tiffanytoyi's Profile

喺九龍城行街, 肚餓又唔想食咁多嘢? 今次我發現咗一間隱世小食店.試咗幾款店家推介嘅小食.酥脆墨魚咀 (HK$17/串)外皮脆卜卜, 咬落有啲彈牙, 但唔係韌.食落有椒鹽香.金磚魚豆腐 (HK$14)一份六件.外層彈牙, 內裡口感似豆腐.食落唔油膩.蜜糖炸燒賣 (HK$11/5粒)炸燒賣外皮炸得好脆.仲keep到彈牙嘅口感, 唔會硬掘掘.我覺得搽咗蜜糖有啲BBQ風味.招牌炸壽司 (HK$20/6件)餡料有腸仔同蟹柳.壽司炸得酥脆.表面有少少醬油.食落有啲似食緊飯焦嘅感覺.絕對值得一試!秘製蒜辣豬皮 (HK$16)雖然唔係依間店嘅推介, 但都有驚喜!秘製蒜辣汁辣得過癮, 蒜香濃郁.豬皮索晒醬汁.入口爽脆又惹味.招牌香辣雞翼尖 (HK$20)雞翼尖份量都幾多.炆到腍晒, 入晒味.個醬汁同豬皮個汁一樣.配咗雞翼尖一樣好食.會令你食到停唔到口.強烈推介!特濃凍朱古力 (HK$26)喺香港好難搵到真正濃郁嘅朱古力.呢杯絕對值得一試!即使加咗冰, 朱古力味依然濃郁.甜度適中.入口順滑.整體嚟講, 呢間小食店嘅食物完全超乎預期.食物款式多, 高質, 而且價格親民.下次經過, 我一定會再買佢嘅招牌炸壽司同埋雞翼尖!…Read More

為咗有8折優惠, 我book咗8:30pm嘅位.點知咁夜仲係full house, 氣氛勁熱鬧!雞皮涼拌豆腐 Chicken Skin Salad (HK$68)魚子份量係多嘅.但唔係好食到有雞皮.魚子嘅味道太搶, 搶過晒其他材料嘅風味.整體份量少咗啲, 食完有啲意猶未盡.牛肉他他腐皮麵 Beef Tartare (HK$188)牛肉他他食得多, 但配腐皮麵真係第一次試.幾有新意.牛肉同雞蛋撈勻再加埋蔥, 口感好滑, 味道鮮味.酒糟薑蔥爆雞胗 Chicken Gizzard (HK$58)醬汁好香.雞腎入晒味.食落有少少辣味同芝麻香, 好惹味.係一道好好嘅送酒小菜.乳鴿 Pigeon (HK$85)皮脆肉嫩.口感有啲似鴨胸.配上橙油同藍莓醬.兩款醬都同乳鴿好夾.食落唔會好油膩.我覺得點多啲醬味道更好.煙燻鯖魚麵 Smoked Mackerel Noodle (HK$168)麵好脆, 辣辣地咁.不過鯖魚嘅煙燻味唔太突出.但整體味道都算唔錯.三黃雞飯 Yellow Chicken Rice (HK$198)呢個係全晚最好食嘅一道菜!好多食評都話係最好食嘅三黃雞飯, 真係名不虛傳.飯有飯焦, 嗍晒雞油, 食落好香雞油味.入面有粟米同埋菇, 味道層次豐富.雞肉質感結實.份量都唔少.呢個一定要試!芝士蛋糕 Cheese Cake (HK$88)如果同朋友慶祝生日, 建議pre-order呢個芝士蛋糕.有得寫字.而且好好食.整體嚟講, 食物賣相精緻, 三黃雞飯最好食.但呢個份量對四個人嚟講唔係好夠飽.餐廳環境比較熱鬧, 想靜靜地飲嘢傾偈其實唔係好適合.…Read More

