kikitse1750's Profile

留意，長文!!!食前一天打去問，到埋單，竟然出現三個價錢，而且職員態度超差，特別係姓謝既男部長今日去食，食之前一日打定電話訂位及問職員詳情，查詢現場及openrice嘅價格及餐單內容分別，職員就推介唔好喺openrice度買，話現場食完畀錢平過openrice，因為未食過，問得詳細啲時間耐左，女職員都態度一般，前後傾咗十分鐘左近，職員表示8點前埋單，食180分鐘，每位埋單價325，咩都計曬，叫我放心!到今日下午4：51到達餐廳（收據帳單電腦單列明），我問短頭髮女職員，埋單要幾錢，諗住問多次，點知佢回覆食完再計，我就諗，會唔會係怕客人未食完浪費，會將未食完既食物收錢，因為任食通常都係咁，所以無再問(依家諗番起就奇怪)！去到時得一檯客，一男一女，我地被安排坐佢隔離，個女食客望住做出唔開心唔滿意既樣，原來佢叫左埋單，但無人理會，最後佢親自走去收銀位置比錢，返埋座位前經過我隔離，比眼色我，再講啲職員態度好差，咁我個已經驚一驚，明白網上講既可能係真，心諗算啦，試一次吧!之後諗住去雪櫃度飲番罐飲品，因為個餐係任飲，點知姓謝既男部長就唔多有善既態度，話等職員攞QR code落單攞野飲，點知等到有code，搵哂都無飲品，個男部長先話去雪櫃攞野飲!到野食嚟，只有海鮮，係蒸海鮮，話唔係粥底，但職員話最後可轉打邊爐，但已經唔同餐牌所講，咁算啦，期間兩名女職員都有主動幫手放海鮮去蒸，依下感覺其實都覺得可以，但海鮮真係正如網上食評一樣，有部分唔太新鮮，兼且有啲係臭，所以轉食火鍋!期間姓謝既男部長走到我地隔離叫我地入會，介紹我地入左有咩好，當然我地沒有，因為食物一般，地方唔就腳，過嚟食都係抱住試一次嘅心態！食火鍋到7：10分左右，男部長就經過我地檯時講左一句last order，就走了，但明明180分鐘，咁快要截單，好吧，唔緊要了，我可以慢慢食唔再叫野食，但7：20佢又走嚟話要埋單了，我問咁早，佢話依家食左已經148分鐘，我話我地食180分鐘，並不是150分鐘，佢就話你仲要食咩呀？！果下態度已經差，我睇埋帳單發現價錢唔啱，表示昨天已打電話問清楚係325埋單一位，三位應該係975，而不是1010（帳單內有列明時間及價錢），點解收多35蚊，佢話可能假日，女職員無計到，咁算啦，照收1010其間職員都係吹水得閒，但過左8分鐘左右，男部長先走嚟話唔係1010，係1075，果下我覺得你地電腦有問題定人既問題，由975到1075，價錢好似海鮮價咁，每次都唔同，果下佢態度差，我都唔會有善，你地職員之間有問題，無理由責任歸咎於食客，食前一日打電話問清楚，都可以出現三個價錢，態度又差，食物又差，最後我堅持唔會比1075，因為975到1010我都算，照比，但你係對完單後比我，又話自己計錯，叫我比1075，難度職員一錯再錯都要食客負責嗎？沒可能！！最後我走時，比個短頭髮女職員講，你地計錯一次又一次，邊次係真，任你地講，態度唔好，而個男部長係我隔離大大聲對住其中一位女職員講，“你自己比番65蚊呀”，其實係男部長自己拎咗1010嘅單出嚟對完後叫我找數，出錯之後要個女職員填番65蚊，其實佢自己對完單係咪應該佢自己都責任呢，自己出單出錯唔睇就推卸責任，依家男部長處事方式真係比較特別！！！當然最後個女職員有冇比，我唔知，但係你問我呢間餐廳無論係食物，職員態度，各樣，其實都唔會吸引到人再光顧！最後唯一比較好既，分別有聲稱係澳洲A5和牛，同龍蝦（每人半隻龍蝦），其他真係唔得…Read More

