mavst's Profile

見好多人都講呢間嘢，bookmarked咗好一會，今日行過灣仔試下，Have to give a No No 😩今日獨行俠，已經唸緊會唔會俾人亂咁塞位坐，結果真係。一話一位佢已經叫我坐bar枱，如果係平日繁忙時間我唔介意，但今日真係唔想，同埋仲要唔係多人。同個帶位侍應講話想坐table，佢望坐我一眼，然之後帶坐我去Bar枱😑 之後我再重新講一次話我想坐table，佢先好唔情願咁叫另外一位侍應帶我去。坐低之後俾咗張QR code我落單，咁我好正常咁落單啦，之後有個侍應衝過嚟話我張QR code同隔離枱調轉咗，話要調返轉，之後另外一位侍應又話同咗廚房講唔使調轉，之後上菜又係掉轉咗。搞嚟搞去我覺得好混亂，如果是但一枱客走先，另外一枱未走，咁有新客到張單又係繼續調轉？點解簡簡單單一張單都可以搞到咁🤦🏻‍♀️🤦🏻‍♀️講返食物：見啲人話麻辣鴨血鍋好正，一心諗住試吓，好Overrated⋯⋯咁嘅小小一鍋$82（連冬粉），仲要未計加一。碗冬粉得一住，兩啖食晒。鴨血得嗰幾舊，仲要係散嘅，之後加多一粒貢丸，兩舊豆腐仔，幾片菜🤦🏻‍♀️🤦🏻‍♀️味道都係好一般，好重味精。終結：咁嘅價錢台灣野有好多其他選擇，應該都唔會再嚟食物：3/5環境：3/5服務：2/5CP: 2/5回頭：應該唔會…Read More

見到社交平台好多宣傳，啲人評價又唔太差，唸住試吓，好失望！一行兩人，一人一碗。1. 杏仁合桃露$39 + 湯丸（加$10）話說小妹食甜品多年都對各款中式甜品都略知一二。最杰嘅係「糊」（例如芝麻糊），之後稀啲嘅係「露」（例如合桃露、馬蹄露），再稀啲嘅係「茶」（例如杏仁茶、桑寄生茶）首先唔好講味道。哩碗嘢完全唔可以叫合桃露，只可以叫合桃茶，稀到水爹爹🤦🏻‍♀️。另外朋友好鍾意食湯丸，唸住加十蚊都算啦，點知得個兩粒利川湯丸咁款嘅湯丸，兩粒咁嘅嘢收人十蚊會唔會太過份🙄2. 杏仁茶燉蛋白 $55見舖頭誠意推介，唸住實冇死，點知中伏🤦🏻‍♀️🤦🏻‍♀️杏仁茶燉蛋白，個重點好明顯應該係個蛋白啦話？得個1/4碗都唔知有冇，我地堂食仲要同我地講冇哂堂食碗，得膠碗…都算喇。啲蛋白冇一羹畢起係完整，全部散嘅，好冇誠意囉大佬。仲好意思收人$55，憑什麼？終結：食到一肚氣，又係浪費quota系列🙄 仲要啲枱密質質，座得唔舒服。地方已經唔係大，重要份付款區呀、取餐區呀，又要客人自己出去攞餐，好混亂囉。請多幾個人做企堂都唔肯，可想而知哩間嘢啲服務會有幾好。食物：2/5環境：2/5服務：2/5CP: 1/5回頭： 不…Read More

店舖真係好細，應該大概100尺到。其實都坐得有少少逼夾，但係嘢食質素非常好👍🏻食物選擇都好多，另外仲有特別餐牌。免治雞肉棒好好食，加埋蛋汁又係另一個層次。燒聖子都有驚喜，黃色嗰個醬汁係麵豉？醬汁好惹味，同聖子好夾。聖子亦都新鮮，肉質嫩滑。燒炸油揚豆腐：醬汁都係好好食，加埋堅魚碎，成件事個質素都好高。另外嗰個辣燒墨魚膠棒都好有驚喜，佢係似墨魚滑嘅質地，加埋嗰個辣汁，好好食。好食到追加左一份😛燒茄子質素正常，中上水平，分量比想像中多。燒年糕非常有驚喜，平時啲年糕都係好韌，呢個煙韌度啱啱好，芝士唔太油膩，有少少流心，外層炸過好鬆脆。整體非常好食。餐廳亦都好細心安排佢最後先上，咁樣唔使未食其他嘢就已經飽晒。整體來講呢間餐廳食物質素好高，但係始終環境同座位都比較窄，加上食物價錢都唔算平，兩個人加埋嘢飲賣單都差唔多$500一個，所以有少少減分。另外可能店舖實在太細嘅關係，喺廚房燒嘢其實坐喺吧枱都會成浸油煙味。但係整體來講係好食嘅，所以都會再幫襯！食物：5/5環境：3/5服務：4/5CP: 3/5回頭：會…Read More

