路易斯LouisC's Profile

<餐廳來頭>餐廳原本只係一間普通既酒店Coffee Shop, 但經過不同名人 (例如王迪詩) 推介佢既海南雞飯之後, 從此聲名大燥, 名氣大到一講起君悅酒店就即刻令人諗起海南雞飯, 縱使價格離晒地, 慕名之人依然絡繹不絕.<FOOD>Menu: A La CarteBread 面包籃 (推介!)味道: 5/5Price: included坐低冇耐侍者就端上面包籃, 本身對佢都冇咩期望, 亦唔打算掂佢, 無奈友人姍姍來遲, 口痕即管試兩啖吧, 叫做有啲野咬下. 一拎上手, 咦~ 暖架喎, 竟然唔係凍冰冰? 心中暗喜. 先食左舊海鹽海苔包, 軟熟既口感加埋少少海苔同丁丁海鹽既味道, 估唔到係驚喜產物!另外仲有Baguette 同 Sour dough, 中上水平~海南雞飯 (推介!)味道: 10/10Price: $285究竟呢個三百大洋既雞飯有幾受歡迎呢? 打個比喻, 就好似喺吉野家見到牛肉飯咁, 冇話枱枱都會叫既, 但8成以上都係食緊佢囉~等左十幾分鍾, 雞飯終於上枱. 好老實, 賣相冇咩特別, 有雞, 有飯, 有湯, 有菜, 有三色醬, 同出面街食開既冇咩大分別, 最多可以叫做擺得decent 啲...至於佢喺味道上會有幾大既威力呢??蔬菜食得出田原氣息; 湯碗盛著既唔只係雞湯, 而係雞既靈魂; 油飯粒粒飽滿, 每一粒米都被濃郁既雞香纏繞住; 至於雞脾肉, 四個字形容: 無以上之!講笑者, 以上只係在下既FF而已, 大家唔好諗到食完真係好似識飛, 以下先至係真實版:有機菜心: 爽脆新鮮, 不過不失雞湯: 有別於出面街飲到既雞湯, 呢度“純” 好多, 白蘭氐雞精既弱雞版. 唔知係唔係在下眼花, 湯入面好似加左啲細小既炸雞肉, 出黎效果好壞參半… 好既係令雞味更濃, 壞既係… 其實有啲怪雞~油飯: 飯粒的確係分明, 不過出面大部分餐廳其實都做到. 值得一讚係濃淡調較適宜, 有油香而冇油膩,雞脾唔去皮: 落單時可簡雞髀或者雞胸, 去皮定連皮, 一樣價錢, 一樣咁貴. 既然價錢一樣, 死都簡雞脾啦, 平時出去食要加錢架嘛, 在下一定唔會蝕俾佢! 雞味充沛同起晒骨係基本野, 由於佢係原隻雞脾呈上, 是故極度厚肉, 大啖大啖肉(重點係冇骨)既滿足感係不能用筆墨言語形容. 至於肉質, 的確做到極級嫰滑, 嫰滑之程度係在下喺其他地方仲未遇到, well, not even close to it. 三款醬汁薑蓉, 黑醬油, 酸辣汁, 堪稱雞飯三寶, 為濃郁雞味豐富層次, 起如虎添翼之用.在下叫做有幸到過其他 “叫雞”勝地, 例如新加坡既chatter box 同逸群, 曼谷既水門市場, 論油飯同雞湯既質素, 大家都係不相伯仲, 各有千秋, 唯獨雞肉本身, 鬥既係肥美滑溜, 而喺呢方面我地香港君悅酒店Grand Café既雞飯的確鶴立雞群, 是故“全宇宙最好食既海南雞飯”既美譽係當之無愧.烤挪威三文魚柳 (檸檬,  刁草奶油) + 配菜薯蓉 (推介!)味道: ~Price: $260 + $65友人叫既主菜, 在下只係偷偷嚐了一口, 本以為烤出黎既魚會係 super well done, 入面乾憎憎, 但估唔到烤得如此出色, 外面帶點脆, 裏面大約3成熟, 仲食到條魚既滑溜, 少有既高質烤三文魚. 至於薯蓉又係正野, 食得出落左好多牛油, 咁點會唔香唔好食呢~?如果下次兩丁友黎食, 可以一個叫雞飯, 一個叫烤三文魚, share 黎食, 滋味double!<DRINKS>CappuccinoPrice: ~用一杯Cappuccino with extra shot為呢餐飯作結係唔錯既選擇, 隨咖啡送上蝴蝶酥4小件, 苦甜交疊. 呼一口氣, 呷一口咖啡, 細味濃香甘苦, 然後慨嘆一句: 生活逼人~ 著住套老西喺君悅扮高尚食雞飯, 應該係我地呢啲打工仔能力之內最大既慰藉… 辛苦搵黎志在食~<OVERALL COMMENT>野食COMMENT食物整體質素屬於高水平, 由面包到雞飯到咖啡, 撇除價錢, 真係冇咩好挑剔.服務COMMENT正常酒店咖啡室服務, 冇期望所以冇失望.  雖然點都無辦法同法國餐廳睇齊, 但冇遇溺既情況出現已經當贏.輕微扣分小插曲: 話說點完餐之後有一位女侍者唔小心拎左杯凍咖啡埋黎, 在下話冇叫過, 佢竟然帶點驚惶失措回應: 6A 喎! 冇?!在下呆左, 真係唔識俾反應… 其實呢啲落錯單送錯野既情況時有發生, 侍者們應該見慣見熟, 冇理由俾咁大反應…環境COMMENT餐廳剛剛裝修完畢,由以前既Cozy 變左而家既 Stylish, 好左定差左就見仁見智. 另外餐廳中間加左bar 枱dining area,  方便啲孤獨精黎食飯. 不過相比起以前, 在下覺得啲枱好似逼左, 成餐飯被逼同隔離枱share 秘密 (好彩隔離枱係洋人, 聽唔明在下吐既苦水), 加上今日餐廳full house,  某程度上其實都幾嘈下…根據在下黎呢度咁多次叫雞既經驗, I mean 叫海南雞飯食, 過左lunch hour 大約2點半黎食就係最佳timing.始終收得在下幾舊水, 除左隻雞, 環境同服務都應該包埋架下話~抵唔抵食?原價$285 既海南雞飯, 加埋一過三百, 幸好友人喺君悅度做, 拎左個員工價, 加上又送左杯Cappuccino, 條氣先冇咁Chok… 但由於今次既用餐環境爭左啲 (因為太嘈), 所以計埋計埋都係唔多抵~呢啲離晒地既海南雞飯, 一年一次就好了 (就算有員工優惠都係咁講), 食完曉唔曉飛在下唔敢講, 但月尾見到張信用卡帳單就肯定亢奮到飛起!…Read More

認識在下既人都知道, 在下係唔鍾意同埋唔會去食自助餐, 一來佢同Fine Dining 追求貴精不貴多既Concept背道而馳 (對不起, 在下一向覺得自助餐啲野食唔多好味, 一味靠多款取勝), 二來… 老啦, 食唔到幾多野, 發揮唔到自助餐精神 – 食到回本… 所以對於自助餐, 在下一向都避之則吉~適逢友人見工得左, 脫火海成功, 係時候要兌現兩個月前既承諾 – 一餐半島 (餐廳在下簡~ 總之係半島酒店) 中菜廳嘉麟樓十二月頭已有飯局, 法國菜Gaddi’s上個禮拜食完, 認真麻麻, 至於瑞士菜Chesa… 天氣咁熱, 邊有雅緻食名物芝士火鍋? 得番日本菜Imasa 同The Verandah… 在下堅守原則, 唔喺香港食高級日本菜, 要食一定要番日本食, 所以順利成章造就今日既The Verandah, 都ok既, 反正食過晒咁多間五星酒店既自肋餐, 唯獨半島未試!自助餐中午價錢平日每位$468, 已經唔算平, 週末更離譜, 盛惠每位$788, 同夜晚Buffet睇齊, 完全冇克制可言… 而且仲要冇蠔, 冇原隻龍蝦, 冇包酒水, 都夠膽死收人 8舊幾水落樓, 唔好去搶? 唔係..係好過去搶…不過~ 今餐係友人請既, 條氣順晒, 哈~ 同友人準時十二點半到逹餐廳, 坐底叫左枝紅酒就正式開餐, 回(唔到)本之戰, Round 1!<FOOD>Menu: Lunch BuffetPrice: $788 per personAppetizer (Cold Cut, Seafood, Foie Gras Mousse)前菜 (冷盤, 海鮮, 鵝肝慕絲)味道評分: 6/10Buffet Area中間有一張長枱, 上面有齊各種沙律同配料, 沙律菜有4款, 款款望落都好新鮮, 不過呢啲低價值既野, 在下冇試到, 哈哈, 縱使呢場戰爭必敗, 但回本之心不可滅! 沙律隔離有幾款finger food, 試左個芝士火腿卷, 一般過一般…黎得食自助餐, 大家目標都係攻海鮮. 呢度海鮮戰場既重點係龍蝦杯同鮑魚仔. 龍蝦肉俾得算大方, 亦有龍蝦鮮味, 配左芒果粒同牛油果醬, 整體感覺還可以. 至於鮑魚仔, 需知道唔係叫親鮑魚都係貴野, 呢度俾你任拎任食當然唔係咩值錢貨, 九孔鮑是也, 街市十蚊一隻有找~ 老實說, 鮑魚味真係食唔出, 不過汁醬叫做燴得入味, 不至於淡然無味.戰場仲有一大盤刺身任拎, 讚既係佢唔會好似其他酒店要配給咁肉酸 (個個拎住隻碟喺度”行乞”, 跪求師傅厚切), 刺身有劍魚, 八爪魚, 北寄貝, 三文魚, 吞拿魚等等等, 不過在下喺香港少食刺身, 所以skip左呢一盤野… 刺身類別仲有一大盤甜蝦, 個樣幾靚幾新鮮, 在下都不禁夾左兩小隻試下, texture對板食得出甜味, 友人則大讚高質.甜蝦隔離仲有一大盤原粒帶子, 又係任夾, 帶子算幾飽滿不過冇咩帶子味, 但已經比平時hae食既好好多. 仲有青口, 又係望落肥美, 食落口就知道唔係果回事… 只可以話: 在下食過更更更好既… 蟹類有兩款, 一款係蟹鉗, 餐廳好細心將一半蟹殼剪走, 所以放落口一啜就食到, 另一款係鱈長蟹腳, 同樣已經開晒邊, 唔駛問佢地拎較剪, 呢啲就叫做窩心既服務囉… 有冇人同在下一樣, 最怕喺街度剝蟹, 整到成手污糟晒, 一諗起就懶得去食! 至於味道呢, 不過不失啦, 蟹味唔夠鮮唔夠濃 (雪藏貨色), 不過勝在冇一味死咸, 自助餐質素算係咁啦…壽司環節, 得罪講句, 食過東京三星米芝蓮Yoshitake同大板兩星既Sushi Harasho之後, 而家在下對大部份壽司都已經免疫, 所以縱使係半島酒店, 面前盤壽司對在下黎講依然係零吸引力, 心諗呢碟野都係留俾有需要既人吧… 不過佢又放得幾靚, 細細舊擺得幾cute, 在下即管捧下場, 食左一件汁燒小章魚壽司, 果然… 真係淺嚐都無謂~cold cut方面有三款火腿同兩款煙三文魚, 在下食試左煙三文魚, 味道唔錯唷~前菜最後一個環節: 由酒店侍者親手奉上每人一客鵝肝mousse雪糕, 鵝肝香味一流, mousse滑溜, 不過敗筆喺個雪糕筒, 唔知係唔係擺得耐得濟, 淋鬼晒, 要知道淋pat pat既雪糕筒真係難食到冇朋友, 失敗啊! 嘥晒個鵝肝!Main Course (Hot Dish)主菜 (熱盤)味道評分:: 7/10其實主菜都有好多款, 不過大家都知… 邊有人黎自助餐係黎食熱盤架? 希望呢句冇得罪人... 要數熱盤最回本既菜式, 當然係燒牛扒 (其實佢係Prime Rib), 依個亦係佢地將weekend lunch賣到$788其中一個原因 (根本係借口!), 好似話平時禮拜一至五既午餐冇呢樣, 在下就即管睇下佢值唔值~ 塊牛喺未切時就咁望落去已經好吸引, 果然~ Medium既生熟程度, 嫰得黎牛味濃郁, 肥瘦均勻, 配埋少少gravy同芥末醬, 完全係高質既表現, 拍得上 Lawry’s the Prime Rib 兩百幾蚊一塊既質素, 在下完全收貨!牛扒表現好, 諗住唔爭在都試埋隔離個羊腿肉, 點之又乾又鞋又冇味, 差! 完全放唔到落口…唔知邊度黎既inception, 半島啲咖哩應該會好好食, 可能因為佢地係英式酒店, 而英國人整咖哩應該有一手, 咖哩菜式有雞, 魚, 同羊, 在下剩係試左咖哩羊, 咖哩汁唔錯, 幾濃幾香, 不過在下嫌佢太辣, 扣分位係舊羊肉, 韌到冇朋友, 所以在下試左一細舊就收手.湯品有中式既雞湯同西式既忌簾磨菇湯 (友人話好香, 似落左少少黑松露提昇左成件事. 在下偷飲左一羹 (當然唔會自己畢一碗啦, 咁濟~) 味道的確唔錯, 忌簾比例剛好, 唔過濃過稀, nice!熱盤其實仲有一系列既菜式, 例如焗扇貝, 蒸大白菜, 焗三文魚,  天婦羅大蝦等等等, 不過呢啲蝕本貨, 在下一概無試… 無法罝評~Dessert (Cake, Tart, Ice- cream, Cheese, Fruit)甜品 (蛋糕, 撻, 雪糕, 芝士, 生果)味道評分: 8/10甜品環節又係自助餐既重點, 對於好多人黎講, 佢既重要程度比熱盤更高. 但食完塊牛在下已經飽左9成, 極其量都係每款淺嚐一下.先講在下既最愛 - 芝士, 一共有五款, Brie, Parmesan, Gorgonzola (blue cheese), Gruyere, 同埋一款唔記得名, 款款都好親民, 就算食唔慣芝士既朋友都可以一試, condiment亦都算多, 有合桃, 杏甫, 餅乾, sourdough bread with nuts and dried fruit, 果醬, 配套算係高分之作! 如果提供埋蜜糖就perfect池了~蛋糕有3-4款, 在下既肚剩係夠力氣食到一款, 簡左日本芝士蛋糕, 輕身得黎味道唔錯. 另外一個要讚既甜品係咖啡撻, 細細個, 撻上面有粒咖啡豆, cute度十足, 食落更有驚喜, 咖啡香味細緻濃郁, 質地滑溜, 甜度適宜, 在下誠意推介!另外仲有好多甜品放喺玻璃Jar任拎 (有raspberry 脆條 – 呢個幾得意, 因為上面放左少少爆炸糖, 仲有朱古力塊, 蝴蝶酥等等等), 鍾意肉桂既朋友要試下 Cinnamon Stick, 夾埋杯咖啡真係一流.雪糕都係呢度既亮點, 有四種味道: 朱古力, 榛子, 雲尼拿, 士多啤梨 (呢個似雪皅多啲), 睇個勢似係自家製. 友人好欣賞, 食完又畢, 畢完又再食, 跟住又再畢~ 在下都計唔到佢食左幾多round了…最後餐廳又係每人送左一個橙酒疏乎里, 不過只係一般貨色, 聊勝於無.Petit Four: 叫餐飲時侍者送上貝穀蛋糕 madeleine, 不過在下飽到食唔到了.<DRINKS>Warm WaterPrice: Free估唔到半島餐廳都有親民既一面, 同隔離瑞士菜Chesa一樣, 唔會逼你飲法國春水, 可以叫暖水, 慳番一百幾十蚊.Red Wine – Domaine Chante Alouette, Cormeil Saint-Emilion Grand Cru 2009Price: $680 per bottle味道評分: 8/10今次係在下第一次食自助餐叫酒飲, 畢竟友人出雞, 在下點都要出啲豉油, 話晒都係幫友人慶祝. 用vivino check過, 枝酒出面零售都要大概$200尾接近$300, 餐廳都係mark up 左幾舊水, 還可以吧.喺半島叫酒, 有難有容易~ 難係酒牌裏面既酒絕大部分都要過千, 想搵啲平既都冇咩選擇. 容易既係“半島” 呢個名就係質素保證, 擺得落佢地wine list都一定簡過, 唔會隨便放啲垃圾落去, 所以差極有個譜, 可以放心咁叫.6舊水既貨色, 當然未有太大驚喜, 不過算稱得上係佳釀, 輕易飲得出有別於街邊西餐廳叫果啲惠康貨色. 講番杯酒, full bodied, 漿果味道濃郁, 單寧飽滿, 平時少飲紅酒既友人都直豎挴指!食住野傾下計, 有杯酒fing 下既感覺係唔同啲, cheers! 酒就係一樣咁神奇既野, 可以令愁更愁, 又可以amplify happiness! 不過如果閣下一心諗住黎食窮半島, 自助餐叫酒並唔係一個好主意, 因為酒精會削弱戰鬥力, 加上飲到咁醉又食到好飽, 其實係好容易嘔的, 喺五星級酒店獲利回吐就唔係咁好啦…Coffee or Tea – Double EspressoPrice: Included味道評分: 5/5自助餐包咖啡茶, 在下喺叫之前特登問侍者: 你地呢度既咖啡同Gaddi’s 既係唔係一樣, 侍者回答話佢地同Gaddi’s係Share同一個Coffee Station, 在下心裏暗喜: 正! 事源在下上個禮拜喺Gaddi’s 飲左杯好悏意既Double Espresso, 今日黎到, 又可以番尋味.