YikPongTong's Profile

兩日前去到又一城，本身諗住去麥當勞，點知最頂層嘅麥當勞，原來早幾年前已經搬走咗，而家變咗呢間，一場嚟到就直入啦叫咗個咖喱豬扒撈麵，匙羹上面嗰啲係馬拉盞，超香蝦乾味道，我唔夠食，叫店員攞多一碟俾我講吓個咖喱先，唔係辣嗰隻，係甜甜地，小朋友都啱食，非常容易入口，而且好香，薯仔煮得好淋，配埋啲咖喱汁好好食，原來豬扒仲淋，煎到少少香口，都幾好食，個麵呢都唔錯！撈埋啲咖喱汁好容易清哂一碟佢。但唔知點解佢放啲秋葵落去，完全唔夾酥炸鳳梨蝦，其實都唔錯，中間除咗有蝦之外都有蘿蔔片，增加咗少少口感，個蝦尾炸到好脆都可以食埋，但係$29真係唔值⋯試一次就算…Read More

其實去深水埗考車牌筆試，咁就去食呢間牛舌專門店！日式風格！一入門口已經聞到好大浸鐵板牛肉味入面唔算坐得多人，大約15個左右，所以都係盡快食完就走。費事阻住其他人。我就叫咗佢個鐵板系列二重牛舌，+28蚊升級套餐，店員話做緊優惠，俾$28等於比$38升級牛舌筋溫泉蛋丼！個餐本身就係牛舌芯+牛舌尖=二重牛舌，而三重牛舌係指牛舌筋，因為個飯上面嗰啲已經係牛舌筋，所以我就咁嗌二重算牛舌筋非常之淋，冇牙都食得，用條脷頂一頂 ，都已經散晒！用嚟送飯一流牛舌尖同樣非常之淋，牛味濃啲，啲肉質一疏疏咁，都幾好食牛舌芯肉質非常爽口！咬落去索索聲！今日嘅冠軍！而且非常有牛味！配埋個醬汁，甜甜地，非常夾！加少少洋蔥食，簡直冇得彈！…Read More

人氣過江龍拉麵餐廳！今晚9點入到去，完全唔使等位，店員安排咗吧枱俾我坐。聽人講呢度嘅牛筋幾好食，於是我就嗌咗一碗試吓。合理價錢！一上到嚟，即刻飲啖湯先，湯頭勁濃郁，勁重豬骨湯味，直程好似飲緊芡汁咁。Gel住哂個口，配料都唔差，大量木耳，蔥花，糖心蛋，叉燒。講吓隻蛋先，呢個價錢嘅應有水準，夠晒流心！個麵就係似X蘭果隻直麵，但係比佢粗少，呢隻麵本身質地比較硬，如果想要淋啲，就要同店員講。粗身啲好，唔好咁掛湯，否則會好鹹。（本身飲頭啖湯都已經咸到要飲水），叉燒方面，正常發揮啦，又肥又瘦，OK嘅。到個主角就係牛筋，非常之淋，好似食緊啫喱咁！用條脷頂一頂就散晒，而且非常好味！值得推介！去到最尾，諗住飲少少湯，但真係太鹹頂唔順，於是加咗少湯，稀釋一下，果然真係易入口好多，最後成碗飲晒！正👍🏼…Read More

其實比一百蚊食碗拉麵，不如平平地幾十蚊食碗清湯牛腩河好過啦。問心嗰句，40幾蚊，有咁嘅質素，超值啦，講吓佢啲牛腩先，夠淋，有五香味，唔太重其他味，所以唔會搶咗牛腩本身嘅牛味，佢有肥膏，瘦肉，跟腱位，所以食落去啲口感都有唔同。最唔鍾意啲牛腩一係全肥/一係全部瘦。呢碗牛腩河就唔會。河粉方面，夠新鮮，唔會疊埋一齊，條條分明，唔會煮到好淋，少少爽口，點解我叫河粉？因為貪佢夠滑，吸到湯！而湯頭唔算太清，但都唔會太咸，飲落都正！…Read More

