samnghk的個人專頁

本來每個星期都會有1-2日會到呢間店食早餐，一直個感覺都係不過不失，喺啲食物偏鹹，啲飲用水有少少怪味，同埋隻杯有少少污跡。之前都有見過員工同客人會有拗撬，無諗過今次會發生喺自己身上。今日同朋友平常咁去食早餐，都係點番例牌通粉＋煎蛋多士。女員工A 送餐黎，咁就話隻太陽蛋穿左，啲蛋汁漏哂出黎，問我地要唔要。我地話想換過隻，咁佢就拎番去廚房。等左陣，女員工A 再送餐黎，係熟蛋多士。我朋友見到塊多士比較燶同焦黑，本來都唔想再麻煩員工更換，嘗試咬左一口但太硬咬唔到，咁唯有麻煩員工換。咁岩女員工A 經過，我地問佢話多士大燶咬唔到，可唔可以換過另一份多士。然後女員工A 就黑臉話：「我地呢到既多士不嬲都係咁！」 然後我地再解釋話個多士咬唔到，希望可以換另一件。佢又再話：「你地一開始唔叫少焊」 我幫襯左都過大半年，我無叫過「少焊」，而啲多士係正常咁食到。 然後佢又話「啲多士係會搽埋牛油咁去焊，所以會係咁」。對話之際，另一份多士煎蛋上枱，份多士係正常（唔太燶，唔太硬，入到口），我地就話「呢份多士我地無叫少焊，但就係我地接受到既多士」。女員工A 跟住好晦氣咁話：「咁我換啲白面包比你啦！」，我地話好。但佢轉頭拎白面包過黎時，隻碟比較大力咁扔喺枱面，仲細細聲講左句「咁麻煩」，好無禮貌。我最後忍唔住話左句：「如果你咁唔想做，唔好喺度做啦」 女員工A 就即刻大聲鬧我地。我亦都回番佢話「其實只係想換番件入到口既多士真係咁難？」「你望下其他客人既多士，有邊一件好似頭先嗰件咁燶？」。鬧多幾句之後，女員工A 竟然大聲講左句：「我唔做你地生意啦！」聽到呢句，我朋友都忍唔住起左身，叫我地去第二間食。餐廳員工竟然開口叫客人走。作為客人，黎用餐要受員工氣，仲要比員工當眾喝令趕走，好似趕乞丐咁，正常一個人都無理由仲留喺間咁既餐廰食，食落去都無意思。我地起身諗住走，個女員工A 仲繼續鬧我地。最後我地無食到任何野就走左。喺成個過程，眼鏡男老闆全程只係喺度旁觀，睥住我地，中間細聲講左句「請咩人係我話事」同埋最後話「咁你地走啦」，放肆比員工鬧客人，同埋趕客人走。唔知道仲以為個女員工A 先係老闆。做老闆做到咁其實都幾無面子，俾個員工咁樣鬧事。其實一開始叫廚房換過件多士有幾難？去其他餐廰（如大X活），見到其他客人多士太燶，職員都會肯幫客人換過件多士（明白人之常情，要做多左野，可能佢地心裹面會鬧客人，但至少唔會當面鬧番個客轉頭）附近其實都有唔少餐廳，價錢同質素其實差唔多，有部份會貴1-2蚊但比較好食，最重要係人地員工會識尊重客人，唔會好似呢間永發廚房咁無禮貌，老闆仲會支持員工大聲鬧客人，趕走客人。最後總結，我係唔會再去呢間餐廳，但都祝願佢生意興隆，同埋女員工A 早日上位取代老闆位置，就可以名正言順咁趕哂啲客人走。…查看更多