呢杯Double Espresso依然咁香, 甘苦同酸味Balance得好好, 唯一分別既係在下已經飽到暈, 無力細心欣賞呢杯難得既高質Espresso, 係咁易sip左兩啖就收工~<OVERALL COMMENT>野食COMMENT原諒在下唔係太識點去評價一個自助餐既食物… 若然用平時fine dining既標準去評, 除左燒牛扒, 芝士, 同咖啡撻係合乎口味之外, 其他都屬於 “不食也罷” 級別~不過, 野不能咁睇, 話不能咁講, 唔同地方就有唔同standard, 始終係buffet. 同其他酒店buffet比較, 野食算中規中矩. 重點既海鮮戰場比上不足, 比下有餘, 整體質素係唔錯既, 不過冇蠔冇原隻龍蝦, 收得呢個價錢, 食客始終有啲期望. 自助餐既熱盤在下不嬲都會Skip, 不過燒牛扒又真係好有驚喜, 換個角度諗, 咁既質素出面賣緊百幾二百蚊, 喺度食3-4塊都叫可以“回本” (啊Q精神一下吧…) 至於甜品, 高質素既一般野囉 (你當係讚吧~)自助餐除左要求味道, 款式多寡更加緊要 (呢個係自助餐精髓吧 – 量夠多, 蟻多摟死象), 雖然呢度放野食既area唔大, 但都比想像中多款式. 估計原因係食客唔多, 所以每款野食放少少出黎都夠, 所以夾埋夾埋都有成百款野食.服務COMMENT半島既服務質素不嬲都冇庸置疑, 今次亦無例外, 當然, 十隻手指有長短, Gaddi’s既服務的確比呢度仲要高幾班. 不過有兩個位可以再改善一下:1. 友人唔習慣放袋喺地下, 同時又唔想擺落背脊頂住晒, 所以無奈放左喺枱面, 雖然個袋唔大, 但侍者應該留意到, 唔駛在下主動問先拎多一張櫈過黎.2. 在下望左個酒牌都差唔多成8-10分鍾都簡唔落手, 理論上應該係遇到疑難, 不過好似冇侍者主動黎拯救在下…服務叫做有少少瑕疵啦, 唔係咩嚴重野, 除此之外每位侍者都好專業同細心, 見在下想調個位, 都迅速走過黎幫手.環境COMMENT首先要一讚係張枱四正大方, 粗略估計有1.5米乖乘1.5米, 足夠四個人用, 大到在下同友人坐對面都覺得有點遠, 故此在下主動調位, 轉坐另外一邊, 傾計都容易好多.地方闊落, 枱同枱之間既距離總美fine dining 格局 (諗番起喺洲際酒店食自助餐, 啲枱密到以為你喺度搭緊隔離張枱)雖然我地張枱唔喺main dining area, 並且匿埋左喺一塊牆後面, 冇左個靚景 (其實都唔係咩景, 只係日光日白既街景), 但變相換左個安靜既用餐環境番黎, 唔會有其他食客喺附近走黎走去. Again, 再次展現半島強項: 高質客人. 雖然餐廳冚full, 但一啲都唔嘈, 而且客人都well dress, 冇咩細路, 連年輕人都少見, 黎親都係著得身光頸靚既客人, 冇話會見到背心短褲踢拖既大叔 (當然, 主要原因係餐廳有Dresscode 要求: Smart Casual). 另外仲有幾枱西洋人同東洋人, well, 當在下膚淺吧, 在下覺得成件事好elegant~ 出去拎野食, 大家都好禮讓, 絕對唔會見到你爭我奪, 推拉碰搶既情況出現.以自助餐餐廳既用餐環境黎計, 半島酒店The Verandah應該難逢敵手!抵唔抵食?如果剩係計野食, 在下肯肯定可以講, 唔很抵! Lunch 兩條友俾左兩千五, 真正食落肚都唔知有冇五舊水 (枝酒已經佔左兩舊水), 咁既價錢可以去任何一間米芝蓮星星法國菜享受真正既fine dining, 而且仲有得找添! 不過, 講句實話, 在下並冇針對半島The Verandah, 只係在下從來冇覺得有Buffet係抵既.之不過, 咁耐冇食過buffet, 久唔久黎一次係ok既. 重點在於心態, 如果真係打算黎食到回本既話, 在下拍心口保證, 你扣兩次喉都唔會食夠數. 但倘若跟在下一樣, 志在同友人開心下, 坐得舒服又有琳琅滿目唔同種類既高質美食, 靜靜地嘆下紅酒, 唔駛用神去享受藝術品一般既菜式, relax~ 純碎輕鬆一下, 咁兩千五百又好似唔算話太離地, 呢啲就係所謂既境界~ 正面諗係豁達, 負面諗係啊Q, 在下係屬於仲有半杯水既人~食飽飽, 真係飽到上心口… 同友人去睇戲, 薩利機長呢餐飯, 亦都代表友人轉工成功. 由alibi 到 plat du jour, 最後半島, 都差唔多成個半月~在此僅祝友人喺新公司一帆風順, 平步青雲! 等大家考埋車牌後, 一齊自駕去轉日本富士山自駕遊, 食下真正既日本菜!!…Read More

First thing first~ 想喺呢度趁機同攝影師友人 R. Lee講聲多謝, 幫呢餐飯影左咁多咁靚既相, 成功地將最完美一刻定格~ 望住啲相在下覺得好慚愧, 同在下平時影果啲真係天與地… 事後佢仲要懶謙虛話今次已經影得唔太好, 嘩! 真係難聽過操口… Any肥, 在下由衷感謝!由於之前一直忙碌, 執筆寫呢篇野既時候餐飯已經過左三個月, 所以記憶不再猶新~ 唉, 由小學到而家都相信同一個大話: I can remember it, I don’t need to write it down~ well~ 咁咪瀨野囉~ 真係鬼記得咩… 點都好… 在下盡最大努力勾起回憶.<餐廳來頭> 先簡介呢間野, 有飲食界奧斯卡之稱既Restaurant Magazine 50 Best Restaurants 喺在下食飯前幾日剛剛出爐, 成個香港就只有Amber上到榜, 仲拎埋全球第二十名, 算得上係全香港排名第一既餐廳, 呢啲咪就係叫傲視同儕囉~ 的確, 在下叫有福氣試過香港大部份高級法國菜: Pierre, Spoon, Caprice, Gaddi’s, Robuchon, 比起佢地, Amber喺食物呢一個環節真係拋離佢地一大段距離 (Robuchon 可能近少少)…<用餐簡介> 利申: 除左食客身份, 在下仲帶著 "Ex - Intern" 既身份黎幫襯, 所以在下唔排除餐飯既Review多左主觀因素同私人感情, 咁係咁架啦, 食野本身就係一樣好主觀既野黎, 係有偏見架啦~未知巧合定有心, 餐廳安排左全餐廳最靚既枱俾在下, 角位枱四人梳化, 坐得舒服又夠私隱, 在此感謝Amber既細心安排. P.S. 其實餐廳每張枱都唔錯 (枱夠大而且枱同枱既距離好充足), 絕對唔會遇上 “屁屁位”, 只係十隻手指唔會一樣長. (屁屁位慘痛經歷請參考灣仔福臨門既Review),<叫野食>逢禮拜六日同公眾假期既Lunch就只有一個menu - Weekend Wine Lunch (6道菜配4杯酒既套餐), 雖然睇住佢由$600幾加到而家既$900幾, 漲價超過5成, 不過諗深一層, 一千蚊唔駛就食到 "全港第一", 都算抵既! (老實說, 如果喺樓上果幾間法國餐廳叫埋酒, 其實價錢都同呢度睇齊, 或者仲貴啲添~)6道菜套餐包一道前菜, 一道Middle Course, 一道主菜, 芝士拼盤, 再加2款指定甜品. 餐前仲有幾款小食Amuse Bouche, 加上源源不絕既自家製面包, 最後仲有petit four 同埋咖啡茶, 其實係好多野食, 一千蚊per  head一啲都唔算貴. 另外要注意用餐時間, 咁樣食法冇2個鍾都走唔到… 其實2個鍾係minimum  (在下足足食左三粒半鍾)<FOOD COMMENT>Menu: Weekend Wine Lunchprice: $928 per personBread Basket面包籃好味指數: 4.5/5大約有三至四款, 試左Baguette 同Sourdough 薄脆, 配埋法國牛油, 味道還不錯~ 可惜既係已經見唔到在下最心愛既olive focaccia, 想當年在下做intern, 都不知偷食左幾多個~ 最後完左intern後肥到啊媽都唔認得…但都係果句… 若論Bread Basket, L’ Atelier de Joel Robuchon 贏晒, 仲要連車尾燈都見唔到果隻…Amuse Bouche 好味指數: 4.5/5送既敬菜一共有四款, 一坐低侍者就奉上一杯烏龍茶fusion tea, 用黎清一清口腔, 定一定神, 至於味道? 咪係烏龍茶囉~ 呵呵~緊接住仲有雞蛋仔, 芝士餅 (呢個好好味, 因為芝士香實在太澎湃了, 喺口中久久不散), 同埋什菜脆塊. 不過在下仲係懷念以前既名物 – 鵝肝珍寶珠, 個個對佢都有讚無彈, 講笑者, 點會無彈, 彈咩? 彈每人一粒唔夠喉囉!!! 但近年已經不見其踪影了, 在下強烈要求俾佢復出!!!AppetizerOyster (推薦!!!)好味指數: 10/10前菜四簡一, 本身想試一試新菜式kohlrabi (取代左以前既另一個名物- sea urchin), 不過舊同事極力推介呢個oyster菜式, 咁人地誠意推介, 在下冇理由唔試架?菜式做法特別, 上到枱見唔到隻蠔, 碗中剩係有一塊綠色薄冰, 上面仲 “吱”左少少醬汁. 原來寶物沉冰底, 食客需要將塊冰整碎然後撈埋隻蠔黎食. Bite Size蠔既質素唔駛多講, 鮮甜清爽, 帶輕微既海水同金屬味, 靚野嚟! 配埋青蘋果薄冰既清香同冰冷感覺, 成件事超級refreshing, 味蕾當堂醒晒!Wine Pairing: White Wine - Sauvignon BlancMiddle CourseCuttlefish - a la carbonara with quail egg yolk, charred pearl onions, smoked alsatian bacon (推薦!!!)墨魚 – 卡邦尼汁配鵪鶉蛋黃, 珍珠洋蔥, 煙肉好味指數: 10/10Middle course 依然係海鮮菜式 - 墨魚. 又係神龍見首不見尾, 望落去又係連一隻墨魚都見唔到, 剩係得啲扁意粉… 而呢個就係重點, 墨魚不見黑魚, 意粉不是意粉, 有點玄吧? 因為佢啲扁意粉係用墨魚做架!第一次接觸呢個概念係細細果睇卡通片既時候, 有套野叫中華一番, 主角劉昴星打大佬其中一關既考題- 麵 非麵, 當時佢用鯰魚去做呢道菜式. 呢種咁特別既做法在下食過3次,  第一次係喺威尼斯兩星餐廳MET, 卡通片情節首現眼前, 驚喜萬分, 亦懷念至今. 第2次係喺東京既TAKAZAWA, 果次啲“麵”就唔係用魚整, 而係用新鮮帶子, 味道鮮甜無比, 唯欠 al dente既口感. 而今次喺Amber則用上墨魚, 補番彈牙感覺, 嘴嚼之時亦滲出淡淡墨魚味. 正正正!卡邦尼汁泡泡偏向淡身, 旨在吊味同豐富層次, 係一塊出色既綠葉, 襯托主角墨魚面而非搶佢戲份. 配菜仲有超甜既烤洋蔥同罪惡煙肉, 認真講句, 真係好味到暈底… 唯一要彈既係份量… 法國菜真係法國菜, 完全唔夠喉…題外話, 當時套卡通片既主角, 係用魚肉包住墨魚芯黎整”麵”, 口感鮮味同時拎滿分, 不過… 現實還現實, 卡通還卡通…正當在下陶醉緊喺呢道麵 非麵既時候, 友人突然爆左一句... 咁咪即係四海吱吱魚肉面啲朋友... 我頂... 美麗幻想瞬間幻滅, 成件事cheap 晒.... 笑左Wine Pairing: White Wine - ChardonnayMain CoursesPigeon "au snag" - breast pan roasted on it carcass, leg & cereal "cromesqiu"; chiogga beetroot cooked and puree; pigeon jus with vadouvan spices  (推薦!!!)法國乳鴿 (煎鴿胸, 鴿腿炸球, 紅菜頭)好味指數: 10/10在下曾經講過, 倘若去一啲高級既法國餐廳, 如果餐牌上有飛禽類 (例如鴨, 鴿, 鵪鶉 – 雞除外…), 佢地通常都會係在下既首選, 因為最易俾到驚喜, 其次會簡羊架.侍者一放碟野落枱, 已經吸晒睛! 真係靚到 “dum” 一聲, wow, it is an Art Piece!!! 呢啲時候要用洋文先表逹到內心既喜悅~鴿胸煎到恰到好處, Medium rare, 而鴿腿肉就切成肉碎, 炸成一個小肉球再加少少穀物, 配菜為一系列既紅菜頭菜式. 先講隻鴿, 食之前點少少鴿肉汁, 香味同味道瞬間提昇, 而亮點係個texture, 嫰到一個點令人難以相信食緊既係胸, 呢啲就係在下所講既驚喜, 遇到好食既野好多時候會問How – 佢點做到架呢? 但去到呢啲級數, 係會轉問Why – 點解會咁幸福? 相比起Petrus 既雞胸, 呢度處理得好幾條街. 切左少少鴿胸俾友人, 佢都讚不住口, 然後就開始失落, 後悔簡左牛而冇簡鴿.由於胸肉光茫太強烈, 已經覆蓋一切, 剩低既鴿腿球同配菜在下已經零印像.Wine Pairing: Red Wine - BaroloVeal Shank - braised on the bone, crispy beef head with green asparagus & black winter truffle potato mousseline 燴牛仔膝肉, 炸牛面珠肉, 露荀, 及黑松露薯蓉Supplement: $138友人既主菜要額外加錢, 但似乎出黎既效果反而冇咁好. 輪賣相, 牛仔輸比隻鴿一條街. 至於味道, 在下今次好乖冇打稅 (反正自己既主菜靚咁多, 呵呵~ 無謂落井下石), 根據友人描述, 味道不過不失, 没有驚喜.CheeseFrench Cheese  (推薦!!!)精選法國芝士好味指數: 10/10一共有五款芝士, 芝士切得慷慨, 先記一功! 侍者好有耐心介紹每一款, 比如黎自法國邊一個地區, 用牛奶定羊奶整, 之類之類, 可惜在下記性愈黎愈差, 當佢介紹到第三款既時候其實在下已經唔記得第一款係咩野, 總之去到最後在下問番侍者應該由邊一隻食先, 確保順序就好了.味道由淡到濃, 由親民到難頂, 而個range都幾闊 (難頂果隻真係有啲哽~), 在下係芝士控, 隻隻都咁欣賞, 每啖都津津有味, 而友人食到第三款就舉白旗, 剩低既當然係收歸在下肚腩~以前呢度serve芝士會推架車仔出黎, 喺你面前慢慢切, 或者咁做真係太費時失事, 而家切好晒放上木碟直接落枱. Anyway, 另外有樣野要讚一讚, 唔知係pat pat撞棍定餐廳如此細心, 用Sharing Plate黎serve呢道芝士. 大家都知道香港食客並非個個都係法國芝士既粉絲 (友人就係好例子), 如果每人自己一碟, 33%會出現一方食唔晒夾俾其他人, 33%會己所不欲, 勿拖於人然後自己哽埋佢, 最後苦了肚皮, 唔嘔當贏, 33%係暴殄天物… 而家擺喺中間大家分享, 淺嚐也可, 鯨吞也可, 悉隨尊便~DessertHeirloom Carrots - confit with & orange blossom honey, carrot cake; segments, zest, sorbet of blood orange復古蘿蔔 (蜜糖烘煮, 蘿蔔蛋糕, 血橙雪皅)好味指數: 8/10又係一系列用同一種食材整出黎既菜式 (似乎而家好興呢種玩法) 今次主角係蘿蔔, 賣相係精美既, 成碟野有暖有凍, 加上唔同煮法有唔同texture, 又蛋糕又雪皅又puree, 成件事俾人感覺好豐富.Opals - white chocolate cream with raw grated, preserved & jel from lime; crispy tuile with line custard & cold infused coffee ice cream白朱古力忌簾配青檸啫哩, 咖啡雪糕好味指數: 8/10法國菜, 埋尾一定要有朱古力, 對在下黎講, 就好似跳水要壓水花, 冇話一定要有, 但冇既話唔完美囉~ 拎唔到十分囉~ 話之你之前喺空中前空後空翻左幾多度.