上星期已經諗住食，點知太多人，五點半攞位，八點鐘先有得食，唯有放棄，今次早啲，食頭轉五點鐘，四點半去排定，每次見到都好多人排，前面已經有二十幾人，但可以早十分鐘入去坐住等，夠鐘就可以出去攞其他野食， 好多蔬菜仲有甜品， 仲有兩大煲肉燥同埋豬腳配白飯任裝，另外又可以用手機 scan q r code落order，啲嘢都好快嚟到，味道唔錯，湯底有唔同款式選擇，今次叫咗人參湯底， 黑牛唔錯幾好食， 啲蜆熟咗都係大大粒，冇沙好甜幾好食，個個職員都忙冇停手，態度都唔錯有禮貌，外面好多餸菜冇咗都好快refill，位同位之間有板分隔都唔迫幾好，但係得90分鐘真係唔係好夠時間，如果120分鐘會更好，另外如果有得 分段攞位會更好，排太耐真係好攰…Read More

收工未夠六點半咁早到，搵左陣先見間舖，外面係agnes b買衫，行到入面先係餐廳，成間舖設計得好古怪! 一早到又無咩人，無訂檯，點知個侍應安排坐貼住正正門口一排中間的位置，又窄又迫，去邊度都會經過又睇到既位置，但入面得3張檯係有客人，我唯有問有無其他位置，佢先安排入面既檯! 最奇怪係坐坐下隔離都係無訂，但可直接安排住入面，一開始感覺已不好，直到臨走前都無一直再無客人嚟，咁點解咁多吉檯都咁安排呢!?無花果沙律，真心好味，只要材料新鮮就可以，新鮮無花果好清甜，配hamham味道好夾，可惜亦係成餐唯一好味既食物。海鮮意粉(份量偏小)，有2粒帶子，2隻蝦球，8小隻青口，蕃茄底扁意粉普通，意粉有d偏軟身，帶子未熟，蝦球過熟並無咩味，青口熟同唔熟又間，食左一口已叫侍應更換，之後果碟所有無變，除左帶子煎番熟。比目魚伴沙律，比目魚又係過熟引致”鞋”口，而且份量又係偏小。最後焦糖燉蛋又係失望，外層焦糖只係微微既暖並過份硬，燉蛋凍冰冰，只係個星星杯靚。請都唔會再嚟，服務差，食物差，埋單5百幾，問自己食左咩，得無花果沙律，唯有再去其他舖食過吧!…Read More

夜晚8點半，依個鐘數對於Mikiki依個商場， 可以用死城黎形容，因為好多舖頭已經關門，餐廳係有閞，但人流非常之少，見依間有2個客人仲食緊，d圖片都幾吸引就試下! 就係依下就中伏了!! 首先去收銀處問下職員，咩係富士山蛋包飯，佢係有解答我問題，即係什扒蛋包飯，我地係佢面前睇餐牌，但佢都照玩Candy Crush，會唔會太明目張膽呢~~? 首先鰻魚鐵板燒飯送到，立即O哂咀 ，鰻魚呢??係邊度??原來有12條好腥既鰻魚絲!!而且所謂既配料都好唔同!!即刻問個職員個鰻魚鐵板燒飯發生咩事， 同個圖嚴重勁大出入喎!! 職員答:係咁架，鰻魚粒飯，無問題!佢咁講， 我地只好用放大鏡將鰻魚絲放大幾倍變成鰻魚粒。而個名好靚既富士山蛋包飯都同樣好失望 ，有又乾又鞋又老又古怪既小漢堡，小魚柳同豬扒，2個餐最正常既係飯，因為係熱既熟既，而蛋包飯唯一優勝過鰻魚絲飯就係什扒既配菜-香腸，係幾好味!…Read More

每次見到咁長龍等候都嚇怕，終於依次用手機download沙田新城市app就可以手機等攞票，唔洗再係門口等，可以四圍行住咁等， 都要等左35分鐘先有位! 座位之間都算濶落，每張椅子都唔係劃一同款式，幾特別喎! 全場都係播緊時下流行的韓語歌曲K-Pop，邊欣賞邊食都唔錯!叫左個花形雜錦圈圈，貪個樣幾靚又可以有幾款口味，但得中間黑色既烏卒卒真係好味道，黃色係咖哩味，:(但唔太多咖哩味又唔夾，紅色果個食左都唔知咩嚟，好似係中間有魷魚，所以下次只係叫烏卒卒就可以! 炸雞沙律好正，炸雞熱辣辣好juice炸得剛剛好，而沙律就係大蔥絲，加左dd辣好惹味，怕大蔥就唔好叫! 卡邦尼年糕無咩特別，都可以! 最後唔記得咩名既炒飯，對我嚟講好辣，所以唔太敢興趣! 但朋友食得辣就覺得ok!整體服務食物水平都唔錯! 如果唔洗等咁耐就更好啦!…Read More