喺朋友推介下，黎左呢間泉章居，位置有少少「格攝」，喺旺角東站同埋旺角站中間，一入到去，都有唔少人坐咗喺度等，初時以為要等位，所以問知客拎左張飛就自動坐埋一邊等，坐左5分鐘，佢就同我講「上得去架啦!」。(之後另外兩個遲黎少少既朋友同我都一樣經歷左喺樓下等位既經驗)據聞泉章居既雞出名好食，所以就叫左個二人餐，要左例牌既霸王雞，有兩碟小菜，送個例湯，都算幾抵，怕唔夠食就再叫多左碟臘味飯。本來諗住例牌份量既雞應該好細碟下，點知佢一上菜，個份量比想像中大好多！最後我地三個男人都好夠食。佢既雞肉好滑，啖啖都係肉，醃得香口，但又唔會太鹹。佢有配個麻醬，一齊點黎食都唔錯，不過咁靚既雞，當然係原汁原味食最好！冬天豆苗當造，當然要叫番碟蟹肉扒豆苗，果然無令人失望，豆苗食落好清甜，只係唔太感覺到佢有蟹肉味，不過撈白飯食都係一流！例湯雖然話係二人份量，但都好大碗下，最後我地三個男人都係飲剩少少。飲落都幾開胃舒服，比較清甜，對平時無乜湯水飲既返工一族都係一個唔錯既推介。粉絲牛仔骨煲，又係另一個撈白飯之選！牛仔骨食落好夠稔，好有黑椒味，而粉絲更加係吸哂牛仔骨同埋黑椒汁既精華！臘味飯，最後呢碟就真係比較普通，同平時喺出面食到既臘味飯差唔多，不過都算係飽肚之選。最後埋單＄454(人均$151)，都算係物有所值，啲野好食又飽肚。…查看更多

最近手頭比較緊，但又唔想成日食麥記，行下行下，就走左去銀咖哩。叫左佢最平嗰個銀咖哩飯，24蚊，雖然比之前個年代貴左唔少，但無計啦，夜晚都無乜地方可以食到平價飯。不過PIAGO 人實在太多，如果唔係得我自己一個人食，都好難搵到位。我搵到位先至敢行去買飯食，買完飯都只係等左5分鐘左右就有得食，都算快手。飯量都幾足，咖哩汁好豐富，啖啖白飯都食到好濃既咖哩汁，傳統既日式咖哩既一大特點就係甜甜地又唔會太辣。好岩唔太食得辣既朋友。…查看更多

喺佐敦附近做完野，差唔多12點，就喺附近搵左間Toastbox 食野。望一望個餐牌，雖然佢寫跟餐熱奶茶免費加大，但其實同番其他分店比較，佢只係將加大個價錢加埋落個餐度，所以其實唔係咁抵同老實。我就點左平日食開既T1傳統多士餐。唔知點解，今日出餐係十級慢，見到好多人都企左喺出餐處附近等，我就搵埋個位打開電腦做陣野，等個感應器自己響。等左好一陣子，杯奶茶都飲左大半杯，但都係未有野食。突然就聽到有個客人都有勁大聲咁閙啲職員:「仲要我等幾耐啊?」見到個職員都好慌張咁搵廚房問。多士出得好慢，坐隔離枱既人遲過自己落單，但到佢食完個公仔面，我份多士同蛋都係未到。於是我都忍唔住行去問一問個職員，佢話廚房仲整緊。再等多幾分鐘，終於有得食。煎蛋同平時一樣，加少少胡淑粉吊下味仲好食。多士醬料好足，咖椰醬食落甜而不膩，十分唔錯。…查看更多

收工途經McDonald，見到有新款薯條出，同埋有紅豆批，就叫個餐再加左幾蚊試下。不過由於夜晚太多人，所以都等左成10分鐘先有得食。個芝士煙肉薯條好有驚喜，薯條都算熱辣辣，配芝士醬十分match，係啲煙肉碎比較零碎同太有咬口，味道雖然都好好，但唔係咁夾個薯條。成件事好罪惡，但有芝士醬真係好好食!至於個紅豆批就比想像中差少少，個皮同平時既批無乜差別，但溫度唔係好夠熱，味道唔係好夠甜，而且食落入面個太濃稠，好似凝固左既紅豆槳咁。…查看更多

