dog.poo.poo.foodie's Profile

MEMOIR發現平時都係食日本野同韓國野多，突然心血來潮想食西餐。揀完間餐廳原本見佢有油封鴨脾諗住試試佢會唔會拍得住之前法國食過嘅。點知去到發現原來佢有lunch menu，搞到冇食到油封鴨脾，轉左食佢嘅lunch set，反而有意外驚喜。雜菜沙律佢嘅沙律菜十分新鮮，而且佢個沙律醋十分好食，酸甜嘅比例十分之好，仲有少少藜麥，超開胃。椰菜花湯佢係好飲同滑嘅椰菜花湯，但椰菜花湯始終係一個偏淡味嘅湯，真係好睇大家原本鍾唔鍾意嗰隻味。香煎盲鰽魚柳配鮮蝦，蕃茄忌廉汁魚味十分濃，而且條魚勁滑，個sauces唔會太濃味，可以好好咁食得出條魚原本嘅味。佢會配薯蓉同埋燒嘅瓜上，有啲人可能會唔鍾意食燒到淋淋地嘅瓜，但係狗仔我都幾鍾意食瓜，啲燒瓜完全開正我胃口。而佢嘅薯蓉就唔似出面西餐嘅薯蓉，佢冇加牛油落去，所以佢個薯蓉相對黎講就淡味啲。狗仔可能平時食開濃味野多，個薯蓉對我黎講就淡味左少少。但係對比較健康嘅人士黎講就應該幾唔錯。香煎澳洲10oz 肉眼扒配韓式燒肉汁 (轉左做牛板腱)個牛非常驚喜，冇諗過唔洗200蚊就可以食到呢個質素嘅牛。講左啲配菜先，啲薯條啱啱炸起，勁熱勁脆，而且落左紫菜去調味，無論係就咁食定點茄汁食都係一流。而佢亦都有啲沙律菜伴碟，但係就同跟set入面嘅沙律一樣，所以如果唔想食太多沙律嘅話可以跟set揀湯。牛扒方面，由於當日佢menu上面嘅肉眼冇晒轉左做牛板腱，原本都有啲驚佢會有筋同冇肉眼咁淋，點知上到黎先發現係狗仔多疑，佢嘅牛板腱完全冇呢個問題。我地叫左5成熟，而佢塊牛扒係好完美嘅5成熟，令到佢塊牛十分軟同嫩。而且佢塊扒處理得好好，冇任何肥膏同筋。佢塊扒仲要好大塊同好厚，呢個價錢呢個質素同份量真係冇得彈。佢仲有配埋黑椒鹽同燒肉汁比你點，比你食厭一隻味之後可以轉左口味，燒肉汁甜甜地超好食。不過其實塊扒肉味都真係好夠，啲調味料其實都冇點樣點到就已經食晒成塊扒。水牛城雞翼雞翼都好驚喜，佢應該係即炸之後再上個汁，個雞翼好脆口而且buffalo 既味啱啱好，唔會好辣好鹹，有少少甜甜地，怕辣既朋友都唔洗怕，超推薦👍Overall：有係香港食開扒都知，300蚊樓下嘅扒，成日唔係生熟度唔啱你order嘅，就係塊扒冇點處理，仲有好大條筋同肥膏連住。呢間西餐完全超出左我預期。估唔到200蚊塊扒都可以做到咁嘅質素。個牛十分推薦大家去試，而唔太食牛or比較健康嘅朋友仔都可以去試下條魚。味道:🌕🌕🌕🌕🌗環境:🌕🌕🌕🌕🌗分量:🌕🌕🌕🌕🌑服務:🌕🌕🌕🌕🌑CP值:🌕🌕🌕🌗🌑Overall: 好西💩加一服務費：✅MEMOIR銅鑼灣登龍街28號永光中心17樓#dog銅鑼灣…Read More

