bigfacebella's Profile

大家去開IFC一定要去%潮勝一下！%係日本人主理嘅咖啡店，裝潢非常簡潔但不失時尚感，唔怪得好快就成為咖啡打卡勝地！咖啡店內除左凍熱飲外，仲有唔同嘅咖啡豆俾人選購。玻璃櫃內仲有唔同咖啡豆嘅介紹，好詳細又用心。咁我當日就揀左杯Spanish Latte Large Size($50)，店員送過黎嘅時候就無蓋嘅，咁就可以清楚睇到%出名聞名嘅拉花，都可以睇到打奶打得好棉密幼滑。而%可以挑選綜合豆咖啡或單品豆咖啡，咁我就揀左綜合豆因為比較香濃。咁Spanish Latte同平時普通Latte嘅分別在於用鍊奶沖調，容易入口，唔落糖都有甜味，剛好%係採用深度烘培手法，咖啡濃度會高d香d，所以配合鍊奶都特別夾，唔會話太話甜口而蓋過咖啡味。外帶咖啡要$50一杯係唔平，但如果在IFC內買嘅都算做合理嘅。整體黎講都可以一試，起碼打卡的確係一流！…Read More

灣仔有條小巷入面竟然有間以包點享負盛名嘅麵包咖啡店，而牛角包更被譽為全城最好食嘅一項包點。而bakehouse係由四季餅房前行政總廚主理嘅，咁睇落都好值得一試嘅。當日十二點半到達餐廳，門口大概有十個八個人排隊堂食，而take away嘅就唔洗排隊，咁我就直接行入去可以揀包買喇!咁入到去一大個玻璃櫃，勁多選揀，如果有選揀恐懼症嘅，真係要諗好先至黎，依咪真係唔知揀咩款好因為真係樣樣都好好食咁。咁我黎到係一心一意試佢地嘅牛角包（$18），咁無人排到之下好快就買左。拎上手都好有份量，唔係平時輕飄飄嘅手感，而睇落都好鬆脆，唔係軟林林咁款。咬落果然好脆口，而入面好煙韌，層次好分明，完全唔係真空，非常實在，仲透出淡淡牛油香味，$18一個牛角包比好多包店都貴，但真心值得一試。跟手我再買多杯熱latte($32)，唔算貴但都唔算突出，正常普通，但都係牛角包嘅一個好配角黎嘅！…Read More

如果想喺中環繁忙街道上搵個寧靜角落休息下，就一定唔好錯過呢間coco expresso喇！雖然咖啡店空間細細，但係都營造到綠色嘅優化環境，Chill得黎又不失型格，加埋門口落地玻璃射入店內嘅陽光，真係坐幾耐都得呀！喺咁chill嘅環境中，咁緊係叫杯咖啡嘆下，叫個bagel慢慢坐慢慢食，忘記出面嘅煩囂啦！咁我叫左個Chicken & Guacamole Bagel($58)同埋一杯黑Latte（$35）。嘩！個Bagel好食到呢，係我有史以來食過最好食嘅Bagel！煙韌程度合到好處，加埋沙律菜勁fresh，雞肉又唔肥又軟熟，加埋牛油果醬嘅味道即刻豐富左好多！而latte都係濃厚嘅，配埋bagel真係一流，可以一試再試，誠意推介！…Read More

如果喺灣仔同金鐘附近返工，要搵間比較划算嘅日式餐廳其實都好難，好彩喺太古廣場三期碗出去附近就有間大門拉麵店，價錢唔貴之餘，仲要唔收加一服務費。所以呢....未到一點食飯時間，餐廳門口都已經排哂長龍，超過十個人排隊。而呢間拉麵店係齊人先會安排入坐嘅，所以要幫朋友拎定位都有難度。咁好彩只係排左3個字左右，而前面排隊嘅又未齊人，所以我地就安排左入坐先。今次黎大門係特登黎食佢地嘅黑蒜油系列嘅，咁我就叫左個黑蒜油拉麵（$58），我朋友就叫左個黑蒜油沾麵（$65）。兩者有咩分別？拉麵就係湯同麵同碗上，而沾麵就係湯同麵分開上。食落拉麵會愈食愈咸，而沾麵因為每一次夾住麵條沾湯食，所以無咁咸口之餘，就算食到最尾，麵條都亦然保持有彈口嘅。同埋無論拉麵定沾麵，配餸都係一樣，都係有塊叉燒，好軟熟，但又未至於入口即溶嘅境界。五十幾蚊、六十幾蚊喺咁嘅地理位置食到碗拉麵，抵食呀！…Read More

