kmedinning's Profile

餐廳新裝修，環境舒服，仲有一排寬落嘅單人燒肉位，I人想食燒肉都唔使擔心。當日叫左兩個set，再加兩份散叫肉，品項豐富，本身set已經包左韓式小菜同生菜吧任食，仲有主食同湯，份量都足夠。任食韓式小菜同生菜吧乾淨企理，fill野速度好快。食燒肉鐘意配kimchi的話，呢到唔止白菜泡菜，仲有其他幾款選擇，種類算好齊。日和極上盛合（日本極上A5和牛／伊比利黑豚／無骨牛小排／龍躉石斑／蝦）和牛油花睇相都覺得靚，份量剛好過到口癮又唔會濟。龍躉石斑意外地好食，燒到個皮脆，肉質感彈牙，食完想encore。海鮮盛合（龍躉石斑／干貝／魷魚／小鮑魚／北寄貝／鱸魚／蝦）魚類表現仍舊出色，但略嫌小鮑魚真係有啲太小，同埋魷魚燒熟後份量比較少。散叫：蔥燒牛舌強烈推薦要加，$88咁多塊，燒極都仲有！散叫：日本雞頸肉香港少見但去日本食串燒成日都會叫呢個部份，口感爽彈，$38又係抵加。講下啲跟餐嘅餐點，加左$10將湯轉做雪濃牛骨湯，但比較下鐘意免費既海帶湯多啲，清爽唔油膩，同食燒肉夾d。而鐘意蛋撈飯就建議將加$15將主食upgrade做蔥花玉子飯，同和牛勁夾！！…Read More

Cobber noodle and Waffle係觀塘早已出曬名，新開呢間地理位置比較方便，唔使上樓，又近巴士站。個日平日夜晚時間都full house，係而家呢個市道算少有。呢間分店特色之處係只要每人都有叫一客野食就可以享用自助飲品吧。款式都唔係hea，最推薦Grape Earl Grey Tea。🍳牛角包＋黑松露蘑菇湯＋沙律（+$25）🍳明太子忌廉蝦肉三文魚子飛魚子紫蘇意粉呢個係Cobber名物之一，意粉口感好豐富，紫蘇嘅香氣係錦上添花，呢款絕對係穩陣之選。🍳香煎白酒忌廉汁三文魚配煙燻薯蓉三文魚外脆內嫩，白酒忌廉汁同面頭嘅茴香都係帶酸，可以減低三文魚同薯蓉油膩感。🍳蜜糖芥末炸雞炸雞keep到juicy，可以一試。🍳開心果巴斯克芝士蛋糕呢個高質！蛋糕表面鋪滿烘脆嘅開心果，芝士蛋糕中間位置有軟心，開心果味又好濃，意想唔到嘅好食！成餐飯唯一個不滿點係梳化位比較矮同軟，食野時有啲辛苦，但食物質素絕對係有保證。…Read More

喺會展收工同同事想食打冷，餐廳樓底高，坐落舒服，幾啱傾偈 。食物種類好多，我哋揀咗鵝片雙拼，拼大墨魚 。鵝片夠入味，肉質又唔會嚡，比坊間唔少鵝片出色 。大墨魚得比較薄，口感比較失色，有啲可惜，本身味道真係幾好 。20年老菜甫燉豬肚見到20年老菜甫就覺得好特別，深啡色嗰片就係啦 。飲落感覺有啲似鹹少少嘅胡椒豬肚湯，胡椒味都幾突出，天氣涼涼哋飲好舒服 。汕頭煎蠔烙可以話係食潮州嘢必備，呢款比較多透明粉漿，食落有啲似台灣蚵仔煎 。蠔仔夠大粒份量亦都唔少，食到邊位又脆帶點焦香，相當好食。 想食菜就叫個拍蒜鹹豬肉炒菜心，碟菜非常大碟，好足料 。菜心都keep住翠綠同爽脆 ，不失為一道蔬菜嘅好選擇 。睇餐牌嘅時候見芋頭焗飯幾特別，啲餡又蝦米、冬菇、豬肉肉粒、芋頭粒等等 。配搭同感覺有啲似臘味飯，米粒分明，配料令飯鹹香感十足，個人嘅喜歡…Read More