咁有香港特色嘅拉麵店，身為拉麵愛好者嘅我，一定要幫襯啦，因為新開張關係要排隊，一個人都排好耐。但我望到店舖入邊有好多空位，店員寧願傾偈都唔放人入嚟！搞到出邊好多人排隊，入邊有好多空位，都唔知係唔係銷售伎倆，喺門口出邊睇落多人啲，吸引顧客，希望老闆可以認真正視呢個問題！首先，講吓衛生問題，啲杯超多油，好似未洗乾淨咁！一裝水落個杯度，啲油浮晒喺水面！非常嘔心。搞到我唔夠膽飲水。（第二第三次去就冇咗呢個問題，應該改善咗）呢間拉麵店舖嘅湯底好多都採用香港特色味道，我當然唔會放過，試晒三隻最特別嘅湯底啦。（小弟我分別食過三次，排過三次隊，集齊晒先出呢一篇食評）算係咁啦慢煮好多個鐘嘅白雞湯拉麵！非常好味！比得上日本銀座拉麵！（當然爭少少啦）湯底唔算非常「傑」，但非常濃郁雞湯！一淡入魂！非常出色！而配料一啲都唔手軟，有竹筍，半隻非常流心嘅糖心蛋，青蔥，洋蔥，慢煮雞胸，鴨胸，叉燒。應有盡有！而麵底方面，我都係揀返幼身嘅拉麵。都算爽口！同場加映煎餃子，普普通通。冇特別，可以唔使加錢食。第二次到訪，我就試咗呢個花雕醉雞湯拉麵，個湯底有少少鹼水味。但依然都食得到酒香。唔錯唔錯。呢嚿慢煮雞肉食到想講粗口！難食到⋯明明第一次係好正常，冇特別。但係第二次嚟呢度食竟然食到好大陣鹼水味。唔知係咪呢塊慢煮雞肉，搞到個湯底都好重鹼水味？我吞都唔夠膽吞，嘔返出嚟，其他配料都同第一次差唔多。第三碗胡椒豚肚湯拉麵，非常重港式味道，胡椒味非常濃郁，而且唔辣，豬肚份量非常多，絕不手軟！慢煮叉燒三次嚟講，今次最好食，而個糖心蛋都非常好，湯底超好飲，今次我飲晒啲湯（因為真係好似飲緊胡椒豬肚湯咁）超好飲！總括嚟講我覺得呢間樂麵水平非常不穩定，一時好好食，一時好難食，真係要睇彩數。完。…Read More

其實呢間嘢都開咗好耐，喺度附近都冇類似嘅石板燒肉，心血來潮想試吓，就入左去入到去煙霧瀰漫，好明顯抽風系統唔夠，好大陣油煙味。環境真係一般般，而且啲枱好油，好似冇抹過咁。自助沙律包，白飯任裝，仲可以食紫菜，仲有個湯可以任飲，湯渣有牛肉粒同洋蔥粒。淨係食呢啲都已經可以好飽⋯咁我就叫咗個餐食，其實性價比幾好，肉方面都唔錯，強烈推薦加錢食牛舌芯。超好味。然後再加多$12有漢堡扒。性價比好好。如果要自己喺出面買牛肉食，一定唔止呢個價錢。其實有好多餐揀我揀咗個澳洲和牛+韓牛+美國牛餐。所有油脂分布都算好，非常有牛味。提提大家，因為呢個係石板燒肉，千祈唔可以放太耐，否則會乾晒。當唔夠熱嘅時候就要叫店員幫手換石板，千祈唔好怕麻煩。Overall嚟講，性價比超高！值得推薦！…Read More

一入到去，環境幾大，埋邊仲有玻璃窗望海景食拉麵，感官嚟講一流。但可惜，一坐低諗住斟杯水飲，啲杯好油，好肥膩，好似冇洗乾淨咁，扣分食個前菜先，正正常常普普通通咁我就嗌咗個適量豚骨蝦味湯拉麵，啖湯超級精神，超重蝦味，上面亦有啲脆卜卜嘅炸薑粒增加口感。但係塊叉燒簡直不知所謂！又柴又乾，同X蘭果隻差唔多級數⋯但係隻蛋係好出色嘅，好流心。但得半隻⋯蛋都要慳⋯個麵不過不失，煮嘅時間剛剛好，所以口感幾好，全靠個湯底令到個面好食晒，啲人話湯底係拉麵嘅靈魂講得一啲都冇錯。同場加映煎餃子。普通到不能再普通。整體來說，應該唔會再試下一次。…Read More