上環一向都好多小店食市，今日就揀左個意式餐廳食左簡單輕便嘅lunch。喺上環站A2出口一出過對面馬路就到喇，好方便。當日1點15分到達，剛剛撞正食飯時間，返工嘅人入哂坐，咁好彩無人排隊，我去到就排第一。等左3個字就有位喇！Set lunch個range都好闊，以一間小店黎講，真係好有誠意，由三文治、burger，去到Pasta、Brunch，仲有扒餐你選擇，真係好有心！咁set lunch有唔同嘅主食選擇之餘，仲有是日餐湯或者沙律，餐飲係有即磨咖啡或茶嘅，如果要轉latte/ cappuccino就要加$10喇！我就叫左個雞肉蘆筍黑松露忌廉闊條麵（$108），加$10轉左杯latte。咁杯咖啡係無拉花嘅，而奶都唔夠企身唔夠厚，普通咖啡，有d失望。但個闊條麵就唔好睇落顏色淡淡，但味道真係好出色，濃郁嘅忌廉帶帶淡淡嘅黑松露醬嘅味道，麵條本身好有咬口，蘆筍都非常多，整體係好夾，可以一試。跟餐沙律就正常合理。對我黎講咖啡真係重要嘅一環，如果大家對咖啡無咩期望或要求，都可以黎試試，因為麵條真係非常出色。…Read More

有日行過太古廣場見到路邊有間咖啡kiosks，就喺正Harvey Nichols 隔離，充斥住濃濃嘅咖啡味，裝潢睇落好吸引！咖啡kiosks 入面有唔少周邊飾品，仲有曲奇，蛋糕，包點，咁緊係唔少得茶飲同咖啡。以外帶咖啡嘅價錢黎睇呢度真係唔平，如果唔加錢轉Large size就只得正常餐茶廳外賣熱飲紙杯咁細細杯。平時飲開latte嘅我，當日突然想飲甜口野，所以我就揀左Salted Caramel Coffee($45+$8)。每款飲品都需要加$8先可以轉Large size，但都係唔大杯，唔似平時連鎖咖啡店咁。Salted Caramel好容易入口，好適合咖啡初哥，咖啡味唔算濃，但係都飲到果仁味嘅炭烤香味，奶滑順口，鹽味焦糖都唔太搶。整體上ok，可能平時飲開濃味d嘅咖啡，呢杯就未係好合我心水，但唯一接受到嘅起碼唔係用莓味帶酸口嘅咖啡，如果你都係唔鐘意帶酸咖啡嘅，呢杯都可一試，但建議期望唔好太高喇！…Read More

早上喺黃竹坑one island south做完野，咁就諗住食埋晏先返出去啦。突然之間好想食pizza，而黃竹坑餐廳都唔多，想食pizza就只可以去pizza express!中午十二點幾，人都唔多。估唔到入到去，環境咁好，好chill好有藝術感，就算坐耐左都覺得舒服嘅。但呢間pizza express 唔似其他分店咁有set lunch嘅餐牌，取而代之嘅係叫一份正常size嘅主食會送沙律或者麵包波波加一杯野飲。咁呢...一個人食就會好吃力，兩個人食就剛剛好喇！黎到pizza express真係一定要食麵包波波，呢度嘅份量比跟餐嘅多，有9粒，配有牛油同羅勒香草醬。主食我就叫左個新口味-卡邦尼薄餅，d煙肉脆卜卜，中間仲有隻太陽蛋，雖然講就講係流心蛋，但黎到係熟蛋，呢下有d失望，不過食落都好香口，好滿足嘅！野飲我就叫左杯可樂，汽水配薄餅真係一個無敵嘅組合。如果唔飲汽水嘅，可以選擇凍檸茶，因為免費refill架！…Read More