可惜既係在下麻麻地白朱古力, 當在下膚淺吧, 在下認為白朱古力唔算係朱古力, 正如熊貓唔係貓一樣… 仔細味道在下真係唔係太記得, 依希記得算係好食既, 只係少左朱古力應有既可可香味, 水花壓唔夠, 遺憾是也.不過友人唱反調, 十分欣賞呢個甜品, 話白朱古力搭青檸搭咖啡呢個mix and match特別得黎又夾得好好味!Petit Four - Green Apple Sorbet; Chocolate Gananche; Raspberry Cheese Tart; Nougat美點雙輝 – 青蘋果雪皅, 朱古力撻, 紅桑子芝士撻, 鳥結糖好味指數: 5/5埋尾既美點雙輝都唔馬虎, 先上青蘋果雪皅, 為一餐咁full既午宴清下味蕾. 再黎就係朱古力漿配紅桑子 (香濃朱古力味, 唔會過甜), 紅桑子芝士撻 (餅廚細心喺粒紅桑子裏面放左少許糖漿, 食落去唔會過酸), 同埋鳥結糖 (因為有大量既開心果同其他果仁, 好香好好食, 又唔太痴牙, 正!)<DRINK COMMENT>Wine Pairing套餐一共包左四杯酒, 坐低一杯香檳, 前菜生蠔同middle course墨魚面各配一杯白酒, 而主菜就跟左杯紅酒. 每款酒都經過酒師精心挑選過, 質素絕對有保證, 而佢地仲match到落啲餸度. (Well… wine pairing其實係一種好高深既野, 好可惜, 在下連皮毛既知識都冇, 真係識條毛咩… 不過, 起碼你食完舊野, 飲啖酒, 唔會覺得 “嘩~個味道咁怪既???” 咁在下當pair到架啦~ 最最最記得係杯紅酒好好飲, 黎自意大利既Borolo, 單獨飲已經覺好正, 同隻鴿更加襯到一絕.Sparkling Water - Saint. PellegrinoPrice: ~CappuccinoPrice: included由於唔係由好朋友F. Cheung所沖, 所以杯野飲只屬聊勝於無水平~<OVERALL COMMENT>野食野飲COMMENT食物味道, 賣相, 份量, 都無可挑剔, 真係連喺雞蛋裏都剔不出骨頭, 由前菜到甜品都係高水平之作, 而生蠔, 面非面, 同乳鴿都俾到驚喜! 唯一既遺憾係甜品唔太啱在口味, 唔係彈佢味道, 只係純粹跟在下磁場唔夾. 以食物質素黎講, 唯一可以同Amber爭長短既, 在下認為只有 L’ Atelier de Joel Robuchon, 剩低既例如Caprice, Gaddi’s, Spoon, 等等等, 真係可以用 “望塵莫及” 黎形容.環境COMMENT貴為兩星米芝蓮同香港第一, 用餐環境當然冇得輸, 坐得舒服裝修靚不在話下,  天花板果兩千幾枝鋼管更彷如一件大型藝術裝置. 枱同枱之間既距離感十足, 雖則全院滿座, 但一啲都唔覺吵鬧.唯一小小小小缺憾, 適逢夏季7月, 放喺餐廳既鮮花無可避免地有蚊滋, 唔多, 一千零一隻咁大把, 亦都係只係擾攘左大概10幾秒, 不過, 呢啲事情唔應該會喺 “香港第一” 發生.服務COMMENT唔係賣花讚花香, Amber既服務一向屬於高水平, 細心, 禮貌, 又有笑容, 縱使佢係一間高級食府, 同樣能夠令你感到好warm, 一啲都唔拘緊. 值得讚下既係兩位外籍人士 – Restaurant Director 同 Assistant Manager ,前者風趣幽默, 後者笑容滿分, 為呢餐飯添加不少色彩.唯一少少defect係另外幾位侍者可能比較green, 冇咩直接deal with客人既經驗, 所以喺介紹菜式時有少少緊張, 講到甩甩咳咳 (同以前既在下一樣, 第一次出大廳同客人講解菜式, 腳震又口窒, 所以在下表示理解.)戴定碩盔先, 並唔係手指拗出唔拗入, 倘若平心而論, 半島Gaddi’s 同 L’ Atelier de Joel Robuchon 既服務的確比Amber做得更出色, 更加能夠將 “Professional” 呢隻字演繹得出神入化.   值唔值?二千三百大洋喺香港食餐晏可能有大把選擇, 但要食物質素咁高, 杯酒又靚, 又有名氣既餐廳, 真係好難搵到. 所以呢度既lunch係超值!最後, 再次多謝友人R. Lee充當攝影師, 拎左部成皮幾既單反黎赴會, 成餐飯又影相又拍片, 渣機又係佢, 旁白又係佢, 食客又係佢, 真係自編自導自拍自演~ 些些~ …Read More

月尾regular飯聚, 但求餐廳近公司, 有杯酒飲吹下水, 坐得舒服就OK, 食物質素屬其次, 最緊要傾到計, 等大家吐下苦水, 所以就拍板簡呢度~<FOOD>Menu: a la carteAssorted Cold Cuts Platter (with German Specialty Meats, Marinated Cheese, Cheese Spread and Bread Rolls)特選德國凍肉拼盤配醃製芝士, 德式芝士醬及面包Price: $182好味指數: 3/5用黎襯啤酒既, 當然最好就係小食拼盤, 一共有4-5款凍肉, 每款都幾好味, 帶少少咸香 (of course, 你唔拎佢同parma ham 或者iberico ham 比… 無得比的). 另外有個芝士醬用黎搽面包, 可以 “掠”一”掠”個胃, 咁就唔會咁易醉啦.玻璃杯裏面裝住啲芝士cube, 味道比較light, 空口食都唔會覺得太咸, 夾埋啲凍肉食就認真惹味, 食完一塊芝士, 飲一大啤酒, “Urch” 番啖氣出黎, 正! 爽!German Sausage Platter (with Bralwurst, Regenbuger, Cheese Kralner and Nurnberger Sausages served with Herb Potato and Sauerkraut德式香腸拼盤配香草燒薯及酸椰菜Price: $228好味指數: 3/5黎德國餐廳梗係要叫德國腸啦 (因為唔叫腸都唔知叫咩好了…) 腸拼盤裏面total有三款腸, 4大3小, 最面頭既係香草豬肉腸, 下面有三條牛肉腸 (2條有芝士, 1條係plain), 然後仲有3條紐倫堡腸. 倘若問在下味道如何, 老實講… 真係款款差唔多, 腸仔味道囉… 係果兩條有芝士既牛肉腸印像深刻啲, 因為勁 “漏”, 食左半條都即刻濟晒. By the way, 3個人食7條腸, 其實真係幾飽…Roasted Pork Knuckle (with Mashed Potatoes and Sauerkraut)秘製德國鹹豬手配香滑薯蓉及酸椰菜Price: $218好味指數: 3.5/5又係德國餐廳必叫菜式 – 烤豬手. 豬手其實可以簡蒸或者烤 (不過99.99%既人都係簡烤, 香口好多嘛, 在下當然隨波逐流~) 上到枱侍者好好人幫我地切開晒, 仲細心問我地駛唔駛切之前俾我地影下相. 豬手燒得算唔錯, 皮脆, 不過仲爭少少先去到肉嫰. 豬羶味點都會有少少, 不過只要陣味唔太濃都當贏 (人總不能要求太多吧)~ 大啖肉, 連埋塊皮, 連埋塊皮下脂肪, 三者一齊擺落口, 然後飲啖啤酒浪下口~ 痛快是也~ 不過每食完一啖都有罪惡感湧現… 對唔住six packs…配菜有酸菜同薯蓉, 正常野, 冇驚又冇喜, 用黎清下味蕾, 唔駛啖啖都係肉咁heavy~<DRINKS>Erdinger Dunkel 3 Litre Draught BarrelPrice: $321 ($425 x 75% Happy Hour)好味指數: 3/5在下本身打算成餐飯每人飲最多1-2枝啤酒, 叫做有啲野飲下冇咁口乾, 點知同事一坐低已經諗緊一係3L或者5L (因為佢被可以用木桶上所吸弔住), 果然… 平時劈開訓練開真係唔同啲, 在下呢啲夏蟲是不能語冰.如果點5L, 就只有一款簡, 仲會係清啤 (淡味啲呱), 而3L裝就有幾款簡, 同事E. Chan簡左隻比較濃味. 的確冇簡錯, 飲落麥味幾香, 但一致認為唔夠苦, 酒精感覺唔強, 簡單黎講者係冇咩料到~Keiler Pale WeissbierPrice: $49 ($65 x 75% Happy Hour)Keiler Dunkles WeissbierPrice: $49 ($65 x 75% Happy Hour)KellerbierPrice: $49 ($65 x 75% Happy Hour)同事意猶未盡, 趁Happy Hour 完之前叫多三枝for sharing, 不過在下飲完果3L已經feel到有少少酒精上腦, 為免酒後吐真言 (你知啦, 公司同事面前, 總要有點保留既…) 所以呢三枝啤酒就跟在下無緣了~<OVERALL COMMENT>野食COMMENT肉~ 全部都係肉… 真係好多肉~ 成件事好Meaty. 整體黎講野食算幾好, 不過都係果句, 今日之gathering既重點不在於食, 所以當佢合格. 啤酒環節, 可能咁啱3L果隻唔係我地既口味, 所以令餐飯有啲啲污點, 反而臨叫果3枝啤酒, 似樣好多. 下次咪再貪3L/ 5L 果啲可以成桶上, gimmick野黎嫁咋, 個桶又唔俾拎番屋企, 都係穩陣啲叫番枝娤吧.值得一讚會係份量十足, 我地三個大男人, 去到最尾都食唔晒啲野食, 個腸拼盤都淨左少少. 如果下次兩丁友黎, 真係要小心啲叫野食)服務COMMENT特別想喺度多謝負責我地果位waitress, umumum, 就係身材比較豐滿果一位. 無限既笑容, 講解又清晰, 對餐牌酒牌又熟, 問親佢啲問題基本上都答到晒. 最緊要係佢有禮貌同耐性, 在下同同事們不停問埋啲低質問題, 佢都好樂意一一解答.除左佢之外, 其他侍者都OK有禮貌. 亦都算細心, 唯一唔好又係唔記得講88~環境COMMENT餐廳分左室內室外, 由於早訂枱 (早既意思都係指兩日前), 幸運地被安排坐喺室內角落既四人梳化枱. 由於室內比較寧靜, 加上其他客人都係斯文type, 所以我地三丁友傾得好舒暢… obviously, 我地係成場最嘈果張枱, 加上同事們有少少酒後失言, 聲量都大左, 真係失禮晒了…注意, 如果坐餐廳出面就認真麻麻了, 又多人, 又嘈, 張枱又細, 幾次去廁所經過都覺得佢地慘, no good~抵唔抵食?3個人, 千二蚊埋單, 三碟肉同埋接近5L既啤酒, 真係飲飽食醉, 如果剩係計野飲野食就未必係好抵, 不過我地足足坐左人地差唔多四個鍾 (由6點45分到10點半), 一路吹水吹到人地Last Order, 咁又好似抵番晒~ASIA MILES呢度係Asia Miles 餐廳, 每2蚊可以儲1里, 不過如果用左Happy Hour Discount, 咁就冇得儲Asia Miles, 計完條數之後 (一係賺多六百里, 一係慳$155), 咁梗係慳錢為上啦~快樂時光過得特別快, 飲酒吹水更加快, 不經不覺已經霸左人地張枱成4個鍾, 前面張枱都換左2枱客, 我地口水仲未乾. 不過, 反正明天番公司又見啦, 所以今晚唔駛吹到咁盡~ 下個月再黎~…Read More

終於到友人請食飯啦, 等到頸到長埋, 對上一次一齊食飯已經係年半之前既事情 (在下請既三星米芝蓮餐廳 - 廚魔). 今次友人提議到半島酒店吉地士食番餐法國菜, 原因係佢對傳統法國菜情有獨鍾 (者係唔要泡泡, 唔要份子料理果啲整色整水既野), 不過入到餐廳坐底之後侍者告之大廚已轉, 而家由Xavier Boyer睇場, 佢之前喺robuchon做過, 主打 “Modern Classic” (佢自己喺網上係咁寫架, 唔係在下老作~), 友人聽到似乎有啲失落, 擔心會見唔到 “傳統” 呢兩字.而在下則同友人調轉晒, 識在下既朋友都知在下鍾意搞呢搞路, 冇果樣整果樣, 幾年前去過Gaddi’s, 對佢貼晒地既法國菜冇咩大好感. 而家大廚轉左, 上網睇相見到啲菜式賣相, 似乎行緊Contemporary French路線 (在下既最愛), 所以滿分期待~餐廳雖然屬於酒店, 不過入口並唔係喺酒店入面, 佢太高級了, 高級到喺酒店側邊有個私家入口同專用電梯~<餐廳來頭>首先解釋下: 點解要花時間花氣力講下餐廳來頭? 因為第時你地帶另一半黎呢度食飯, 人地問你點解要簡呢間餐廳, 呢間餐廳有咩咁好既時候, 你唔駛口窒窒答, 呢間..餐廳..好..好好囉, 而且知名度高, 又出名, 最緊要多人識… 之類既低能答案~ 人類喜歡聽故仔, 食飯之前介紹下餐廳, 除左減少dead air, 仲暗地裏表逹出你係有做過功課, 唔係求3x3其簡~餐廳大有來頭, 論資排輩如果佢認第二, 無人敢認第一, Gaddi’s 如無意外係全香港最歷史悠久既法國餐廳, 1953年開業至今, 足足63年, 大過家嚴家慈了… 雖然餐廳 “上左年紀”, 但估計有不停翻新, keep住咁靚咁新淨, 唔會見到一絲疲態, 既然係咁, 佢可以點表逹佢德高望重既地位呢? 就係佢部專屬電梯啦~ 電梯依然採用油壓式, 咩叫油壓式? 唔知唔緊要, 總之就係好鬼慢, 由閂門到上一層 (冇錯, 只係由地下到一樓), 足足用左半分鍾有突.. 如果喺IFC, 半分鍾已經唔知去到幾多十樓了~餐廳另一特式就係佢既dresscode要求, 黎食夜晚既男士們一定要著西裝褸, 咁 “傳統” 既要求, 香港應該只此一家. 中午就casual啲,  唔駛西裝褸, 不過business attire係基本野 (者係最好都係恤衫西褲啦). 不過, 凡事總有例外, 而例外則不適用於凡人… 當日餐廳有一位非凡既座上客 - 無線電視前高層 (搞飯局果個呢), 佢朋友似乎著果對係reebok黎架喎, 嘜原來reebok都有出皮鞋架咩?? 饒恕在下孤陋寡聞… (又或者係在下眼花~哈~)而呢度另外一個熱話就係全香港咁多間高級法國菜, 唯獨Gaddi’s 拎唔到米芝蓮星星… 當年 (都已經係7 年前既事, 果時啱啱出米芝蓮) 在下黎呢度見工搵summer placement,  去到last round 見F&B Director, in 完之後佢問在下有冇問題想問, 羽翼未豐既在下不諱直問: 你地半島咁多間dining outlets, 一粒星都拎唔到, 你點睇呢? 個Director氣定神閒, 反問一句: 當添好運都拎到一粒星, 你覺得呢粒星仲有咩咁緊要? 在下當堂被霸氣嚇窒, 無言以對~至於最後in 唔in 得成?? 咁串嘴, 咁梗係得啦, 不過在下無做~ 去左Amber,  哈哈, 因為人家有兩粒星, 而且仲識到今日一齊晉餐既友人添~<叫野食>好, 入番正題講番餐飯, 上到餐廳即刻有人黎greeting, 帶領入座後指定動作: still or sparkling, 然後就奉上餐牌. Lunch Set 一共有兩款, 一款係degustation menu, 索價過千per person, 當然就唔係今日既目標, 另一款就係weekend lunch menu, 4 個courses 包咖啡茶, 每位盛惠$618.<FOOD>Menu: Weekend Lunch Menu (4 courses)Price: $618 per personAmuse Bouche – Anchovy Stick, Parmesan Biscuit, Confit Chicken開胃菜 – 鯷魚面包條, 巴馬臣芝士餅乾, 慢煮雞粒好味指數: 4/5餐廳送既, 味道還好, 尤其以巴馬臣芝士餅乾最好食, 芝士味最能引起食慾, 連剛喺一個鍾頭前食飽早餐既在下都忽然覺得肚餓.Bread and Butter面包籃好味指數: 4/5一共有三款, 每張枱都有一舊white brioche, 勁香牛油味…. 