cp5021sa's Profile

最近又係睇報紙介紹，得悉觀塘有間雞蛋仔舖賣有餡雞蛋仔，於是同女友喺觀塘食完晚飯就行過嚟。嗰陣八點幾，除夕夜，門口圍住一堆人等緊攞雞蛋仔，有啲好似我哋咁慕名而嚟，有啲係街坊。冇排隊可言，買就行埋去同阿姐講，佢會叫你等至少十分鐘，比埋錢就企埋一二邊等佢整。原味十蚊有交易，要加餡就再加錢，芋泥要加$6，其餘有紅豆味、朱古力味等等。而短短三個字，最多人叫嘅係芋泥，其次就係原味。整嘅時候，阿姐先焗個空雞蛋仔殼，然後就打開個焗夾，搽入芋泥餡，搽滿晒，再冚埋個夾，喺個餅夾邊倒蛋漿再繼續焗，用蛋漿封晒條邊，以免焗完出嚟啲餡漏晒出嚟。雞蛋仔到手，即使用蛋漿封邊，啲芋泥餡都依然漏咗啲出嚟！食落好得意，除咗有雞蛋香味之外，第一啖食個餡冇味，啲芋頭味係一路食一路出，外殼脆卜卜，個餡熱辣辣有芋頭味，比起食開嘅「有味雞蛋仔」，有餡嘅餡味更加突出。臨走前，有個客叫個朱古力味，阿姐就逐粒逐粒朱古力放入每一格焗好嘅雞蛋仔殼，呢份心機嘢應該冇乜舖頭肯做，而呢間舖得三個雞蛋仔夾同埋咁多人等，都肯咁做法，令我哋更有藉口下次嚟試朱古力味！…Read More

細細個過聖誕，屋企人偶爾會帶我嚟波士頓食返個鐵板餐，除咗好味，而且每枱都有份聖誕禮物。更加見識到班老伙記點樣打呢場仗！早一兩年前，同女友嚟食，班老伙記仍然寶刀未老，但當時已經混入新力軍取代。今年平安夜，波士頓啱啱裝修完成，於是叫埋女友個朋友一齊去食聖誕大餐。五點十去到，等位人潮已經企晒出行人路，再遲啲嚟後果可想而知。當晚九點幾再路經附近，仍然有唔少人等緊位，真係等得嚟都可以去食宵夜！同以前有啲唔同，包舖個位闊落咗，亦都換晒一班後生嘅員工。份聖誕禮物就門口派，小朋友先有，所以再冇每枱一份呢支歌仔唱。餐牌一目了然，個個嚟到實係食鐵板餐。不過女友同佢朋友想知「聖誕大餐」係乜嚟，所以我自願放棄鐵板餐，「犧牲小我」食聖誕大餐。等位其間，兩位女士走咗入包舖，因為鐵板餐冇甜品，經商議後買兩件餅上樓上食，作為甜品。等咗成粒鐘，終於有得入去坐。裝修後個環境一樣咁暗，啲枱凳都冇乜點重新排過，唯一分別係班老伙記一個不留，再冇班老伙記鬧返個客轉頭嘅「集體回憶」(其實嚟到真係食「集體回憶」多過食味道)，第二代老闆亦親自落場指揮。落咗Order後，又要再等多幾個字先有得食餐湯連同餐包先上。喺波士頓，餐湯好難唔好飲，而個南瓜湯更加係全個「聖誕大餐」第二美味嘅食品(呢次中伏喇)，個包就失咗水準，唔脆嘅！由於太多人叫鐵板餐，所以鐵板餐唔使等好耐就有得食。反而「聖誕大餐」等極都未有。:(一如以往，鐵板餐從冇教人失望，而且聖誕唔加價，難怪燒鐵板聲音此起彼落，旁邊做火焰牛柳更係一個接一個！呢度唔作特別介紹。聖誕大餐主菜等咗好耐先上枱，女友一見「頹」樣，已經安慰我。難怪嘅，塊扒太靭，除咗有汁味，就同食香口膠冇分別...... 咦！碟前菜呢？追吓啲伙記，碟沙律先嚟。呢碟沙律，老實講，撞晒味覺同視覺，一嚟只有甜味，完全食唔到火鴨胸味道，而且呢種水蜜桃甜味應該係甜品先出現，作為前菜個味道就Over咗，撈埋啲苦嘅火箭菜同沙律醋，可謂「百感交集」！餐飲變咗用嚟平衡返頭先嗰堆「聖誕大餐」。不過中咗兩次伏，聖誕特飲(伙記話係雞尾酒)都係可免則免。叫杯凍奶茶算數。甜品都冇乜期望。不過就係冇期望，所以呢碟榛子朱古力蛋糕仔先成為全個大餐最好食嘅嘢！件蛋糕入口即融，榛子同朱古力味道突出，應該同樓下包舖賣嘅一樣。亦因為呢件蛋糕咁出色，所以再叫伙記喺雪櫃拎埋剛才買嗰兩件蛋糕出嚟。一件係檸檬芝士撻(左)，另一件係芒果蛋白蛋糕(右)，兩件都係有餅底。件檸檬芝士撻，好creamy，檸檬味道啖啖滲出，微酸得嚟亦有芝士味道；另一件芒果蛋白蛋糕，就好似食Moose咁，同檸檬芝士撻啱啱相反，呢件蛋糕比較清淡輕盈，同芒果味道同樣突出，而且食晒都唔會覺得滯。而兩件蛋糕均有同樣特點，就係個餅底好脆口，一試就愛上。其實幫襯波士頓咁多年，從來都只係講鐵板餐，最多講埋個餐包，反而忽略咗佢個餅房，睇嚟要對呢間幾十年嘅老子號重新定位！尤其係佢個餅房，麵包、蛋糕、焗批一應俱全，而樓上餐廳又冇得直接同餅房落單，下次路過應該要試吓餅房嘅出品。…Read More