喜茶黎左香港都一段時間，而剛剛開嘅時候都驚排得太耐所以等到依家先初嚐喜茶。傍晚5點半經過銅鑼灣時代廣場間喜茶，無人排隊買飛，但有十幾個人排緊拎野飲，咁都應該排得唔會耐就試下啦！果然唔洗排隊就買到，又唔洗十分鐘又有得拎wo!而到我拎野飲個陣得返兩三個人排隊，感覺好似奇蹟發生左咁！喜茶最出名就係芝士奶蓋，咁我都揀左杯個餐牌推薦第一次試就要試嘅其中一個項目-芝士四季春（$32）！少少冰少少甜！果然奶蓋非常出色，好濃厚，好香芝士味，入口仲好順滑，正呀！但茶味就一般，混合後一齊飲其實都可以。如果唔鐘意太甜口嘅野飲，試下都無防，但講真如果要鐘意飲咖啡嘅我排隊排超過半個鐘仲要俾咁嘅價錢去買杯茶飲，喜茶應該唔會係我嘅選擇。…Read More

星期六嘅下午行緊去LCX買野嘅時候，經過間綠色白色為主嘅咖啡店，即刻俾間野吸引左入去！原來係Ralph Lauren服裝牌子主理嘅咖啡店，裝橫好有個性，真係打卡一流呀！我揀左杯latte試下（$45），估唔到又幾出色wo，好有驚喜。咖啡有陣炭烤味，濃郁香醇，對於唔鐘意酸味咖啡嘅我，真係一個好選擇。而咖啡店內有好多唔同嘅包點同曲奇，賣相都好吸引，下次有時間喺店內立食嘅都想試下。如果大家喺尖沙咀行開街，真係可以去買杯咖啡，打下卡！…Read More

今天中午十二點到左金鐘，食個晏先再去做野。經過Simplylife竟然仲未有人排隊，咁緊係即刻入去仲要係即刻有位！因為平日呢間Simplylife到左中午超過十二點半就會大排長龍，要排半個鐘先入到場。仲有呢間食飯時間係限時一小時嘅，如果大家想慢慢坐慢慢食就唔好食飯忙碌嘅時間黎喇！餐牌都會定期轉下，所以每隔一輪再黎食晏就未必係同一個餐牌嘅野食去做lunch set架喇！同埋價錢都偏貴，可以只選主食加野飲就$102，而主食加餐湯或沙律加野飲就$112，如果要extra coffe就要加多$15。餐飲就只可以揀自家製冰茶或者汽水。而我今日就揀左辣肉腸車厘茄嫩菠菜有機糙米飯加杯凍橙茶，而我朋友就有配湯，是日餐湯係南瓜濃湯，仲會送一大片法包。糙米飯非常有咬口，辣肉腸好濃味，加左片芝士令成個飯更加出色！橙茶就普通！美中不足係呢個set lunch如果可以包一杯latte，cappuccinos 咁真係perfect喇！…Read More

悠閒嘅下午到黃竹坑遊走，心境豁然開朗!一出地鐵站就會見到好多大大幅嘅壁畫，非常壯觀，香港地為之少見！經過呢幾幅大型壁畫，附近有間好chill嘅咖啡店，空間感十足，當日下午2點先去食晏，但都有人龍排隊，但好彩餐廳坐位充足，好快就搵到位坐。Sensory ZERO係自助形式嘅餐廳，排隊叫左野食，就需要自己去水巴拎飲品，去廚房位置拎野食。午餐嘅價錢其實都唔平，但可以免費配杯咖啡嘅話，其實都可以嘅。除左正常飯餐，咖啡店仲供有唔同嘅咖啡豆俾愛好咖啡嘅人去買，睇黎呢間咖啡店對咖啡真係有份執著！而我當日就叫左個蒲燒三層鰻魚滑蛋飯（$108），午餐包有一杯latte。由於咖啡店係自助形式，所以都無收加一。個飯上面嘅鰻魚燒得非常香，而炒雞蛋都真係好滑，飯係日本珍珠米，成個組合真係無得輸！而杯latte真心高質！飲落好滑好順，咖啡味香醇，仲有陣果味，真係日日飲一杯都唔會厭呀！…Read More

