tnaces's Profile

為了鍛鍊自己的雙語水平，就嘗試中、英文並用吧，有錯以中文版為準，哈哈。In order to improve my Chinese and English standard, let me try to write in English too. 早前看到網上食評推介這間餐廳，聽聞餐廳食物不錯，加上背後有段故事，最重要是位置不遠(對我而言)。我聽後一直就很心動，難得今日有空，便一個人去餐廳嘗嘗。I read a recommendation of Café Heato on the Internet. Delicious food and a story behind the cafe drew my attention. Of course, I chose to visit because I live nearby. I went to the café for lunch today as I was free.我住在附近，找位置不成問題，聽說有住在香港、九龍的人也特地前來，好不容易才找到。It is not a problem for me to find the location because I live nearby. However, I heard people who live in Hong Kong and Kowloon region have difficulty of it.很幸運，不用花太多的時間便能進去，因為外面陽光很猛，若然要等也要等很久。I was lucky that I didn’t have to wait for a long time. The sun was shining brightly and it would be a disaster for waiting.佈置很漂亮舒適，將近聖誕，餐廳也掛上了不少聖誕裝飾。The design was nice and comfortable. Christmas is coming and a lot of Christmas decorations were hung.人太多，不想打馬賽克，就沒有拍攝餐廳的佈置，有興趣的朋友就上官方網站吧。There were so many people in the café. I was too lazy to add the mosaic effect so I didn’t take a photo of the decorations. People who are interested of it can visit the official webpage.可能是很多人都慕名而來，加上音樂開得比較大聲，環境沒想像中寧靜。Maybe there were so many people and the music was quite loud, it was not as quiet as I expected.我點了雞肉翠香汁意粉($45)和摩卡咖啡($35)。I ordered a bowl of spaghetti* ($45) and a cup of mocha ($35). (*I don’t know what is the official English name, maybe you can refer to the photo.)由於今天是周日，餐廳沒有套餐優惠，意粉和摩卡咖啡同以正價收費，相比之下，平日比較便宜。Since today is Sunday, there was no set lunch. The spaghetti and the mocha were charged at regular price. In comparison to weekdays, it is not so beneficial.等候時間實在太長了，沒記錯大概是半小時吧，讓我從笑臉變成「撲克臉」，也是食評分數不高的主因。I had waited so long that my smiley face became poker face. Nearly half-hour waiting is the reason why I don’t give a smile in this food critique.首先送上的是摩卡咖啡，拉花很好看，咖啡暖暖的，也合口味。只可惜在等意粉來時變涼了。Mocha was served first. The latte art was beautiful. The coffee was warm and it suited my palate. It was a pity that it became cold quickly during the waiting time.意粉的份量足夠，第一口吃下時挺清新的，有檸檬和香草(不知道是哪種)的味道，雞肉也不錯，但不知為何吃到最後就有點膩。The size of spaghetti was large enough. It was quite refreshing when I first tried it. The blending of lemon and herbs (well, I don’t know which one) is good, also for the chicken. However, I was tired of eating it after more bites.說說可以改善之處。Room for improvement:1. 桌子不平，邊吃邊害怕會打翻食物。The surface of table was tilted and I worried the food may overturn.2. 上菜實在等太久了，等到花兒都快要凋謝，餐廳若想長久發展，必須要想方法改變這點。The waiting time was too long. The café should find a solution to solve the problem for long-term development.值得一讚的是，侍應姐姐很有禮貌。I appreciated the waitress was very polite.餐廳地理位置優勝(重申：對我而言)，我下次應該會在平日再嘗一次。Since the café is not far from my home, perhaps I will try other food on weekdays.有如標題所言，繼續加油吧！Lastly, keep it up!…Read More