位於電影中心附近嘅肥波燒餅，成為戲前戲後醫肚嘅其中一個選擇。呢日睇完戲，因為我同女友都未食早餐，於是叫咗份雞肉炒烏冬套餐連一杯熱飲同一份大嘅肥波燒餅。不過爐頭同「肥波」都係得一個，燒餅亦製成需時，撞啱有幾枱客加埋外賣客，可以要等幾個字。心急人就要忍一忍。呢度嘅燒餅，或者係炒嘢，好處係落好多椰菜；食燒餅順手可以食菜，好似幾健康。而醬汁味道亦都調得算適中，唔會偏鹹或者鹹甜。而個炒烏冬，用埋燒餅個爐頭嚟炒，味道同平時酒樓食開嘅唔同，一時忘記係邊隻味道，但都係食得過嘅。剛才講到個燒餅「好似幾健康」，但其實個燒餅落咗好多沙律醬，係好味道但會食到好滯同好肥；同女友食晒成個，個感覺係好飽，不過唔係真飽肚。食完之後半個鐘，肚餓嘅感覺又再返轉頭。可能落少啲沙律醬，食呢個燒餅會比較實在。路過嘅話，叫一份燒餅，當佢係小食咁食都無妨。…Read More

考試季節，又係時候請假返學溫書。過往返城大，「食個快飯」從來都係去AC1 Canteen，越食越頹，暑假裝修後啲嘢食重縮晒水。後來女友介紹我去教職員宿舍露天餐廳，點知今個暑假執咗！(聽聞開返)跟住有同學指點咗我去AC2 Canteen食，美心旗下，係就係質素好過AC1，不過同PolyU新Can一模一樣，食咗好多年，食得多都會厭。直到寫食評前嘅星期六，朋友約我返城大，佢哋提議去AC3食......我以為聽錯係AC2，再問佢都話係AC3，又唔係Délifrance，咁即係邊間？原來AC3都有間Canteen，要搭Lift上七樓，除咗學生、舊生同教職員之外，應該冇乜人會知。呢間Canteen都係美心旗下，但係就行比較健康同埋全西式嘅路線，好似飯會揀糙米咁。價錢亦相對學生化，一個八吋大嘅薄餅都係講緊四五十蚊，而且質素唔差，又薄又脆唔太乾。趁呢日溫書，再次嚟到飯堂食晏。今次揀咗朋友推薦嘅「茶食」之一C2(見上面餐牌)，煎蛋轉炒蛋，加多兩蚊飲橙汁。賣相唔係好吸引嗰隻，但係卅幾蚊有包有粉又有嘢飲，起碼合符「抵食」原則先。天寒地凍，個多士雖然幾厚，但係烤得啱啱好脆口，唔太燶，亦唔太硬。炒蛋方面，至少唔會炒到老晒或者太水，達到快餐基本要求，亦都冇落鹽所以唔會太鹹，食完成碟蛋亦都冇乜油，女士們應該幾鍾意。肉醬意粉，如果用AC2個標準嚟比較，呢碟意粉點都好過AC2嗰種醬、粉分離嘅感覺。呢碟肉醬意粉起碼意粉唔會太腍，肉醬又唔會太稀，呢個價錢咁嘅質素，又食得飽一個人都已經唔差。但老實，呢間餐廳主打焗飯同薄餅，而焗豬扒飯係拍得住大家樂，好過AC2好多嘅，有機會再講。…Read More