牛繁一人燒肉最近香港多左好多一人燒肉，食完一間又一間，繼之前食過嘅燒肉👍（偷懶冇寫食評），呢間係第二間食過嘅一人燒肉。為左可以快啲試晒唔同肉唔同味，所以叫左個咩肉都有嘅set同一個牛肉嘅set。飯生蛋/溫泉蛋加蔥/飯素加醬油加飯。明明應該係無敵嘅組合，但佢飯素加蛋既組合有啲唔太掂，撈咗隻蛋落去，飯素嘅味道太重，成隻蛋基本上都食唔到佢有咩味，同埋本身啲肉有醃料，連埋飯一齊食就好鹹。蔥嗰個就好啲，如果鍾意食蔥嘅朋友可以叫。雞肉雞肉就係雞肉，就係平時自己係超市買到或者其他燒肉店標配嗰啲，再普通到普通嘅雞肉。從來唔會有人話佢好味，但又唔會有人話好難食嗰款。豬肉其實都好普通，就係超市買到嘅豬五花，不過佢會醃埋比你。同埋佢都幾大舊，如果成舊食會有啲韌，之後叫店員比左把較剪剪開去先好啲。雖然都唔太好食，但已經係三種肉最好嘅一種。牛肉佢又未到好韌好韌個隻，但係都要啲牙力先咬得開。就好似係屋企打邊爐因為買唔到靚啲嘅肥牛淨係買到最平個款咁。你話佢好難食又唔係好難食，但佢又冇乜牛肉味，又有啲韌，食下食下連自己都唔知食緊乜味。同埋因為佢唔知係咪都知自己啲牛冇乜牛肉味同雪味有啲重，佢啲醃料落得勁重手，基本上成舊牛都係個啲醃料味。Overall: 百幾蚊都幾失望，CP值十分低，同佢同行燒肉👍相比，燒肉👍好好多（燒肉👍其實都唔算話好好食）。自己求其都佳寶買啲肉去燒都可能好過佢。味道:🌕🌑🌑🌑🌑環境:🌕🌕🌑🌑🌑分量:🌕🌕🌕🌗🌑服務:🌕🌕🌕🌑🌑CP值:🌕🌑🌑🌑🌑Overall：狗屎💩加一服務費：✅牛繁一人燒肉旺角砵蘭街215號朗晴坊2樓牛繁荃灣大河道100號海之戀商場2樓2025號舖#dog旺角 #dog荃灣 …Read More

元祖沾麵專門店 一直都好鍾意食海膽，見呢間有海膽沾麵幾特別所以決定去嘗下鮮。 麵方面，麵質都算幾煙靭彈牙。同埋算係比較粗嘅沾麵。🍜味道方面，唔知係咪當日煮湯嘅比例問題，佢嘅湯都算幾稀同淡味，外面嘅沾麵通常都會比較濃味同杰，啲麵通常沾一下就會好易掛到湯同入味。但呢到嘅湯就完全唔同，佢比較似將一個拉麵分湯，如果真係想嘅麵有味嘅話就可能要放啲麵入湯到浸一陣，變返好似拉麵咁食。海膽方面，佢嘅味道偏淡，唔太重海膽味。但有啲海膽就明顯比較黑同多血絲，令到原本已經冇乜味嘅海膽變到幾苦下。叉燒就係一舊好普通嘅叉燒，普通到冇乜好講😂。海膽芝士湯🧀算食到有芝士味，但係由於個湯偏淡，所以唔算太有味。湯入面亦會有肉粒同海膽。肉粒都幾𣺉，但會帶啲細骨，食嘅時候可能要小心啲。而海膽就幾特別下，由於佢湯入面嘅海膽係煮熟左嘅，佢嘅口感同味道同普通生嘅海膽都幾唔同，佢會有啲似咸蛋黃嘅獨特味道。同埋佢湯入面都有幾舊海膽，所以海膽湯黎講都算幾有誠意。龍蝦湯🦞龍蝦湯味道相對就比較芝士海膽湯濃味少少，個人覺得比較夾。同埋佢嘅龍蝦味都幾出下，感覺有啲似平時食西餐飲到嘅龍蝦湯味。 分量方面，佢麵嘅分量都算幾多，一般嘅成年男士都應該夠食。海膽就算係咁啦，百幾蚊一板連埋個沾麵同叉燒都唔會要求太多。湯嘅話就可以再加，仲會加返啲啱啱煮好嘅滖湯。不過可能就要預返佢煮湯嘅時間。服務方面🤵‍♀️唔知係唔係因為佢間鋪係長條型再加少少彎，當日其實唔算太多客，但每次都要舉勁耐手先有人行埋黎幫我地。除此之外，有一次叫左個男店員幫我地加湯，佢叫我哋等一陣之後就出咗去講電話。講完電話返嚟，就好似冇咗回事咁行咗入鋪嘅最入面（一個我地睇唔到佢嘅地方），之後再冇理過我地。之後我哋好無奈咁再舉左幾分鐘手先再有第二個店員行過嚟幫我地加拎隻碗入廚房加湯。Overall: 百幾蚊一板海膽連沾麵對海膽嘅要求都唔會太高。有係香港食開海膽嘅朋友可能都知，呢個價錢就食到嘅海膽九成都一係分量好少，一係就質素好參差。百幾蚊黎講CP值唔算太高，但如果想嘗鮮嘅朋友可以一試。而佢其他嘅沾麵個人覺得就偏貴，香港都有好多CP值更加高嘅沾麵。 同埋佢店員嘅服務都需要改善，即使當日唔多客同埋店員都唔少嘅情況底下，佢地都冇辦法顧及所有客人。⭐️最值得一提嘅係，佢哋加價嘅速度快過火箭。早幾個月喺網上面見到海膽沾麵都只不過係$158 ，當日去到店門口見到已經加價加到$165。但係見一場嚟到都照入咗去食，點知入到去問店員先知已經加價加到$179。加得快到連店外面嘅menu都update唔切。除此之外佢menu上面大部分嘅野都有一定嘅加價。佢加價嘅速度僅次於食神入面嘅瀨尿牛丸😂。極上芝士海膽沾麵 (原板海膽) $179龍蝦沾麵 $89味道:🌕🌕🌕🌑🌑環境:🌕🌕🌕🌑🌑分量:🌕🌕🌕🌕🌗服務:🌗🌑🌑🌑🌑CP值:🌕🌗🌑🌑🌑Overall: 負皮🦮💩加一服務費：✅枱面俾嘅宇治抹茶需要收取$5/人-元祖沾麵專門店 (尖沙咀)尖沙咀厚福街5-6號多富閣地下5號舖#dog尖沙咀 …Read More