小弟我食過咁多間拉麵店，我敢肯定旺角區最好食嘅拉麵店。撲一，為咗呢篇食評小弟親身分別嚟過五次（即係排過五次隊）食哂我最期待嘅拉麵（當中海老拉麵食過兩次），小弟呢邊食評係誠意之作係開始之前，我想讚一讚店員小姐，有一次我漏咗把遮喺入面，佢都幫我keep住，勁窩心，係招呼客人排隊入去之前，好有禮貌，會預先俾定菜單排隊嘅客人睇入面舖頭唔算好大，目測可以坐到大約20人，如果夏天會比較熱，因為冷氣唔算好夠麵底嚟講有兩隻：白麵（博多），比較幼身，硬少少，適合配濃湯黃麵（東京），粗少少，比較滑，口感好啲，適合配淡湯第一碗海老拉麵好好味呀，所以我食過兩次，個湯幾濃，非常重蝦膏香味，上面亦有啲櫻花蝦乾，將成個蝦湯嘅鮮甜升華到另一個層次，非常濃郁，因為濃郁所以我選擇咗黃麵，隨湯附送一隻蝦佢有得俾你揀厚叉燒/慢煮叉燒，今次我揀咗厚叉燒，簡直完勝慢煮叉燒。我覺得海老拉麵係撲一代表作。同場加映唐揚魷魚，油溫控制得啱啱好，外面卜卜脆，入面非常Juicy，用嚟佐酒一流！想講最特別係個綠色醬汁，雖然唔知咩嚟，食落去好好味，好特別特，有冇朋友仔知道係咩醬？第二碗蟹膏拉麵同海老拉麵不相伯仲叮噹馬頭，要我揀邊碗係冠軍？真係係好困難。相比起海老拉麵，蟹膏拉麵比較清淡，一如既往，清淡嘅湯，就係配白麵，但如果你哋想濃少少，不妨將上面嘅蟹膏同蟹肉碎，撈勻落啲湯度，將成碗湯嘅蟹味昇華！好似食緊隻蟹咁隨湯附送一個蟹鉗仔，老實講，冇乜味⋯今次我試咗慢煮叉燒，俾我揀100次，100次，我都應該要揀返厚叉燒，簡直係完全兩個境界，每個人都有唔同嘅口味，可能有啲人鍾意食慢煮叉燒多啲。同場加映冷凍廣島蠔，一啲都唔腥，而且非常鮮甜，個醬汁有少少辣，用嚟作為開胃菜一流，唯一缺點係限定期間發售，所以朋友仔見到呢個食評嘅時候，應該冇得食:(強烈要求撲一將佢列為常規菜式第三碗魚介拉麵一飲啖湯，超濃郁鰹魚香味，口感有些少流沙質感，應該係鰹魚粉，非常重成本點解會有一塊慢煮叉燒，一塊厚燒叉燒？因為師傅話嗰塊厚燒叉燒，份量比平時細，所以送一塊慢煮叉燒俾我，好佛心有良心特別嘅係竹筍吸收晒啲鰹魚味道，而且非常爽口，上面嘅木魚片撈埋啲湯飲，木魚mix鰹魚，味道非常好。同場加映黑松露魚餅，作為小食係非常高分，魚餅炸到好熱，而黑松露醬係凍凍地，黑松露配魚餅真係第一次食，呢個組合意外地夾，出乎意料好食最後一碗豚骨拉麵豚骨拉麵港人至愛，但點樣可以喺云云豚骨拉麵之中脫穎而出？撲一拉麵做到。其實個湯底做到好香豬骨味，再加少少豬油脂肪，令到成件事好「豬」就得㗎啦，起碼有人會記得你，比其他豬骨湯特別，啲湯再配埋啲脂肪，好順滑，用條脷頂一頂，啲豬油香出晒嚟總括嚟講：撲一拉麵全部菜式都係高水準水平，個人認為唔應該賣呢個平民價錢添，不論係師傅對客人嘅態度，因為塊叉燒份量少咗，加多另一塊慢煮叉燒俾你作為補償，淨係呢個做生意嘅態度，喺香港仔邊度搵？似日本嗰啲匠人精神，而且侍應小姐都非常有禮貌，價錢平，不在話下，食物嘅質素先係重點。佢係香港所有拉麵店之中，係我心目中嘅top 1。我好少會讚到一間拉麵店咁好，亦都花咗好多心機去打呢篇食評，我唔係打手賣廣告，一蚊都無收過，撲一拉麵，你值得的。Hong Kong deserves the best last forever.…Read More

