Patloyc's Profile

呢間看似港式嘅西餐廳比預期有驚喜。食物嘅選擇好多，有意粉，有西式，日式及港式飯，有Pizza，有牛扒，亦有小食。食物水準絕對比一般港式西餐高，所有食物上枱都係熱嘅，而食物嘅價格係包括一般餐飲或餐湯，要加錢嘅特色飲品嘅選擇亦都好多，價錢非常合理，絕對係平日午餐及晚餐嘅好選擇。 餐廳嘅空間頗為闊落，樓底高，對用餐體驗有正面幫助。由於午餐唔收的一服務費（晚餐要加一服務費），所以午餐嘅性價比更高。下午茶餐嘅選擇比較少，但價格極之吸引，絕對值得一試。…Read More

相比附近一間藍色外牆嘅網紅打卡coffee shop，呢間位於佐敦道廟街上唔起眼嘅coffee shop提供高性價比而極之美味的食物及咖啡。呢間coffee shop提供嘅食物唔算多，但質素極高，特別係佢嘅意粉，做得極高質素，軟硬度拿捏得極之準成，其中以Linguine Bolognese 及Linguine Carbonara 最為出色， 絕對做到意大利嘅味道。Egg Benedict 亦都做得頗出色，唯獨是Scourdough麵包並冇toasted，所以係凍同埋唔脆，希望廚師可以考慮做多一個工序令到呢個食物更加完美。至於咖啡方面就做得極之出色，咖啡豆烘焙得好到位，而奶同咖啡亦都Integrate得好balance。如果同時間order嘢食，咖啡係收半價。更值得一讚嘅係呢間餐廳無限用餐時間，所以可以慢慢享受美食。但亦都希望客人喺繁忙時段唔好長時間佔用座位，影響其他想用膳嘅客人。…Read More

天氣轉涼，忽然間想搵間好食嘅煲仔飯。喺網上影片度睇到有人介紹呢間小店，於是就去試試，結果又係中伏！呢間小店嘅煲仔飯價格並唔便宜，一個餸要$71 ，兩個餸要80幾蚊，三個餸要$90。老實講，食得煲仔飯點會叫一個餸啊，起碼兩至三餸啦，於是就叫咗一個鹹魚田雞飯同一個潤腸臘肉飯嚟share，另外再加咗一個薑汁炒芥蘭。等候座位嘅時間並唔長，而落單到出餐嘅時間亦比想像快，估計佢係一路煲箸好多個飯，然後等你落單嘅時候加餸落去再煲。兩個煲仔飯裏便嘅餸都極為之少，飯所佔嘅比例則好大。潤腸臘肉飯裏便只有一條切開咗嘅潤腸同埋幾片切得十分之薄嘅臘肉，最過分係全部臘肉都係八成肥兩成肉，基本上等同於冇肉落肚。而鹹魚田雞煲嘅鹹魚份量亦都非常之少，田雞只有兩條細小嘅腿，加上幾件完全冇肉嘅身。 飯算係做得可以，但係唔算突出。 碟芥蘭菜嘅油多到好比油浸芥蘭，見到都唔想食……整體嚟講係屬於物非所值，性價比低。…Read More

有一段時間冇喺香港食台灣嘢，咁啱見到呢一間看似台灣小食嘅餐廳，就入去試一試。睇過餐牌，午餐價錢並不便宜，order咗個酥炸海島蠔滷肉飯($88)同台式紅燒半筋半肉麵($88),價錢包括一杯台式熱飲(揀咗桂圓紅棗茶）。 個滷肉飯同個牛肉麵嘅賣相都相當唔錯。但滷肉飯只有兩隻蠔，炸得唔錯，而滷肉嘅份量也極之少，基本上係食完都唔會飽嘅。至於個牛肉麵，牛肉並非如台灣般用上牛腱，而係類似牛肋肉；個粗麵比較腍，冇嚼口；個湯有啲藥味，比較奇怪。個桂圓紅棗茶就十分之行貨，應該係即沖嗰種。買單嘅時候發覺原來仲要加一，即係話平均要接近$100一個午餐，絕對係物非所值，應該唔會再幫襯😥。…Read More