Shake Shack其實Shake Shack 到香港咁耐都冇食過佢，早排有一日想食burger，就走左入去食。Set $146堂食就叫左個set，有一個包一個小食同一個野飲，計過之後發現其實個價錢係等於三樣加埋，但會多左杯Frozen Custard。Dark Meat Hot Chicken ($61)係一個幾辣既雞堡，第一啖咬落去嚇親，因為比我想像中辣，唔鍾意食辣嘅朋友可能未必接受到。而雞肉嘅嫩滑程度就正常。Buffalo Spiced Cheese Fries ($43)佢所謂嘅buffalo 係求其加少少粉上去，一啲buffalo味都冇，可能廚房驚我辣親掛，個包就識落咁多辣粉，buffalo 粉就俾多少少好似慷慨俾你咁。結論係佢同普通嘅芝士薯條一樣，食得多就會好滯。Black & White Shakes ($42)杯shakes 食梗burger 飲既話都唔錯，食完哂所有野再飲佢既話好似飲梗糖水咁，食包既時間唔算好耐，但佢溶既速度好快，最後飲剩一半掉咗。Frozen Custard (Vanilla)由於佢係同個burger 一齊上，建議大家一開波就食，因為你食完個burger 佢一定溶哂。佢其實就係一杯雲呢拿雪糕，冇咩特別。ShackBurger $54另外要單叫左一個burger，食落牛肉味都好濃郁，就但佢可能有少少煮過龍，個牛肉係好乾身，但牛肉漢堡配埋蕃茄芝士同生菜都冇咩好彈，哩個組合冇得輸。個包就好軟熟香口，但佢太軟身好難咬開。Overall: CP值唔算太高人均其實都要$100，唔算好平又唔算好貴，分量唔算好多，但某啲食物都幾個漏下。如果想求唔中伏有穩定質素嘅可以食佢，分店嚟講都算好方便。但如果同樣價位唔介意地點既話，有更多更好食嘅選擇。味道:🌕🌕🌕🌑🌑環境:🌕🌕🌕🌗🌑分量:🌕🌕🌕🌑🌑服務:🌕🌕🌕🌗🌑CP值:🌕🌕🌑🌑🌑Overall: 正常💩加一服務費：❎-Shake Shack尖沙咀柯士甸道西1號ELEMENTS圓方火區1樓1005-06號舖中環金融街8號國際金融中心商場4樓4018號舖尖沙咀廣東道3-27號海港城海運大廈地下OTG53號舖金鐘金鐘道88號太古廣場L1樓105A號舖銅鑼灣勿地臣街1號時代廣場B2樓217-219號舖沙田沙田正街18號新城市廣場一期1樓153-154號舖東涌達東路20號東薈城名店倉地下G20號舖#dog尖沙咀 #dog圓方 #dog柯士甸 #dog中環 #dog金鐘 #dog銅鑼灣 #dog沙田 #dog東涌 …Read More

星星Pho Cha最近好想食醬油蟹，上網見到呢間嘅韓國嘢食價錢都幾平，就約咗朋友去食。星期日晏晝去到唔算好多人，大概坐到2/3滿，但上菜既速度十分之慢，落左單之後大概10分鐘先有小菜，再過多20-25分鐘先再上炸雞同醬油蟹。前菜有泡菜、菠菜、豆芽、海苔同埋韓式粉絲。種類算多，泡菜偏鹹，但係菠菜同海苔味道仲鹹，一食完要即刻飲水，韓式粉絲就痴到一嚿嚿根本夾唔開，得啲豆芽算係正常啲。醬油蟹 $383/2隻就咁睇相其實就見到佢啲佢啲醬汁好濁，同以前食過嘅醬油蟹好唔同，就算睇其他foodie 既圖啲汁都唔係咁濁。就咁試下啲蟹肉先，點知佢超級鹹，要係咁飲水，咬咗一啖頂唔順要將佢撈飯。而且兩隻蟹唔算好多膏，有一隻個殼幾乎係無膏，好在佢個飯個紫菜唔會好鹹，仲有少少麻油味，撈左啲蟹肉同蟹膏就襯托到個飯好食啲。個醬油蟹一定要配飯先食得落口，整體嚟講都幾失望，變左比三百幾蚊去食飯多過食蟹。星星酸辣味炸雞 $88上枱嗰下係幾震撼，因為佢嗰啲tray好大而且啲汁都好多，令人覺得份量好多。但係一食落口就覺得佢炸皮好厚，咬落雖然好脆身，但係至少咬第二啖先咬到肉。醬汁都幾好食，而肉質就正常，未到好juicy，但亦都唔會話乾爭爭。Overall: 價錢雖然比其他韓國野食平，但係我食完就明白咩叫一分錢一分貨。食完呢餐鹹到腎虧，頂唔順飲咗好多杯水。而且除左啲野食嘅質素，服務態度同上菜時間都需要改善下🤏味道:🌕🌑🌑🌑🌑環境:🌕🌕🌕🌑🌑分量:🌕🌕🌗🌑🌑服務:🌕🌕🌑🌑🌑CP值:🌕🌕🌑🌑🌑Overall: 狗屎💩加一服務費：✅堂食店星星 Pho Cha佐敦文英街18號文英樓地下外賣店星星Togo佐敦文英街14號文英大廈地下12號舖#dog佐敦 …Read More

