DietAnotherDay's Profile

星期六中午食飯時間經過，見近排啲人好似都有討論下呢間店，明明見一個客都冇，我都入咗去。（之後發現人哋討論嘅係「僕一」唔係「僕之」🥲）本身唔係咁餓想叫少麵，但係少麵係麵同餸都減半，但都要$50幾，我都係要正常份量$70幾蚊算。真心，碗麵唔算難食，但真係好似日式超市買到果啲即食麵味，所有野，麵同配菜都好平平無奇，咁樣收$70-$80有啲貴啦。我自己就唔會再幫襯架喇。佐敦會有更好選擇！…Read More

星期六7:00pm到，排咗10分鐘就有得食喇！天氣勁熱，入到去個冷氣好勁，座位有啲迫。可惜沾麵已售罄，我哋叫咗一個豚骨拉麵同埋一個胡麻冷麵。本身胡麻冷麵係跟雞肉，但係佢賣晒雞肉，變咗跟叉燒，係碎上凍叉燒，冇比較下都ok嘅。胡麻汁夠甜，我鍾意❤️！食完涼幾度。佢冷氣又勁，我又食凍野，之後我病咗🥲。豚骨拉麵係出色嘅，湯夠濃夠味，中華風，紫菜唔係一塊果隻，食落好似份量多好多，又好味！麵係幼麵，ok嘅！叉燒算嫩，冇炙過唔係好夠香。冇蛋🥲。整體份量唔算多。下次再食嘅話，我要食佢個沾麵！…Read More

星期六七點鬆啲去到，都要排成半個鐘先至有位，大熱天時真係出晒汗。叫咗一個料理長之選，火炙腩肉同慢煮豬肩，兩款嘅肉都會有。另外叫咗個妹妹之選，只係會有慢煮肉，肉就冇咩特別，麵係幼麵，上菜時個湯好夠熱，我有少少覺得係太熱，個麵如果唔係好快食晒嘅話就會糊喇。湯底係豬骨魚介湯底，好香好濃厚，佢最好係加咗生洋蔥，好鮮甜，令湯冇咁油膩！蛋要加$10嘅，冇咩特別算係合格。整體唔驚艷，不過所有嘢都合格有餘，值得一試。值得一讚係佢個侍應，好細心，refill 水好快，亦都好有禮貌。…Read More

星期六，6點鬆啲去到，唔使排隊就有得食！😋個位好乾淨！點解咁講？因為拉麵店，食拉麵嗰時都唔多唔少會彈到周圍都係，但大丸，我真係冇見到啲漬。餐牌我哋叫咗蝦豚骨拉麵同埋醬油拉麵，同埋關西風餃子。蝦豚骨拉麵 - 個碗好熱，拉麵好熱，第一啖好重蝦味，之後食落習慣咗就食得返豬骨味，個湯係比較清爽，唔似一般拉麵咁油。麵 - 我揀咗粗麵，一般般。叉燒都係一般般。蛋係出色嘅，佢用咗曉，蛋黃係紅色嘅，重蛋味。拉麵食到一半可以加昆布醋，口味變得更清爽。順帶一提，當日天氣熱，拉麵又好熱，鋪頭又冇咩冷氣，真係食到出晒汗。黑丸 - 醬油拉麵關西風餃子 - 餃子都juicy嘅，加埋木魚同沙律醬，幾得意。…Read More

尚青係出名嘅排隊店，是日星期日，6:00pm到埗，剛剛第一輪晚飯嘅入座，等咗多過半個鐘，先至到我哋入去食。其實要排隊我都預咗，不過間鋪真係冇乜冷氣，排隊熱到出晒汗，到坐低都唔覺得真係涼。我嗰日叫咗鴨血煲，$78，好足料，好多舊鴨血，仲有少少貢丸，豆腐，配冬粉。真心覺得抵，香港買一盒盒嗰啲鴨血$50-$60得兩、三塊鴨血，尚青講緊係佢嘅三倍。我覺得最出色嘅係豆腐，佢嘅豆腐有少少煙韌，同香港食到嘅好唔同。佢成個鴨血煲都算幾辣，好夠香。…Read More

星期六，朝早12:15pm去到海老名，剛剛好趕到最後兩碗限定蠔拉麵。落完單都等咗差唔多半個鐘先至有得食，等嘅時候就見到佢點煮，見到真係好多步驟落足心機！小食上菜喇，成碗麵熱辣辣，有好香嘅柚子味。湯底係偏甜嘅，但係又唔係好係蠔嘅鮮味，反而我覺得係肉嘅味道多啲，然後柚子味都好重，同平時食鹹嘅拉麵係明顯唔同。鍾唔鍾意就真係好個人，我自己鍾意柚子味又好甜所以我覺得好好食。湯底好濃，面係偏粗，配料有蔥、蠔、海苔、肉碎同味蛋，蔥煎到好香，入口仲好熱，蠔一啲都唔惺，肉碎帶甜同埋增加口感，味蛋有啲偏生，略嫌唔夠味。絕對係落足心機整嘅一碗麵。…Read More