呢間係朋友生日指定想食既蛋糕，收工上去拎，店員都好好咁提醒要盡快放入雪糕。有需要的話，都好建議大家加錢要冰袋，畢竟鮮忌廉好易融。呢個4吋日式士多啤梨朱古力脆米戚風蛋糕，size真係剛剛好，食完晚飯大家影下相同淺嚐。蛋糕外型幾靚，味道整體唔會太甜膩，蛋糕體鬆軟，最鐘意中間個層粉紅色既士多啤梨乳酪mousse，酸甜唔膩。朱古力脆米就主要係為口感方面加分。試過安全牌後，下次會想試特別啲嘅款，例如芋泥爆漿流心 x 斑斕戚風。…Read More

呢輪睇完黑白大廚，就想瘋狂食韓國嘢，睇戲前同friend揀咗呢間特別啲，有香港少見既釜山豬肉飯嘅餐廳試吓。仲有一個鐘就開場，快手揀左釜山豬肉湯飯、釜山豬肉湯麵，同埋醬油蝦意粉。店員放低左一盤韓式前菜，種類都幾豐富，除左常見既泡菜類，仲有炒粉絲、甜蕃薯等。好快就上菜，釜山豬肉湯湯底奶白色，當中有韭菜、娃娃菜、豬肉等。飲落鮮甜得黎幾清，豬肉片有口感，整體有種屋企feel，有別於一般韓國菜又辣又重味既印象。另一款釜山豬肉湯麵，麵質類似上海麵，較軟身，湯底相比起湯飯較淡，個人比較喜歡湯飯。餐牌上最特別係醬油蝦意粉，好奇醬油蝦點樣結合意粉。味道又幾香，食落係醬油咸香加左cream既奶感，意粉質地彈牙。呢個組合創新得黎又幾夾，值得一試。食完就夠鐘睇戲啦，下次去尖沙咀都會想encore湯飯。…Read More

平時好少行過嚟尖東，咁啱今日喺附近做完嘢就食埋飯先走 。呢間餐廳又有雪糕店，又有超市仲有得堂食 。晚餐有三款選擇，揀咗set 1同set 2，每款都有前菜主菜同埋甜品 。🍴雜豆湯份量比一般餐湯多，而且有好多料，分別有唔同嘅豆類同埋有藜麥 。好欣賞佢夠熱，飲落好重黑胡椒味，帶少少辛辣感，今日秋意下飲呢個湯係幾舒服同飽肚 。🍴招牌沙律首先俾個份量嚇親，好少見到套餐附嘅沙律係咁大兜 。沙律有沙律菜、雞蛋、吞拿魚、疑似鯷魚、橄欖、蕃茄乾等等 。整體食落係鹹香，沙律菜亦好爽脆 ，唔錯 。🍴蜆肉意粉啲蜆肉好大粒之餘，保留到蜆肉嘅水份同鮮味 。雖然調味比較清淡，但連埋蒜片食好香，意粉口感亦都煮得好好，意想不到地出色。🍴半隻烤雞烤雞睇落比較乾，食落發現雞皮非常之脆，雞肉除咗胸位有少少嚡之外都可以接受 。側邊嘅烤時蔬同薯仔意外出色，薯仔外脆內軟，仲要好甜。好想encore個薯仔 🍴甜品揀咗一個雪糕一個Lucky cake，雪糕就係門口嗰間Gelato嘅雪糕揀咗開心果味，開心果味香濃，唔會好假，就算係正價$38嚟講都幾抵，但係略嫌面頭灑嘅朱古力針有少少影響口感之餘又增加一份假甜 ，強烈建議請店員唔好加朱古力針 。而Lucky cake我真係食唔出係咩蛋糕，係我從來未食過嘅口感，但味道幾好，配搭上面嗰球雲呢拿味雪糕一齊食都唔錯 。外籍女店員好有禮貌，亦都好細心會幫手換碟 。餐廳睇落平平無奇，食落每樣嘢食都比想像中出色，而且有唔少外國人獨自用餐，睇嚟都幾得外國人歡迎。…Read More

