Kantabo's Profile

之前試過佢嘅晚餐Secret menu ,已經食得出廚師Tony好有熱誠好有heart 仲好有創意餐廳賣點係用天然食材泡製令人驚喜的創意美食。但係最近睇報導得知佢被食環處告佢擺街 （但其實佢攞2張枱一d都唔阻街，仲要嗰個位人流不算多 不是大街大巷🙄）Anyway,政府做事你是無法想像的。因此佢而家只可以利用bar枱位置server 少量客人，要食一定要預早book。為生存只好轉型做埋午餐 主要做外賣，仲有好靚嘅少女風甜品，影相呃like一流。今日去試左佢個午餐 選擇有幾個 沙律、意粉、飯、韓式米紙卷，仲有其他少食，佢個午餐menu每星期會轉款。叫左個XO醬雞肉炒飯，XO醬有少少辣 好惹味，加左西蘭花雞肉份量亦不少，飯都算乾身粒粒分明，面頭再加d魚鬆更香口 好味重緊要係少油少鹽無味精 食完唔會囗渴👍🏻全部即叫即製 需要有少少耐性 但其實我都只係等左5-10分鐘佢有幾款自家製特飲 賣相好靚 我揀左鮮果茶原價$40跟餐叫只需$20，用5款鮮果製成橙、菠蘿、火龍果、西瓜、熱情果，佢會轉款 視乎買到咩生果，鮮果茶好清甜完全無加糖，亦無冰但係好夠凍，生果好新鮮，比起果d所謂人氣果茶店浸糖嘅水果好假嘅甜味 好一百倍，既然比同等價錢去排曬隊買一杯機械式嘅糖水，倒不如買一杯有生命又健康嘅真•水果茶$45食到一個有誠意一啲都唔hea嘅午餐 加多$20仲有真正嘅水果茶真係物超所值 …Read More

不枉我特登來試奶茶王既奶茶 茶香 入口順滑 完全唔澀口 真係一杯頂級奶茶溫馨提示：奶茶本身已落糖 要走甜請早掦聲不過佢加左糖都唔會太甜 因為我平時飲其他奶茶係不落糖都覺得佢可以接受蛋牛治都做得不錯 蛋滑牛肉淋 即叫即製飲完呢杯奶茶成日心思思想再飲 佢收6:00只可以放假先可以再飲 😣…Read More

經過9號水產見到有間非日本料理嘅粉麵店開將 於是入去試下。舖面裝修簡潔舒服 都可以容納2-30人望望餐牌 除左一般魚蛋、雲吞、牛腩麵外，竟然有其他粉麵店少見的炸蠔餅、沙薑雞仲要係店主推介，不過今日得一個人怕食唔晒所以無叫，但見其他枱order 賣相非常吸引，份量亦不少，下次一定要叫埋朋友來試。見到餐牌 一品牛皇、豬皇同魚皇，其實係牛、豬、魚雜錦，呢個設計好窩心，啱晒我呢d又貪心又有選擇困難嘅人，一次過可以試晒幾樣野叫左個一品牛皇：有齊牛腩、牛肚，牛根、牛丸 每樣2件 份量啱啱好湯底清淅 不油膩 有少少牛香麵質算爽囗牛腩、牛肚、牛根都好淋，不過略嫌淡左少少 最出色係牛丸 非常爽口 有牛味 有少少牛根一食就知係靚料整體來講算好食，而家肯用優質食材嘅舖頭不多 淨係呢份對食材既要求已經加分希望呢種小店可以繼續落去 💪🏻…Read More