依間d拉麵超得!有幾得? 第一，湯底勁濃郁豬骨湯，唔同味千，一蘭果d咁普通，一定飲哂d湯! 第二，麵質軟硬適中!第三，雞蛋係我食過最好味既一間，正宗日本溫泉蛋，連蛋白都香滑到不得了! 第四，套餐既龍蝦沙律勁得!:)仲有每檯小貼心都有盒Tempo，辣粉，蒜泥，麥茶，芽菜等!當然都有不足既地方，:(餃子皮薄但一般，舖細之餘座位好迫，坐得唔舒服，成間舖得3個職員但好似無分侍應廚師收銀咁，個個都好忙無咩笑容好似好惡咁，食完都快d走比下一檯咁!…Read More

棉登徑一向都係以酒吧為主，但近幾年愈來愈多唔同類型既餐廳，依間酒吧位置於Xi Hotel(憙酒店)內5樓，食完晚餐行兩步就係，好方便!講真唔係朋友帶我嚟，都唔知道原來有間咁正既酒吧!一入去就見到Bar檯，好多唔同酒放哂係架度，一位青靚白淨既男職員就帶位，而客人檯面放左小蠟燭，附近有部空氣清新機，第一印象感覺唔錯加分!原來仲有室外，食煙既客人啱哂，唔洗下下落樓下食，其中兩邊牆身放滿小盆栽，:)小小的綠林，仲設置暖燈好細心喔! 但我地唔食煙都係返去室內好d!由於唔知飲咩好，朋友話問下Bartender有咩好介紹，佢勁好禮貌笑容，知道我地鍾意咩口味，就立即調左5杯唔同口味既cocktail，飲酒點可以咁單調，我地仲叫左小食!可能時間仲早，九點幾十點唔多人，個環境同朋友傾偈都特別舒服，好怕樓下d酒吧好嘈好迫，下下好似同人劈酒，同樓下相比好似2個世界咁!大約15分鐘左右，所有飲品小食都已經放哂係檯好快手!我個杯cocktail個名同味道到依家都仲記得，因為真係唔錯!Nothing依個名好特別，淺藍色係小蠟燭照射下更靚，酒味相比其他朋友比較濃d，有椰子同菠蘿味道，鍾意飲酒但又想有少少甜味就啱哂，不過影出嚟唔知點解變左綠色!而朋友們叫d比較甜味既cocktail，好似叫Purple果杯都唔錯，其他名唔記得啦，我地互相試飲都覺得唔錯，影出嚟都好靚!小食就叫左白乾酪蕃茄沙律同芝士薯皮，以為小食份量好少，點知又幾多喎! 一啖白乾酪配蕃茄，原來可以幾好味，沙律菜都幾新鮮! 芝士薯皮熱辣辣香噴噴，唔油唔肥膩，加埋白芝士更加正，愛芝士的人更容易愛上!坐坐下開始多人，但又唔會好嘈，仲同侍應，Bartender一齊吹下水，影相仲幫我地打埋燈，佢地真係好nice好搞笑!而男女洗手間就各得一格，多番幾格，提供埋hand cream會更好，不過洗手間好大好舒適，最緊要係好乾淨，去過咁多間酒吧未見過咁乾淨舒適!P.s. 當初以為酒店酒吧就一定好貴，點知都只係60-70蚊一杯cocktail，我地叫埋野食都係每人大約130蚊左右，估唔到棉登徑有間咁正咁舒適既酒吧，以後又多一個飯後聚下的新蒲點!…Read More

中秋佳節食番個甜品應下節，叫左個香蕉船，有3球雪糕，我地選左朱古力，雲呢拿同曲奇的口味，不過得朱古力好味，香濃的朱古力，其他兩款味道奇怪，唔知咩牌子咁唔好味道! 兩旁放左香蕉，整體一般，普通!…Read More