最近報紙推介此店嘅流心蛋糕，Forward比女友之後佢都一見鍾情，趁呢晚book咗晚飯不過有排都未夠鐘，但又開始肚餓嘅時間，特登嚟到呢到一嚐流心蛋糕。去到門口，已經有姐姐拉客宣傳。特意問流心蛋糕大小，姐姐指住櫥窗......都成六、七吋大，而且轉頭又去食正餐，有啲擔心會食完就飽，姐姐就話個蛋糕一個人都食得晒，而且堂食有折，就係咁樣講，我哋就入咗去。晚上七點幾，人流唔多，而且地方闊落，所以坐落都算舒服。店員同時推介芥末心太軟，睇餐牌相都幾吸引，但係要留肚所以拒絕。都等咗幾耐，終於見到真身，個樣幾似大陸一間叫「瑞可爺爺」嘅蛋糕，但人哋冇賣到$85一個咁貴。切開之後，蜜糖隨即流出，賣相已經教人唾涎三呎。食一啖落口，蜜糖味道香濃，然後就會食上癮，我一啖女友一啖，好快就清咗碟蛋糕。老實，佢賣$85嘅話，吸引力實會大減。既然開咗個頭，都唔爭在揀多樣唔會太飽嘅。餐牌上寫住「特色焗雪糕」，女友感到好奇，就問吓個店員定係老闆嘅哥仔。佢就介紹呢個甜品係法式焗製，外層係一層好薄嘅脆皮，中間一層蛋糕，再包住嚿雪糕一齊焗，多重口感。聽過後頗吸引，於是加單。又等咗一段時間......正如店員/老闆所講，鹹脆皮喺最外層，中間夾住蛋糕同雪糕一齊食，鹹甜外脆內軟再入面係凍雪糕縱橫交錯嘅多重口感，一小件確實唔係咁夠喉，但真係要留肚，不宜再食，只好留待下次再試。…Read More

遊走深水埗耀東街，好容易就會諗起排檔。上年打風前，幫襯過蘇記，當時開盡晒風扇都好熱，但係就好夠人情味。呢次就輪到蘇記對面嘅長發。行過去嗰陣，女友就問：「會唔會食到好貴？」我就咁答：「唔通深水埗食碗麵都要百零蚊落樓咩！」可能係接近六點食飯時間，蘇記的確冇咁多人幫襯，而且每枱客只靠麻雀枱橙照明，同燈火通明又開盡晒風扇嘅長發，食客一輪一輪咁接住嚟，真係天與地之比！又咁啱聽到啲材料陸續沽清，阿事頭婆就話聽日（星期日）唔開，所以呢日入少啲貨，唔知係咁啱定係好搵到唔做星期日嘞。班伙記事頭個個都係粗豪效率型，一二三就問我哋食乜，一二三就開晒爐頭煮麵食，總之就同蘇記種慢條斯理係兩個世界。其實入到嚟都諗唔到食乜，女友就叫我食豉油撈麵，拼個墨丸，佢食魚蛋根腩米，再加多碟腩汁菜芯。呢度聲稱魚蛋墨丸自制，魚蛋細細粒彈牙咁有魚味，而根腩又幾鬆化唔黐牙，整體都唔太差。撈麵嚟到，但係墨丸又未到喎，咁點搞呢？飲啖湯先囉唯有。點知一飲就上癮，鮮甜到停唔到口，飲完一啖又一啖……停一停先！試埋個得啲豉油嘅撈麵，冇樣嘅，但係點解早幾年連森美都要推介佢？撈完啲墨丸都係未到嘅，好樣啲啦，似豉油皇炒麵咁。等唔切食少少先。嘩～佢啲甜豉油真係唔知咩構造，齋撈都咁好味，啲麵身又夠乾爽，食到「索索聲」又係停唔到口。啲甜甜鹹鹹喺把口度夾埋，幾香口咁，唔怪得淨撈麵都咁夠膽賣。食咗大半先上埋碗墨丸，六粒大過魚丸多啲，浮晒上湯面（雖然冇影相），亦都係咁彈牙同咁夠墨魚丸味。而最後連墨丸碗湯都飲得七七八八。但係都唔係咁夠飽，而且食完之後成晚都好口渴。…Read More