荃灣泰國菜餐廳選擇多.今次我試咗近Citywalk嘅依間餐廳, 真心唔錯!菜單超豐富.串燒、炒菜、河粉、海鮮、甜品, 應有盡有.而且價錢親民, 性價比高.令我忍唔住叫多幾款嚟試.泰式濕炒豬肉河粉 (HK$78)可揀乾炒或濕炒.肉類方面, 有豬、牛、雞揀.今次我就揀咗個平時少食嘅濕炒豬河.濕炒河芡汁會比較多.河粉幼身, 口感煙韌.係用豆瓣醬炒, 好香, 好有鑊氣.除咗有豬肉片, 仲有菜同埋菇.調味適中, 食落唔會好鹹.沙嗲串燒雞肉 (HK$88/6串)我覺得沙嗲配雞肉係最好食, 所以揀咗雞串燒.依個雞肉燒得乾身咗啲.不過點埋濃郁嘅沙嗲醬食都幾惹味.馬拉盞炒鮮魷通菜 (HK$88）炒通菜都有兩款.我揀咗有魷魚嗰款.魷魚爽脆.通菜微辣.我覺得用嚟餸飯應該幾啱.芒果糯米飯 (HK$38)白色嗰隻硬身啲.紫色嗰隻軟糯啲.芒果超甜.落咗椰奶嘅糯米飯甜甜地鹹鹹地咁, 我覺得好好食.原個鮮椰青 (HK$35)椰青好大個.椰青水好清甜.菠蘿沙冰 (HK$30)夠晒冰.唔係好甜.飲完好爽.整體嚟講, 呢間泰國菜味道地道, 選擇多, 抵食又滿足.鍾意食泰國菜嘅朋友, 值得一試!…Read More

為咗慶祝餐廳五周年, 而家餐廳做緊快閃大激賞澳洲M4-M5和牛套餐 (HK$260/人)叫套餐佢會送日式和風雞煲.雞煲好香, 雞肉份量多, 而且啖啖肉.唔食辣嘅朋友都唔使驚, 因為佢嘅辣味真係少到我呢個唔食得辣嘅人都食到.佢係有少少麻味.所以好惹味.啲雞肉吸收晒雞煲嘅汁, 好好食.食完雞煲就可以加湯打邊爐.我叫嘅和牛套餐有5款肉俾你揀:頂級牛肉、牛肩胛、保濕豬豚肉、澳洲和牛、牛白肉全部肉都好好食.我最鍾意食牛肩胛同豬豚肉.除咗肉, 自助區仲有勁多配料俾你選擇.有菜、丸、麵、餃、菇.每類都有好多款選擇.揀唔到嘅, 可以全部都要晒.我特別鍾意佢嘅墨魚滑, 食落真係會食緊墨魚粒粒.飲品方面, 都係有好多選擇.除咗罐裝飲品, 仲有自家製嘅雞骨草同冰糖紅棗燉雪耳.最正嘅係, 啤酒都有幾款俾你選擇, 仲要唔使加錢.佢嘅冰糖紅棗燉雪耳值得一讚, 飲落清甜, 打邊爐飲佢感覺唔會好熱氣.喺社交平台like and share, 仲會送五款蒸海鮮.有帶子、鮑魚、蟶子、蠔同埋蝦.全部都好新鮮, 勁鮮味.自助區仲有多款甜品同雪糕.食完真係勁滿足呀!呢間餐廳仲要免+1真係勁抵食呀!…Read More

依間越南餐廳係朋友推介.門面精緻, 內部環境舒適, 帶點格調.非常適合聚餐.Deep -fried Spring Roll 安南春卷(HK$128)春卷外皮香脆, 食落唔油膩.我鍾意配埋菜一齊食, 感覺冇咁邪惡.An Nam Skewers Platter 安南串燒拼盤 (HK$168)串燒拼盤包括雞、牛、豬三款肉.烤得啱啱好, 仲keep到肉汁.全部都好惹味.點埋個沙嗲醬更好食.Crispy Vietnamese Shrimp Cake 越南炸蝦餅(HK$148)蝦餅雖然薄啲, 但口感依然好彈牙.好食到令人回味.An Nam Crispy Chicken 傳統南乳燒雞 (Half - HK$258)半隻雞份量十足, 每件都肉厚多汁.食落皮脆肉嫩.配搭嘅南乳醬味道偏鹹, 略為蓋過雞肉嘅原本嘅味道.唔係好建議大家點個醬食.My Tho Style Fried Rice Noodle 美拖炒沙河粉 (HK$148)一上枱就聞到好香.份量十足, 食材豐富.尤其係啲蝦勁大粒.好食到, 要我一個人食晒一碟都得.Wor-fried Morning Glory 馬拉盞炒通菜 (HK$98)雖然加咗辣椒, 但辣度適中.係食到有鑊氣嘅.味道唔錯.Black Sticky Rice with Mango 香芒黑糯米 (HK$98)芒果糯米飯配雲呢拿雪糕真係比較少見.芒果甜度適中, 黑糯米軟糯, 有少少甜味.所有嘢配埋一齊好好食.Lychee Smash 荔枝特飲 (HK$78)夏天飲幾啱.飲落幾清爽, 味道似Mojito加淡淡荔枝味.裏面係有荔枝果肉㗎.整體嚟講, 食物味道質素高.味道令人滿意.雖然價格比較高, 但環境舒適, 服務周到, 我覺得係物有所值嘅.…Read More

