夜嵐123's Profile

來到中環Lawry’s The Prime Rib，享受一頓高質午餐，環境優雅，有一個中庭天窗，靜謐寬敞，令人可以慢慢細味每一道菜，感受片刻寧靜。中午時間呢度會提供Lunch Set，⁠今次仲多左選擇，加左一個 Grilled Steak Menu ，每日扒款都唔同，令人有驚喜。首先登場的是Foie Gras Terrine鵝肝凍批，質感極致細滑，入口即溶，creamy之中帶點酒香，層次豐富。配上新鮮無花果、青蘋果、合桃和脆多士，果香與堅果味道完美中和鵝肝的濃郁，令整體味道更有層次，食落唔會膩。主菜方面，Lawry’s 主打Roasted Beef，所以一定要叫Steak Platter，一次過集合三款牛扒，絕對係牛魔王的至愛。法國夏洛萊草飼牛柳肉質嫩滑，入口即化，輕輕一咬已經感受到細緻的纖維，適合喜歡柔嫩口感的人。蘇格蘭阿伯丁草飼肉眼則油花分布平均，牛味最濃郁，咬落去多汁有彈性，每一口都充滿牛香，配上牛肉醬汁更提升味道層次。最後，西班牙加利西亞紅牛草飼西冷經過dry-aged處理。由於西冷部位，肉質相對較嫩，有明顯煙燻香氣，味道層次更深，帶點堅果及熟成香，餘韻悠長。配菜的薯仔外脆內軟，帶微微香草味。另外建議配上Himalayan岩鹽，簡單突顯牛肉原味，每一啖都令人回味。另一道主菜諾曼第豬扒同樣令人驚喜，煎至金黃，鬆軟多汁，肉香四溢，咬下去juicy到不得了。醬汁以蘋果、法國Calvados蘋果酒調製，微酸微甜，完美平衡豬肉油香，令味道更有層次，為整體味道帶來清新感。Lawry’s The Prime Rib無論係食材選擇、烹調手法定環境氛圍都非常出色。牛扒三重奏各有特色，無論你鍾意嫩滑定濃郁牛味都可以滿足，偶爾Weekday想黎放鬆一下不失為一個好選擇!。諾曼第豬扒則Juicy得黎又有層次，配搭蘋果醬汁令人一試難忘，最後享受一杯意式Cappuccino 為呢一餐劃上完美句號! …

之前係長沙灣已經聽過，不過店舖較細，成日要排隊未必有時間食到，但而家搬左大舖，雖然都要等位，但好快就入去食到。呢度啲套餐選擇都幾多下，主打熱石鍋出餐，今次就試左兩款套餐。［明太子忌廉烏冬配蜜糖芥末雞套餐］由於石鍋上枱，明太子忌廉烏冬熱辣辣的確吸引，味道唔會過鹹，我仲加左隻溫泉蛋，撈埋落去仲正！至於蜜糖芥末雞有4舊，醬汁調得幾Blaance，仲要有碎蛋增加口感。［牛肉蒸飯配芝士番茄吉列豬肉石鍋］牛肉、牛汁加埋洋蔥呢個經典組合永遠係絕配，蒸飯特色係夠濕潤，唔會食落啲飯好乾，變成一舊舊，配日本飯係幾適合呢個做法。芝士番茄吉列豬扒一上枱芝士味好香，呢度好醒用椰菜墊底，令豬扒唔會痴底。豬扒質素幾好，肉質夠鬆夠淋，但又唔係加鬆肉粉𠴱種口感。芝士番茄醬同豬扒好夾，仲做到拉絲效果。套餐加12蚊就有綠茶鮮奶，平時閒閒地都30-40蚊杯，幾抵飲。［沖繩獅莎冬甩雪糕］之後就係呢度的另一Signature特色甜品 - 沖繩獅莎冬甩雪糕，造型好似舞獅頭，估唔到睇得又食得，「獅頭」酥皮夠鬆化，配埋Vanilla雪糕味道好夾。而冬甩就另一感覺，夠煙靭，配埋焦糖醬同雪糕真係食極都唔厭。整體黎講感覺唔錯，套餐有唔少選擇，唔洗$100（未包加一）都可以揀到包括一個烏冬或飯，配一個石鍋菜或小食，仲可以包野飲同特色獅莎冬甩甜品，新舖環境舒適，仲可以帶埋寵物黎食添！…