不過有啲似我地食開既排包. 另外有侍者拎住個細細面包藍周圍 “兜售” – 賣火柴的少女個friend, 賣包的少男~ 包籃裏面有baguette 同 onion and bacon roll, 兩者望落都幾吸引.不過, Baguette 不嬲都唔係在下杯茶, 所以在下冇食到, 反而個onion and bacon roll好驚喜, 其實個包望落去都已經知道會好食, 剛焗起冇耐既酥皮, 保持微暖而同時散發住香噴噴既牛油味, 放落口見真章, 酥皮做得靚, 夠薄夠脆又唔會食到成口油, 加埋邪惡既煙肉同惹味洋蔥, 真係搵唔到唔好食既理由.之不過, 若然要比較Bread Basket, 講多一次, 全香港最掂既包籃喺置地既robuchon… 款式味道真係贏其他餐廳數以街計 (一條街既距離已不足以形容) 1st coursePuy lentils in lightly spicy dressing served with sliced foie gras and crunchy vegetables蘭度豆配鵝肝片及蔬菜好味指數: 8/10食完開胃菜同面包就正式開餐, 前菜二簡一, 可以簡煙三文魚同蘭度豆, 在下總覺得喺法國餐廳叫煙三文魚唔太抵, 自己喺 “城市超級” 都買得到, 雖然蘭度豆都唔係咩吸引人之選, 之不過睇中佢有 “Foie Gras” 喺呢度菜式入面, 話之佢slice上定得一至兩片, 喺法國餐廳叫鵝肝唔會死錯人.上到枱, 賣相唔多吸引, 圓形既豆俾一個黃色六角形框住… 咩料… 完全唔知想點, 真係藝術呢啲野, 在下識條夏秋冬~在下對蘭度豆本身麻麻 (又唔係話憎既, 唔係特別鍾意囉), 淋身既蘭度豆加左啲碎杏仁, 咬落去有層次好多, 至於放面既有唔同種類既蔬菜, 最搶眼就係紅radish同黑radish (紅黑紅黑, 果然有Robuchon既影子...), 予人清爽口感. 亮點依然係鵝肝 (其實係鵝肝醬), 香滑味濃, 正! 足以搶晒樓下豆豆既戲份.Scottish smoked salmon and green bean salad with tomato coulis蘇格蘭煙三文魚配青豆沙律及蕃茄蓉友人既前菜, 賣相比在下既好, 不過無得試食, 不予置評~2nd coursePoached and deep-fried pig trotter with a classic ravigote sauce (推薦!)炸豬腿配法式傳統芥苿醬好味指數: 9/10第二道菜可以簡呢個炸豬腿或者粟米湯… 有咩人會簡粟米湯? 屋企都有金寶啦… 所以在下同友人都簡左豬. 一上枱個樣依然唔太討好, 成舊吉烈豬柳, 咁邊係高級法國菜應有既賣相? 不過今次就豬不可以賣相, 水不可以斗量, 吉烈皮炸得夠薄夠脆, 咬落唔油, 裏面既豬肉餡, 肉味濃郁, 一啲羶臭味都冇, 加埋少少帶酸同微辣既mustard sauce, 高質是也, 媲美東京銀座一星吉烈店Katsuzen既出品!伴菜仲有1.5隻鵪鶉蛋 (開邊上), 蛋上面放左一pat用鵪鶉蛋黃整既mayonnaise sauce, 咁整法又真係幾好味喎… 不過, 佢好似同隻豬冇咩關連, 隻蛋搭枱渣嘛…3rd course (main)American sirloin with horseradish and seasonal vegetables (回水!!!)美國西冷配時蔬好味指數: 3/10呢道菜只有一個字黎形容: 差!侍者推介呢道西冷同帶子, 帶子被友人叫左, 咁在下唯有叫西冷. 要求Medium, 出黎對板, 不過味道就唔對板啦, 仲好意思話係推介菜式. 先講賣相, 六“粒”西冷肉圍住棵菜, 家陣中秋應節六星伴月嗎? 致命傷係肉粒上面啲青紅黃椒, 令到成件事好cheap…在下以為樓下啲茶餐廳先會咁做, 估唔到喺度出現, 難聽啲講句, 唔係presentation差咁簡單, 而係冇presentation 可言.味道, 比賣相更差…唉… 牛味淡薄, 唔juicy, 唔tender (咬落去仲有少少韌), 斃上加斃係on side既肉汁, 諗住淋少少落去救下火, 俾番啲味道佢, 點知係火上加油, 肉汁過咸, 仲衰過唔加… 失望到一個點…或者以上既評語係harsh左啲, 佢亦未至於去到 “俾汪汪食” 既級數, 但在下完全冇預過會喺半島Gaddi’s遇到咁劣質既一道菜. 任何菜式都有失手既機會, 在下明白, 不過喺主菜環節失手係大忌中既大忌, 足以ruin左一大半dining experience.Pan-fried Hokkaido scallops on fregola sarda pasta risotto, lobster emulsion with yellow wine煎帶子配意大利飯, 黃酒龍蝦汁友人既帶子主菜, 擺碟同西冷一樣, 又係6粒圍圈圈, 似乎大廚喺擺碟上已經黔驢技窮… 一讚既係portion, 足足有成6粒咁多, 友人做飲食業, 知道food cost大概幾多, 所以不禁大讚餐廳慷慨.在下有幸得以拖捨, 偷偷食左友人一隻帶子, 味道唔錯, 生熟程度啱啱好, 不過對比起在下喺petrus食果隻, 質素有點距離, 未夠香, 未夠甜. 而友人亦都係帶子愛好者, 佢話唔係賣花讚花香, Amber既帶子先係天下第一! size大呢道一倍, 鮮甜味更出, 同呢度比起, 就好似天堂與地獄... 冇...咁又冇爭咁遠, 天堂與人間啦~4th course (dessert)Baked almond and plum tart with champagne ice cream焗杏仁布冧撻配香檳雪糕好味指數: 8/10甜品都係二簡一, 有呢個同雲尼拿慕絲簡, 在下一見到香檳雪糕隻眼就發晒光, 諗都唔駛諗就決定左. 個tart既樣依然走平實路線, 除左係多左幾條直昇機螺旋槳做裝飾. 至於味道方面, 撻皮夠light夠鬆化夠香脆, 布冧果肉帶點酸甜, 杏仁俾番啲咬口, 而亮點既香檳雪糕, 入口後酒香味隨即揮發, 令人上癮, 忍唔住一啖接一啖, 成件事十分美好!不過友人彈個擺碟唔夠user friendly, 個幾條螺旋槳好礙手礙腳, 令人無從入手, 在下則覺得冇咩大問題, well, 各花入各眼, 食野從來都係咁主觀架啦~Petit Four西式美點雙輝好味指數: 4/5埋尾peiti four, 最上面紅色果粒係熱情果(朱古力?? 在下都唔太肯定), 味道唔錯, 帶濃郁熱情果味道同酸味, 令人為之精神一振, 中間果粒完全冇印像… 最下面當然係呢度既招牌食物 – 朱古力 (今次品嚐既係古巴朱古力), 不愧為半島名物, 可可香味十足, 苦同甜味之間攞左一個好好既平衡, 醇香滑溜, 正~<DRINKS>Sparkling Water – BadiotPrice: $108Coffee or Tea - Double EspressoPrice: Included另一樣半島名物 – 咖啡. 如果想試真一杯咖啡, 不如試espresso, 濃縮之後, 優點缺點齊齊放大. 是故在下打孖上, 叫左杯double espresso, 反正都係試, 大杯啲可以試真啲嘛~其他review在下好少講咖啡茶, 因為都係正常野, 不過呢杯真係又要講一講, 咖啡味香, 甘苦同酸味既比例啱啱係在下杯茶… umum, 杯咖啡係在下杯茶…會唔會有啲亂… anyway,  一生人飲過咁多杯咖啡, 呢杯係其中一杯最還悏意的, nice!<OVERALL COMMENT>野食COMMENT野食好老實講, 真係中規中矩, 你話難食一定唔係 (個主菜西冷除外), 但你話好好味又似乎講唔過去, 食完成餐飯都冇咩邊道菜值得回味, 驚喜更加講唔上 (都算有既… 個主菜差成咁… 夠晒驚… 不過係驚嚇囉~). 在下明白餐廳走傳統路線, 雕龍雕鳳既賣相欠奉在下一早預左, 但餐廳既然知道唔行得偶像派, 咁就應該更加努力去做一個實力派, 用味道俘虜食客, 用味道彌補賣相既不足… 但而家睇又唔睇得, 打又唔打得… 大失所望.傳聞米芝蓮只會評食物質素, 環境服務一概唔睇, 倘若真的如此, Gaddi’s 連一粒米芝蓮星星都拎唔到其實一啲都唔難理解…在下喺可見既將來應該都唔會再次到訪, 但如果有日真係番黎, 希望唔會再帶住失望離開.服務COMMENT所謂相由心生 (意思即係樣好自然心地好… 在下係咁理解呢句成語的…), 所以, 樣, 係好很緊要的, 正如食神套戲話齋, 如果廚師樣衰既話, 食客望到都冇心情品嚐美食. 在下平時絕少對侍者本身既樣貌身材評頭品足, 始終呢啲係不能控制既factor (喺韓國食飯除外), 你總不能怪人地母親… 不過, 呢度既侍者真係又值得講下, 佢地好明顯係被精心挑選過, 在下唔敢講個個都係金城武, 但大部份都係黃曉明囉… 有咩理由十個有八個都差唔多成1米8, model身型, 著住套黑色西裝型到爆, 做咩者而家… 人家黎食餐飯, 而家搞到自卑晒…面就爆分啦, 咁裏呢? 半島酒店既服務不嬲都係屬於教材式, 每一位侍者都話到俾你聽咩叫 “專業”, 一舉手, 一投足 (介紹菜式, 放刀叉, 落餸, 收碟, etc…) 都俾到一種好 “pro”既感覺, 佢地既pro係pro到你feel到~ (絕無誇張成份, 真係贏其他五星酒店餐廳一大段距離). 笑容呢啲唔駛特別講, 個個都好似咬住果舊C朗既低能微笑神器黎番工, 無時無刻都掛住笑容, 真係想問, 唔攰嗎?細心既服務亦都係呢度既強項, 食完每道菜侍者都會問下岩唔啱食 (唔似得喺Petrus, 在下剩係食左一啖配菜就黎問你好唔好食, 叫人點答呢). 起身去洗手間會有侍者一路帶到去門口, 唔會係咁易指指下同你講 "男廁喺水牌果面".臨走時, 洋人經理埋黎say goodbye 送我地搭電梯, 仲好幽默咁同我地講下笑添, 之後在下同友人就懐著愉快心情, 含笑離開 (I mean離開餐廳…)環境COMMENT滿分之作, であります~ 法國宮廷式設計既裝修, 將 “雍容華貴” 呢4隻字演繹到淋漓盡致, 餐廳雖然得一層, 不過故意整多半層出黎, 外圍既餐枱高半級, 呢啲咪叫Layer囉~枱同枱之間夠空間, 加上當日餐廳唔算full, 所以享受左一餐寧靜既午膳. 值得一提係我地隔離有張大枱, 8丁友, 都冇話高談闊論, 個個顧身份顧儀態, 尊重自己尊重餐廳, 呢樣就係半島既威力, 入得黎既人都係ladies and gentlemen, 連客人既質素都manage到, 呢啲就真係叫高章. 而佼佼者係樓28樓既Felix, 縱使全院滿座都唔覺嘈… 或者大部份客人都係講緊洋文… well.. 大聲既洋文又好似冇大聲既唐文咁擾人, sorry, 但願冇衝擊到玻璃心.值得提下洗手間, 超乾淨超靚, 雖然唔似Felix用落地大玻璃, 冇左居高臨下向住九龍半島尿尿既快感, 不過裝修亦屬景點級 (呢個唔係講笑, 真係值得參觀, 唔痾都埋黎睇下啦喂~) 心諗, 如果office有啲咁靚既廁所就大鑊啦, 相信員工們絕大部份既時間都會係 “辦公時間”~抵唔抵食?倘若以整體用餐experience黎講, 係值既, 話晒在下都俾左個A grade (縱使野食唔太掂, 但服務同環境呢兩欄接近完美). 不過如果可以再簡 (類似呢個價位既話), 在下會簡Petrus, 環境同服務喺比呢度輸蝕少少少少少, 但野食好多多 (起碼人地既主菜 – 羊架 好味程度屬於感動級~)當然, 如果計 weekend lunch, 閣下又有多少少既筆直 (大約每人一千鬆啲啦), 在下誠意推介Amber 同 L’ Atalier de Joel Robuchon.友人而家喺一間準備新開張既餐廳打骰, 由餐廳裝修到廁所用咩品牌香薰都一腳踼, 煩惱辛苦自己知, 不過, 快樂同成功感亦都係, 在下講笑話佢搞緊真人版夢幻西餐廳~ 呢篇review出街時餐廳應該已經開業, 身為好朋友, 最大既支持就係去做座上客, 嗱~ 你講過架, 記得留定張靚枱同俾個好折頭啊~…Read More

餐廳剛剛開張, 所謂新屎坑特別香, 晚市6點開始, 5點15分就已經見人龍. 由於仲係Soft opening 中, 餐廳特意慢慢放人入去, 一路都唔肯坐爆間餐廳 (究竟係怕廚房應付唔掂定想造勢, 真係不得而知啦~), 最後在下同友人足足等左大概9個字先入到去... 幸好商場有冷氣, 如果喺室外?? 在下真係冇咁好耐性去排~餐廳算幾大, 應該可以容納100人, 在下同友人被安排坐喺餐廳中央一張長bar 枱, 枱中間有一條 "小運河", 不停有水流過, 喺食飯枱搞掂咁既野, 都算 "無果樣整果樣" 既俵俵者, 不過在下好欣賞~ 哈哈~ 由於坐喺 "上游" 出水處, 故此一路食就一路水聲潺潺, 叫做喺吵鬧人聲中有點自然清優, fabulous design!接過餐牌, 硏究左一輪, 發覺呢度都幾多野食, 意粉, pizza, 牛扒, 龍蝦, even甜品同野飲都有好多野簡, 真係花多眼亂. 菜式價錢大約100蚊左右, 倘算親民. 在下同友人唔多肚餓, 黎呢度只係貪新鮮, 所以就咁叫啲小食同野飲就算了~哈蜜瓜火腿五十蚊貨色, 當然唔會俾好靚既火腿你, 雖然香味欠奉, 不過油脂倘算充沛, 咬落唔會成口渣~ 蜜瓜爭少少, 唔知係唔係未夠熟, 甜度仲爭啲啲~焦糖雞翼友人叫既單骨雞翼, 一共八隻 (單骨 x 8 =  4 隻雞翼~) 除開每隻$13蚊, 都ok既~拆開左做單骨, 食落更方便, 雞翼無咩特別, 亮點喺個焦糖醬, 食落同蜜汁雞翼差唔多, 不過更為杰身, 惹味更多.冰搖咖啡在下叫既凍咖啡, 本身佢係冇奶既, 不過會落糖, 所以減緊肥既在下特登叫埋走糖, 同卡路里講拜拜~ (其實者係叫左一杯凍齋啡)杯野下面有乾冰, 所以一上枱就煙霧迷漫, 瞬間變左成間餐廳既焦點, 身邊食客都討論緊在下究竟叫左啲咩野. 呢杯野真係唔飲得都睇得, 吸 (現場) 睛一流!講番杯野, 由於走左糖, 所以甘苦味特別出, 幸好在下不嬲都做開人上人, 所以對呢杯野都非常有好感, nice! 另外一讚既係杯野冇咩酸味, 啱晒平時飲咖啡怕酸既朋友! 熱mocha友人叫既, 所以在下無緣試飲, 但睇個樣都似乎唔錯!餐廳新開張, 所以杯碟傢俬都好新淨. 食客亦不難察覺呢間野真係幾有誠意, 喺裝修上都花左唔少心思. 首先有一幅大既植物牆, 而靠玻璃又有流水擺設, 蛋糕櫃地下鋪左一小塊草皮, 音響設備都用左靚牌子Bose. 而重點係員工數目! 小小樓面加加埋埋都有10個8個, 絕對唔會有遇溺既情況出現 (者係舉極手都冇人應~)大埔有愈黎愈多既新餐廳, 而且愈開就愈有質素, 不過睇黎呢間野都應該有備而戰, 似乎區內好快會有一番龍爭虎鬥, 在下即管拭目以待~…Read More

