0田中太郎0's Profile

早幾日天氣潮濕悶熱，個人冇乜胃口，想搵啲開胃少少嘅嘢食吓。醒起樓下商場有間越南菜，好似越南菜比較開胃，就過咗去食了。雖然已經下午茶時間，但好似都幾多客。冇乜胃口嘅時候最好就係食撈檬～我叫咗個春卷撈檬，仲加咗兩串串燒。撈檬用加埋個甜酸汁先好食。配料有好多菜絲、花生粒等等，食落爽口。春卷都好食，但餡料味道偏鹹，要食返幾啖麵中和返。另外估唔到串燒都幾好食。我叫咗一串牛肉一串豬頸肉，牛肉肉稔，咬落去都多肉汁；豬頸肉多爽口多汁。飲品揀咗薄荷青檸梳打，食完飲完舒暢返了～不錯的越式餐廳，下次會再嚟。…Read More

前一排再度光顧一蘭，一直想打返篇但係又冇乜時間。以前一開張就排哂長龍，有人去日本旅行又一定要食，其實我唔係好明。間唔中口痕係會食嘅，但不至於超級好味。前排就去咗尖沙咀呢間，除咗自修室式座位之外都有普通餐檯區。食物方面，都keep到水準，湯底濃郁香醇，幼麵掛湯力強，辣醬有獨特風味，但可惜欠缺一點impact，可能我自己鍾意味道強烈少少重口味少少嘅拉麵啦。另外我都叫咗個抹茶杏仁豆腐。抹茶係濃嘅，不過份量少咗啲，而且香港已經周街都抹茶，而且呢個細細個要$49，感覺好不值。希望一蘭以後會多啲選擇啦～（不過應該唔會…）…Read More

口痕想食個tea，之前都經過過呢間新開嘅越式餐廳，見到裝潢幾靚，所以就決定試下。入面裝修都唔錯，坐咗喺張高檯，一面落地玻璃向街，自然光幾舒服。叫咗個綜合越南麵包&牛油果沙冰：綜合越南麵包：類似豬仔包嘅質感，入面夾咗雞絲、扎肉、蘿蔔絲、生菜、紅菜頭絲？之類的材料，食落幾清新，份量大但又唔會好漏。牛油果沙冰：玻璃樽外型加分，佢地仲有好多款味道，但自己喜歡牛油果味所以揀咗呢杯，開頭好有牛油果味，但後半就唔係好飲得返隻味，可能自己麻痺咗？個人覺得同一地區嚟講，呢度感覺最舒服。不過我坐喺轉角位比較難落單，店員最好多加注意了。…Read More

前一排天氣凍凍地，就同朋友約不如打邊爐啦！以前食呢間任食韓燒，都留意到佢地除咗燒烤，都有得任食邊爐。所以我地幾個人就去咗呢間打邊爐，去到發現加錢可以轉雞煲底，咁就索性食埋雞煲啦！雞肉煮得入味，而鍋入面嘅蘿蔔、豆卜之類，吸咗湯之後好好食。不過唔食得辣嘅人就唔好揀啦，唔係成鍋都唔駛食，因為入面每樣野都吸哂啲辣味。另外送咗一碟有生蠔、帶子、魚嘅拼盤，味道都唔錯。而肥牛同啲丸啊，餃啊都係任食，我地梗係係咁食肥牛啦！但感覺打邊爐配料冇韓燒咁多選擇。除咗肥牛，雪糕都係我地嘅主要目標。就地取材，食Dreyer's雪糕解辣。廿幾歲人同小朋友爭玩足球機（利申：其實冇小朋友玩緊嘅），對上次玩應該仲係中學雞年代。最後飽到上天花板，大班人去有得食有得玩，抵！…Read More

某日晚上自己一個行開銅鑼灣，肚餓想搵啲嘢食，唔覺唔覺行咗去登龍街。近年登龍街新大廈落成，新食肆頻繁開張，日本拉麵店都有5間。本來想去是旦一間食，但係間間都有人排隊，最近又洗大咗，咁啱見到有間中國麵，而且係藥膳窩，咁就行咗入去了。口水雞係我至愛，我仲加咗錢要刀削麵和豆漿。湯底很香，中藥味剛剛好不太重；麵質也很不錯，刀削麵的薄邊吸收了湯汁，中心部分彈牙有微微咬口；雞肉嫩滑，口水汁不會太油，辣度亦剛剛好。講真自己去親嗰條街都係食日本拉麵，今次如果唔係肚餓唔會特登入去呢度食，都算係有驚喜。呢間屹立喺幾間日本拉麵中間嘅中國麵，令我回想起潮流底下好多有意思嘅舊事物都會被忽視，最後被淘汰。大家去登龍街都可以試下唔好淨係排隊食拉麵，食呢間其實都唔錯。…Read More

一向喜愛食沾麵嘅我，見到尖沙咀新開呢間舖，咪特登出去試下囉。叫咗個炸蝦沾麵，同行朋友就叫咗最普通的魚介沾麵。一夾起Ｄ麵，就心諗：「奶野喇。。。」，點解啲麵咁林嘅？！食沾麵最重要係品嚐麵的香味及口感，連呢點都做唔到。。。另一方面Ｄ湯雖然喺石鍋入面熱到滾，但食落口發覺佢淡茂茂。。。一般沾麵因為麵只會掛上小量的湯，因此湯底濃度會比拉麵濃，但呢間的麵湯竟然咁淡。。。而炸蝦已經霉咗。。。已經冇哂蝦應有嘅彈性。。。今次係我唯一一次食沾麵我唔會飲埋Ｄ湯。食完個口仲好頸渴，都唔知個湯底加咗咩。本身食沾麵想獎勵自己，點知變咗活受罪。唔駛旨意我再嚟。完。…Read More