我係大隻妹's Profile

香港都算得上係非常多日本餐廳嘅地方，當然質素又好又唔好啦！女仔約食飯十次有八次都會想食日本嘢，今次我哋有嚟到呢間立食壽司嘅立鮨喇！雖然已經嚟過幾次，但係每次都好有驚喜！香港好少有立食壽司嘅地方，其實日本係好流行，因為好多時候可能都係一兩個人去食飯，有啲人想快啲食完走，有啲人就鍾意同壽司師傅傾吓計。我哋就係偏向鍾意睇吓壽司師傅有啲咩好介紹，吹下水嗰種！除咗可以揀自己鍾意嘅壽司之外，我一直覺得壽司師傅嘅推介係好值得試。有時候唔係自己偏愛嘅魚類，但係如果當日係好新鮮而師傅又推介你，我試過咁多次聽師傅話都冇死嘅！今次都唔例外， 平時好唔鍾意食熟嘅吞拿魚，但係師傅同我講呢一隻好正，我都未聽清楚係乜嘢都已經叫佢一人一件先！原來係火灸大吞拿魚腩海苔壽司！大吞拿魚腩比較油，用火燒過係香好多，吞拿魚嘅面上面加咗芝麻細蔥，再用海苔包住嚟食，天衣無縫，齒頰留香。又係另一樣我平時好少叫嚟食嘅嘢！三文魚籽！因為實在試過好多次中伏，又咸又腥！但係今次師傅拍晒心口話一定唔會，仲好甜，咁我就膽粗粗試吓啦。一見到滿到瀉，心諗死火喇，如果真係唔好食有咁多，師傅見我食淨晒一定唔開心😫 點知一放入口，我已經叫多份啦！粒粒飽滿嘅三文魚籽，鮮甜到不得了，再加埋師傅喺上面加咗一啲青檸皮，完全係口腔嘅衝擊啊！好多時候食咁多魚籽係會好膩， 呢個時候青檸皮就發揮佢嘅解膩作用！我哋呢啲係海膽fans，係冇可能會唔叫嚟食啦！好甜啊！鰻魚又係我好少會喺香港食嘅嘢，一樣啦出去食餐好多時候都會覺得好腥。但係呢一個手卷真係超正，油香滿滿的！塊皮仲要脆㗎！呢個蟹膏蟹肉壽司軍艦就係我朋友點嘅，我食咗佢少少蟹膏，又係甜到不得了😍自從去日本食過中吞拿魚，每次嚟親呢度都會必叫，今次我哋一人兩件食飽飽，就走去食甜品啦！…Read More

之前我地已經試過旺角果間尚八，今次再想食日式燒肉我哋就諗起尚八啦！今次我哋專登搵部另一間分店試下，我哋今晚就係尖沙嘴分店搵食！通常是一樣呢度食燒肉都係放題，可以因應自己嘅要求而選擇唔同價錢，豐儉由人。我哋今次就豪一豪佢，試吓和牛放題。確定我哋食邊個套餐之後，就即刻去睇吓有咩飲品選擇。種類都算相當多，總有啱你選擇。我攞完嘢飲返去好快就送咗一個刺身拼盤上嚟。質素都相當高完全唔似係放題，尤其是海膽，十分鮮甜。啱啱食完刺身我哋叫嘅小食就馬上放喺我哋面前。各款都相當不錯！其中最令我哋驚喜就係呢個尚八泡飯，十分美味！今晚最重要嘅主角上場啦！就係有三個唔同部位嘅和牛。質素相當相當，完全唔似食緊放題。最緊要仲係任食。其他燒肉都依然保持水準。呢間放題燒肉店我地一定會繼續支持！…Read More