吉列牛忌廉烏冬專門店Kobekyu於首爾弘大好出名ga，竟然可以喺香港都係到呀！呢間吉列牛想試好耐喇，終於有日同朋友喺銅鑼灣行完街就上去試下。我地去到餐廳晚上六點半左右，當初都擔心無BOOK位會唔爆哂，但都好好彩仲安排到位俾我地。到我地坐到7點後食飯時間就真係開始多人了。我地當日都叫左幾多野食，諗住慢慢食慢慢傾，個度D人都唔會話會迫住趕我地走，感覺都良好的。咁我地就叫左兩個小食，兩個主食。主食包括咖哩忌廉雞肉烏冬（$78)、吉列牛定食 （$148)。唔好睇落個咖哩烏冬白雪雪以為會甜口，但原來都辣ga。不過唔食得辣嘅，都可以試下。因為真係好滑稽稽，唔係平時會食到嘅質感，好特別。而吉列牛真係必試！必試！必試！好食到不得了！口感非常軟熟，完全無筋，牛味好重。而且需要在鐵板上面燒一燒後，好香口，牛味更加特出。小食包括韓式甜辣醬單骨雞翼（$65)、味噌蟹蓋配紫菜飯糰（$58)。味噌蟹蓋配紫菜飯糰都係一樣唔可以錯過嘅小食，香濃嘅蟹膏好滿仲加有一絲絲嘅蟹肉，好抵食。而單骨雞翼係甜口唔辣嘅，食住呢兜野傾下計，真係覺得食極都食唔完，好大兜ga。所以整體黎講可以再ENCORE，吉列牛真係無得輸，去得呢度就要食。…Read More

早排經過灣仔修頓球場附近見到一間紅磚牆餐廳，裝潢非常吸引，就入去坐下食個晏。入到去感覺真係好CHILL好輕鬆，好有英式感。坐低左就想食D REFEASH嘅野所以就叫左個Set Lunch入面嘅Lemon Chicken Risotto（$138)。仲包左是日精選湯或沙律同埋一杯咖啡。當日嘅湯飲係雜菜湯，正常無特別，但湯匙就非常吸精喇。而個Lemon Chicken Risotto，好香檸味呀～食落唔會有酸口感覺，味道好平均，檸檬味又唔會蓋哂雞味，意大利飯都好有質感，值得一試。但對於LATTE就相對有D失望喇！唔夠濃又唔夠香，好淡口，對於呢杯咖啡唔會有留戀感覺...但餐廳都可以以裝潢搭夠，都係一個享受咖啡嘅地方黎，但咖啡可以再改進。…Read More

喺上環繁忙嘅街道上竟然搵到小清新嘅CAFE，門口開放式嘅設計，已經有別於平時工業風重嘅咖啡店，望落好和諧呀。如果大家唔係趕時間，可以坐下感受下繁忙中嘅一點清靜。LUNCH TIME由12:00-14:30 ，當日我12點半到，就叫左個大早餐落BRUNCH咁食。而SET LUNCH都有好多唔同選擇，會包湯或者沙律，仲可以加$15配咖啡或茶呢個大早餐（$108)一D都唔HEA，放低左之後香氣撲鼻。大早餐包括有腸仔、炒雞蛋、雜菇、煙肉，仲有片Sourdough Bread配埋Homemade Jam & Yogurt，呢個Sourdough Bread 真係好出色，食完仲好想Encore。而我呢個咖啡控緊係加左杯LATTE飲（跟餐＋$15)。值得一提，呢間餐廳嘅咖啡有兩款咖啡豆可以揀，分別係House Blend同Seasonal Blend。House Blend會有莓味，飲落會有少少酸口，比較容易入口。而Seasonal Blend就成熟D，香濃得黎有甘香味，仲有淡淡橙嘅甘香。而我比較鍾意濃味嘅咖啡所以就揀左Seasonal Blend。…Read More

近日約左朋友去葵芳食LUNCH，想搵個CHILL嘅地方Girl’s Talk，呢度真係好適合。我地兩個人叫左個細沙律（$53/250g），仲可以選擇3款唔同嘅沙律，我就揀左Californian Pasta Salad 雞肉意粉、Moroccan Couscous 地中海小米 同埋Beetroot w/Sour Cream 古紅菜頭。紅菜頭沙律係我其中一款覺得最好食嘅沙律，酸酸甜甜非法開胃。雞肉意粉會比較飽肚而地中海小米有少少辣之餘又散發出中東香料嘅風味。除非沙律，法式包款喺呢度大都非常出式。因為朋友唔食牛，所以我地就揀左個Le Parisien 法式火腿芝士包（$52），非常香口。而我額外加左杯Cafe Latte （$37 ）。杯邊配有一條杏仁香味嘅餅條。這一點好有心思，可以將一杯平凡嘅ILLY咖啡提升左。…Read More