平時黎鴨脷洲都係食海鮮, 呢排轉一轉口味, 試下泰國菜~ 食過隔離街既泰象泰國越南餐廳, 坐就坐得舒服, 不過野食認真麻麻 (青咖哩唔得, 條香茅明爐烏頭更加唔得), 所以no encore!今日試既泰菜館, 喺正大街入口, 每次總係擦身而過~ 搞埋手頭上既野, 1點半準時黎到, 去到門口有少少卻步, 因為門面都幾 "up dup"... 試問有咩比中一次伏更慘? 就係中兩次啦~ 正諗住移師M記食瑞士芝士漢堡既時候,  望到貼喺門口既餐牌: 午市套餐一律$45蚊, 又真係幾抵既, 唉~ 算~ 人一世物一世, 豪俾佢, 試埋佢啦~同友人都叫左泰式金邊粉午市套餐, 等左五分鍾就有得食啦! 剛剛炒起熱辣辣上枱, 帶微酸既香味瞬間撲鼻~ 咩都唔駛講, 賣相先行, 個樣睇落幾正宗, 亮點係料多份量大, 金邊粉旁放左慷慨份量既辣椒同花生, 加幾多悉隨尊便, 仲有半個青檸, "吱"少少加番啲refreshing感覺俾佢. 翻開粉面, 有蝦, 蛋, 同大量雞肉, 收你$45蚊包野飲有咁既質素同份量, 剩係誠意都已經爆燈啦!! (事實證明: 在下最後飽到上心口)至於味道, 甜,酸,辣既比例剛剛好, 為數不少既櫻花小蝦喺味道上再賜予多少少層次, 整體黎講算係上佳水平, 拍得住九龍城泰國菜既水準 (可能仲有過之而無不及) 幅相影得係爭少少... (實物係吸引好多...) 因為一開始冇諗過會打食評, 所以在下冇影到, 唯有跪求友人hae影既照片...在下口痕, 叫多左半打沙爹, 盛惠$68. 侍者好好人俾我地雙拼, 3串豬3串雞. 雞肉本身就麻麻, 豬反而唔錯, texture唔係一般野. 不過在下著重既都係個沙爹醬, 呢度整得堅唔錯, 合晒在下口味, 夠濃味, 多花生, 夠杰身~ 正!! 不過略嫌咸左少少...炒金邊粉同沙爹在下都好鍾意, 仲帶少少喜出望外添~ (需知道搵到一間啱自己口味既泰國菜絕對唔係容易既事, 要結合積番黎既福氣同埋無限次食到苦口苦面既經驗), 為左肯定呢間餐廳係在下既Ms Right, 要搵多次機會黎試埋在下既最愛 - 明爐烏頭同青咖哩! 萬分期待!!!餐飲方面, 原來餐廳冇供應咖啡奶茶, 所以逼於無奈叫左已戒好耐既汽水 - 凍檸七~ 不過, 汽水如毒品, 既然戒得甩就無謂再番兜, 所以都係輕輕飲兩啖就算數了, 有啲野, 真係不可一, 不可再! 在下平時寫食評大部份都係圍繞Fine Dining 餐廳, 不過呢間細鋪真係俾到驚喜, 加上小小店鋪值得支持, 好事應該傳千里, 而最重要最重要係喺openrice竟然搵唔到呢間野, 莫非真係蒼海遺珠?? …Read More

友人牛一, 搵間好餐廳去慶祝一下, 考慮過四季酒店既Caprice, 不過被身邊好友勸阻, 告之質素已經跌左唔少, 加上在下喺openrice睇食評時, 啲食物相望落的確麻麻地, 縱使挾住2粒星星, 但睇落唔值得拎生日飯做賭注. 而喺幾個月前, 在下聽聞The Drawing Room 載譽歸來, 諗番起當日喺呢間餐廳食過2次好滿意既晚餐, 所以決定番黎試一試~<餐廳來頭>循例介紹一下餐廳, 一提The Drawing Room 呢3個字, 就知係勁野~  I mean當年~ 哈哈! 果陣剛剛出米芝蓮, 全香港咁多間知名意大利餐廳 (有pizza hut 啦, spaghetti house 啦, 講笑者~ 例如有Sabatini @ 帝苑酒店, The Mistral @ 海景嘉福, 等等等知名意大利fine dining 餐廳), 就淨係得The Drawing Room拎到星星, 一千零一間, 風頭一時無兩, 果陣時booking 滿到三個月後. 而佢既成名菜就係紅蝦意粉, 食過既客人都念念不忘!不過餐廳喺幾年前就close左, 原因係主廚Mr. Roland 覺得係時候要開一個新既Project, 去下一個里程卑, 熟客個個都大感可惜, 人家都未食夠… 等到今年, 終於回歸, 由果陣既銅鑼灣搬到黎PMQ, 佔領左Vasco西班牙餐廳既竇口. 用餐環境靚左, 不過大廚Roland亦唔再喺度打骰… 桃花不依舊, 人面也全非, 究竟佢仲係唔係當年既 The Drawing Room呢? 真係要試過先知~<嚴重扣分位>知道餐廳匿埋喺PMQ, PMQ聽就聽得多, 在下知道佢係一個新商場, 大概喺中上環, 但去就真係第一次去… 喺紅磡搭過海巴士104號, 去到威靈頓街附近落車, 跟住就GG了… 大家都知中上環啲路幾難行幾複雜,路又窄斜路又多, 大熱天時三十幾度,  拎住部電話用google map, 真係成吉思汗打仔, 屬於崩潰級別.行左十五分, 鍾於搵到PMQ, 原來佢一共有三棟, Block A 同Block B 同埋連接佢地既一小棟, 唔知Block 咩… 但水牌指示唔清楚, find out餐廳原來喺Block B, 而我地就喺Block A 兜兜轉轉, 又當失路, 又要搵條路過番去Block B, 最後行到成身濕晒同硬晒 – I mean 在下個拳頭, 真係未食都一肚火!!!<叫野食>不過入到餐廳, 見到咁靚既環境, 條氣順番一半, 加上餐廳冷氣充足, 成個人好快cool down 番, 當然杯Sparkling Water with Lime都有唔少功勞~Weekend 黎到, 全宇宙都係食同一個menu - Weekend Roast Brunch: 3 個Courses (前菜, 主菜, 甜品) 盛惠$488, 加多個Pasta Course 就$588~ 一場黎到, 都唔爭在果一百蚊啦!前菜有四款, 每款都幾吸引, 正正諗緊簡邊樣既時候, 侍者走過黎告之原來唔駛簡, 因為四款都有齊晒~ 在下都不禁打左個突, 咁抵?! 冚齊?! 至於意粉course就三簡一, 主菜同甜品都係四簡一, 好多選擇, 正!餐廳另外有樣野幾得意, 為左配合 Drawing 呢個字, 餐廳特登喺枱面放左啲顏色筆同一張細畫紙, 俾大家露兩手, 不過在下見啲畫筆都好乾淨, 加上長短一樣齊葺葺…估計都係得個擺字, 應該冇人真係會落手呱~<叫野飲>Weekend Lunch 有個超正既offer, 就係加$200 可以free flow 香檳, 加$100 free flow 紅白酒, 不過考慮到在下晏晝要學車, 為免未有牌先被釘牌,  free flow 似乎唔太搏得過, 而友人則喺前一晚已經劈左個通宵, 今日都不宜飲太多. 所以我地兩個每人叫杯紅酒by glass 襯番個main course就好了.題外話: $100 free flow 紅白酒好似平左啲喎… 第一下感覺好抵, 但第二下感覺就好伏, 100蚊? 天下間邊有咁大隻蛤乸? 枝酒仲唔係made in China?? 雖然侍者解釋番賣到咁平唔係因為枝酒唔靚, 而係佢地做緊promotion… 原諒在下膚淺… “平野冇好野” 呢個concept已經被深深植入~<FOOD>Menu: Weekend Roast Brunch Menu - 4 coursesPrice: $558 per personBread Basket and Olive Oil面包籃好味指數: 5/5面包雖然得一款, 不過剛剛焗起, 所以算唔錯, 最怕食到啲攤凍晒既面包. 至於在下俾滿分係因為佢枝棷欖油, 同街邊食開果啲好唔同, 醇好多, 杰身好多, 香好多, 好味到在下下意識咁將啲面包當做海綿, 狂索落啲橄欖油度食!Appetizer to Share 前菜:Insalata (organic mixed salad leaves with pickle mushroom)意大利有機沙律配醃磨菇好味指數: 4.5/5​​第一道既前菜, 沙律是也, 正常貨色, 猜想廚師知道未必個個鍾意火箭菜, 怕佢苦, 所以呢度主角用左波菜葉, 又係在下既最愛. 但佢好食既主要原因並不在此, 所謂禮多人不怪, 油多菜不壞, 呢度正正體驗到呢句說話~ 餐廳用左 Jamie Oliver 所講既A Little Bit 橄欖油 (者係其實超多…) 去撈勻啲菜, 誇張講句,  每一塊波菜葉都被啲油封住, 又香又滑, 咁你話點會唔好食呢? 只不過又難為了在下既6 packs… 佢地開始又共聚一堂了…Mozzerella & Salumi (Buffalo mozzarella with Italian charcuterie & gnocco fritto)水牛芝士配意大利火腿, 炸面團 (推薦!)好味指數: 5/5火腿咸香不過咸, 易咬唔韌, 雖然切到少少碎同好薄, 但咬落仲有油脂滲出, 應該唔係cheap野~ (唔似早一個月喺Bistecca食到既ham, 一味死咸). 除左火腿, 每人都有一舊水牛芝士, 不過佢唔係在下杯茶, 嫌佢淡味, 所以係咁易淺嚐過便算了, 不過友人似乎好欣賞…配火腿同芝士仲有啲軟糯既炸面粉, 呢個係重點, 因為你食完會重到一個點, 哈哈, 爛gag~ 炸面粉香味十足, 夾埋落啲火腿度, 與其話佢地相輔相成, 不如話佢地狼狽為奸, 兩樣邪惡既野加埋一齊, 只會變成罪惡… I mean 罪惡感… 叫人點停到口呢, 唯有一路食一路纖悔…主啊, 寬恕我把口吧, 睇在在下既6 packs份上…Pesce (Marinated fish with avocado, green apple & mandarin)酸橘汁醃魚生配牛油果, 青蘋果, 橘子好味指數: 4.5/5呢個其實似啊根庭既Ceviche, 者係用生果汁醃海鮮~ 賣相唔錯, 用上靚靚花瓣黎裝飾呢道本身幾醜樣既菜 (因為佢都係將啲野切粒撈埋一齊, 好睇極有限) 味道都ok, 魚生配牛油果個感覺幾新鮮, 一個軟綿, 一個軟爛. 成個菜酸酸昧昧幾開胃, 青蘋果同橘子間唔中出一出場, 吊一吊味, 為酸味帶來一點甜, 為軟糯送上一點清爽~ (Yoho! 呢兩句勁有文學feel~)Capesanta (seared scallops & pork ragout on toast)煎帶子配免治豬肉多士 (推薦!)好味指數: 4.5/5又係一道好神奇既配搭, 帶子鮮甜, 不過太細舊, 頂唔住樓下豬肉既強勁光茫, 所以唔係好發揮到出黎… 至於舊豬肉有幾強勁?? 友人一聞話好香, 一食話好正, 咁梗係啦!! 我頂… 全部都係肥豬肉黎既.. 不過, 做人勻真啲, 除左卡路里高之外, 佢的確係一件天下美食, 豬肉又淋又香, 同塊脆多士係絕配, 加埋帶鮮味既煎帶子, 正啊喂!食到呢度, 在下知道6 packs 應該冇救了… 唯有唸必殺咒語減輕一下罪孽: 都係聽日先減啦~Pasta 第二道菜Spaghetti (spaghetti with crab, zucchini & sweet chili)蟹肉意粉配翠玉瓜及甜椒好味指數: 3.5/5在下一直懷念佢地既紅蝦意粉, 心諗蝦同蟹其實係Friend, 應該都會好好食, 所以就簡左呢個~ 上到枱, 賣相ok, 見到廚師好有心機將蟹肉, 翠玉瓜同啲椒切絲, 切到好似同意粉咁上下. 先講味道, 還可以, 意粉係Al dente, 蟹肉算多, 不過整體蟹味唔太濃郁, 同在下以前食果個紅蝦意粉有段天地既距離, 有期望所以會失望~.不過敗筆係口感, 大廚故意將所有材料切絲, 但一絲絲既蟹肉咬落去令在下覺得似喺度食緊伊面 (即管當在下太好想像力吧)…成件事down grade 晒~Risotto (sea urchin risotto with courgette flower & sea weed rock)海膽意大利飯 (推薦!)好味指數: 5/5友人既Pasta Course, 雖然佢個賣相在下都認為係爭啲啲, 成個大家樂太極駌鴦焗飯茄汁果一part, 不過個器皿又的確幾趣緻, 所以搶回少少分數.在下當然打番少少稅, 畢一羹試下, 飯夠煙韌, 汁醬夠濃, 幾重芝士味, 係高水準之作, 不過未到亮點~ 最後咬既係隻蜆, 一咬落去就不禁食神裏面既薛家燕上身: 嘩! 好好食既蜆啊! 蜆肥加上冇overcook, 所以依然保持嫰滑, 最冇得輸係佢本身既蜆味, 濃郁程度媲美一次過放10隻本地蜆落口, 食到在下同友人都Lam晒脷, 植樹舞子! 強烈推介是也!不過呢, 樓上既菜名冇寫有蜆呢樣材料, 所以都唔Sure仲係唔係呢個Risotto, 定或者係廚師當日轉左第二款risotto俾我地?Meat (all served with garnish) 主菜Vitello (roasted Italian veal rack with basil crust (must be enjoyed every two guests)羅勒葉烤焗意大利小牛肉架好味指數: 4.5/5主菜有四款簡, 有好吸引既羊架, 肉眼扒, 春雞, 同埋在下叫既小牛肉架. 羊架在下一個月前喺Petrus食左 (basically 係偷食左友人一小舊, 質素之高可以用感動級黎形容, 費事呢度會被比下去), 至於肉眼扒, 在下始終覺得鋸扒要去番扒房 (例如超正既Beefbar 或者Ruth’s Chris), 春雞就更加唔駛講…咁耐以黎, 都未遇過一隻好雞, I mean好味既春雞, 永遠都係鞋烚烚… 所以決定go for呢個for two persons 既Veal. 注意: 佢係2人份量, 是故在下要跟友人share~賣相唔錯, 上到枱已經切好晒一舊舊, 出面鋪滿綠色既香草醬, 入面係烤到接近熟透既Medium Well. 望落冇咩血色, 擔心會唔會太韌, 不過最後證實擔心係多餘既, 縱使冇血水, 但依然保持嫰滑, 肉汁充沛, 油份適足, 係一件不可多得既 “好肉”! 不過可能仲係小牛既關係, 肉味唔係太濃, 對重口味既在下黎講, 略嫌清純左啲, 不過會推介俾啲怕羶唔食羊既朋友.最後埋單時同經理傾左陣計, 佢話通常客人第一次黎佢都會推介佢地食羊, 因為係佢地既signature, 只不過見在下一開始就好似主意已決咁叫左小牛仔, 無謂掃我地興, 在下聽後不禁講左句… shit!…點都好聲好氣勸下我地嘛, 例如講句: 咦?!今日啲羊好似好靚喎, 真係唔試下?? 最衰在下叫菜果一刻醒唔起, 呢一生人食過最好味既羊架…其實就係喺The Drawing Room (本身喺銅鑼灣果間), 唉…整定.. 注定在下要番黎多一次食羊架~哈哈哈~ 很好既借口.Garnish (Potatoes and Sun dried Tomato, Roasted Pepper)配菜 (焗薯及意大利蕃茄, 焗香椒) (推薦!)好味指數: 5/5配菜有焗薯同焗椒, 薯仔唔知咩品種, 勁香薯味, 本身皮已夠薄, 加埋焗到脆一脆, 入口又粉嫰, 同友人都起勢咁讚, 一路讚就一路叉一舊落口, 完全忘記薯仔係減肥大敵人… 薯仔上面仲有兩隻意大利乾蕃茄, 又係好味道. 焗椒齊晒紅黃綠三隻色, 隻隻都好味, 不過似乎友人唔係椒友, 食左一隻就口停手停, 交俾在下吧, 在下最鍾意吔椒架啦~Dessert 甜品Gelati & sorbetti (selection of homemade ice cream & sorbet) – Earl Grey and Mascarpone Cheese意大利雪糕及雪皅呢個係友人既甜品, 在下無緣試食, 不過佢話幾好味.Formaggi (assorted selection of cheese) 精選芝士 (推薦!)好味指數: 5/5唔駛審, 芝士控既在下當然又簡左芝士, 一共7款芝士, 在下request每樣試少少, 有勞餐廳經理Mr. Ho Lau啦, 真係切到手軟. 芝士款款都係黎自意大利, 有牛奶, 有羊奶, 有mix, 有blue cheese, 不過佢地啲名在下真係記唔到, 淨係記得灰色果隻係黑松露芝士~在下就真係無法子細緻形容每一款芝士, 不過總括黎講每隻都好平易近人, 就算blue cheese 都屬於入門級, 絕對唔似 (全部都帶極高挑戰性). 黑松露味果隻幾特別幾好食, 友人打稅試味, 試完一啖又一啖, 最後足足試左3份2舊…咁仲叫試咩….?另外一讚既係condiments, 有簿切sourdough 面包, 果醬, 同超好味既蜜糖 (高級蜜糖黎, 食得出唔係一般貨色). 