喺Facebook見到人哋推介佢嘅薄荷朱古力奶昔，先知原來MOKO都開咗呢間 。嚟到呢度一定要叫奶昔，今次試萬聖節限定嘅芝麻奶昔 。面頭灑咗好多黑芝麻，飲落唔會太甜，又帶有芝麻嘅香味，值得一試。前菜揀咗taco同埋青口我欣賞佢taco入面嘅一口三文魚，煎得啱啱好，唔會太乾硬，夾埋莎莎醬、牛油果醬、酸忌廉一齊食，成個組合好開胃又好夾 。忌廉藍青口被比下去，側邊兩塊方包烘得好香脆，亦都好重牛油味 。雖然藍青口幾大隻，但藍青口肉質比較實，忌廉汁都唔算太香 。兩款前菜比較之下taco完勝！主食方面，揀咗Carbonara同埋牛扒 。Carbonara麵質al dente，亦都有煙肉同埋蘑菇增加口感 。不過個汁有啲太傑要趁熱食。呢個牛扒之前食過都覺得幾好食，今次一樣冇失望。揀咗五成，配菜有啲薯條同埋烤蔬菜 。牛肉軟腍，薯條炸到好香脆，呢個價錢覺得幾抵食。已經食唔落所以無嗌到好出名嘅pancake，如果唔係都幾想試吓芝麻版本 。下次encore都係會嗌返奶昔、牛扒同埋taco。…Read More

之前係台灣forum都聽過呢間，點諗到會開黎香港。香港一般常見嘅邊爐一係任食，一係散叫。呢到個叫法就好似一個set，有齊肉類、任食自助吧、主食、飲品同甜品。一去到感覺似去左台灣，店員用台妹溫柔腔講解。餐廳環境行日式簡約風，有種café感，幾舒服。平日個lunch set好抵，但社畜只能weekend去食，價錢就取決於揀咩肉。湯底分別揀左石頭湯同老佛爺，前者有好多魷魚乾，似潮汕風味，非常香；老佛爺就係藥膳，屬於入門級嘅藥膳，有香味但無藥材嘅苦。肉類揀左伊比利豬同霜降牛肉眼 。份量都唔少，但有個台灣火鍋常見嘅通病就係切得比較薄。相比之下我鍾意食豬多啲，有啲咬口。出面個自助吧有好多款，連醬汁都有啲特別嘅選擇。醬汁特別啲就有香醋醬，同埋洋蔥粒 。蔬菜方面擺得好整齊企理，竟然有莧菜揀 。其他配料嗰啲特別少少就係蛋餃、豬血糕、甜不辣 ，仲有自己任畢嘅豬肉滑同埋蝦滑 。香港打邊爐多數都係食完唔夠飽再加個烏冬，呢度套餐包埋主食，最特別係蟹膏飯，單食味道唔錯，但同打邊爐有少少唔夾，建議都係揀返烏冬或者王子麵 。飲品出奇地出色，叫咗奶茶同埋鳳梨冰茶，都有出面手搖店嘅質素 。食完仲有一客甜品，推薦焦糖燉蛋 。單睇weekend個價錢吸引力就唔係咁大，如果平日食lunch就非常之抵啦，畢竟還原到台灣風味，特別係湯底選擇同風味試 。…Read More

香港有唔少韓國菜選擇，但中伏機率都幾大㗎 ，變相食嚟食去都係嗰幾間。Outdark我之前都食過幾次，每一次都係食尖沙咀分店 。連店員都係韓國人，店員同店員之間都係講韓文，成個感覺特別道地 。今次嚟覺得最大嘅分別就係以前大排長龍要等lift上樓，但而家直入 🥲 。裝修同之前都一樣，黑孖孖嘅感覺，播住啲韓文歌幾有feel 。黎呢度一定要食炸雞，今次揀咗一半甜辣炸雞一半香蒜蜜糖炸雞 。呢度最特別係會配咗啲薯角等等嘅炸物 ，炸得好香脆，次次都食到好飽 都忍唔任食埋啲薯角 。以前有幾款醬汁可以俾你點，而家就要by request但可惜都係遇唔返好好食嘅香蒜醬 。發現多咗限定嘅水冷麵揀，以前唔識欣賞，早排去完韓國之後真係好鍾意食水冷麵 。冰冰涼涼，配住一啲油膩嘅嘢食真係好夾。呢度除咗水冷麵之外仲可以揀個配菜，我哋就揀咗甜甜地嘅燒牛肉。第一次叫海鮮蔥煎餅，雖然比較油膩，但非常香口惹味 ，配埋個酸酸地嘅醬汁，值得encore。之前同朋友黎係叫馬格利酒，今次唔飲酒就揀咗士多啤梨乳酪，唔會太甜，中規中矩 。…Read More