呢間餐廳環境超正!有落地玻璃望住園景.露營風嘅枱凳同decoration好有feel, 空間感十足.帶小朋友或者狗狗嚟都啱.Breakfast:經典班尼迪蛋、田園沙律、蕃茄扒 (HK$88)個蛋做到流心效果, 煙肉香而不柴, 鬆餅烘得軟硬適中, 配上酸酸嘅醬汁, 食落好開胃.蕃茄扒都烤得啱啱好.沙律菜都幾新鮮, 唔會有苦澀味.特濃凍朱古力 (+HK$42)依個特濃凍朱古力一定要試!真心係我飲過最濃嘅凍朱古力!連上面嘅cream都超好味.撈勻飲, 個味道真係不得了!而且賣相好靚.Lunch: 法式蟹肉龍蝦湯 (HK$48)依個龍蝦湯都有驚喜.味道超濃郁.個湯係見到有一絲絲嘅蟹肉, 同埋係食到粒粒龍蝦肉.口感都幾豐富.意式煙三文魚意粉 (HK$128)意粉軟硬度適中, 食落好creamy.蘑菇、洋蔥、三文魚碎都幾多.食完好滿足.鮮奶咖啡 (HK$38)鮮奶咖啡味道都唔錯.每日一啡嘅, 我表示滿意.整體嚟講, 依間餐廳環境舒適, 食物正, 而且性價比都幾高. 想喺科學園搵食Chill吓, 呢度係一個唔錯嘅選擇.我下次都想帶屋企人嚟試吓晚餐!…Read More

呢個天氣又熱又焗, 行街淨係想搵啲冰涼嘅飲品同埋啲小食食吓.今次係新蒲崗搵到依間小食店.飲品選擇多到不得了, 解渴嚟呢度買嘢飲真係啱晒.芒芒特濃鮮奶(HK$38)依間店嘅鮮奶全部都要係用Meiji鮮奶製成.奶香濃郁.芒果粒都幾大粒.份量都幾多味道有少少似楊枝甘露.天氣熱嘅時候飲, 我覺得都幾爽, 而且味道唔會好甜.草莓4.3特濃鮮奶(HK$36）作為店內Top 3人氣飲品, 草莓特濃鮮奶真係名不虛傳!滿滿草莓果肉, 配上濃厚Meiji鮮奶, 奶香同果味完美融合!攪勻之後飲, 口感順滑, 甜度適中.正！Nutella 榛子格仔餅 (HK$26)格仔餅係即叫即整, 熱辣辣.啲醬份量啱啱好, 食落又唔會過甜.不過一個人食晒有啲邪惡.椒鹽燒賣 (HK$12/5粒）炸燒賣我都好耐冇食.之前食過有啲舖頭嘅炸燒賣係勁硬.但係呢個燒賣係做到外脆內軟.食落都仲有燒賣嘅口感.加埋椒鹽粉幾惹味.整體嚟講, 依間小店嘅飲品味道唔錯.下次經過我都想試埋佢唔同味嘅雞蛋仔.…Read More