今次介紹旺角人氣新派西餐廳Homeland。環境舒適，景觀開掦，對住旺角鬧市街燈閃爍，即刻有種「繁華中偷閒」嘅浪漫感。[泰式柚子蟹肉沙律]一上枱就聞到清香的味道！蟹肉絲多到似拆開成隻蟹，混入炸紅蔥頭同花生碎，酸辣汁調得超醒胃，柚子粒爆汁仲帶少少甜味，fusion得嚟毫無違和感！[西班牙蒜油大蝦配酸種麵包]話就話係前菜，估唔到有6隻大蝦連殼浸喺金黃蒜蝦油海！蝦頭膏香濃到似海鮮醬，蝦肉夠彈牙。彈酸種麵包烘到微焦脆，索盡香蒜蝦油蝦膏精華，邪惡到想encore多份！[原隻波士頓龍蝦明太子海鮮薄餅]一上枱已經覺得好震憾。餅底夠脆，成隻龍蝦鋪滿面，鉗肉已拆好超貼心。明太子醬混蛋黃醬海嘯級爆發，蟹柳加煙三文魚加龍蝦肉三重鮮味夾擊，每啖都嘗到充滿大海新鮮的味道。[皇胎菊花茶]茶杯浮住朵綻放菊花！入口清甜，飲完成個人由內到外暖笠笠，充滿菊花香味[經典蘋果覆盆莓餡餅 × 角落生物畫盤]甜品就揀左經典蘋果覆盆莓餡餅、唔太甜，蘋果蓉同覆盆莓餡味道都保持到平衡。最特別係呢度甜品可以有tailor made畫盤服務，今次就揀左我最鐘意的角落生物豬扒，畫得超靚，儀式感滿滿，充滿驚喜。…

一入到燒烤堂，就可以置身係日本居酒屋當中，氣氛一流，現場的環境會令到你個人好relax。平日由於工作關係，比較多去中環分店，今次黎到荃灣，一於又要回味下呢度性價比高的串燒，首先介紹一下必叫推介:[焦糖青蘋果鵝肝多士]一上枱真係好震憾，鵝肝係超厚超大舊，鵝肝入口即溶，而青蘋果就可以中和到鵝肝的油份，配上超脆的多士，加埋的口感同味道的複雜性難以形容。[和牛棒‧配松露一口飯.]燒烤堂最新推出的串燒，主要分為三部份，包括免治和牛棒、生雞蛋黃同埋松露飯。食法係將和牛棒分為三塊，之後再撈埋蛋汁，加一口松露飯來食，相當滿足![明太子雞腿肉]明太子多到滿瀉，包圍晒成串雞腿肉，但食落去又唔算鹹。至於雞腿肉夠滑嫩，亦保持到Juicy的味道。[雞皮墨魚滑]雞皮墨魚滑又係呢度必叫之選，呢個配搭幾好，雞皮夠脆，而墨魚滑夠大件而肉質夠爽彈。[豚肉荔枝卷‧豚肉日本蘋果卷]豚肉卷基本係日式串燒店中又係必叫，呢度都幾多選擇，而我推介豚肉配水果相對上會清新啲，而日本蘋果同荔枝有兩種唔同的口感同味道，日本蘋果會清爽啲，而荔枝就會清甜同Juicy啲。[鹽燒原塊雞皮]黎到燒烤堂，一定要試原塊雞皮，外型上已經夠晒特別，另外雞皮夠薄，食落去超脆，好似食緊薯片咁。調味方面只用鹽燒，已經夠晒惹味。[柑桔鹹蛋黃卷]呢道真係唔錯，係得燒烤堂獨有的甜品。柑桔酸甜開胃，而鹹蛋黃令你有種特別「沙沙」的口感，但絕對唔咸，加上外脆的皮，充滿複雜口感同味道!最後一得一讚係每一枱佢都有提供暖盤，咁就唔怕叫多左食唔切的時候，會令到串燒凍左唔好食，都算係貼心的服務。…