今個夏天熊拉麵推出左新嘅魚油撈麵。唔同大細有唔同嘅價錢，咁就唔驚食唔晒。可以揀一種醬汁或者配料，既然佢推薦他他醬，咁我就揀他他醬啦。夏天嘅關係食湯麵會比較熱，可能會食到成身汗，撈麵係一個唔錯嘅選擇。佢個麵似豉油王炒麵，不過就帶甜（其實都幾甜），加埋魚油，其實係有啲膩。個他他醬係好重要，佢嘅酸酸地令到呢碗麵有啲清爽嘅感覺。麵質正常，算係粗麵，暖嘅。配料唔錯，叉燒放涼左，似食火腿，唔太膩，筍夠多，冇渣，蛋好食，係入味嘅，不過因為個麵已經好甜，佢個味蛋又係帶甜，令到成碗面真係甜咗啲。不過我都係食晒嘅。服務就真係麻麻地，雖然拉麵店我都唔期望有咩服務。我一入到去佢就俾咗吧枱位我，跟住佢想我掉位，因為佢要俾四連位其他人。佢有問我嘅，咁OK啦換啦，我要抽住自己個袋，一隻手拎住口罩，另一隻手拎住杯水，我都未拎晒啲嘢，佢已經比嚟緊班人企係我後邊等我，跟住我見到佢抹都冇抹過張檯就比其他人坐，疫情期間其實係咪都要衛生啲呢？我拎住咁多嘢，員工係咪都可以幫下手呢？…Read More

拉麵台風開咗咁耐（已經8年）一直都有幫襯。初初開嘅時候香港都仲係好少拉麵店，到而家愈來愈多競爭都大咗。拉麵台風唔係最top 嘅，不過性價比高，唯一缺點係排得耐，特別而家限聚，佢只係坐一半人。今次星期六8:00pm到開始排，等咗45分鐘終於有得食。平時最鍾意係沾麵，因為係限定，今日食唔到。今次叫咗骨膠原拉麵同埋魚介豬骨拉麵。夏天食骨膠原唔會食到個人好熱。雖然冇湯，但係唔會乾，而且都好夠味。我今次要咗一半麵量，可能免費加一份配菜，今次加咗辣芽菜。另外嘅魚介豬骨湯。湯都好夠味，麵彈牙，叉燒都滑不過唔係好香，蛋好食。仲要份量多，$80真係算抵。叉燒有時一塊有時係一粒粒，我覺得粒粒好食啲，冇咁乾。記得以前剛剛開麵量仲多，不過叉燒好柴，有日本師傅。好似而家已經唔見日本師傅，可能去咗另外分店。…Read More

有一晚經過中環，就去試咗立体派。之前見到啲comment麻麻哋，都係抱住平常心一試。第一晚叫咗個雞白湯，係小有嘅清湯，但其實味道唔係淡，而係好清甜，好似媽媽煲嘅雞湯。麵質ok, 都幾掛湯。我叫咗個細拉麵，所以叉燒得一塊，嫩滑但唔係好夠香。味蛋係奇怪，呢個係追加嘅，到我差唔多食晒碗麵佢都未嚟，一般拉麵店上個麵嘅時候都已經會同一時間上埋追加嘢。到第二晚加替玉，又係後上。另外呢個味蛋真係好一般。唔入味亦冇蛋香。第二日試咗醬油清湯拉麵，分別係九製叉燒拉麵，同埋野菜醬油清湯拉麵。首先湯底都係清湯不過唔淡好夠味。同埋好impressed 嘅一樣嘢係佢上拉麵嗰時隻碗係真係熱到辣手。喺香港我冇食到一間嘅碗會熱到呢個程度。醬油拉麵嘅配菜都好好食。九製叉燒，類似東坡肉，係腩肉，佢整到好甜好香。另外野菜拉麵跟嘅蝦，係類似醬油蟹嘅做法，係凍蝦，入味好香。呢兩樣嘢喺其他拉麵舖真係食唔到。綜合來講我比較推薦醬油拉麵，因為佢嘅配菜比起雞白湯拉麵出色。但唔知係咪重味關係，第二日食完隻眼都腫晒。…Read More

鬼金棒嘅拉麵出名係辣同麻，我覺得同一般嘅日系拉麵唔可以比較，因為係兩件事，日系係食湯底鮮味，好純粹嘅；而麻辣拉麵係食調味。第一次食，叫咗芫茜拉麵同辣芽菜拉麵，保險啲要小麻小辣。心諗日式拉麵唔會好辣，應該冇料到，事實係都辣喎，小麻小辣對我剛剛好，有啲刺激又唔會好大負擔。辣芽菜拉麵 - 好多芽菜呀芫茜拉麵 - 好多芫茜呀，再加咗隻味玉。麵質，佢似刀削麵嘅麵質，偏粗硬，等一等食會好啲，亦唔會好掛湯，不過我覺得ok, 我唔會將佢同其他日系拉麵比，如果佢好掛湯，又辣，唔係好多人受到。叉燒，係一件五花腩肉。正常。味玉，好impressive，生熟程度控制得好好，蛋黃偏紅色，靚蛋，有蛋香又入味。（抱歉比我整得咁肉酸）星期六晚7:30pm唔係好使等，又坐得舒服，缺點係貴少少，兩個麵加咗一個替玉一個味玉，要$250。我會再幫襯。…Read More