約左朋友仔九點幾喺尖沙咀附近搵野食，行行下經過「豚豚拍子」，醒起上次見到佢新開張，話過想試下，喺門口望一望左佢個menu，大家都覺得OK就入左去。我地有三個人，但望到有個2人set，有兩個主食，三份小食，覺得都ＯＫ，於是就叫左呢個。我地分別點左個三文魚飯，豬軟骨拉面，南瓜薯餅，燒牛舌，炒草菇。三文魚飯： 望落賣相一般，但出奇地好食，三文魚夠肥美，沙律醬同壽司飯好夾，唯一美中不足既係佢既牛油果有啲生，食落硬同有少少苦。燒牛舌：一定要趁熱食！一放凍左就會好un，本身食好香口，有種路邊食串燒既感覺。可以加埋少少檸檬汁一齊食會更香。炒草菇：好香口，做餐前小菜一流！南瓜薯餅：咬第一啖己經食到入面充滿好甜好香既南瓜味，如果怕太肥膩，可以加埋配菜同沙律醬一齊食，會有另一種風味。豬軟骨拉面：比起其他食物相對較為普通，加上食過其他比較出色既拉面，所以覺得呢間既拉面一般。湯底偏鹹同埋渴喉，面條缺乏彈性，但配料都算用得幾足。…查看更多

大耐無食KFC，於是今日心血來潮叫左人一齊去食。一去到餐廳，見到勁多人，應該係因為下午茶時間，望一望個餐牌，有個小食set 24蚊，又真係幾抵既。同大部份快餐店一樣，KFC都係俾左錢再等叫號拎野食，我地叫左個S1香烤蜂蜜雞翼茶餐 同埋 S4 巴辣香雞翼茶餐，加多左兩隻巴辣香雞翼。由於太多人，叫完個餐，都等左成10分鐘先有得食。雞翼一定要趁熱食，蜂蜜雞翼超好食，外皮好香口，入面既雞肉好滑。巴辣香雞翼就覺得太辣，搶哂啲雞味。KFC葡撻就一直都係咁好食，品質絕對有保證!至於白汁雞皇飯同磨菇飯都係有少少偏鹹，但整體都算唔錯。蜜糖綠茶飲落有少少甜味, 飲落同日式快餐店既日本綠茶好似，同雞翼食都幾夾，同埋起到少少解辣作用。…查看更多

夜媽媽有啲肚餓，於是約埋朋友仔去附近食啲野，本來想食樓上間吉野家，但太多人，同埋朋友又想試下新野，最後就黎左呢間一泡而紅。想食得健康少少，就揀左個番茄薯仔牛肉泡飯，但點知落order 時老細話無哂薯仔，最後轉左落冬瓜粒，但都係完全唔夾個湯，加上番茄湯底本身飲落都幾酸，最可怕既係佢既飯係食得出有種隔夜飯既味道，同埋煮得太爛身。唯一覺得唔錯既係牛肉，煮得唸身又比較好食(不過都係夾唔到番茄湯底)再試左一啖朋友嗰碗雙魚奪金泡飯既湯，同自己嗰碗差好遠... 真材實料既魚湯，魚肉好滑好好食。不過無試佢啲飯，但應該同自己嗰碗一樣都係麻麻地。差三蚊既話，早知我都叫呢碗雙魚奪金泡飯。…查看更多