田心村近排好Hit，突然被遊客網紅棒成「小京都」，係咪似京都就見仁見智，不過裏面反而有好多滄海遺珠的美食，其中一個就係由馬鞍山搬左黎田心村的泰中意，專程黎試呢度的蔥油碳燒豬扒飯同埋Fusion菜。[蔥油碳燒豬扒飯]碳燒豬扒果然係呢度的皇牌，基本上每一枱第一樣點就係豬扒飯。一上枱果然驚豔，豬扒仲大塊過面，仲要有兩大塊。最重要係佢做到鎖到肉汁，肉保持到Juicy。肉質唔鞋，兩邊前得香口。而餣肉方法近似傳統鐵皮檔豬扒麵的做法，我覺得應該有加到魚露同薑汁，令豬扒有味道層次提升，整體做得唔錯，點埋蔥油更加好「送」飯。[冬蔭公鮮蝦忌廉意粉]另一道係Menu觸動到我就係Fusion風的冬蔭公鮮蝦忌廉意粉。首先意粉一上枱有驚喜，估唔到有擺盤。鮮蝦有微微煎香，證明夠細心。冬蔭公味好濃，但唔會好辣，酸酸地加埋香茅味係好特別，加左忌廉，將每條意粉都掛晒汁，配埋洋蔥一齊炒增加一種甜味。[鮮柚子蝦球沙律]鮮柚子蝦球沙律份量好大，柚子肉唔少，而且夠Juicy夠甜。鮮蝦份量都多。泰式醬汁酸辣幾清新，辣味有後勁。整體黎講，呢度Signature的菜式對我印象都幾深刻，尤其冬蔭公鮮蝦忌廉意粉，呢道菜係其他泰式餐廳真係比較難搵到的Fusion菜式。而碳燒豬扒份量夠多，肉質Keep到Juicy都好驚喜，希望大家可以支持一下呢間小店!…

今日咁岩黎到太子，終於有機會試到人氣壽喜燒店八不，一入到去個環境好吸引，唔講以為自己入去隨意門去左日本，裝潢環境日式風格滿滿，仲配上耳熟能詳的日本音樂，只係環境氛圍已經加爆分！難得黎到就決定食好啲，就叫左『雪室盛』世界最高質牛二人餐，裏面包括最稀有的雪室和牛、澳洲M9+全血和牛、澳洲和牛封門柳同埋澳洲和牛牛小排，仲有野菜盤兼飲品。[日本雪室和牛］呢個餐重點當然係日本雪室和牛，雪室和牛又稱為「雪中沉睡的和牛」。點解咁稀有係因為雪室和牛熟成的處理手法，日本新潟縣的傳統技術雪室已經超過200年歷史，新潟每年降雪量高，所以當地人會收集白雪做成雪室儲存糧食。雪室熟成則是在高濕度環境下進行，牛肉靜置約30天，表面可保留90%以上水份，唔會因乾燥而令肉質硬化，維持發酵狀態，以最原始技術，保留天然資源最原始風味。雪室和牛有成11塊，份量比想像中多，油花好靚，好似白雪的樣貌，真係合乎其名叫雪室和牛，果然係極稀有的和牛品種。一食落去口感好似飲牛奶咁順滑，入口即溶，但仍品嚐到牛味，真係一試難忘。[澳牛M9全血和牛]全血和牛指純種和牛，只有極少數會符合呢個標準，仲要係M9高級別。M9全血和牛食落去都有入口即溶的感覺，但未至雪室和牛咁嫩滑，比較實在，牛味就較為濃郁。[澳洲和牛封門柳］封門柳就肉味相對較濃，有咬口，但唔會鞋。[澳洲和牛牛小排] 切得較為厚身，雪花都靚，食落去較為彈牙，由於較厚，所以口感會豐富啲，肉質就介乎M9和牛同封門柳之間。整體黎講，無論日本和牛同澳洲和牛質素都好好，尤其品嘗到雪室和牛真係好難得，而入口即溶的口感真係一試難忘。和牛份量都好多，加埋野菜拼盤同埋飲品，每人都只係$500左右，仲要免收加一，性價比超值。如果想食壽喜燒，八不係你的選擇之一！…