話說小妹都係鐵板燒愛好者，當然食鐵板燒都有一定要求啦。見呢間日式鐵板燒新開，試業價$498，諗住嚟試吓。果然，一分錢一分貨好，首先俾大家睇吓啲餐牌為咗增加透明度，我決定影晒晚市同午市嘅餐牌俾大家睇。我哋今晚試嗰個係第一個餐牌，佢哋聲稱話係試業價$498頭盤：三色前菜首先第一個係紫菜包住嘅天婦羅海膽，第二個係茄子嘅漬物，第三個係魷魚漬物。之後係香辣大蝦沙律：聲稱係大蝦但係都唔算太大，沙律菜都算新鮮，配上有印度味嘅香辣汁都幾得意。刺身就好一般，俾得三文魚都唔係咩貴價嘢，不過都算新鮮茶碗蒸有少少鹹，但整體來講都OK，雖然獻汁較為多主菜揀咗紐西蘭肉眼扒。唔係好掂，呢個已經係五成熟，但係就乾到有啲柴，賣相亦唔見得好好。如果唔點任何醬汁就咁食，根本係冇味，連最基本嘅牛肉香味都冇。唔掂喎另外仲有個炒飯（已經冇心機影相）。話說當晚有四枱客，總共八個人。大家都差唔多時間食完上炒飯。個主師竟然搬咗一大碟飯出嚟，然後八碗飯一齊炒…. 認真真係未見過高級嘅鐵板燒師傅會咁樣一次過大鑊飯咁炒。個炒飯係有啲櫻花蝦同埋魚乾仔，但係只係得個鹹味完全唔覺得香口。個飯又炒到好硬。之後廚師話會跟埋個堅魚湯汁，可以食到一半做茶漬飯。我哋等咗10分鐘都仲未有嗰碗汁，碗飯都食到最後一啖。原來侍應哥哥攞住左碗汁，喺全場繞場一周搵緊邊台客仲未有-.-最後甜品有雲呢拿雪糕/水蜜桃雪芭，我哋揀咗水蜜桃雪芭，正正常常啦唔算特別。總結：整體來講覺得未去到高級鐵板燒水準，餐廳聲稱話鐵板燒由日本師傅主理，但係成晚剩係得一個講廣東話嘅女師傅幫我哋燒。係我哋臨走嘅時候先見到有一個貌似日本師傅，但係都唔知佢係唔係嘅師傅出咗嚟一陣…食物唔特別有驚喜，講真咁嘅價錢其實有好多其他選擇。仲要有幾個侍應哥哥好似新來唔知自己做緊乜嘢，賣單嗰時又計錯數，成支酒計漏咗，好彩我哋誠實小寶寶同佢講返啫，如果唔係佢可能要自己咩條數都幾慘…由於前菜普通，主菜唔得，炒飯都唔得。所以我決定俾劣評食物：2/5環境：3/5服務：2/5 （侍應哥哥要加緊培訓）CP: 2/5回頭：可一不可再…Read More

又係見到open rice啲好評如潮，唸著帶媽媽嚟試吓，都係不似預期😩燒金目鯛魚頭雜菜鍋原先都對呢個幾有期望，因為係是日精選餐牌上面。魚頭第一啖食落口已經知唔得🙅🏼。冰鮮魚頭冇嚟味道，仲有少少腥，就算燒過都食到腥味🤢牛肉烏冬味道普通，烏冬偏幼，唔係我鍾意食嗰啲日本烏冬。串燒：免治雞肉、厚燒牛舌、和牛免治雞肉味道正常，和牛有啲韌，牛舌有啲筋。追加咗個雞肉丸，普普通通呢個全餐飯最難食，第一batch叫，第二batch追加啲嘢嚟哂都未嚟，原先都唸著取消，同侍應講完即刻嚟🙄咁好明顯係漏單啦。都算喇，啲壽司飯唔係日本米，完全食落口同普通冷飯冇分別，仲要係淋bat bat嗰啲。軟殼蟹又洩哂氣…. 噫😩😩總結：唔係難食，但係唔可以叫好食，四百幾個笑哈哈更加係過份。啲位又逼夾，將啲2人枱擺哂係一個長走廊，分4張卡位，每一枱卡位嘅闊度同一個廁格一樣闊，重要話衛生問題要落棠簾，但係又落到只係去到頭嘅位置，咁落嚟有咩用呢？🙄食物：2/5環境：1/5服務：2/5CP: 2/5回頭：不了…Read More