夾埋佢地落芝士度, 再飽都食得落! 講笑者, 芝士其實都幾濟下~由於個芝士拼盤太吸引, 在下相都唔記得影就已經開始食, 所以唔齊七舊, 有兩舊喺肚…Petit Four西式美點雙輝好味指數: 4.5/5又係一個誇張既賣相, 玻璃金鍾罩, 罩有六個細洞, 放左一共6粒既小甜點, 包括有椰子糖, 拖肥曲奇, 紅桑苺蛋糕, 味道唔錯, 襯番杯cappuccino, 幫呢餐埋個靚尾. 不過呢…唔知係唔係在下隻手指粗大 (友人都係), “了” 極都 “了” 唔到佢地出黎, 尤其係粒椰子糖, 唔知餐廳會唔會考慮俾隻鉗仔啲食客, 方便得黎又好似高級啲呢?<DRINKS>Sparkling Water – San PellegrinoPrice: $60 x 2 bottlesRed Wine – Molettieri, Aglianico Cinque Querce, Campania, Italy 2011Price: $180 x 2 glasses同酒師講想要啲full bodied既紅酒, 佢就介紹左兩款俾我地, 一款係Molettieri, 一款係2013年既Cannonau Di Sardegna, 呢兩個字在下睇唔明, 不過唔明都唔緊要, 重點係前者$180 per glass, 後者$98 per glass. 貴唔一定好, 平唔一定差, 但貴會好過平, 玄呢~ 總之呢堆數字令在下簡左前者啦, 而事實證明在下冇簡錯, 杯酒係在下杯茶, 好啱口味~ (應該簡啱呱…反正在下冇得做比較, 幾歹都話自己啱)CappuccinoPrice: Included<OVERALL COMMENT>野食COMMENT整體黎講每道菜都好高水準, 無論味道, 賣相, 份量, 在下都俾好高分! 除左在下既意粉菜式有少少失望, 其餘野食在下都十分滿意! 有驚喜不過未到超大驚喜, 主要原因係在下未食到佢地既Signature – 紅蝦意粉, 羊架, 同埋餐廳經理極力推介既乳鴿, 下次黎, 試埋佢地再評過!注意番, 呢度絕對唔係啲追求瘦身既人可以黎既地方, 菜式偏heavy, 更偏高卡路里. 自己簡, 一係食好西, 一係有6 packs, 或許這就是傳說中吃貨的悲哀… 不過, 在下就要破呢個咀咒, 決心做第一個! 第一個有6件腹肌既賤貨, sor, 係吃貨!!!服務COMMENT所有待者包括酒師都好專業, 落菜時都有簡介下道菜係咩, 而絕大部分都好好笑容, 又有禮貌!  加分位係他鄉遇故知, 世界真細小, 唔覺意遇到師兄 (大家傾談之後先發現原來大家都喺同一間餐廳做過), 大家臨尾都傾左大約10分鍾, 得悉師兄做過唔少知名餐廳, 又識唔少人, 勁啊! 相比之下, 脫離左酒店行業逹五年之久既在下, 似乎已經對飲食界行情有少少脫節~友人生日, 本身book枱時order左喺甜品度寫番句Happy Birthday, 無奈友人好叫唔叫叫雪糕做甜品, 細細杯, 人地點寫字呢? 不過, 餐廳好細心, 特登整左張生日卡, 俾我地拎住黎影即影即有相 (provided by 餐廳), 都算一個幾窩心既服務.服務係好, 不過仲未完美, 樓下有兩點仲有改善既空間.Reception 姐姐好似爭左少少少少少主動, 既然行得Fine Dining 呢條路, 自然要同五星級酒店餐廳既Service睇齊,  Greeting同講88都屬於整個dining experience 既其中一環, 由一開始聽電話接booking 到個客離開Reception 講thank you 幫客人禁lift, 個客人已經開始計緊數應唔應該再翻桌~另外有一樣野真係要講一講, 其實有人喺openrice已經提過, 由於我地坐細房, 好多時都俾侍者忽略, 舉極手都冇人應, 佢地喺條走廊行黎行去都唔察覺到有客人召喚緊佢地, 當然, 在下又冇理由勁大聲咆哮: 唔該! 有冇人啊? … 話晒都係高級餐廳, 不過有幾下爭啲忟到想自己行出去叫佢地. 又之不過, 在下同友人都唔趕時間, 等下又冇咩所謂, 所以唔太受影響, 但餐廳真係要注意一下.環境COMMENT環境呢Part認真無得彈, 唔計一間private room, 餐廳有兩間細房同一個大廳 (所謂大廳, 其實都唔係話太大, 都係擺到4張4-6人梳化枱), 大廳如下圖般一樣咁靚. 而果兩間細房就放左兩張2人枱~ 所以計埋計埋其實都唔係坐到好多人, 所以當日就算full house, 其他客人喺度高談闊論, 都唔會話覺得太嘈.此照片取自網上裝修摩登時尚, 夾番呢度所提供既現代意大利菜, 不過, 裝修點靚都係最緊要地方闊絡, 枱同枱之間有足夠既距離, 咁就唔駛同隔離枱share秘密啦!抵唔抵食?直頭抵到爛啦! $558 四個courses, 包埋咖啡茶, 仲有7款芝士食, 前菜仲要係齊晒4款, 如果夾硬計, 一共有成7個courses~ 而任飲香檳紅酒都係加多百幾蚊 (雖然在下冇叫到…), 服務好, 環境更加一流, 呢間野已經被納入在下既飯堂~最後, 喺度再次同友人講聲生日快樂! 謹祝閣下黎緊既Tripsss玩得開心愉快 (又話唔知幾月去美國, 幾月去歐洲, 幾月去古巴, 有錢真係任性~)由於呢餐太好味既關係, 在下喺埋單時已經順手訂埋10月30日, 與另一位好試試佢既夜晚, 趁機嚐嚐紅蝦意粉, 睇下係咪依舊咁好味, 睇下the drawing room係咪真係番左黎,  楽しみ~…Read More

鍾於三個幾月又過去, 又係我地呢個小群組出黎約食飯既時候了~  第一聚會喺Beefbar (Beefbar既Dining Review) 個個食到Lam Lam脷, 然後上次喺Whisk @ Mira Hotel 食左餐好不如意既晚飯 (三條友食左4千幾蚊…但質素…worse than the worst), 希望今次黎seafood room收復番少少收地~題外話, 在下對呢間野既印像幾深刻, 因為第一次聽佢個名時..seafood room… 搞gag啊而家?! 咁既名都改得出? 讀歪少少都笑人, 人地問今晚食咩, 答佢seafood room, 但願聽到既人會問間野腥唔腥, 而唔係臭唔臭… 哈, 你懂的…餐廳喺銅鑼灣Tower 535既26樓, 棟野喺世貿中心隔離, 銅鑼灣D1出口行3分鐘就到, 位置十分方便~ 上到餐廳一出Lift就有Reception姐姐主動黎greet我地, 唔錯, 最怕做無主孤魂冇人理 (即時令在下諗起喺灣仔福臨門既慘痛經歷…)<叫野食>餐牌上有好多海鮮簡, 有刺身 (刺身再細分Sashimi, Tartare, Carpaccio), 有湯, 有沙律, 同埋大概十幾款既熟食, 而另外右上角有一欄係中式海鮮, 好似話係餐廳特登請左個中廚黎主理, 有豉椒炒蜆, 蒜蓉粉絲蒸帶子, 炒蟹之類等等等...同友人J. Lee向著同一方向, 絕對唔叫港式海鮮, 一來佢喺網上openrice劣評如潮, 二來我地一致認為如果要食中式海鮮可以喺大排檔食, 而且一定好味過呢度.<叫野飲>食海鮮當然配白酒, 本身已經有心水 (因為喺未黎之前已經腥左個酒牌俾友人A. Chow – 在下既御用酒師~, 叫佢幫下眼簡定幾枝), 諗住叫野食時一次過叫埋, 點知侍者 (望落著西裝, 似係首領級) 幫我地take 完food order之後就好似好唔耐煩話轉頭先過黎take wine order… 點之呢個 “轉過頭” 一轉就轉左10分鍾…需知道對於餐廳黎講, 酒錢係最好膁, 利潤最高, 叫枝$900既酒差唔多賺你一半, 難道而家嫌錢腥? 就這樣, 在下就拎住本wine list 好迷惘咁等左10分鍾~ 雖然佢最後佢都好nice咁介紹番唔同酒俾我地, 不過有時有啲野就好似一張摺皺左既紙, 你點熨都熨唔平…  <FOOD>Menu: a la carteBread Basket and Olive Oil with Vinegar面包籃好味指數: 2.5/5面包有兩款, 大路野, 唔似喺openrice睇到果啲咁豐富, 人地好似有墨汁包, 又有薄脆, 在下今日去就咩都冇, 可能最近轉左餐牌吧~ 可取既係裝橄欖油同醋既碟仔, 上面圖案隻八爪魚好得意, so cute~Tuna Carpaccio (foie gras, truffle)吞拿魚刺身薄片 (鵝肝, 黑松露)Price: $240好味指數: 4/5望落個樣唔錯, 亮點係塊吞拿魚下面既鵝肝醬, 好香, 加埋面上幾塊松露, 成道菜香噴噴! 不過呢兩樣食材好似功高蓋主, 完全淹没左吞拿魚既光茫~ 在下其實唔係好覺食到吞拿魚既存在…Langoustine Tartare (avocado, truffle, caviar) (推薦!)小龍蝦刺身 (牛油果, 黑松露, 魚子醬)Price: $290好味指數: 5/5頭盤之二, 亦係呢度最最最出名既菜式, 喺openrice個個都猛讚. 上網睇相以為佢個portion會好細, 仲躊躇緊三個人會唔會好難分, 但上到枱又ok喎, 每人都分到一大羹!小龍蝦既鮮味比較淡身單薄, 但亦正正係佢吸引人既地方, 似有還無, 欲擒先縱, 欲拒還迎~ oops… sorry, high大左~ 哈哈~ 加埋魚子醬既咸鮮, 成道菜就鮮上加鮮. 底下既牛油果係一塊出色既綠葉, 喺味道同質地上都襯晒樓上既小龍蝦. 而汁醬都值得一提, 應該係經過悉心調製, 味道複雜, 甜咸參半, 帶少少中式感覺 (feel到有啲啲豉油同麻油), 畢少少淋落去隻小龍蝦度食, 成件事昇華晒!雖然道菜係冷盤, 俾人好refreshing, 但小龍蝦同牛油果又會 “張” 住個口, 所以清爽得黎幾creamy, umum, 應該冇衝突吧咁講…Mussels (white wine, garlic, cream) (推薦!)青口 (白酒, 蒜頭, 忌簾)Price: $320好味指數: 5/5早幾日喺Plat du Jour @ Pacific Place 食左餐滿意青口, 果度以量取勝 (當然質素都相當唔錯, 只係佢個量實在太驚人).(Plat du Jour 既Dining Review 在此)相比Plat du Jour, Seafood Room 果兜算正常fine dine份量… 者係portion好細, 望落似得8-9隻, 心諗又被人呃… 點之唔知係唔係錯覺問題, “巧晨此啊~” 兜野食極都食都唔完, 夾完一隻又一隻, 在下起碼都食左7-8隻 (….唔排除在下因為覺得好好食而狂食, 食埋友人果份). 所以喺量呢方面, 佢就拎滿分 (最後好似都有成around18-20隻), 咁質呢? 堅冇得輸! 新鮮呢啲係基本, 最最最緊要係每隻都好肥美, 加埋煮既時間剛剛好, 每一隻都漲卜卜, 就咁食都好好味, 點埋底下既白酒忌簾汁就添加多一層滋味.青口白酒汁好味, 友人提議叫個白飯, 撈埋黎食… 話唔好嘥喎, 在下心諗: 痴線, 咪玩啦… 人地高級餐廳 fine dining restaurant黎架…. 咁緊係俾個膠袋佢, 打包番屋企, 自己煲飯啦, 喺呢啲餐廳叫白飯好貴架嘛~ wakakaka~ just kidding~Sea Bass (potato, tomato, olives)海爐魚 (薯仔, 蕃茄, 橄欖)Price: $380好味指數: 3.5/5一直覺得整魚都係中菜既天下, 點整最好食, 唔駛問啊貴, 梗係清蒸啦, 不過難得黎到Seafood Room, 都要試下既~ 除左三文魚, 仲有三款簡: 海鱸 (Sea Bass), 倉魚 (Promote Devil), 鯛魚 (Sea Bream), 煎倉魚呢, 母親大人平時喺屋企都會整, 鯛魚成$650蚊一細條, 似乎唔太划算, 所以唯有簡海鱸.老實講, 鱸魚在下一向都麻麻, 一來嫌佢唔夠滑, 二來唔夠香 (因為本身呢種魚肥油唔多), 不過, 叫得Seafood Room, 在下期望呢度會俾到驚喜, 所以決定放手一搏~ 可惜… 最後既冇驚又冇喜… 同平時食開既海鱸係一鬼樣… Sigh, 咁又白白浪費左$380. (well, to be honest, 佢呢條魚算係比其他餐廳既滑啲同香啲, 不過呢一 “啲” 唔多夠囉~)反而配菜唔錯, 係在下最鍾意食既蕃茄粒同橄欖, yoho~ 在下一掃而光, 妹仔大過主人婆~Octopus (red wine, potato) (推薦!)八爪魚 (紅酒, 薯仔)Price: $370好味指數: 5/5友人想試下八爪魚, 所以叫上一客. 好味既八爪魚唔多, 一來本身冇咩非中菜餐廳會供應, 二來多數衰韌, 食過暫時覺得好味既只有日本高級壽司店同尖沙咀Al Molo既Pan Seared Octopus (不過而家好似已經被人喺menu上剔走了, such a pity~)講番呢度既八爪魚, 上枱時的確有點淆, 咁既樣既??? 薯蓉望落還可以, 條八爪魚鬚好似唔多係路喎 (佢俾一pat蕃茄蓉覆蓋住)… 但擺到上黎都要食架啦, 諗住切開幾份, 每人試少少先, 一落刀就發現有surprise, 咦?! 咁易切既~ 放落口就即刻安心晒, 縱使佢好粗 (大約係恒香蛋卷既兩倍), 依然咬落彈牙, 彈牙係好正常, 最怕咬唔爛, 咦?! 又幾易咬得開喎, 仲好juicy添, 個芯帶好少好少既海水咸味, 簡單啲黎講, 好食! 淨係texture呢一part已經夠俾佢滿分! 估計餐廳喺後期都落左唔少功夫去處理呢道食材, 難道佢幫條爪做左個幾粒鍾既full body massage?條鬚估計都有成25-30cm, 每人分到2大碌, 配埋隔離既薯蓉, 食到呢度都幾飽, super大滿足!Miso Salmon (lime) (推薦!)味噌三文魚 (青檸)Price: $350好味指數: 5/5呢道菜喺網上又係每個人都推介, 咁在下當然唔會執輸. 一上枱相機先食, 影果時已經聞到面豉香味, 搞到原本飽左七成既我地又開胃番. 先講條魚本身, 雖然熟透但冇過熟, it is cooked, but not overcooked, 你明既~冇過熟令到魚油足以保留, 故夠香夠滑夠juicy (juicy係因為好多汁, 啲汁咪即係啲油囉, 勁多omega 3… 同埋勁多calories…shit!), 尤其魚既中間部分, 果種滑溜拍得上鱈魚!重點係面豉醬汁, 原來三文魚同面豉係咁好朋友, 在下都係第一次食, 咸咸甜甜, 堅香口惹味! 臨食前再“芝”少少青檸汁上去, 為兩樣重口味既食材做一個refreshing agent~ 在下強烈推介呢道菜~Australian Wagyu Rib Eye (chimichurri sauce)澳洲和牛肉眼扒 (阿根廷香料酸辣醬)Price: $650好味指數: 4.5/5成個menu既熱食得2樣唔係海鮮, 一個係春雞, 一個係肉眼扒. 友人J. Lee鍾意鋸扒, 加上成餐飯如果冇一啲好實在既野落肚, 感覺係爭少少.關於澳洲和牛, 其實在下之前喺Beefbar既Review入面講過 (Beefbar 既Dining Review ), 澳洲和牛係界乎日本和牛同美國牛中間, 佢比起日本和牛更有肉味, 比美國牛肥, 可以話佢取兩家之長, 亦可以話佢兩頭唔到岸, 呢個係半杯水既命題, 在下樂觀, 所以仲有半杯水~友人R. Ho怕食生野, 怕血淋淋, 所以在下落單時特登request左medium (其實在下一開始係要求最好味既Medium Rare Medium…者係四成熟, 不過侍者擺出一個 “諗” 樣, 唔太明白在下講咩, 所以在下放棄, medium就好了), 無心插柳柳成蔭, 佢唔覺意就烤出左最難做到既Medium Rare Medium (頂! 