星期六下晝，風和日麗冇嘢做。喺尖咀一間Cafe度諗吓有邊度去。忽發奇想，即興入西貢。入去做乜好？女友話佢阿媽嘅唔邊個朋友話，西貢有檔菠蘿油好好食喎，但係唔知係邊間。Search過之後，確認係呢間，就一二三即興搭車入西貢。雖然係星期六下晝，又好好天，但係西貢市集又唔係特別多人，啲人去晒呢？即使行到去門口，亦都唔見有人排隊，旁邊嘅帳篷茶座又有空位。雖然食完嘢冇耐，但係見到門口嘅葡撻奶撻、啱啱出爐嘅大大個菠蘿包，加埋一杯冰凍奶茶，忍唔住搵個位坐低。遊戲規則係單叫包或者單叫嘢飲就冇得堂食，其實又唔係肚餓，所以叫咗杯冰奶茶跟鮮奶撻，加多個菠蘿油，夾埋$41，快餐店形式出咗櫃枱買完拎嘢食。繼奇華Anytime十年前賣$22一個菠蘿包，大到成半塊面咁大嘅之後，呢日再一次見到咁大個菠蘿包，櫃枱一刀劏落個包度，駕輕就熟咁塞塊牛油入去，就挑起咗我個食慾。影完呢張相之後，先飲一啖奶味同茶味啱啱好嘅凍奶茶。我食奶撻女友食菠蘿油，但係女友食咗成分鐘都未食到塊牛油，而塊牛油喺影完相之後一分鐘內已經融得七七八八，牛油流到女友成隻手同咀角都係。雖然個奶撻酥皮唔漏又有啲奶味，暖暖哋咁，但係望住女友個食相，我恨不得即刻咬埋一份！佢終於都食到個牛油位，就話鹹咗啲；我就接力食埋嗰半，個包熱辣辣，食到成手都係牛油，個包皮又脆又甜，而個精髓都係融咗嘅牛油滲入個包入面，鹹鹹香香咁，再飲返啖凍奶茶，嗰刻真係當正自己high tea緊。即使啲冰再融，杯奶茶依然咁有味，成件事根本就係絕配！同真正high tea唔同嘅係，我哋食完成手都係牛油，所以之後走去咗買包濕紙巾。…Read More

冇嚟三角公廁一排，呢日經過幾乎改頭換面，有啲舖頭唔見咗，又有啲新進駐。經過呢間，門口通透企理，與左右兩旁嘅韓食店、拉麵店、水餃店等截然不同。雖然價錢計埋都要一嚿水落樓，但係女友想食意粉而附近得呢間最似樣，就同女友入咗去。入到店內坐低，點完餐之後望住塞緊車嘅街道，完全唔覺自己喺煩囂鬧市！亦都係因為呢隻窗同埋清幽冇壓迫嘅環境，真係對住呢隻窗都可以望成日。卅多度陽光猛烈，一杯冰涼飲品確實好消暑。一杯朱古力，除咗面頭忌廉較多似冰山之外（其實都係一杯凍朱），其濃度應該有六十度左右，所以會偏苦一啲，朱古力味道亦都會突出一啲。呢杯係特飲，正價$35，跟All Day Breakfast只須加多十蚊雞。星期六嘅餐牌，唔覺有set lunch，只好退而求其次揭開主食餐牌。普通嘅主食唔跟飲品，但跟湯或沙律就只需加多十蚊。於是就叫咗碗湯。忌廉同磨菇味道都好濃郁好香滑。可能我哋係全日第一個叫湯嘅客人，所以啖湯都夠晒濃味。碟意粉嘅好味之處唔在於海鮮，而係啲蕃茄，意粉嘅色水吸引到我，即使啲三文魚或者其它配料幾咁新鮮都好！而事實亦都係，啲鮮茄味道入晒落意粉裏面，食落啖啖都係鮮甜蕃茄味道，因此碟意粉好難唔好味。呢碟All Day Breakfast真係要介紹吓。日光日白食西餐牛扒（唔係茶記或者快餐牛扒）當早餐或午餐，都係第一次。價錢亦都係All Day Breakfast之中最貴嘅($98)，但係唔代表係最好味。沙律撈芝麻醬，唔會差得去邊嘅。牛角包都焗得鬆化，一層層見得到嘅，少少油膩。煎蛋其實可以轉炒蛋，今次呢隻煎雙蛋就好似熟咗啲，蛋黃篤穿咗之後都唔流出嚟，實的的嘅，蛋白就夠晒滑。至於塊牛扒，抱歉，真係韌咗啲，好難先切得開同咬得到，好實，但係塊扒又唔係乾喎，啲肉汁都幾香幾夠味道，用嚟點牛角包或者點返塊牛扒都好夠肉味。至於係煎得老得滯定係選料問題，就由其他食家去發掘。食完之後，我同女友都不約而同地講，唔想走，因為個環境夠晒好hea。…Read More