放假同班friend想搵個舒服嘅地方gathering.今次就搵到西環呢間Cafe.首先講吓我朋友叫咗啲乜嘢食先：香濃日式咖喱豬扒飯 (HK$78)朋友俾咗一件豬扒我試.豬扒厚身, 外脆內嫩.不過咖喱就冇咩特別, 係普通嘅日式咖喱.松葉蟹·蟹籽明太子天使麵 (HK$108)慢煮加拿大豬鞍 (HK$128)配咗甜漬蘋果莎莎同埋薯菜.朋友話個豬鞍食落唔會韌.香煎比目魚扒伴西式薯菜 (HK$118)和風烤雞扒定食 (HK$88)呢個定食勁豐富呀.雞扒都烤得好香, 肉質嫩滑, 好好食.配菜都樣樣味道唔錯.開心果特調 (HK$56)開心果味超濃, 味道鹹鹹地咁.裡面仲有啲軟滑嘅豆腐花, 飲落口感都幾特別. 不過我覺得試一次就夠啦.煙肉芝士薯條 (HK$78)芝士醬多到誇張, 煙肉都好香脆.我覺得呢個係必試!呢個係期間限定嘅雪の豆腐巴斯克芝士蛋糕 (HK$62)好濃豆腐味, 配埋啲脆脆都幾好食嘅.但係食到尾段我就覺得有啲乾.E FOR EGG芝士奶蓋招牌窩夫 (HK$88)依個窩夫打卡一流.係食到有芝士奶蓋味嘅.夾心似雲呢拿味雪米糍.唔係唔好食嘅, 不過我覺得都係試一次就夠.整體嚟講, 環境幾好, 坐得好舒服嘅.係gathering唔錯嘅選擇.…Read More

最近同friend喺銅鑼灣無意中發現到依間日式餐廳.餐廳環境優雅舒適, 無論係同朋友慶祝生日定係見客食飯, 都係一個唔錯嘅選擇.服務質素亦都令我留下深刻印象.Lunch Menu (HK$368 +10% per pax)前菜 (Appetizers）選擇豐富.有魚生、玉子燒、茶碗蒸、螢光魷魚…全部都好精緻, 好好食.燒物 (Grill Dishes)有燒雞腿同埋鮭魚南蠻漬.燒雞腿外皮脆, 燒得好香.魚肉都keep到嫩滑.主食我揀咗釜飯同埋鰻魚飯各一.兩者可以先試原味, 再加入盒內自己鍾意嘅香料, 體驗唔同風味.釜飯 (Kamameshi)我就揀咗和牛.成個飯都好香牛油味, 飯粒煙韌, 兩者真係絕配.除咗原味品嚐, 仲可以加入高湯變成茶漬飯.加埋啲脆脆, 口感層次勁豐富.再加入少少芥末, 我覺得味道更上一層樓.鰻魚飯三食 (Hitsumabushi Unagi)鰻魚有蒲燒同埋白燒兩款製法.兩款鰻魚都好好食.我鍾意食白燒多啲, 因為香脆啲.同樣可以加入高湯變茶漬飯, 味道令人一試難忘.真係超好食呀!豆腐紅豆雪糕 (Dessert)最後點少得甜品.依個雪糕都幾濃豆腐味, 配埋甜甜地嘅紅豆味道唔錯.依間餐廳無論環境、服務定食物質素都唔錯, 絕對值得一試!…Read More

今次再去食中菜.依間餐廳嘅食物味道同質素真心唔錯.百花蜂巢豆腐 （HK$98)係我最鍾意食嘅一道菜.豆腐炸得金黃香脆, 唔會油膩.上面亦都鋪滿蝦滑.食落有兩種口感.食完一嚿即刻想再食多一嚿.椒鹽魷魚鬚 (HK$88)魷魚鬚得炸得好香脆.味道正常, 但係我覺得價錢貴咗少少喇.招牌紅燒乳鴿王 （HK$88/隻）呢個要預早一日預訂.我哋訂咗五隻.皮脆肉嫩, 啲肉汁都仲keep到.如果啲肉再多少少就更好喇.價錢比一般酒樓貴, 但我覺得呢個質素嚟講, 真心值嘅.欖角冰梅骨 (HK$158)豬肉肥瘦適中.食落個口感唔會硬.酸酸甜甜嘅味道好啱送飯.海味雜菜煲 (HK$138)食中菜點少得蔬菜.呢個海味雜菜煲好足料, 勁多魷魚同多菜.啲菜都好香鹹香味, 好好食.楓林小炒王 (HK$158)味道唔錯, 再香口啲、惹味啲就更好啦.豆腐花 (HK$88)我第一次見即撞嘅豆腐花.質地好滑.鍾意食黃糖嘅, 可以好似我咁加勁多黃糖.好滿足呀!大壽桃 (HK$32/個）個壽桃都有少少驚喜.勁多餡, 裡面仲有成舊鹹蛋黃.勁邪惡.依間餐廳, 我覺得係幾適合一家人聚餐嘅.…Read More