統一包餅工程作為煙麻薯波波嘅愛好者，喺觀塘搵到間平民麵包舖賣超級大大大大大個嘅麻糬波波。麻薯波波 $22/5 $30/8一比完錢攞上手勁嚇親，買左$30/8個，真係超級大袋，一路行啲人都望住袋麻薯波波，我自己都覺得好誇張。😂 攞上手一度，佢仲大過我個手掌。早餐食一到兩個嘅話都已經飽哂。啱啱買完之後即刻食左個，入面係超級脆!! 整體嚟講佢係偏向脆口嘅麻薯波波，但亦保留左煙煙韌韌既口感，感覺反而會有啲似普通麵包。但隔左一陣再食個口感就會冇咁脆，食落就會似返出邊食既脆皮麻薯波波咁。😋但去到第二日本身想就咁食，佢已經變到硬到咬唔開😭 ，如果大家第二日食的話一定要整熱佢先食!!分別攞左微波爐同焗爐整熱佢，如果想要煙煙韌韌既口感就推薦用微波爐，想要脆身既話就用焗爐🫶而我買咗三隻味，分別係芝麻味、紫薯味同夏日限定嘅芒果味。芝麻味食落超級多芝麻，其實佢嘅味道同出邊普通原味嘅好似，但係會多咗一陣好濃郁好香嘅芝麻味，食落都幾好香口。紫薯味(狗仔唔知點解覺得似香芋😂)平時冇見過香芋或者紫薯味嘅麻糬波波，咬落口其實都幾驚喜，狗仔覺得似細細個食雀巢嗰種香芋味，大推哩個🐶芒果味嗰度啲姐姐瘋狂推薦我試呢隻味，咬落去其實唔太覺有芒果味，但咬完之後有嗰種好科學嘅芒果味係口腔，都係似雀巢雪糕嘅芒果味，個人覺得另外兩款好食啲🤣 但咁平嘅話其實都一試無妨🫶Overall: 姐姐們超級熱情😂 大推哩間既原因，一來佢價錢勁抵，二來size嚟講出面麵包舖既麻薯波波完全俾唔上，而且佢仲要係脆皮版嘅，真心勁抵。味道:🌕🌕🌕🌕🌑環境:不適用🐶分量:🌕🌕🌕🌕🌕服務:不適用🐶CP值:🌕🌕🌕🌕🌗Overall:Good shit💩加一服務費：❎統一包餅工程觀塘協和街177號地下25號舖#dog觀塘 …Read More

LA Restaurant & Dessert Bar平時上網見到好多食評寫哩間既威靈頓牛，而且午市好抵食，搞到我都心思思想去試。前後食左兩次，今次決定一次過講晒。個白湯就好濃，而且有啲蜆肉，味道都唔錯，就係正正常常既一個白湯。威靈頓牛柳 $98 🥩當時都問咗服務員邊種熟度係最好，佢哋就話五成熟，咁我哋都照嗌咗五成熟。上到嚟啲薯條好熱好新鮮，個酥皮都幾脆，但係一由威靈頓牛既邊邊切開食，個牛幾乎係全熟，邊位都話可以理解到。但食到中間，點睇都唔似五成熟，至少都七八成熟，好明顯熟過頭，而且切到好薄個牛肉都仲係有咬口，食到我懷疑人生😇。可能我對牛肉既熟度有理解錯誤，呢個牛柳食完一定唔會想再去呢間食。重量級安格斯牛肉漢堡伴薯菜 $98 🍔個漢堡幾出色💯，由佢上枱到影左唔同角度既相再慢慢砌返個包切開食，個漢堡都仲係好熱，薯條都好新鮮。而個牛肉漢堡係有肉汁滴出嚟，不過砌好晒個包成個咬就略嫌有啲失態，因為都幾大舊下。整體嚟講，如果女士自己食一個餐應該會好飽，一來薯條份量都多，二來漢堡都算係一個好易滯既食物，如果可以揀配沙律可能會好啲。香煎厚切豬扒伴洋蔥汁 $68 🍖一上枱俾佢個份量嚇親，睇相就知佢份量好大，而且好厚。豬扒既味道就正常，主要都係靠個汁，整體上都係好鬆軟。炭燒松阪豬伴燒汁 $78 🐷哩個松阪豬係豬頸肉，而Menu上面嘅鰻魚汁就已經冇咗啦，我就揀咗燒汁，有一啲豬頸肉係冇掂到汁食得出佢係有少少甜甜地嘅味係表面，而整體上松阪豬都係好香炭燒過既香味，而且肥瘦適中，個人認為佢好食過厚切豬扒。Overall: 除咗威靈頓牛柳中伏之外，其他三款都幾推薦，建議大家，平日晏晝時間去都要等一兩枱，星期六日嘅話就可能預早少少去排。午市免加一，有一個湯、主食同野飲，價錢上都算係咁，分量算多，味道又幾好，CP值都算唔錯。味道:🌕🌕🌕🌗🌑環境:🌕🌕🌕🌗🌑分量:🌕🌕🌕🌕🌑服務:🌕🌕🌕🌕🌑CP值:🌕🌕🌕🌑🌑Overall: 好西💩加一服務費：❎-LA Restaurant & Dessert Bar旺角通菜街25號地舖#dog旺角 …Read More