一直都想試茶木，但成日好多人排隊，最終都係唔排閃人!今次去都見大約有20人排緊，見得閒就照排，期間職員攞左碟鳳梨酥比客人試食，宣傳產業之餘又可比客人解下悶係唔錯的方法，等左25分鐘左右就有位，比預期中快!座位尚算舒適，不過冷氣太大，加左外套仍覺得凍!煙三文魚沙律新鮮美味可口，再多d沙律醬更好!牛肉麵湯底濃厚的牛肉味，麵質QQ，但紅蘿蔔應該無煮過，超硬!水果茶內有不同水果大約5種，橙，火龍果，士多啤梨等，仲有2粒話梅，好好味，酸酸甜甜一流，而朋友的咖啡只話好難飲!最後甜品，朱古力口味的厚吐司，內裡部份麵包脆脆有蜜糖包住，好甜加上雪糕立即好飽好頂胃，不過都係值得試下!…Read More

醬家依間舖係同事帶我去食，因為佢話6點幾經過見到已排哂長龍，只有蕃茄湯底就咁多人去等好似好好味咁，而且位置有d偏都咁多人，就去試下佢有幾巴閉啦!係門外等左半小時其間，:)見到唯一的樓面兼知客就係日本靚靚老闆娘，好有禮貌笑容對待每位客人，幸好舖頭不大，大約25個座位! 其間有不少客人走左有吉檯，但老闆娘一直無咩放過客人入去，當吉檯已有8張左右，才放2個客人入內，但外面大約已有30人排隊啦，天氣好悶熱，唔知好明點解唔比客人入去，原來廚師人手不足，而且order每碗麵都要等15-20分鐘先有，所以老闆娘唔比咁多客人入去，但外面真係好悶熱，:(入去坐低等食都好過係街度滴汗吸塵吧!!入到去我地第一時間叫左檸檬茶降降溫先，其間老闆娘要招呼每位客人，但位置太窄，客人又要坐前d比老闆娘行過，好彩佢好嬌小打橫攝過去，肥d都過得辛苦d! 我叫左蕃茄大蜆麵，同事就叫左蕃茄意大利白乾酪麵，大蜆大約13隻，細小無沙新鮮但有怪味，咁再試下麵都同湯底，都係有一種唔識形容的一股怪味，我同事果碗都係，佢話可能係翡翠苗既味引致，咁都仲ok接受到! 同事個白乾酪好香濃美味! :(而個麵好普通一般，湯底係有濃郁既蕃茄，但夾雜著怪味，個分數始終差d! :(所以下次未必會再食，排隊排咁耐更加唔洗諗!…Read More

久違了的一蘭，原來今個月中已係同一條街開左分店，只係隔左幾個舖位! 係新店門外等左25分鐘就入到去，座位設計同舊舖間格一樣，位置左右下方都有小勾可掛手袋，:(座位之間依然狹窄! Order紙上湯部分既濃度多左2個選擇，係濃郁同超濃郁，咁我當然試下有幾超濃郁啦，真係幾濃郁喎，香蒜叫左一份但食落完全唔覺，叉燒賣相同口感超差，好似薄瘦豬肉，又”鞋”又薄又乾，老公果碗都係一樣情況，點解依家變成咁?? 加左黑木耳同半熟鹽煮蛋，:(黑木耳好似少得濟，半熟鹽煮蛋口感都唔錯，不過同拉麵來相比，一蘭既湯底同麵都比拉麵來好，但配料如黑木耳，半熟鹽煮蛋，蔥花，叉燒等等拉麵來就好味過一蘭好多! 而總括拉麵來，一蘭同佐敦的八盛，八盛又比拉麵來同一蘭都好!唯一一蘭最好，就係每個客人座位上都有無限量冰水供應，夏天就最適合!:)…Read More

假期前夕去食唔算太多人~1845去到，我地一行7人walk-in唔洗等有位，可能我已半年無食過放題，心情好興奮~一去到佢地主攻刺身先，再入熱食同飲品，大約5-10分鐘左右刺身就到，我地多人，所以每樣都係叫20件，:(但全部都唔夠數，好快就比我地ok左! 值得一讚係keep到水準，全部都係咁新鮮，:(唯獨三文魚只有少部分係肥美的魚腩位，八爪魚一向就普通!甜蝦同虎蝦真係唔錯好鮮甜，馬刀貝好清爽! 刺身合共叫左3 round! 其後熟食叫左都好多味道都唔錯而且都係熱辣辣，蜜汁雞翼皮脆肉嫩、天婦羅蝦新鮮美味、天婦羅日本蕃薯細細粒好香甜、牛柳粒好甜美、清酒煮蜆有dd沙但算清甜、燒菠蘿多汁清甜、但炸蠔太厚粉、芝士焗蠔有dd殼碎新鮮程度同口感一般! 汽水、麥茶、菜蜜任飲，啤酒就要收費! 全晚叫左金菇肥牛卷無出現過! 走前食埋雪糕完美啦! …Read More