最近喺太子發現有一間唔錯嘅手工糖水舖, 真心推介!今次我哋叫咗三個糖水同一個小食, 全部都好有驚喜!蘆薈雪燕綠豆邊馬蹄爽 - 凍(HK$45)呢個糖水真心要讚!呢排天氣又焗又濕, 食依碗冰凍嘅馬蹄爽, 真係透心涼.材料好足, 馬蹄粒大粒又爽脆, 綠豆同雪燕份量都唔少.甜度啱啱好, 清新唔膩, 食完超滿足!新鮮海底椰椰汁雪燕桃膠露 - 凍（HK$48)呢款糖水椰汁味濃郁, 夏天食一樣好清涼.雖然冇馬蹄爽咁清新, 但有椰子肉同埋勁多桃膠, 口感豐富.超正!黑白配 - 自家製芝麻糊配蛋白燉3.6牛乳 (HK$40)呢款糖水完全係另一種體驗.味道會濃啲.芝麻糊食落好香, 入口順滑.蛋白燉牛乳口感似食緊布甸, 質感超滑溜.鍾意食芝麻糊同燉奶嘅朋友, 依個配搭真係必試!香脆豆卜釀豬肉 (HK$38/5粒)冇諗一間糖水舖嘅小食可以咁出色!一上枱已經聞到香味.每粒係一口size.豆腐外層脆脆地, 裡面釀滿豬肉餡.而且啲肉汁仲鎖住喺裡面.就算唔點泰式辣醬都已經好夠味, 好好食.呢個小食一定一定要嗌!下次再嚟太子，我會試吓其他甜品, 同埋再食香脆豆卜釀豬肉.…Read More

之前同男朋友係尖沙咀「韓國街」見到依間餐廳勁多人排隊.今次想食韓國嘢, 就即刻諗起佢.餐廳勁有韓國小店feel, 好似去咗韓國咁.食物選擇都幾多.今次我試咗幾個我喺韓國都會叫嘅嘢食.前菜先上枱嘅有三款前菜.- 泡菜酸酸辣辣咁幾開胃.- 涼拌芽菜好香麻油味.- 涼拌魚板淡淡魚鮮味同埋甜甜地咁, 我幾鍾意食.海鮮薄餅 （HK$149)勁大份啊!滿滿魷魚同韭菜.絕對唔係得啲粉.唔好以為個醬紅卜卜好辣, 其實係完全唔辣㗎.佢係魚露嘅味道.點一點, 個海鮮薄餅變得勁鮮味.韓式豬手&五花肉 (HK$318)依個真係必試!可以一次過試晒韓式豬手同五花肉.除咗肉仲會配埋沙律同埋菜.啲肉夾菜食可以解膩.五花肉肥瘦均勻.豬手膠質滿滿, 啲肉勁嫩.有兩個醬汁可以點.我鍾意依個有蜆肉嘅醬, 味道勁鮮!紫菜飯團 (HK$70)紫菜多到誇張.飯撈咗麻油同飯素.食落仲暖暖地, 好好味.攞上手整波波好玩又滿足!整體嚟講, 呢間餐廳嘅韓國料理都幾正宗, 好高質.而且份量都幾多, 兩個人食到勁飽.食完呢餐飯, 我有少少掛住韓國添.…Read More