今日灣仔上完堂見到一間即叫即燒日式串燒店就入去試下 入到去環境幾舒服 唔會太迫夾原來除左日式串燒 佢仲有咖啡同西式甜品 咖啡好香 見到好多人都會order咖啡 不過本人怕飲完訓唔著 所以主攻串燒。鹽燒秋葵 ：味道清新 少少咸味更帶出秋葵清甜，好味手羽 ：燒得表面香脆 雞肉好juicy 👍🏻👍🏻鹽燒花魚：無諗過份量咁多 魚肉厚身 燒得唔會乾火陷黃金大菇：店員喺你面前淋酒點火 夠晒氣氛 影相呃like一流 大菇燒完帶有陣陣酒香鹽燒雞中亦：師傅好細心將雞亦切開底面分開燒 使雞亦燒得更香脆 真係加分💯仲有燒蠔、茄子、清酒煮蜆烏冬兩個人食到飽 埋單都唔洗300蚊，食到師傅真係用心去燒每一樣野 全部都保持到食物嘅原汁原味，淨係呢份耐性都值得一讚👍🏻傾開計原來佢地係用日本雞做主打 店𥚃面仲有2位貓店長 好親民好可愛見到有一張枱放左個留坐牌喺枱面 原來係貓店長喺張櫈度訓左覺 老闆驚有客人睇唔到坐左落去 實在太窩心喇☺️下次早少少落去試埋佢d咖啡同甜品先…Read More

心血來潮好想享受一個悠閒嘅下午，去openrice search 下上環又咩好地方，見Nosh食評唔錯就去試下。Nosh喺轉角位，餐廳不算大，但好開洋，我就㨂左bar枱半露天位。點左Apple Tarte Tatin 同 cappuccinoApple Tarte Tatin: 面頭個cream 好輕一d都唔漏，新鮮蘋果帶淡淡嘅酒味，最欣賞係蘋果依然爽囗，有口感，又不會太甜口味清新；底層薄薄的酥皮獨立食非常鬆化不油膩，但連埋蘋果一齊食就唔多覺，可能太薄。整體來講，係好味，一定會再試。Cappuccino : 亦有水準，奶泡夠細滑夠厚，咖啡不太濃但夠香，是我喜歡的味道。…Read More

知道呢間係台灣嘅過江龍麵包店就去試一試，入到去種類好多，但係無一種特別吸引我。既然來到就試下佢其中一個招牌包菠蘿丹麥酥，本人特別喜愛酥皮包，所以揀呢個。菠蘿丹麥酥：個包凍冰冰，個菠蘿皮唔脆唔香；個包完全唔係丹麥酥嗰回事，完全唔脆唔酥，亦無一層層，如果你唔當佢係丹麥酥，佢其實係一個好鬆軟嘅麵包；成個包都偏甜，本人不太喜歡這味道。同老字號金華菠蘿包比較真係無得比。:(…Read More

睇雜誌見到knockbox喺旺角開新舖仲加埋標榜自家制麵包，明明約左人食野都要來試一試先。麵包每日只在下午1：00同3：30出爐，每次仲要得10零個，我1：30去到仲驚賣晒，好彩仲有。我點左香草意式軟包（Rock salt and rosemary focaccia)同cappuccino。Rock salt and rosemary focaccia: 味道確實唔錯，有齊晒要有嘅味，充滿橄欖油的香味，rosemary 的香草味，仲有鹽嘅咸味，但係包個質地唔得,完全無外脆內軟嘅感覺，個包好硬又un,仲要已經reheat 左。:(Cappuccino: 賣相ok, 先食奶泡，個泡唔夠滑同埋唔夠厚；個咖啡唔香，仲有d苦，好嘅cappuccino 係唔洗加糖架，因為喺加熱打奶泡嘅過程奶會轉發出乳糖，但係佢做唔到。可能佢重點係精品咖啡喇，個cappuccino真係好失望。…Read More

今日再去試埋呢個牛角包，下午四點去到見到有條小人龍，諗住唔洗排太耐喇，每25分鐘出爐一轉，每轉48個，每人最多買9個。第一轉出左，得5個人買到就心知不妙，但係特登為左食佢先黎,所以照排........排左一個鐘終於買到。佢有原味、杏仁、朱古力、芝士，但係今日只得原味同杏仁。新鮮出爐好熱，先食原味：好脆，有少少燶燶地嘅味，好有牛油味，裏面好軟，但係唔夠酥。杏仁：包嘅質感味道其實一樣，只係表面加左杏仁片同糖，糖令個皮更脆，同令個包帶有甜味。本人不太嗜甜，所以較喜歡原味，原味牛油味較香。其實以呢個價錢可以有咁嘅質素真係非常好，但係同樓上嘅Le salon 相比真係差d,Le salon 嗰個甘香酥脆好多。如果下次唔洗排隊我會試埋芝士同朱古力，但如果要排隊呢個質素唔值得等一個鐘囉。…Read More