一蘭拉麵 知道好多人都食過一蘭拉麵，亦都知出晒名麻麻，但見自己未食過，又冇乜人排，屎忽痕入去一探究竟🐾味道方面，湯底係正常豬骨湯味，大眾都會接受嘅味道，同埋佢有得自己每樣野揀個人喜好，所以點都唔會話唔啱自己口味。面係正常九洲地區嘅拉麵，亦都有得揀個人喜好，正常水平，不過不失。但叉燒就無辦法評價佢嘅味道。因為啲叉燒同拉麵嘅分量就真係唔罵唔得，佢唔係細碗，係好x細碗。唔好話女仔，連三歲細路仔都未必夠食。啲拉麵仲少過一個普通size嘅合味道杯麵。啲叉燒真係世界級，得三舊仔都算，仲薄到好似三塊肉片咁，一啲口感都冇，完全食唔出到佢係咩味。佢緊緊厚過星爺賭聖生日嗰塊午餐肉少少。天然豚骨拉麵$98味道:🌕🌕🌗🌑🌑環境:🌕🌕🌗🌑🌑分量:🌑🌑🌑🌑🌑CP值:🌑🌑🌑🌑🌑Overall: 狗屎🦮💩加一服務費：✅CP值低到喊，狗都唔食，狗屎之中最惡劣。如果大家唔係發左達或者唔係想減肥嘅話極度唔建議大家去食。-天然豚骨拉麵專門店一蘭 尖沙咀棉登徑8號地庫B舖及地下入口大堂銅鑼灣謝斐道440號駱克大廈A座地下F-I號舖#dog尖沙咀 #dog銅鑼灣 …Read More

楚撚記大排檔哩間野平時睇社交平台都幾多廣告同foodie 推介，平時兩丁友好難食到大排檔，今次同幾個朋友出去就決定食佢，對佢亦都好高期望。6:30去到入邊已經就快滿，大概搭九已經需要排隊等位，建議大概要早少少攞位。秘製香辣水煮花甲 $128佢會有個爐熱住個煲，食嘅時候都會keep住暖。而佢有粉絲蘿蔔豆卜，全部都好索汁同入味，花甲就正常水準，食得辣嘅人值得一試。燕麥金沙蝦球 $113一碟有8隻蝦，上面鋪滿晒燕麥，令到佢口感幾有趣。而蝦球都算幾有鹹蛋黃味，底嗰浸燕麥亦會有鹹蛋黃味，整體唔錯但定價偏貴。蜜椒薯仔牛柳粒 $113最失望應該就係佢，可能因為俾萬發搞到我對薯仔牛柳粒期望好高，呢碟嘅薯仔切得太細，令到佢一啲口感都無，而且一啲都唔脆口，成粒上到黎已經淋晒。牛肉就正常， 好多時候茶餐廳同大排檔嘅牛食落唔韌其實都已經收貨。而且佢一啲都冇蜜糖味，黑椒味又無乜。成碟野$113但又無口感又無味咁其實都唔知食左乜。拔絲焦糖香燒脆腩仔 $98睇相都知佢幾考功夫既，最主要係拔絲焦糖整得唔錯，撈埋燒腩仔食再點芥末個味道係幾得意。但係燒腩仔有一啲俾偏硬身，要啲時間去咀嚼，而且個皮都唔係話好脆，兩樣燒腩仔應有嘅元素都無。比$98好似食個拔絲多過食過燒腩仔。瑤柱蝦粒帶子蛋白炒飯 $99份量好足，味道正常，飯炒得幾乾身。黃金炸饅頭(半打) $40正常水平，就係平時大家食炸饅頭再點煉奶既味。楚撚桂圓手工啤 $48係用圓肉乾杞子釀製，飲落偏重麥味，如果中意重麥香既會覺得唔錯，值得一試。食到最尾會有糖水送返俾你，當日食既有以下兩款。番薯糖水 薑味太勁，有少少食唔出番薯本身嘅味，如果薑嘅量減少會好啲。綠豆清心丸第一次食清心丸，個口感好神奇有少少似芋圓嘅口感。Overall: CP值麻麻，佢除左有冷氣坐得舒服啲之外，我完全諗唔到有咩原因要幫襯佢而唔幫襯出面啲大排檔。佢價錢又貴啲，分量又少啲，味道又差啲。最緊要嘅係，平時食大排檔好多時候都係貪佢夠鑊氣，但呢到完全比唔上出面嘅大排檔。味道:🌕🌕🌑🌑🌑環境:🌕🌕🌕🌗🌑分量:🌕🌕🌗🌑🌑服務:🌕🌕🌕🌗🌑CP值:🌕🌕🌑🌑🌑Overall: 唔會再食💩加一服務費：❎楚撚記大排檔土瓜灣馬坑涌道2C號寶光大廈地下C及D號舖荃灣川龍街118號百悅坊地下-1樓西環石塘咀皇后大道西554-560號日富里百好大廈地下1號舖…Read More