喺網上見到呢間蘭桂坊嘅法國餐廳有任食生蠔，魚子醬，海鮮+5個course嘅套餐，於是就喺KKday買咗套票去試吓。首先要強調生蠔，魚子醬及海鮮並唔係自己去攞嘅，而係你要先落order，等佢上菜，而上菜嘅時間亦比較慢，所以如果你諗住可以食好多生蠔嘅話其實係有困難嘅。生蠔分三種，分別係來自日本，法國及澳洲。每次上六隻，每款兩隻，唔可以選擇指定要某一種生蠔。日本同法國嘅生蠔都算唔錯，體型比較細同薄身，少許爽口同帶少許甜味。但澳洲嘅生蠔就好一般，太大隻同太Creamy，食得兩三個order就已經覺得有啲滯……。魚子醬嘅品質十分之差，體積細小，一啲魚子醬應有嘅鮮味都欠奉，口感亦都欠爽脆。 但係咁嘅價錢有魚子醬俾你食都可以預期到啲魚子醬嘅品質唔會高，不過冇諗過係咁差。至於另外嗰五個course嘅食物，老實講就真係好麻麻啦，唔應該係一間所謂法國菜餐廳嘅出品。整體嚟講質素只屬一般，但價錢（喺蘭桂坊嚟講）亦都屬於合理。如果你係追求高質素嘅食物，呢個唔係一個好嘅選擇，應該俾多兩三佰蚊去五星級留返俾我酒店嘅自助餐會比較更好。 …Read More

喺YouTube睇到關於呢間小店嘅報道，覺得佢嘅蟹肉忌廉湯，手工意粉同意大利飯幾吸引，再加上係一間小店，覺得有需要多多支持，於是專程搵一日去試吓，卻發覺無論係服務質素同埋食物質素都未如理想。首先係大部份餐牌上嘅嘢都係冇嘅，包括蟹肉忌廉湯係冇嘅，意大利飯亦都冇（老闆話因為做啊時間太長😢），就連牛角包都係冇嘅。 如果餐牌上面大部份嘅嘢都係冇(可能因為生意唔好，所以唔想買太多食材），我覺得咁樣做生意嘅態度同諗法就唔會做得太長久啦。 最終只可以齋點意粉- 明太子海鮮意粉，同埋牛肋肉意粉。 呢間小店標榜即製手工意粉，但係個意粉做唔到意粉應有嘅效果。 理論上好嘅意粉應該做到Al-dente, 即係意粉表面有少少腍，core係煙靭，但係佢做出嚟嘅意粉只有硬，而唔係煙韌，應該同佢用嘅材料及recipe有關係，同佢煑意粉嘅時間無關。除咗個意粉本身做得唔係太好之外，明太子海鮮意粉嘅醬做得太過Creamy同太甜，食咗唔夠一半就冇辦法再食落去 。相反地，牛肋骨意粉就做得有點太酸(酸味並非來自蕃茄，因為佢冇用鮮蕃茄，好大機會係來自喼汁）。除此以外，由於只有老闆一個人做晒所有嘢，所以上菜嘅時間十分之慢。再加上佢並唔係跟你落order嘅先後次序嚟出菜（有兩枱俾我們遲入坐嘅客人都比我哋先上菜，但奇怪係佢哋點嘅意粉同我哋點嘅意粉係一樣嘅），所以你真係要有充足嘅時間同耐性先至好去食。整體嚟講食物質素不如理想，而價錢絕對係屬於偏高(加上亦都冇服務可言），性價比係屬於低嘅。…Read More

呢間位於荃灣嘅西餐小店真係唔容易搵到，就算去到舖頭門口都搞唔清楚點樣入去😅。舖頭內嘅座位唔多，坐得頗為逼夾。點咗兩個Eggs Benedict，Cappuccino同Flat white。 兩個咖啡都做得頗有水準 - 咖啡夠熱夠濃，啲奶同咖啡Integrated好好，好balanced。個Eggs Benedict 亦都做得好有水準，特別係個醬汁做得夠濃。唯一覺得可以改善嘅就係個Sourdough麵包係凍嘅，同埋太腍。如果可以先toast咗佢就更加好啦。整體嚟講質素屬於中上，但價錢就十分親民性價比高，絕對係日常西式早餐嘅上上之選。…Read More