咪即係一開始要求果個囉~), 唔太生得黎冇過熟, 保持肉嫰而冇血淋淋, 讚! 本身塊牛油脂充沛, 所以係好嫰, 唯欠一點肉味, 呢個就係澳洲和牛既弱點, 不過一早預左~唯一不足之處係調味仲爭少少, 故同侍者拎左樽鹽, 自己加少少落去, 掂晒~Chunky Fries (sea salt)粗薯條 (海鹽)Price: $100好味指數: 4.5/5勁粗既薯條…. 都唔知仲應唔應該叫佢做 “條”, 薯磚似乎適合啲. 收得你成舊水, 佢都唔好意思俾M記質素啲薯條呱~ 果然, 冇偷工減料俾空心磚, 每一舊都好實心, 剛剛炸起所以皮脆內熱, 點埋茄汁或者青口汁超好味!Yuzu Tart (toasted meringue, green tea ice cream) (推薦!)柚子撻 (焗蛋白, 綠茶雪糕)Price: $130好味指數: 5/5柚子撻喺openrice又係超多人推介, 在下當然又不甘後人, 人試我試, 即刻叫番個. 黎到個賣相幾靚, 估唔到個portion都好大, 估計直徑都有成10cm, 絕對唔係一人份量 (其實分三份在下都覺得ok). 撻皮夠脆, 柚子味好香, 亮點係唔太甜, 好味! 在下一向唔係焗蛋白既粉絲, 食之前在下就一野撥開左, 無法置評~侍者Jerome 解釋番因為個柚子撻徧少少酸, 所以夾番個甜甜地既綠茶雪糕就會balance 番~ 不過在下覺得兩者似乎無咩關連.Peanut Butter Crunch Bar (banana ice cream)花生醬脆餅 (香蕉雪糕)Price: $130好味指數: 4/5朱古力蛋糕配左個花生醬脆脆喺底, 係幾惹味, 香蕉不嬲同花生醬係朋友, 所以夾埋唔錯. 在下個人黎講幾鍾意呢個甜品, 因為在下好鍾意食花生醬, 成日幻想有一日可以拎住隻羹直接畢花生醬黎食~ 呵呵~不過友人突然爆左句… 呢個甜品同惠康買到既sneaker好似一樣味道…. 成件事瞬間冇晒mood…Baked Vanilla Cheesecake (strawberries)焗雲尼拿芝士蛋糕 (士多啤梨)Price: $140好味指數: 4/5Jerome 話佢最鍾意食呢個甜品, 雖然在下覺得cheesecake冇咩特別, 不過實在已經簡無可簡 (因為更加唔想食panna cotta 同芭菲), 所以叫一客. Cheesecake 味道不錯, 好香雲尼拿味, texture值得一讚, 硬身有substance得黎唔會好似Starbucks 藍苺芝士蛋糕咁死實, 裏面充斥大量空氣, 雖然聽落有啲矛盾, 但的確係 heavy 得黎幾light~士多啤梨唔錯, 食落唔太酸, 應該唔係用cheap 野.<DRINKS>Sparkling Water - WaiweraPrice: $78 x 2 bottlesWhite Wine – Domaine Chaude Ecuelle Chablis Premier Cru “Montmains” 2013Price: $900 x 1 bottle枝酒唔錯 (不過在下其實唔係好識欣賞白酒, 總之唔係難飲…), 不過九舊水似乎唔係太抵… 好大原因係在下唔太鍾意白酒, 而9百蚊其實已經可以買到枝好靚既紅酒.食完成餐飯之後, Jerome 好好人咁同我地講, 唔夠喉既話可以上去rooftop 佢地既酒吧飲杯野或者食水煙, 如果係去既佢會留定張靚啲既枱俾我地. 難得佢咁好人, 而且時間倘早 (食完餐飯都只係9點半…), 所以就上去坐陣~上面其實就係棟大廈既天枱, 不過改裝左做酒吧, area好大, 而且個景好靚, 可以望晒成個維港, 嗱… 呢啲先叫海景… 個場唔算多人, 而且算坐得舒服.. 不過人大了, 佢啲梳化對在下黎講實在太淋了, 好彩佢仲有啲硬櫈~飲左三杯野 (友人R Ho 試左杯香港啤…. 唔講在下都唔知原來香港有啤酒出, 在下同J Lee就飲左杯Sake底既Saketini 同Sake Cocktail~ 每杯大約100蚊, 計埋呢個舒適, 十分之好抵! 在下多謝J Lee請飲酒, 當慶祝佢考車成功!<OVERALL COMMENT>野食COMMENT雖然成餐飯都係主要圍繞海鮮, 但都有好多唔同種類, 又有唔同煮法, 所以一啲都唔悶. 味道賣相屬高水平, 大部份都值得細心回味 (有幾道菜仲好驚喜添~). 最後份量比想像中大, 值得一讚!服務COMMENT除左一開始果位黑面首領, 其他侍者都好健談同好好笑容, 值得一提係其中一位server – Jerome, 去到餐飯中段佢突然出現左, 專業得黎肯花時間同客人傾計, 講解菜式時有耐心, 又有無限笑容, 為呢餐飯添色不少. 少少失分位係臨走時冇人講88, 縱使佢地有人幫我地禁電梯落番地下, 服務切忌好頭爛尾, 任你起跳幾高, 高空轉左幾多個圈, 臨尾唔記得壓水花就spoil左成件事了.不過樓上酒吧啲服務就真係爭少少啦, 個個都好似黑面神… (或者會唔會因為係個環境太暗, 在下眼花呢?)環境COMMENT餐廳剛開業四個月, 裝修靚同新淨係預料中事, 餐廳好人安排個轉角海景位俾我地, 在此致謝~ 不過…”Window Seat” 對香港人已經開始免疫, 香港既 “夜景” “海景”對於在下餐飯並唔會特別加分 (除非你係Petrus既落地大玻璃咁既view…否則, “window seat” 只係a seat next to a window, that’s all) 與其俾呢張轉角枱在下, 倒不如安排一張靜啲既枱, 在下會更開心.餐廳好大, 上網話有八千幾呎, 但似乎餐廳有意將3-4人枱都安排喺同一個area, 雖然係禮拜四, 但似乎呢間野人氣高企, 我地成個area都full house, 所以幾嘈下… 不過我地幾個大男友, 傾計飲酒, 所以今餐對寧靜並無太大要求.洗手間細, 裝修靚, 算普通乾淨, 不過第一次去廁所時, 清潔姐姐口快心直話唔好用盡個尿兜住, 因為地下有wee wee, umum, 有時又唔駛咁坦白既…抵唔抵食?一般啦… 每人千五蚊, 都食到幾飽, 又有酒飲, 有啲菜式仲俾到驚喜, 最緊要坐得舒服, 仲有得俾你直落上埋去佢個rooftop 酒吧再傾下*, ok既.*每人千五蚊係未包樓上rooftop酒吧飲野<RECOMMENDED MENU FOR 2 餐單推薦>呢類型餐廳喺香港屬罕有, 海鮮餐廳香港不缺, 淨係西貢鯉魚門布袋澳都有排食, 不過focus西式海鮮既的確少見, 而且行fine dine路線, 評心而論, 菜系係幾特別既. 在下亦推介俾各位, 如果同另一半黎慶祝都係一個唔錯既選擇, 以下為在下推薦菜單, 每人一千連酒水加一可落樓~野食:前菜:Langoustine Tartare (avocado, truffle, caviar) 小龍蝦刺身 (牛油果, 黑松露, 魚子醬)Price: $290Middlectopus (red wine, potato) 八爪魚 (紅酒, 薯仔)Price: $370  或者Mussels (white wine, garlic, cream) 青口 (白酒, 蒜頭, 忌簾)Price: $320主菜: Miso Salmon (lime) 味噌三文魚 (青檸)Price: $350甜品:Yuzu Tart (toasted meringue, green tea ice cream) 柚子撻 (焗蛋白, 綠茶雪糕)Price: $130野食Total Price: $1,140 for 2 persons (for share)野飲:Sparkling Water x 1 bottle Price: $78White Wine x 4 glass (2 glasses per person) Price: around $500大Total: $1,140 + $78 + $500 = $1,718 + 10% + Tips = $1,950 for two餐廳係由俄羅斯大型飲食集團開過黎, 有大財團照住, 大水喉射住, 廚師就可以放心專注整好野食, 唔駛憂柴憂米, 條命好, 有個好老豆 (飲食集團), 就算個名改得怪雞, 一樣客似雲來! 連埋rooftop bar一共hae左接近四粒鍾, 飲飽食醉超滿足, 打Uber回府! 期待下次12月6日既gathering, 約定, 半島酒店嘉麟樓~…Read More

為左份工可以去到幾盡? 上一篇review寫到友人食完alibi之後就去見工 (alibi review 喺呢度), 果然, 好味既午餐係成功既一半, 兩日之後就有好消息, 下個禮拜進行第3 round interview, 不過今次係高難度動作, 要同公司其中一個大粒佬進行Lunch Interview @ Plat du Jour Quarry Bay, 邊食邊in, 都咪話簡單~ 所謂要贏就要贏在起跑線, 加上友人平時比較少黎呢類型餐廳, 所以特登喺interview之前黎食餐飯, 熟習一下環境, 咁到時見工果陣就更加得心應手啦~由於側漁涌分店唔開禮拜六日既lunch, 所以唯有轉黎Pacific Place分店視察環境. 餐廳勁就腳, 金鍾地鐵站F出口, 上兩條扶手電梯就見到, 其實佢就係喺北京樓對面, 所以都好易搵.午餐有2個courses同3個courses簡, 分別索價$235 同 $275, 兩者分別爭左個甜品 (可以食住個2 courses, 到時唔夠先再加甜品, 冇話會貴左), 餐牌上有幾款食物要加少少錢 ($50), 同埋注意番午餐並唔包野飲, 不過, 杯咖啡都係30幾蚊, ok既~<FOOD>Menu: Set Lunch3 courses: $275 x 2 personsBread Basket 面包籃正常面包籃~Entrees 前菜:Seared Foie Gras (quince, candied pecan, brioche, sauternes reduction) (推薦!)煎鵝肝 (榲桲, 核桃, 面包, 甜酒汁)Supplement: $50友人既前菜, 係餐廳其中一樣推介菜式. 鵝肝賣相肥美, 望落好似好鬼好食, 所以在下豪不客氣叫友人切少少黎俾在下試下. 又真係幾好味喎! 鵝肝本身夠肥美, 煎得亦夠香, 食落口有應該要有既入口即化. 底下既榲桲汁 (梨汁啲朋友) 同塊脆多士平衡番啲油膩. 而甜酒汁醬所帶既獨特甜味令呢道菜喺味道層次上更豐富, 又甜又油, heavy得黎好guilty啊!!! 讚多樣野係核桃, 出面包左層糖衣, 咬落鬆脆, 為每一口肥美鵝肝之間作一間短暫緩衝~呢道Foie Gras色香味俱全, 不愧為餐廳推介. 一早話左, 黎法國餐廳叫鵝肝實冇死, on the condition that 佢係一間真正既法國餐廳, 唔係港式扮法式果啲, 你懂的~Escargot Bourguignon (sautéed snails, soubise onions, persillade, brioche)法式焗田螺 (田螺, 洋蔥, 番茜, 面包)同樣係推介菜式, 同樣係法國傳統野, 而家新派既法國餐廳已經好少見到呢個菜式了. 田螺好細心地折晒肉, 然後浸淫喺用牛油, 牛油, 同牛油, 點解講三次? 因為真係真係好多牛油… 仲有香草, 碎洋蔥造成既醬汁, 拎去焗. 焗出黎外面脆一脆, 裏面… 油一油, 依然都係好多油, 不過堅香!!!田螺本身冇咩味道大家都知, 重點係佢夠大隻, 好肉地, 配埋個sauce又係好heavy, 不過超惹味! 就咁空口食真係未必頂到佢既重量, 將佢地配埋面包食就好多了.Plats 主菜an-seared Salmon Fillet (organic white quinoa, fennel, beet, baby carrots, harissa dressing)煎三文魚柳 (有機蔾麥, 茴香, 甜菜, 蘿蔔, 哈里薩辣醬)友人既主菜, 在下當然又打稅. 三文魚煎得肉香而皮脆, 重點係冇過熟, 仲保留到三文魚既魚油, 魚肉保持juicy同tender, 讚! 最怕食到啲乾憎憎既三文魚扒. 不過, 如非必要, 在下都比較少喺西餐叫魚食, 呢道食材始終屬於中菜~Moules Marinieres (bouchat mussels, aoilo, frites) (推薦!)法國青口 (青口, 蛋黃醬, 炸薯條)Supplement: $50呢個真係唔話得啦, 先唔講味道, 淨係份量都贏晒, 青口起碼有成25-30隻, 仲有薯條一大兜, 邊個話法國菜碟大餸少食唔飽人架?!青口鮮甜, 重點同三文魚一樣, 都係冇overcook, 最怕青口熟過頭跟住縮晒水, 得番手指甲般咁細隻. 好多時候食海鮮, Less is More, 青口要好味其實唔駛點整色整水, 只要青口本身靚, 簡單烚兩下, 配埋個濃淡適宜既白酒忌簾汁, 已經係一道人間美味. 跟番傳統做法, 青口係會跟番啲薯條, 點蛋黃醬食又得, 點番落個白酒忌簾汁度食都得!頭果15隻的確愈食愈好味, 不過好味還好味, 由於白酒忌簾汁加薯條配蛋黃醬, 你都咪話唔飽唔濟, 所以食左3份2之後, 在下就極力誠邀友人試食, 最好試晒果3份1.Desserts 甜品:Grand Marnier Crème Burlee (peppercorn shortbread)橙酒焦糖燉蛋 (黑胡椒奶油酥餅)友人既甜品, 呢個在下就真係無緣試食啦, 不過佢話好香橙酒味道.Cherry Clafoutis (kirsch chantilly) (推薦!)法式櫻桃布丁蛋糕 – 克拉芙緹 (櫻桃白蘭地酒忌簾)爭扎過究竟叫Tarte Tatin定呢個甜品好, 特登問一問侍者拎意見, 佢推介Cherry Clafoutis, 話呢個比較特別, 然後補充話佢自己個人就唔太鍾意, 食既時候會挑走晒啲車厘子, 咩料… “我唔鍾意但我推介”, 係咩方法既銷售技巧… 不過就係咁反而令在下更想試, 即管信佢一次~其實呢個甜品似面包布甸, 軟軟綿綿, 車厘子焗完之後濃縮左, 變得更甜, 配上櫻桃酒, 香味十足, 車厘子既粉絲不容錯過! 最後加埋暖身既布甸, 好warm咁為呢餐飯劃上句號.伴碟既有鮮忌簾, suppose要撈埋落去一齊食, 不過在下最近立志要將腹肌兄弟們打散, 將佢地分番開六舊, 所以並未品嚐~<DRINK>Hildon Sparkling Water 750mlPrice: $55下次黎應該飲Still,  因為平$20蚊~ 不過餐廳都只係收你$55蚊一枝, 其實算好克制~Earl Grey Tea 伯爵茶Price: $35Long Black 咖啡Price: $35<OVERALL COMMENTS>野食野飲COMMENT菜式係走傳統路線, 並無什麼特別花巧, 賣既係傳統法國煮法, 食得出佢地啲野比較down to earth, 唔會見到泡泡, 雕花雕草既擺設, 欣賞餐廳忠於原著, 並無隨波逐流, 跟隨所謂既普世價值.不過… 話雖如此, 呢道既食物的確比較 “有營養”, 久唔久黎一次會係賞心樂事, 每日都黎就麻煩準備定身後事~服務COMMENT一半侍者係外國人 (高級地方嘛), 一半local, 基本上佢地既服務都好好, 又有禮貌, 亦都會主動問下我地啲, 野食啱唔啱胃口.環境COMMENT雖然唔係坐喺餐廳入面, 而係outdoor 位置 (不過都係喺商場入面, 係有冷氣的, 所以為室內既outdoor), 原本以為會人來人往有啲嘈吵, 但可能由於商場實在太高級既關係, 出入既都係高檔人士, 所以同 “嘈” 呢個字拉唔上任何關係, 就係咁在下同友人又過左個寧靜既午膳.難得餐廳又肯dum本dum心機, 雖則喺商場入面, 每張outdoor枱都有太陽傘, 勁有法國bistro既優閒風味.抵唔抵食?以Lunch黎講, 每人四舊水講唔上抵, 不過喺金鐘PP呢啲高級地方, 可以坐得舒服享受一個高質既午餐, 連杯咖啡都只係賣緊3x幾, 其實喺某程度上都算還可以.寫呢篇review 時友人仲有三日就interview, 喺度衷心wish you all the best!! 但願呢篇文章喺facebook pulish之際, 你我同坐半島酒店內, 於斜陽下享受佳餚, 把酒言歡~注: 友人答應如果見得成呢份工, 會請在下食半島….…Read More