行過見到A5和牛全日半價，加埋兩個人先五百幾蚊，平時食普通放題打邊爐都要呢啲價錢 。呢個價錢可以試晒全間鋪唔同款嘅牛肉同配料 。鍋底方面唔使加錢可以揀鴛鴦鍋，試咗藥膳鷓鴣湯、酸菜白肉湯 。湯底唔算好濃味，中規中矩。每人包咗杯台式飲品，揀咗杯檸檬愛玉蜂蜜綠茶、荔枝蘆薈紅茶，係出街嗌嘢飲嘅質素，計落又好似再抵左 。最出色係啲牛肉，好多時台式火鍋放題敗筆都係牛肉切得比較薄，食唔出肉嘅質感 。今次叫咗幾款肉都唔會切得太薄，食落有口感 ，同埋會分到每款牛有咩唔同 。A5和牛非常大片，記得唔好淥太耐，雖然唔係靚到入口即溶個隻，但好有滿足感 。霜降牛油花好重，比較軟腍 。牛小排油花比霜降牛再少啲，冇咁易食膩 。出面有大量嘅蔬菜同配料自己揀，仲可以QR code落單。推薦單骨雞翼、鱔片、蝦、萵筍、年糕 。最後好想讚吓啲店員，幾個都好細心同有禮貌，加湯會提我哋小心彈到，又會主動俾多兩對筷子我哋夾生肉，仲會主動俾紙巾 。…Read More

餐廳應該係新開，佔地好大，門口睇落好多人食緊飯，但原來入邊仲有好多位 ，唔使等 。睇餐牌嘅價錢就中規中矩啦，裝修同埋餐具都幾特別。豬頸肉茄子沙律豬頸肉佔大部份，調味都幾有層次 ，唔會好辣但開胃 。店員冇講吓係點食，我估隔離個椰菜應該係當生菜包咁配住食 。不過原棵真係有啲難分黎食，如果可以不如提供椰菜絲。船河（牛筋/牛頸脊/牛丸）有四款麵底揀，我揀咗闊河粉。睇相都見湯底好濃郁，配搭埋枱面嘅辣椒粉就更加惹味 。咁多款配料中最鍾意牛筋，炆到好腍。黃咖喱蟹肉飯呢個雖然有好多蟹肉，但食落有啲失望，黃咖喱汁太甜，亦都唔係好有層次，整體比較普通 。燒原隻魷魚酸辣汁惹味，配埋燒到好香嘅魷魚係冇得輸香茅青檸沙冰大大杯，酸甜平衡得幾好椰青水清甜解辣…Read More

年頭去台灣時已經食過築間打邊爐，係當地好受歡迎 。意外地竟然插旗黎香港開酸菜魚先，而唔係火鍋 。可能知道香港人太鐘意食酸菜魚 😂 。今次我係睇中嘉義砂鍋魚所以黎試，香港好少地方有，但睇台灣節目就形容到砂鍋魚好好食 。好彩餐廳嘅魚係分咗大、中、細份量，想試兩隻味就叫兩個細都OK 。🍲 嘉義砂鍋魚原來係以沙茶醬為底，整體味道好重口味，係香濃沙茶香但唔辣嘅 。有別於酸菜魚用魚片，呢一度係用炸過嘅魚塊 。開頭趁熱食嘅時候魚皮仲係帶脆，魚肉厚實嫩滑，不過就會有啲骨，唔係啖啖肉 。配料方面有紅蘿蔔、娃娃菜、炸過嘅鵪鶉蛋、金菇等。始終呢款比較重口味同油，建議幾個人share一個細嘅砂鍋魚都OK，跟住叫吓其他口味嘅魚食 。🍲酸菜魚手機點餐冇得揀辣度，default嘅酸菜魚係台妹style—好溫柔 。佢同平時大陸style酸菜魚唔同，整體口味平衡啲同埋食落舒服，唔會太酸或者太辣，係襟食嘅酸菜魚 。配料方面有寬粉、金菇、腐竹、木耳等 。💡淨係比較魚嘅話，成餐飯食完總結出比較鍾意酸菜魚，無咁膩可以食多啲 。食台灣嘢點可以冇炸物，叫咗個炸甜不辣同埋鹽酥雞 。甜不辣份量相當多，炸到外皮脆，中間係煙靭，好食 。鹽酥雞就係店員力推，結果都冇失望嘅，中間雞肉仲係好嫩滑，仲有炸九層塔，都算係有完整還原台灣味道。特別值得一提嘅係炸物嘅底部有啲生洋蔥，可以解膩，都幾貼心。🍥柚香蘿蔔上菜時店員話我哋好識揀，因為蘿蔔係自己醃嘅 。淡淡柚子香配埋酸爽嘅蘿蔔，好啱食炸嘢同砂鍋魚嘅時候解膩 。🧋檸檬紅茶雖然冇得調整甜度，只可以少冰 ，兩位飲開走甜嘅都覺得尚可接受 ，茶味都算香濃，但希望遲啲有得走甜 。🍨紅豆仙草仙草質地比較挺身，有仙草嘅甘味，適合食完炸野要下火嘅感覺 。整體全部嘢都唔錯，咁多野食埋單都係400幾 。難得佢有細份魚嘅選擇，下次行過一個人食都得 。…Read More

