fatty_jojo的個人專頁

住系皇后大道東嘅indigo，後巷過嚟就係金鳳啦，好方便！！差唔多日日都會過嚟，無事就會嚟杯奶茶凍檸茶，有時候落著大雨，都會過嚟食個breakfast。不過成日嚟到都要稍為排個8、9分鐘嘅隊。凍檸茶，冰唔系好夠，加翻多啲冰就正啦，咁熱嘅天時，凍啲都解渴啲啊嘛。。·~奶茶我hold唔著，下晝飲完之後，心跳加速。太勁啦杯奶茶，飲完之後成個人都好興奮！！菠蘿油都唔錯，新鮮出爐，外酥內軟。…查看更多

每一日嘅朝早都係從食早餐開始嘅，每一日都流連于各式各樣嘅茶餐廳、餅店.....至於今日就輪到佢啦——檀島！！ 出名嘅特色蛋撻，味道相比起其他茶餐廳嘅真係ok，口感算比較滑，起碼對得著9蚊一隻嘅~~~點咗檀冰，以為系刨冰，點知系紅豆朱古力冰飲，38蚊一杯，都幾貴下，仲味道一般。。。可能因為我自己唔系好鐘意紅豆·· 立頓奶茶，茶味唔夠濃，同某飲品奶茶好似... 荷包蛋多士，荷包蛋就係兩個蛋，味道好淡，幾乎無味，多士仲過得去，麵包烤得幾脆 仲有個牛肉米粉，就係煮過嘅米粉加咗牛肉，煮法其實好簡單，米粉就係普通嘅米粉，味道偏甜。 …查看更多

同Lily從5月份一直約到6月份，一直都約唔到佢...大家平時上班嘅地方唔同，平時佢weekend有好鬼唔得閑，所以一拖再拖，拖到月底先輪到我~~因為系男神吳彥祖嘅日本料理店，所以就過嚟試下啦~~可惜見唔到佢！嚟嘅時候啱啱好系六月優惠，從夜晚六點開始有特價優惠！！Lucky..芝士玉子燒超級推薦！！玉子燒嘅厚度同火候啱啱好，唯一覺得regret嘅系芝士味唔夠濃，因為我特別鐘意芝士！！雞翅入面竟然有包著肉，味道仲ok！有烤翅嘅味道。雞脆骨串&大蝦天婦羅卷~~脆骨果然名不虛傳！軟骨好脆，咬落去卜卜脆，好過癮三文魚魚膠嘅肉質好嫩好嫩，而且唔會好多骨，好味食材都系幾新鮮嘅，味道都唔錯，下次再試試其他款~~…查看更多

朋友極力推薦話要嚟福臨門，食得真係夠曬奢侈啦，我最記得個價錢系5600蚊！！朋友話呢度嘅豬肚魚翅羹特別好食，不過要提前一日預訂。服務員阿姨好有禮貌，茶依然點嘅系鐵觀音。:):)鮑魚。一直都唔覺得鮑魚好食，口感乾身，鮑魚汁反而比鮑魚好味炒飯。有雞肉、瑤柱，飯嘅口感都算粒粒金香，不過稍為咸咗少少，再淡翻啲就perfect啦乳鴿，燒得幾靚，無多餘嘅油脂，乳鴿啖啖肉，比較肥美~·魚翅點嘅系普通排翅。口感覺得有啲腥，食落都幾滑~~燕窩當甜品上嘅，好味！！香甜絲滑…查看更多

完美煮意系我最近新發現嘅一間幾有情調嘅餐廳，餐廳入面嘅佈局復古又文藝~~最啱我呢種文藝青年去食啦！！墻上面仲有美國隊長嘅盾牌！！I Like It.而且啲碟唔系普通嘅白底，仲有巴黎鐵塔，好鬼死得意吖！！沙律前菜，有新鮮嘅生菜、粟米粒同番茄仔，開胃！！墨魚汁魷魚意粉，98蚊。墨魚汁好飽滿，意粉煮得軟熟度啱啱好，仲有個聖女果做裝飾，唔認真睇真係睇唔出上面有幾個魷魚圈，已經完全同意粉融為一體啦。青蘋果綠茶，清新嘅青蘋果味，有濃郁嘅綠茶香味。茉香珍珠奶茶，有淡淡嘅茉莉花香味，奶茶唔會太甜。…查看更多

啱系對面茶餐廳食完飯，無意之中search到呢間糖水鋪，啱啱好可以作為飯後甜品。源記都可以話系見證香港歷史嘅百年老店。！！一坐低就直接點咗個桑寄生蛋茶，蓮子有一湯匙嘅份量，糖水比較清甜，蓮子入口即化，之前一直都未食過呢種口感嘅蓮子，第一次食覺得好特別。紅豆沙，入面仲加咗一隻蛋。紅豆沙口感細滑，有淡淡嘅陳皮味，不過又有沙嘅feel。綠豆沙入面都有好多蓮子，而且口感好酥好軟，唔會太甜，都有加少少陳皮。非常清涼消滯~~…查看更多