友人今日請左全日假, 方便下午去見工,  話要脫離地獄, 但願佢唔係由一個火坑跳去第二個火坑啦. Anyway, 在下無咩幫到手, 唯有喺佢見工前請佢食餐好既, 等佢輕鬆一下當幫佢打下氣. 以往有朋友自遠方黎旺角同在下食飯, 在下都會同佢地去呢間餐廳, 貪坐得舒服得黎野食又唔錯, 價位仲十分之OK, 每人大概200幾~餐廳喺康得思酒店 (之前叫朗豪坊酒店, 唔知點解好地地要改名…) 既大堂樓上 (5樓), 可以搭電梯去, 又或者喺大堂行條雲石樓梯上去, 非常方便.午餐可以叫Set, 又可以叫a la carte (都好多野簡, 推介漢堡包及炸淮山), 不過在下費事煩, 求其叫個set 就好了, 反正醉翁之意不在酒, 食咩唔係太重要, 重點係同朋友傾下計, 所以今餐喺某程度上環境會比食物質素緊要. 前菜同主菜三簡一, 甜品二簡一, 屈指一算都有18個combinations~ 哈哈~ 無聊算術題~<FOOD>Menu: Executive Lunch2 courses: $1983 courses (with dessert): $218Bread Bastet 面包籃正常貨式, 不過用黎點下個濃蝦湯又幾好味.Prawn Bisque with seafood agnolotti (Lime leaf oil) (推薦!)濃蝦湯配海鮮餃子 (青檸葉油)侍者一放上枱就香味撲鼻, 係一陣超濃既蝦味道, 令人充滿期待. 飲落去味道似龍蝦湯, 不過冇佢咁杰, 比較薄身, 但其濃厚蝦味仿似個口含住無數既蝦. 至於果兩粒海鮮餃子呢, 就真係冇咩特別, 叫做唔會齋飲湯咁寡..亮點係湯面既青檸葉油, 佢獨特既清香味道令在下諗起喺廚魔同MIC Kitchen食過既炸墨魚波配Kaffer Lime Sauce, 瞬間勾起快樂回憶, 將佢撈均之後, 飲湯時就會不停有輕微Refreshing既感覺. 大廚呢個配搭的確一流, 屬高度驚喜之作!不過留意番湯既份量都幾多, 而且感覺幾濟 (始終係Cream Soup), 飲完之後在下都飽左7成, 友人更加係無法完成賽事, 飲剩四分一~Coffee crusted Australian pork loin (Red cabbage, crushed green peas, Toasted corn, pickled shimeji, Pull porked croquette) (推薦!)澳洲豬排配咖啡脆皮 (紅菜頭, 綠豆蓉, 烤粟米, 醃日本磨菇, 碎豬肉球)主菜爭扎左一陣究竟食豬排定紅菜頭意大利飯好, 兩者都好吸引. 最後決定食豬排, 因為出色既豬扒喺香港比較少見, 而且豬扒係一種比較難處理既食材, 要整得好味唔係咁易, 當然… 若閣下滿足於大家樂既一哥焗豬扒, well, 似乎大家層次唔係好同… 閣下高好多…少少失分位就係飲完個蝦湯等成十五分鍾先上呢道主菜, 究竟係漏單定大廚真係咁醒, 知道個湯太full, 特登俾時間我地落格?? 前者吧… 佢冇咁醒吧…賣相吸引, 落刀果一下就知自己冇簡錯, 果然係好嫰, 食落肉汁澎湃, super juicy! 一啲豬羶都冇, 讚! 至於menu 所寫既咖啡味道唔太食到. 底下帶酸既香醋醬汁balance番隻豬既heavy, 而成道菜式有好少既微辣, 令人愈食愈上癮. 至於大配角綠豆蓉既獨特味道都好出, 青草氣息予人盛夏既感覺.至於炸豬肉波, 日本磨菇, 同烤粟米 (估計係碟邊既黃色粉末), 點綴品而已.Jasmine tea custard & orange, Gelee tart (chocolate sorbet) (推薦!)苿莉茶吉士撻配香橙啫喱撻 (朱古力雪皅)又係久違既高質甜品, 冇諗過會係呢度遇到, 清香既茉莉茶化身成啫喱狀, 同脆身既撻皮做一個contrast. 茉莉啫喱勝在唔甜, 佢既作用主要係提供冰凍口感同清新香味, 而味道就交俾底下既香橙醬, 同樣帶清香而不過甜. 伴碟既有紅桑子, 蜜瓜, 橙啫喱, “綠葉” 是也~ 不過舊朱古力雪皅唔知咩事, 在下覺得有少少格格不入~大熱天時食到呢個甜品真係令人精神為之一振.<DRINK>Warm water 暖水Price: Free of charge一坐低侍者就即刻遞兩杯暖水過黎, 雖然佢係酒店餐廳, 都冇屈我地飲法國春水, 成件事好美好, 咁又慳番幾十蚊~Earl Grey Tea 伯爵茶Price: Included很香的伯爵茶, 在下很喜歡. 不過略嫌茶葉落得重手, 濃左少少, 飲到中段有點澀.<OVERALL COMMENTS>野食野飲COMMENT每一道菜 (除左面包籃) 都屬高水平之作, 味道賣相媲美米芝蓮Fine Dining 餐廳. 自從黎左新既大廚, 呢間餐廳既水準不停提升. 倘若晚餐黎既話可以試埋生蠔, 之前食過, 新鮮又多款, 而且價錢都幾近人, 不時仲有啲白酒配半打生蠔優惠!埋單時侍者告之剛於昨日轉左新餐牌, 差唔多又係時候擇個吉日去試下佢地既新dinner menu!服務COMMENT一貫四星酒店既服務, 談不上超專業, 但亦屬應有既酒店級數, 而且有笑容, 算主動. 唯一扣分位係在下離開時冇人講88. 呢啲門面野, 身為酒店餐廳要注意一下.環境COMMENT今日客人唔算多, 連埋我地4-5枱客到, 加上餐廳本身都唔細, 所以在下享受左一個寧靜既午餐. 而且我地今次坐疏化位, 最適合慢慢食個Casual Lunch, hae住hae住同朋友傾計.不過之前週末黎食Tea 同埋禮拜五六黎食晚餐, 餐廳都幾full, 咁就有啲嘈啦~ 所以~ 推介平日中午黎食Lunch~抵唔抵食?水又唔駛錢, 又有齊前菜主菜甜品, 仲要包埋咖啡茶, 食物質素高, 用餐環境同服務又係酒店級, 仲要可以儲飛行里數, 抵?? No LA! 係好抵啊!! 係很抵啊!! 係好很抵啊!!! (因為重要, 所以講三次)Asia Milesalibi係Asia Miles伙伴餐廳, 用埋渣打Sammi果張信用卡, 消費$470就輕鬆賺左346里數, 抵到今晚開心訓唔著!.要喺旺角呢個鬧市搵個舒服又寧靜既地方食餐好或者同朋友傾計 (even約客人食飯), 在下都諗唔到有咩地方好得過呢度. 用“旺角綠洲”黎形容alibi就最貼切不過.開心既時光過得特別快, 唔覺唔覺又到2點鍾, 在下要回公司, 而友人就去破地獄, 在此僅祝友人轉工成功, 咁在下餐半島就有著落了.…Read More

母親大人生日, 在下諗住帶佢同屋企人飲餐靚茶慶祝一下, 諗過去酒店中菜廳, 但覺得好似冇咩誠意, 所以決定去有 “富豪飯堂” 之美譽既福臨門, 淨係聽過名都夠晒勁, 仲要係大劉去開果間 – 灣仔店. 在下知道呢間野堅出名, 所以老早就喺2個星期前訂定枱 (事實證明在下做得啱, 因為當日見到大量客人想walk in, 都被知客婉拒).<災難級安排>訂左1點鍾, 慣例早到10分鍾, 被告之張枱未ready, 不過已經埋緊單, 要我地喺地下大堂等多陣, 雖然冇諗過黎呢啲高級中菜廳都要等位, 不過畢竟係在下早到, ok既~ 但一等就等左25分鍾, 者係成1點15分先上去… 明明訂左1點鍾…唉… 而呢25分鍾都算難過了, 要母親大人山長水遠入黎飲茶, 仲要佢等, 感到有少少安排失當同不孝…不過更難過既就係喺等候期間不停有 “熟客” 入黎, 知客直接帶佢地上餐廳, 就好似有人去到迪士尼樂園買Fast Pass, 一次過打晒百幾人尖. 在下都曾經用過Fast Pass, 所以在下理解的… 人有貴賤之分, 熟客有熟客既待遇, 只不過, 當你喺大堂門口一直無了期咁等待既時候出現一班遲黎先上岸既熟客, 心裏就有點不是滋味.然後等啊等, 終於叫到我地. 上到去被安排坐喺電梯口第一張枱… (好彩既叫係有個玄闗擋一擋, 未致於對正晒個電梯口), 在下稱呢個位為 “屁屁位” (斯文叫法…), 同埋好明顯呢張枱係見人多臨時搭建出黎. 等左25分鍾, 滿心期待, 最後竟然換黎呢張枱, 唉…天忙我也…等在下講解一下呢個位如何 “屁屁” 法: 首先  後面電梯不停有食客出入, 左面收銀部信用卡機由在下坐低到離開, 都不停埋單發出吱吱聲, 屬於極度擾人級別, 而右面係廚房, 每隔一陣就有果啲匙羹倒黎倒去既嘈音, 不過都未到重點...由於呢個位近齊餐廳門口, 廚房, 收銀, 所以有大量侍者喺呢度溝通, 通知邊個入黎, 邊張枱加餸, 邊張枱埋單, 在下呢個軍事重地都接收得一清二楚… 在下唔敢講好嘈,但以上四樣野不停輪流轟炸, 任何心情雅緻都被抹殺了.被安排坐呢個屁屁位, 在下不能說係餐廳既錯. 位, 總要有人坐, 要怪, 就只怪時不與我, 只怪在下唔係熟客...所謂一不離二, 坐低之後足足等左成分鍾都冇人招呼茶水, 冇人俾點心紙, 純粹乾等然後同爸爸媽媽妹妹你眼望我眼, 在下以為我地張枱變左透明. 最後好彩都有位年輕侍者察覺我地被人遺棄左, 拿拿臨開番壼茶.喺高檔餐廳遇到咁既待遇在下還是第一次, 嗰下真係唔識俾反應, 所以喺未點野食之前已經冇晒心情, 不過點都好, 母親大人生日, 呢啲場面唯有扮冇野方為上策, 無謂搞到大家尷尷尬尬.晏就黎呢度通常都係叫點心為主, 加埋個炒粉面飯就夠食了.<FOOD>餐前小食Price: $20好似係豆之類既野, 不過在下完全冇印像… (可能呢一刻仲係喺心情極度低落既時候, 咩記憶都冇晒)蠔皇叉燒包Price: $65食包最怕面粉唔靚, 食到痴晒牙, 呢度當然冇呢個問題. 叉燒餡既濃淡比例適中, 好味!菜膽牛肉球Price: $65牛肉球夾雓大量馬蹄, 爽口既佢同軟綿綿既肥牛肉係好朋友, 同街外既有明顯分別. 不過, 一講起牛肉球, 在下即刻諗番起曾經係在下最喜愛但已結業既玉蕾, 佢既和牛肉球真係頂呱呱~筍尖鮮蝦餃 (推薦!)Price: $75呢道既名物, 同時係在下簡呢度食飯既主要原因. 到目前為止, 在下依然覺得灣仔福臨門既蝦餃係全港第一. 單單係皮薄已經撼贏好多地方, 薄得黎唔易穿, 彈得黎唔會咬死人. 至於個餡, 大大隻蝦加埋荀尖, 又係一道佳作.爽滑鮮蝦腸Price: $75蝦腸隻蝦當然冇問題, 同蝦餃隻蝦一樣咁靚~ 腸粉皮似我地喺大埔陳漢記食開果隻, 又滑又薄. 不過母親大人似乎鍾情於厚身果啲, 話咁薄既腸粉唔似腸粉.雞粒荔芋角Price: $65芋角係在下最愛既點心, 只要見到佢出現, 必定點上一客, 不過呢款點心喺香港已經買少見少…. 老實講, 在下仲未食過唔好食既芋角, 福臨門整既都唔錯, 芋香十足, 又夠鬆化. 不過更喜歡利苑酒家既蜂巢芋角, 佢既好味程度足以令在下一次食三隻~哈哈~蜜汁燒鱔Price: $220本身想叫個燒味雙拼 – 燒腩仔配叉燒, 不過之前食過冇話特別驚喜, 見點心紙有呢個燒鱔, 所以抱住好奇心去試試. 出黎效果唔錯, 鱔本身幾肥美, 燒得夠惹味又夠脆 (估計係臨尾再用火熗燒一燒層皮), 點埋啲蜜糖汁, 又係好食!美中不足係灘凍左之後, 底下塊皮變韌, 完全咬唔到, 呢道菜都係要趁熱食. 講起燒鱔, 不得不提大尾篤間泰國菜館忠誠茶座, 佢都有燒鱔, 勁肥勁香不特止, 仲真正做到外脆內軟, 相信所有愛鱔之人都無法抗拒.蟹肉瑤柱蛋白炒飯 (推薦!)Price: $300本身想叫埋呢度既另一名物 – 荷葉飯, 不過父親大人唔鍾意. 之後曾經考慮點一客龍蝦炒伊面, 不過擔心會係天文字數 (餐牌好似係寫住時價), 唯有叫個貼地又踏實既炒飯.所謂貼地…都要成300蚊, 其實都唔係好貼, 不過其他炒粉面飯都係200幾蚊起跳, 變相呢個炒飯好似抵好多, 有蟹肉wor. 收得你3舊水, 佢又真係俾足料, 蟹肉同瑤柱份量十足, 蟹肉唔係用 “一絲絲” 而係用 “一疏疏” 黎形容, 基本上每一口飯都充斥蟹香. 飯亦炒得乾身, 一啲都唔油, 同名人坊既富哥炒飯名列在下既排行榜首位.生磨合桃露  (推薦!)Price: $50​​又係在下最愛, 以前每次黎都必點, 食得出唔係用粉開既, 食落仲有粒粒合桃, 又香又夠杰, 正!蛋白生磨杏仁茶Price: $55妹妹則點左杏仁茶, 雖然在下無綠試食, 但聽講味道都不錯!<DRINK>茶水: 普洱$20 per person<OVERALL COMMENTS>野食野飲COMMENTS以點心黎講, 其實呢度既認真唔錯, 拍得住出面啲五星酒店中菜廳, 尤其蝦餃更加係難逢敵手. 而燒鱔同蟹肉炒飯更屬驚喜之作. 曾經幫襯過佢幾次午餐同一次夜晚, 所有食物都十分高質!利申: 食物一欄評分只有33.5... 估計係因為屁屁位影響到心情, 從而影響到味蕾... 題外話: 佢地有個梅香鹹魚蒸肉餅, 索價300幾, 係在下有生以黎食過最貴既蒸肉餅, 不過同時係在下食過最好味既! 誠意推介!服務COMMENT之前黎果幾次, 佢地既服務都好專業同窩心. 不過唔知今日係唔係太多客人既關係, 桃花依舊, 人 “臉” 全非, 當日既細心服務同親切笑容在下已經見唔到… 或者都有既, 不過限左量, 悉數留俾 “富豪”, “名人”, “熟客”.環境COMMENT撇除屁屁位, 真心講, 呢度既用餐環境的確好唔錯, 裝修靚, 枱櫈坐得舒服, 枱同枱之間又闊落, 基本上就算坐到滿晒都唔會覺得嘈. 冇野衰, 就衰在下張枱真係差到冇朋友.題外話… 又係在下瀨野… 有一張大枱, 佢地有幾個細路, 臨走時啲細路唔知點解咁興奮, 一邊尖叫一邊你追我逐, 而咁啱我地張枱喺正門口, 俾佢地以環迴立體高頻圍攻, 在下真心瞬間崩潰… 而啲細路又唔覺意踢到在下張櫈… 唉… 抵唔抵食?叫得做富豪飯堂, 當然預左唔會平. 若只論食物質素同埋整體既環境服務, 在下覺得還可以, 價位其實同出面啲中菜廳例如龍景軒, 文華廳差唔多. 不過如果以在下呢餐飯黎講… sorry, 我真係寧願冇黎過, 今餐飯撤底破壞晒在下對福臨門既美好回憶…餐飯雖被評為S級 (大海級), 不過呢個S主要係針對成個Dining Experience, 並非話佢野食唔好食, 服務唔好, 或者地方污糟邋遢, 即管當在下果日烏雲蓋頂, 咁災難性既用餐體驗都俾我們這一家遇到.富豪飯堂, 人地畫公仔都已經畫晒出腸, 專門招待富豪, 在下呢種平民百姓走錯了地方, 連門面都未睇清楚就貿然走左入去, 變相自取其辱… 諗住媽媽生日, 帶佢食好啲, 唉~ spoil左成件事, 錢就俾左, 換黎既就只有失望, 真係賠了夫人又折兵.人貴自知, “富豪” 兩字跟在下仲有一段光年級既距離, 怕且餘生都唔會有福氣感受到 “熟客” 既待遇, 故此今日一別, 亦是緣滅.…Read More