一直仲諗緊食咩晚餐，行到條巷仔發現左間拉麵餐廳咁熟…原來係大坑果間開左分店，係門口排哂長龍等半小時以上，但我食果事起碼已經係一年前既事，果時都覺得可以! 今次見開左分店，又無咩客人唔洗排，當然火速入去食番碗! 原來已經開左2個月啦，可能時間仲早6點半所以無咩客人!旺角依間分店比大坑大好多，位又多左，唔洗咁迫，而牆上既擺設同大坑差不多，都係日本以前兒童玩的玩具，不過有部好似彈珠機咁幾吸引，可惜只供欣賞!而拉麵款式同大坑一樣，而唔食辣又對豚骨湯底情有獨鍾，所以都係叫金味，我加左隻溫泉玉子，而朋友一樣叫金味但加左木耳! :)桌上放置醋蒜粒等供客人添加，還有紙巾和檸檬水，依樣幾貼心所以有d加分! 大約10分鐘後拉麵送到，拉麵既軟度係我要求既程度，不過湯底好普通，又唔係餐牌所標示咁濃郁，木耳同蔥花都好少而且唔香，:(感覺同味千拉麵差不多，我同朋友感覺一樣，可能食過佐敦Ramen Champion八盛後更覺得拉麵來唔值咁貴同咁多人排隊食!…Read More

經過尋晚一試後，今日午餐又再去食過…^^ 不過係隔離果間無雙~ 見佢大大隻字宣傳冠軍麵~咁當然試下啦! 今次都係食2人餐，不過唔係同一個朋友，因為佢都未試過~反而依間個2人餐得一款小食，比隔離八盛少一樣，同埋貴一蚊，即係$199，依間又係做緊團購!:(同樣都係豬左買貴左……同一次一樣，都係有個接收器等攞，做好同樣會閃住提醒麵要做好可自取，都係等左15分鐘左右就完成! 豚肉的外形同口感同其他舖分別不大，而碗上鋪滿蔥花同大量芽菜，唔太鍾意芽菜的我唯有飛走芽菜食，蔥花點綴下同個湯底都幾夾，唔太識去容易，都ok~不過覺得湯底既八盛啱我口味，濃香而不咸，但無雙既湯底好普通，麵質都好好!無雙既餃子同八盛相比，無雙技勝一籌，皮薄之餘餡靚，相反八盛既餃子餡一咬即散無咩味道!再一次証明2個人女仔如果食2人餐係太多，食一個餐加一至兩個小食就足夠!總括之言，個人認為拉麵及湯底八盛比較好，而小食餃子則無雙比較好~ 我都明白人係無兩全其美，更何況食物呢…~…Read More

好多時經過門口睇以為係一間拉麵舖，點知一入去係6間不同拉麵舖組成的Food Court，行左一圈，都係sale1人餐拉麵同2人餐拉麵! 我同朋友2人當然選擇左2人餐拉麵，選依間因為有拈麵，即係湯同麵分開上，好似幾特別咁，咁就試依間，時間仲算早1845，所以有位，門口位有水吧，可免費有熱水熱茶同凍茶，汽水果d要另外比錢買!點知比我聽到做緊團購$49一碗拉麵，我地2人餐要$198，不過2人餐有2個麵同多左兩個小食，唉!算吧!豬左一次~!:(買左餐後職員比舊接收器既野我，話如果做好果舊野會閃，通知麵煮好可以去攞，好似台灣咁~ 大約等左15分鐘左右煮好，好吸引呀，好香，好濃既湯底，拉麵唔熱放落去湯度一陣即食，好好味，麵質軟硬適中，就算放左係湯15分鐘都唔太軟，而豚肉有大3片，都可以，溫泉蛋一隻，紫菜3片，都係放落去湯度一陣即食，配個湯底一流，而且湯底唔太咸，不過好快凍，冷氣唔大都快凍，所以碗既保溫好重要!而小食我地選左炸雞同餃子，炸雞有4件，餃子有6件，都可以! 餃子皮薄又唔硬，不過內面一般啦，而炸雞都算大件，熱辣辣!:)總括而言，我會再去食過依間，不過都想試下其餘果5間拉麵舖!…Read More