食過咁多間泰國菜嘅餐廳，覺得新泰東南亞都係算入邊好食嘅一間！！所以成日都會帶朋友啊、或者屋企人、同事過嚟食野。而且呢度環境唔錯，泰式嘅裝飾會有啲泰國風味。而且服務態度好，加水啊、換碟都好勤力。！麵包焗咖喱軟殼蟹！$188.超級推介！！咖喱嘅品種實在太多啦，雖然都係黃色，不過每間餐廳嘅味道都會有啲唔同，呢度嘅咖喱椰漿味唔會好濃，不過都好味，將軟殼蟹浸系咖喱到，令蟹更加入味！！泰式生蝦！$98.同平時食嘅日本料理入邊嘅蝦肉刺身好唔同。首先喺賣相，將蝦殼整開之後，將蝦肉分成兩邊攤開，再系蝦肉中間放上秘製嘅泰式醬料，蝦肉爽口，新鮮！！！泰式蝦炒金邊粉！$95.呢個金邊粉入邊食材真係超級豐富，有腰果、西柚肉、蝦肉，仲有各式各樣嘅配料，將金邊粉都遮到實曬。口感豐滿。呢個飛天通菜同我地平時食嘅通菜味道都係有啲唔同，佢嘅味道比較重，而且微辣，食起身好開胃。…查看更多

呢日公司開OT開到夜晚9點幾，收工之後男朋友過嚟接我，順便帶我一齊去食個飯。~~好幸福吖！！因為系九龍城附近有好多泰國菜嘅餐廳，今次就揀咗呢間小曼谷泰國餐廳啦。雖然已經系晚黑10點幾啦，不過餐廳嘅人都系有唔少，餐廳空間唔大，不過都算乾淨。我地兩個人點咗一份黃金蝦、一份泰式拼盤、一份蟹肉炒飯、椰青同埋青檸水，服務費要加收10%。！泰式黃金蝦！啲蝦炸到金黃色，外面嘅口感非常香脆，入面嘅蝦肉熱辣辣又夠軟熟，在配埋爽脆嘅蝦片一齊食！泰式拼盤！傳統嘅泰式小食再配埋好味嘅酸甜醬，泰式風味濃郁，拼盤有四種小食！泰式青檸水！清涼解渴，而且酸酸甜甜，好開胃。！香芒蟹肉炒飯！炒飯配菜有肉鬆、番茄、同青瓜。炒飯同雞蛋、四季豆、雞蛋同蟹肉、芒果一齊炒，每一啖都口感豐富。唔會覺得好油膩~！~~…查看更多

一路都有食開牛奶公司嘅雙皮奶，因為味道真係唔錯，而且又唔貴...不過入邊嘅服務員態度真係太...！！！既然咁大個招牌擺系度，係咪服務水平都應該要跟得上呢？？！！雙皮奶，濃郁嘅奶香味，又滑又嫩，名副其實有雙層奶皮，一定要盡快食咗佢，唔系耐咗化咗口感就無咁好。豬扒包嘅兩層包皮口感比較硬，唔軟熟，不過舊豬扒份量就幾足。不過中午食完飯再嚟飲下午茶，豬扒包都系有啲飽。香醇朱古力雙皮奶，份量適中，朱古力味好濃郁，雙皮奶絲滑香甜~！！！紅豆雙皮奶，口感似豆腐花，紅豆好甜，搞到雙皮奶嘅味道無曬。…查看更多

系西環海味街買完乾貨海鮮之後，就順便去酒樓食個飯，夜晚酒樓有唔少特價嘅海鮮菜，真係幾抵食嘎！！點咗燒鵝原本驚著份量太細，四個人唔夠食，於是就點咗半隻燒鵝，200蚊！結果上菜嘅時候竟然系一大碟~~味道好正，鵝肉嘅肉質非常鮮美，食到後面四個人都食唔落啦...另外仲有一個特價海鮮，清蒸大沙巴，目測呢條魚應該幾重下，好大！但係價格都只系138蚊！！！份量真係好大，味道鮮甜，少骨。仲有專門嘅海鮮區俾我地自己去揀海鮮，海鮮都好生猛。。。…查看更多

呢間系米其林餐廳，主打食海鮮。呢度有大電視直播跑馬，啲人一邊食飯一邊睇跑馬。餐廳有海鮮區，可以見到新鮮嘅帝王蟹澳龍，隔離仲放咗個獎。花膠魚翅端上嚟仲系保溫緊嘅，溫熱嘅口感ok，口感綿軟，有啲好結嘅膠質。 鮑魚好細隻，不過口感比較彈牙。入面嘅冬菇同其他配菜都吸收咗鮑魚汁，好入味~~ 龍蝦用金湯焗過，奶白嘅湯拿嚟拌飯都幾好味，肉質比較飽滿。燒味三拼就麻麻啦，口感唔系幾好。 …查看更多