兩草見哩間係香港 x 馬來西亞特色美食，裝修好具香港特色，張枱櫈都好大排檔feel，平時經過見到要排隊就去左食。約莫大概七點去到，前面大概都要排四五枱客，排隊入去唔係好耐，但排嘅時候已經feel到祖國嘅熱情，條隊基本上得我哋係講廣東話😂 原來小紅書有推薦，唔怪之得平時咁多人排 🙏 入到去依舊都係好似返咗內地食野咁🥰香煎脆邊蛋肉餅飯 $42呢個咁嘅肉餅飯，肉餅又乾又梅，同我求其係惠康求其買塊premixed左嘅肉餅煎完加隻蛋冇分別。收$42都算，碗野仲要鬼死咁細碗，但佢又好死唔死用隻更加細嘅碗（唔知係咪要扮大碗），再加上佢啲位又窄到仆x，完全唔知點篤穿隻太陽蛋撈飯食。呢碗咁嘅野仲要冇乜味，我哋要另外落辣椒或者豉油先夠味。小籠包胡椒湯 $40個小籠包好明顯食得出係急凍包裝嗰啲，個皮偏厚，個胡椒湯飲落好似媽咪麵既味，即係個包粉攞嚟沖湯飲咁樣，有少少辣辣地鹹鹹地咁😂 大家買包媽咪麵同急凍小籠包就可以返屋企自制👍蛋炒豬腸粉 $25碟腸都炒得算香口，但又係冇乜味，又係要另外落辣椒油先叫好食啲。出面大把蛋炒腸粉好食過佢。咖央多士 $22好Q薄，唔知大家睇圖feel 唔feel 到佢幾薄呢，咬兩三啖就基本上食左一舊，牛油又得少少。唔講以為食梗法國菜🥰兩個人一到去要搭枱，見佢鋪面咁細都冇乜所謂。但店員安排得偏慢，其實出面排隊嘅時候望入去見到都有唔少空位，但就要按店員指示，如果入晒去條龍應該冇咁長。服務就正常，因為係QR code 落單。Overall: CP值極低，完全唔知自己食緊咩，佢唔算好貴，但份量極少。成份飯就係不停落豉油同辣油。仲要啲位又窄，我明白香港地少人多，鋪租貴。但橫掂都安排唔切入座，不如減返幾個位，等啲客至少有位放袋同郁下隻手。味道:🌕🌕🌑🌑🌑環境:🌕🌗🌑🌑🌑分量:🌕🌗🌑🌑🌑服務:🌕🌕🌑🌑🌑CP值:🌕🌑🌑🌑🌑Overall: 狗屎🦮💩加一服務費：❎-兩草旺角白布街16號地舖#dog旺角 …Read More

Shari Shari Kakigori House 氷屋同朋友係中環食完野，見唔太晏就去左Shari Shari 度食。呢篇食評係同Lab zero 差唔多時間食😋 為左可以更好咁比較，我兩間都係叫左抹茶味。抹茶忌廉焦糖味(配白玉) $110抹茶味幾回甘，比較濃味少少，唔係死甜既抹茶。而刨冰面頭會有啲cream 同埋白玉，cream 就有啲焦糖味，而白玉食落超級煙韌😋😋 去到中間個刨冰會有啲焦糖，個人比較中意LAB ZERÕ嗰啲脆脆，因為係口感上既轉變，而哩個既焦糖只係味覺既轉變。而刨冰溶得比較慢，而且佢刨冰既口感相對係比較好食同唔算話太冰😛🍨Overall: 上次20:00去到基本上就唔洗排隊，20:15見到門口已經開始排隊🥺 佢相比起LAB ZERÕ 服務態度就麻麻地，叫左好耐先有人理我地🥲但刨冰兩間就各有優勝之處，大家可以自行決定。接下來希望可以去食埋甜姨姨😋味道:🌕🌕🌕🌗🌑環境:🌕🌕🌕🌗🌑分量:🌕🌕🌕🌑🌑服務:🌕🌕🌕🌑🌑CP值:🌕🌕🌕🌑🌑Overall: 正常💩加一服務費：❎Shari Shari Kakigori House 氷屋中環奧卑利街11號地舖銅鑼灣加路連山道13號地舖尖沙咀漆咸道南83-85A號金德大廈地舖#dog中環 #dog銅鑼灣 #dog尖沙咀…Read More

