一行二人叫咗辣炒小章魚五花肉、芝士吞拿魚蛋卷、招牌炸豬腳、甜米露。一坐底上泡菜是基本吧，跟住就有新鮮熱辣辣章魚五花肉，其實唔算好辣，炒得幾入味，仲有椰菜，份量好足。芝士吞拿魚蛋卷超級巨型，切開即刻見到芝士拉絲，應該無人會唔中意食。最後上枱係招牌炸豬腳，配咗生菜俾係包住一齊食，仲有辣醬同介末醬。豬腳炸到超脆，肥瘦肉分佈適中。我哋一致認為呢個最好食！埋單人均二至三百蚊，食得飽環境又正，下次會再嚟飲酒🍻…Read More

前排天氣好凍，所以好想食啲暖野，咁啱喺銅鑼灣fashion walk附近竟然發現咗一間好隱世嘅日式餐廳，主打食日式火鍋。舖頭店面嘅設計非常簡約，而且座位與座位之間好寬敞，好有privacy。睇返Menu有好多選擇，主打食壽喜燒同埋日式火鍋。經店員推薦之後，我哋叫咗犇盛合套餐。每人只係$398，但已經包咗刺身、沙律、海鮮、肉眼、牛小排、雞件、烏冬等等，超級豐富。我哋揀咗原粹豆乳豚骨湯底，非常之濃郁稠杰，一上枱已經聞到陣陣豆香。刺身好大塊，有鮮味。個沙律都係偏大份，特別鍾意個醬汁，好開胃。之後就輪到肉類上枱，分別有四種肉，包括澳洲一級肉眼、美國安格斯牛小排、美國牛五花同埋無激素春雞。個人就最鍾意牛五花，烚完放入口有溶化嘅感覺，好正！至於海鮮就有帆立貝、虎蝦等等，全部都好新鮮，食到我哋舔舔脷。配埋個野菜拼盤，索晒湯底個精華，冇得頂。very recommend!…Read More

呢排政府話要搞旺夜市，咁我哋梗係要促進經濟，夜晚飲番杯去消費😆朋友推介我哋去尖沙咀一間遠離繁囂嘅酒吧餐廳，佢有室內同室外座位，不過因為嗰日天氣唔係幾好所以我哋就坐入邊。餐廳裝飾好有地中海特色，圓形大拱門震懾眼球，而且成間鋪都係用白色為主調，俾人感覺好舒服。我哋叫咗三樣嘢食，包括避風塘風味炒蜆墨魚麵($148), 炭燒牛柳配黑松露蘑菇醬($238), 蒜香白酒清酒煮蜆($158)。話明係酒吧嘢飲梗係有好多選擇，侍應特別推介左佢哋餐廳嘅signature cocktail，一杯butterfly($98)，同埋一杯homemade grapefruit gin tonic($98)。兩杯雞尾酒都好fancy，用咗好多花花草草做點綴，打卡一流。兩杯飲落去都好fresh，特別係杯gin tonic，散發出淡淡嘅西袖香，好好飲。清酒煮蜆配咗四個包，將佢點落啲汁度食，索細啲精華，識食一定係咁食。蜆同青口都冇腥味，而且份量都多。墨魚麵個口感彈牙，避風塘口味有少少辣，好似花椒咁樣，不過出奇地又同啲意粉好夾。最後上碟嘅炭燒牛柳，非常之鬆軟，切嘅時候幾乎唔使用力，個黑松露醬尤其出色，一啖牛柳一啖醬再配埋一啖薯蓉，ok please take my money😍…Read More

大角咀利奧坊嗰一邊慢慢轉型，由舊區開始變咗好有活力嘅社區，仲多咗好多餐廳。有日探完朋友之後就去咗附近一間好有情調嘅西餐廳同埋酒吧，裏面座位唔多，全部都係高身嘅吧枱，侍應服務態度好好，熱心同我哋介紹Menu。我哋一行兩人叫咗四樣嘢，包括西班牙辣肉腸($68), 蒜香橄油炒野菜($88), 脆炸原隻魷魚配香辣蛋黃醬($128)，主菜就叫咗烤焗美式BBQ醬豬肋骨($268)。嘢飲方面餐廳有一大個酒櫃display咗各種形式嘅酒，目不暇給。因為我哋都唔係成日飲，所以叫侍應幫我哋推介。紅白酒各自叫咗一杯，兩杯都好易入口，而且冇澀味，好順滑。野菜充滿牛油同埋蒜香，有四季豆翠玉瓜同埋菇類，又唔會太油。西班牙辣肉腸配酒一流，香味多過辣，係十分稱職嘅佐酒小食。魷魚勁好食，炸到好酥脆，但係又唔會覺得好粉，滴多兩滴香檸汁，再配埋蛋黃醬，勁有衝動嗌多一個。最後上碟嘅係豬肋骨，大過我隻手掌！侍應話BBQ醬係佢哋自己整，好惹味。下面仲墊住薯條同埋粟米，我哋兩個人都差啲食唔晒。總結呢間餐廳好有驚喜，啱晒情侶過嚟食慶祝飯，嘢食質素好高又有情調。…Read More

本身已經係家後嘅超級fans，喺我心目中係全香港最好食嘅餃子❤️‍🔥知道佢最近開分店即刻衝過去試吓！去到鋪面同以前好唔同，新店行文青風格，仲賣埋咖啡，啱晒平時喺度chill一chill。嗰日仲見到有藝人嚟買外賣😍朋友第一次嚟食，所以我叫佢咩都試吓。灼餃子我哋揀咗韭菜豬肉餃、菠菜豬肉餃。至於煎餃子我哋就揀咗小籠包豬肉餃、雲耳椰菜豬肉餃。餃子一如既往地多汁多料爆好食，我就最鍾意煎小籠包豬肉餃，真係好似食緊一個小籠包咁樣，超級Juicy。點埋喼汁就真係可以一個人食20件。灼餃子個湯底係精粹，嗰日係螺頭燉野生菌，超級入味，我同朋友完全將佢飲晒，無得頂。另外仲叫咗個沙薑雞中翼、日式住家飯糰，當然唔少得最出名嘅開心果芝士蛋糕！好彩我哋去到仲有貨，強烈勸喻大家一定要早啲去😆飯糰同出邊食嗰啲好唔同，相對上健康，同埋有好多料。至於芝士蛋糕真係用好食都唔足夠形容，一入口就好似溶咗咁樣，質地好似Movie，食極都唔停，好想買晒成底返去😭…Read More