食完之後覺得何洪記嘅菜式普遍都偏咸。而且服務員嘅態度真係好一般...廚房系半開放式嘅，可以見到啲師傅系到整野食。雲吞麵ok咸，可能未經放得太多。不過雲吞入邊都系有鮮蝦嘅~~平時我就比較鐘意食咸野，所以都仲算啱我口味~！腸粉可以值得推介，點著豉油一齊食好味，好快就食完一碟啦黃金流沙包，38蚊一份。味道唔錯，咬落去有啲似爆漿嘅feel。有些少似咸蛋黃嘅味道~…查看更多

朋友介紹韓日燒有晚餐自助，而且仲好抵食添~~今日得閒，一於過嚟試下！！ 一入到餐廳，入面嘅燈光比較暗，好舒服，大部分都係卡座，每個卡座嘅檯上面都有一個燒爐，仲有一個電磁爐。因為嚟得比較早，所以唔洗點等位就可以入座啦。 一入座，我就直奔火鍋食物區，第一層系涼菜，有涼拌青瓜、蘿蔔、等等。第二層有車仔麺、仲有普通嘅即食麵，同埋瓜類。第三層系蔬菜同菇類。食材都好新鮮 酒類飲品，啱曬我胃口。食飯就係應該要飲翻啲酒，自斟自飲，仲有專門嘅杯添。 燒肥牛、豬扒、餃子同雞肉，揀完食材可以自己拿嚟燒，肉類紅白相間，而且舊舊都好大分量，燒嘅時候加些少自己鐘意嘅醬汁落去，熟咗之後會更加入味。 嚟翻碗湯或者糖水都係唔錯嘅選擇！鐵板燒帶子。實在太好味啦，鐵板燒嘅味道，再加上配料同帶子嘅獨特口感。好味.…查看更多

琴晚做嘢做到通宵，無訓幾粒鐘，又繼續ot，做到夜晚終於落班啦，忙到已經唔記得自己今日都無點食野，落班決定先唔翻屋企，填飽個肚先系最重要！！仲有就係自己ot咗咁耐，肯定要食翻啲好嘢獎勵下自己啦！！！店內嘅環境都幾舒適，而且我地去得比較遲，所以唔洗點等就有位啦。 晚餐有專門嘅餐牌，有海鮮意大利飯、羊膝、三文魚扒、牛柳同鵝肝、加20蚊仲有個甜品添~~~ #Peach Orange Paradise#香濃嘅桃味同橙味融合埋一齊，完全唔會覺得唔match，反而仲有好特別嘅香味添，天氣咁熱，夠曬解渴！ #海鮮意大利飯# 香濃嘅白汁撈住啲飯，再配埋多款海鮮，有鮮魷、鮮蝦、蠔，海鮮味十足啊！！！ #美國牛柳伴法式鵝肝#呢樣菜式嘅份量真係夠曬大份啦，牛柳嘅外層煎得好香脆，牛柳咬落去香嫩多汁，熟度啱啱好~~~ #牛油果海蝦釀燒烤菇#呢個菜好特別，經過燒烤之後嘅菇上邊放上海蝦同牛油果嘅汁，牛油果香味充滿成個口腔 #蒜蓉包#唔好睇佢好似只系普通嘅麵包，麵包口感香脆，而且有非常濃郁嘅蒜茸味，口感獨特，食落特別開胃！！ #香橙甘筍湯#香橙嘅酸甜味加上甘筍嘅酸味，令到呢個湯飲落特別開胃，#芒果熱情果蛋糕#賣相好掂，蛋糕口感軟熟，蛋糕入邊仲有芒果夾心，好味！ …查看更多

點樣可以一次過食到各式各樣嘅海鮮，而且仲要經濟實惠呢？今日就去咗一間日式丼飯店，其中有一款刺身系分咗兩層嘅，賣相相當吸引，一定要嚟試下！！！！ 點入面嘅燈飾比較暗，坐得好舒適。餐牌上面為每一個丼飯提供咗picture，方便我地自己揀。有288蚊嘅極上海鮮二段丼仲有178蚊嘅極丼。兩款感覺都好吸引，於是就都叫曬，食唔曬唔緊要，最緊要系可以樣樣都試下！ 極丼，$178。當中有帆立貝、海膽、油甘魚、赤蝦、藍鰭吞拿魚大腩。用比較大隻嘅平碗裝著。吞拿魚外表有光澤，脂肪分佈均勻，一啖咬落去，魚油就會即刻涌曬出嚟。 如果覺得有啲油膩，可以用紫蘇葉包著，再一起放落口，會有特別嘅香味。 極上二段丼$288。分兩層，有九種海鮮刺身。上層有三文魚、帆立貝、蟹鉗、海膽等等...下層有三文魚籽、青瓜、蟹膏、王子碎、溫泉蛋等等....呢度用嘅wasabi系新鮮山葵蓉整成嘅，所以辣得嚟又唔會覺得攻鼻 玫瑰二段丼$268.肥美嘅三文魚腩系厚切，咬落去啖啖肉，口感細滑 最後嚟翻一杯水蜜桃香檳，飲落去好似水蜜桃汽水，但又會帶上些少酒精嘅口感…查看更多