由於係朋友生日，所以一早訂座位，7點半去到，服務員好主動咁上前招待，講我地訂左位，亦都好快咁搵番相關資料，安排左我地入座。有個朋友遲到，所以我地傾左陣計先落單，但好快8點15分左右服務員問我地仲有無野加，原來已經係last order 時間，先知店鋪原來9點鐘就close，所以我地再即刻落埋啲甜品，服務員都話會等我地食完正餐先上，所以叫我地可以落左單先。Curly Fries: 個薯條炸得幾靚，熱辣辣，趁熱食好正，佢仲有三款醫汁，簡單黎講就係有「甜」「酸」「辣」三種味道，食落好過癮，刺激唔同味蕾，唔會食到好厭。Truffle and Pancetta Pizza: 薄批好脆口，配料香口，食落去味道比較特別，平時喺出面食唔到呢種pizza，幾有新鮮感!Margherita Pizza: 食落同平時喺出面食既Margherita 差唔多，比起較有特色既Truffle and Pancetta 失色左少少，但品質都算中上。Iberico Ham and Porcini Mushrooms Spaghetti: 同其他主食比算係最唔好食，本身個意粉有少少偏硬同埋無味，雖然配料味道唔錯，不過食落個感覺就好似水煮好左個意粉，先再加啲配料上去，失去左菜式既一體感。服務員見我地食完正餐，就上甜品比我地啦!Sizzling Chocolate Brownie a la Mode: 個汁似係焦糖醬，試左一啖，大家都覺得甜得滯，去到有鹹味既感覺，於是就無點醬咁食brownie，不過brownie 本身都整得唔錯，唔點醬都幾好食。Brownie 上面可以配一球雪糕(Coffee, Vanila, Apple Sorbet 三揀一)，落單時服務員推介可以配Coffee 或者Vanilla，Apple Sorbet 就同Brownie唔太夾，最後我地叫左Vanilla雪糕，食落都有十分濃郁既香草味，但又唔會太甜，同有微溫既brownie 一齊放入口好match，好似香草加朱古力咁，但又唔會搶左brownie 本身既甜味。食完甜品大家好似都唔夠喉，於是壽星女再出去叫多左個Galeto 同埋Blueberry cheesecakeGelato: 今次要左Apple sobert, 好似真係食緊青蘋果咁, 甜度岩岩好。Blueberry Cheesecake: 諗住本身cheesecake 會幾滯下，但食落夾心佢有加少少檸檬汁，唔會好膩同頂胃，好舒服。而餅底就只係平時整蛋糕用既消化餅，無乜特別。佢旁邊放左cream，連埋cheesecake一齊食好正！店鋪有wifi，密碼可以去前台收銀處嗰度見到，連接速度都幾好，上網睇YouTube 無lag機! (不過同friend 食飯當然就少玩電話啦!) 水要自己倒，佢用左過濾水，飲落唔會有平時自己煲水既金屬味，不過略用紙杯唔太環保，同埋隻杯比較細，一兩啖就飲哂啲水要再出去倒，希望店鋪可以用番可以洗完再用既杯。店員服務態度好好，有笑容，充滿細心和耐性，待客之道１００分！最後埋單連加一，人均$182，價錢略貴，但都算物有所值！店鋪有少少偏遠，介乎灣仔港鐵站同銅鑼灣站中間，步行大約都要10-15分鐘先到。但亦都造就左店內環境比較安靜同舒適，岩哂唔鐘意迫同嘈既朋友仔，值得再去!…查看更多

今日又要去趕住上堂，於是就好急咁買左個開心樂園餐帶去課室食，揀開心樂園餐既原因不外乎係因為佢價錢平，20蚊有找，又可以食得健康啲，可以叫鮮橙汁同埋粟米杯，加上晚上又食唔落太多，開心樂園餐既細份量係岩岩好。用左點餐機落單，先知原來漢堡飽係可以set唔同份量既材料！比如係酸瓜最多可以落２片（平時係一片），茄汁份量可以揀。我就加多左塊塊酸瓜，因為自己好鐘意食，同埋落少左茄汁。最後打開個包黎睇，個份量真係有變化！至於粟米都係甜甜地，好食。而鮮橙汁飲落亦好新鮮(因為夠酸，唔似勁加糖嗰啲果汁)不過唔知點解，今次係第二次用點餐機落開心樂園餐，揀左玩具但佢都無執比我，下次可能需要拎住張單問番收銀處。…查看更多