一向喜歡牛角包的我，之前睇到雜誌介紹呢間店嘅牛角包今日特登來試下。餐廳環境ok,今日趕時間只可以買走，下次一定坐低試埋佢個咖啡。見到counter 有四款牛角包選擇：Tiramisu, 栗子，朱古力，焦糖，本來想要焦糖但係賣晒，所以擇左Tiramisu, 個包好大，用個紙袋入住，可以揸住食唔整污糟手，個包仲係暖嘅，一咬落去牛油味好香濃但一d都唔油，好脆好酥，一路食中間原來有餡，一咬落去唔覺意溜晒出來都係整污糟左隻手有d＂呢hea",個餡唔太甜，有Tiramisu嘅咖啡香味，但無真正Tiramisu咁膩。其實精髓係個包，唔需要有餡都好足夠，淨係個包已經係我會再返來嘅理由，下次希望食到焦糖喇。…Read More

前排見幾本雜誌介紹呢間係東京攞獎嘅拉麵，所以滿懷期望咁專誠來試。晚上7點幾見門口無人等位，等左一陣就被安排坐在bar枱位置，對住開放式廚房；店舖是全木裝修掛左好多兒時玩具，模仿舊式玩具店。食物方面點了兩碗濃厚豚骨湯拉麵，朋友加多隻蛋。賣相普通又無香味；重點的湯底呈奶白色亦很杰身，飲落好有豬骨味不太油，但略稴太黏囗不夠清，飲多兩啖覺得好咸同好膩；麵好差~~~完全唔爽囗直情有點膠囗，麵質偏硬係似未熟透嘅硬；叉燒好肥好膩，肉質好散甚至有點霉店舖裝修比食物質素遠遠出色好大，名大於實；唔好話同豚王比，就連普通級數的札幌都不及。咁嘅質素佢一定好快喺巿場上消失。…Read More

朋友知我愛咖啡推介咖啡雪芭就去試下，確實無介紹錯。一入囗好香濃嘅咖啡味，亦不會太甜帶有咖啡的少少苦味，雪糕喺囗裏面慢慢溶，咖啡味滲透整個囗腔，感覺好正；最正係佢好似飲咖啡咁有after taste,咖啡嘅香會留喺口腔一段時間。但略稴奶味重左少少。食完晚飯想飲杯咖啡但又驚瞓唔著，呢個甜品啱晒。:)黃金拿破侖其實都ok,黃金係芒果；佢其實唔係一般拿破侖嘅質地，只要你當佢係一個穌皮甜品確實不錯，穌皮好鬆好脆亦唔油，感覺好輕好似陣風咁，食晒成個都唔覺膩。…Read More

因為呢間餐廳個名同個朋友一樣，所以特登同佢來試。餐廳裝修好簡約舒服以木為主，行入少少係露天的，但其實係後巷，都係揀左室內bar枱位置坐。叫左raw chocolate truffle, autumn flat, cappuccino, Babylon shake。Raw chocolate truffle: 好濃朱古力味，帶一點苦但不酸，但唔似一般truffle咁滑，質感比較硬再有少少碎嘅nuts。Cappuccino: 正統來講奶泡不夠厚和滑，但係味道方面係好好，有咖啡嘅香但冇咖啡嘅苦，唔洗加糖甜度適中，奶嘅溫度亦啱啱好。我的朋友是不嗜甜的，所以對這兩個勁滿意。^o^Autumn flat: 外面係烘暖的皮包住火箭菜，菇，番茄。咬落個皮不太厚亦有d麥香；火箭菜好新鮮冇澀味；夾埋來食好香菇味加淡淡嘅火箭菜味真係唔錯。佢都幾大件，兩個人share 啱啱好。Babylon shake: 香蕉、無花果、香草、玉桂加豆奶（但本人不愛玉桂，所以走左）好香蕉味好杰身唔甜，佢只係有香蕉嘅天然甜味，同埋少少好菁嘅香草味，仲有d 無花果同nuts嘅碎....好味。:)飲晒成杯都幾飽肚。呢間餐廳係sell環保，所有紙巾、紙杯、紙盒都係再造紙；膠杯唔係膠係用粟米衣造架，更加要推介大家多d幫襯。:)…Read More