HANA Korea restaurant同朋友唔太肚餓，但又想食韓國野，就走左去金巴利道度覓食，見到哩間食偏清淡既韓國野就衝左入去。因為出邊超級熱，所以同冇叫到粥食，怕食完會仲熱😂😂釜山魚糕烏冬 $78鮮蜆烏冬 $88個烏冬做型好打卡able 😍而且湯底味道啱啱好，佢有少少似北兵衛腐皮烏冬個湯底咁，而烏冬食落好彈牙同滑身😋 個湯仲有腐皮、海帶、天婦羅碎等等既配料，個人覺得腐皮好好食，浸淋左吸哂湯仲好食😋魚糕串食落都好彈牙，唔似出邊偏淋身既魚糕，而且每一舊口感都有啲唔同😂 圓身既就偏淋身同粉啲，而扁身既就比較彈牙啲。而蜆肉份量唔可以話好多，食落就係普普通通蜆肉，但佢係冇沙嘅，大家可以放心😂Overall: 正常價錢既韓國野，想食清淡啲不妨可以去哩間食下😆但個人推薦如果想食烏冬可以叫返釜山魚糕烏冬，又打卡able 又飽肚😋味道:🌕🌕🌕🌑🌑環境:🌕🌕🌕🌗🌑分量:🌕🌕🌕🌑🌑服務:🌕🌕🌕🌗🌑CP值:🌕🌕🌕🌑🌑Overall: shit💩加一服務費：✅HANA Korean Restaurant 尖沙咀金巴利街1E號地舖#dog尖沙咀 …Read More

LAB ZERÕ見到最近咁多打卡cafe, 有間特別出名既雲朵cafe 係尖沙咀點可以唔去打卡呢😍大家係IG 見到嗰個打卡位係冇人坐住，佢係專for 你去打卡既~ 食野係去另一邊度食🤩去到唔洗擔心打卡位會俾人坐左，星期六下晝去到都唔洗排隊，而且店內仲有啲空位。因為食飽左之後先至去食，所以淨係叫左一個刨冰食。宇治金時刨冰 $98抹茶味都唔錯，🐶中意食比較苦有回甘既抹茶，佢就唔會勁回甘，但係抹茶味都出，唔係死甜嗰款。刨冰面頭會有啲紅豆同一串小丸子，去到中間個刨冰會有啲脆脆同幾粒小丸子，小丸子食落好煙韌😋😋由一開始得刨冰既口感食到悶悶地就有啲脆脆轉換下口感都唔錯，而啲脆脆食到中途都有變淋到。但刨冰溶既速度比較快，食到碗水平就會見到下邊溶左好多抹茶水，唔打太耐可能會好啲😂Overall:個人覺得佢同Shari Shari Kakigori House 氷屋未至於一模一樣，但佢有打卡位同埋價錢就平少少，本身想講九龍區既大家可以去食，但係末出post既時候見到Shari Shari係尖沙咀都開左分店，大家可以睇下邊間少人啲再決定，如果想打下卡都推薦去哩間食，而且佢有主食同唔同甜品，環境都坐得幾舒服。味道:🌕🌕🌕🌗🌑環境:🌕🌕🌕🌗🌑分量:🌕🌕🌕🌑🌑服務:🌕🌕🌕🌗🌑CP值:🌕🌕🌕🌑🌑Overall: shit💩加一服務費：✅LAB ZERÕ尖沙咀金巴利道68號地下B號舖#dog尖沙咀 …Read More

舌丼作為牛舌愛者，聽到觀塘新開左間牛舌就即刻出發左去觀塘食。lunch time 去到都唔少人，但上菜嘅速度都好快。但係哩幾日駱駝漆俾政府搞到咁🫠 寫完食評大家就冇機會去食…鐵板套餐牛舌芯配牛板腱 $128 (日式牛排汁)牛舌芯配牛舌尖 $108 (和風鹽蔥汁)牛舌芯牛舌芯十分之軟熟，把刀唔洗點用力就cut 得開😙切開仲要係粉紅色的，生熟度啱啱好，又軟熟又好食😋 大家去到唔洗諗，直接叫牛舌芯實冇死！牛舌尖佢係已經分開左一嚿嚿咁上，佢雖然冇牛舌芯咁淋，但係感覺會比起牛舌芯佢就清爽啲，同冇咁油膩。牛板腱 食完牛舌再食哩個會覺得佢好韌😭 而且切開都要好用力，而佢牛味就比較重，但食完一舊就唔太想食第二舊。日式牛扒汁 和風鹽蔥汁前者係偏向比較甜嘅燒汁，個人覺得同牛板腱夾啲😋而後者就有少少似蔥油咁，可能係我個人覺得佢配牛肉食有啲奇怪，所以我都係推薦牛扒汁多啲。湯見到有洋蔥，推斷應該係洋蔥湯，因為狗仔係食完晒先再飲湯，所以覺得個湯好清淡冇乜味，飲咗兩啖就冇再飲了。Overall: 個人覺得佢牛舌係好好食嘅，但牛板腱就太韌，落單係經QR code，所以都冇咩特別服務可以評價到😂 分量嚟講其實偏小，男仔應該會唔夠飽，同埋午市仲要係觀塘都賣成百幾蚊，價錢上有少少進取，如果係為咗牛舌都可以接受，但overall性價比黎講都係一般。味道:🌕🌕🌕🌗🌑環境:🌕🌕🌕🌑🌑分量:🌕🌕🌗🌑🌑服務:🌕🌕🌕🌑🌑CP值:🌕🌕🌕🌑🌑Overall: shit💩加一服務費：❎舌丼 (觀塘)觀塘開源道60號駱駝漆大廈3座1樓R室#dog觀塘 …Read More