今日星期日，過左兩點鐘少少先到，已經見到門口好多人等位，即刻拎飛等叫號。因為我地都唔介意搭枱，所以比較快能夠入座。後來先知原來係因為晚上有婚宴，所以佢無開放偏廳房間，所以座位比較緊張。同樣是下午茶時段，除左叫左少量點心，亦都試下點佢既肉絲煎面（無錯，係「煎」面），意外地好食，特別係如果鐘意食平時肉絲炒面喺側面脆口既面餅，佢煎得岩岩好，唔會太焦太油。中間既面底同啲料一齊食又唔會太鹹。而家喺出面茶餐廳午餐食個炒粉面飯都係差唔多既價錢（30尾到40頭），而肉絲炒面亦都唔係好多間餐廳煮得好食，一係就太濕，太鹹，或者太乾，分佈得唔平均。但呢間酒樓既價錢雖然稍貴，但係個質素係值得。至於其他點心，同肉絲煎面相比就有少少失色，質素都比較參差。特別係香芒糯米卷，入面係完全無味（用啫哩粉開水都比佢有味道），鮮蝦菜苗餃亦都退步左少少，唔知點解會加左啲薑喺入面，同菜苗味道好唔夾。至於蝦餃都係真材實料，大大粒既蝦肉喺入面。整體黎講，今餐都算係唔錯，大家下次去酒樓不妨都可以試下點佢既炒粉面飯，話唔定會有驚喜！…查看更多

如果想追求一個唔迫，環境唔太嘈既地方打邊爐，呢間「囍」絕對岩哂您心水! 星期六晚8點半前到左店舖，唔洗等位，入面又唔多人，雖然我地得2 個人，但店員安排左個4人卡位比我地，個座位亦都十分闊落，就算坐足4個人都唔會迫。個環境好適合朋友聚會，一邊食野一邊吹水。由於朋友想食牛肉，所以就揀左個B餐(每位$148, 計埋加一就$163), 最經濟實惠而又有牛肉既餐，豬牛雞肉都有。望一望啲湯底選擇，由清淡到濃味既選擇都有，本來諗住安全啲揀壽喜燒，不過朋友想試木瓜椰青水，而服務員都推介話木瓜椰青水都多客人選擇。的確呢個湯底好少見到，咁就試下啦！好快服務員就拎左個煲過黎，開到最大火，話等佢滾左就會幫我地落雞肉落去煮。咁係等待既時間我同朋友就一齊出左去睇下有咩配料拎。基本上見到佢啲配料選擇都幾充足，蔬菜種類幾多，竟然連秋葵都有!其他一啲火鍋料都有：丸類，加工肉類（腸，午餐肉），面類。亦都有煮熟左既食物，好似炒飯同壽司。由於實在太肚餓，先食左少少少壽司頂住肚先。返到埋位，啲湯差唔多滾啦，服務員就過左黎幫我地落雞同埋木瓜湯料，原來喺枱面上既沙漏係用黎計住煮雞既時間，等左大約五分鐘左右就食得。食一口既感覺係：雞肉一流，又滑又甜！本來有諗過煮耐少少，但本身個湯底幾清下，唔想令佢變左雞湯咁，同埋咁滑既雞肉煮大耐會老，所以都係快快手咁夾起哂啲雞肉食。服務員介紹左個「特製醬料」去點雞肉食：日式醬油，再加少少新鮮柑桔汁，同埋沙薑。自己試完建議可以加多少少柑桔汁（佢係比兩粒柑桔自己擠啲汁出黎，夠哂新鮮），會多少少酸味中和番日式醬油既甜，同雞肉好夾，有種天然既味道。之後用黎點牛肉豬肉既味道都好夾。同朋友亦都各自裝左一碗試左佢既木瓜椰青水湯底，都係一個「正」字！個湯好清甜，散發出少少椰香。亦都係令我對成餐火鍋好滿足既主要原因，平時喺其他地方食火鍋，好多時都係靠濃味既火鍋令所有食物都好食（其實好似食味精咁，所有野都會食濃味湯底），但食清湯底既話如果啲配料唔得既話，又會係唔好食。但今次呢個木瓜椰青水湯底好成功咁同所有火鍋料既味道融合埋一齊：將蔬菜既甜度提升，將肉類既鮮味提高，保持左食材本身既味道特性，唔會比個湯底搶哂味，仲要健康過平時既濃味湯底，極力推介木瓜椰青水湯底！同時亦都證明左佢本身火鍋材料質素好，所以敢推介口味較為清甜既湯底！所以個人推介各位朋友喺呢度食係唔需要去再溝醬料，基本上個湯底同個「特製醬料」已經夠食哂！到左火鍋主料既肉！個餐包括豬同牛肉，質素都十分好。而呢間火鍋店令我感到有良心既係佢就算出第二，第三輪既肉，個質素都保持得好好，啲肉質望落去都係靚，食落都係咁好食，絕無欺場！有另外一樣配料推介就係「日式綠茶面」，平時其他地方見唔到，於是就試下，放落去煮左5分鐘左右就夾左黎食，食落好Q，彈牙，順滑，入口好舒服既感覺，就算唔洗點咬，都可以吞到落肚。另一個原因係佢對面條既處理十分好，平時食烏冬同公仔面一個面餅既份量令到唔少人覺得好快飽肚，所以唔敢拎黎煮。但佢既面條就用左個小容器裝住，份量比較細，煮好大約都只係一湯勺，好岩啲想試下少少面既朋友仔。(因為我都鐘意食少少，留番個肚試多啲其他野嘛!) 後期個湯底煮到變色，所以建議一開始先裝一碗湯飲下最純正既湯底味，再煮左啲菜先，最後先開始煮肉。咁亦都係食得比較健康。食到差唔多飽，係時候食甜品啦！同大部份火鍋店一樣，佢有牛奶雪糕機可以自己擠雪糕，旁邊放左啲配料可以自助咁加。食落都幾香牛奶味，十分滿意。好食以外，佢亦都做到一間成功既食店應有既服務態度，服務員好親切，好好笑容，不時會過黎問我地需唔需要加湯，一開始入座既時候亦都做左唔少既介紹，同埋介紹下推薦食法。亦都好樂意解答我地既問題，加肉速度亦都十分迅速。用餐途中聽到有兩枱客都唱生日樂食蛋糕，於是我問左服務員，餐廳唔收切餅費，十分有良心。時間雖然係90分鐘，或者相比其他火鍋店有120分鐘好似短左少少，不過能夠食到好食既野，食得滿足，食得飽，服務又好，其實90分鐘都真係好夠，唯一美中不足既地方係一開始花左啲時間去煲滾啲湯，落雞，再計時，等啲雞煮好左先可以落其他火鍋配料，嗰度其實都花左10分鐘左右。…查看更多