一上去，就見到佢同時嘅韓國野唔同，環境應該係主力，難怪好多枱都係一班女仔 。野食選擇同一般傳統韓菜唔同，無豆腐湯飯或者石鍋拌飯呢類 。蕃茄韓式辣海鮮湯伴中華麵中華麵嘅質地幾煙韌，傾住計滾耐左都無咩問題 。湯底蕃茄味唔算太濃，屬於清爽型，辣度都唔高 ，大家可以share食 。芝士鐵板泡菜炒五花肉超多芝士😂個爐會加熱至芝士融，記得襯熱食，一凍芝士又會硬返 。酸忌廉炸雞配薯格炸雞啖啖肉，個醬幾fresh，酸酸地配住炸雞都唔膩 。要讚薯格，炸得好香脆 。This summer 好蠢地唔記得攪勻先飲，仲心諗乜咁淡😂酸甜解膩嘅飲品，普普通通 。餐廳以打卡同氣氛為主，食物中規中矩，最推薦炸雞 。…Read More

地點位於尖沙咀中心地帶，但位置都幾隱蔽，一開𨋢門就有啲古色古香 。打邊爐多數都揀鴛鴦鍋，今次試沙嗲拼芫荽皮蛋 。我好少揀沙嗲，呢個好少見地落左好多蝦皮，食落濃郁之餘仲有陣咸香 ，芫荽皮蛋重茜味，兩款湯底都出色 。單骨雞翼餐前小食，炸得好香脆 。水餃入面包左好大隻蝦，皮薄餡靚，將韭菜餃比下去 。丸類正常，墨魚丸出色啲 。安格斯牛拼伊比利豬牛肉肉嫩，輕輕灼幾秒就OK 。響鈴即炸架！浸落湯到仲有滋～嘅聲，口感好脆 。烏冬呢個湯底係絕對要叫個烏冬，超吸湯 。菜盤有油麥菜、生菜、皇帝菜同蕃茄，用芫荽湯底煮可以吸曬啲湯 。打邊爐有個好嘅湯底，真係有加乘效果 。…Read More

兆萬雖然被稱”劣食之塔”，但起碼呢間韓國野ok，餐廳環境樓底夠高，坐得幾舒服。🥗八爪魚沙律醬汁酸酸甜甜幾開胃，但八爪魚就無咩味。🐓半半炸雞揀左大蔥絲雞同辣醬雞，份量上每款味都有4-5件，仲有啲蕃薯條。幾欣賞個雞係嫩同有汁，不過要留意返個辣醬味都幾辣。🍳芝士牛肉蛋卷朋友想叫蛋卷，食落就係預想到既味，芝士量適中唔會太膩。🍛玫瑰牛肉年糕幾有心思，連年糕仲有兩款（條狀同片狀），仲有啲魚糕。如果唔想食辣炒，試下呢款都ok。🐖白切五花腩睇韓劇成日都會食肉包菜，第一次食到。本身以為個肉會好膩，點知用生菜配住食好清爽，口感又好豐富，有驚喜。本身仲想叫個雪冰，可惜太飽了，下次食lunch有機會再試，lunch有折會再抵食啲。地理位置方便，食物水準同賣相都唔差，難怪多好評。…Read More