好耐之前嘅一晚經過附近搵食，發現成條五光十色嘅吳松街入面，呢一間特別光猛，於是同女友貢埋去睇睇。原來係間平民韓食店，除咗佢個餐牌，就係比佢嘅大光燈吸引住，念念不忘。某晚放工，終於有機會一嘗。到達時雖然係八點半，但係間舖冇乜食客，或者個個都好遲先放工都唔定啦，啲食客都係我哋入座之後先陸續嚟到嘅。環境其實唔差，光猛又闊落，冇迫夾感，而且每枱一壼水可以自己Refill，唔使勞煩人斟水。只係偶爾有隻小烏蠅趕極都唔走，有些少影響食慾。點好菜後，先嚟兩碟開胃小食－泡菜同醃蘿蔔。有如其他人所言，醃蘿蔔稍勝，比較爽甜；反而泡菜，女友食完第一啖之後縐一吓眉頭，話唔夠辣；我食一啖，都辣，但係酸到盲公都開眼！泡菜炒豬肉飯，雖然碟小食比較弱啲，但仍然期待泡菜撈飯多過豬肉。果然不出所料，呢碟泡菜味道調校得比小食嘅好好多，酸、甜、辣度啱啱好。然而泡菜味道濃郁，撈乜食都會蓋過晒其它食物本身嘅味道，因此我係食唔出炒豬肉嘅味道，而腦海亦都只記住泡菜爽脆酸甜味道。韓式炸醬麵，相片係撈完炸醬之後影嘅，點解？同中式炸醬唔同，未撈之前係一碟碎豬紅一嚿嚿咁淋上上面嘅麵，黑色一碟咁，影完都唔知自己影乜。撈完之後仍見到一嚿嚿豬紅咁，而且偏濕。味道會偏甜，好似豉油皇粗炒咁，唔係話唔好食，但係各有各口味，同埋唔比「炸醬」呢兩隻字誤導咗，當係一種全新麵食嘅話，會係另一種感受都唔定。喺泡菜餅同海鮮煎餅之間決擇，店員建議我哋揀海鮮煎餅。上枱時，碟煎餅好香，煎得嚟好脆口，好快就食晒。但有兩嘢味道唔多覺，一樣就係海鮮味，應該就冇蝦同蟹，因為女友唔食得，件餅又唔見有；另一樣係件餅本身都係得個香口味，如果唔點佢跟嚟嘅甜醬汁一齊食，其實同煎蛋餅冇乜分別。或者應該跟隔離枱咁叫碗石頭鍋飯，上枱時「sasa」聲，香到連隔離枱都聞到。但至少今次食呢幾碟都算係韓食新體驗嚟，可以再試。…Read More

夜晚九點去油麻地睇戲，上嚟Search到呢間個名寧舍特別，而且又有芝士又多蔬菜食幾吸引，連女友都被相片吸引，所以好快就扑鎚。跟住再望資料，寫住「敬請預約」，冇得walk-in，原來係西式私房菜嚟。預約方式亦都好特別，要用Whatsapp，雖然book嗰陣都五點幾，都本住「博一博」嘅心態睇吓有冇人覆啦……兩個字之後就有回覆，而且重問埋我哋嘅Budget同喜好，令我哋好期待呢一餐。不過最早都要七點半先開就Feel到會食得幾急。準時上到去，個土耳其大廚兼老闆啱啱開檔，老闆重好執着咁set緊background music，而且單位細細，一張大枱三張細枱，有啲失望。不過老闆Ready好晒熄咗燈之後，成個場嘅感覺完全唔同晒，完全忘記平日生活緊張嘅感覺，真正可以享受一餐，完全唔知老闆會煮啲乜出嚟比我哋食嘅土耳其餐。頭盤係老闆喺Whatsapp話會送沙律。洋蔥青瓜椰菜絲，即使怕有口氣都要試試，因為生洋蔥嘅清新味道，幾令人增加食慾。之後就係呢碟菜，初頭冇睇餐牌唔知乞頭乜路，食落乜菜都係酸嘅，用嚟醒胃確係一流，但當食椰菜花同蘿蔔都係酸嘅時候，呢碟菜就真係吸引力大減。後嚟睇餐牌先知呢碟係叫土耳其鮮檸檬汁泡菜。只可以話唔係我杯茶。開始有啲肉食吓，係一串串串燒，初頭睇落以為係牛同雞，因為羊肉落咗香草之後辟晒羶味。雖然未到juicy起碼唔係燒到變肉乾咁，肉滑又易咬，唔使點蕃茄醬都已經夠晒入味。一堆炸芝士，本來炸到金黃香脆有芝士味就已經完成，而呢碟炸乳酪芝士就多咗一重味道，就係芫茜味。雖然整體係好溜，但係呢啲芫茜味嘅香草可以減輕溜嘅感覺。又香口，又有芝士味道，又有芫茜味道，都幾難可以用一種似曾相識食物可以形容到。食到八點九差唔多夠鐘要閃，忍唔到問老闆重有幾多碟嚟緊，佢話重有一碟，就係有薯仔（薯條啦）又有茄子，撈咗一堆醬咁，睇嚟普普通通。原來都幾精彩，要形容佢嘅話，最接近嘅就係食鐵板扒嘅薯菜，撈埋啲醬嚟食，雖然好飽但都食到停唔到口。同時再上埋呢個飯後飲品，粉紅色冰凍嘅玫瑰花茶，不過都幾甜吓，女友就接受唔到咁甜，我就反而當佢係糖水咁飲，有玫瑰花香。最後埋完單，老闆叫我哋等多一陣，佢就係個廚房切啲嘢，估係甜品之類啦。佢話係唔知乜嘢嘅土耳其甜品，餐牌搵唔到，睇落酥皮嘢幾溜吓。女友食過話幾好味，我咬落要都幾實幾硬吓，而種甜味係甜到溜，似係Supermarket買牛油酥嗰陣同溜，但係唔知係咩餡，所以對佢冇乜興趣。咁食法都食到九點幾，唔係趕時間，真係可以hea到佢收工。總括嚟講，呢間餐最啱用嚟hea住食，無論係上菜速度定係環境氣氛，抑或係貼身情度（我哋話偏向食菜，佢就除咗串燒，其餘幾乎全齋宴）同食物質素，都係好值得推介。唔好嘅係，你唔會知你食嘅嘢值幾錢，同埋唔睇餐牌嘅話全程就食到估估吓咁。…Read More