今日全家人都好早起左身，於是就去左德福間稻香飲早茶，九點前去到，無乜人，即刻已經拎到位。喺屋企人話事之下亦都好快填好左點心紙，不過唔知點解明明無乜人，將點心紙舉高揮手啲樓面姐姐們都係無乜反應，舉左手15秒左右，我大叫左聲「唔該!」先有人應機。不過啲野食都算幾快上黎，加番少少分比佢啦。打頭陣既係鳳爪排骨飯，由於本身啲飯都有啲肉汁，就算唔加鼓油其實都好夠味，加埋排骨同鳳爪一齊食都夠哂開胃。之後另一碗雲耳排骨飯亦都上枱，比起鳳爪排骨飯，佢失色左少少，可能係由於鳳爪排骨飯比較鹹，所以食呢碗雲耳排骨飯嗰時顥得唔夠味，不過佢啲雲耳食落都幾爽口，唔錯！而排骨其實就同鳳爪排骨飯既排骨同出一徹（如果唔同既話就嚇死人啦。。。）又黎左碗豬肚雞肉粥，姐姐落左比較多既胡椒粉，所以鹹左少少。不過佢用料都幾足，入面係有啲肉食下，算係中規中矩。食完啲正餐野，啲點心終於黎啦。首先係鵝肝黑椒燒賣，由於佢做緊特價，所以比起普通既燒賣更加平！而且佢食落比普通燒賣好食，的確係食到少少鵝肝味，加上佢落左啲黑椒係面度吊下味，其實食落係幾過癮。牛肉球，一家四口食就岩岩好！今次姐姐手勢好，落喼汁岩岩好，唔會比酸味蓋過哂啲牛肉味，不過建議唔落調味先試到佢既真材實料（最重要係食得健康啲）煎蝦米腸上枱既時候熱辣辣，正！就咁食都好香口，佢煎到岩岩好有少少焦，但又唔會太焦。如果覺得就咁食會太ｄｒｙ既食客們可以點佢提供既麻醬或者甜醬，食到唔同既好滋味。最後黎埋個「菜餃」（唔係太記得佢個名，因為水準一般，無乜印象），佢裏面有少少菜同有少少蝦肉，食落同平時食嗰啲餃差唔多（而家餐廳各自整出黎既餃都係差唔多料，只係將佢入面轉少少野），所以呢個都係中規中矩啦!…查看更多