今日同媽媽去淘大食個lunch,見到間新開嘅廣東雲吞麵就試下。下午茶餐好抵食，26蚊一碗麵+油菜／一碗粥。無想像過會值得同大家分享，所以無影相，sorry!細蓉（細雲吞麵）：同麥奀記size差唔多，個麵望落好靚，湯亦好清；湯好有大地魚味，麵好爽囗，要大力用牙先切得斷，就算浸左一陣都唔會淋；最讚係湯同麵都無䶨水味，平時我會加醋同辣椒油，但這個原汁原味更好食。雲呑反而一般，皮不夠散同滑。個麵可以比美麥文記、麥奀記，仲要價錢平一半，不得不讚！店長推介炸醬麵，下次一定要試。…Read More

見雜誌介紹沾麵今日特登來試，lunch時間等左15分鐘有位。燈光好暗樓底好矮故意形做日本舊式拉麵店格局。麺有三種唔同選擇：沾麵、撈麵、拉麵，仲有飯同小食，種類算多元化。我點了沾麵，朋友點了拉麵。沾麵（200g):可選唔同分量但價錢一樣:)，正常人200g啱啱好，個麵得半隻半熟蛋，擺得好求奇，賣相唔多討好；個湯好油，有d叉燒條同筍絲，叉燒又好肥。麵點落去只掛住d油點唔到湯，食落好酸，應該係加左醋，完全食唔到雞湯同醬油嘅味，真係好油，個麵硬得來係似未煮透嘅感覺，唔係爽口。食完個麵加雞湯試埋個湯，已要求多湯，但都係好酸好油，飲一啖即刻有d毛管楝。同陳生嘅隱家比較，隱家無論賣相，麵質，湯底都好好多。周月拉麵：麵是幼麵，都算爽口，但略嫌淋左少少，湯底是醬油湯底，清清地唔會太濃。相比起沾麵，拉麵反而好一點，佢有少少似日本一籣嘅味道，但係無咁香。見隔離食撈麵賣相都係一般，同樣用沾麵個麵底，自己加醬油同醋。…Read More

上個月來摸門釘，今次終於食到喇。可能係平日兩點零人比較少，好好彩竟然唔洗排隊，地方好細，個環境好似仲未裝修完咁，木板仲圍住，d木枱好似臨時搭出來咁，座位係用汽水盤疊起加塊滕墊就係，d調味料放晒喺頭頂嘅木板，如此隨意嘅裝修反而好有日本橫丁嘅風味。食物方面得3種選擇：白（原味）、黑（黑蒜）、赤（辣+蕃茄）全是沾麵；枱邊有張圖文並謬教你點食嘅簡介，唔洗你好尷尬咁問店員食法。我點了白，朋友點了黑。白伝：把麵點落湯，麵面排住少少汁但都有d油，麵條睇落似油麵比油麵粗身點，入口好爽，又能掛起個湯，食落好有味亦不油膩:)；之後我再加昆布醋同辣醬，辣醬唔辣好重蒜味，但我覺得唔加任何野較好味。食完個麵加雞湯飲個湯，但實在太油同太咸飲唔落。黑伝：望落好油，將麵點落去只沾到油所以無咩味，亦食唔到蒜味，白伝比較好食。:(整體來講白伝唔錯比周月的沾麵好好多。…Read More