已經有一段時間冇幫襯過麥奀記，今日剛剛路過元朗教育路，發現佢開咗一間新舖，咁蹺又係午飯時間，於是同朋友一齊入去光顧。叫咗一個加大嘅雲吞麵，同埋一個牛筋撈麵。佢雲吞麵嘅份量一向都係偏細，所以叫個加大，一般嘅大雲吞麵應該有六粒雲吞，但係佢只係得食五粒。雲吞嘅湯欠缺大地魚同蝦頭嘅濃味，非常之寡，並唔合格。雲吞尚算可以，面的確係彈嘅，但係整體嚟講絕對唔可以叫做出色。牛筋撈麵就十分之差啦，首先佢嘅份量係小到我以為佢係將人哋食淨嘅俾我食。牛筋冇一條係完整嘅，全部都係碎濕濕，而麵亦都少得可憐。隔籬枱嘅顧客見到我碟撈麵都話有冇咁細碟啊！咁樣做生意實在係太離譜，唔怪得知而家咁多香港人都寧願上大陸食嘢，作為一間 “所謂”嘅米芝蓮食肆,收得貴冇人會怪你，但係食物嘅份量同質素咁差，就真係自作孽啦，祝佢好運！不過我就一定唔會再幫襯佢！…Read More

作為莆田嘅常客，喺亞洲多個唔同嘅地方及城市都經常惠顧，一向都有頗正面嘅評價，但係香港機場嘅莆田真係可以用不知所謂嚟到形容。首先問題在於佢同一間快餐店冇分別，但係佢所出品嘅食品比起一般快餐店嘅水準都不如，價錢卻比其它快餐店貴得多。如果作為遊客第一次喺香港機場光顧過莆田，相信佢唔會有興趣再喺任何地方幫襯莆田，因為香港機場嘅莆田嘅食物質素實在太差，比一般機場裏面嘅快餐廳都不如，我覺得佢哋嘅管理層應該認真對待佢哋不容易所建立嘅品牌同定位，並且監管好佢哋嘅食物質素。…Read More

這家咖啡小店所提供嘅飲品嘅質素實屬罕有的高，但佢嘅價錢又實惠到驚人，完全冇諗過喺灣仔區(甚至係喺香港島)可以搵到一間咁高質素但價廉嘅咖啡店。惠顧當日店內只有一名年青的女店員，沖咖啡及收錢都係佢做。佢雖則年青，但冲出嚟嘅咖啡及其拉花都做得極之出色。與佢閒談間感覺到佢對咖啡嘅熱誠，應該對佢沖出嚟嘅咖啡好有要求。咖啡豆本身嘅選擇及炒豆都做得很好，餘韻極長，與奶混合得好balance，奶亦都打得恰到好處，真係好耐冇飲過咁好飲嘅咖啡啦。同區比佢高檔及貴嘅咖啡店都做唔到佢嘅水準。同區唯一嘅對手只有位於金鐘旁邊嘅Coco,但價格高出近三分一，所以這家咖啡小店實屬灣仔區嘅No. 1👍。一定要繼續惠顧支持呢間小店。…Read More

呢間燒味餐廳的外賣價格比附近一般嘅燒味舖貴出一大截，但其食物質素與其高昂的價錢絕對唔成正比。買過幾款唔同的外賣，包括义燒，燒鴨及燒肉，只屬中規中矩。义燒的味道比較單調，只留在外層，且不夠入味；燒肉味道則偏鹹，燒鵝比較其他燒味做得出色，應該算係呢間餐廳嘅招牌菜。其實附近有好多更好的外賣燒咪檔選擇，例如灣仔道的老舖環球燒味，價格實惠之外，每樣食品的味道都做到恰到好處，燒肉更是一絕。而且又好禮貌，實屬外賣首選！…Read More

