koalasloth's Profile

今日係屯門市中心行行下就去到置樂呢個位置見到一間台式牛肉麵店。三橋慢煮牛肉乾拌麵 (半筋半腩), 牛肉好入味, 口感軟腍, 味道濃厚, 拌麵一流。半筋半腩的牛肉結合了筋和脂肪，質地豐富多樣，咬上一口時可以感受到肉質的韌度和脂肪的融化。慢煮的過程使牛肉變得極其嫩滑，入口即化。每一片牛肉都帶著濃郁的牛肉香氣，令人垂涎欲滴。我今次轉刀削麵, 能夠更好地吸附牛肉醬汁，使每一口都能夠充分品味到食材的風味。另外仲點了兩道小食, 台式蒜味烤香腸和脆香花枝酥球。係咁熱既天氣下, 飲埋呢一杯仙草冬瓜茶, 為這一餐畫上一個完滿的句號。呢一間台式牛肉麵店既係我香港食過數一數二出色既台式牛肉麵, 推介比大家!…Read More

不得不介紹，這間食肆雖然係人多車多的觀塘，位置東廣場內，設計卻開揚，空間感大，所以一向係我約好朋友食飯，聊天的好地方。 【BBQ cajun chicken pizza】Pizza 底厚薄適中，上面有層薄薄蕃茄醬，加上雞肉，洋蔥，新鮮火箭菜及半溶芝士，是一個不會出錯的配搭。 要一讚係火箭菜好新鮮，條條都好翠綠！火箭菜的獨有香味令普通的pizza，提升到另一層次。Pizza唔油膩，兩個人食一整個都剛好。 【Ham and cheese sandwich with fries】薄薄的芝士蓋住三文治，面包香軟，內裏配合火腿，咸香拿捏得正好～Fries即叫即做，上到枱香脆熱辣。 【Rose and grapefruit oolong】朋友的飲品，據說花香果味突出，我見到俾佢靚靚外表吸引！打卡able!【Hot turmeric and lemon ginger tea】冬天太寒，我就叫左個本地品牌的薑黃薑茶喇～果然暖胃驅寒！如果唔要糖飲，我好推介叫呢個養生茶！ 【環境】好喜歡它的設計，又開揚，坐下聊天不會焗促。我特別欣賞佢個自助區！居然有sparkling water！我冇咩見過餐廳會有自助sparkling water 飲呢！【Menu】佢其實仲有好多特色用心作品，下次會想試下佢地用蘭王蛋做的菜式！好吸引呢！…Read More

呢間店位置好方便，係觀塘交通滙處，凱滙內，係放工叫小食返屋企食的方便食店選擇，攞返到屋企仲熱辣辣香噴噴。 叫左個$128／12件 套餐【黃金鹹蛋黃焗雞翼】咸蛋一定必叫！蛋黃油包住焗香的雞翼，一試難忘。雖然肥，但係值得為佢肥幾斤，最多做運動抵返啫！ 【港式避風塘蒜香雞翼】都是濃味之作，蒜粒很多，滿滿蓋住雞翼，香味四溢，食不停口。 【港式咸檸7雞翼】前個兩款我成日叫，呢款都係第一次。之前兩款濃味，呢款咸咸甜甜，檸味正好中和返啲蒜味同咸蛋味。是另外一種味覺新體會！都係必食！餐跟有氣維他！叫左個柳橙茶～【服務】全部即叫即做，大約都係等左5分鐘左右，唔錯！仲有個靚靚粉色環保袋載住！正除左雞翼，宜家仲有多款小食！下次要再買多次，試埋佢啲小食，好似幾吸引…Read More