女友介紹我嚟呢度買件cake返去做母親節禮物，於是就兜去睇睇。去到見到每件蛋糕比想像中細好多，細過Tony Wong嗰啲，但價錢又唔平，平均每件要四十蚊以上。心諗值唔值......呢刻店員見我企咗喺度睇，就開始介紹啲cake。我見呢度都有人讚焦糖芝士蛋糕，就買件返去；擺喺Chesse Cake隔離咁啱賣剩一件Tiramisu，心諗大路嘢個個啱食，就買多一件。店員迅即將蛋糕入盒，送埋隻木羮木叉嚟塞入盒頂。原本都冇乜問題，但係一出到街，突然落大雨，呢個唔防水嘅紙盒連食具就變得好難拎。呢個cake等咗兩個鐘後先食，兩個蛋糕就咁睇都冇乜點溶。先食個焦糖芝士，左邊嗰件，係冇乜焦糖味，少少芝士味咁，反而嗰粒朱古力就好好味，真係吹漲！而食落口嗰刻，成口cream，好似溶溶哋咁，係佢隻蛋糕本身係咁，定係原本會係實啲嘅質感呢？無從稽考嘞！亦都好好彩係四個人分一件蛋糕，每人食得一啖，因為食一啖已經幾溜幾滯吓。再試埋右手邊件Tiramisu，食第一啖已經係好濃郁嘅酒味；家母食第一啖反而係好濃嘅咖啡味，再食落去先食到係櫻桃酒嘅味道，食落比較輕盈而又唔溜，食到尾重見到可能係櫻桃酒嘅水，令到呢件Tiramisu反而成為意料之外嘅好味！總體嚟講，佢係好味，但未值呢個價錢。…Read More

同女友喺尖咀行完街食飯，女友問我食乜，我就話想飲湯。佢又好嘢喎，save低咗呢間話想去呢間嘢食好耐，咁啱喺尖咀，就行過去。不過去到就未有位，伙記就叫我哋出去走廊等吓……冇派飛，全靠認樣，其間有人嚟到等位，又係比佢叫出去走廊等，跟住就佢有佢哋忙，個感覺好唔可靠。最後等咗半個鐘，個伙記就安排我哋搭枱坐。入到去個環境都幾迫夾吓，好似大排檔咁，冇乜意欲想坐耐啲。個餐牌就要考吓功夫去睇，因為套餐好似抵啲，但又冇嘢啱食；但係散叫只係費少少，不過點叫都得。睇咗一大輪先決定到落單。跟住就要考耐力，因為間嘢得一間廚房仔，等碗湯要三個字，等小菜就更加慢，睇住啲料喺個廚房排住隊咁炒，對肚餓嘅我哋真係一種挑戰！先嚟兩碗湯。想試多啲湯水，所以我叫咗蟲草花淮杞雞湯。飲一啖，有啲雞湯味，同屋企煲雞湯差唔多，係嚿烋湯瘦肉唔係鞋口，幾好味咁。但當我試埋女友碗龜苓湯之後，我情願叫多碗龜苓湯。因為碗湯幾鮮甜回甘，少少似龜苓膏味道但係鮮甜好多，只係覺得$50一碗好似貴咗啲。再等就係隻豉油雞。隻雞都幾嫰滑，即使食雞胸肉都唔會鞋口，而且啲玫瑰露豉油滲晒入啲肉度，咬入口啖啖豉油甜，最好就係豉油撈飯。不過啲雞油一樣唔少，所以女友都勸我唔好撈咁多。最後上埋呢碟茄子魚腩煲，真係等到頸都長。呢個煲嘅優點就係夠香，尤其係件魚腩好香口；缺點係油到影相都見到，同埋鹹過頭，餸飯都餸唔掂。所以好辛苦先清晒兩碟咁油膩嘅嘢，好話唔好聽，屋企食飯都唔會落咁多油！可能得兩個人食呢啲上樓檔唔係咁過癮，唔會落blacklist，但係唔會有種短期內再嚟食過嘅衝動。…Read More