同大少去朗豪坊行街，行到肚餓唔知食咩好，朗豪坊又間間都要等位。我即刻搵下附近有咩好食。發現有間日本嘢係正朗豪坊隔離，我地就即刻衝上去試下啦！呢度雖然叫做居酒屋，但係食物種類好似有啲唔對路，不過最緊要啲嘢味道好！我地見好多人都係食緊鍋物，但係由於我地之前果晚先打完邊爐，所以我地就主打俾小食同燒物。首先係一定要有嘅雞泡魚乾。再嚟就係炸紫薯栗子餅。跟住我地就叫了兩隻燒芝士帆立貝。食串燒當然唔少得肉類啦，我地叫咗雞翼，牛舌，豬腩等等淨係食串燒係唔夠嘅，我地一人一個燒飯團。最後上枱嘅就係燒茄子。呢度雖然話係居酒屋，但食物本身就唔係太日本啦。食物整體尚算不錯，不過真係想食日本菜嘅朋友就要留意下啦！…Read More

每次令到我想去台灣嘅都係當地嘅美食。但唔係每次都可以即刻飛過去，所以我哋成日都會喺香港搵一啲可以令到我哋有去到台灣感覺嘅餐廳。有一日去開天后嗰邊，見到附近有間台灣餐廳好似幾有台灣嘅味道，所以我哋就即刻去試一下。天氣咁熱我哋加即刻帶咗兩杯嘢飲你自己講吓溫先。飲品都係好傳統嘅台式飲品味道唔算十分驚喜。首先上枱嘅就係鹽酥雞粒，雞粒炸得十分香口，而調味亦都唔會過濃味道啱啱好，食完都唔會好口渴。再嚟就係肉燥飯，味道適中，但略嫌唔夠油香。分量細細碗，可以食多啲其他嘢。食台灣嘢又點少得炸花枝丸呢最後又加多一個鳳梨甜酸蝦，雖然份量比較少，但係味道不錯。想食台灣嘢又多一個不錯嘅選擇喇！…Read More

成日都會出旺角食嘢，好多餐廳都試過亦都有試過有伏。見到呢間新開嘅餐廳，咁得意嘅，東南亞菜？平時通常泰國就泰國，越南就越南，東南亞即係呢啲嘢都有？天氣咁熱，一坐低就梗係叫番個椰青飲吓先啦！餐牌上琳琅滿目，搞到我哋心大心細。問店員介紹下幾樣佢哋比較招牌嘅嘢食，本身都好想食肉骨茶，但係同行朋友麻麻哋所以我哋就唔叫啦！首先就叫咗一個泰式滷豬髀，講真， $68真係物超所值！入口即溶，味道亦都剛剛好唔會過分調味！每次去食泰國嘢，都一定會叫炒通菜， 睇佢炒出嚟會唔會好油或者會唔會已經淋哂，其實已經知道呢間餐廳夠唔夠鑊氣。呢度完全冇失望，唯一就係豬頸肉可能比較乾左少少，但係菠菜都冇得頂呀！朋友唔鍾意食辣，所以我哋就叫咗個pad Thai～ 串燒都真係幾有驚喜，平時好多時候出去食全消都會乾爭爭，呢度除咗個汁好好味之外，連啲肉都好好味。我哋食咗六串都唔夠喉，但因為真係已經有啲飽，所以唔再追架。下次一定要來再食多啲先得！…Read More

幾年前朋友為我慶生時，帶我來呢間上野食鐵板燒；幾年之後，到我要帶朋友食飯時又諗起呢度，所以決定返嚟食返餐好！因為一早訂好位，店員都好快手帶我哋入座。坐低一睇Menu就揀咗呢個鐵板大蝦套餐！首先有刺身同沙律，刺身都幾新鮮啊～開始煮之前，廚師都比我哋睇下啲食材先～老虎大蝦都真係幾大隻，味道幾好之餘，蝦嘅質地爽口彈牙，我哋好快就清哂呀！安格斯肉眼我哋要求要MEDIUM，咬落去仲有肉汁啊！旁邊仲配埋炸蒜，勁香口！師傅又問我地揀三文魚定係龍脷柳，我自己就麻麻哋食三文魚所以就揀返龍脷柳啦！估唔到咁簡單嘅調味整出嚟可以咁香口，而且唔會覺得乾身。之後就有炒雜菜同埋烏冬，我成日好怕出街食炒烏冬，唔知點解成日都會有一陣酸味。呢度完全冇，可能係啲烏冬嘅質量比較好，我哋兩個極速清晒全部食物之後就嚟甜品啦！甜品係我好鍾意嘅紅豆雪糕，呢一餐真係超滿足呀！…Read More