之前見朋友嚟食過賣相唔錯，openRice又有百幾個笑哈哈，早兩個禮拜已經book定枱，但係食完都幾失望！首先係成餐飯我哋覺得都算係OK嘅菜式：老壇酸菜魚（$468）差唔多見到枱都有叫。魚係新鮮嘅，有魚片，另外魚骨就拎咗去炸，食落都幾香口。其他配菜有酸菜、大豆芽、蓮藕、小木耳、寬粉等等。花椒有紅花椒同青花椒，份量都算多但係味道唔夠突出，好似花椒嘅存在只係一個襯托，並唔係同成個酸菜魚融為一體。酸菜魚整體來講味道OK，唔算太油膩，屬於中上水平，但未係最好。除咗酸菜魚之外，以下菜式全部都唔得🙅🏼椒麻鮮雞（$148）、清炒萵筍絲（$138）椒麻鮮雞：一食落去就知係雪雞，又霉又冇雞味，味道好一般，又係花椒好多，但係一啲味都冇。另外份量亦屬於少。清炒萵筍絲：從未食過可以切到咁幼嘅萵筍絲，幼嘅程度講緊係每一條唔超過2mm，近排啲萵筍好貴咩？夫妻肺片（$108）圖片一眼望晒，有八成以上都係唐芹仔，肺片應該唔超過十塊，每一塊肺片又係唔超過2mm….. 分量亦唔需要多講，一隻手掌咁多麻辣豬耳 （$88）呢碟應該係全晚最過分嘅一碟菜，隻碟已經唔係大，每塊豬耳簡直薄到係透光，不得不讚師傅嘅刀工，點解可以切到每一塊都係1mm以下🤦🏻‍♀️，我真係未食過咁薄嘅豬耳。總結：除咗個酸菜魚之外，其他菜式俾我嘅感覺都係非常之寒酸！！其實收得咁嘅價錢，食物質素應該有返咁上下水準。剩係得個招牌酸菜魚好食，其他啲食物都唔得，仲要所有嘢都唔夠辣。真係唔明嗰百幾個笑哈哈係邊度嚟。一間餐廳如果係好食嘅，上至招牌菜，下至一碟配菜都應該要全部都好食。基於呢個原因，所以我係俾劣評嘅食物：1/5 （酸菜魚：3/5）服務：3/5環境：3/5CP: 1/5回頭：應該唔會…Read More

下午茶時間嚟，唸著叫啲甜嘢食吓，見到佢有個dessert menu，唔包野飲$60-80。叫咗個麻糬野莓窩夫 （$68單叫）窩夫又乾又韌，就咁抌幾粒麻糬係側邊就算，有幾粒士多啤梨，雪糕唔特別好食，整體來講其實都算難食。仲要收咁嘅價錢，都真係幾過分。 另外叫咗個肉桂latte 完全冇玉桂味，上面淨係求其撒左啲玉桂粉，飲落去粉還粉，咖啡還咖啡，完全唔知想點。另外見到隔離枱叫咗個大蝦意粉，得個幾隻蝦仔，意粉有水汪汪咁，睇見都唔係好想食，好彩冇叫到。成間餐廳又坐得好迫夾，完全都唔覺得係舒服，嘢食又麻麻，應該都唔會再黎。食物： 2/5服務：3/5環境： 3/5CP: 2/5回頭： 不了…Read More