孜然屋喺尖沙咀開咗新分店啊!依間餐廳我book mark咗好耐, 另外兩間分店都係港島, 都未有機會去試.今次去尖沙咀行街, 終於都試到喇!黑毛和牛丼 (M) (HK$156)當店名物, 梗係要試吓啦.M size份量我覺得已經夠食.套餐仲包括沙律、漬物同味噌湯, 性價比幾高.和牛入口即溶, 撈埋生蛋, 每一啖都有濃濃嘅蛋香同牛油香, 勁好食.沙律清新.漬物酸酸地好開胃.枝豆我都食得好滋味.飲埋碗味噌湯, 真係好滿足!蒲燒鰻魚飯 (HK$164)一樣好出色!鰻魚燒得啱啱好, 肉質軟嫩.仲鋪滿成個飯面.鰻魚汁滲晒入飯粒, 每一啖都係享受.兩個飯要二選一嘅話, 我係完全選擇唔到, 因為兩個飯都好出色!水果茗茶 (+HK$29)裡面有柚子、橙、青檸同埋蘋果粒.甜度調得啱啱好.荔枝西柚梳打 (+HK$26)賣相勁靚.飲落都幾fresh.絕對係打卡之選.餐廳食物質素超高, 價錢合理.Menu仲有好多套餐選擇.我下次要試埋佢個咖喱定食同埋鍋物先得.…Read More

星期五Lunch Time喺太古坊搵食真係一個挑戰.間間餐廳都爆滿, 等位等到懷疑人生.今次就搵到呢間餐廳.餐前麵包有兩款暖笠笠嘅自家製麵包: 蕃茄麵包 & 果仁麵包兩款都好好食, 外脆內軟, 烘得啱啱好.特別係果仁麵包, 咬落有堅果香, 同埋好有口感.仲有黑松露醬配搭, 好食到連我呢個唔愛醬料嘅人都忍唔住點晒嚟食.Set Lunch (HK$150)Starters:Selection of Italian Cold Cuts & Cheese好少見set lunch starter會有咁大盤cold cut & cheese.裡面有三款凍肉、芝士、醃洋蔥、甜椒同酸種麵包.Salami 我覺得有啲辣.Ham上面有啲甜椒, 所以食落有鹹香之外, 仲有微微辣味, 好開胃.酸種麵包烘得乾同脆, 配埋芝士或Salami食, 真係好正!Tomato Bruschetta呢個係健康之選.多士上面勁多蕃茄粒, 底層鋪滿火箭菜, 味道清新.但如果你唔鍾意火箭菜嘅獨特味道, 我建議唔好揀呢個啦.Mains:Ravioli Fiorentina意大利雲吞裡面係滿滿嘅ricotta芝士同埋菠菜蓉.配埋蕃茄同羅勒醬, 酸酸哋好開胃.份量亦都啱啱好.Spaghetti Carbonara (HK$18)呢款Carbonara用嘅意粉比較粗身, 我覺得口感冇咁彈牙, 有啲似粗版蕎麥麵.上面嘅豬面頰肉係炸得好香脆.撈埋意粉嚟食, 我覺得好香好好食.不過芝士味就略為淡咗啲.Drinks:Iced Tea我哋就揀咗凍嘅檸檬茶.味道中規中矩, 飲落清爽.食完意粉飲返杯凍檸茶解下膩都唔錯.…Read More

依間餐廳嘅裝修好有特色.好似韓國市場或者路邊攤, 有韓式大牌檔feel.前菜餐廳先送上兩款泡菜.泡菜有啲辣, 但都幾開胃嘅.呢個芽菜我覺得幾好食, 帶點麻油香.黑松露Mayo炸雞 (全份) （HK$238)呢個係店長推薦嘅炸雞.有半份同全份選擇.今次我哋叫咗全份.一上枱就聞到好香黑松露味.炸雞皮薄, 同埋都幾脆.雞肉都keep到嫩滑.不過份量對於兩個人嚟講, 我覺得有啲多, 點半份就夠喇.芝士泡菜煎蛋卷(HK$112)呢個真心推介!芝士控一定會鍾意.蛋卷上面鋪咗厚厚嘅芝士, 有拉絲嘅效果.一定要趁熱食.裡面都勁多泡菜.酸辣同芝士嘅配搭勁正呀!街頭魚糕串串(M) (HK$146)好彩我叫咗中size咋.依個份量已經好多.我見人哋點咗大size係勁大盤.佢除咗有一條條魚糕串, 另外仲有細細片嘅魚糕.味道講唔上特別, 但係係韓國食魚糕嘅味道.柚子梳打 (HK$38)& 荔枝梳打 (HK$38)味道唔會好甜.食完熱辣辣嘅魚糕, 飲返啖梳打都幾爽.整體嚟講, 食物質素都唔錯.如果想食韓國嘢, 我會再嚟嘅.…Read More