近排天氣落完雨就好曬，咁岩係尖沙咀買完野，經過見到有間新開的甜品店龍糖坊，環境唔錯，望落幾舒服，主打養生，甜品款式又多選擇，咁一於入去試下。[芒多多楊枝甘露雪花冰]天熱咁熱，當然要試雪花冰，於是叫左芒多多楊枝甘露雪花冰。配料子豐富，俾芒果、藍莓同奶凍包圍住，無論係質感同味道，濃到好似食緊楊枝甘露雪糕咁 ，另外望到鮮奶現製，仲覺得超值！[香芋芋圓奶凍西米露]之後就輪到佢的手工芋圓系列，就叫左滿足晒我所有願望的香芋芋圓奶凍西米露，香芋夠晒滑、芋圓煙靭有口感、奶凍Q彈，最特別的地方整體甜品味道唔太甜，所以推介大家熱食，更加有養生的感覺[養生核桃糊]最後就揀左養生核桃糊，一上枱就聞到好香，係面仲見到有核桃碎，每一啖都好似緊核桃咁，感受到真材實料。…

朗豪坊經常都黎，由於環境同個Feel幾好，有時都會去頂樓Chill下，平時就通常都係飲兩杯，但今次就順便黎食埋晚餐，發覺有驚喜，以下就推介呢道菜俾大家。[小食拼盤]首先黎得Sky Bar，當然要Happy Hour，每人只係$198，已經有一個小食拼盤，兼可以暢飲Free Flow 120分鐘。小食拼盤包括香辣雞翼、炸薯條、脆炸洋蔥圈同埋炸魷魚。一拎上手全部都熱辣辣，最有驚喜係炸魷魚，食得出魷魚炸得脆身而內裏Juicy，肉質都彈牙，最重要係炸粉夠薄。而Free Flow 我地揀左 Pineapple Squash同埋 Fruit Punch，飲落唔算太甜，食完炸野解渴岩岩好。[白酒忌廉煮青口]忌廉白酒汁整得好，唔算好杰，配埋洋蔥、蒜同香料更加惹味，可以當佢湯汁黎配埋青口一齊食，另外配上法包送汁更加一流。而青口份量都好多，目測有30-40隻，算係幾抵食![香煎美國頂級安格斯肉眼扒]本身以為安格斯級別，味道應該無乜驚喜。不過出奇地牛扒煎得好香，而肉質鮮嫩有肉汁，又夠大塊。另外本身叫Medium，好多餐廳都未必做到，但呢度真係做到medium 的效果。另外薯蓉做得綿滑，入口即溶感覺，配埋個醬汁一流。[虎蝦魷魚意大利粉]意粉類似Penne但比較細長，做到Al Dente 效果，而醬汁都比較濃稠，做到掛汁的效果。而虎蝦夠大隻，開邊煎得夠香，肉質紥實，另外魷魚份量都多又彈牙。整體黎講，本身以為係Bar仲要商場裏面食西餐質素未必好驚喜，但估唔到叫呢幾道菜材料質素都唔錯，調味同配料都有心思，份量又足，環境又舒服。如果大家想搵一處比較遠離煩囂的地方，The Sky Bar或者係你的選擇之一。…

今日去深水埗買電腦野，之後經過童年回憶傷心酸辣粉，原來而家有烤魚·雞煲90分鐘放題，咁於是試下重拾回憶！<麻辣雞煲放題>本身有諗麻辣雞煲同椰子雞煲中二揀一，最後都係諗住刺激啲，揀左小辣的麻辣雞煲。一滾熟開蓋後就已經聞到𠴱種麻辣的味道，目測雞件份量都唔少。而雞件有預先煎炸過，加埋配料蔥蒜、洋蔥、芫茜都幾惹味！配料方面都算有齊蔬菜、菇類、丸類、唔同肉類、串串水魷，最重要係有呢度的主角酸辣粉的粉，唔知點解呢度的粉係特別軟檽同吸汁，另外仲有回憶的味道。飲品方面都係任飲，除左紙包同埋汽水外，仲有自家製的菠蘿粒粒同青提粒粒，仲有芒果汁同桃汁，今次只係試左菠蘿粒粒同芒果汁，兩款都幾好飲。價錢方面假日每位都只係$158，係放題的價錢黎講算係平靚正。<香酥軟骨>另外仲嗌左兩款小食，每款都係三十幾蚊，第一款香酥軟骨其實係炸雞軟骨，炸粉都幾薄同脆，本身唔點醬都夠味，最重要份量好多下，兩個人食岩岩好。<麻香雞翼>本身以為都係普通炸雞翼，估唔到味道都幾多層次下，由於佢應該有加到少少南乳黎餣雞翼，之後食食下就滲出花椒麻麻地的感覺。而且炸得雞皮夠脆而肉質唔乾。…