哩間火鍋店好多宣傳，主打港女打卡必去，裝修係幾靚嘅，食物就一般，CP值唔太高。訂咗6點，入座已經講明8點要還枱。坐咗冇耐侍應已經問我地要咩湯底，最後揀咗牛乳玫瑰鍋味道有啲似淡嘅忌廉湯，都算好味，但飲得出幾重味精...另外叫咗：- 手切肥牛 - 墨魚滑- 三色餃- 桂花蚌- 海鮮菇- 金粒豆腐- 萵荀金粒豆腐幾好食不過，酥炸香脆，肥牛就有啲韌，三色餃黃色好食、黑色普通、綠色怪怪地，其他食物一般，整體嚟講食物定價偏貴。瑰洛月，個名好好聽，其實係洛神花蘋果茶。有啲太甜，冇咩酸味。舊玫瑰冰等咗超過半個鐘都未溶...已經係咁篤篤篤，完全攻破唔到，飲到要還枱仲未溶，同侍應講咗句，佢都繼續俾我地坐，最後舊冰等咗成粒鐘（加埋係咁篤）先溶哂。建議想order嘅記得早啲叫...另外有個扮team lab 嘅小房子，都for 係港女打卡為主。最後埋單每人大概$5xx，其實唔係叫咗好多嘢... 最誇張係醬錢收咗每人$40，出面係有個自助醬料corner，但係都係普通醬料（XO醬都冇😠），咁都$40會唔會有啲過份⋯⋯*總結*：打卡一流，但係CP不高。樓下係大家樂，可想而知呢度租金可以有幾貴... 油麻地地區，收中環嘅價錢，仲有下面部𨋢尤其恐怖。食物：3/5環境： 5/5服務： 4/5CP: 2/5回頭： 未必會 …Read More

好多foodie、KOL推介，見佢個樣都幾靚，又話咩越南fusion菜，點知食完得淡笑。一入門口，100平方米都唔知有冇嘅地方，已經放咗三枱4人枱，三枱2人枱。枱同枱之間嘅距離，緊緊fit得入一個屁股，同麥記啲擺枱冇分別。我哋唔想坐得咁迫夾，見到張四人枱冇人坐，出邊又冇客等，問侍應可唔可以坐張大少少，佢話唔得，嗰張係四人枱。但係明明另外一張四人枱，都係坐緊兩個人🙄全場得一個侍應，其餘嘅都係茶水。同佢講話落單，佢都好似唔想睬我哋咁...終於落到單，叫咗一個鹹點，一個甜品， 加2杯嘢飲個蛋糕港女打卡一流，所謂嘅芝士蛋糕，一啲芝士味都冇，下邊餅底又淋.... 咁嘅質素仲要收$68，酒店都唔使咁貴啦話😑 蝦多士$108 ：又係賣相一流，食落唔入流😑 伴碟蝦片全部都係蝕晒氣🤢蝦多士啲蝦又霉又唔新鮮，咁大塊多士隻蝦佔1/3都唔知有冇。講真，爭鮮熟蝦壽司啲蝦都新鮮過佢🤦🏻‍♀️ 仲好意思收人$108，憑什麼。Latte正常冇驚喜，另外杯茶都係正常冇驚喜。原先諗住同朋友share食，問侍應姐姐攞2隻叉同1把刀，等咗5分鐘都未有。我哋remind佢，等多5分鐘之後佢淨係拎咗1隻叉嚟😑😑😑我哋再remind佢，再等多唔知幾多分鐘佢先再黑著面拎多一把刀嚟....難道兩隻叉同一把刀真係有咁難記嗎？總結：地方逼夾，服務不友善，食物又唔好食又貴食物： 2/5服務：2/5環境：2/5CP: 2/5回頭：不了不了😩…Read More

見好評幾多，雖然都有留意到劣評都幾中肯，姑且一試，都係唔掂😩星期六晚飯，6:30嚟到，有book。原先侍應安排高枱，感覺好逼夾，之後安排咗大少少嘅枱，但係係廁所出邊....見在場吉位已經冇乜，都算喇... 番紅花煮青口$138：完全見唔到同食唔出有番紅花... 但係青口都算大隻，雖然數量較少西班牙吐司三式（番茄、橄欖醬、豬肉）$48: 豬肉嗰個有啲奇怪，其他兩個正常，但係冇乜驚喜西班牙海鮮飯$298: 份量算多，但係啲飯鹹到苦🤢，海鮮不過不失，但係整體嚟講食得出唔傳統，就算佢係就香港人口味，都唔可以話係好食，總之就係怪怪地... 另外叫咗兩杯sangria，各$98，一杯傳統（正常但唔算好生果），一杯荔枝（好甜好利賓納feel）。咁嘅價錢，性價比唔高。環境普通，唔算好有情調，有枝蠟蠋咁囉，但係播啲音樂一時播情歌，一時播clubbing歌，搞到個人思緒有啲混亂🤯總結： 食物怪怪地，播啲歌又怪怪地... 食物： 2/5環境： 3/5 （音樂尤其怪）服務：3/5CP: 2/5回頭：不會了…Read More