哇，終於食哂lunch menu上我最期待嘅餐喇！大眾所知，珍組比milkmilk介紹完之後，多咗幾多人去食⋯我都唔例外，lunch 平靚正，中環打工仔最愛！之前我都打左唔少珍姐食評，有興趣可以留意下我之前啲post….今次我叫咗個極品封門牛柳豬油撈麵，我仲叫咗個extra beef…結果食唔晒一上到嚟個份量比佢嚇親⋯無乜香味，咁試下佢個麵先，比較淡口，似粥舖果啲粉面咁，以為又豉油又豬油 一定好油膩，吖，又無喎，好乾身喎，但又唔算好香，牛肉先係主角，又淋又有牛味，點少少豉油令到啲牛肉味仲出！用嚟餸麵好夾，可能係唔想啲麵搶哂啲牛肉味，所以先整到啲麵咁淡口？唔知呢，我食哂最期待嘅餐，最好食都係咖喱羊架飯，超好食…Read More

其實意樂餐廳，都開咗好多間分店，坑口呢間都屹立不倒咗好多年，入邊裝修風格非常西式。一入到去，啲職員會用無線電耳機通訊「一位入𡁵嚟」，好似好pro咁！坐位算闊落，下午茶時間無乜人，都幾好坐。今次我就叫咗個pizza食。一上到嚟，個賣相唔錯，個pizza細細份，作為下午茶個份量岩岩好！個流心蛋係個pizza上面朗下朗下好吸引。一切開佢啲蛋汁流哂出嚟，正呀，勁有蛋香味，加埋有少少辣肉腸，好好味😋到凍檸茶喇，百分百集團嘅凍檸茶最巨爭議性架喇，一杯無檸檬嘅凍檸茶，仲算唔算凍檸茶呢，for me…why not?…Read More

又來到午餐時段，喺東港城唔知食咩好，呢間茶飯參少門口咁多人排隊，上次食過一次，都OK，今次再食多一次，睇吓會唔會好似同上次一樣保持水準，我一個人，排咗5分鐘就有位，冷氣足夠。今次我就嗌咗一個金湯酸菜魚片配白飯一嚟到梗係飲吓佢個湯先，酸辣程度正常，老少咸宜，非常之有酸菜味道，佢有豆卜，吸晒啲湯汁，一咬落去好似飲緊湯咁，酸菜魚最緊要梗係個魚，肉質鮮甜，淋到冇牙都食得，用條脷頂一頂都已經鬆化晒，直接吞落肚，當然對比起大陸食嗰啲，咁就梗係輸咗啦，但係香港食到呢個質素都算係咁。…Read More

喧鬧中的一點慰籍今日12點半時段來到，一如既往咁多人排隊，身水身汗，都係想食個靚飯，填飽個肚仔，今次我就叫咗個頭抽豬扒煎蛋飯。賣相唔錯，啲豉油幾正，啲豬扒炸過嚟，但唔會話炸到好乾，食落去都有肉汁，唔錯唔錯！而且側邊，仲有少少脆香，咬落去卜卜聲，啲豬油渣到出晒嚟，勁香口，撈埋少少豉油，用嚟送飯，真係一流，個煎蛋係太陽蛋，一搞開個蛋黃，流晒出嚟，再加少少豉油，太陽蛋加豉油好好撈飯打工仔咁又一餐，有時候打工仔最緊要係快靚正一餐！…Read More