知道呢間餐廳開咗一段時間，成日都見到好多朋友會嚟打卡影相。我今日都終於帶機會嚟試下喇！餐廳叫得做火水爐，有個爐字都知佢地係打邊爐嘅，今晚就食雞煲火鍋任食套餐，先食雞煲後打邊爐。打邊爐最緊要整一個適合自己口味嘅豉油啦！我地溝溝下嘅時候，店員突然放上一碟小食，有炸燒賣同炸魚蛋，仲有好緊要嘅辣椒豉油，唔錯唔錯！話咁快雞煲已經放係我地面前，原來仲有鮑魚添㗎！我地就叫咗少辣，雖然唔係好辣，但依然十分惹味，麻味十足！而啲雞都相當嫩滑！食完一轉雞煲之後，店員就幫我地轉左沙嗲湯底打邊爐。火鍋配料都相當豐富，基本上大部份都係任食。最緊要係食材嘅質素都幾好！我哋食完帶埋單嘅時候，店員同我地講叫我地等多陣。原來仲有一個甜品送！雖然只係一個好簡簡單單嘅刨冰，但係都食得出相當用心製作，而且好多料。喺打完邊爐嘅時候食一個刨冰，原來都幾夾！雖然食物種類唔算十分特別，但係食得出餐廳全部都好俾心機製作。以呢個價錢有呢個質素都係一個十分唔錯嘅選擇。…Read More

其實都已經食過呢間緬甸招牌米線幾次，但位於勝利道嘅店真係比較少位，所以我哋通常都係外賣，但外賣返到屋企食，味道一定無堂食咁正啦！發現原來喺附近開咗分店，大好多，所以今次就決定坐定定食返次先！我就叫返平時最愛嘅曼德勒鮮茄滋味撈麵，佢啲香料加落啲蕃茄度煮個濃稠嘅醬汁，麵質有咬口，較幼身，完全係我杯茶呀！之後叫咗酥炸黃金脆蝦餅同緬甸黃薑脆脆雞翼，略嫌炸過火咗少少，但完全無影響味道啊～大少就揀咗曼德勒紅燒腩肉飯，我試咗少少，味道帶少少甜，都幾開胃。腩肉亦煮得幾好，稔得嚟依然有應有嘅質感！緬甸菜真係香港比較少，尤其小店經營又好味，一定要多多支持 ～…Read More

越南菜，係旺角從來都唔多選擇。今日行過見到有新開嘅越南餐廳，就即刻同大少衝入去試吓！大少最愛就係越南嘅滴漏咖啡，所以佢無考慮就叫咗杯嚟試下！睇餐牌見到個黃咖哩軟殼蟹好吸引，我地就叫一份試吓。份量都相當多，仲會跟一份法包。用嚟點咖哩汁一流，如果烘脆啲仲正！跟住我同大少就一人一個生牛肉湯河。湯頭味道尚算濃郁，河粉夠滑，整體味道唔錯！話咁快炒芥蘭都送到嚟我地面前，味道都OK。最後送上枱竟然係小食拼盤，可能係因為牛油雞翼製作需時。拼盤有滷水牛𦟌，越式春卷同埋牛油雞翼。係旺角想搵一間價錢相宜嘅越南餐廳，呢度都係一個唔錯嘅選擇！…Read More