見到好多好評，但係親身體驗並非理想tea time 嚟到，一入餐廳，得2個侍應，但係全場應該有超過20張檯。企咗係門口差唔多2分鐘，個侍應行過望一望我，但係完全冇理過我嘅存在，之後先施施然行過嚟問我幾位...我同佢講話2位，想要張大啲嘅檯，因為想用電腦做嘢要啲空間，佢有咁多張吉檯唔俾，係要俾張最細嘅我😒 之後我再重複一次我想要張大少少嘅檯用電腦，佢先至俾另外一張我。落order叫咗差唔多5分鐘先有人理我，order嘅時候講明想上咗鹹點先，甜品同飲品後上，佢食物都未到轉頭就攞杯野飲嚟😑😑。食物質素亦唔見得好好：叫咗一個散叫辣肉腸薄餅，同埋一個下午茶餐（French crepe + coffee）辣肉腸薄餅名副其實”薄“過張紙... 係literally同下面張墊底紙一樣薄 🤦🏻‍♀️，個薄餅嚟到已經唔係熱（順帶一提，間餐廳冷氣勁大，尤其埋邊sofa位）， 食落冇咩料，辣肉腸（$1嘅size）數埋6塊都唔知有冇，薄餅大概5-6”，盛惠$158，都幾略水... 間連鎖薄餅帽都好食過佢啦French crepe (tea set with regular coffee)賣相唔差，但係🤮。Crepe 食落去係近符泥膠質地，似蛋餅多過crepe。唯一好食係vanilla雪糕，但係相信唔係自家製。個crepe都幾失望.....總結：食物麻麻，服務亦麻麻食物：2/5服務： 2/5環境：3/5CP： 2/5回頭：未必會…Read More

其實平時喺OpenRice search下都知，中環真係冇乜幾間食日本菜，一係就係好貴嗰啲。見佢新開張咗一排，今日過嚟試試，有驚喜！魚生好新鮮，就算係角切，都唔係啲頭頭尾尾，有誠意👍🏻碗碟都好精緻，好日式，欣賞佢個麵豉湯碗，平時啲舖頭只係會用膠碗，佢呢個係真搪瓷碗👍🏻價錢唔算平，熟食大概$150，魚生/壽司$170-$250，但係質素非常唔錯，貴啲都值得嘅。雖然地方唔大，但係勝在夠cozy～食物：5/5環境： 4/5服務：4/5CP: 4/5回頭： 會…Read More

‼️如果你正在考慮book呢間餐廳，以下食評絕對值得你參考‼️Fine Dine 三大元素無非講求1. 環境 2. 食物 3. 服務，呢間餐廳除咗個景之外，冇其他原先為咗2021 Spring restaurant week(RW)而嚟，但係dining city full 咗，唯有book openrice (OPR)。OPR佢地有個golden hour menu，望落去嘢食同RW大同小異，價錢一樣$488。點知原來後尾朋友book到RW，同我一齊double book咗。去到餐廳朋友用咗RW個booking入座，餐廳話搵唔到個Booking，搞咗一輪先安排一個唔係窗口位嘅位置。之後我話其實我係OPR都有book到，有講明話要窗口位。個經理已經好唔耐煩黑哂面咁問我哋究竟要食RW 定Golden hour menu，佢話如果食RW就唔會有窗口位...點解❓❓❓❓❓❓❓（後來經理自己泄露軍情話因為RW會抽佢地佣.... ）哦！原來有咁分嘅 ！🙃 所以唔好以為個景係免費，你張單係包㗎😉好囉，咁既然兩個menu對我哋來講都係一樣價錢，咁梗係要個有景架啦！Golden Hour Menu ：首先，侍應完全冇解釋成個Menu點樣運作，我哋原先以為全部都可以自選，原來諸多限制... 原來前菜同主菜成枱人要叫一樣嘅組合，粉麵飯同甜品每人可以叫自己嗰份。下面英文寫咗 ”menu requires a minimum of two people to order” ，你話minimum咋嘛，冇話whole table 喎。我地三個人驚食唔晒，諗住叫兩份餐其他散叫，佢又話唔得，要成枱都叫餐🙄 Okay fine. 前菜：椒香口水雞、玫瑰茶燻素鵝、龍抄手素鵝同龍抄手（辣鮮蝦雲吞）普通，口水雞個樣似雞絲粉皮多過似口水雞，最初仲以為佢上錯....主菜：宮保黑豚肉、老乾媽牛柳宮保黑豚肉：味道普通，用啲染色蘋果扮菠蘿。老乾媽牛柳（冇影相）：牛柳好韌，成碟嘢完全冇老乾媽味（十幾蚊一樽老乾媽都要慳？？）。另外四季豆係散叫嘅，味道一般，完全唔辣。最後我哋另外自己落咗兩碟辣椒油 :)粉麵飯：手撕鴨肉炒麵都係普普通通，有啲油膩咁... 另外有朋友叫咗炒飯，都係普普通通，有幾隻蝦咁... 甜品： 朱古力柑桔似平時潮州酒樓食開嘅炸油粿，但係中間係朱古力。呢碟係兩個人份量，一人一粒，一啖食晒，多啲都冇。環境：全場都係黑黑暗暗，最恐怖係個廁所，地下紅色一達達，古代木門配銅面盤，開埋紅色燈，唔講以為自己去咗海馬公園哈囉喂👻👻* 咁大間餐廳，收得咁嘅價錢，俾個紙袋裝口罩都冇，仲要最後收野嗰陣，收埋我朋友個口罩🙄🙄總結：extremely overrated + overpriced ，完全係呃鬼佬食物：2/5環境：5/5 （*個景，唔係餐廳自己）服務：1/5CP: 1/5回頭： 不了…Read More