今日天氣寒冷，成日都無食過飯，近近地，約左好朋友食日式大餐！【熱杏仁奶奶・熱抹茶鮮奶】未諗好食咩，叫兩杯熱飲先。熱杏仁奶茶，茶底香濃，杏仁味唔重，平衡的得剛剛好，有種說不出的特別。朋友的抹茶鮮奶仲有拉花添！好靚呀！朋友話抹茶味勁正！【火炙左口魚邊牛油果沙律】好多黑松露！上枱時十分香。牛油果好新鮮！左口魚沙律好少見，魚肉白滑，魚味濃。正！【燒日本廣島蠔】大大隻生蠔，燒得剛剛好，配合芝士／蒜蓉，味道各有千秋，必食推介！【千回火鳥】又係熱辣辣香口野！雞串外皮燒得好香，調味剛好，配上嘅幾滴檸檬汁，清新解膩， 將燒雞提昇到另一味道層次！【一口牛鐵板飯】朋友問是否牛芯來的，我睇返Menu，係叫一口牛。朋友話啲整得好好，以為係貴價部位，牛肉味好香，又易咬，配上薯條，流心煎蛋，真係好邪惡！【泡菜黑豚腩鍋】 唔會辣，腩肉好多，肥瘦適中，粉絲索哂啲帶有蔬菜甜味的湯汁，冬天食一流。呢餐真係食得好滿足。另外，服務員都值得一讚，好忙都好，態度都好親切，面帶笑容。食用一碟又會好快幫忙清理，食完又唔會望住你幾時走，可以慢慢飲埋杯飲品，傾多陣偈都無壓力！仲有其他食物都好吸引，下次必再來食！…Read More

今日又做孤獨的美食家… 因為上堂地點的關係，近來的晚餐都在旺角解決。今日就試下旺角朗豪坊的「i CREMERiA Cafe」。門面，裝修都好優雅，好Lady。室內有花花裝飾，配上金屬射燈，雲石枱，梳化櫈，坐落舒適。Set dinner有多款選擇，包餐湯/沙律+茶/咖啡。+$30 有Parfait!我就叫左個最吸睛的「蕃茄大蝦青口意大利麵」!餐湯係粟米濃湯，湯質地濃厚，有粟米顆粒，熱度適中，唔係罐頭湯，正!主角! 賣相超靚靚!大蝦有膏又大隻，啖啖肉，抵食!青口大隻，味道就不過不失。忘記左原來餐跟左塊包，應該係跟湯食，但我已經飲哂個湯… 包包好好味呀，有麵包獨有甜香。意粉質地彈牙，滿滿的蕃茄汁掛在麵上，加上菇、蟹柳、小蕃茄、翠玉瓜做配菜， 呢個意粉簡直超水準 !仲有杯跟餐咖啡，可以揀凍齋啡或者牛奶咖啡。 我杯牛奶咖啡，味道就正常~其實佢嘅Tea set同雪糕都好吸引，下次真係要再黎試下佢嘅甜品!…Read More

我和朋友經openrice，按評價是但揀左間樓上Cafe 晚餐。GO DUTCH CAFE 嘅經營時間竟然去到4/5 am! 如果係夜貓一族，黎呢到是不錯選擇，仲有好多旅遊書俾你慢慢睇。大門就有盞好吸睛的燈!Cafe 分兩邊，明明大堂有位，但帶左我去偏室，偏室冷氣機聲好嘈! 有啲影響傾計~Set meal 包主餐同40蚊樓下熱飲。小食選擇薯類偏多。落單後等左一陣，終於有飲品。友人好似點左一個芒果紅茶，我就叫左個柑桔檸檬。友人說飲品偏甜，但嗜甜的我就覺得好好味。＜咖喱汁炸蝦天婦羅飯＞不過不失，Cafe水準。炸蝦好脆!又熱! 咖喱唔辣，又夠香! OK好食~＜法式煙鴨胸長通粉＞賣相吸引，滿滿芝士。新鮮焗起，連隻碟都熱。鴨胸偏咸，但整份餐分量算多。多到我都食唔哂!…Read More