今日又跟啲同學出去搵野食，見到譚仔三哥米線，好耐無食過，就走左入去食。好彩岩岩七點，仲搵到位坐，之後坐坐下已經見到其他客人要等位。我地三個人分別叫左自己想食既米線，我就叫左個三哥米線，配金菇同埋蕃茄湯底，大家仲夾份叫左小份土匪雞翼，因為每次行過，都聞到好香既「土匪雞翼」味，今次終於有機會試到。等左5分鐘左右，我碗米線終於黎啦，一望覺得勁大碗！先試左啖湯底，好濃烈，好有蕃茄味，不過對我黎講酸左少少，我個朋友提我要撈一撈佢喺面嗰啲茄膏先。撈完之後的確啲味道平衡返好多，連埋金菇米線一齊食好正。米線食落好滑，容易入口，金菇都好甜。等多左一陣，萬眾期待既土匪雞翼都黎啦!即刻夾左舊黎食，勁香口，佢喺雞皮上面既香料食落好開胃同舒服，個面又唔會煎得太焦，入面既雞肉亦都好滑，煮得岩岩好。土匪雞翼係必試推介！到最後埋單，人均４０蚊，食到勁勁飽，超抵食！…查看更多

禮拜日難得一家人都得閒，於是就去左飲茶，下午茶時段2點開始入座，我地大約2點05分到達，去到都只係等左2分鐘左右(等個帶位阿姐行出黎)。落左單之後，某啲食物好快就上菜。紅燒乳鴿會係我大力推薦既菜式，咬落肉汁好夠，唔似平時其他地方既乳鴿太油太乾，下午茶市都只係19蚊有2隻，十分抵食。鮮蝦菜苗餃亦都係另一個唔錯既點心，可能係而家冬天，菜苗當造，食落啲菜苗好香口。塊皮亦都好薄好滑，夾既時候要小心啲，好易夾爛。唯一有啲小小負評就係佢「鮮蝦」既份量太少，每隻餃得一粒蝦仔(感覺係將一隻蝦切粒，分左入4隻餃咁 =.=)蝦餃，正常發揮，令人感動既係終於食到一隻完整既蝦!! (同上面個菜苗餃比較之下)至於咸水角，望落去唔太油，都還可以，不過除左老豆之外都無人食，我自己一見到啲油物就覺得唔太健康，所以唔想食。叉燒腸發揮都係正常，至少啲腸粉食落有咬口，唔係「好爛皮，黐哂牙」嗰種感覺，用料都足，其實唔落鼓油都已經夠味。(個人覺得落左鼓油比較鹹)白灼西生菜，菜本身都幾難唔好食，唔... 其實喺酒樓食菜真係唔抵。仲有其他點心，不過由於我掛住食乳鴿，所以唔記得影相，以下逐一做個簡評。山竹牛肉球：牛肉落喼汁好食，不過食到啲枝竹有少少怪味，阿媽話可能係縮左，所以最後我地無食哂啲枝竹。古綿馬拉糕：鬆軟香甜，好食！香麻流沙包：一開始睇錯左以為係「奶皇包」，原來係「芝麻包」，不過都好食，芝麻香甜，咬落包度真係有流沙既口感。本來點左個蘿蔔糕，但食哂所有點心，茶壺既水都飲埋，等多１５分鐘都係無黎，於是最後出去埋單嗰時取消番個點單。最後埋單盛惠$194.5，飲茶黎講都算OK啦!…查看更多