咁岩買野黎到旺角，見到附近一間叫甜悅的甜品店下午就已經有人排隊，所以就決定順便試下，食左幾款甜品都幾值得介紹!<香蕉雪糕窩夫>香蕉雪糕窩夫即叫即整，窩夫總共有兩塊，熱辣辣兼外脆內軟，配埋芒果雪糕一齊食又有另一滋味。香蕉亦都有誠意，上面加左蕉糖，另外仲加埋香蕉蓉，而價錢只係$59，但從材料、擺盤都見得到誠意，值得一試!<荔枝龍眼冰山>一上枱已經見到有十幾粒龍眼，而旁邊估唔到咁多料。不過重點係個冰，之前有食過龍眼冰，但加埋荔枝原來會更加清甜，另外仲加上椰絲，增加口感同埋椰子味，味道層次幾豐富。份量都幾多，建議同朋友一齊開心Share! <碟豆花富士山奶凍>富士山奶凍可以話係呢度的Signature Dish，用碟豆花做到富士山，而上面就舖上紫薯奶蓋做成雪山的樣貌。食落去質感好Q彈，有時最驚就係奶蓋做得太杰同太甜，呢度處理得好好，食落去唔太甜。<開心果味雪糕檽米滋>如果大家等唔切位，其實甜悅仲有外賣部，見到佢呢排推緊雪糕檽米滋，仲有人氣的開心果味揀，咁就試一下。開心果味雪糕夠晒濃味，證明真材實料。而檽米滋的質感好軟檽，都幾特別!整體而言，幾款甜品都有特色之餘，味道都唔錯，下次我仲要試下佢的中式甜品，以後黎到旺角有甜品落腳點了!…

咁岩係荔枝角附近，由於對雪山冰廳的椒鹽豬扒炒飯念念不亡，又再次回訪二刷，仲試埋其他菜式添!<始祖椒鹽豬扒飯(炒底)>一上枱熱辣辣，豬扒切得夠大塊，夠晒「諗」而且餣得好惹味，肉質唔會乾爭爭。炒飯粒粒分明，唔算話好乾身，飯粒滲入少少椒鹽豬扒的油香。份量都幾多，適量兩個人Share一齊食。<香辣馬來炒米粉>睇到個名幾特別，所以就試下。材料非常豐富，首先吸晴的係三隻大蝦，之後仲有好多臘腸同埋魚餅條。另外佢加左辣醬、洋蔥同臘腸炒，而本身又夠鑊氣，而米粉亦用較粗身的米粉，所以可以掛到啲調味料，更加惹味!<爆餡蛋牛治(烘底)>見到蛋牛治的餡仲厚過兩塊多士，真心足料，唔怪之話爆餡。雞蛋食落去有蛋汁，夠Juicy。另外除左鹹牛肉外仲加左蔥，所以除左鹹的味道外，仲會帶蔥清香的感覺，食落去無咁「溜」。由於每次通常都係兩個人，而雪山冰廳每道菜又大大份，所以每次叫兩至三樣就已經夠飽了。整體而言，雪山冰廳長期保持到高水準，無論係茶記小食、炒粉麵飯都做得出色，同時咩菜式都有得揀，如果有選擇困難症的朋友們黎雪山就岩晒啦!…