今日晚上揀左一間樓上「Station 3 Cafe」跟朋友Dinner，貪佢安靜，比起旺角普遍的餐廳更寬敞，性價比高! 「Station 3 Cafe」位於金雞廣場25樓，出到lift 口直行就到白色的主裝修，加上少少的掛畫，綠色的植物，給人舒適的感覺。呢度啲櫈都係梳化黎，坐幾耐都好舒服!「安心偷食」新聞都係在 Station 3 睇，大大個電視，大大沱鼻涕都睇得好清楚，好彩未叫野食Dinner set 就最抵，有主菜，飲品。加$30仲有沙律，芝士蛋糕!飲品花款好多!有兩大版，每款都好吸引!小食種類唔算太多，但都做得出色!＜松露薯條＞份量大，2個人食真係有啲多。薯條唔似超市貨，薯條略為粗身。松露好香，一上枱就令人流口水! 我見鄰枱都有叫，可能係餐廳必叫之選!睇下有薯仔皮ga!＜女皇＞玫瑰檸檬乳酪沙冰 (右杯)玫瑰被打成碎粒，加上酸酸嘅檸檬，甜甜嘅乳酪，好香，好開胃。＜ 巨峰提子乳酪:) ＞(左杯)朋友叫ge, 佢就覺得略甜，不過整體都ok好飲~總體飲品賣相一流，大大杯，打卡一流!頭盤沙律正常，沙律菜靚仔無異味!＜煙三文魚野菌忌廉燴意粉＞意粉軟硬度適中，每條意粉都依附住野菌忌廉醬，正! 煙三文魚圈成玫瑰花形狀，賣相漂亮!＜西班牙煙鴨胸燴飯＞我都試咗朋友一兩啖鴨胸燴飯， 整體嚟講燴飯唔油膩，軟硬度及味道適中， 鴨胸食得出煙燻嘅味道!＜法國朱古力芝士蛋糕＞＜藍莓芝士蛋糕＞兩件蛋糕賣相靚 ，灑上糖粉，配上焦糖/朱古力醬嘅拉花。法國朱古力芝士蛋糕，朱古力味道濃烈 ，總共有五層 。第一層係朱古力醬，第二層係朱古力mousse，喺兩層朱古力海綿蛋糕中間再夾上一層薄薄嘅朱古力mousse，好好食呀！雖然藍莓芝士蛋糕冇咁多層口感，但係藍莓醬 配上口感實在嘅芝士蛋糕，每一啖都充滿幸福的感覺!…Read More

早上返工，晚上返學，是一般打工仔日常返學前的晚餐，選擇了久違的日式放題稿賞一下自己。之前經過，已經知道平時晚餐時間會好多人排隊等位，所以揀左六點黎到。不用等位，但餐廳已經有不少食客。係文華商場，搭笠可到，地點指示清晰。餐廳用剔剔紙落單，我覺得比平板電腦落單更方便快捷! :)有不同類型食物: 壽司，刺身，卷物，煮食， 鍋物， 炸物 ，天婦羅……，仲有星級海鮮宴!其中星級海鮮宴食物最吸引， 有黃金炒海蝦 辣酒煮大蜆， 瑤柱海鮮粥 ，法式忌廉藍青口，芝士蒜香蝦。＜芝士蒜香蝦＞ 開邊大蝦鋪上蒜粒，再加上一層厚厚焗過嘅芝士， 蒜香、芝士鹹香， 加上蝦的鮮味 ，在口腔融為一體，在味蕾上到爆發! 必推!＜ 刺身 ＞刺身新鮮，厚切，即叫即到。 其中油甘魚和櫻花魷魚味道最好。＜ 海膽手捲 ＞手捲一口份量，海膽冇腥味，味道唔錯!＜人氣鐵板蒜香一口牛＞ 必推稱得上人氣之作，果然係做得出色。牛肉質地爽彈，有牛香，蒜香味濃。 我發覺佢哋嘅蒜香食物做得最出色!必叫!＜ 蒲燒鰻魚 ＞ 必點超好食! 平時出街買鰻魚都好貴，喺度可以食番夠本! 鰻魚無骨，肉質軟林，蒲燒汁香甜! ＜鹽燒三文魚壽司＞好食到咬咗一半先記得影相。 三文魚炙燒過 後 ，能逼出本身魚油， 加上少少鹹香 ，真係好好食!:)＜心太軟＞ 正細細件，熱辣辣，朱古力味香濃， 蛋糕濕潤 ，有流心效果。飲品種類繁多，仲有啤酒，膠樽裝飲品大大支 唔似得其他放題店，膠樽飲品細細支。仲食咗好多其他食物，真係寫都寫唔曬! 仲有甜品櫃雪糕櫃都冇影到出嚟。平均食物質素高 ， 熱食夠熱 ，食物味道唔錯， 冇漏單情況，傳菜夠快，職員做事勤快，好快會收走食完嘅碟，有禮貌~ 可見無論食物、服務、環境 ，都顯示出呢一間係有誠意嘅放題食肆，值得支持。…Read More