首先講下點解我用「愛恨交加」黎做形容，愛佢既野食，的確出色，恨佢既等候時間，實在令人詬病。好啦，正正經經講一次，首先，我同個fd行開旺角，諗起呢間人氣cafe，於是就兩個人去左幫襯，初頭以為閒日，又唔係繁忙時間，應該唔洗等太耐就入到去，結果證明我錯左，呢間人氣爆登既cafe出面有好多人等緊，情侶啦，朋友啦，一排一排咁企左係度，我地要等12張，係A枱，初頭諗ok啦，12張姐，結果佢叫B枱時，我呆左，我承認我天真haha，估唔到仲有C枱，我內心諗，有D枱E枱F枱嗎！！！ 跟住，我要講佢既輪候方法既問題，利申，我講既係我當日既情況，我唔肯定其他日子係咪有同樣既問題。我個日有好多4人枱既客人食完走人，正常黎計，4人枱緊係比3人或者4人既人一齊入去食，問題係，有好多2人其實比3人或者4人既人早到，如果靈活既話，係咪應該比兩個2人既客人入去四人枱食，結果佢淨係一味比4人枱既客人入，對比得輪左好耐既2人唔公平，更加有唔少因為咁嬲嬲地走左。我覺得貴公司一定要重視呢個問題，唔一定個個都好似我咁，咁有耐性等等等(我中間有發過小脾氣)，又唔一定個個都好似我咁，會好均真咁比個正評你(我唔排除有人會因為咁而比負評，即使佢鍾意你地既野食)，點解好似曲線讚自己咁haha。一間公司最緊要係人氣，即使初頭人氣幾高漲，但如果有好多人因為咁樣而有唔好既印象，一傳十，十傳百，好可能會錯失左好多潛在既客人，咁少既事搞到流失人客，咁就得不償失啦。好啦，話說我好容易咁等左45分鐘啦，終於入到去坐啦，我發現好多枱其實係無人，只係未執枱，唔知係咪因為員工不足，所以就搞到枱未執，枱未執就搞到人客入唔到黎，人客入唔到黎就炆，又番返去最初既問題。因為我覺得朱古力味會好膩，我唔鍾意食藍莓，個fd唔鍾意食芒果，所以我地叫左個士多啤梨蜜糖磚塊，然後又係漫長既等候，我個fd終於忍唔住問個員工，佢話因為係即叫即整，所以就要等半個鐘以上，不便之處，敬請原諒，what？出面等得仲唔夠耐，仲要等半個鐘，雖然我好欣賞即叫即整呢點，可以諗其他辦法加快速度嗎？咁唔單止耗盡客人既耐性，仲會耗盡客人僅餘既好感，最後等左差唔多半個鐘(由叫完野食計)，野食終於黎到。外型幾靚，望落幾吸引，btw我地諗左好耐點分黎食，結果我地一路諗一路望下人地點做，最後由我小心翼翼移開面層，成功yeah，我個fd個塊(第二層)有d蜜糖磚塊加麵包框，我就要個底，最後我地互相分好之後，就點d士多啤梨汁食，d暖笠笠，炸好既蜜糖多士，配上有d涼，酸酸地既士多啤梨汁食超正，係嗰刻，我地都冇後悔排左咁耐隊。食下食下就分最頂個層食，個士多啤梨雪糕應該係haagen dazs(?)，然後配埋d棉花糖，真係好好味，而且唔覺膩(不適用於朱古力味)，兩個人七手八腳搞掂哂全部，大滿足！不過唔知返去會肥左幾多磅haha。味道：4正呀正呀，微酸既士多啤梨味配淡淡甜味炸好既蜜糖磚塊，絕配！環境：4個室內設計幾靚幾舒服，明顯係有擺過心思設計。服務：3呢個位唔包輪候時間，如果唔係實拖低哂d分，只講員工服務，ok la，不過不失。衛生：3不過不失啦抵食：3同上等候時間：1由等位到等到野食上黎，等左1個鐘15分鐘，這樣好嗎？！要求改善ps.下次想試下芒果味，望到隔離嗰碟，好似都好正咁……若然唔多人排隊既話。…Read More