喰楽咁啱有野做去開觀塘，就睇下有咩好食，睇到哩間shabu shabu 既評價好高，就book 左位去食。間舖其實得4張枱，每張枱既空間都好足夠，私隱度好高，想同朋友傾八卦都唔洗就住就住。如果平日食飯時間要walk in 都好大機會冇位，大家記得book 左位先去。關東風壽喜燒鍋定食 Shabu Shabu Sukiyaki pot 午市定食就包左三式前菜、日本雞蛋、野菜鍋、珍珠白飯(任添)同甜品。三式前菜 第一款係辣味既芽菜，佢既味道有啲似韓式既辣，而上邊有少少木魚碎，但夾埋一齊食又會覺得佢既味道變日式左。🤤第二款係蟹膏玉子燒，呢一款係我最中意既前菜，蟹膏既味道超濃郁，而且有少少海苔，一齊食味道係十分夾。蟹膏好食到忍唔住夾左少少撈飯食，如果佢有蟹膏飯相信都會好大賣，因為真係超好食!😉第三款係牛腩蘿蔔，估計應該係關東煮既煮法，牛唔算好淋可以夾開嗰種，但係佢俾既size 係好大舊，味道亦偏甜。而蘿蔔就真係好好好好好食，佢超級清甜同埋一啲根都冇，應該用左日本蘿白，而唔係用超市幾蚊一大條嗰啲。😋日本產A5 和牛 100g $198講返主角，睇相都覺得佢既紋理好靚仔，食落都十分之好食，如果就咁食既話可能會覺得有少少偏甜，始終壽喜燒都係偏甜，但係只要點左蛋汁再配埋飯一齊食，今個蛋中和左壽喜燒既甜味，再加埋啲飯就抵銷左和牛既油膩感，食落真係人生一大享受。和牛真係點食都好正 🫶北海道豚肉 100g $108睇圖可能會覺得佢有少少肥，但係其實片肉好大塊，肥肉既比例係十分之完美，佢既厚度唔會令你涮完之後變到好韌，而且豚肉同壽喜燒個汁係超夾😋。不過同牛肉相比固然有啲失色，但其實豚肉都好好食，唔想食牛肉既話可以叫豚肉食，心思思兩樣都想試既話就可以揀肉類復仇者聯盟。野菜鍋野菜係一開始就煮熟左，一上枱就可以即食，有腐皮、豆腐、冬菇、芋絲、洋蔥等等，種類多而且量都多，唔好睇圖以為佢好少，一路夾啲菜好似無窮無盡咁，食極都仲有。個鍋嘅分量如果比細食啲既女仔就咁食其實都可能夠飽🤰。白桃烏龍啱啱坐低既時候，店員斟咗一杯茶，開頭以為係普通綠茶，但係飲落濃郁得嚟好清甜，問落先知原來係白桃茶😂狗仔覺得好飲過平時自己買嗰啲白桃茶包好多😂沖繩鹽雪糕一開頭聽落有啲驚佢會好怪，佢唔係一款好甜既雪糕，有少少鹹鹹地，但其實食完壽喜燒偏甜既食物之後，食哩款雪糕就可以令自己冇咁漏，哩樣配搭可以一讚。Overall: 午市價格黎講性價比極高，睇相都覺得啲牛既花紋係勁靚，而且服務好好，店員見到你杯茶就冇既時候會行過嚟斟滿，個爐就冇火既時候都會好主動咁行過嚟落蠟燭。整體嚟講十分滿意，份量都冇可挑剔，狗仔飽到食唔哂個野菜鍋，男士既話份量一定夠，而且白飯都可以添。如果去開觀塘極推薦大家去哩間食🐶 非打手，自費去食。味道:🌕🌕🌕🌕🌕環境:🌕🌕🌕🌕🌗分量:🌕🌕🌕🌕🌗服務:🌕🌕🌕🌕🌕CP值:🌕🌕🌕🌕🌑Overall:Good shit💩加一服務費：✅喰楽觀塘開源道60號駱駝漆大廈第3座9樓H室#dog觀塘 …Read More