當日下午，女友forward一個blog比我睇，講到一間座落喺西九龍中心嘅小食店。文章係咁形容：「在此我得強調，小店賣的不是甚麼驚世美食，純日式家庭風，勝在口味正宗。」有啲吸引，再睇埋落去：「純鄙人猜測，多半是小夫妻在港想搞些小生意，被無良之士「昆」去這個「地茂」商場；異鄉人在港生活不易為，純粹是希望能幫他們一把，在這小部落格宣傳一下。」係咪真係咁折墮？又值唔值得支持吓呢？呢一大堆疑團，推動到我同女友要去「會一會佢」。去嘅時候已經係下晝四五點，女友未食晏，特別肚餓。搵咗幾搵，終於搵到呢檔唔起眼嘅小店。但係原先間「浪漫滿屋」呢？好似都係個位喎，女友都未食過就已經執咗，有啲可惜。坐底咗之後望入去，見到只有一個男人踎喺地下整緊嘢，相信佢就係「事頭」，而「事頭婆」就唔喺度。我哋望咗幾望個中日夾雜嘅餐牌，就決定點一份牛肉烏冬餐（我食）同一份吉列豬扒烏冬，另外blogger極力推介嘅十蚊三件炸雞，覺得唔夠喉，所以叫廿蚊四件嘅南蠻炸雞。堆到櫃枱，「事頭」就以唔鹹唔淡嘅廣東話幫我落單同覆核一次我嘅落單，係feel到日本人嘅認真一面。比咗個牌仔我哋，講明要等廿分鐘，我哋一路傾住偈一路望住佢整，其間聽到又切又拍又炸咁，乜聲都有，一個期待會出啲咩比我哋食嘅心態就浮咗上面。答案揭盅一半。冇人會諗到喺呢啲地踎商場會食到啲港式包裝，日式風味嘅日本菜囉。只係佢個嘅綠茶包，暫時未見過香港有，知道會有啲臥虎藏龍feel。另一半呢？炸雞未炸，比住一半我哋食先，所以一路食一路聽到斬嘢聲咁油鑊聲。先嚟個牛肉烏冬，牛肉其實唔太大特別，吉野家實好食過佢，但家庭式煮法，佢都算易咬得開，而且又有少少牛肉味。重點落咗喺碗湯度，係啲鮮甜湯底，落咗幾粒冬菇吊吓味咁，嗰種鮮甜到好似飲麵豉湯咁嘅味道，而唔係清到水鬼尿或者鹹到落味精咁。唔係個發泡膠兜，真係唔覺自己喺food court食緊烏冬。再講，出面街加十幾蚊比咗「半熟蛋」，真係一半烚熟同一半生，好呃秤；而呢隻蛋真係外面熟裏面生，篤穿佢做蛋花湯咁飲，一啲都唔欺場，而且飲湯嗰陣重多咗一重食蛋花嘅口感出嚟，都係賣$35連嘢飲，你話有冇搞錯！吉列豬扒烏冬係女友點嘅。豬扒同烏冬分開載，豬扒下低用洋蔥墊底，睇落對辦。咬落去實係不得了，外脆內軟，而且唔係炸到乾晒水，依然好Juicy好鬆化，而唔係實的的好似咬極都咬唔開咁。外面沾咗層蛋，食落食有埋蛋香。呢件豬扒喺箱根食，￥1000；喺丼丼屋食堂食，$50走唔甩；喺呢度食，廿幾卅蚊咋，重要大家同level咁計喎。我開始明白個blogger點解會話店主比人「昆」咗嚟呢度。但反而覺得佢哋小本生意，資金唔多，呢度租金又平，作為佢哋嘅「試金石」就啱啱好。只係欠缺宣傳，實在要靠口碑推廣。等炸雞其間觀察，唔多人幫襯呢檔，尤其係深水埗多以老街坊打躉為主。我哋之後，有對後生情侶買咗份炸雞，同埋有個日本家庭應該同店主好熟落，推住BB車都要去同店主吹水。唔係有呢檔，西九龍中心真係搵個日本人行街都冇。呢份南蠻炸雞作結尾可以話係為成件事畫上一個完美嘅句號。廿蚊，苛求啲咩？即炸，雞蛋醬，炸到咁Juicy，脆卜卜，雞肉又夠嫰，又夠香，味道啱啱好咁鮮甜味，好味到一人食晒四件都得。己經係非筆墨所形容，要親自去食先知！我哋有諗過南蠻炸雞好味，要唔要試埋普通炸雞，不過小吃多滋味，最後都冇咁做。而且得「事頭」一個做，一等又廿分鐘就免啦，所以留返下次先食。呢間小店，炸嘢做得特別出色，相信憑住口碑，可以創出一返新景象，衝出food court。…Read More

