Darknightrunner's Profile

未上去前見評價咁高有啲期望，但試完有啲落差，三百蚊一位既價錢應該仲有大把選擇。食物不過不失，好老實講唔難食亦唔好食，醬料選擇亦唔夠多。員工可能工作量太大，由打電話黎confirm當晚booking,到即場既服務都係呆呆滯滯，個個都做到木口木面，希望呢間公司既管理層多啲關心下員工既心理健康。…Read More

見佢新開兩個零月都未試過就試下啦，點知一試就中伏。叫碟叉油雞飯，油雞即係幾塊雞骨，叉燒韌到嚼唔到要吐返出黎。點解可以咁無誠意，做生意咁短視，出產啲垃圾比客人食？冇下次。…Read More

夏日炎炎去食返個冷烏冬最合適不過，感覺好清新，配上蔥絲又開胃，食完成碟個湯都想飲埋。晚市個場唔算太多人，坐得舒服，周圍唔算嘈。同服務員有要求都好快有回應，唔會黑面，今時今日既香港算難得架啦。…Read More

呢間餐廳開左都有段時間，一直未有機會試。放假終於有時間，同女友點左黑松露雞肉意粉同菠蘿烤雞炒飯，個意粉好入味，個汁有驚喜，覺得係above average既水準! 會再回頭! 餐廳環境幾舒服，地點都算方便，唔錯。…Read More

端午節一點午市時段，前台冇員工，場內只有一位著淺藍色衫，戴眼鏡既中年阿叔，場內當時只有三四台客。由於要先取飛，等左五分鐘都冇員工理會入口處客人，朋友入內搵職員表示要攞飛，個位中年阿叔即刻黑面，叫我朋友出返去等，之後怒氣沖沖咁去前台出張飛比我地。再好唔耐煩咁叫號碼將其他等緊位既客人帶入餐廳內。希望麻蒲管理層注意人手分配，以免員工在壓力下工作引致情緒有問題。…Read More

真實成品同商品說明既相片有極大出入，根本唔係魷魚鬚，只係細細塊既魷魚粒，再包住更多既麵粉炸過，如果唔係外面果層炸物充撐下體積，成個便當應該只有一條魷魚鬚既份量，再求其擺上去，好能夠感受到廚師果份討厭自己工作既誠意。而比客人盛戴食物個盤係岩岩洗完濕既，放係上面既餐巾就好快濕透，食完野冇可能用黎抹嘴。最後希望呢間公司改改門面menu既相片，做唔到就唔好充。一係標返高個價錢等自己買到相應既食材，做到類接近menu相片既水準。請不要誤導客人。…Read More

朋友喜歡舊式茶樓，於是去深水步信興一試。老實講食物水平一般，唔係特別比人印象深刻，最令人印象深刻一件插曲。話說食緊野時候有人打黎約見工講時間地點，情急隨手就反轉張點心卡係背面寫左幾隻字，點知到出去埋單時，個收銀阿姐就黑面教訓我，話要紙可以問員工(真係咁好服務?)，唔可以係點心紙上寫野，我即刻向佢道歉，連聲唔好意思(心諗個行地址應該點睇都唔似菜名會引起妳誤會掛)，道歉後個收銀阿姐依然唔把休，仲話卡上有字就要收錢，我當時好驚，唔知個行地址佢地茶樓會賣咩價錢，收我一萬幾千都任佢up，於是我緊接再向佢道歉，個阿姐見完全勝利後就掉返d找贖比我放我走啦。咁正既老字號真係香港寶貴既文化，大家要好好珍惜保育呀。…Read More

由荃灣坐80號小巴20分鐘到終點站，一落車就係彩龍茶樓，地點都算方便。茶樓點心款式都幾多，大大件抵食呀。而且仲食到最愛既酥炸鯪魚球! 唔錯! 果度既職員都好隨和，好肯幫客人，唔似有d傳統茶樓持住薄有名氣就零服務比面色客人睇。去大帽山效遊順便黎飲個茶係唔錯既選擇!…Read More

朗屏邨商場自領展全面翻新後，食肆多左好多選擇，成個場旺左環境都好左。呢間大掌櫃台味環境幾光猛，四方是正，已經食過好多次，水準都好穩定，雖未至於好好食既level, 但喜歡果度員工都好友善，唔會見到好多香港食肆果種黑口黑面，每次入去都會有職員greeting, 冇話扮見唔到客人既情況。想叫野食一招手，即使見到客人既員工忙緊，都會叫其他員工上前去落單，甚至唔駛叫已經有其他員工留意到客人既需要而上前幫忙。我覺得係香港呢個服務業水平日益低落既地方仲有咁既餐廳真係好難得，希望佢地會保持到啦!呢排飲品好似做緊promo, 餐飲有免費upgrade加台式珍珠，唔錯唔錯~ …Read More

去食下午茶，叫左個豚肉炒烏東，食左兩啖一啖暖暖地但另一啖就凍凍地，了落底d烏東一試仲係凍既，好明顯係炒定但比客人既時候用微波爐未翻叮熱透，好低級既錯誤，要改善。…Read More

收工返到元朗已經好夜，犯賤地行左入呢間新寶茶餐廳，間野夜晚生意多到唔憂做，行入去係你求佢比飯你食，多過你惠顧佢，咁多年都從未聽過果度既員工會向客人講聲你好/多謝，不過呢d都係小事，香港好多茶記都係咁(又係"文化"呀麻)。最勁既係d侍應好鍾意黑客人臉，一唔耐煩就比面色你睇。叫野食一定要好似小學生朗頌咁，將食物名稱一字不漏大大聲讀出黎，例如「單吊曬筒肉餅煲仔飯」，客人唔可以只用手指住個餐牌果行齋講肉餅煲仔飯，一定要大聲朗讀埋「單吊曬筒」比侍應阿姐聽。如果講遲兩秒，阿姐就會先黑面，然後搵個背脊得住你，真係好鬼有尊嚴，ego大過個煲蓋。間餐廳做得咁成功，唔需要customer service都可以屹立社區咁多年，老闆令員工可以吐氣揚眉咁工作，呢個的確係佢地既實力，我呢d小食客都係死去第度，唔好阻人發達。…Read More