之前黎呢度食過幾次，覺得幾好味同埋價錢實惠，就黎呢度再試其他款式，因為黎之前無耐已經同個fd食左野，所以我地只係叫左兩款野食，pizza同埋意粉。先講黑椒雞肉pizza，黑椒味幾香，雞肉又嫩滑，加埋d芝士真係幾惹味，絕對推介！至於菠菜配煙三文魚忌廉意大利粉，雖然個忌廉幾香，但我覺得煙三文魚鹹左d，同埋有d spring onion(?) 味，可能我個人並唔鍾意spring onion(?) 陣味，所以初頭覺得有d難入口。最後兩個人食左兩碟$62，計番平均一碟pizza/意粉既價錢，比起提供同類型相近份量野食既舖頭平唔少，所以下次我都會再黎試其他野食。味道：4唔錯，平均都算有水準環境：3唔係我特別鍾意既佈局服務：3個鐘禁左幾次都唔得，要叫人黎寫單，扣左d分衞生：3不過不失抵食：4上面有寫唔解釋…Read More

前兩日同個fd去左元朗，醒起呢間「盆栽」tiramisu既人氣cafe，搵左一輪路之後，終於去到間舖頭，間舖頭以黑色藍色做主調，感覺幾grand幾靚，由於我地係閒日下午茶時段幫襯，唔洗排隊等位，直接walk-in已經有得坐。我地目標明確，一早鎖定招牌菜，係三款tiramisu當中，我地叫左個原味兩個人share。因為驚唔夠飽，再叫多左個waffle，以士多啤梨、朱古力杏仁醬加蜜糖脆脆雪糕配搭。叫完之後好快就黎左，先講tiramisu，份量唔大，好彩叫多左個waffle姐，上面插住薄荷葉，朱古力脆粒加上爆炸糖既「泥」的確幾精緻，令個tiramisu有淡淡既薄荷味，而「泥」既質感都幾特別，爆炸糖令到個味覺提升左，再挖深d，有d咖啡味既mousse加埋海綿蛋糕都幾好食，不過我個fd話蛋糕整得有d淡，我個人覺得ok，因為如果個蛋糕整得太濃，會好膩好heavy，依家兩個女仔share就差唔多，唔算太heavy。再講waffle，呢個簡直係驚喜之作，初頭諗住只係為填肚，估唔到咁掂，個waffle攞上黎嗰陣已經聞到香味，配上朱古力杏仁醬食落暖笠笠，又有絲絲朱古力味，士多啤梨同少少士多啤梨醬有d酸，可以解膩，個凍冰冰既蜜糖雪糕有一陣淡淡既甜味，配上微暖朱古力脆粒黎食，超正！兩個人總共食左$93，d甜品幾有水準，大家都覺得好滿足！味道：4都算幾有水準，尤其個waffle令我幾surprise環境：4走高檔舒適路線，室內設計幾好睇服務：4職員態度幾好，臨走有同我地講byebye衞生：4望落所有野都幾乾淨抵食：3個tiramisu雖然好食，但只係賣gimmick，如果論份量黎計並唔值$45反而個waffle($48)就差唔多…Read More

我好少會去佐敦，但由於團購有優惠($15coupon當$30咁用)，呢項優惠對於鍾意食甜品既我黎講大為吸引，係交通方面權衡輕重之後就揀左佐敦呢間分店，貪得意買左兩張coupon去試下。可能因為我去既時間並唔係繁忙時段，所以我一推開度門之後，只係見到一枱客人樂也融融咁食緊甜品，而我就一個人坐係另一張枱，由於我一早就係網上睇定menu，就決定先試以下呢款甜品↓↓雙球雪糕(配涼粉) $30 因為人流既關係，個甜品唔夠五分鐘就送到黎，驟眼睇個樣尚算吸引，份量亦都足夠，但味道方面就令我有d失望。先講雪糕方面，雪糕可能係個雪櫃雪得有d耐，結果食到最後多數都係冰，令整個味道淡左好多。而椰汁涼粉方面，椰汁涼粉可能係啱啱「畢」起，所以比較暖，同我想像中冰涼既感覺唔同，攪到d雪糕溶得有d快，結論係雪糕味同椰汁味唔太夾，只好速速食完走人。如果唔係團購有優惠，我諗我唔會再返番去食，原價$30既呢款甜品稱唔上出色，甚至分分鐘自家製仲比佢更加好，但仲有一張coupon係手，或者下次會試下主力推介既白雪黃金卷，希望能夠令我眼前一亮啦。…Read More