女友聖誕Party抽中獎，呢餐佢請！不過呢幾日腸胃唔多好，所以我唯一要求就係食菜。結果佢喺灣仔搵到呢間。門口入Lift啱啱有兩個外國遊客都去食，入到去又望到另一枱遊客，睇嚟呢間嘢幾受遊客歡迎。不過初初我都唔知呢間嘢咩來頭，入到門口先知呢間係社企，而且招乎我哋嘅都係社會上被忽略嘅一群，都係落單嗰陣我哋先知。餐牌方面，好多食肆都做唔到，亦都唔知點解唔肯做，就係幾乎每一碟餸都有相睇，而且中英對照，唔怪得外國遊客都要嚟食。另外，我亦都好欣賞佢改嘅名，一定唔係啲咩豬牛羊魚咁嘅假名，而係佢係乜就叫乜，從來食齌食唔係要齌口齋心咩？間舖賣嘅係好嘢，唔使改名都一定會有人點嚟食。就算係呢似豬牛羊嘅嘢，佢都會改個我都估唔到係乜嘅名，食咗你話似乜就似乜。左揀右揀，又望到隔離枱啲餸咁大碟，決定叫住三碟先。佢哋出菜嘅速度真係好快，叫完唔使幾分鐘即上菜。先嚟雙拼餃。呢度好多人推介流沙餃，所以就四隻流沙四隻梅菜。梅菜餃方面，我係食唔出梅菜味，食完之後亦都食唔到梅菜嘅卜卜脆，所以唔推介；流沙餃呢，因為唔知咩餡，所以咬咗一啖都要估吓……原來係蕃茄餃，鮮茄味有，不過同「餃」呢個字唔夠夾，我鍾意食啲挺身嘅餃，呢隻扁嘢就麻麻哋，食完得陣風咁。再食多一隻，原來係有薯仔嘅，即係「是日靚湯」嘅蕃茄薯仔湯做餡，但係食落都唔似餃嘅，麻麻哋。再嚟係蟲草花紫薯浸時蔬。其實呢碟真係啱晒啲食清淡嘅人，因為紫薯本身有甜味，但係其它就係冇味嘅，咁紫薯嘅味道就唔會比任何嘢蓋過晒。紫薯亦都幾夠粉，入口即融。不過呢晚我想食多啲味道，所以好唔好味就由其人食家評價。至於嚟緊呢碟，真係撞手神點出嚟。呢碟叫「欖頭欖髻」，喺餐牌度放喺最尾嗰幾頁，原本都冇揭到咁後，一揭到女友同我望到張相，就篤定要呢碟。第一眼望到成碟蜜汁叉燒咁囉！就連個味道、色澤、甚至乎咬口食感全部都係叉燒。我同女友完全估唔到佢係用咩嚟做，極度神秘，而且係食到停唔到口。可惜冇叫碗白飯，唔係肯定好滿足！呢碟嘢一定要推介！點知三碟嘢食完，都意猶未盡（即係未飽啦），咁啱見隔離枱叫咗碟脆味卷好吸引，女友又想食合桃露，就加呢兩單。炸到脆一脆嘅麵包，加上裏面嘅燈籠椒個餡，每一啖都咁脆卜卜。配埋碟邊嘅芥醬一齊食，香脆芥味撈埋一齊，又有啲燈籠椒味喎，而個賣相又咁吸引，由其係啲芥醬唧到唔似芥醬咁，唔怪得咁多好評。食晒之後侍應幫我哋收枱，亦都主動問我哋係咪有叫甜品，服務已經好過好多食肆。作為結尾，呢盅合桃露睇落細細碗，其實兩個人食都食到好多羮。呢碗嘢雖然唔係好杰，但食得出一粒粒合桃喺口腔，每一啖都有，每一啖都係合桃味，確實滿足。不過唔經唔覺，原來咁樣食法都食咗成三舊水，都咪話唔貴。但的確高水準出品，有機會再嚟。…Read More

這麵包店曾經風靡一時，質素之高早已聽聞，奈何無緣一試。這晚九點多經過太子，旁邊當紅的麵包店早已打烊抹櫃，這麵包店雖然人流不及當年，但仍繼續營業至十點，而且仍見有包點從廚房捧出。走進這間店，款式之多、賣相吸引的確令我無從選擇！所以選擇了這個……十八大元，有點貴，但有點重量。第二朝把這個小雪山翻熱後才吃，確實有別於吃麵包，正確點，我像吃一個實心蛋糕似的，外表脆，內裏軟，甜得像蜜糖；更貼切的形容是像吃屋邨餅店的雞蛋糕，不是雪芳蛋糕那般軟綿綿，有點實，總之就是一試難忘了。這十八大元值得花，因為買的是這位麵包師父的真功夫！…Read More