係香港想食泰國嘢，第一時間都會諗起九龍城。係九龍城果短短幾條街入面，就可能已經有3，40間泰國菜餐廳。今次我地就選擇咗係九龍城入面有幾間分店嘅小曼谷。大熱天時，一坐底就即刻叫左一杯芒果沙冰同椰汁沙冰就降降溫先。第一樣送到我地面前嘅就係馬拉盞炒豬頸肉通菜。一上枱已經聞到鑊氣十足，十分惹味！係大火快炒下嘅通菜仲保持到爽脆，又唔會過份濃味之後等左一陣我地嘅泰式燒雞就好快上枱啦！雞燒得啱啱好，皮脆肉嫩多汁，就算雞胸位都唔會嚡最後就係鹽燒原條馬友！剥左層皮之後，睇到肉質仲有肉汁流出嚟！鮮嫩多汁！配埋佢地嘅泰式辣汁，一流！係九龍城食泰國菜都朝中伏嘅機會。不過選擇小曼谷就唔會有呢個機會…Read More

我同大少都係鍾意去泰國食嘢，每次都會係泰國買藍象嘅醬料返屋企整嘢食。但我地就無試過喺泰國食藍象嘅餐廳。之前聽到香港開藍象嘅時候，我地已經滿心期待，終於搵到時間嚟試下！因為訂左枱嘅關係，所以唔使等就可以安排入座。入到去環境相當唔錯，眼見到差唔多坐滿，都建議大家預先訂座。食泰國嘢一定要飲返個冬陰公湯，我地再叫多咗一個椰子雞湯試下！兩個湯都無令我地失望，味道相當濃郁，作為一餐嘅開始絕對令人開胃。之後就係燒大頭蝦炒金邊粉。炒金邊絕對有係泰國食嘅風味，另外果隻大頭蝦真係好大隻，兩個人分享就啱啱好！跟住就到我地最期待嘅咖哩炒肉蟹，有分兩個Size嘅，我地兩個人就叫左細嘅就夠啦！蟹本身相當新鮮，十分鮮甜！而咖哩本身都相當夠味，加埋蟹嘅鮮甜，簡直係一絕！食咖哩又點可以無薄餅呢，就算幾飽都要叫一份嚟點咖哩汁！今餐飯我地都相當滿意，所有菜式都無令我地失望！可能味道跟足泰國嘅關係，所以食完飯之後有少少口乾！我地下次去泰國嘅時候會再去當地嘅藍象餐廳再去比較下！…Read More

朋友突然好想食牛粉，我諗下就話有間越南粉想試下，所以就即刻打電話睇下當晚有無位啦！呢間北美越南嘢想試一段時間，因為聽到不少朋友話呢度啲牛粉好正，本身好鍾意食，直頭有啲情意結，所以希望唔會令我哋失望啦！兩個女仔就唔叫太多嘢 ，叫一碗XL嘅特式牛湯粉，聽聞湯底用上六十磅牛骨去熬，真係好期待啊～ 湯粉係用上金邊粉，合哂我胃口！入面有好多配料，有生牛肉、牛坑腩片、牛筋片、手打牛丸、牛腩邊同牛栢葉。店員仲比咗一啲香葉辣椒同芽菜我哋，可以加入湯粉食。呷一啖熱湯，真係幾正喎～ 好香濃嘅牛味，唔似有啲越南粉嘅湯好味精咁！生牛肉同手打牛丸絕對推介！老實講，我哋真係要兩個人先清得哂呢！我哋仲叫咗個二人小食拼盤，超級好味嘅春卷啊～～～～～～～～～～完全係愛不釋口呀～～～～～～～～朋友嘅呢杯牛油果奶昔，佢都好鍾意呀，不過如果牛油果味再濃啲就更正！…Read More