星期日lunch食飯度度都係人，原先唸著食附近間人氣台灣菜，但係太多人，見嚟邊唔使點排隊就過咗嚟。入去見到有2-3吉枱，唸著即刻有得入，但係侍應堅持話要俾角落頭張枱我地，話個張執緊枱叫我地等等。好啦，等左5-10分鐘都未執完....其實唔明點解唔可以安排我地坐其他枱先，之後你要執咪慢慢執囉😑 都算喇全場大概12-15張枱，得1個樓面😑😑 帶位係佢，落單係佢，上菜係佢，埋單都係佢....睇見佢都覺得辛苦💦1325坐低落單，1355先有第一碟野食，只見枱枱都係咁吹單，但係就得一個樓面一腳踢。之後1415先上埋第二碟，水吧個邊都係得一個人，然後廚房傳菜又係一個。講返野食：叫咗兩個set lunch，價錢$78-$118，包野飲（限$20內）多過$20補差價。其實$20淨係得西茶同檸檬茶，咖啡/其他飲品最平（americano)都要$24，特飲個啲$30-40。 黑松露軟殼蟹意大利飯黑松露味好香，意大利飯夠creamy，唔算太淋有咬口。原隻軟殼蟹上都算有誠意，另外加埋蘆筍幾好食。鮮茄牛柳粒長通粉呢個意粉有驚喜，個醬汁好好食又夠汁，有微微嘅酒味，長通粉al dente，白色長菇朔左啲酒味好好食。牛柳粒有啲熟但唔算太韌，整體來講係好食嘅。另外餐飲叫咗伯爵茶，都係茶包，冇乜特別。食物來講，唔算太大碟，但整體係好食嘅，睇得出廚房有心煮，所以我都唔劣評你。但係服務，尤其係人手方面就有待改善。始終同區嚟講，價錢偏貴，咁嘅服務質素真係唔得。前後等咗接近50分鐘先上齊所有食物真係有啲過分😠就算食物幾好食都冇用啦！老闆，假日請多幾個人幫吓手啦😩😩食物：4/5環境：3/5服務：1/5CP: 3/5回頭：平日冇咁多人或者會再嚟，假日免了…Read More

定期都會返黎幫襯😋食過好多間車仔麵，始終都係文記最好食！今次都係叫咗兩個麵：雞翼、酸齋、陳皮魚蛋、魚角、油麵（腩汁小辣）全部都好好食，油麵夠彈口，湯汁香甜，辣醬惹味。豬手、豬皮、豬紅、蘿蔔、米線 （清湯）豬手有少少毛，其他都好入味，蘿蔔夠清甜冇渣，豬皮夠淋，豬紅冇押味，就算只係清湯都好正。港九新界食過好多間車仔麵，都係呢間最好食，非常推介！ 味道：5/5服務：3/5環境：4/5CP: 5/5回頭：一定會😋…Read More