之前剛剛開業嘅時候叫過一次外賣，都覺得好一般，但見其他人食評都唔錯，決定再俾一次機會佢。今次七點去到，餐廳坐咗三份一人，唔使排隊。見人哋話蝦拉麵OK，咁就跟啦。其實個樣都唔錯嘅，不過一黎就一浸鹼水味。面質都算OK。叉燒做得唔錯，火炙過，都好香。味玉都合格，略嫌唔夠味。衰在個湯底，唔夠味，好淡。拉麵嘅湯底真係第一重要！比外賣，堂食好好多，起碼份量多少少，同埋熱啲。不過真係稱唔上好食。都係果句，同區咁多拉麵，佢要再努力啲喇。讚嘅係間店支持動物，有介紹助養，有得捐款。…Read More

試咗佢個豚骨沾麵、蝦沾麵仲有炸雞。沾麵最緊要係湯底，佢嘅湯底夠味但只係得鹹味，另外上菜時湯亦唔夠熱，雖然佢有個爐可以加熱，但上菜嗰下都唔夠熱，有啲冇誠意。麵質ok, 佢有熱麵同凍麵俾人揀，我仲以為凍麵唔通冰住上，原來只係普通室溫麵，沾麵不嬲都唔跟熱麵架啦，呢個選擇好奇怪。配菜少，質量亦好普通。份量一般，唔係多。佢未至於難食但係同區咁多拉麵店，佢要努力啲喇。優點係佢唔使排隊，我哋7:30pm到都可以直入。炸雞就一般般。…Read More

團拉麵以前都有食過，覺得一般啦，喺荃灣有幾間好食過佢，所以都甚少再幫襯，今次見佢出咗特別版蜆肉拉麵，先至去試吓。本身諗住堂食，但有突發情況變咗外賣。堂食拉麵點都好食過外賣，起碼熱都熱啲，唔夠熱會變咗有鹼水味，仲要今次有蜆，我都驚會腥。我嘅擔心係冇發生到，湯可能冇咁熱，不過都好好食。蜆肉拉麵，有五、六粒蜆，其中一粒死咗冇開口🥲，其實啲蜆有少少沙，不過我自己可以接受，主要係食佢個湯嘅鮮味。加咗蜆嘅湯真係好鮮好好味。麵本身外賣關係硬咗啲，要浸一陣，叉燒合格嫩滑有炙香，蛋都流心嘅，份量唔知係唔係外賣，我覺得少咗啲。另一個叫咗黑蒜拉麵，一般般，唔係好香好濃。配料好似比較豐富，有蔥、生蒜同炸蒜。我應該都會encore, 睇吓堂食係咪會再好食啲。take away有85折。佢部售票機真係好慢。…Read More

我哋真係好鍾意食雞！Roti Tori 已經食過幾次，encore 得因為佢啲雞真係好嫩，又入味。Roti Tori 主打係烤雞，佢整得真係好好，連雞胸都唔會柴。烤雞一啲都唔油，唔會食完好guilty。佢用啲雞都係比較細隻，以前一隻兩份分就會覺得唔係好飽，今次叫咗一隻半，仲加多條番薯，就真係好飽喇！特別題一題係佢啲醬，佢有四款，紅色係hot sauce - 辣醬，都幾辣，不過只係入口嗰下，冇餘辣。Yellow sauce係柚子，我最鍾意，夠清新，又唔似普通餐廳嗰啲用檸檬加糖咁酸咁甜，柚子味係好出同時唔甜，天然味。Green sauce 係蒜油味，似平時斬料嗰隻蔥油味，同埋都幾咸 。好似仲有一隻係miso, 未試過。讚完佢個柚子醬，又要讚埋佢個柚子沙冰，都係唔會好甜，反而柚子香、澀味重，我反而鍾意咁樣。仲有佢個番薯，本身諗住塞飽自己，番薯係冇咩特別嘅，特別係個醬，係焦糖牛油，我未試過咁樣同番薯食，令到舊番薯好滑又好又多咗一層焦香味。整體我覺得好高質。…Read More

餐廳位置都算偏僻，喺愉景新城對面，福來邨側邊。餐廳環境、食物有質素。價錢來講荃灣區偏貴，但我覺得咁嘅質素係值。Mocktail生蠔🦪 - 好新鮮，可以唔使點醬。醬方面，佢有普通嘅茄汁同埋比較特別既紅酒汁。前菜，吞拿魚與子沙律， 又係好新鮮。我哋叫咗set, 送嘅餐湯。主食係燒烤醬朱肋骨配炸芝士 - 朱肋骨好入味，炸芝士又脆又香。不過食得有啲麻煩。另一主菜係韓牛封門柳 - 個牛煮得好軟好嫩，有牛香味，明顯唔係平時啲平貨，略嫌有啲細份。甜品係麵包布甸 - 好味，唔會太甜，食埋呢個就剛剛好，好滿足！另外見有食評話佢哋只收現金，我當日去佢哋係會收卡嘅。…Read More