呢兩三年吉列牛十分之流行，我哋喺日本食過一次之後都已經成日好掛住。喺香港有吉列牛嘅地方我哋都會去食，希望可以止得到癮。今次同大少又去到銅鑼灣呢個美食天堂，但係都唔知食咩好因為太多選擇。我哋發現原來我哋仲未試過呢一間餐廳嘅吉列牛，同埋我哋都未試過好多人鍾意嘅咖喱忌廉烏冬，所以我哋都即刻打電話上去留返兩個位。都冇咩可能唔叫呢個招牌菜，吉列牛啦！佢好似一個定食咁嘅，有一件吉列牛啦、配菜、白飯同埋湯。個吉列牛炸至半熟，上枱時你可以根據自己鍾意嘅程度再煎到想食熟嘅程度。味道都幾好，最重要就當然係個牛本身質素都唔差啦！我哋又嗌左一個味噌蟹蓋紫菜飯團，呢個就有少少失望啦，因為上枱嘅時候紫菜已經淋哂。雖然話有少少失望，但係個味噌蟹蓋真係好味啊！滿滿嘅蟹膏好正！之後咖喱忌廉烏冬就到啦！一直好想知道係烏冬上面嘅忌廉到底係甜定咸， 終於都可以開估啦！其實係……奶味嘅！我諗佢個主要目的都係想令到個咖喱更加滑，感覺食落去好似有少少薯仔嘅味道咁，都幾得意呀！最後嚟到嘅就喺個滋味單骨雞翼。呢個滋味除咗係好味咁解，佢仲有濃濃嘅芝士香味㗎！不過我自己本身就唔係鍾意太濃味，但係大少就極速清晒，證明個芝士味好啱佢口味啊！當晚全場滿晒人，店員唔係太多，但係招呼都非常周到。佢哋嘅服務態度好值得一讚啊！…Read More

朋友住喺呢區附近，所以都約喺呢頭食飯。佢同我講呢頭有一間唔錯嘅越南餐廳，所以我哋今次就嚟試吓！入去坐低，睇吓Menu就見到有個小菜套餐，只係$168就有兩個小菜仲有飯有飲品。我哋就揀咗海南雞同蒜蓉炒通菜，之後再加左一個三式拼盤同埋一個豬頸肉。之後就一路慢慢傾慢慢食喇！海南雞質地非常嫩滑，唔會話皮肉分離，加埋啲薑蓉食送飯真係一流！炒菜唔會食到成口油，而且味道都唔會太濃味，當然愛食菜嘅我哋就覺得如果分量多啲就更加好啦！接住就係三色拼盤，拼盤入面有炸春卷、越式粉包同蔗蝦（？）。個春卷我哋都唔係即刻食，放左一陣都依然好脆，但係完全唔覺得好熱氣；越式粉包入面餡料充足；蔗蝦味道都唔錯呀！可惜第二日我哋都要返工，否則我哋都一定會帶番杯啤酒嘆下！我哋最初怕唔夠飽所以就叫多一個豬頸肉，但係原來個海南雞都好大份。好彩個豬頸肉都幾好味所以我哋都清晒呀！食飽飽我哋又要返歸準備第日返工啦，下次再發掘一啲屋村好味餐廳先！…Read More

自從梳乎厘pancake嘅興起，香港自己本身都已經開咗好多唔同嘅小店係主打梳乎厘pancake。接住落嚟就有好多日本出名嘅名店到嚟香港分一杯羹。今次呢間餐廳我喺日本已經有食過，同埋因為佢限時段嘅關係所以我今次就冇再去等佢嘅梳乎厘pancake，而去試吓佢其他食物。呢啲咁熱嘅天氣就梗係要飲返杯凍咖啡啦！呢杯凍咖啡一飲落就好有日本咖啡嘅味道，因為飲日本嘅咖啡就會好明顯係飲到日本調配嘅味道同平時意式咖啡係有唔同。另外就叫咗一杯期間限定嘅白桃沙冰。呢杯沙冰完全令我驚喜因為佢完全冇假嘅桃糖漿，飲得出佢係用真桃味呀，十分清甜首先我哋要左一個烤蘋果配紅茶忌廉pancake。用肉桂煮過嘅蘋果，配上紅茶忌廉加雪糕，再切一塊pancake我哋見到佢有鹹味嘅pancake，決定叫一個嚟試吓。煙三文魚配牛油果pancake，一想來嘅時候見到好似冇汁好乾咁。但係原來佢係有一個透明嘅汁，不過好快就已經比個pancake索晒，呢個就普通啲啦～一間餐廳係做甜品出名始終都係甜品最好食，我哋都明白要兼顧兩邊係有難度，希望佢地可以繼續進步！我哋下次會再嚟試吓其他味道嘅pancake！…Read More