喺將軍澳泳池游完水，勁肚餓，諗唔到食乜，於是上OpenRice搵好嘢食一入到去呢度，門口裝修都OK ，但係門口冇人招呼，我坐低咗喺一個位又要我起身，要我坐第二度咁你一開始唔帶枱？都算啦，食物最重要，我叫咗個OpenRice最多人介紹嘅海南雞飯。個海南雞飯未到之前，佢就送咗一碗冬陰功湯俾我，入邊勁多芫荽，對於一個唔食芫荽嘅人，真係難以接受，我飲咗一啖，酸得滯，而且有芫荽，即刻投降⋯唔緊要啦，個冬陰功湯都唔係主角，海南雞飯先係呀嘛！一上到嚟，仲要係有好多軟骨，雞翼都冇去骨，而且啲皮上面仲有好多毛，超嘔心，雞肉一啲都唔滑，韌到呢！好似走地雞嘅質地咁，而且冇雞味！似係雪咗好耐，所以有少少雪味，都咁多人推薦？個黃薑飯就普通水平，醬汁只有酸辣醬，冇豉油同埋薑蓉。比較單一口味，啲雞肉已經難食，醬汁仲要冇得選擇⋯救命⋯奶茶係普通泰國奶茶，比港式奶茶甜啲，正正常常啦個海南雞飯真係難食，唯有叫多個小食，講個春卷先，係OK嘅，入邊啲餡都夠味，係成餐飯最好食嘅嘢我期待嘅蝦餅係最令我失望，勁粉，feel到麵粉比例超多，不如叫炸麵粉？唔好叫炸蝦餅…Read More

食完晚餐喺尖沙咀搵邊度有糖水啦，真係行過都留意唔到，呢度係樓上舖，大家記得望清楚，唔係就走漏眼裝修屬於清淡風格，坐落去都非常舒服，不過張枱比較細，冇乜地方放置其他物品。好普通:)但芝麻糊不嬲都係普普通通，唔駛咁多花臣，夠溫度，甜味適中。芒果沙冰，都係正常發揮，芒果肉唔酸，成個甜品都好平衡。唔係死甜果隻！而價錢方便正正常常，又唔係話特別抵食，小店嚟講算係咁，尖沙咀收呢個價錢都合理，如果飯後無嘢做，可以一試。…Read More

呢晚約咗幾個兄弟聚聚舊，食吓大排檔咁，一入到去原來係地庫嚟，仲以為好熱，但放心入邊冷氣足夠，就算人多都唔會覺得焗，入面嘅裝修好似舊式大排檔，牆壁貼滿晒招牌菜單，真係有啲似去咗沙田食陳根記嘅感覺。幾個大男人梗係叫返個炒飯食先，打打底。馬拉荔枝炒飯，辣辣地，有少少荔枝肉，雞肉等等炒埋一碟，但越食越辣，為一敗筆就係個雞肉有少少雪藏味⋯不過整體都OK，都有少少鑊氣，呢度加加分。炸大腸，老實講，同其他大牌檔質素不相伯仲，度度都係差唔多㗎喇，所以都冇乜大期望，主要係用嚟送啤酒，不過我鍾意佢夠瘦，好憎大腸入邊好多肥膏，咬極都唔斷好似香口膠咁⋯呢個就唔會啦，佢偏瘦，所以啖啖都脆卜卜。椒鹽鮮魷，四個字，皮薄餡靚，脆粉唔會太多，而且魷魚非常新鮮， 十分爽口，椒鹽方面唔會話太辣，唔會太鹹，味道剛剛好！嚟到主角炸豬手，醃製得非常入味，用嚟送啤酒一流，豬皮炸到脆卜卜，好似薯片咁，一咬就開，毫不拖泥帶水！豬手非常淋，又冇筋，唔怪之得咁貴啦送啤酒非常之適合最後食返個蝦醬炒通菜，炒得好香，唔係死鹹果隻，微辣，為呢餐晚飯畫上句號。…Read More