我自己都幾鍾意食海南雞飯，而長沙灣都有幾間選擇，不過始終都係偏愛蘇山雞飯多啲，今次除左揀必叫的蘇山雞飯外，仲試下其他小食。<招牌海南雞飯>海南雞飯一上枱見到份量都幾多下。目測雞皮晶瑩剔透，而內裏的雞內白裏透紅就覺得應該唔錯，食落去肉質都夠滑嫩，而本身都已經有調味，所以唔點醬汁都夠味。而海南雞飯另一個重點係醬汁，薑蓉真係打到「蓉」的狀態，辣醬都幾辣，夠惹味，而最後甜豉油相對比較甜，建議將甜豉油撈埋辣醬或薑蓉一齊點就岩晒。而隨餐的冬瓜湯都幾大碗，夠晒清，岩晒用黎平衡醬料的味道。<獅城芽菜走地雞飯>獅城芽菜走地雞相對上就雞味較濃，另外加上唔少麻油，做到類似麻香雞的感覺。而芽菜又肥又大，夠晒爽脆，加埋豉油麻油，而家好好「送」飯。而我另外加左$10 轉輕怡肉骨茶，呢度的肉骨茶係近似新加坡口味，比較重白胡椒味道，而豬骨都有三條，啖啖肉，都算真材實料。<開心果椰子奶昔>飲品方面，我地揀左新出品開心果椰子奶昔，見到綠色已經知道用左唔少開心果，而椰味都夠重，係而家大熱天時飲岩晒!<小食拼盤>小食拼盤包括蘇山雞翼、脆炸鳳尾蝦卷、泰式魚餅、同埋豬肉串。由於跟餐小食、飲品半價，所以咁大份小食拼盤都只係加 $49，全部食得出係即炸，熱辣辣的溫度，真係幾抵食。而我首抽前兩者。蘇山雞翼係用上雞全翼，炸得好香口，而保持到肉質鮮嫩。而脆炸鳳尾蝦卷就炸得鬆脆，成隻蝦釀左係裏面，脆到連蝦尾都食得。<鮮油咖央多士>一上枱見個咁厚的鮮牛油已經覺得好邪惡，食落去入口即溶，配上椰味十足的咖央醬真係絕配，由於跟餐半價，兩件都只係$19，如果大家有quota真係值得一試。整體而言，蘇山主打的海南雞飯皮脆肉嫩，而三款醬料味道方面都調制得唔錯，而獅城芽菜走地雞飯就雞味夠，芽菜爽脆，有麻油雞的感覺，各有特色。另外小食方面由於半價，都幾抵食。至於飲品方面就推介出面比較少有的開心果椰子奶昔。…

今日黎到尖沙咀，試下岩岩係呢度新開的人生有限杯.串燒店，呢度主打平靚正串燒，係呢個時候居然仲有$10、$15同$20串燒系列，咁決定同大家試一試。[$10 串燒系列]一開始諗$10 串燒只係Gimmick，點知原來都好有誠意，首推一定係豬腩肉，油分足夠，肉質唔會鞋，調味有少少微辣。牛油粟米一大舊，味道有少少焦香，加埋牛油好香口，栗米肉都夠甜。脆肉瓜同燒菠蘿每串都有四舊，燒得夠Juicy唔乾，而且都入味。[$15 串燒系列]至於$15系列的串燒選擇都好豐富，首推一定係豚肉荔枝卷，一串有3舊，豚肉燒得香脆，裏面的荔枝夠甜同Juicy，食完即刻要Encore。之後仲叫左墨魚鬚同埋味增松阪豬。墨魚鬚肉質夠Q彈，仲好有誠意俾埋泰式辣醬夠晒惹味。松阪豬肉質爽脆，食落好似豬頸肉咁，配埋味增醬又有另一番風味。[$20 串燒系列]$20 串燒系列剚有唔少選擇，首推係雞中翼，佢將肉拆開，所以好容易就食到，而雞肉都保持鮮嫩，雞皮香脆。而雞皮好似整到一層層塔，本身都燒到夠香脆，我建議可以撈埋蛋汁一齊食。[特色串燒、小食]其他特色串燒推介免治雞肉棒，雞肉中帶雞軟骨增加口感，配埋生雞蛋汁真係無得輸。另外仲有呢度先有的墨魚滑大蝦卷，同時食到墨魚的Q彈同蝦肉的爽脆兩種口感，配埋芥末醬又幾特別。最後當然叫埋飲品，目測都幾大杯，包括係菠蘿可以必思同埋桔仔薄荷梳打，前者甜甜酸酸，都有唔少菠蘿肉。而後者就清涼解渴，各有特式。總結黎講，一開始以為以$10、$15串燒只係用黎Gimmick，食完後就覺得唔hae，絕對物超所值，食左差唔多30串串燒，又有和牛，又有海鮮，平均都只係三百幾蚊。另外環境都唔錯、地點又方便，真心推介大家同朋友黎試下!…