一個港女到重慶搵食，心裏總有點毛毛的，要搵個天不怕地不怕的男友陪陪先夠膽去今日到「7E咖喱王」搵食，網上見好多正評，一於就去呢間探險喇!一去到重慶就有好多哥哥撈客，撈完客佢地會親自帶路。起初我地仲怕自己會搵唔到路，咁就唔洗怕喇~門面唔起眼，周邊同層都係旅館，自己摸上黎的為食鬼就要小心行錯。餐廳唔係賣裝修，但係賣親切同美味食物一入到去，就有靚仔外國侍應帶位 (我都唔知係屬於咩國籍)，仲介紹佢地餐廳的招牌菜，中文都算流利，我同男友都冇咩頭緒食咩好，今餐係由佢發板＜ 威化胡椒餅 ＞原來每枱客係主菜上前，都會送一客。胡椒味唔太重，薄脆非常! 一啲都唔油~ 仲伴一碟綠醬吃，香草醬甜甜辣辣，好開胃!＜Chicken Masala 馬沙拉燴雞＞Masala是一重普遍的綜合印度香料，濃濃的印度香味，是辣、酸、甜的合奏。雞件嫩滑，有質感。分量適中，真心好食!＜蒜蓉烤餅＞烤餅有4塊，大大塊。 口感煙韌，有微微蒜香。餐牌烤餅是在"Tandoor"烤，即是土窯爐，怪不得咁香! 配上Malsala的醬汁，成塊餅充滿印度香氣! ＜Tandoori chicken 香燒雞塊＞雞塊其實係用上雞槌和雞上髀，又係用masala醃過，用鐵板上。侍應哥哥話滴上檸檬汁更好食。果然，檸檬就好似魔法醬汁一樣，可以令雞有一種Fresh的感覺! 雞髀肉嫩滑， 可惜雞上髀有少少乾鞋。 鐵板底有被烤過的雜菜，碟邊伴有青瓜、蘿蔔。 為充滿香料味嘅口腔帶來清新! 進餐到尾聲，侍應走來關心我哋 問我哋覺得呢一餐好唔好食~我地咬住隻雞，都大叫好食! 仲要舉埋手指公放心~我地會再返黎再開餐加埋菜單俾你地睇下，仲有好多野想試!…Read More

取代了Pizza express的鋪位，取而代之是港人至愛的日本拉麵店，廚房有一面大，可觀看廚師烹煮。店鋪明光，鋪面雖不算大，但尚算舒適。有多款拉麵揀，仲會教埋你用什麼醬搭配!＜俺流紫蘇梅子拉麵＞配搭新鮮，梅子清新開胃，拉麵有紫蘇的淡淡香味， 叉燒味道一般，略鞋口，蛋就有少少流心，湯底偏清。其餘友人都叫左碗拉麵，可惜我已經唔記得叫咩～ 淨係記得湯底比較重口味。仲叫咗個唐揚雞share，雞大大件，脆口。肉質有油份，好食!…Read More

媽子話好耐冇請佢食飯，要服侍皇后，就要搵間好食，好坐，唔迫，乾淨，多菜色，有特色的餐廳~ 最好之選，莫過於近近地嘅「一杯」。餐廳位於apm，相當易搵當晚無book位，但都不用等位，好快就可以就坐樓底高，裝修又有特色仲可以睇住廚師整燒餅＜蟹肉牛油果卷＞賣相精嫩，蟹肉有點腥，牛油果片軟滑，整體配搭都夾，不過不失~＜柚子牛肉石頭湯＞喝第一啖，哇!真係有柚子味! 加上大量的蔥，旺菜，成個湯甜得來又有少少柚子香!Match!可惜所謂的牛肉，係好食，但分量好少，得幾小塊＜炸雞軟骨＞炸粉不會太厚，剛剛好包裹住雞軟骨的，都幾juicy!＜一杯關西燒＞雜錦燒餅，有蛋有菜有肉，上面淋上沙律，甜醬，好正侍應在燒餅上桌後隨即為我地切開燒餅，服務周到!女皇老媽子表示食得滿意， 御准我下次再帶佢去~…Read More