早前喺YouTube睇過有關於呢間小店嘅短片，對佢嘅食物頗有興趣。剛巧午膳時間經過附近，所以佢試一試。很可惜的是午餐只有拉麵提供，並且只得兩款，真是有點失望。但反正已經坐下，也就試試吧，心想佢專注做拉麵應該會好食。點了兩款拉麵，分別係豬骨濃湯拉麵及櫻花蝦拉麵。 豬骨濃湯拉麵嘅湯做得未夠濃郁，而櫻花拉麵嘅湯則做得非常濃郁可口，但兩個湯都唔太夠熱。溫泉蛋要另外加$12 ，做得還可以。但因為佢用嘅係幼麵，所以好難拿捏到淥麵嘅時間，結果係拉麵偏淋，唔夠煙靭，影響整體效果。希望老闆可以考慮改用較粗層嘅拉麵，應該對整體效果有所改善。老闆非常健談，對客人有耐性，有禮貌。價格可接受，但在該區可能有些偏高。…Read More

經常出差去星馬嘅我，十分之喜歡當地嘅食物，所以見到有一間標榜地道新加坡風味嘅餐廳，再加上好多好Review，決定馬上去試試。結果係一個重雷區，真係唔知道點樣可以再相信Review去搵好嘢食…….Order咗芽籠蝦麵，蔥餅配咖喱汁及新加坡白胡椒肉骨茶配米飯。蔥餅多油而且黏，一啲都唔鬆，而且咖喱亦一D都做唔到星加坡嘅味道，相差好遠。蝦麵嘅湯底有欠蝦嘅鮮甜味及蝦頭嘅濃味，亦欠椰奶味。所用嘅蝦好明顯係雪藏蝦，既硬亦欠蝦味。豬腩片則有好重嘅油膱味，整體嚟講係非常之差。至於個所謂嘅肉骨茶，就真係同肉骨茶完全扯唔上關係。第一眼見到個好淺色嘅湯就知道唔對路，肉骨茶不但一D都唔熱，而且完全冇應有嘅味道。茶味唔夠濃郁，而且完全冇藥材味，只有胡椒味。肉排乾而且韌，豬腩肉片同樣有油膱味，極之失望。整體嚟講冇一樣食物係可取嘅。雖然呢間食肆所收嘅價錢相宜，但並不代表客人應接受完全冇星加坡食品應有嘅味道嘅食物！…Read More

以往住在附近的時候經常惠顧這間食市晚飯，但已是多年前了。最近再次惠顅是有點失望的飲食體驗。前菜叫了烤芙及鷄絲粉皮，是兩道以前經常吃的前菜。價格約六七十元，與各款湯麵主食的價格相約，但份量卻少得很，與其價格不成正比。味道方面也大不如前。烤芙只有甜味，口感過硬。鷄絲粉皮的粉皮則做得太淋，欠口感。小籠包，此食店的主打，仍然是皮薄多汁，但肉餡有欠鮮味，稍為失色。麵食方面，依然做得出色。湯夠熱，麵做得好煙靭。擔擔面仍然係此店一絕，醬味十分濃郁可口。整體嚟講食物質素不如前，性價比底，特別係前菜，是令人失望的。服務員十分有善及殷勤，值得一讚。希望稍後食物質素會有所改善⋯⋯…Read More

呢間係以往我經常嚟食嘅日本餐廳，無論係午餐或晚餐都屬於高水準嘅日本菜，特別係魚生，好新鮮，價錢稍高，但與品質成正比。上一次惠顧已經係2022年年頭，近期回港再惠顧，可惜食物質素下降咗好多，特別係魚生，份量不單止變細，最大問題係好明顯食唔出新鮮嘅味道，食材明顯較以前質素下降很多，大部份嘅魚生都食唔出應有嘅味道。就算係熱食嘅烏冬，湯唔夠熱，而烏冬亦都煮得太腍。以佢收嘅價錢嚟講，食物質素唔應該咁差，完全唔成正比。已經再唔係一間高質素嘅日本食肆，真可惜，可能會再幫襯佢啦⋯⋯…Read More