今日難得黎到元朗，當然要食埋晚飯先走。途中見到一間泰國餐廳有二人餐好抵，仲要加多$1就多半隻燒雞，咁二話不說就走入去食了。泰式二人包括雞肉+豬肉串燒、泰式炒蜆、海鮮冬蔭功湯、黃咖喱豬，仲送埋兩杯特飲，今次就叫左香茅冰同埋青檸冰，成個餐未計加一都只係$338。之後仲加左$1半隻燒雞，最後就叫埋食泰菜必叫甜品──芒果檽米飯。[雞肉+豬肉串燒]串燒沙嗲醬好濃，雞肉夠嫩而豬肉油份較多，帶少少燶邊，帶出焦香的效果[泰式炒蜆]一上枱就俾個蜆的Size震攝左，份量又多 目測至少有30隻，泰式酸辣的醬汁好惹味，撈汁一流。[海鮮冬蔭功]海鮮冬蔭功加左番茄 所以唔會好辣 仲帶出番茄鮮甜的味道。海鮮配料都好多，包括有大蝦、青口、蜆同埋魷魚。[黃咖喱豬]黃咖喱相對椰味較重，類似葡汁的味道，所以唔會太辣。由於比較杰身，相對容易掛汁之下，每款食材都可以沾到黃咖喱，送飯一流。豬肉無雪味，仲有大量配材如洋蔥、青椒、紅椒同埋薯仔，夠晒豐富。[$1泰式燒雞]燒雞即叫即燒，一上枱熱辣辣，皮脆肉嫩，雞皮燒到好似食薯片咁，而雞肉尤其雞脾位就超嫩，成隻脾咁食個感覺好爽[芒果檽米飯]芒果夠甜、糯米飯熱辣辣夠軟檽，配埋鮮甜的芒果同埋椰汁岩岩好。埋單叫咁多野都係$500左右，超抵食! 下次要再黎試下其他特式泰菜。…

牛大人相信唔少人都食過，不過今次佢岩岩新推出全新系列「黑與白的盛宴」，咁襯weekend得閒又黎食下。今次揀左最高級的日本A4黑毛和牛火鍋放題，湯底就當然揀左新推出的黑與白鴛鴦湯底，分別係「黑金蒜皇土雞鍋」同埋「雪白御鮮豆腐鍋」。黑鍋充滿蒜香味，湯底夠濃，而白鍋就比較清新，由於加左芫茜，所以似芫茜魚湯，而魚肉就用左三文魚，都算夠鮮味。原來隨餐附送澳洲M9和牛牛丸每人2粒 及 海鮮拼盤，都算唔錯。和牛牛丸油份夠香，食落都幾彈牙。而海鮮拼盤就有大隻的生蠔、鮑魚、扇貝同埋魷魚，都夠新鮮!之後當然要試限定的黑白美食，今次就試左藤香鮑魚豆腐同埋鹽酥髒髒雞，前者加上藤椒調味，麻麻辣辣咁幾特別。鹽酥髒髒雞就加左海苔粉，味道層次豐富左，細細粒一啖一口唔錯。而主菜當然係日本黑毛A4+和牛，一上枱已經俾個油花吸引左，食落去真係入口即溶，充滿油香，值得不斷Encore。而伊比利亞黑牛豬梅肉都值得推介，望落去個油花都好靚，唔講仲以為食緊牛肉，肉味相對較和牛重。另外都有其他唔同的自助食材同飲品，另外亦可以散叫芝麻豆漿黑旋風(需要加$25)同埋其他台式飲品例如冬瓜茶、酸梅湯等(免費)，最後當然要食幾杯Movenpick先叫完滿結束啦，最後埋單兩個人大約千一蚊左右!…