屋企人呢排胃炎，新年餐餐要食粥為左逃避，立刻call我男人出黎食晚飯初一喎，當然是食好啲~ Table18經常行過，但未食過，就試下佢喇!＜燒美國頂級牛肩肉300g＞5成熟，加上鐵板餘溫，切下去，沒有血水流出，肉內顏色粉嫩吃下去，Wow~ 肉質實在，不老，沒渣，又彈牙。牛肉配上黑松露醬汁，充滿肉香，松露香~ 配菜有薯條，西蘭花，粟米，烤蒜頭。最欣賞是烤蒜頭，原隻烤焗，蒜頭軟冧＜美國帶子鮮蝦蘑菇薄餅＞薄底pizza，脆得來都有啲厚度，有咬口蕃茄醬底，酸酸地，帶子鮮蝦正常味道，芝士有拉絲。＜煙三文魚凱撒沙律＞三文魚有厚度，不是超級市場的貨式般又薄又咸，沙律菜新鮮爽嫩，加埋脆脆麵包粒，唔錯唔錯!餐廳為慶祝豬年，當日有抽利是活動，我正正就是抽中我本來已想叫的凱撒沙律!真的很好運呢！…Read More

之前經過，見到幾吸引，不過見個釜飯好似好細，怕唔夠我呢個大食積食，所以都無試。但近日有朋友試過，話啲飯一定夠我食好喇，咁我就試下跟朋友兩人食 叫左兩個飯:鰻魚金魂極，鰻魚銀魂極金魂即是指有燒汁，鰻魚不算太薄身，有獨特香香的鰻魚味，鰻魚沒有骨。極是指鰻魚分量，簡單來說是中量，伴以少量蔬菜，蛋絲，配搭健康!銀魂即是白鰻魚，少了燒汁，卻直接食到饅魚原本香味，要餐廳本身對鰻魚有信心先會咁做食完先知加18蚊有茶漬配搭!白鰻加茶漬一定好正!底下有焦飯，有焦香得來又唔太硬，飯量果然足夠!一定夠飽另外仲叫左個炸雞，又脆又香，咬落有肉汁!奉上沙津汁，檸檬，想配邊樣都得~兩人食左二百幾蚊! ok la~ 見佢仲有其他肉類/生蠔釜飯~下次可再戰…Read More

天氣凍冰冰，肚仔餓空空正好打邊爐，返夜校之前，約左友人去「吞POT」先!位於油麻地地鐵站附近，行一分鐘就到位於廿幾樓，境觀開揚，可看漂亮城市夜境!我地7點幾去到，未算多人，服務員好快為我地帶位，奉上調味九格子 辣的有辣椒，豆瓣醬，潮州辣油(?)，仲有惹味 炸蒜，蒜頭，香蔥。 好似仲有xo醬，芝麻醬，太多調味了我都唔太識分，哈哈!我混得好靚~呵呵以剔剔紙點單作為女士，必推的＜ 花雕藥膳雞煲 ＞，雞點了半隻，藥膳和雞的分量十足。喝上一口藥膳雞湯，哇！不得了，好香好濃的藥材味，還夾上雞的鮮味。熱騰騰~ 好暖身~真材實料!＜自制蟹粉蟹肉雲吞 ＞自家製足料雲吞，見到一絲絲蟹肉，皮薄肉厚，充滿蟹香，友人至愛即炸＜爆芝響鈴＞， 究竟是什麼味道?其他火鍋店都未見過wor店員同我地講響鈴是現炸，叫我地小心熱~ 好貼心啊！放上鍋內淥兩淥，就食得! 新鮮味道就是不同!沒有街買響鈴的油膱味，內裏包上已溶掉的芝心，香濃味道，不言而喻!＜唐生菜＞塊塊都好好好翠綠，無爛~相信餐廳是一塊一塊揀完先賣俾客!!仲有不同類型飲品!可惜近排戒甜，見到旁邊的哥哥們一旁飲上幾杯，一樂也!整體服務好好，服務員貼心有禮，坐位寬敞，抽風系統好，一點都不焗，吃完身上都沒油煙味~良朋知已，一家大小都適合~食物有不少是手作，新鮮和性價比高是餐廳的賣點!推介推介!…Read More

食過數次，第一次見新開貪新鮮，之後幾次都係因為等酒樓等唔到位，又餓，近近地，食住先今次又係，諗住飲茶，但趕返工，見上面有間金記，唔好理!醫好個肚先!叫左個咖喱牛腩飯，啲飯好硬，加唔夠水煮，咖喱就一般般，牛腩就叫好啲，有筋有腩，唔太難咬，無咩渣，盤內都有5，6嚿~午餐跟湯跟飲品，羅宋湯唔錯~唔辣，有足料蔬菜~煮到軟林林!熱飲杯幾有創意，又特別~杯邊鬼馬地寫上「謝謝你飲我」，哈哈!…Read More